ഡാർവിന്റെ പരിണാമം – ⭐⭐

image

യുക്തിയില്ലാത്തൊരു പരിണാമ കഥ! ⭐⭐

ലോകപ്രശസ്തനായ ചാൾസ് ഡാർവിന്റെ “ഉത്തമൻ അതിജീവിക്കുന്നു” എന്ന സിദ്ധാന്തം പ്രമേയമാക്കിയ സിനിമകൾ നിരവധിയുണ്ട്. സമൂഹ ജീവിയായ മനുഷ്യൻ നേരിടേണ്ടിവരുന്ന പ്രശ്നങ്ങളെല്ലാം അതിജീവിച്ചു മുൻപോട്ടു പോയവരെയാണ് ഉത്തമർ അഥവാ “സർവൈവൽ ഓഫ് ദി ഫിറ്റെസ്റ്റ്”എന്ന് വിശേഷിപ്പിക്കാവുന്നത്. 

ഓഗസ്റ്റ് സിനിമാസ് നിർമ്മിച്ച്‌ ജിജോ ആന്റണി സംവിധാനം നിർവഹിച്ച ഡാർവിന്റെ പരിണാമത്തിൽ ചർച്ചചെയ്യുന്ന പ്രമേയവും മനുഷ്യൻ നേരിടേണ്ടി വരുന്ന പ്രശ്നങ്ങളെ അതിജീവിക്കുന്നതിനെകുറിച്ചാണ്. ഈ സിനിമയിൽ ഡാർവിൻ എന്ന കേന്ദ്ര കഥാപാത്രത്തെ അവതരിപ്പിച്ചിരിക്കുന്നത് ചെമ്പൻ വിനോദ് ജോസാണ്. അനിൽ ആന്റോ എന്ന സാധാരണക്കാരൻ നേരിടേണ്ടി വരുന്ന ഒരു പ്രശ്നവും അതിനോടുള്ള ചെറുത്തുനിൽപ്പും, അതെല്ലാം അതിജീവിച്ചു മുന്നേറുന്നതുമാണ് ഈ സിനിമയുടെ കഥ. അനിൽ ആന്റോയായി പ്രിഥ്വിരാജ് അഭിനയിച്ചിരിക്കുന്നു. അതിജീവനത്തിനു വേണ്ടി ഡാർവിനും അനിലും തമ്മിലുള്ള പോരാട്ടമാണ് ഡാർവിന്റെ പരിണാമം എന്ന സിനിമ.

പ്രമേയം: ⭐⭐
കേരളത്തിൽ ഒരിടയ്ക്ക് നിരന്തരം സംഭവിച്ചുകൊണ്ടിരുന്ന പട്ടാപകൽ നടക്കുന്ന മോഷണങ്ങളും ഹെൽമെറ്റ്‌ ധരിച്ചു ബൈക്കിൽ വന്നു മാല പൊട്ടിക്കലും കൊട്ടേഷൻ സംഘങ്ങളുടെ ആക്രമണവും സാധാരണ ജനങ്ങളെ എത്രത്തോളം മോശമായി ബാധിക്കുന്നു എന്നത് ഗൗരവമുള്ള വിഷയമാണ്. ഇത്തരത്തിലുള്ള കുറ്റകൃത്യങ്ങൾക്കെതിരെ ഒരു  സാധാരണ പൗരൻ നടത്തുന്ന പ്രതികാരം രസകരമായ സന്ദർഭങ്ങളിലൂടെ അവതരിപ്പിക്കുന്നതാണ് ഈ സിനിമയുടെ പ്രമേയം.

തിരക്കഥ: ⭐⭐
സംവിധായകൻ ജിജോയും മനോജ്‌ നായരും ചേർന്നാണ് ഈ സിനിമയുടെ രചന നിർവഹിച്ചത്. ഈ സിനിമയുടെ പ്രധാന ഘടകം എന്നത്  ഡാർവിൻ എന്ന ഗുണ്ടയുടെ പരിണാമം ആണ്. ഡാർവിൻ ചെയ്ത കുറ്റകൃത്യങ്ങൾ ന്യായികരണമില്ലാത്തതാണ്. അതിനെതിരെ അനിൽ സ്വീകരിച്ച വഴികൾ രസകരമായിരുന്നുവെങ്കിലും അതൊന്നും ഒരു വ്യക്തിയുടെ സ്വഭാവമോ പ്രവർത്തികളൊ മാറ്റം വരുത്തുന്നവയല്ല. നാടിനെ വിറപ്പിക്കുന്ന നാട്ടുകാരുടെ പേടിസ്വപ്നമായ ഡാർവിൻ ഗുണ്ടയുടെ പരിണാമത്തിനു അവിശ്വസനീയമായ കാരണങ്ങളാണ് തിരക്കഥ രചയ്താക്കൾ എഴുതിയിരിക്കുന്നത്. അത് തന്നെയാണ് ഈ സിനിമയുടെ പ്രധാന പോരായ്മകളിലോന്ന്.

സംവിധാനം: ⭐⭐
വി.കെ.പ്രകാശ്‌ ശിഷ്യനായ ജിജോ ആന്റണി സംവിധാനം നിർവഹിച്ച രണ്ടാമത്തെ സിനിമയാണ് ഡാർവിന്റെ പരിണാമം. രസകരമായ കഥാസന്ദർഭങ്ങളെ അതിഭാവുകത്വമില്ലാതെയും വിശ്വസനീയതയോടെയും അവതരിപ്പിച്ച ആദ്യ പകുതി പ്രേക്ഷകരെ ഒന്നടങ്കം ചിരിപ്പിച്ചു. എന്നാൽ, സിനിമയുടെ രണ്ടാം പകുതിയിൽ അവിശ്വസനീയമായ വഴിതിരുവുകളും വിശദീകരണമില്ലാത്ത കഥാസന്ദർഭങ്ങളും മോശം സിനിമയിലേക്കുള്ള പരിണാമമായി മാറി. ഡാർവിൻ ഈ കഥയിലെ നായകനും അനിൽ വില്ലനുമാണന്നും ഈ സിനിമയുടെ തുടക്കത്തിൽ പറയുന്നത്‌. എത്ര ആലോചിച്ചിട്ടും ഡാർവിൻ ചെയ്ത കാര്യങ്ങൾ തെറ്റായിട്ടും അനിൽ ചെയ്ത കാര്യങ്ങൾ ന്യായമായിട്ടുമാണ് തോന്നിയത്. ഇത് നിരൂപകനെന്ന നിലയിലും പ്രേക്ഷകനെന്ന നിലയിലും എനിക്ക് മാത്രം തോന്നിയതുമാകം.

സാങ്കേതികം: ⭐⭐
യുക്തിയെ ചോദ്യം ചെയ്യുന്ന ഈ പരിണാമ കഥ കണ്ടിരിക്കുവാൻ തോന്നുന്ന രീതിയിലാക്കിയത് അഭിനന്ദൻ എന്ന വ്യക്തിയുടെ ചായഗ്രഹണ മികവുകൊണ്ട് മാത്രമാണ്. ഇതിനു വിപരീതമായി സമീപകാലത്ത് കണ്ടത്തിൽ മോശം എന്ന് തന്നെ തോന്നിപ്പിക്കുന്ന രംഗങ്ങളുടെ സന്നിവേശമാണ്‌ വിജയ്‌ ശങ്കർ നിർവഹിച്ചിരിക്കുന്നത്. 10 വർഷങ്ങൾക്കു മുമ്പ് ഡോൺ മാക്സും മറ്റും പരീക്ഷിച്ച ശൈലിയാണ് ഈ സിനിമയ്ക്ക് വേണ്ടി വിജയ്‌ ശങ്കർ സ്വീകരിച്ചത്. ശങ്കർ ശർമ്മ ഈണമിട്ട പാട്ടുകൾ ശ്രദ്ധ നേടിയില്ല. എന്നാൽ പശ്ചാത്തല സംഗീതം സിനിമയിലുടനീളം മികച്ചു നിന്നു. അനൽ അരശ്-അൻപറിവ് ടീമിന്റെ സംഘട്ടനം മികവു പുലർത്തിയില്ല. സംഘട്ടന രംഗങ്ങളെല്ലാം  പുതുമകളൊന്നുമില്ലാതെ പതിവ് രീതിയിൽ അനുഭവപെട്ടു.

അഭിനയം: ⭐⭐⭐
കേബിൾ ടീവി റിപ്പെയർ ജോലി ചെയ്തുവരുന്ന സാധാരണക്കാരന്റെ വേഷത്തിലാണ് പ്രിഥ്വിരാജ് അഭിനയിച്ചിരിക്കുന്നത്. അയാളുടെ കുടുംബത്തെ ബാധിച്ച ഒരു പ്രശ്നവും അതിനെതിരെ നടത്തുന്ന ചെറുത്തുനിൽപ്പും മാനസിക സംഘർഷങ്ങളും തന്മയത്വത്തോടെ അവതരിപ്പിക്കുവാൻ പ്രിഥ്വിയ്ക്ക് സാധിച്ചു. ഗുണ്ടയായ ഡാർവിൻ എന്ന കഥാപാത്രത്തെ മോശമാക്കാതെ അഭിനയിച്ചു ഫലിപ്പിക്കുവാൻ ചെമ്പൻ വിനോദ് ജോസിനും കഴിഞ്ഞു. പുതുമുഖ നായിക ചാന്ദിനി ശ്രീധരൻ ശ്രദ്ധനേടുന്ന അഭിനയം കാഴ്ചവെച്ചു. ഇവരെ കൂടാതെ സൗബിൻ ഷാഹിർ, അരുണ്‍ നാരായണൻ, കോട്ടയം പ്രദീപ്‌, ഷമ്മി തിലകൻ, ഹന്ന റെജി, നന്ദു, ജാഫർ ഇടുക്കി, ബാലു വർഗീസ്‌, മാമുക്കോയ, ധർമജൻ ബോൾഗാട്ടി, സാജിദ് യഹ്യ, സാബു, മുരുകൻ, വിവിത, സേതുലക്ഷ്മി എന്നിവരാണ് പ്രധാന അഭിനേതാക്കൾ.  

വാൽക്കഷ്ണം: ഇത് ഡാർവിന്റെ പരിണാമമോ അതോ അനിലിന്റെ പ്രതികാരമോ?

കഥ, സംവിധാനം: ജിജോ ആന്റണി
നിർമ്മാണം: ഓഗസ്റ്റ് സിനിമാസ്
തിരക്കഥ, സംഭാഷണം: മനോജ്‌ നായർ
ചായാഗ്രഹണം: അഭിനന്ദൻ രാമാനുജം
ചിത്രസന്നിവേശം: വിജയ്‌ ശങ്കർ
സംഗീതം: ശങ്കർ ശർമ്മ
കലാസംവിധാനം: രാജീവ്‌ കോവിലകം
സംഘട്ടനം: അനൽ അരശ്, അൻപറിവ്
വസ്ത്രാലങ്കാരം: സ്റ്റെഫി സേവ്യർ
മേയ്ക്കപ്പ്: അമൽ
ശബ്ദമിശ്രണം: രംഗനാഥ് രവീ
വിതരണം: ഓഗസ്റ്റ് സിനിമ

ഇതു താൻടാ പോലീസ്! – ⭐

image

പോലീസ് ഓഫ്‌ ഡ്യൂട്ടി! ⭐

ഏലത്തൂർ എന്ന മലയോര ഗ്രാമപ്രദേശത്ത് സ്ഥിതി ചെയ്യുന്ന വനിത പോലീസ് സ്റ്റേഷനിൽ ഡ്രൈവർ ജോലിക്കായിയെത്തുന്ന ആദ്യ പുരുഷനാണ് രാമകൃഷ്ണൻ. ഏലത്തൂർ പോലീസ് സ്റ്റേഷനിലെ എസ് ഐ അരുന്ധതി വർമ്മയും ഡ്രൈവർ ആയി ജോലിചെയ്യുന്ന രാമകൃഷ്ണനും ഒരു പ്രത്യേക ദൗത്യത്തിൽ ഏർപ്പെടുന്നു. മെട്രോ റെയിൽ മേധാവിയ്ക്ക് ഭീകരരുടെ വധഭീഷണിയെ തുടർന്ന് സുരക്ഷതിത്വം നൽക്കുക എന്നതാണ് ദൗത്യം. തുടർന്ന് സംഭവിക്കുന്ന കാര്യങ്ങളാണ് തമാശയുടെ മേമ്പൊടിയോടെ അവതരിപ്പിച്ചിരിക്കുന്നത്. രാമകൃഷ്ണനായി ആസിഫ് അലിയും അരുന്ധതിയായി അഭിരാമിയും മെട്രോ  റെയിൽ മേധാവിയായി തമ്പി ആന്റണിയും അഭിനയിച്ചിരിക്കുന്നു.
ഏലൂ ഫിലിംസിന്റെ ബാനറിൽ കെ. ആർ. മണി നിർമ്മിച്ച്‌ മനോജ്‌ പലോടാൻ സംവിധാനം നിർവഹിച്ചിരിക്കുന്ന ഇതു താൻടാ പോലീസ് സിനിമയുടെ ആദ്യ പേര് ഡ്രൈവർ ഓൺ ഡ്യൂട്ടി എന്നായിരുന്നു. സമീപകാലത്തെ ഹിറ്റ്‌ പോലീസ് സിനിമകൾ പോലെ ഈ സിനിമയും ഒരു വിജയമായിതീരട്ടെ എന്ന തോന്നലാകും തമിഴ്-തെലുങ്ക്‌ സിനിമകൾ പോലെ തോന്നിപ്പിക്കുന്ന ഇതു താൻടാ പോലീസ് എന്ന പേര് നൽകുവാൻ കാരണം.

പ്രമേയം: ⭐
പ്രത്യേകിച്ച് പ്രമേയമോ കഥയോ പുതുമകളോ ഒന്നും തന്നെ അവകാശപെടാനില്ലാതെ ഒരു സിനിമയാണ് ഇത് താൻടാ പോലീസ്. ഇത്തരത്തിലുള്ള ഒരു സിനിമ നിർമ്മിക്കാൻ മുൻപോട്ടു വന്ന കെ.ആർ.മണിയെയും, അഭിനയിക്കാൻ തയ്യാറായ അഭിരാമി-ആസിഫ് അലി എന്നിവരെയും ഈ സിനിമയിലേക്ക് ആകർഷിച്ച ഘടകം എന്താണെന്നു മനസ്സിലാകുന്നില്ല.

തിരക്കഥ: ⭐
മാവോയിസ്റ്റ് തീവ്രവാദികളുടെ ഭീഷണിയുള്ള മെട്രോ റെയിൽ മേധാവിയും അദ്ദേഹത്തിന് സുരക്ഷ നൽക്കുന്ന വനിത പോലീസുകാരും ഒരു വശത്ത്‌. ഏലത്തൂർ പോലീസ് എസ്. ഐ അരുന്ധതി വർമ്മയും ആ ഗ്രാമത്തിലെ എം.എൽ.എയും തൊട്ടടുത്ത പോലീസ് സ്റ്റേഷനിലെ എസ്.ഐ.യും തമ്മിലുള്ള ശത്രുതയും മറുവശത്ത്. ഇതിനു മാറ്റുക്കൂട്ടുവാനായി വനിത പോലീസിലെ ചിലർക്ക് രാമകൃഷ്ണനോട് തോന്നുന്ന പ്രേമം, മെട്രോ റെയിൽ മേധാവിയുടെ മകളും രാമകൃഷ്ണനും തമ്മിലുള്ള അടുപ്പം, കുറെ തമാശകളെന്നു തോന്നിപ്പിക്കുന്ന വളിപ്പുകൾ, ഒരു മസാല ഗാനം, ഒരു യുഗ്മ ഗാനം, ക്ലൈമാക്സിൽ ഒരു സംഘട്ടനം, വില്ലന്മാരെ പിടികൂടുന്നു, നായകനും നായികയും ഒന്നിക്കുന്നു. ഇതാണ് ഈ സിനിമയുടെ കഥാസന്ദർഭങ്ങൾ! സംവിധായകൻ മനോജും രഞ്ജിത്തും ചേർന്നൊരുക്കിയ ഈ സിനിമയുടെ തിരക്കഥയും സംഭാഷണങ്ങളും പരിതാപകരം എന്നല്ലാതെ മറ്റൊന്നും പറയുവാനില്ല.

സംവിധാനം: ⭐
മലയോര ഗ്രാമാന്തരീക്ഷം, നാട്ടിൻപുറത്തെ ക്ലീഷേ കഥാപാത്രങ്ങൾ, വനിത പോലീസ് സ്റ്റേഷനിൽ ആദ്യമായി ഒരു പുരുഷൻ ജോലിക്കായി എത്തുമ്പോൾ സംഭവിക്കാവുന്ന കോമാളിത്തരങ്ങൾ, നായകനെ പ്രേമിക്കനായി മാത്രം നടക്കുന്ന ചിരിച്ചു കളിച്ചു നടക്കുന്ന നായിക, വില്ലന്മാരെ ബുദ്ധികൊണ്ട് നേരിടുന്ന കൗശലക്കരനായ നായകൻ, മസാല പാട്ടും നൃത്തവും, ശുഭപര്യവസായിയായ കഥയുടെ അവസാനം തുടങ്ങിയ ചേരുവകൾ ചേർത്താൽ സിനിമ വിജയിക്കുമെന്ന് നിർമ്മാതാവിനെയും അഭിനേതാക്കളെയും വിശ്വസിപ്പിച്ചു എന്ന കാര്യത്തിൽ അഭിമാനിക്കാം മനോജ്‌ പലോടന്. ഇതു താൻടാ ഡയറക്ടർ!

സാങ്കേതികം: ⭐
ഹരി നായരുടെ ചായഗ്രഹണവും സംജിത് ചിത്രസന്നിവേശവും നിർവഹിച്ചിരിക്കുന്നു. സംവിധായകൻ നിർദേശിച്ച രംഗങ്ങൾ പകർത്തി അവയെല്ലാം കോർത്തിണക്കി 2 മണിക്കൂർ സിനിമയാക്കി എന്നലാതെ മറ്റൊന്നും ഹരി നായരും സംജിതും ചെയ്തിട്ടില്ല. പാട്ടെന്നു തോന്നിപ്പിക്കുന്ന ശബ്ദകോലാഹലങ്ങൾ ചിട്ടപെടുത്തിയത് സുമേഷ് പരമേശ്വർ ആണ്. റഫീക്ക് അഹമ്മദ്, സന്തോഷ്‌ വർമ്മ എന്നിവരാണ് ഗാനരചന. പോലീസ് ഉദ്യോഗസ്ഥരുടെ പദവിക്കനുസരിച്ചിട്ടുള്ള യൂണിഫോം നൽകാതിരുന്നത് ഷീബ മണിശങ്കറിന്റെ വസ്ത്രാലങ്കാരത്തിലെ പിഴവുകളിൽ ഉൾപ്പെടുന്നു. പ്രദീപ്‌ രംഗന്റെ മേയ്ക്കപ്പും ചിലയിടങ്ങളിൽ ബോറായി അനുഭവപെട്ടു.

അഭിനയം: ⭐⭐
ആസിഫ് അലി, അഭിരാമി, ജനനി അയ്യർ, സുനിൽ സുഖദ, സുധീർ കരമന, തമ്പി ആന്റണി, ഷാജു ശ്രീധർ, സജിത മഠത്തിൽ, നീന കുറുപ്പ്, ശ്രുതി ലക്ഷ്മി, കൃഷ്ണപ്രഭ എന്നിവരാണ് പ്രധാന അഭിനേതാക്കൾ. അവരവരുടെ കഥാപാത്രങ്ങൾ അഭിനയിച്ചു അവസാനിപ്പിച്ചു എന്നല്ലാതെ മറ്റൊന്നും ചെയ്യുവാനില്ല ഒരു അഭിനേതാവിനും. ഈ നിലവാരമില്ലാത്ത സിനിമകളിൽ എന്തു കാരണത്താലാണ് അഭിനയിക്കുവാൻ മേൽപറഞ്ഞ അഭിനേതാക്കളെ പ്രേരിപ്പിക്കുന്നത്.

വാൽക്കഷ്ണം: ചിത്രീകരണ വേളയിൽ  സംവിധായകനും നിർമ്മാതാവും സാങ്കേതിക പ്രവർത്തകരും അഭിനേതാക്കളും ഓഫ്‌ ഡ്യൂട്ടിയായിരുന്ന ഒരു സിനിമ!

സംവിധാനം: മനോജ്‌ പലോടൻ
നിർമ്മാണം: ഏലു ഫിലിംസ്
രചന: മനോജ്‌-രഞ്ജിത്ത്
ചായാഗ്രഹണം: ഹരി നായർ
ചിത്രസന്നിവേശം: സംജിത്
ഗാനരചന: റഫീക്ക് അഹമ്മദ്, സന്തോഷ്‌ വർമ്മ
സംഗീതം: സുമേഷ് പരമേശ്വർ
വസ്ത്രാലങ്കാരം: ഷീബ മണിശങ്കർ
മേയ്ക്കപ്പ്: പ്രദീപ്‌ രംഗൻ
വിതരണം: ഏലു ഫിലിംസ്