ആദ്യരാത്രി – ⭐️⭐️⭐️

ആദ്യരാത്രി – കുടുംബസമേതം കാണാം ഈ ആദ്യരാത്രി! ⭐️⭐️⭐️

കുടുംബസമേതം സിനിമ കാണാൻ വരുന്ന പ്രേക്ഷകർക്ക് ഇഷ്ടമാകുന്ന രസക്കൂട്ടുകൾ എന്തെല്ലാമാണെന്ന് കൃത്യമായി അറിയാവുന്ന നടനാണ് ബിജു മേനോൻ. കേരളത്തിലെ നാട്ടിൻപുറത്തു നടന്നേക്കാവുന്ന കഥയും, ആ കഥയിൽ പ്രേക്ഷകർക്ക് സുപരിചിതമായ കഥാപാത്രങ്ങളും, നായകന്റെ നിവർത്തികേടുകൊണ്ടു പെട്ടുപോകുന്ന അവസ്ഥകളും, അതുമൂലമുണ്ടാകുന്ന നർമ്മങ്ങളുമൊക്കെ കൂട്ടിയിണക്കിയിതായിരിക്കും ഒട്ടുമിക്ക ബിജു മേനോൻ സിനിമകളുടെയും കഥ. വെള്ളിമൂങ്ങ എന്ന സിനിമയ്ക്ക് ശേഷം ജിബു ജേക്കബും ബിജു മേനോനും ഒന്നിച്ച ആദ്യരാത്രി എന്ന സിനിമയിലും മേല്പറഞ്ഞവയെല്ലാം കോർത്തിണക്കിയിട്ടുണ്ട്.

നവാഗതരായ ഷാരിസ് മുഹമ്മദ് – ജെബിൻ ജോസഫ് ആന്റണി എന്നിവരാണ് ആദ്യരാത്രിയുടെ കഥയും തിരക്കഥയും എഴുതിയത്. പുതുമുഖം സാദിഖ് കബീറാണ് ഛായാഗ്രഹണം. ഒരു ചെറിയ ഇടവേളയ്ക്കു ശേഷം സെൻട്രൽ പിക്ചേഴ്സ് നിർമ്മാണവും വിതരണവും ഒരുമിച്ചു നിർവഹിച്ച സിനിമകൂടിയാണിത്.

പ്രമേയം ⭐️
പുതുമകളൊന്നും അവകാശപ്പെടാനില്ലാത്ത പ്രമേയവും കഥയും ഒരിക്കൽക്കൂടി ഒരു ബിജുമേനോൻ സിനിമയ്ക്ക് കാരണമാകുന്നു. ജന്മനാൽ തരികിട സ്വഭാവമുള്ള ഒരാൾ രാഷ്ട്രീയത്തിലെ പാരവെപ്പുകളെ എങ്ങനെ തരണം ചെയ്തു വിജയിക്കുന്നു എന്നതായിരുന്നു വെള്ളിമൂങ്ങ സിനിമയിലൂടെ പ്രേക്ഷകർ കണ്ടത്. പക്ഷെ, ആദ്യരാത്രി എന്ന സിനിമയുടെ കാര്യത്തിൽ കണ്ടുപരിചയമുള്ള പ്രശ്നങ്ങളായ ഒളിച്ചോട്ടവും പ്രേമം മുടക്കലും കല്യാണം നടത്തിലും ഒട്ടും പുതുമ സമ്മാനിക്കാതെപോയി. കണ്ടുമടുത്ത ഇത്തരം പ്രമേയങ്ങളും കഥകളും കുടുംബ പ്രേക്ഷകർക്ക് ഇഷ്ടമായേക്കുമെന്ന വിശ്വാസമായിരിക്കാം ഒരു പക്ഷെ സംവിധായകൻ ജിബു ജേക്കബിനെയും നായകൻ ബിജു മേനോനെയും നിർമ്മാതാക്കൾ സെൻട്രൽ പിക്ചേഴ്സ്സിനെയും ഈ സിനിമയിലേക്ക് ആകർഷിച്ചത്.

തിരക്കഥ ⭐️⭐️
മുല്ലക്കര എന്ന സാങ്കല്പിക ഗ്രാമത്തിലെ കണ്ണിലുണ്ണിയായ വ്യക്തിയാണ് വിവാഹ ബ്രോക്കർ മനോഹരൻ. നന്മയുള്ള ഒരു മനസ്സും ഒരല്പം തരികിടയും കൈവശമുള്ള മനോഹരൻ എന്ന വിവാഹ ബ്രോക്കറിൻറെ നാട്ടിലുണ്ടാകുന്ന ചില പ്രശ്നങ്ങളും അതിനെ തുടർന്നുണ്ടാകുന്ന സംഭവങ്ങളുമാണ് ആദ്യരാത്രിയുടെ കഥ. ആ നാട്ടുകാർ വെറുമൊരു വിവാഹ ബ്രോക്കറായിട്ടല്ല മനോഹരനെ കാണുന്നത്. നാട്ടുകാരുടെ എല്ലാ പ്രശ്നങ്ങൾക്കും തീർപ്പുകൽപ്പിക്കുന്നതും മനോഹരൻ തന്നെ. മധ്യവയസ്കനായ മനോഹരൻ അവിവാഹിതനാണ്. 20 വർഷങ്ങൾക്കു മുമ്പ് ഒരു വിവാഹത്തിന്റെ അന്ന് പ്രത്യേക സാഹചര്യത്തിൽ ബ്രോക്കർ ആകേണ്ടി വന്ന മനോഹരൻ, അതൊരു തൊഴിലായി സ്വീകരിക്കുന്നു. അയാളുടെ കുടുംബ സുഹൃത്തിന്റെ മകളുടെ വിവാഹവുമായി ബന്ധപെട്ടു അഭിമുഖീകരിക്കേണ്ടി വരുന്ന സംഭവങ്ങളാണ് ആദ്യരാത്രി എന്ന സിനിമയുടെ കഥാസന്ദർഭങ്ങൾ. പ്രവചിക്കാനാവുന്ന കഥാസന്ദർഭങ്ങൾ, നാട്ടിൻപുറത്തെ സ്ഥിരം കഥാപാത്രങ്ങൾ എന്നിവയെല്ലാം ഇന്നത്തെ സിനിമയുടെ വിജയ ഘടകങ്ങൾ ആണെന്നുള്ള വസ്തുത ദൗർഭാഗ്യകരം തന്നെ. മേല്പറഞ്ഞ കുറവുകളുണ്ടെകിലും, ബിജു മേനോനും മനോജ് ഗിന്നസും ചേർന്നുള്ള ചില രംഗങ്ങളിലെ തമാശ നിറഞ്ഞ സംഭാഷണങ്ങൾ ചിരിപ്പിക്കുന്നവയായിരുന്നു. യുക്തിയെ ചോദ്യം ചെയ്യുന്ന കഥാസന്ദർഭങ്ങൾ നിരവധിയുണ്ടെങ്കിലും, സാധാരണ പ്രേക്ഷകന് ഒരുതവണ ചിരിക്കാനും രസിക്കാനുമുള്ള ഘടകങ്ങളെല്ലാം തിരക്കഥയിൽ ചേർക്കുവാൻ ഷാരിസ്-ജെബിൻ സഖ്യം മറന്നില്ല എന്നത് ആശ്വാസകരം.

സംവിധാനം ⭐️⭐️⭐️
കുടുംബപ്രേക്ഷകർ ആരാധകരായുള്ള നടനെ അവർക്കു ഇഷ്ടമാകുന്ന രീതിയിൽ സിനിമയിൽ അവതരിപ്പിക്കുക എന്നത് ബുദ്ധിയുള്ള സംവിധായകനു മാത്രമേ സാധ്യമാകുകയുള്ളൂ. മേല്പറഞ്ഞ ബുദ്ധിയുള്ള സംവിധായകരിൽ ഒരാളാണ് ജിബു ജേക്കബ്. തരികിട കഥാപാത്രങ്ങൾ ഇണങ്ങുന്ന ബിജു മേനോന്റെ മാമച്ചനും, പ്രണയം തന്മയത്വത്തോടെ അവതരിപ്പിക്കുവാൻ കഴിവുള്ള മോഹൻലാലിൻറെ ഉലഹന്നാനും അതിനുദാഹരണങ്ങൾ. കുഞ്ഞാറ്റ എന്ന കഥാപാത്രം അവതരിപ്പിക്കാൻ മനോജ് ഗിന്നസിനെ തിരഞ്ഞെടുത്തത് സംവിധായക മികവ് തന്നെ. എന്നാൽ, നായികയുടെ റോളിൽ അനശ്വര രാജനെ തിരഞ്ഞെടുത്തത് അനിയോജ്യമല്ലാതെ തോന്നുകയും ചെയ്തു. കുട്ടനാടിന്റെ ഗ്രാമീണ പശ്ചാത്തലവും, രസകരമായ തമാശകളും, ബിജു മേനോന്റെ തരികിടകളും, ഇമ്പമുള്ള പാട്ടുകളും രണ്ടേകാൽ മണിക്കൂർ ദൈർഘ്യത്തിൽ കഥപറഞ്ഞ രീതിയും പ്രേക്ഷകരെ രസിപ്പിച്ചിട്ടുണ്ട്. എന്നാൽ മറുവശത്തു, വെള്ളിമൂങ്ങയ്ക്ക് ശേഷം ബിജു മേനോനും ജിബു ജേക്കബും ഒന്നിക്കുന്നു എന്ന അമിത പ്രതീക്ഷ ഒരുപരിധി വരെ സിനിമയ്ക്ക് ദോഷം ചെയ്തിട്ടുമുണ്ട്. വെള്ളിമൂങ്ങയോളം പ്രേക്ഷകരെ രസിപ്പിക്കുന്നിലെങ്കിലും, സമീപകാല ബിജു മേനോൻ സിനിമകളെ അപേക്ഷിച്ചു ഭേദമായ അനുഭവമായിരുന്നു ആദ്യരാത്രി.

സാങ്കേതികം ⭐️⭐️⭐️
കുട്ടനാടൻ ഗ്രാമീണത ഓരോ ഫ്രേയിമിലും ഉൾപ്പെടുത്തുവാൻ ഛായാഗ്രാഹകൻ സാദിഖ് കബീറിന് കഴിഞ്ഞിട്ടുണ്ട്. അജു വർഗീസും അനശ്വര രാജനും പാടിയഭിനയിച്ച ഗാനരംഗത്തിന്റെ ചിത്രീകരണം രസകരമായിരുന്നു. സൂരജ് ഈ എസ് ആണ് ചിത്രസന്നിവേശം നിർവഹിച്ചത്. പ്രേക്ഷരെ ബോറടിപ്പിക്കാതെ രണ്ടേകാൽ മണിക്കൂർ ദൈർഘ്യത്തിൽ കഥ പറയുവാൻ സാധിച്ചത് സന്നിവേശകന്റെ മികവ് തന്നെ. ബംഗളൂരു നഗരത്തിലെ കോളേജിൽ അരങ്ങേറുന്ന സംഭവങ്ങളിൽ ചിലതു ഒഴിവാക്കാമായിരുന്നു. കഥയിൽ പിന്നീട് യാതൊരു ഗുണവുമില്ലാത്തവയായിരുന്നു ആ രംഗങ്ങൾ. ബിജിബാൽ ഈണമിട്ട ഗാനങ്ങൾ കേൾക്കാൻ രസമുള്ളവയായിരുന്നു. ബാഹുബലിയുടെ സ്പൂഫ് ഗാനം ഇതിനോടകം തന്നെ ശ്രദ്ധ നേടി കഴിഞ്ഞിരിക്കുന്നു. അജയൻ മങ്ങാടാണ് കലാസംവിധാനം നിർവഹിച്ചത്. ബ്രോക്കർ മനോഹരന്റെ ജുബ്ബയും മുണ്ടും ബിജു മേനോന് അനിയോജ്യമായ രീതിയിൽ തോന്നി. എന്നാൽ, അനശ്വര രാജനെ ഒരല്പം പ്രായം തോന്നിപ്പിക്കുന്ന തരത്തിലുള്ള വസ്ത്രങ്ങളെങ്കിലും നൽകാമായിരുന്നു. സുനിൽ ജോർജാണ്‌ വസ്ത്രാലങ്കാരം നിർവഹിച്ചത്.

അഭിനയം ⭐️⭐️⭐️
30 വർഷങ്ങൾക്ക് മുമ്പായിരുന്നുവെങ്കിൽ മനോഹരൻ എന്ന കഥാപാത്രം അവതരിപ്പിക്കാൻ ജയറാമും മുകേഷും അനിയോജ്യരായായിരുന്നു. 15 വർഷങ്ങൾക്കു മുമ്പായിരുന്നുവെങ്കിൽ ദിലീപിനും അനിയോജ്യമായ വേഷം തന്നെ. എന്നാൽ ഇപ്പോൾ ഈ കഥാപാത്രം അവതരിപ്പിക്കുവാൻ ബിജു മേനോനല്ലാതെ മറ്റാർക്കും സാധ്യമല്ല. വെള്ളിമൂങ്ങയിലെ മാമച്ചനെ അനുസ്മരിപ്പിക്കുന്ന സ്ഥിരം ബിജു മേനോൻ അഭിനയ ശൈലിയാണ് ഈ സിനിമയിലും അദ്ദേഹം കാഴ്ചവെച്ചതെങ്കിലും, അതൊന്നും പ്രേക്ഷകർക്ക് അരോചകമായി തോന്നിയില്ല എന്നതാണ് ആ നടന്റെ വിജയം. കുഞ്ഞാറ്റ എന്ന കഥാപാത്രത്തെ രസകരമായി അവതരിപ്പിച്ചു പ്രേക്ഷകരെ ചിരിപ്പിക്കാൻ മനോജ് ഗിന്നസിനും സാധിച്ചു. വ്യസ്തതയുള്ള ഒരു കഥാപാത്രത്തെയാണ് അജു വർഗീസ് ഈ സിനിമയിൽ അവതരിപ്പിച്ചത്. നെഗറ്റിവ് കഥാപാത്രമായി പോളി വിത്സണും അഭിനയ മികവ് പുലർത്തി. ഇവരെ കൂടാതെ, അനശ്വര രാജൻ, സർജാനോ ഖാലിദ്, വിജയരാഘവൻ, ബിജു സോപാനം, ചെമ്പിൽ അശോകൻ, ജയൻ ചേർത്തല, അശ്വിൻ ജോസ്, വിനോദ് കെടാമംഗലം, നസീർ സംക്രാന്തി, പ്രസാദ് മുഹമ്മ, ഹരിപ്രശാന്ത്, ശ്രീലക്ഷ്മി, സ്നേഹ ബാബു, ഷൈനി രാജൻ, വീണ നായർ എന്നിവരും ഈ സിനിമയിൽ പ്രധാന കഥാപാത്രങ്ങളെ അവതരിപ്പിച്ചിട്ടുണ്ട്.

വാൽക്കഷ്ണം: ബിജുമേനോൻ സിനിമയിൽ നിന്ന് കുടുംബ പ്രേക്ഷകർ പ്രതീക്ഷിക്കുന്ന വിഭവങ്ങളെല്ലാം ചേർത്ത ആദ്യരാത്രി ഒരുവട്ടം കണ്ടിരിക്കാം.

സംവിധാനം: ജിബു ജേക്കബ്
രചന: ഷാരിസ് മുഹമ്മദ്, ജെബിൻ ജോസഫ് ആന്റണി
നിർമ്മാണം: സെൻട്രൽ പിക്ചേഴ്സ്
ഛായാഗ്രഹണം: സാദിഖ് കബീർ
ചിത്രസന്നിവേശം: ഈ.എസ്.സൂരജ്
സംഗീതം: ബിജിബാൽ
വരികൾ: സന്തോഷ് വർമ്മ, ഡി.ബി. അജിത്കുമാർ
കലാസംവിധാനം: അജയ് മാങ്ങാട്
വസ്ത്രാലങ്കാരം: സുനിൽ ജോർജ്
വിതരണം: സെൻട്രൽ പിക്ചേഴ്സ് റിലീസ്

വികൃതി – ⭐️⭐️⭐️

വികൃതി – വികൃതിയിൽ ഒരല്പം കാര്യം! ⭐️⭐️⭐️

ട്രോളന്മാർ ജാഗ്രതൈ! ഒരു വ്യക്തിയുടെ മാനസിക അവസ്ഥയുടെയോ അയാൾ പറഞ്ഞ വാചകങ്ങളുടെയോ നിജസ്ഥിതി അറിയാതെ എന്തിനെയും പരിഹാസത്തോടെ മാത്രം കാണുന്ന നിങ്ങൾക്കൊരു ഓർമ്മപ്പെടുത്തലാണ് ഈ സിനിമ.

കേരളത്തിൽ നടന്ന ഒരു യഥാർത്ഥ സംഭവത്തെ ആസ്പദമാക്കി ഒരുക്കിയ വികൃതിയിലൂടെ നല്ലൊരു സന്ദേശം സമൂഹത്തിനു നൽകുവാൻ ഈ സിനിമയുടെ അണിയറ പ്രവർത്തകർക്ക് സാധിച്ചു. നമ്മടെ ചുറ്റും നടക്കുന്ന നല്ലതും ചീത്തയുമായ കാര്യങ്ങളെ ആക്ഷേപഹാസ്യരൂപേണ മറ്റുള്ളവരിലേക്കെത്തിക്കുക എന്നത് ഏവരെയും രസിപ്പിക്കുന്ന കാര്യം തന്നെ. അതൊരിക്കലും ഒരു വ്യക്തിയെ അപമാനിക്കുന്ന തരത്തിലാകാതെ ശ്രദ്ധിക്കേണ്ടത് ഇത്തരത്തിലുള്ള ട്രോളുകൾ ഉണ്ടാക്കുന്ന ആളുകൾ തന്നെയാകണം. ട്രോളുകളിലൂടെ പരിഹസിക്കപെടുന്ന കാര്യത്തിന്റെ സത്യാവസ്ഥ എന്തെന്ന് അറിഞ്ഞിട്ടാകണം അത് പരിഹസിക്കപ്പെടേണ്ട കാര്യമാണോ എന്ന നിഗമനത്തിൽ എത്തേണ്ടത്. നിർഭാഗ്യവശാൽ ഇന്നത്തെ സാമൂഹിക മാധ്യമങ്ങളിൽ നടക്കുന്നത് ഒരല്പം ക്രൂരം തന്നെ. അതിനാൽ, എല്ലാ ട്രോളന്മാർക്കും ഈ സിനിമ ഒരു ഓർമ്മപ്പെടുത്തലാകട്ടേ!

സുരാജ് വെഞ്ഞാറമൂടും സൗബിൻ ഷാഹിറും പ്രധാന കഥാപാത്രങ്ങളെ അവതരിപ്പിച്ച വികൃതി സംവിധാനം ചെയ്തത് എംസി ജോസഫ് എന്ന നവാഗതനാണ്. അജീഷ് പി. തോമസാണ് കഥയും തിരക്കഥയും സംഭാഷണങ്ങളും എഴുതിയത്. ആൽബി ഛായാഗ്രഹണവും അയൂബ് ഖാൻ ചിത്രസന്നിവേശവും ബിജിബാൽ പശ്ചാത്തല സംഗീതവും നിർവഹിച്ചിരിക്കുന്നു.

പ്രമേയം ⭐️⭐️⭐️
ഇന്നത്തെ കാലഘട്ടത്തിനും ഈ തലമുറയിലെ കുട്ടികൾക്കും നല്ലൊരു സന്ദേശം നൽകുന്ന ശക്തമായ ഒരു പ്രമേയമാണ് വികൃതിയിലൂടെ ചർച്ചചെയ്യപ്പെടുന്നത്. ഒരു യഥാർത്ഥ സംഭവം സിനിമയ്ക്ക് ഉതകുന്ന കഥയാക്കുക എന്നത് ശ്രമകരമായ കാര്യങ്ങളിൽ ഒന്നാണ്. എല്ലാത്തരം സിനിമകൾ ഇഷ്ടപെടുന്ന പ്രേക്ഷകനും ഈ സിനിമയുടെ കഥയും അതിലൂടെ അവരെ ചിന്തിപ്പിക്കുന്ന വിഷയവും മനസ്സിനെ സ്പർശിക്കുമെന്നു കരുതാം. സാമൂഹിക മാധ്യമങ്ങളിൽ കൊട്ടിഘോഷിക്കപ്പെട്ട സംഭവത്തിന്റെ നിജസ്ഥിതി, സിനിമ എന്ന മാധ്യമത്തിലൂടെ പ്രേക്ഷകരിലേക്ക് എത്തിക്കുവാൻ ശ്രമിച്ച സംവിധായകൻ എംസി ജോസഫിനും ഈ സിനിമയുടെ നിർമ്മാതാക്കളായ എ.ഡി. ശ്രീകുമാർ, ഗണേഷ് മേനോൻ, ലക്ഷ്മി മേനോൻ എന്നിവർക്കും അഭിനന്ദനങ്ങൾ!

തിരക്കഥ ⭐️⭐️⭐️
ഒരു യഥാർത്ഥ സംഭവം സിനിമയാക്കുമ്പോൾ, അവയിൽ ചില കഥാസന്ദർഭങ്ങളും കഥാപാത്രങ്ങളും പ്രേക്ഷകരെ ചിരിപ്പിക്കുവാനും ചിന്തിപ്പിക്കുവാനും ഉൾപ്പെടുത്തേണ്ടി വന്നേക്കാം. അത്തരത്തിൽ എഴുതപെട്ട തിരക്കഥ വിശ്വസനീയമായി പ്രേക്ഷകർക്ക് തോന്നുക എന്നതാണ് എഴുത്തുകാരന്റെ വിജയം. വ്യത്യസ്ത സാമൂഹിക ചുറ്റുപാടിൽ ജീവിക്കുന്ന അപരിചിതരായ രണ്ടു വ്യക്തികളുടെ ജീവിതത്തിൽ നടക്കുന്ന സംഭവങ്ങൾ സിനിമയുടെ ആസ്വാദനത്തിനായി എഴുതപ്പെട്ടവയാണ്. അവരെ തമ്മിൽ ബന്ധിപ്പിക്കുന്ന വിഷയം മാത്രമാണ് യഥാർത്ഥ സംഭവത്തിൽ നിന്നും എഴുതപ്പെട്ടത്. ചില രംഗങ്ങൾ പ്രേക്ഷകരെ ചിരിപ്പിക്കുന്നതും മറ്റുചിലത് ചിന്തിപ്പിക്കുന്നതും ക്‌ളൈമാക്‌സ് രംഗങ്ങൾ കരയിപ്പിക്കുന്നതുമായിരുന്നു. സുപരിചിതമായ സന്ദർഭങ്ങളിലൂടെയാണ് ഈ കഥ വികസിക്കുന്നത് എന്നത് ഒഴികെ മറ്റു കുറവുകളൊന്നും തിരക്കഥയിലില്ല.

സംവിധാനം ⭐️⭐️⭐️
നവാഗതനായ സംവിധായകന്റെ പരിചയക്കുറവൊന്നും എംസി ജോസഫ് എന്ന സംവിധായകനിൽ കണ്ടില്ല. ഓരോ രംഗവും വിശ്വസനീയതയോടെ അവതരിപ്പിക്കുവാൻ ജോസഫിന് കഴിഞ്ഞിട്ടുണ്ട്. പ്രേക്ഷകരുടെ മനസ്സിനെ സ്പർശിക്കുന്ന ചില രംഗങ്ങൾ കയ്യടക്കത്തോടെ അവതരിപ്പിക്കുവാൻ സംവിധായകന് സാധിച്ചു. കഥാപാത്രങ്ങൾക്ക് അനിയോജ്യരായ അഭിനേതാക്കളെ തിരഞ്ഞെടുത്തതും സിനിമയ്ക്ക് ഗുണകരമായിട്ടുണ്ട്. സുരാജ് വെഞ്ഞാറമൂടും സൗബിനും പൂർണ്ണമായി യോജിക്കുന്ന കഥാപാത്രങ്ങളാണ് സംവിധായകൻ നൽകിയത്. ഈ സിനിമയുടെ വിജയഘടകങ്ങളിൽ പ്രധാനപെട്ടതാണ് സൂരജ് വെഞ്ഞാറമൂടും സൗബിനും അവതരിപ്പിച്ച കഥാപാത്രങ്ങൾ. ചില രംഗങ്ങൾക്ക് അതർഹിക്കുന്നതിലും ദൈർഘ്യം നൽകി വലിച്ചുനീട്ടി എന്നതൊഴികെ ആദ്യ സിനിമ സംരംഭം വിജയകരമാക്കുവാൻ എംസി ജോസഫിന് സാധിച്ചു.

സാങ്കേതികം ⭐️⭐️
ആൽബി പകർത്തിയ ദൃശ്യങ്ങൾ യാതൊരു പുതുമയും അവകാശപ്പെടാനില്ലാത്തവ ആയിരുന്നു. അയൂബ് ഖാൻ നിർവഹിച്ച സന്നിവേശവും ശരാശരിയൊലൊതുങ്ങി. ബിജിബാൽ ഈണമിട്ട പാട്ടുകൾ തരക്കേടില്ലാത്തവയായിരുന്നു. സന്തോഷ് വർമ്മ, ഷാഹുൽ മേഴത്തൂർ എന്നിവരാണ് ഗാനരചയ്താക്കൾ. ബിജിബാൽ തന്നെയാണ് പശ്ചാത്തല സംഗീത സംവിധാനവും നിർവഹിച്ചത്. ചില രംഗങ്ങളിൽ പശ്ചാത്തല സംഗീതം മികവ് പുലർത്തി. സുജിത് രാഘവ് കലാസംവിധാനവും സമീറ സനീഷ് വസ്ത്രാലങ്കാരവും അമൽ ചന്ദ്രൻ ചമയവും നിർവഹിച്ചു.

അഭിനയം ⭐️⭐️⭐️
സമീപകാലത്തിറങ്ങിയ മലയാള സിനിമകളിൽ സുരാജ് വെഞ്ഞാറമൂടിന്റെ ഏറ്റവും മികച്ച അഭിനയ മുഹൂർത്തങ്ങൾ കണ്ടത് വികൃതിയിലായിരിക്കും. സംസാര ശേഷിയില്ലാത്ത എൽദോ എന്ന കഥാപാത്രമായി അക്ഷരാർത്ഥത്തിൽ ജീവിക്കുകയായിരുന്നു സുരാജ്. ക്‌ളൈമാക്‌സ് രംഗത്തിലെ അഭിനയം പ്രേക്ഷരുടെ കണ്ണുനനയിപ്പിക്കുന്ന രീതിയിലായിരുന്നു. ഇതിലും മികച്ച രീതിയിൽ നിസ്സയകാവസ്ഥ അഭിനയിച്ചു ഫലിപ്പിക്കാൻ മറ്റാർക്കും സാധിക്കില്ല എന്നൊരിക്കൽ കൂടി സുരാജ് തെളിയിച്ചു. സമീർ എന്ന കഥാപാത്രത്തെ കയ്യടക്കത്തോടെ അവതരിപ്പിക്കുവാൻ സൗബിനും സാധിച്ചു. ചില രംഗങ്ങളിൽ പക്വതയില്ലാത്തവനായും മറ്റു ചിലതിൽ ഭീരുവായും സിനിമയുടെ രണ്ടാം പകുതിയിൽ സംഘർഷം നിറഞ്ഞ അവസ്ഥയുമെല്ലാം മികവോടെ സൗബിൻ അവതരിപ്പിച്ചു. സൗബിന്റെ അമ്മയുടെ റോളിൽ അഭിനയിച്ച ഗ്രെയ്‌സി എന്ന നടിയും മികച്ച അഭിനയം കാഴ്ചവെച്ചു. ഇവരെ കൂടാതെ ബാബുരാജ്, ജാഫർ ഇടുക്കി, സുധി കൊപ, മാമുക്കോയ, സുരഭി ലക്ഷ്മി, വിൻസി അലോഷ്യസ്, ഭഗത് മാനുവൽ, ഇർഷാദ്, മേഘനാഥൻ, സുധീർ കരമന, ബാലു വർഗീസ്, മറീന മൈക്കൽ, റിയ സാറാ, അദിതി മനോജ്, പോളി വിത്സൺ, ബിനീഷ് ബിൻസൺ എന്നിവരും പ്രധാന കഥാപാത്രങ്ങളെ അവതരിപ്പിച്ചു.

വാൽക്കഷ്ണം: വിനോദോപാദിയായി സിനിമയെ സമീപിക്കുന്ന ഒരു സാധാരണ മലയാള സിനിമ പ്രേക്ഷകന് ഇഷ്ടമാകുന്ന ചേരുവകളെല്ലാം ഉൾപ്പെടുത്തിയ നല്ലൊരു കുടുംബചിത്രമാണ് വികൃതി.

സംവിധാനം: എംസി ജോസഫ്
രചന: അജീഷ് പി. തോമസ്
നിർമ്മാണം: എ. ഡി. ശ്രീകുമാർ, ഗണേഷ് മേനോൻ, ലക്ഷ്മി വാര്യർ
ഛായാഗ്രഹണം: ആൽബി
സന്നിവേശം: അയൂബ് ഖാൻ
സംഗീതം: ബിജിബാൽ
ഗാനരചന: സന്തോഷ് വർമ്മ, ഷാഹുൽ മേഴത്തൂർ
കലാസംവിധാനം: സുജിത് രാഘവ്
ചമയം: അമൽ ചന്ദ്രൻ
വസ്ത്രാലങ്കാരം: സമീറ സനീഷ്
വിതരണം: സെഞ്ച്വറി ഫിലിംസ്

ജല്ലിക്കട്ട് – ⭐️⭐️⭐️⭐️

ജല്ലിക്കട്ട് – മഹിഷവും മനുഷ്യനും ⭐️⭐️⭐️⭐️

ഇരുകാലികൾ കൊലയാളികളാകുമ്പോൾ സ്വയരക്ഷാർത്ഥം ഓടുന്ന ഒരു നാൽക്കാലിയുടെ അതിജീവനത്തിന്റെ പോരാട്ടമാണ് ജല്ലിക്കട്ട്.

ജല്ലിക്കട്ട് എന്ന സിനിമ എല്ലാവർക്കും ഇഷ്ടപെടുന്ന സിനിമയായിരിക്കില്ല. പക്ഷെ, സിനിമ കണ്ടിറങ്ങുന്ന പ്രേക്ഷരെല്ലാം സംവിധായകനെയും ഛായാഗ്രാഹകനെയും നമിക്കുമെന്നുറപ്പ്!

പ്രമേയം ⭐️⭐️⭐️⭐️
മനസാക്ഷി നഷ്ടപ്പെട്ടുകൊണ്ടിരിക്കുന്ന മനുഷ്യർ എന്ന ഇരുകാലികൾക്കു നേരെ വിരൽചൂണ്ടുന്ന അതിശക്തമായതും കാലിക പ്രസക്തിയുള്ളതുമായ ഒരു പ്രമേയമാണ് എസ്. ഹരീഷ് എന്ന എഴുത്തുകാരന്റെ ഭാവനായാൽ എഴുതപെട്ട മാവോയിസ്റ്റ് എന്ന ചെറുകഥ. സ്വാർത്ഥ ലാഭങ്ങൾക്കു വേണ്ടി കുറെ മനുഷ്യർ ഒരു പോത്തിനെ വേട്ടയാടുന്നതും, ആ പോത്ത് അതിന്റെ ജീവൻ രക്ഷിക്കാനായി നടത്തുന്ന പോരാട്ടവുമാണ് ഈ സിനിമയുടെ കഥ. ഇത്തരത്തിലുള്ള ഒരു പ്രമേയവും ആ പ്രമേയം അവതരിപ്പിക്കാൻ തിരഞ്ഞെടുത്ത കഥയും മലയാള സിനിമയിൽ ഇതാദ്യം. ടോറോന്റോ ഫിലിം ഫെസ്റ്റിവലിലും ബുസാൻ ഫിലിം ഫെസ്റ്റിവലിലും ലണ്ടൻ ഫിലിം ഫെസ്റ്റിവലിലും ഈ വർഷം പ്രദർശിപ്പിച്ചു പ്രേക്ഷകരുടെ കയ്യടി നേടിയ സിനിമകളിൽ ഒന്നാണിത്. ആസ്വാദന ചേരുവകൾ ഇല്ലാത്ത സിനിമകൾ നിരാകരിക്കുന്ന പ്രേക്ഷകർ ഈ സിനിമയെ വിമർശിക്കുമെങ്കിലും, ഈ സിനിമ സംവാദിക്കുന്ന വിഷയം മനസ്സിലാക്കുകയെങ്കിലും വേണമെന്ന് അണിയറപ്രവർത്തകർ ആഗ്രഹിക്കുന്നതുകൊണ്ടാണ് ഈ സിനിമ തിയറ്ററുകളിൽ പ്രദർശനത്തിനെത്തിയത്.

തിരക്കഥ ⭐️⭐️⭐️⭐️
കേരള സാഹിത്യ അക്കാദമി പുരസ്കാരം നേടിയ എഴുത്തുകാരനാണ് എസ്. ഹരീഷ്. ഹരീഷും ആർ. ജയകുമാറും ചേർന്നാണ് ജല്ലിക്കട്ടിന്റെ തിരക്കഥയും സംഭാഷണങ്ങളും എഴുതിയത്. ഈ സിനിമയുടെ കഥയോട് നൂറു ശതമാനം നീതിപുലർത്തുന്ന ഒന്നാണ് ഓരോ കഥാസന്ദർഭങ്ങളും കഥാപാത്രങ്ങളും സംഭാഷണങ്ങളും. കേരളത്തിലെ മലയോര ഗ്രാമപ്രദേശമായ കട്ടപ്പനയിലെ മനുഷ്യരുടെ ജീവിതചര്യകൾ കൃത്യമായി നിരീക്ഷിച്ചതിനു ശേഷമാണ് ഈ സിനിമയിലെ സന്ദർഭങ്ങളും സംഭാഷണങ്ങളും എഴുതിയത് എന്ന് കരുതേണ്ടിയിരിക്കുന്നു. കാരണം, അവയോരോന്നും അത്രമേൽ വിശ്വസനീയമായിരുന്നു. ഓരോ കഥാപാത്രങ്ങളും എന്ത് ഉദ്ദേശത്തോടെയാണ് പാവം നാൽക്കാലിയെ വേട്ടയാടാൻ തീരുമാനിക്കുന്നത് എന്നതാണ് ഈ സിനിമയിലെ ആദ്യ പകുതിയിലെ രംഗങ്ങൾ. വർക്കി(ചെമ്പൻ വിനോദ്) എന്ന കശാപ്പുകാരന്‍റെ ജീവിതമാർഗമാണെങ്കിൽ, ആന്റണി(ആന്റണി വർഗീസ് പെപ്പെ) എന്ന ചെറുപ്പക്കാരന് അയാളുടെ പ്രണയസാഫല്യം എന്നതാണ് ലക്ഷ്യം. കുട്ടിച്ചൻ എന്ന വേട്ടക്കാരന് തന്റെ പ്രതികാരമാണ് നടപ്പിലാക്കേണ്ടതെങ്കിൽ, ആ നാട്ടിലെ ജനങ്ങൾക്ക് അവരുടെ കൃഷിയിടങ്ങളും മുതലും മറ്റും നഷ്ടപ്പെട്ടതിന്റെ പകയും. ആ പരിശ്രമത്തിനൊടുവിൽ എന്ത് സംഭവിക്കുന്നു എന്നതാണ് സിനിമയുടെ രണ്ടാം പകുതിയും ക്‌ളൈമാക്‌സും. എസ്. ഹരീഷിനും ആർ. ജയകുമാറിനും അഭിനന്ദനങ്ങൾ!

സംവിധാനം ⭐️⭐️⭐️⭐️
മലയാള സിനിമയെ ലോകോത്തര നിലവാരത്തിലേക്കു ഉയർത്തിയ സംവിധായകരിൽ ഒരാളാണ് ലിജോ ജോസ് പെല്ലിശ്ശേരി. ഈ.മ.യൗ.വും ജല്ലിക്കട്ടും അതിനുദാഹരണങ്ങൾ. ഓരോ കഥാസന്ദർഭങ്ങളും അതർഹിക്കുന്ന ആഴത്തിൽ ചിത്രീകരിക്കുക, ഓരോ കഥാപാത്രങ്ങളും നമ്മുടെ കൺമുമ്പിൽ നിൽക്കുന്നത് പോലെ അനുഭവപ്പെടുത്തുക, ഓരോ രംഗങ്ങൾക്കും അർഹിക്കുന്ന വേഗത നൽകുക, ബുദ്ധിജീവികൾ മുതൽ സാധാരണ പ്രേക്ഷകനെ വരെ ഒരേ സമയം ചിന്തിപ്പിക്കുകയും നൊമ്പരപെടുത്തുകയും ചെയ്യുക എന്നത് അസാമാന്യ കഴിവുള്ള ഒരു പ്രതിഭയ്ക്ക് മാത്രം സാധ്യമാകുന്ന ഒന്നാണ്. ആസ്വാദനത്തിനുള്ള ഘടകങ്ങൾ ഒന്നും തന്നെ ഈ സിനിമയിലില്ല എങ്കിലും, ഒരു നിമിഷം പോലും പ്രേക്ഷകനെ ഈ സിനിമ ബോറടിപ്പിക്കുന്നില്ല. ഇതുവരെ കണ്ടുപരിചതമല്ലാത്ത ചിത്രീകരണരീതി, ഇതുവരെ സുപരിചതമല്ലാത്ത ഫ്രയിമുകൾ, കഥ നടക്കുന്ന സ്ഥലത്തു ഓരോ പ്രേക്ഷകനും നിൽക്കുന്നു എന്ന തോന്നൽ ഉളവാക്കുന്ന ശബ്ദസംവിധാനം, ഓരോ അഭിനേതാക്കളും ജീവിക്കുകയാണ് എന്ന രീതിയിലുള്ള പ്രകടനം എന്നിവയെല്ലാം കൃത്യതയോടെ സമന്വയിപ്പിച്ച കഴിവുറ്റ സംവിധാന രീതിയാണ് ലിജോ ജോസ് പെല്ലിശേരിയുടേത്. ദേശീയ തലത്തിലും അന്താരാഷ്ട്ര തലത്തിലും ശ്രദ്ധ നേടാവുന്ന ഒരു സിനിമയായിരിക്കും ജല്ലിക്കട്ട് എന്നുറപ്പ്!

സാങ്കേതികം ⭐️⭐️⭐️⭐️
ഗിരീഷ് ഗംഗാധരന്റെ വിഷ്വൽ മാജിക് അനുഭവിച്ചറിയണമെങ്കിൽ ജല്ലിക്കട്ട് തിയറ്ററിൽ തന്നെ കാണേണ്ടിവരും. പുതുമയാർന്ന ഫ്രേയിമുകളും ദൈർഘ്യമേറിയ ഷോട്ടുകളും അതിസാഹസമായ ആങ്കിളുകളും രാത്രി രംഗങ്ങളിലെ ലൈറ്റിങ് രീതികളും ഈ സിനിമയുടെ പ്രധാന സവിശേഷതകളാണ്. പോത്തിന്റെ പുറകെ ജനങ്ങൾ ഓടുന്ന രംഗങ്ങൾ അതിഗംഭീരമായി ചിത്രീകരിക്കാൻ ഗിരീഷ് ഗംഗാധരൻ എടുത്ത പ്രയത്നം അഭിനന്ദനാർഹമാണ്. ഓരോ രംഗവും പ്രേക്ഷകർ നേരിട്ട് കാണുന്ന തരത്തിലാണ് ഗിരീഷ് ചിത്രീകരിച്ചിരിക്കുന്നത്. ദേശീയ തലത്തിൽ നിരവധി അംഗീകാരങ്ങൾ ഈ വർഷം ഗിരീഷിനെ തേടിയെത്തുമെന്നുറപ്പ്! പ്രേക്ഷകരിൽ ആകാംഷ ജനിപ്പിക്കുന്നതിൽ ദീപു ജോസഫ് എന്ന ചിത്രസന്നിവേശകൻ വഹിച്ച പങ്ക് ചെറുതല്ല. ഇത്തരത്തിലുള്ള ഒരു കഥ ആവശ്യപ്പെടുന്ന ചടുലത സിനിമയിലുടനീളം കാണപ്പെട്ടു. രംഗനാഥ് രവി നിർവഹിച്ച ശബ്ദ സംവിധാനം മികവ് പുലർത്തി. ഒരു മലയോര ഗ്രാമപ്രദേശത്തെ രാത്രികാലങ്ങളിൽ കേൾക്കുന്ന ഓരോ ശബ്ദങ്ങളും സൂക്ഷ്മമായ നിരീക്ഷണത്തിലൂടെ ഈ സിനിമയിൽ ചേർക്കുവാൻ രംഗനാഥ് രവിക്ക് സാധിച്ചു. ഒരേ സമയം ഭീതി ജനിപ്പിക്കുന്നതും ത്രസിപ്പിക്കുന്നതുമായ പശ്ചാത്തല സംഗീതം നൽകാൻ പ്രശാന്ത് പിള്ളക്കും സാധിച്ചു. ആൾക്കൂട്ടങ്ങളുള്ള രംഗങ്ങളിലെ ഡബ്ബിങ് ഒരു പോരായ്മായി കാണപ്പെട്ടു. അഭിനേതാക്കൾ സംസാരിക്കുന്നുണ്ടെങ്കിലും അവയൊന്നും ശ്രവ്യമാകാതെ വെറും ചുണ്ടനക്കം മാത്രമായി തോന്നുകയായിരുന്നു.

അഭിനയം ⭐️⭐️⭐️⭐️
അഭിനയ പ്രാധാന്യമുള്ള മുഹൂർത്തങ്ങൾ ഈ സിനിമയില്ലെങ്കിലും, ഓരോ കഥാപാത്രവും അവതരിപ്പിച്ച പ്രമുഖ നടന്മാരും പുതുമുഖങ്ങളും അവരവരുടെ റോളുകൾ തന്മയത്വത്തോടെ അവതരിപ്പിച്ചു. ചെമ്പൻ വിനോദും ആന്റണി വർഗീസും സാബുമോൻ അബുസമദും(തരികിട സാബു) ജാഫർ ഇടുക്കിയും ശാന്തി ബാലകൃഷ്ണനും ജയശങ്കറും ഒഴികെ മറ്റെല്ലാം പുതുമുഖങ്ങളാണ് അഭിനയിച്ചത്. പുതുമുഖ നടീനടന്മാരെ അഭിനയിപ്പിക്കാനുള്ള ലിജോ ജോസ് പെല്ലിശ്ശേരിയുടെ കഴിവ് അങ്കമാലി ഡയറീസിലും ഈ.മ.യൗ വിലും പ്രേക്ഷകർ കണ്ടതാണ്. ഇത്രയേറെ ആളുകളെ സംഭാഷണങ്ങൾ തെറ്റാതെ അഭിനയിപ്പിച്ചെടുക്കുക എന്നത് പരിശ്രമം നിറഞ്ഞ കാര്യം തന്നെ. ചില രംഗങ്ങളുടെ ദൈർഘ്യം 3ഉം 4ഉം മിനിറ്റുകളാണ്. അവയിൽ പലതിലും ദൈർഘ്യമുള്ള സംഭാഷണങ്ങൾ ഉള്ളതുമാണ്.

വാൽക്കഷ്ണം: മലയാള സിനിമ പ്രേക്ഷകർ ഇന്നോളം കണ്ടിട്ടില്ലാത്ത അവതരണ മികവും ദൃശ്യഭംഗിയും നൽകി ജല്ലിക്കട്ട് ഒരുക്കിയതിനു ലിജോ ജോസ് പെല്ലിശ്ശേരിക്കും ഗിരീഷ് ഗംഗാധരനും ബിഗ് സലൂട്ട്!

സംവിധാനം: ലിജോ ജോസ് പെല്ലിശ്ശേരി
കഥ: എസ്. ഹരീഷ്
തിരക്കഥ: എസ്. ഹരീഷ്, ആർ. ജയകുമാർ
നിർമ്മാണം: തോമസ് പണിക്കർ, ലിജോ ജോസ്, ചെമ്പൻ വിനോദ്
ഛായാഗ്രഹണം: ഗിരീഷ് ഗംഗാധരൻ
ചിത്രസന്നിവേശം: ദീപു ജോസഫ്
പശ്ചാത്തല സംഗീതം: പ്രശാന്ത് പിള്ള
കലാസംവിധാനം: ഗോകുൽ ദാസ്
വസ്ത്രാലങ്കാരം: മാഷർ ഹംസ
ചമയം: റോണക്സ് സേവ്യർ
ശബ്ദ സംവിധാനം: രംഗനാഥ് രവീ
ശബ്ദ മിശ്രണം: കണ്ണൻ ഗണപത്
സംഘട്ടനം: സുപ്രീം സുന്ദർ
വിതരണം: ഫ്രൈഡേ ഫിലിം ഹൌസ്.

ഗാനഗന്ധർവ്വൻ – ⭐️⭐️

ഗാനഗന്ധർവ്വൻ – അപ്രസക്തമായ ഗാന്ധർവ്വകഥ! ⭐️⭐️

“ഞാൻ ചെയ്യുന്ന സിനിമകളിലെ എന്റെ കഥാപാത്രത്തിന്റെ ജോലി മാത്രമാണ് വ്യത്യസ്തമാകുന്നത്, കഥ ഒന്നു തന്നെയാണ്”. ഗാനഗന്ധർവ്വൻ എന്ന സിനിമയുമായി ബന്ധപെട്ടു നടന്ന ഒരു അഭിമുഖ സംഭാഷണത്തിൽ മമ്മൂട്ടി പറഞ്ഞ ഒരു വാചകമാണിത്. അദ്ദേഹം പറഞ്ഞ വാചകം അക്ഷരാർത്ഥത്തിൽ സത്യം തന്നെ. മമ്മൂട്ടിയുടെ തന്നെ മുൻകാല സിനിമകളായ സന്ദർഭവും, വേഷവും, ബസ് കണ്ടക്റ്ററും പോലെ തന്നെ നന്മയുള്ള ഒരു മനുഷ്യൻ വീട്ടുകാരാലും നാട്ടുകാരാലും തെറ്റുധരിക്കപ്പെടുന്നതു തന്നെയാണ് ഗാനഗന്ധർവ്വന്റെയും കഥാതന്തു.

പഞ്ചവർണ്ണതത്ത എന്ന സിനിമയ്ക്ക് ശേഷം രമേശ് പിഷാരടി സംവിധാനം നിർവഹിച്ച ഗാനഗന്ധർവ്വൻ നിർമ്മിച്ചത് ആന്റോ ജോസഫ്, ശ്രീലക്ഷ്മി, ശങ്കർ രാജ് എന്നിവർ ചേർന്നാണ്. മമ്മൂട്ടിയെ കൂടാതെ വമ്പൻ താരനിര തന്നെ ഈ സിനിമയിലെ ചെറുതും വലുതുമായ കഥാപാത്രങ്ങളെ അവതരിപ്പിച്ചിട്ടുണ്ട്. അഴഗപ്പൻ ഛായാഗ്രഹണവും, ലിജോ പോൾ സന്നിവേശവും, ദീപക് ദേവ് സംഗീത സംവിധാനവും നിർവഹിച്ചിരിക്കുന്നു.

പ്രമേയം ⭐️
സഹജീവികൾക്ക് വേണ്ടി സ്വന്തം ജീവിതവും കുടുംബവും മറന്നു ഉപകാരവും ത്യാഗവും ചെയ്യുന്ന ഇട്ടിമാണിമാരും ഗന്ധർവ്വൻമാരും നായകന്മാരാകുന്ന കാലഘട്ടമാണിത്. നായകനെ നന്മമരമായി അവതരിപ്പിക്കുക എന്ന പ്രമേയത്തിൽ വീണ്ടുമൊരു സിനിമ. ഇത്തരത്തിലുള്ള പ്രമേയങ്ങളിൽ എന്ത് പുതുമയാണ് രമേശ് പിഷാരടിക്കും ഹരി പി. നായരിനും തോന്നിയത് എന്ന് മനസ്സിലാകുന്നില്ല. പറഞ്ഞു പഴകിയ സംഭവങ്ങളായ സാധാരണക്കാരന്റെ ദുരിതം, പണത്തിനോടുള്ള പ്രലോഭനം, നായകനു പറ്റുന്ന ചതി, കുടുംബത്തിന്റെ തെറ്റുധാരണ, കഥാവസാനം നായകനെന്ന നന്മമരത്തെ തിരിച്ചറിയുക തുടങ്ങിയവയാണ് ഈ സിനിമയിലും കാണപ്പെടുന്നത്.

തിരക്കഥ ⭐️⭐️
കലാസദൻ എന്ന ഗാനമേള ട്രൂപ്പും, ട്രൂപ്പിലെ ഗായകരും അവരുടെ ജീവിതത്തിലെ കഷ്ടപ്പാടുകളും ഉൾപ്പെടുത്തിയ കഥാസന്ദർഭങ്ങളാണ് ഈ സിനിമയുടെ ആദ്യ പകുതിയിലെ രംഗങ്ങൾ. അവയിൽ ഒട്ടുമിക്ക രംഗങ്ങളും ചില കഥാപാത്രങ്ങളും സിനിമയുടെ കഥാഗതിയിൽ യാതൊരു പ്രാധാന്യവും അർഹിക്കാത്തവ ആയിരുന്നു. ഉല്ലാസിന്റെ അയല്പക്കത്തെ വീട്ടിലെ ഫിസിക്സ് ടീച്ചറും അവരുടെ ഫിസിക്സ് തിയറികളും, ദേവനും സോഹൻ സീനുലാലും ഉൾപ്പെട്ട രംഗങ്ങൾ, ഗായകരുടെ ഫോട്ടോസ് എടുക്കുന്ന രംഗങ്ങൾ എന്നിവയെല്ലാം ഉദാഹരണങ്ങൾ. ആദ്യ പകുതിയേ അപേക്ഷിച്ചു ഈ സിനിമയുടെ കഥയോട് നീതിപുലർത്തുന്നവയായിരുന്നു രണ്ടാം പകുതിയിലെ രംഗങ്ങൾ. ജയിലിലെ രംഗങ്ങളും, കോടതി മുറിയിലെ രംഗങ്ങളും വാദങ്ങളും, ഉല്ലാസിന്റെ മകൾ വീട്ടിലേക്കു വരുന്ന രംഗവും മികവ് പുലർത്തി. സങ്കീർണ്ണമായ അവസ്ഥയിലൂടെ പോകുന്ന സന്ദർഭങ്ങൾ ആണെങ്കിലും, ചില സംഭാഷണങ്ങൾ ചിരിയുണർത്തുന്നവ ആയിരുന്നു. ഹാസ്യ രംഗങ്ങളും സംഭാഷണങ്ങളും ക്‌ളൈമാക്‌സിലുള്ള ട്വിസ്റ്റും രണ്ടാം പകുതിയിൽ പ്രേക്ഷകരെ രസിപ്പിക്കുന്നവയായിരുന്നു.

സംവിധാനം ⭐️⭐️
ആസ്വാദനത്തിനുള്ള ചേരുവകളെല്ലാം ചേർത്ത സിനിമകൾ ഒരുക്കുക എന്നത് തന്നെയാണ് എല്ലാ സംവിധായകരുടെയും ലക്ഷ്യം. അത്തരത്തിലുള്ള ഘടകങ്ങൾ എല്ലാം തന്നെ ഗാനഗന്ധർവ്വനിലുമുണ്ട്. പ്രവചിക്കാനാവുന്ന കഥാസന്ദർഭങ്ങളെ ഒരല്പമെങ്കിലും കണ്ടിരിക്കാനാവുന്ന രീതിയിലാക്കിയത് ഹാസ്യ രംഗങ്ങൾ അവതരിപ്പിക്കാനുള്ള പിഷാരടിയുടെ കഴിവ് തന്നെ. ചില രംഗങ്ങൾ അനാവശ്യമായി വലിച്ചുനീട്ടി അവതരിപ്പിച്ചപ്പോൾ, മറ്റു ചിലതിനു വേണ്ടത്ര പ്രാധാന്യം നൽകാതെ അവസാനിപ്പിച്ചു. കഥാവസാനമുള്ള കോടതി രംഗങ്ങൾ തന്നെ ഉദാഹരണം. എന്നിരുന്നാലും, പഞ്ചവർണ്ണതത്ത എന്ന സിനിമയുമായി താരതമ്യം ചെയ്യുമ്പോൾ ഗാനഗന്ധർവ്വൻ ഭേദപെട്ട നിലയിൽ സംവിധാനം ചെയ്യുവാൻ പിഷാരടിക്കു കഴിഞ്ഞിട്ടുണ്ട്.

സാങ്കേതികം ⭐️⭐️
പ്രത്യേകിച്ച് പുതുമകളൊന്നും നൽകാതെ സംവിധായകന്റെ നിർദേശമനുസരിച്ചു ദൃശ്യങ്ങൾ ക്യാമറയിൽ പകർത്തുക എന്നത് മാത്രമാണ് അഴഗപ്പൻ ചെയ്തത്. മൂന്നാർ പോലെയുള്ള സ്ഥലങ്ങളിൽ ചിത്രീകരിച്ചിട്ടു പോലും മറ്റു സിനിമകളിൽ കണ്ട മൂന്നാറിന്റെ ഭംഗി ഈ സിനിമയിൽ കാണാൻ കഴിഞ്ഞില്ല. സിനിമയുടെ ആദ്യപകുതിയിൽ ഒട്ടനവധി രംഗങ്ങൾ വലിച്ചുനീട്ടി അവതരിപ്പിച്ചത് സന്നിവേശകന്റെ പിഴവ് തന്നെ. ലിജോ പോളാണ് സന്നിവേശം നിർവഹിച്ചത്. ദീപക് ദേവ് ഈണമിട്ട ഗാനങ്ങളും ശരാശരിയിലൊതുങ്ങി. കോടതിയിലെ രംഗങ്ങളിൽ പോലും ആകാംഷ ജനിപ്പിക്കുന്ന പശ്ചാത്തല സംഗീതം നൽകാൻ ദീപക് ദേവിന് കഴിഞ്ഞില്ല. ജയദേവൻ നിർവഹിച്ച സിങ്ക് സൗണ്ട് ശബ്ദ സംവിധാനം മികവ് പുലർത്തി.

അഭിനയം ⭐️⭐️⭐️
കലാസദൻ ഉല്ലാസ് എന്ന സാധാരണക്കാരന്റെ റോൾ മമ്മൂട്ടി മികവോടെ അവതരിപ്പിച്ചു. വൈകാരികത നിറഞ്ഞ രംഗങ്ങളിൽ മമ്മൂട്ടിയുടെ അഭിനയം മികച്ചതായിരുന്നു. ഏറെ നാളുകൾക്കു ശേഷം സുരേഷ് കൃഷ്ണക്ക് ലഭിച്ച വേഷം രസകരമായി അവതരിപ്പിക്കുവാൻ സുരേഷ് കൃഷ്ണക്ക് സാധിച്ചു. മനോജ് കെ. ജയന്റെ കഥാപാത്രവും അദ്ദേഹം പതിവുപോലെ രസകരമായി അവതരിപ്പിച്ചു. വന്ദിത മനോഹരൻ, അതുല്യ ചന്ദ്ര എന്നിവരാണ് ഈ സിനിമയിലെ നായികമാർ. ഇവരെ കൂടാതെ മുകേഷ്, സിദ്ദിക്ക്, അനൂപ് മേനോൻ, മണിയൻപിള്ള രാജു, ഇന്നസെന്റ്, അശോകൻ, ബൈജു എഴുപുന്ന, മോഹൻ ജോസ്, ധർമജൻ, കുഞ്ചൻ, ജോണി ആന്റണി, റാഫി, സലിം കുമാർ, രാജേഷ് ശർമ്മ, സാദിഖ്, ദേവൻ, സോഹൻ സീനുലാൽ, സുധീർ കരമന, ഹരീഷ് പെരുമണ്ണ, സുനിൽ സുഖദ, ചാലി പാലാ, കലാഭവൻ പ്രജോദ്, കോട്ടയം നസീർ, അപ്പഹാജ, ഡാൻ ഓസ്റ്റിൻ, കൊച്ചുപ്രേമൻ, അബു സലിം, കിഷോർ വർമ്മ, ബിനു തൃക്കാക്കര, ശ്രീലക്ഷ്മി, ഷൈനി സാറ, സിന്ധു വർമ്മ, ആര്യ രോഹിത്, സിതാര കൃഷ്ണകുമാർ എന്നിവരും ഈ സിനിമയിൽ അഭിനയിച്ചിട്ടുണ്ട്.

വാൽക്കഷ്ണം: രസകരമായ സംഭാഷണങ്ങളും മമ്മൂട്ടിയുടെ അഭിനയ മികവും ഈ ഗന്ധർവ്വനു രക്ഷയായേക്കും!

സംവിധാനം: രമേശ് പിഷാരടി
രചന: ഹരി പി. നായർ, രമേശ് പിഷാരടി
നിർമ്മാണം: ആന്റോ ജോസഫ്, ശ്രീലക്ഷ്മി, ശങ്കർ രാജ്
ഛായാഗ്രഹണം: അഴഗപ്പൻ
സന്നിവേശം: ലിജോ പോൾ
സംഗീതം: ദീപക് ദേവ്
കലാസംവിധാനം: ത്യാഗു തവന്നൂർ
ചമയം: റോണക്സ് സേവ്യർ
വസ്ത്രാലങ്കാരം: സമീറ സനീഷ്
ശബ്ദ സംവിധാനം: ജയദേവൻ ചക്കാടത്
വിതരണം: ആൻ മെഗാ മീഡിയ

മനോഹരം – ⭐️⭐️⭐️

മനോഹരം – വിനീതം മനോഹരം! ⭐️⭐️⭐️

ചുമർ ചിത്രങ്ങൾ വരയ്ക്കുന്ന കലാകാരനാണ് മനു (മനോഹരൻ). ചുമർ ചിത്രങ്ങൾക്ക് വെല്ലുവിളിയായ ഫ്ലെക്സ് പ്രിന്റുകൾ പരസ്യത്തിനായി ഉപയോഗിക്കുന്ന ഈ കാലഘട്ടത്തിൽ, മനോഹരനെ പോലെയുള്ള ചിത്രകാരന്മാരുടെ തൊഴിലും ജീവിതവും എത്തരത്തിൽ ബാധിക്കുന്നു എന്നവതരിപ്പിക്കുന്ന കഥയാണ് മനോഹരത്തിന്റേത്.

ഓർമ്മയുണ്ടോ ഈ മുഖം എന്ന സിനിമയ്ക്ക് ശേഷം അൻവർ സാദിക്ക് സംവിധാനം ചെയ്ത മനോഹരത്തിൽ വിനീത് ശ്രീനിവാസൻ, അപർണ്ണ ദാസ്, ബേസിൽ ജോസഫ്, ഇന്ദ്രൻസ്, ദീപക് പറമ്പൊൾ, ഹരീഷ് പരേഡി, ഡൽഹി ഗണേഷ്, നിസ്താർ സേട്ട്, അഹമ്മദ് സിദ്ദിക്ക്, ജൂഡ് ആന്തണി, വി.കെ. പ്രകാശ്, നന്ദുലാൽ, ശ്രീലക്ഷ്മി, നീന കുറുപ്പ്, നന്ദിനി നായർ എന്നിവരാണ് പ്രധാന കഥാപാത്രങ്ങളെ അവതരിപ്പിച്ചത്.

പ്രമേയം ⭐️⭐️
കലാകാരന്മാർ സാങ്കേതികപരമായി പിന്നോട്ടാണെന്നുള്ള മിഥ്യാധാരണ നമ്മടെ നാട്ടിൽ ചിലർക്കുണ്ട്. ഏതൊരു കലാകാരനും തന്റെ സ്വതസിദ്ധമായ കഴിവിനെ സാങ്കേതികപരമായി ഉപയോഗപ്പെടുത്തുവാൻ ശ്രമിക്കുമ്പോൾ വിജയപരാജയങ്ങൾ നേരിടേണ്ടി വന്നേക്കാം. അതിൽ തോറ്റുകൊടുക്കാതെ വീണ്ടും വിജയിക്കുവാൻ പരിശ്രമിക്കുന്നയിടത്താണ് യഥാർത്ഥ വിജയം തുടങ്ങുന്നത്. അന്ന്യം നിന്നുപോകുന്ന കലയും ഇന്നത്തെ കാലഘട്ടത്തിൽ അത്യാവശ്യമായ സാങ്കേതിക അറിവും ഒരുപോലെ ഉപയോഗപ്പെടുത്തുവാൻ കഷ്ടപ്പെടുന്ന ഒരു കലാകാരൻ, തന്റെ ന്യൂനതകളെ അതിജീവിച്ചു വിജയം കൈവരിക്കുന്നതാണ് ഈ സിനിമയുടെ പ്രമേയം. പുതുമയുള്ള പ്രമേയമല്ലെങ്കിലും, ഈ സിനിമയിലൂടെ നൽകുന്ന സന്ദേശം ഉൾക്കൊള്ളാൻ പ്രേക്ഷകർക്ക് സാധിക്കുമെന്നുറപ്പ്!

തിരക്കഥ ⭐️⭐️⭐️
സംവിധായകൻ അൻവർ സാദിഖ് തന്നെയാണ് ഈ സിനിമയുടെ കഥയും തിരക്കഥയും സംഭാഷണങ്ങളും എഴുതിയത്. ഒരു ഫീൽ ഗുഡ് സിനിമ എന്ന ഗണത്തിൽ ഉൾപ്പെടുത്താവുന്ന സിനിമയാണിതെങ്കിലും, കഥയിലുള്ള ചെറിയ വഴിത്തിരുവകൾ പ്രേക്ഷകരിൽ ആകാംഷ ജനിപ്പിക്കുന്നതാണ്. കഥാസന്ദർഭങ്ങളും കഥാഗതിയും കണ്ടുപരിചിതമാണെങ്കിലും, അവയൊന്നും പ്രേക്ഷകരെ മുഷിപ്പിക്കുന്നതല്ല. സത്യസന്ധമായ നർമ്മവും അവയുടെ അവതരണവുമാണ് സിനിമയുടെ മറ്റൊരു ആകർഷണ ഘടകം. ഏറെ നാളുകൾക്കു ശേഷം അതിശയോക്തിയില്ലാത്ത പാലക്കാടൻ ഭാഷ ഈ സിനിമയിലെ സംഭാഷണങ്ങളിലൂടെ കേൾക്കുവാൻ സാധിച്ചു. മനോഹരൻ എന്ന കഥാപാത്രത്തെ ഇന്നത്തെ തലമുറയിലുള്ള യുവാക്കൾക്ക് എളുപ്പത്തിൽ മനസ്സിലാക്കാൻ സാധിക്കുന്നതും കഥാപാത്ര സൃഷ്ടിയുടെ മികവ് തന്നെയാണ്.

സംവിധാനം ⭐️⭐️⭐️
ഓരോ കഥാസന്ദർഭങ്ങളും രസകരമായ രീതിയിൽ ചടുലതയോടെ അവതരിപ്പിക്കുക എന്നത് ഏറെ ശ്രമകരമായ കാര്യമാണ്. അതിൽ നൂറു ശതമാനം വിജയിക്കുവാൻ അൻവർ സാദിക്കിന് സാധിച്ചു. ഈ സിനിമയിലെ ഒരു കഥാസന്ദർഭം പോലും അനാവശ്യമായി വലിച്ചുനീട്ടി സ്പൂൺ ഫീഡിങ് രീതിയിൽ അവതരിപ്പിച്ചിട്ടില്ല. സിനിമയുടെ തുടക്കം മുതൽ അവസാനം വരെ ഓരോ കഥാസന്ദർഭങ്ങളും അതിശയോക്തിയില്ലാതെയാണ് അവതരിപ്പിച്ചത്. കഥാപാത്രങ്ങൾക്ക് അനിയോജ്യരായ നടീനടന്മാരെ കണ്ടെത്തുന്നതിലും സംവിധായകൻ മികവ് തെളിയിച്ചു. സ്ഥിരം അമ്മാവൻ വേഷങ്ങളിൽ കണ്ടുവരാറുള്ള സിദ്ദിഖിനും വിജയരാഘവനും രഞ്ജി പണിക്കർക്കും പകരം, വില്ലൻ വേഷങ്ങൾ അവതരിപ്പിച്ചിരുന്ന ഹരീഷ് പരേഡിയുടെ അഭിനയം തന്നെ അതിനു ഉദാഹരണം. ഈ സിനിമയോടെ അൻവർ സാദിഖിന്റെ മുഖം മലയാള സിനിമ പ്രേമികൾക്ക് ഓർമ്മയുണ്ടാകും!

സാങ്കേതികം ⭐️⭐️⭐️
താരതമ്യേനെ പുതുമുഖങ്ങളാണ് ഈ സിനിമയുടെ പ്രധാനപെട്ട സാങ്കേതിക വശങ്ങളായ ഛായാഗ്രഹണവും ചിത്രസന്നിവേശവും സംഗീതവും കൈകാര്യം ചെയ്തത്. ഇനി മലയാള സിനിമയിൽ ശ്രദ്ധ നേടാൻ സാധ്യതയുള്ള ഒരു പേരായിരിക്കും നിഥിൻ രാജ് അരോൾ. സമീപകാലത്തിറങ്ങിയ സിനിമകളിൽ കണ്ടതിൽ മികച്ച സന്നിവേശമാണ് ഈ സിനിമയുടേത്. ചടുലതയുള്ള അവതരണത്തിന് ഏറെ സഹായകമായത് നിഥിന്റെ സന്നിവേശമാണ്. ജിബിൻ ജെക്കബിന്റെ ഛായാഗ്രഹണവും സിനിമയ്ക്ക് ഏറെ ഗുണം ചെയ്ത ഘടകങ്ങളിൽ ഒന്നാണ്. സഞ്ജീവ് തോമസ് ചിട്ടപ്പെടുത്തിയ ഗാനങ്ങളും കേൾക്കാൻ രസമുള്ളവയായിരുന്നു. മനു മഞ്ജിത്തും ജോ പോളുമാണ് പാട്ടുകളുടെ വരികൾ എഴുതിയത്. നിമേഷ് താനൂരിന്റെ കലാസംവിധാനവും മികവ് പുലർത്തി.

അഭിനയം ⭐️⭐️⭐️
അപകർഷതാബോധം നിറഞ്ഞ യുവാവിന്റെ വേഷം കൈയടക്കത്തോടെ മിതത്വമാർന്ന രീതിയിൽ അവതരിപ്പിക്കുവാൻ വിനീത് ശ്രീനിവാസന് സാധിച്ചു. മനോഹരനെ പുച്ഛത്തോടെ പരിഹസിക്കുന്ന അമ്മാവനായി ഹരീഷും തന്റെ റോൾ മികച്ചതാക്കി. സുഹൃത്തിന്റെ റോളിൽ ബേസിൽ ജോസഫും അച്ഛന്റെ സുഹൃത്തും വഴികാട്ടിയുമായ വർക്കി എന്ന വേഷത്തിൽ ഇന്ദ്രൻസും തിളങ്ങി. താരതമ്യേനെ പുതുമുഖമാണെങ്കിലും അപർണ്ണ ദാസ് നായികയുടെ റോൾ പക്വതയോടെ അവതരിപ്പിച്ചു. സദാസമയം പാരവെപ്പു നടത്തുന്ന സുഹൃത്തിന്റെ വേഷം ദീപക് പറമ്പൊൾ മികവുറ്റതാക്കി. ഏറെ നാളുകൾക്കു ശേഷം അലിഭായ് എന്ന കഥാപാത്രമായി പ്രശസ്ത തമിഴ് നടൻ ഡൽഹി ഗണേഷും തന്റെ കഥാപാത്രം മികവോടെ അവതരിപ്പിച്ചു.

വാൽക്കഷ്ണം: ചടുലമായ അവതരണശൈലിയാലും അഭിനേതാക്കളുടെ പക്വതയുള്ള പ്രകടനത്താലും മനോഹരമായ ഒരു സിനിമ!

രചന, സംവിധാനം: അൻവർ സാദിക്ക്
നിർമ്മാണം: ജോസ് ചക്കാലക്കൽ, സുനിൽ എ.കെ
ഛായാഗ്രഹണം: ജിബിൻ ജേക്കബ്
ചിത്രസന്നിവേശം: നിഥിൻ രാജ് അരോൾ
സംഗീതം: സഞ്ജീവ് തോമസ്
വരികൾ: മനു മൻജിത്, ജോ പോൾ
കലാസംവിധാനം: നിമിഷ് താനൂർ
ചമയം: റോണക്സ് സേവ്യർ
വസ്ത്രാലങ്കാരം: അരുൺ മനോഹർ
വിതരണം: സെഞ്ച്വറി ഫിലിംസ്.

കാറ്റ് – ⭐️⭐️⭐️

കാറ്റ് – വൈകാരിക ബന്ധനകാറ്റ്! ⭐️⭐️⭐️

മദ്ധ്യകേരളത്തിലെ ഒരു ഗ്രാമത്തിൽ എഴുപതുകളുടെ അവസാനം നടക്കുന്ന കഥയാണ് അരുൺകുമാർ അരവിന്ദിന്റെ കാറ്റ്. വൈകാരിക മുഹൂർത്തങ്ങളിലൂടെ ആത്മബന്ധനങ്ങളുടെ തീവ്രമായ മുഖം വരച്ചുകാട്ടുന്ന വേറിട്ട സിനിമയാണ് കാറ്റ്. പ്രവചിക്കാനാവുന്ന കഥാസന്ദർഭങ്ങളിലൂടെ പഴമയുടെ ലോകത്തിലേക്ക് പ്രേക്ഷകരെ കൊണ്ടുചെല്ലുന്ന സിനിമായാണിത്. ആസ്വാദനത്തിനു വേണ്ടി മാത്രം സിനിമയെ സമീപിക്കുന്നവരെ ഒരുപക്ഷെ കാറ്റ് ത്രിപ്തിപെടുത്തിയെന്നുവരില്ല.

യശ്ശശരീരനായ പി.പത്മരാജന്റെ റാണിമാരുടെ കുടുംബം എന്ന ചെറു കഥയിലെ കഥാപാത്രങ്ങളെ മാത്രമെടുത്തു അദ്ദേഹത്തിന്റെ മകൻ അനന്തപത്മനാഭൻ രചന നിർവഹിച്ച കാറ്റ്, കുത്തഴിഞ്ഞ ജീവിതം നയിക്കുന്ന ചെല്ലപ്പനും അയാളുടെ സന്തത സഹചാരിയായ നൂഹുകണ്ണും തമ്മിലുള്ള ആത്മബന്ധത്തിന്റെ കഥയാണ്. മുരളി ഗോപിയും ആസിഫ് അലിയുമാണ് മേല്പറഞ്ഞ കഥാപാത്രങ്ങളെ അവതരിപ്പിച്ചത്.

പ്രമേയം: ⭐️⭐️
ഒരു നാണയത്തിന്റെ രണ്ടു വശങ്ങൾ പോലെ വൈവിധ്യമാർന്ന സ്വഭാവക്കാരായ രണ്ടുപേരാണ് ചെല്ലപ്പൻ എന്ന സ്ത്രീലമ്പടനും നൂഹ്കണ്ണ് എന്ന നിഷ്കളങ്കനും. എഴുപത്-എൺപത് കാലഘട്ടങ്ങളിൽ കേരളത്തിൽ നടന്നു വന്നിരുന്ന ചില സംസ്കാരങ്ങളെ രണ്ടു വ്യക്തികളുടെ ജീവിതകഥയിലൂടെ അനാവരണം ചെയ്തിരിക്കുന്ന സിനിമയാണിത്. അന്നത്തെ കാലഘട്ടത്തിലെ ആണും പെണ്ണും തമ്മിലുള്ള ബന്ധങ്ങളുടെ തീവ്രതയും ഈ സിനിമയിൽ പ്രമേയമാകുന്നു.

തിരക്കഥ: ⭐️⭐️
ആഗസ്റ്റ് ക്ലബ് എന്ന സിനിമയ്ക്ക് ശേഷം അനന്തപത്മനാഭൻ കഥയും തിരക്കഥയും സംഭാഷണങ്ങളും എഴുതിയ സിനിമയാണ് കാറ്റ്. ശക്തമായ ഒരു കഥയും കഥപാത്രങ്ങളും സംഭാഷണങ്ങളും ഈ സിനിമയുടെ മുതൽക്കൂട്ടാണ്. എഴുപതുകളുടെ അവസാനം കേരളത്തിലെ ഉൾഗ്രാമങ്ങളിൽ കണ്ടുവരുന്ന രീതികളൊക്കെ അതേപടി കഥാസന്ദർഭങ്ങളാക്കുവാൻ അനന്തപത്മനാഭനു സാധിച്ചു. ചെല്ലപ്പനും നൂഹ്കണ്ണും മൂപ്പനും ശിവൻകുട്ടിയും പോളിയും മുത്തുലക്ഷ്മിയും നമ്മൾ എവിടെയോ കണ്ടുമറന്ന മനുഷ്യരാണെന്ന തോന്നൽ പ്രേക്ഷകരിൽ സൃഷ്ടിക്കാൻ എഴുത്തുകാരന് സാധിച്ചു. എന്നാൽ, മേല്പറഞ്ഞ കഥാപാത്രങ്ങളെ അവതരിപ്പിച്ച കഥാസന്ദർഭങ്ങൾ പുതുമയില്ലാത്തതും പ്രവചിക്കാനാവുന്നതുമായിരുന്നു. കാറ്റ് സിനിമ സഞ്ചരിക്കുന്ന കഥാഗതിയും ഊഹിക്കാവുന്നതായിരുന്നു. രണ്ടാം പകുതിയുടെ അവസാനം നാടകീയമായ ഒട്ടനവധി മുഹൂർത്തങ്ങളും സിനിമയുടെ കലാമൂല്യത്തിനെ സാരമായി ബാധിച്ചു. കഥാപാത്രങ്ങളുടെ സൃഷ്ടിയും വൈകാരികത നിറഞ്ഞ സംഭാഷണങ്ങളും മാറ്റി നിർത്തിയാൽ ശരാശരി നിലവാരമുള്ള തിരക്കഥയാണ് ഈ സിനിമയുടേത്.

സംവിധാനം: ⭐️⭐️⭐️
മലയാള സിനിമയിലെ സംവിധായകരൊന്നും പരീക്ഷിക്കാൻ തയ്യാറാകാത്ത സിനിമകളാണ് അരുൺകുമാർ അരവിന്ദ് എന്നും സിനിമയക്കിയിട്ടുള്ളത്. അവയുടെ കൂട്ടത്തിലേക്കു കാറ്റ് എന്ന സിനിമയും ചേർക്കപെടുന്നു. കേരളത്തിലെ പഴയ കാലഘട്ടത്തെ ഇത്രയും മികച്ച ദൃശ്യമികവോടെ അവതരിപ്പിച്ച സിനിമയൊന്നും സമീപകാലഘട്ടത്തിൽ മലയാളത്തിൽ നിർമ്മിക്കപ്പെട്ടിട്ടില്ല. ഓരോ കഥാപാത്രങ്ങളുടെയും മാനസിക വ്യഥകളെ പ്രേക്ഷകരിലേക്ക് എത്തിക്കുവാൻ സംവിധായകൻ എന്ന നിലയിൽ അരുൺകുമാറിന് സാധിച്ചു. ഈ സിനിമയുടെ കഥയോടും കഥാസന്ദർഭങ്ങളോടും കഥ നടക്കുന്ന കാലഘട്ടത്തിനോടും നീതിപുലർത്തുന്ന അവതരണ രീതിയാണ് സംവിധായകൻ സ്വീകരിച്ചത്. മികച്ച ലൊക്കേഷനുകൾ തിരഞ്ഞെടുത്തതും, കഥാപാത്രങ്ങൾക്ക് അനിയോജ്യരായ നടീനടന്മാരെ കണ്ടെത്തുകയും ചെയ്യുന്നിടത്തു സംവിധായകൻ പൂർണ വിജയം കൈക്കൊണ്ടു. എന്നാൽ, ഈ ഇരുപത്തിയൊന്നാം നൂറ്റാണ്ടിൽ ഇത്തരത്തിലുള്ള ഒരു കഥ പ്രേക്ഷകരുമായി സംവദിക്കുന്നത് എന്താണ് എന്ന് മനസിലാകുന്നില്ല. ഇന്നത്തെ തലമുറയിലെ സിനിമാ ആസ്വാദകർക്ക് ദഹിക്കാൻ ഒരല്പം പ്രയാസമുള്ള അവതരണ രീതിയാണ് സിനിമയ്ക്ക് ദോഷകരമായത്. സിനിമയുടെ ദൈർഘ്യവും പ്രവചിക്കാനാവുന്ന കഥാഗതിയും പ്രതികൂലമായി സിനിമയെ ബാധിച്ചിട്ടുണ്ട്. എന്നരിന്നാലും, ഈ വർഷത്തെ അംഗീകാരങ്ങൾ തേടിവരാൻ സാധ്യതയുള്ള സിനിമകളിൽ ഒന്നാണ് കാറ്റ് എന്നുറപ്പ്!

സാങ്കേതികം: ⭐️⭐️⭐️
പ്രശാന്ത് രവീന്ദ്രൻ എന്ന ഛായാഗ്രാഹകനും പ്രതാപ് രവീന്ദ്രൻ എന്ന കലാസംവിധായകനും എന്നും അഭിമാനിക്കാവുന്ന സിനിമയായിരിക്കും കാറ്റ്. അത്യുഗ്രൻ ഛായാഗ്രഹണവും കലാസംവിധാനവും കാറ്റ് എന്ന സിനിമയെ മറ്റൊരു തലത്തിലേക്കെത്തിച്ചു. എഴുപതുകളുടെ അവസാനം കേരളത്തിലെ ഓരോ ഉൾഗ്രാമങ്ങളും എത്തരത്തിലുള്ളവയായിരുന്നു എന്ന് കണ്ടുപഠിക്കാൻ ഈ സിനിമ ഉപയോഗപെടുത്തം. അത്രയ്ക്ക് സൂക്ഷമതയോടെയാണ് കലാസംവിധായകൻ ഓരോ രംഗങ്ങളും ഒരുക്കിയത്. അവയോരോന്നും ഒപ്പിയെടുത്ത പ്രശാന്ത് രവീന്ദ്രന്റെ ഛായാഗ്രഹണവും ഗംഭീരമായിട്ടുണ്ട്. അരുൺകുമാർ അരവിന്ദ് തന്നെയാണ് രംഗങ്ങളുടെ സന്നിവേശം നിർവഹിച്ചത്. കഥ പറയുന്ന കാലഘട്ടത്തിനോട് നീതിപുലർത്തുന്ന വേഗതയെ സിനിമയ്ക്ക് നൽകിയിട്ടുള്ളു. ഇന്നത്തെ സിനിമാ ആസ്വാദകർക്ക് കഥയുടെ വിശദമായ വിവരണം ആവശ്യമാണോ എന്നിടത്താണ് സന്നിവേശകൻ ആശയകുഴപ്പത്തിലായത്. കഥാപാത്രങ്ങളെയും കഥാസന്ദർഭങ്ങളെയും ഇത്രയും വിവരിച്ചു കാണിക്കേണ്ടതിന്റെ ആവശ്യകതയുണ്ടായിരുന്നില്ല. രണ്ടരമണിക്കൂർ ദൈർഘ്യം ഈ സിനിമയുടെ ആസ്വാദനത്തെ സാരമായി ബാധിച്ചിട്ടുണ്ട്. ഓരോ കഥാസന്ദർഭങ്ങൾക്കും കഥാപാത്രങ്ങൾക്കും അനിയോജ്യമായ പശ്ചാത്തല സംഗീതമൊരുക്കുവാൻ ദീപക് ദേവിനും സാധിച്ചു. റഫീഖ് അഹമ്മദ് എഴുതിയ വരികൾക്ക് ദീപക് ദേവ് ഈണമിട്ട രണ്ടു പാട്ടുകളും കഥാപശ്ചാത്തലത്തിനോടും സന്ദർഭങ്ങളോടും ചേർന്നുപോകുന്നവയാണ്. റഹിം കൊടുങ്ങല്ലൂരിന്റെ ചമയവും എസ്.ബി.സതീഷിന്റെ വസ്ത്രാലങ്കാരവും മികവ് പുലർത്തി. ക്‌ളൈമാക്‌സ് രംഗത്തിലുള്ള സംഘട്ടന രംഗം നാടകീയത നിറഞ്ഞതാണെങ്കിലും ത്യാഗരാജൻ മാസ്റ്ററുടെ സംഘട്ടന സംവിധാനം കഥയോട് നീതിപുലർത്തുന്നവയായിരുന്നു. അരുൺ എസ്. മണി-വിഷ്ണു പി.സി. എന്നിവരുടെ ശബ്ദ സംവിധാനം ചിലയിടങ്ങളിൽ മികവ് പുലർത്തി. കാറ്റ് വീശുന്ന രംഗങ്ങളിൽ ചിലതിൽ കാറ്റിന്റെ വൈകാരികത കുറഞ്ഞുപോയോ എന്ന് തോന്നുന്ന വിധത്തിലായിരുന്നു ശബ്ദസംവിധാനം.

അഭിനയം: ⭐️⭐️⭐️⭐️
പരുക്കൻ പരിവേഷത്തിലുള്ള കഥാപാത്രങ്ങൾ മികവോടെ അവതരിപ്പിക്കുവാനുള്ള മുരളി ഗോപിയുടെ അസാമാന്യ കഴിവിനെ എത്രകണ്ട് പ്രശംസിച്ചാലും മതിവരില്ല. ചെല്ലപ്പൻ എന്ന സ്ത്രീലമ്പടന്റെ കഥാപാത്രം ഇന്ന് മലയാള സിനിമയിൽ അവതരിപ്പിക്കാൻ മറ്റാർക്കും സാധിക്കില്ല. നൂഹ്കണ്ണ് എന്ന കഥാപാത്രത്തെ ആസിഫ് അലി അവതരിപ്പിച്ചപ്പോൾ ആസിഫ് അലി എന്ന നടനെ പ്രേക്ഷകർ മറന്നു, നൂഹുകണ്ണായി സങ്കൽപ്പിക്കാൻ തുടങ്ങി. ഒഴിമുറിക്കു ശേഷം ആസിഫിന്റെ ഏറ്റവും മികച്ച അഭിനയ മുഹൂർത്തങ്ങൾ ഈ സിനിമയിലേതാണ്. മൂപ്പനായി അഭിനയിച്ച പങ്കൻ താമരശ്ശേരി, പോളിയായി അഭിനയിച്ച ഉണ്ണി രാജൻ പി. ദേവ്, മുത്തുലക്ഷ്മിയായി അഭിനയിച്ച വരലക്ഷ്മി എന്നിവരും അവരവരുടെ കഥാപാത്രങ്ങളെ ഗംഭീരമാക്കി. ജയശങ്കർ, ഷെബിൻ ബെൻസൺ, മാനസ രാധാകൃഷ്ണൻ എന്നിവരും ഈ സിനിമയിലെ ഓരോ കഥാപാത്രങ്ങളെ അവതരിപ്പിച്ചിട്ടുണ്ട്.

വാൽക്കഷ്ണം: വൈകാരിക മുഹൂർത്തങ്ങളിലൂടെ സഞ്ചരിച്ചെത്തുന്ന ആത്മബന്ധനങ്ങളുടെ കാറ്റ് വ്യത്യസ്തമാണ്!

സന്നിവേശം, സംവിധാനം: അരുൺകുമാർ അരവിന്ദ്
എഴുത്ത്: അനന്തപത്മനാഭൻ
നിർമ്മാണം: കർമ്മയുഗ് ഫിലിംസ്
ഛായാഗ്രഹണം: പ്രശാന്ത് രവീന്ദ്രൻ
ഗാനരചന: റഫീഖ് അഹമ്മദ്
സംഗീതം: ദീപക് ദേവ്
കലാസംവിധാനം: പ്രതാപ് രവീന്ദ്രൻ
ചമയം: റഹിം കൊടുങ്ങല്ലൂർ
വസ്ത്രാലങ്കാരം: എസ്. ബി. സതീഷ്
സംഘട്ടനം: ത്യാഗരാജൻ
ശബ്ദസംവിധാനം: അരുൺ എസ്. മണി, വിഷ്ണു പി.സി.
വിതരണം: കർമ്മയുഗ് ഫിലിംസ്.

ലവകുശ – ⭐️⭐️

ലവകുശ – ന്യു ജനറേഷൻ നാടോടിക്കാറ്റ്! ⭐️⭐️

പ്രേ ബോ കൊ ഞ! പ്രേക്ഷകരെ ബോറടിപ്പിച്ചു കൊല്ലും ഞങ്ങൾ എന്ന ലക്ഷ്യത്തോടെ ലവലേശം ഗുണമില്ലാത്ത സന്ദർഭങ്ങളും സംഭാഷണങ്ങളും അവതരണവും സമാസം ചേർത്തു അവതരിപ്പിച്ച സിനിമയാണ് ലവകുശ.

നി കൊ ഞ ചാ! എന്ന സിനിമയക്ക് ശേഷം ഗിരീഷ് മനോ സംവിധാനം നിർവഹിച്ച ഈ ന്യു ജനറേഷൻ നാടോടിക്കാറ്റിന്റെ രചന നിർവഹിച്ചത് നടൻ നീരജ് മാധവാണ്. ലവനും കുശനുമായി നീരജ് മാധവും അജു വർഗീസും മികച്ച രീതിയിൽ ഹാസ്യം കൈകാര്യം ചെയ്തു എന്ന് മാത്രമാണ് ലവകുശയിലെ ഏക സവിശേഷത. ബിജു മേനോനും നായകതുല്യ വേഷത്തിൽ ഈ സിനിമയിലുണ്ട്.

ആർ.ജെ.ഫിലിംസിനു വേണ്ടി ജെയ്സൺ ഇളംകുളം നിർമ്മിച്ച ലവകുശ,കാർട്ടൂൺ പരമ്പരകളെ അനുസ്മരിപ്പിക്കുന്ന വിധത്തിലുള്ള ഹാസ്യരംഗങ്ങളാൽ കോർത്തിണക്കിയ രണ്ടരമണിക്കൂർ കോമാളിത്തരമാണ്. നാടോടിക്കാറ്റിലെ ദാസനെയും വിജയനെയും പുതിയ രീതിയിൽ അവതരിപ്പിച്ചതാണ് ലവനും കുശനും.

പ്രമേയം: ⭐️
മലയാള സിനിമ ചരിത്രത്തിലെ നാഴികല്ലുകളാണ് ദാസനും വിജയനും. നാടോടിക്കാറ്റ് എന്ന സിനിമയുടെ മൂന്ന് ഭാഗങ്ങളും കണ്ടുചിരിക്കാത്ത മലയാളികളുണ്ടാകില്ല. ദാസനും വിജയനും, CID മൂസയും അബദ്ധത്തിൽ കുറ്റങ്ങൾ തെളിയിക്കുന്നത് രസകരമായ പ്രമേയങ്ങളായിരുന്നു. എന്നാൽ, മേല്പറഞ്ഞ സിനിമകളുമായി നിരവധി സാദൃശ്യങ്ങളുള്ള കഥ എന്നതാണ് ലവകുശയുടെ പ്രധാന ന്യൂനതകളിൽ ഒന്ന്. സാധാരണക്കാരായ രണ്ടു ചെറുപ്പക്കാർ അസാധാരണ സംഭവങ്ങൾക്കു സാക്ഷിയാകുകയും സമൂഹ നന്മക്കു വഴിതെളിയിക്കുകയും ചെയ്യുക എന്നത് പ്രമേയപരമായി പുതുമയൊന്നും സമ്മാനിക്കുന്നില്ല.

തിരക്കഥ: ⭐️
നീരജ് മാധവ് ആദ്യമായി തിരക്കഥ എഴുതിയ സിനിമയാണ് ലവകുശ. ഒരു നവാഗത തിരക്കഥാരചയിതാവിന്റെ പരിചയക്കുറവൊന്നും കഥാസന്ദർഭങ്ങളിലോ സംഭാഷണങ്ങളിലോ കണ്ടില്ല. കണ്ടുമടുത്തതും പ്രവചിക്കാനാവുന്നതുമായ രീതിയിലായിരുന്നു അവയിൽ ഓരോന്നും. ലവനും കുശനും ബിജു മേനോന്റെ ജോൺ കാപ്പ എന്ന കഥാപാത്രവുമെല്ലാം കണ്ടുമടുത്തവ തന്നെ. ആദ്യ പകുതിയിലെ ഹാസ്യ രംഗങ്ങളിൽ ചിലതൊക്കെ പ്രേക്ഷകർ ആസ്വദിച്ചിരുന്നു. ട്രെയിനിലെ യാത്രക്കിടയിൽ സംഭവിക്കുന്നതെല്ലാം രസകരമായിരുന്നു. എന്നാൽ, രണ്ടാം പകുതിയിലെ നീന്തൽ പരിശീലനവും മേക്കപ്പും അസഹനീയ ഹാസ്യ രംഗങ്ങളായിരുന്നു. രണ്ടാം പകുതിയിൽ കുറെ ട്വിസ്റ്റുകളും സസ്‌പെൻസും കുത്തിനിറച്ചു കഥ മറ്റൊരു ദിശയിലേക്ക് സഞ്ചരിക്കുവാൻ തുടങ്ങി. എൺപതുകളിലെ പ്രിയദർശൻ സിനിമകളിലെ പോലെ കുറെ കഥാപാത്രങ്ങളും മണ്ടന്മാരായ വില്ലന്മാരും അടിപിടിയും അബദ്ധങ്ങളും എല്ലാം സമന്വയിപ്പിച്ചു അവതരിപ്പിച്ചു. അവസാനം, ലവകുശന്മാരുടെ സഹായത്തോടെ കുറ്റാന്വേഷണം പൂർത്തിയാക്കുന്നു. ഊഹിക്കാനാവുന്ന കഥയും സസ്പെൻസുകളുമായി സിനിമ അവസാനിക്കുന്നു. നല്ലൊരു നർത്തകനും അഭിനേതാവുമായി കഴിവ് തെളിയിച്ച നീരജിന്റെ കെട്ടുറപ്പുള്ള ഒരു തിരക്കഥക്കായി പ്രേക്ഷകർ കാത്തിരിക്കുന്നു.

സംവിധാനം: ⭐️⭐️
പുതുമയുള്ള കഥയും പേരും അവതരണവുമായി മലയാള സിനിമയിൽ തുടക്കം കുറിച്ച സംവിധായകനാണ് ഗിരീഷ് മനോ.എന്നാൽ രണ്ടാമത്തെ സിനിമയിലെത്തുമ്പോൾ,പുതുമയില്ലാത്ത പ്രമേയവും അവതരണ രീതിയും സ്വീകരിച്ചു പ്രേക്ഷകരെ ബോറടിപ്പിച്ചു. ആദ്യപകുതി ചടുലതയോടെ അവതരിപ്പിച്ചപ്പോൾ, രണ്ടാം പകുതി ഇഴഞ്ഞു നീങ്ങുന്ന അവസ്ഥയിലെത്തി. ഒരുപക്ഷെ ഇത്തരത്തിലുള്ള സിനിമകൾ വേഗത നഷ്ടപ്പെടുത്താതെ അവതരിപ്പിക്കുമ്പോൾ ആയിരിക്കണം അവ പ്രേക്ഷകരെ രസിപ്പിക്കുന്നത്.ഹാസ്യ രംഗങ്ങൾ കണ്ടുമടുത്തവ ആയതുകൊണ്ട് ഈ കഥ പുതുമയുള്ള ഒരു കഥാപശ്ചാത്തലത്തിൽ അവതരിപ്പിക്കാമായിരുന്നു.ഓരോ ട്വിസ്റ്റുകൾക്കു ശേഷം മറ്റൊരു ട്വിസ്റ്റുകൾ വന്നുചേരുന്നത് പ്രേക്ഷകരിൽ ആകാംഷ ജനിപ്പിക്കുന്ന വിധത്തിലുള്ള സാങ്കേതിക മികവ് ആ രംഗങ്ങളിൽ കണ്ടില്ല. ഗോപി സുന്ദറിന്റെ ശബ്ദകോലാഹലങ്ങൾ വേണ്ടുവോളം പശ്ചാത്തലത്തിൽ ആവശ്യത്തിനും അനാവശ്യത്തിനും ഉപയോഗിച്ചിട്ടുണ്ട്!

സാങ്കേതികം: ⭐️⭐️
ഒരു മെക്സിക്കൻ അപരതയ്ക്കു ശേഷം പ്രകാശ് വേലായുധൻ ഛായാഗ്രഹണം നിർവഹിച്ച സിനിമയാണ് ലവകുശ.ട്രെയിൻ യാത്രക്കിടയിലുള്ള രംഗങ്ങളെല്ലാം കൃത്രിമത്വം നിറഞ്ഞതായിരുന്നു എന്നത് വ്യക്തം.ട്രെയിൻ യാത്രക്കിടയിൽ നീര്ജും അജു വർഗീസും വാതലിനടുത്തു ചെന്ന് നിൽക്കുന്ന രംഗങ്ങൾ ഒഴിവാക്കാമായിരുന്നു. സ്വിമ്മിങ് പൂളിനടിയിലുള്ള രംഗങ്ങളും കൃത്രിമത്വം വ്യക്തമായിരുന്നു.ഒരു ഹാസ്യ സിനിമക്ക് അനിയോജ്യമായ കളർഫുൾ വിഷ്വൽസ് പോലും ഈ സിനിമയിൽ കണ്ടില്ല. അയ്യപ്പന്റെ ‘അമ്മ നെയ്യപ്പം ചുട്ടു എന്ന ഗാനത്തിന്റെ ചിത്രീകരണം രസകരമായിരുന്നു. ഗോപി സുന്ദർ ഈണമിട്ട ആ ഗാനം രസകരമായിരുന്നു. ഗോപി സുന്ദറിന്റെ മുൻകാല സിനിമകളിലെ പശ്ചാത്തല സംഗീതം കൂട്ടികൊഴച്ചു വീണ്ടും അവതരിപ്പിച്ചു ശബ്ദകോലാഹലങ്ങൾ സൃഷ്ട്ടിച്ചു. ചിലയിടങ്ങളിൽ അയ്യപ്പൻറെ അമ്മ എന്ന പാട്ടിന്റെ സംഗീതം ഉപയോഗിച്ചത് നന്നായിരുന്നു. ജോൺകുട്ടിയുടെ സന്നിവേശം സമ്പൂർണ്ണ നിരാശ സമ്മാനിച്ചു. ഇഴഞ്ഞുനീങ്ങുന്ന മന്ദഗതിയിലാണ് രണ്ടാംപകുതി അവസാനിച്ചത്. ലവനും കുശനും എയർ ഹോസ്ട്രെസ്സ് സ്‌കൂളിൽ ചെന്ന് കാണിച്ചുകൂട്ടുന്നത് കോമാളിത്തരങ്ങളിലൂടെ കണ്ടെത്തുന്ന ചില സത്യങ്ങൾ ഹാസ്യത്തിന് വേണ്ടി മാത്രം ഉപയോഗിച്ചവയാണ്. നാഥൻ കണ്ണൂരിന്റെ കലാസംവിധാനം ശരാശരിയിലൊതുങ്ങി.പൊളിഞ്ഞു കിടക്കുന്ന കെട്ടിടത്തിൽ മെയിൻ സ്വിച്ച് ഉൾപ്പടെയുള്ള സജ്ജീകരണങ്ങളും,പകൽ പോലെ പ്രകാശം പരത്തുന്ന വെളിച്ചവും അവിശ്വസനീയമായിരുന്ന.സമീറ സനീഷിന്റെ വസ്ത്രാലങ്കാരം പതിവുപോലെ മികവ് പുലർത്തി.

അഭിനയം: ⭐️⭐️⭐️
ലവനായി നീരജ് മാധവും കുശനായി അജു വർഗീസും മികച്ച അഭിനയം കാഴ്ചവെച്ചു. അജു വർഗീസിന്റെ സമീപകാലത്തെ ഏറ്റവും മികച്ച ഹാസ്യ കഥാപാത്രം ഇതുതന്നെയായിരിക്കും. ജോൺ കാപ്പ എന്ന പോലീസ് ഉദ്യോഗസ്ഥന്റെ വേഷത്തിൽ ബിജു മേനോനും തിളങ്ങി.ചില രംഗങ്ങളിൽ അദ്ദേഹത്തിന്റെ സ്ഥിരം ശൈലിയിലുള്ള അഭിനയ മുഹൂർത്തങ്ങളുണ്ട് ഈ സിനിമയിലുണ്ട്. വിജയ് ബാബു തനിക്കു ലഭിച്ച വേഷം രസകരമായി അവതരിപ്പിച്ചു. പലപ്പോഴും മുദ്ദ്ഗവ് സിനിമയിലെ റാംബോയെ ഓർമ്മിപ്പിച്ചു. നിർമ്മൽ പാലാഴിയുടെ കോഴിക്കോടൻ ഭാഷ രസകരമായിരുന്നു. ഇവരെ കൂടാതെ, മേജർ രവി, ബാലാജി ശർമ്മ, അശ്വിൻകുമാർ, വിഷ്ണു ഗോവിന്ദൻ, ദീപ്തി സതി, അദിതി രവി, അഞ്ജലി നായർ, തെസ്നി ഖാൻ, ബേബി അക്ഷര എന്നിവരും ഈ സിനിമയിൽ അഭിനയിച്ചിട്ടുണ്ട്.

വാൽക്കഷ്ണം: കഥയിൽ കഴമ്പില്ലാത്ത ഹാസ്യ സിനിമകൾ ഇഷ്ടപ്പെടുന്നവരെ ഒരുപരിധിവരെ ലവനും കുശനും തൃപ്തിപെടുത്തിയേക്കാം!

സംവിധാനം: ഗിരീഷ് മനോ
നിർമ്മാണം: ജെയ്സൺ ഇളംകുളം
എഴുത്ത്: നീരജ് മാധവ്
ഛായാഗ്രഹണം: പ്രകാശ് വേലായുധൻ
സന്നിവേശം: ജോൺ കുട്ടി
സംഗീതം: ഗോപി സുന്ദർ
ഗാനരചന: ബി.കെ.ഹരിനാരായണൻ
കലാസംവിധാനം: നാഥൻ കണ്ണൂർ
വസ്ത്രാലങ്കാരം: സമീറ സനീഷ്
ചമയം: റോണക്സ് സേവ്യർ
വിതരണം: ആർ.ജെ.ഫിലിം

സോളോ – ⭐️⭐️⭐️

സോളോ – പഞ്ചഭൂത ഏകഭാവം! ⭐️⭐️⭐️

പഞ്ചഭൂതങ്ങളിലെ ജലം, വായു, അഗ്നി, ഭൂമി എന്നീ നാല് പ്രതിഭാസങ്ങളെ ആസ്‍പദമാക്കി ശിവന്റെ ഭാവങ്ങളോട് സമന്വയിപ്പിച്ചു അവതരിപ്പിച്ച നാല് സിനിമകളുടെ ആന്തോളജിയാണ് ബിജോയ് നമ്പ്യാരുടെ സോളോ. ഭാര്യയാൽ, കാമുകിയാൽ, അമ്മയാൽ, സഹോദരിയാൽ ഒറ്റപ്പെടുന്ന ഒരു പുരുഷന്റെ അവസ്ഥയാണ് സോളോ എന്ന ശീർഷകതിനർത്ഥം.

ഓരോ സാഹചര്യത്തിനനുസരിച്ചു സ്വന്തം രൂപം മാറാൻ സാധിക്കുന്ന വസ്തുവാണ് ജലം. കാമുകിയോട് സ്നേഹവും, ഭാര്യയോട് ദേഷ്യവും, മകളോട് വാത്സല്യവും പ്രകടിപ്പിക്കുന്ന ജലം പോലെയായ ശേഖറിന്റെ കഥയാണ് വേൾഡ് ഓഫ് ശേഖർ. ജലം പോലെ ഒരിക്കൽ ശാന്തവും മറ്റൊരിക്കൽ അശാന്തവുമാകുന്ന ശേഖറും അയാളുടെ പ്രണയിനി രാധികയുടെയും കഥയാണ് സോളോയിലെ ആദ്യ ചെറു-സിനിമ. മൂന്ന് ലോകങ്ങളായ ആകാശം, ഭൂമി, നരകം എന്നിവയുടെ പ്രതീകമായ ത്രിലോകിന്റെ പ്രതികാര കഥയാണ് വേൾഡ് ഓഫ് ത്രിലോക് എന്ന ചെറു-സിനിമയുടെ പ്രമേയം. പഞ്ചഭൂതങ്ങളിളെ വായുവിനോട് ഉപമിച്ചാണ് ത്രിലോകിന്റെ കഥ അവതരിപ്പിച്ചത്.ശിവന്റെ രൗദ്രഭാവത്തിൽ എല്ലാത്തിനെയും നശിപ്പിക്കാനുള്ള, അഗ്നിയോളം ശക്തിയുള്ള ശിവയുടെ പ്രതികാരത്തിന്റെ കഥയാണ് സോളോയിലെ മൂന്നാമത്തെ ചെറു-സിനിമ വേൾഡ് ഓഫ് ശിവയുടെ പ്രമേയം. ബാല്യത്തിൽ അമ്മയാൽ ഒറ്റപ്പെടുന്ന ശിവ, അച്ഛനെ കൊന്നവരോടുള്ള പ്രതികാരം വീട്ടുന്നതാണ് ഈ ചെറു-സിനിമയിലൂടെ സംവിധായകൻ അവതരിപ്പിക്കുന്നത്. പ്രണയവും, വിരഹവും ഒരുപോലെ വിഷയമാകുന്ന സോളോയിലെ അവസാന ചെറു-സിനിമയാണ് വേൾഡ് ഓഫ് രുദ്ര. ഭൂമിയോളം ക്ഷമയുള്ള രുദ്രയുടെ പ്രണയത്തിന്റെയും വിരഹത്തിന്റെയും സഹനത്തിന്റെയും കഥ, ആശയത്തിലും അവതരണത്തിലും വ്യത്യസ്തമായിരുന്നു.

പ്രമേയം: ⭐⭐⭐
പ്രമേയപരമായി ഏറെ പുതുമകൾ സമ്മാനിച്ച സോളോയിലൂടെ ശിവന്റെ ഭാവങ്ങൾ നായക കഥാപാത്രത്തിനും, പഞ്ചഭൂതങ്ങളിളെ നാല് പ്രതിഭാസങ്ങൾ കഥാപശ്ചാത്തലമാവുകയും അവ കഥാപാത്രത്തിന്റെ സ്വഭാവത്തെ സ്വാധീനിക്കുകയും ചെയ്യുന്നു. ഇത്രയും ശക്തമായ ഒരു പ്രമേയത്തിന്റെ പിന്തുണയോടെയാണ് നാല് സിനിമകളെയും സംവിധായകൻ ബന്ധിപ്പിച്ചത് എന്നത് ആന്തോളജി സിനിമകളെ അപേക്ഷിച്ചു മികവാണ്. കേരള കഫെയിലും, അഞ്ചു സുന്ദരികളിലും, പോപ്പിൻസിലും, ഡി കമ്പനിയിലും, ഒരേ യാത്രയിലും, നാല് പെണ്ണുങ്ങളിലും പ്രത്യക്ഷത്തിൽ ചെറു സിനിമകളിൽ തമ്മിൽ ബന്ധമൊന്നുമില്ല. എന്നാൽ, സോളോയിൽ അത്തരത്തിലുള്ള പ്രമേയപരമായി ബന്ധം ഉൾപെടുത്താൻ ബിജോയ് നമ്പ്യാരിനു കഴിഞ്ഞിട്ടുണ്ട്.

തിരക്കഥ: ⭐⭐
സംവിധായകൻ ബിജോയ് നമ്പ്യാരാണ് സോളോയുടെ കഥയും തിരക്കഥയും എഴുതിയത്. ധന്യ സുരേഷിന്റേതാണ് സംഭാഷണങ്ങൾ. മികവുറ്റ ഒരു പ്രമേയം ലഭിച്ചിട്ടും പ്രേക്ഷരെ തൃപ്തിപ്പെടുത്തുന്ന കഥയോ കഥാസന്ദർഭങ്ങളോ രചിക്കുവാൻ ബിജോയ്‌ക്കു സാധിച്ചില്ല എന്നിടത്താണ് സോളോ നിരാശപ്പെടുത്തുന്നത്. ശേഖറിന്റെ കഥ പ്രവചിക്കാവുന്ന വഴിയിലൂടെ തന്നെ സഞ്ചരിച്ചു. തമിഴ് മൊഴിമാറ്റ സിനിമകളിലെ സംഭാഷണങ്ങൾ പോലെ പലയിടങ്ങളിലും സംഭാഷണങ്ങൾ മുഴച്ചുനിന്നിരുന്നു. ജലം എന്ന പ്രതിഭാസത്തോടു നീതി പുലർത്തുന്നതായിരുന്നു കഥാസന്ദർഭങ്ങൾ.ത്രിലോകിന്റെ കഥ വേറിട്ട വഴിയിലൂടെ സഞ്ചരിച്ച പ്രതികാര കഥയായിരുന്നു. ആദ്യാവസാനം പ്രേക്ഷകരിൽ ആകാംഷ ജനിപ്പിച്ച കഥാസന്ദർഭങ്ങളും കഥാഗതിയും സംഭാഷണങ്ങളുമായിരുന്നു. എന്നാൽ, വായുവിനോട് ഉപമിച്ച ഈ കഥയിൽ പ്രത്യക്ഷത്തിൽ വായുവിനെ സാധൂകരിക്കുന്ന ഒന്നുംതന്നെ ചർച്ചചെയ്യുന്നില്ല. ശിവയുടെ പ്രതികാര കഥ കഴമ്പില്ലാത്ത പോലെ അനുഭവപെട്ടു. അമ്മയിൽ നിന്ന് ചെറുപ്പത്തിലേ ഒറ്റപ്പെട്ട ശിവ, അച്ഛനെ കൊന്നവരോടുള്ള പ്രതികാരത്തിനു വേണ്ടി ബോംബയിലെത്തുന്നു. എന്നാൽ, അച്ഛനോടുള്ള മകന്റെ അടുപ്പം ഒരു രംഗത്തിൽ പോലും കാണിക്കുന്നുമില്ല. ശിവന്റെ രൗദ്രഭാവവും അഗ്നി പോലെ എല്ലാം ചുട്ടെരിക്കാനുള്ള ശക്തിയും കഥാസന്ദർഭങ്ങളാകുന്നു. ശിവയുടെ കഥാപാത്ര രൂപീകരണം മികവുപുലർത്തി. സംഭാഷണങ്ങളും കഥയോട് നീതിപുലർത്തുന്നവയായിരുന്നു. ക്‌ളൈമാക്‌സ് രംഗത്തിലുള്ള ട്വിസ്റ്റ് പ്രവചിക്കാനാവുന്നതുമായിരുന്നു. അവസാന ചെറുകഥയായ രുദ്രയുടെ കഥ സമ്പൂർണ്ണ നിരാശയാണ് സമ്മാനിച്ചത്. കഥയിലെ യുക്തിയില്ലായ്മ്മയാണ് പ്രധാന പ്രശ്നമായത്. ഗൗരവമുള്ള കഥാസന്ദർഭങ്ങളും സംഭാഷണങ്ങളും പ്രേക്ഷകർ പരിഹസിച്ചുതള്ളുന്ന അവസ്ഥയിലായി. ഭൂമിയോളം ക്ഷമയുള്ള രുദ്ര കഥാവസാനം എല്ലാവരോടും ക്ഷമിക്കുന്നു സങ്കടങ്ങൾ സഹിക്കുന്നു എന്നത് പ്രേക്ഷകരിലേക്കുത്തുന്നില്ല. സംഭാഷണങ്ങൾ ഒട്ടുമിക്കതും നാടകീയമായിരുന്നു.

സംവിധാനം: ⭐⭐⭐
സെയ്താൻ, വാസിർ, ഡേവിഡ് എന്നീ സിനിമകൾക്ക് ശേഷം ബിജോയ് നമ്പ്യാർ സംവിധാനം ചെയ്യുന്ന സോളോ അദ്ദേഹത്തിന്റെ ആദ്യ മലയാള സിനിമയാണ്. മോഹൻലാൽ നായകനായ റിഫ്ലെക്ഷൻസ് എന്ന ചെറു സിനിമയാണ് ബിജോയിയുടെ ഏക മലയാള സിനിമ ബന്ധം. മണിരത്നത്തിന്റെ മികച്ച ശിഷ്യനാണെന്നു താനെന്നു സോളോയിലൂടെ തെളിയിക്കുവാൻ ബിജോയ്‌ക്കു സാധിച്ചു. സാങ്കേതിക മികവോടെ അവതരണത്തിൽ വ്യത്യസ്തത സൃഷ്ടിക്കുവാൻ ബിജോയ്‌ക്കു കഴിഞ്ഞിട്ടുണ്ട്.പ്രണയം വിഷയമാക്കിയ ആദ്യ സിനിമയും അവസാന സിനിമയും പതിഞ്ഞ താളത്തിലും, പ്രതികാരം വിഷമായ രണ്ടാമത്തേതും മൂന്നാമതെത്തും ചടുലമായ വേഗതയിലുമാണ് അവതരിപ്പിച്ചത്. പുതുമകളൊന്നും അവകാശപ്പെടാനില്ലാത്ത കഥാസന്ദർഭങ്ങളെ സാങ്കേതികത്തികവോടെ അവതരിപ്പിച്ചു ബിജോയ് കയ്യടി നേടി. അഭിനേതാക്കളെ തിരഞ്ഞെടുക്കുന്നതിൽ പൂർണ വിജയം കൈവരിക്കാൻ ബിജോയ്‌ക്കു സാധിച്ചില്ല.

സാങ്കേതികം: ⭐⭐⭐
മധു നീലകണ്ഠൻ, ഗിരീഷ് ഗംഗാധരൻ, സെജൽ ഷാ എന്നിവരുടെ ഛായാഗ്രഹണം മികവുറ്റതായിരുന്നു. ഓരോ പ്രമേയത്തോടും ഓരോ കഥയോടും ഓരോ സന്ദർഭങ്ങളോടും നീതിപുലർത്തുന്ന ചിത്രീകരണമായിരുന്നു നാല് സിനിമകളിലും കാണുവാൻ സാധിച്ചത്. പ്രണയ രംഗങ്ങളിൽ മനോഹാരിതയും പ്രതികാര രംഗങ്ങളിൽ തീവ്രതയും സൃഷ്ടിക്കുന്ന ഛായാഗ്രഹമായിരുന്നു മൂവരും കാഴ്ചവെച്ചത്.ശ്രീകർ പ്രസാദിന്റെ സന്നിവേശം അതിഗംഭീരമായിരുന്നു ആദ്യ മൂന്ന് സിനിമകളിലും. പ്രേക്ഷകരിൽ ആകാംഷ ജനിപ്പിക്കുന്ന രീതിയിലായിരുന്നു രംഗങ്ങൾ കോർത്തിണക്കിയാണ്. ശേഖറിന്റെ പ്രണയകഥയും ശിവയുടെ പ്രതികാര കഥയുമാണ് സന്നിവേശമികവിൽ പ്രേക്ഷകർക്ക് ഇഷ്ടമായത്. രുദ്രയുടെ കഥ പ്രാധാന്യമില്ലാത്ത രംഗങ്ങളിലൂടെ അവതരിപ്പിച്ചു വലിച്ചുനീട്ടി ബോറടിപ്പിച്ചു.

പ്രശാന്ത് പിള്ള, സൂരജ് എസ് കുറുപ്പ്, ഗോവിന്ദ് മേനോൻ, തൈക്കുടം ബ്രിഡ്ജ്, മസാല കോഫി, ഗൗരവ് ഗോദ്കിന്ദി, രാഗിണി ഭഗവത്, അഭിനവ് ബൻസാൽ, അഗാം, ഫിൽറ്റർ കോഫി, സെസ് ഓൺ ദി ബീറ്റ് എന്നിവരാണ് സോളോയുടെ സംഗീതവും പശ്ചാത്തല സംഗീതവും നിർവഹിച്ചത്. ശിവയുടെ കഥയിലെ പശ്ചാത്തല സംഗീതം ഒറ്റവാക്കിൽ പറഞ്ഞാൽ ഗംഭീരം. അതുപോലെ, രുദ്രയുടെ കഥയിലെ സീത കല്യാണം എന്ന പാട്ടും മനോഹരമായിരുന്നു. പത്തിലധികം പാട്ടും പശ്ചാത്തല സംഗീതവും കഥാസന്ദർഭങ്ങളുടെ മാറ്റു കൂട്ടുന്നവയായിരുന്നു. സമീപകാലത്തു സംഗീതത്തിലൂടെ കഥ പറഞ്ഞ സിനിമയൊന്നും മലയാളത്തിലിറങ്ങിയിട്ടില്ല. ശ്രീ ശങ്കർ-വിഷ്ണു ഗോവിന്ദ് എന്നിവരുടെ ശബ്ദ സംവിധാനം, അമരന്റെ കലാസംവിധാനം, ഗോപിക ഗുൽവാഡിയുടെ വസ്ത്രാലങ്കാരം, ജാവേദിന്‍റെ സംഘട്ടനം എന്നിവയെല്ലാം നാല് കഥകളോടും നീതിപുലർത്തി.

അഭിനയം: ⭐⭐⭐
നാല് കഥാപാത്രങ്ങളെയും വ്യസ്ത്യസ്തമായി അവതരിപ്പിച്ചു ദുൽഖർ സൽമാൻ മികവ് പുലർത്തി. അവയിൽ ഏറ്റവും മികച്ചത് ശിവയുടെ വേഷമായിരുന്നു.സംഭാഷണങ്ങൾ പോലുമില്ലാതെ ശിവയെ ദുൽഖർ ഗംഭീരമാക്കി.ആദ്യ സിനിമയിൽ ധൻസിക, സൗബിൻ ഷാഹിർ, ജോൺ വിജയ്, സതീഷ്, സിദ്ധാർഥ് മേനോൻ,അനുപമ കുമാർ, ഷീലു എബ്രഹാം, നിത്യശ്രീ, കിഷോർ എന്നിവരാണ് അഭിനേതാക്കൾ.രണ്ടാമത്തെ സിനിമയിൽ രഞ്ജി പണിക്കർ, ആർതി വെങ്കടേഷ്, അൻസൻ പോൾ, ആൻ അഗസ്റ്റിൻ എന്നിവരാണ് അഭിനയിച്ചത്.ശിവയുടെ കഥയിൽ മനോജ് കെ. ജയൻ, ശ്രുതി ഹരിഹരൻ, പ്രകാശ് ബെലവാഡി, ഗോവിന്ദ് മേനോൻ, സായി തമൻകാർ, ദിനേശ് പ്രഭാകർ, പീതാംബര മേനോൻ, ആശാ ജയറാം, റോഹൻ മനോജ്, എ.ർ.മണികണ്ഠൻ എന്നിവരാണ് അഭിനേതാക്കൾ.നേഹ ശർമ്മ, ദിനോ മോറിയ, നാസ്സർ, സുഹാസിനി, മാണിത്, ദീപ്തി സതി, സുരേഷ് മേനോൻ, സുജാത സെയ്ഗാൾ എന്നിവരാണ് രുദ്രയുടെ കഥയിൽ അഭിനയിച്ചത്.

വാൽക്കഷ്ണം: അവതരണത്തിന്റെ പുതുമയിലും സാങ്കേതിക മികവിലും സോളോ യുവാക്കളെ ആസ്വദിപ്പിക്കുന്നു.

എഴുത്ത്, സംവിധാനം: ബിജോയ് നമ്പ്യാർ
നിർമ്മാണം: എബ്രഹാം മാത്യു, ബിജോയ് നമ്പ്യാർ
സംഭാഷണങ്ങൾ: ധന്യ സുരേഷ്
ഛായാഗ്രഹണം: മധു നീലകണ്ഠൻ, ഗിരീഷ് ഗംഗാധരൻ, സെജൽ ഷാ
സന്നിവേശം: ശ്രീകർ പ്രസാദ്
സംഗീതം: പ്രശാന്ത് പിള്ള, സൂരജ് എസ് കുറുപ്പ്, ഗോവിന്ദ് മേനോൻ, തൈക്കുടം ബ്രിഡ്ജ്, മസാല കോഫി, ഗൗരവ് ഗോദ്കിന്ദി, രാഗിണി ഭഗവത്, അഭിനവ് ബൻസാൽ, അഗാം, ഫിൽറ്റർ കോഫി, സെസ് ഓൺ ദി ബീറ്റ്
കലാസംവിധാനം: അമരൻ
വസ്ത്രാലങ്കാരം: ഗോപിക ഗുൽവാഡി
ശബ്ദസംവിധാനം: ശ്രീശങ്കർ, ഗോവിന്ദ്
സംഘട്ടനം: ജാവേദ്
വിതരണം: ഗെറ്റ്എവേ ഫിലിംസ്.

ഷെർലക് ടോംസ് – ⭐️⭐️

ഷെർലക് ടോംസ് – കുറ്റാന്വേഷണ വിഢിത്തരങ്ങൾ! ⭐️⭐️

മലയാളത്തിൽ ഹാസ്യ സിനിമകൾ അണിയിച്ചൊരുക്കിയ ഷാഫി, ജനപ്രിയതാരം ബിജു മേനോൻ, ബുദ്ധിമാനായ എഴുത്തുകാരൻ സച്ചി എന്നിവർ ഒന്നിച്ച സിനിമയാണ് ഷെർലക് ടോംസ്.

വിശ്വവിഘ്യാതനായ ഷെർലക് ഹോംസ് എന്ന കുറ്റാന്വേഷകനെ പോലെ കുറ്റാന്വേഷണം ഇഷ്ടപെടുന്ന ടോംസ് എന്ന് വിളിപ്പേരുള്ള തോമസ് എന്നയാൾ കള്ളപ്പണക്കാരെ തേടിയിറങ്ങുന്നു. ഇന്ത്യൻ റെവന്യൂ സർവീസിലെ ഉദ്യോഗസ്ഥൻ തോമസ് എന്ന ടോംസിന്റെ കഥയാണ് നജീം കോയ-സച്ചി-ഷാഫി ടീമിന്റെ ഷെർലക് ടോംസ് എന്ന സിനിമ.

കെട്ടിച്ചമച്ച കുറ്റാന്വേഷണ കഥ വിഡ്ഢിത്തരങ്ങൾ നിറഞ്ഞ കഥാസന്ദർഭങ്ങളിലൂടെയും അസഭ്യ സംഭാഷണങ്ങളിലൂടെയും പഴഞ്ചൻ സംവിധാന രീതിയാലും അവതരിപ്പിക്കപ്പെട്ട സിനിമയാണിത്. ക്‌ളൈമാക്‌സിലെ ട്വിസ്റ്റ് മാത്രമാണ് ഷെർലക്‌ ടോംസിന്റെ ഏക സവിശേഷത.

പ്രമേയം: ⭐
ഷെർലക് ഹോംസ്ന്റെ ആരാധകൻ ഇന്ത്യൻ റവന്യു സർവീസിലെ ഉദ്യോഗസ്ഥനാകുന്നു. അയാളുടെ കുടുംബജീവിതത്തിലെ പ്രശ്നങ്ങൾ ഔദ്യോഗിക ജീവിതത്തെ പ്രതികൂലമായി ബാധിക്കുന്നു. തുടർന്നുണ്ടാകുന്ന പ്രശ്നങ്ങൾ ഹാസ്യത്തിന്റെ മേമ്പൊടിയോടെ വലിയ പുതുമകളൊന്നുമില്ലാതെ കഥയുടെ രൂപത്തിലാക്കിയത് നജീം കോയയാണ്. 2 കണ്ട്രീസിന് ശേഷം നജീം കോയ എഴുതുന്ന കഥ എന്നത് പ്രേക്ഷകരിൽ ആകാംഷ ജനിപ്പിക്കുന്ന ഒന്നായിരുന്നു. എന്നാൽ, ഈ സിനിമയുടെ കാര്യത്തിൽ വിശ്വസനീയമായ ഒരു കഥ രൂപപെടുത്തിയെടുക്കാൻ നജീമിന് സാധിച്ചില്ല. രസകരമായ കഥാതന്തുവിനെ അവിശ്വസനീയമായ കഥാഗതിയിലൂടെ അവതരിപ്പിക്കാൻ ശ്രമിച്ചത് പ്രതികൂലമായി ബാധിച്ചു. ഷെർലക് ഹോംസ് എന്ന കുറ്റാന്വേഷകന്റെ വിളിപ്പേരുണ്ട് എന്നുള്ളതല്ലാതെ ബിജു മേനോൻ അവതരിപ്പിക്കുന്ന തോമസിന് സാക്ഷാൽ ഹോംസിനോട് ഉപമിക്കാവുന്ന ഒരു സവിശേഷതയുമില്ല. മാൻ ഓൺ എ ലെഡ്‌ജ്‌ എന്ന ഇംഗ്ലീഷ് സിനിമയിൽ നിന്നും പ്രചോദനമുൾക്കൊണ്ടാണ് നജീം കോയ ഈ സിനിമയുടെ കഥ രൂപപ്പെടുത്തിയത്.

തിരക്കഥ: ⭐⭐
നജീം കോയയും ഷാഫിയും സച്ചിയും ചേർന്നാണ് ഈ സിനിമയുടെ കഥാസന്ദർഭങ്ങൾ എഴുതിയത്. അതീവ ബുദ്ധിമാനായ തോമസിന്റെ കുറ്റാന്വേഷക കഴിവുകൾ കഥാസന്ദർഭങ്ങളാക്കുന്നതിന് പകരം, മദ്യപാനവും അസഭ്യവും പാട്ടും കുടുംബപ്രശ്നങ്ങളും സമന്വയിപ്പിച്ചു പ്രേക്ഷകരെ ബോറടിപ്പിക്കുന്ന കഥാസന്ദർഭങ്ങൾ ആയിരുന്നു ആദ്യ പകുതിയിലുടനീളം. കാറ്റഴിച്ചുവിട്ട ബലൂൺ പോലെ അന്തവും കുന്തവുമില്ലാതെ രണ്ടാം പകുതി കോമാളിത്തരങ്ങൾ കൊണ്ട് കുത്തിനിറച്ചു. ആത്മഹത്യാ ശ്രമവും അത് കാണാനെത്തുന്ന മണ്ടന്മാരായ നാട്ടുകാരും, രക്ഷിക്കാനെത്തുന്ന പോലീസും ഫയർ ഫോഴ്‌സും തുടങ്ങി എല്ലാവിധ കോപ്രായങ്ങളുംകൊണ്ട് സമ്പന്നമായിരുന്നു രണ്ടാം പകുതി. അവസാനം,ഷെർലക് ടോംസ് എന്ന സിനിമയുടെ ശീർഷകത്തോട്‌ നീതിപുലർത്തുവാൻ വേണ്ടി കണ്ടുപിടിച്ച ക്‌ളൈമാക്‌സും.മേല്പറഞ്ഞ കഥാസന്ദർഭങ്ങൾക്കു മാറ്റുകൂട്ടുന്നു അസഭ്യ സംഭാഷണങ്ങൾ എഴുതിയത് സച്ചിയാണ്. സച്ചിയോളം കഴിവുള്ള ഒരു തിരക്കഥാകൃത്തിൽ നിന്നും വിഡ്ഡിത്തരങ്ങൾ മാത്രമുള്ള ഇതുപോലൊരു തിരക്കഥ ബിജു മേനോൻ പോലും പ്രതീക്ഷിച്ചിട്ടുണ്ടാവില്ല.

സംവിധാനം: ⭐⭐
ഹാസ്യ സിനിമയ്ക്ക് വേണ്ടി എഴുതപെട്ട ഒരു തിരക്കഥയും കഥാപാത്രങ്ങളും സംഭാഷണങ്ങളും, നടീനടന്മാരെയും ലഭിച്ചപ്പോൾ ഷാഫി സ്ഥിരം അവതരണ രീതി തന്നെ സ്വീകരിച്ചു. കുട്ടികൾക്കും കുടുംബങ്ങൾക്കും ഒരുവട്ടം കണ്ടുമറക്കാവുന്ന ഒരു സിനിമ എന്നതിലുപരി പ്രാധാന്യം ഷാഫി ഈ സിനിമയ്ക്ക് നൽകിയതായി തോന്നിയില്ല.ഷെർലക് ടോംസ് അഥവാ തോമസിന്റെ കുടുംബജീവിത പ്രശ്നങ്ങൾ പലയാവർത്തി പറഞ്ഞു പ്രേക്ഷകരെ വെറുപ്പിച്ചു. രണ്ടാം പകുതിയിൽ ടോംസ് ആത്മഹത്യാ ചെയ്യുന്നതായിരുന്നു നല്ലതു എന്നുവരെ തോന്നിപ്പിക്കുന്ന അത്രയും വെറുപ്പ് പ്രേക്ഷകർക്ക് ഒന്നടങ്കം സിനിമയോട് തോന്നി. സലിംകുമാറും ജോബിയും ഹരീഷും കോട്ടയം നസീറും മികവോടെ അവരവരുടെ കഥാപാത്രങ്ങളെ അവതരിപ്പിച്ചതുകൊണ്ടു പ്രേക്ഷകർ രണ്ടേകാൽ മണിക്കൂർ പ്രദർശനശാലകളിൽ തന്നെ ഇരുന്നു.

സാങ്കേതികം: ⭐⭐
ആൽബിയുടെ ഛായാഗ്രഹണം സിനിമയ്ക്ക് അനിയോജ്യമായിരുന്നു. പുതുമയുള്ള ഷോട്ടുകൾ ഒന്നുമില്ലായിരുന്നുവെങ്കിലും, ഒരു ഹാസ്യ ചിത്രത്തിനു വേണ്ട രസകരമായ വിഷ്വൽസ് ചിത്രീകരിക്കുവാൻ ആൽബിക്ക് സാധിച്ചു. വി.സാജന്റെ സന്നിവേശം ആദ്യപകുതിയിൽ സമ്പൂർണ്ണ നിരാശയാണ് സമ്മാനിച്ചത്. ഇഴഞ്ഞു നീങ്ങുന്ന അവസ്ഥയിലായിരുന്നു ആദ്യപകുതിയിൽ രംഗങ്ങളിൽ ഭൂരിഭാഗവും. ഷെർലക് ടോംസിന്റെ ചെറുപ്പകാലം ചിത്രീകരിക്കാതെ തന്നെ അയാളുടെ സ്വഭാവം മനസിലാക്കികൊടുക്കുവാൻ സാധിക്കുമായിരുന്നു. അതുപോലെ, ആദ്യ പകുതിയിലെ മദ്യം വിൽക്കുന്ന കടയിൽ നിന്ന് തോമസിന്റെ സുഹൃത്തുക്കൾ മദ്യം മോഷ്ടിക്കാനുപയോഗിക്കുന്ന വിദ്യ ശ്രദ്ധിച്ചവർക്കെല്ലാം, ക്‌ളൈമാക്‌സ് ഊഹിക്കാനാവുന്നതായിരുന്നു. ഹരിനാരായണൻ എഴുതി ബിജിബാൽ ഈണമിട്ട പള്ളിക്കലച്ചന്റെ മോളെ എന്ന ഗാനം രസകരമായിരുന്നു. രാഹുൽ രാജാണ് പശ്ചാത്തല സംഗീതം നൽകിയത്. ഷെർലക് ടോംസിനു അനിയോജ്യമായ ഒരു കോമഡി പശ്ചാത്തല സംഗീതം ബിജു മേനോന്റെ കഥാപാത്രത്തിന് നൽകാമായിരുന്നു. സുജിത് രാഘവാണ് കലാസംവിധാനം നിർവഹിച്ചത്. 1993 കാലഘട്ടത്തിലെ സ്ക്കൂളും പുസ്തകങ്ങളും ചായക്കടയും വിശ്വസനീയത നൽകി. റോഷൻ നിർവഹിച്ച ചമയം ഓരോ കഥാപാത്രങ്ങൾക്കും അനിയോജ്യമായിരുന്നു. അതിൽ പ്രധാനമായിരുന്നു കലാഭവൻ ഷാജോണിന്റെ മേക്കപ്പ്. പല കാലഘട്ടങ്ങളിലൂടെ കടന്നുപോകുന്ന ആ കഥാപാത്രത്തിനും അയാളുടെ അവസ്ഥക്കും യോജിച്ചതായിരുന്നു മേക്കപ്പ്. എസ്.ബി.സതീഷ് ആണ് വസ്ത്രാലങ്കാരം നിർവഹിച്ചത്.

അഭിനയം: ⭐⭐
ഷെർലക് ടോംസെന്ന കഥാപാത്രത്തെ തന്റെ സ്വദസിദ്ധമായ ശൈലിയിൽ ബിജു മേനോൻ അവതരിപ്പിച്ചു. ഏറെ നാളുകൾക്കു ശേഷം സലിം കുമാർ അമിതാഭിനയം കാഴ്ചവെക്കാതെ ആശാൻ കഥാപാത്രം അവതരിപ്പിച്ചു. സുരേഷ് കൃഷ്ണയും ഹരീഷും കോട്ടയം നസീറും റാഫിയും ജോബിയും ഷാജോണും ഹാസ്യ കഥാപാത്രങ്ങളിൽ തിളങ്ങി. ഏറെ പ്രയാസമുള്ള ഒരു കഥാപാത്രത്തെ ശ്രിന്ദ കയ്യടക്കത്തോടെ അവതരിപ്പിച്ചു. അമിതാഭിനയത്തിലേക്ക് വഴുതിവീഴാൻ സാധ്യതയുള്ള ഒന്നായിരുന്നു സദാസമയം വഴക്കു കൂടുന്ന ഭാര്യ കഥാപാത്രം. ഇവരെ കൂടാതെ വിജയരാഘവൻ, മിയ ജോർജ്, വിജയകുമാർ, പ്രശാന്ത് അലക്‌സാണ്ടർ, രാജേഷ് പറവൂർ, ജയൻ ചേർത്തല, ബാലാജി ശർമ്മ, വിനുത ലാൽ, ദിനേശ് പ്രഭാകർ, മോളി കണ്ണമാലി, നെൽസൺ, കലാഭവൻ ഹനീഫ്, വിനോദ് കെടാമംഗലം, അനിയപ്പൻ എന്നിവരും ഈ സിനിമയിലെ പ്രധാന കഥാപാത്രങ്ങളെ അവതരിപ്പിച്ചു.

വാൽക്കഷ്ണം: ഷെർലക് ടോംസ് സിനിമയുടെ രണ്ടാം പകുതിയിൽ പ്രേക്ഷകരോടെന്ന പോലെ ബിജു മേനോൻ ചോദിക്കുന്ന ചോദ്യമുണ്ട്. “നിങ്ങൾക്ക് വേറെ പണിയൊന്നുമില്ല?, മണ്ടന്മാർ!” ആ ചോദ്യത്തിന്റെ പൊരുൾ പ്രേക്ഷകർ തിരിച്ചറിഞ്ഞത് രണ്ടേകാൽ മണിക്കൂറുകൾക്കു ശേഷം പ്രദർശന ശാലകളിൽ നിന്നെറങ്ങുബോഴാണ്!

സംവിധാനം: ഷാഫി
കഥ: നജീം കോയ
തിരക്കഥ: സച്ചി, നജീം കോയ, ഷാഫി
സംഭാഷണങ്ങൾ: സച്ചി
നിർമ്മാണം: പ്രേം മേനോൻ
ബാനർ: ഗ്ലോബൽ യുണൈറ്റഡ് മീഡിയ
ഛായാഗ്രഹണം: ആൽബി
സന്നിവേശം: സാജൻ
സംഗീതം: ബിജിബാൽ
പശ്ചാത്തല സംഗീതം: രാഹുൽ രാജ്
ഗാനരചന: ഹരിനാരായണൻ
കലാസംവിധാനം: സുജിത് രാഘവ്
ചമയം: റോഷൻ
വസ്ത്രാലങ്കാരം: എസ്.ബി.സതീഷ്
വിതരണം: സെഞ്ച്വറി ഫിലിംസ്.

രാമലീല – ⭐️⭐️⭐️

രാമലീല – ആസ്വാദ്യകരം ആവേശകരം! ⭐️⭐️⭐️

ജനപ്രിയ നായകൻ ജനപ്രിയ സിനിമയുമായി ജനഹൃദയങ്ങൾ കീഴടക്കുന്ന കാഴ്ച കാണുമ്പോൾ, മലയാളികൾ വ്യക്തികളോടൊപ്പമല്ല, നല്ല സിനിമയോടൊപ്പമാണെന്ന സത്യം ബോധ്യമാകും. കുട്ടികൾക്കും കുടുംബങ്ങൾക്കും യുവാക്കൾക്കും ഒരുപോലെ ആസ്വദിച്ചു കണ്ടിരിക്കാവുന്ന തരക്കേടില്ലാത്തൊരു എന്റർറ്റെയിനറാണ് ദിലീപിന്റെ രാമലീല. യുക്തിയില്ലാത്ത കഥാസന്ദർഭങ്ങൾ എന്നൊരു പോരായ്മ മാറ്റിനിർത്തിയാൽ സമീപകാലത്തിറങ്ങിയ രാഷ്ട്രീയ പശ്ചാത്തലത്തിലുള്ള മികച്ച കുറ്റാന്വേഷണ സിനിമ തന്നെയാണിത്. അരുൺ ഗോപിയുടെ സംവിധാന മികവും ദിലീപിന്റെ അഭിനയ മികവും ഗോപി സുന്ദറിന്റെ പശ്ചാത്തല സംഗീതവും സിനിമയുടെ മാറ്റുകൂട്ടിയിട്ടുണ്ട്.

പുലിമുരുകനു ശേഷം ടോമിച്ചൻ മുളകുപാടം നിർമ്മിച്ച രാമലീല സംവിധാനം ചെയ്തത് നവാഗതനായ അരുൺ ഗോപിയാണ്. സച്ചിയാണ് കഥയും തിരക്കഥയും സംഭാഷണങ്ങളും എഴുതിയത്. ഷാജികുമാർ ഛായാഗ്രഹണവും വിവേക് ഹർഷൻ സന്നിവേശവും ഗോപി സുന്ദർ സംഗീത സംവിധാനവും നിർവഹിച്ചിരിക്കുന്നു. ദിലീപിനെ കൂടാതെ മലയാള സിനിമയിലെ ഒരു വമ്പൻ താരനിര തന്നെ ഈ സിനിമയുടെ ഭാഗമായിട്ടുണ്ട്.

പ്രമേയം: ⭐⭐
രാഷ്ട്രീയ പശ്ചാത്തലത്തിൽ നിർമ്മിക്കപ്പെട്ടിട്ടുള്ള ഒട്ടുമിക്ക സിനിമകളുടെയും പ്രമേയം ഒന്ന് തന്നെയാകും. നിലവിലുള്ള രാഷ്ട്രീയ സാമൂഹിക പ്രശ്നങ്ങളൊക്കെയാകും അവയിൽ വിഷയമാകുന്നത്. രാമലീലയെ സംബന്ധിച്ചിടത്തോളം, ഇതൊരു പൂർണ രാഷ്ട്രീയ സിനിമയല്ല. രാഷ്ട്രീയ പശ്ചാത്തലമുള്ള ഒരു പ്രതികാര കഥയും അതിനോടൊപ്പം ഒരു കുറ്റാന്വേഷണ കഥയുമാണ്. പ്രമേയപരമായി പുതുമയൊന്നും അവകാശപ്പെടാനില്ലെങ്കിലും, ആകാംഷയുളവാക്കുന്ന ഒരു കഥ രൂപപെടുത്തിയെടുക്കാൻ സച്ചിക്കു കഴിഞ്ഞിട്ടുണ്ട്.

തിരക്കഥ: ⭐⭐
പ്രേക്ഷകരുടെ ഇഷ്ടാനിഷ്ടങ്ങൾ കൃത്യമായി മനസിലാക്കി തിരക്കഥ എഴുതുന്നവരിൽ പ്രാവിണ്യം നേടിയ എഴുത്തുകാരിൽ പ്രധാനിയാണ് സച്ചി. ചോക്കളേറ്റ് മുതൽ അനാർക്കലി വരെ അതിനുദാഹരണങ്ങളാണ്. ജോഷിയുടെ റൺ ബേബി റൺ പോലെയുള്ള ഒരു കഥയും തിരക്കഥയുമാണ് രാമലീലയുടേത്. എന്നാൽ, മേല്പറഞ്ഞ സച്ചിയുടെ തിരക്കഥകളിലെല്ലാം യുക്തിയെ ചോദ്യം ചെയ്യുന്ന ഒരു സന്ദർഭം പോലുമുണ്ടായിരുന്നില്ല. എന്നാൽ,രാമലീലയിൽ അത് വേണ്ടുവോളമുണ്ട്. കുറ്റാരോപിതനായ രാമനുണ്ണി കേസിലെ തനിക്കെതിരായ തെളിവുകൾ അടിസ്ഥാന രഹിതമാണെന്ന് തെളിയിക്കുന്ന രംഗങ്ങൾ അതിനുദാഹരണം. കേരളത്തിലെ പോലീസുകാർ രാമനുണ്ണി നിരത്തുന്ന തെളിവുകൾ വിശ്വസിച്ചു എന്നത് സച്ചിയെപ്പോലെയുള്ള ഒരു എഴുത്തുകാരനിൽ നിന്ന് പ്രതീക്ഷിച്ചില്ല. യുക്തിയെ ചോദ്യം ചെയ്യുന്ന ഒന്ന് രണ്ടു സന്ദർഭങ്ങൾ മാറ്റിനിർത്തിയാൽ ഏവർക്കും ഇഷ്ടമാകുന്നതും ത്രസിപ്പിക്കുന്നതുമായ രംഗങ്ങളാണ് സിനിമയിലുടനീളം.ഇന്നത്തെ സാഹചര്യത്തിൽ അനുകൂലമായ ചില സംഭാഷണങ്ങളും മികവുറ്റതായിരുന്നു.

സംവിധാനം: ⭐⭐⭐
ജോഷിയുടെ പൊളിറ്റിക്കൽ സിനിമകളെ അനുസ്മരിപ്പിക്കുന്ന അവതരണമാണ് അരുൺ ഗോപി സ്വീകരിച്ചത്. സിനിമയുടെ ഉദ്യോഗജനകമായ കഥാസന്ദർഭങ്ങളെ മികച്ച ഛായാഗ്രഹണത്തിന്റെയും സന്നിവേശത്തിന്റെയും പശ്ചാത്തല സംഗീതത്തിന്റെയും അകമ്പടിയോടെ പ്രേക്ഷകരിൽ ആകാംഷ ജനിപ്പിക്കുന്ന വിധത്തിൽ അവതരിപ്പിക്കുവാൻ സംവിധായകൻ ശ്രമിച്ചിട്ടുണ്ട്. ആദ്യപകുതിയിലെ ത്രസിപ്പിക്കുന്ന രംഗങ്ങളും ക്‌ളൈമാക്‌സ് രംഗങ്ങളും കയ്യടക്കത്തോടെ അരുൺ ഗോപി സംവിധാനം നിർവഹിച്ചു.രണ്ടാം പകുതിയിലെ ഹാസ്യ രംഗങ്ങൾ സിനിമയുടെ ഗൗരവത്തിനു ദോഷകരമായി ബാധിച്ചിട്ടുണ്ട്. അതുപോലെ, കഥാഗതി നിർണ്ണയിക്കുന്ന സുപ്രധാന രണ്ടാം പകുതിയിലെ ഒരു രംഗവും യുക്തിയെ ചോദ്യംചെയ്യുന്ന രീതിയിലായത് പ്രേക്ഷകരിൽ മുഷിപ്പുളവാക്കിയിട്ടുണ്ട്. ആദ്യ സംവിധാന സംരംഭം എന്ന നിലയിൽ അരുൺ ഗോപിക്ക് അഭിമാനിക്കാവുന്ന ഒന്നായിരിക്കും രാമലീല എന്നുറപ്പ്!

സാങ്കേതികം: ⭐⭐⭐
ഷാജികുമാറിന്റെ ഛായാഗ്രഹണം രാമലീലയ്ക്കു ത്രില്ലർ പരിവേഷം നൽകുവാൻ സഹായിച്ചു. ഈ സിനിമയിലെ രംഗങ്ങളെല്ലാം തന്നെ രാഷ്ട്രീയ-കുറ്റാന്വേഷണ സിനിമയ്ക്ക് അനിയോജ്യമായ രീതിയിലായിരുന്നു ചിത്രീകരിച്ചിരിക്കുന്നത്. വിവേക് ഹർഷന്റെ സന്നിവേശവും രംഗങ്ങൾക്ക് അനിയോജ്യമായിരുന്നു. കഥയിൽ പ്രാധാന്യമില്ലാത്ത രംഗങ്ങളൊന്നും തന്നെ ആദ്യപകുതിയില്ല. എന്നാൽ, സിനിമയുടെ ഗൗരവം നഷ്ടപ്പെടുത്തുന്ന ചില ഹാസ്യ രംഗങ്ങൾ രണ്ടാം പകുതിയിൽ നിന്ന് ഒഴിവാക്കാമായിരുന്നു. ഗോപി സുന്ദറിന്റെ പശ്ചാത്തല സംഗീതം ഗംഭീരമായിരുന്നു. പ്രേക്ഷകരിൽ ആകാംഷയും ആവേശവും ഒരുപോലെ ജനിപ്പിക്കുവാൻ ഗോപി സുന്ദറിന് സാധിച്ചിട്ടുണ്ട്. ഹരിനാരായണന്റെ വരികൾക്ക് ഗോപി സുന്ദർ ഈണമിട്ട രണ്ടു പാട്ടുകളും ശരാശരിയിലൊതുങ്ങി. സുജിത് രാഘവന്റെ കലാസംവിധാനം സിനിമയ്ക്കുതകുന്നവയായിരുന്നു. സമീറ സനീഷിന്റെ വസ്ത്രാലങ്കാരം കഥാപാത്രങ്ങളുടെ സ്വഭാവത്തിന് ഉതകുന്നവയായിരുന്നു.

അഭിനയം: ⭐⭐⭐
ദിലീപ്, കലാഭവൻ ഷാജോൺ, രാധിക ശരത്കുമാർ, സിദ്ദിഖ്, മുകേഷ്, വിജയരാഘവൻ, രഞ്ജി പണിക്കർ, സുരേഷ് കൃഷ്ണ, സായികുമാർ, സലിം കുമാർ, സാദിഖ്, അനിൽ മുരളി, ഷാജു ശ്രീധർ, നിർമ്മാതാവ് സുരേഷ് കുമാർ, പ്രശാന്ത് അലക്‌സാണ്ടർ, അശോകൻ, ശ്രീജിത്ത് രവി, വിനോദ് കെടാമംഗലം, അമീർ നിയാസ്, ചാലി പാലാ, മജീദ്, പ്രയാഗ മാർട്ടിൻ, ലെന എന്നിവരാണ് രാമലീലയിലെ അഭിനേതാക്കൾ. രാമനുണ്ണിയായി തകർപ്പൻ അഭിനയം ദിലീപ് കാഴ്ചവെച്ചു. ആദ്യപകുതിയിൽ ഗൗരവമുള്ള ഭാവപ്രകടനവും രണ്ടാം പകുതിയിൽ കുശാഗ്രബുദ്ധിയുള്ള ഒരാളിനെ പോലെ പക്വതയാർന്ന അഭിനയവും കാഴ്ചവെച്ചു ദിലീപ് കയ്യടി നേടി. ഹാസ്യരസവാഹമായ സംഭാഷണങ്ങളിലൂടെ ഷാജോണും, കുറ്റാന്വേഷണ ഉദ്യോഗസ്ഥനായി മുകേഷും, ഉദയഭാനു എന്ന രാഷ്ട്രീയക്കാരനായി സിദ്ദിക്കും, വില്ലൻ പരിവേഷമുള്ള സഖാവായി വിജയരാഘവനും അഭിനയ മികവ് പുലർത്തി. ഇവരെ കൂടാതെ ഈ സിനിമയിലുള്ള ഓരോ അഭിനേതാക്കളും ഊർജസ്വലമായ രീതിയിൽ അവരവരുടെ കഥാപാത്രങ്ങളെ അവതരിപ്പിച്ചു.

വാൽക്കഷ്ണം: രാമനുണ്ണിയുടെ ലീലകളിൽ യുക്തിയില്ലെങ്കിലിലും, ആസ്വാദ്യകരവും ആവേശകരവുമാകുന്ന അവതരണമാണ് രാമലീലയെ വ്യത്യസ്ഥമാക്കുന്നത്.

സംവിധാനം: അരുൺ ഗോപി
എഴുത്ത്: സച്ചി
നിർമ്മാണം: ടോമിച്ചൻ മുളകുപാടം
ഛായാഗ്രഹണം: ഷാജികുമാർ
സന്നിവേശം: വിവേക് ഹർഷൻ
സംഗീതം: ഗോപി സുന്ദർ
കലാസംവിധാനം: സുജിത് രാഘവ്
ഗാനരചന: ഹരിനാരായണൻ
വസ്ത്രാലങ്കാരം: സമീറ സനീഷ്
ചമയം: ജിതേഷ് പൊയ്യ
ശബ്ദസംവിധാനം: രംഗനാഥ് രവി
വിതരണം: മുളകുപാടം ഫിലിംസ്.