സോളോ – പഞ്ചഭൂത ഏകഭാവം!

പഞ്ചഭൂതങ്ങളിലെ ജലം, വായു, അഗ്നി, ഭൂമി എന്നീ നാല് പ്രതിഭാസങ്ങളെ ആസ്‍പദമാക്കി ശിവന്റെ ഭാവങ്ങളോട് സമന്വയിപ്പിച്ചു അവതരിപ്പിച്ച നാല് സിനിമകളുടെ ആന്തോളജിയാണ് ബിജോയ് നമ്പ്യാരുടെ സോളോ. ഭാര്യയാൽ, കാമുകിയാൽ, അമ്മയാൽ, സഹോദരിയാൽ ഒറ്റപ്പെടുന്ന ഒരു പുരുഷന്റെ അവസ്ഥയാണ് സോളോ എന്ന ശീർഷകതിനർത്ഥം.

ഓരോ സാഹചര്യത്തിനനുസരിച്ചു സ്വന്തം രൂപം മാറാൻ സാധിക്കുന്ന വസ്തുവാണ് ജലം. കാമുകിയോട് സ്നേഹവും, ഭാര്യയോട് ദേഷ്യവും, മകളോട് വാത്സല്യവും പ്രകടിപ്പിക്കുന്ന ജലം പോലെയായ ശേഖറിന്റെ കഥയാണ് വേൾഡ് ഓഫ് ശേഖർ. ജലം പോലെ ഒരിക്കൽ ശാന്തവും മറ്റൊരിക്കൽ അശാന്തവുമാകുന്ന ശേഖറും അയാളുടെ പ്രണയിനി രാധികയുടെയും കഥയാണ് സോളോയിലെ ആദ്യ ചെറു-സിനിമ. മൂന്ന് ലോകങ്ങളായ ആകാശം, ഭൂമി, നരകം എന്നിവയുടെ പ്രതീകമായ ത്രിലോകിന്റെ പ്രതികാര കഥയാണ് വേൾഡ് ഓഫ് ത്രിലോക് എന്ന ചെറു-സിനിമയുടെ പ്രമേയം. പഞ്ചഭൂതങ്ങളിളെ വായുവിനോട് ഉപമിച്ചാണ് ത്രിലോകിന്റെ കഥ അവതരിപ്പിച്ചത്.ശിവന്റെ രൗദ്രഭാവത്തിൽ എല്ലാത്തിനെയും നശിപ്പിക്കാനുള്ള, അഗ്നിയോളം ശക്തിയുള്ള ശിവയുടെ പ്രതികാരത്തിന്റെ കഥയാണ് സോളോയിലെ മൂന്നാമത്തെ ചെറു-സിനിമ വേൾഡ് ഓഫ് ശിവയുടെ പ്രമേയം. ബാല്യത്തിൽ അമ്മയാൽ ഒറ്റപ്പെടുന്ന ശിവ, അച്ഛനെ കൊന്നവരോടുള്ള പ്രതികാരം വീട്ടുന്നതാണ് ഈ ചെറു-സിനിമയിലൂടെ സംവിധായകൻ അവതരിപ്പിക്കുന്നത്. പ്രണയവും, വിരഹവും ഒരുപോലെ വിഷയമാകുന്ന സോളോയിലെ അവസാന ചെറു-സിനിമയാണ് വേൾഡ് ഓഫ് രുദ്ര. ഭൂമിയോളം ക്ഷമയുള്ള രുദ്രയുടെ പ്രണയത്തിന്റെയും വിരഹത്തിന്റെയും സഹനത്തിന്റെയും കഥ, ആശയത്തിലും അവതരണത്തിലും വ്യത്യസ്തമായിരുന്നു.

പ്രമേയം: ⭐⭐⭐
പ്രമേയപരമായി ഏറെ പുതുമകൾ സമ്മാനിച്ച സോളോയിലൂടെ ശിവന്റെ ഭാവങ്ങൾ നായക കഥാപാത്രത്തിനും, പഞ്ചഭൂതങ്ങളിളെ നാല് പ്രതിഭാസങ്ങൾ കഥാപശ്ചാത്തലമാവുകയും അവ കഥാപാത്രത്തിന്റെ സ്വഭാവത്തെ സ്വാധീനിക്കുകയും ചെയ്യുന്നു. ഇത്രയും ശക്തമായ ഒരു പ്രമേയത്തിന്റെ പിന്തുണയോടെയാണ് നാല് സിനിമകളെയും സംവിധായകൻ ബന്ധിപ്പിച്ചത് എന്നത് ആന്തോളജി സിനിമകളെ അപേക്ഷിച്ചു മികവാണ്. കേരള കഫെയിലും, അഞ്ചു സുന്ദരികളിലും, പോപ്പിൻസിലും, ഡി കമ്പനിയിലും, ഒരേ യാത്രയിലും, നാല് പെണ്ണുങ്ങളിലും പ്രത്യക്ഷത്തിൽ ചെറു സിനിമകളിൽ തമ്മിൽ ബന്ധമൊന്നുമില്ല. എന്നാൽ, സോളോയിൽ അത്തരത്തിലുള്ള പ്രമേയപരമായി ബന്ധം ഉൾപെടുത്താൻ ബിജോയ് നമ്പ്യാരിനു കഴിഞ്ഞിട്ടുണ്ട്.

തിരക്കഥ: ⭐⭐
സംവിധായകൻ ബിജോയ് നമ്പ്യാരാണ് സോളോയുടെ കഥയും തിരക്കഥയും എഴുതിയത്. ധന്യ സുരേഷിന്റേതാണ് സംഭാഷണങ്ങൾ. മികവുറ്റ ഒരു പ്രമേയം ലഭിച്ചിട്ടും പ്രേക്ഷരെ തൃപ്തിപ്പെടുത്തുന്ന കഥയോ കഥാസന്ദർഭങ്ങളോ രചിക്കുവാൻ ബിജോയ്‌ക്കു സാധിച്ചില്ല എന്നിടത്താണ് സോളോ നിരാശപ്പെടുത്തുന്നത്. ശേഖറിന്റെ കഥ പ്രവചിക്കാവുന്ന വഴിയിലൂടെ തന്നെ സഞ്ചരിച്ചു. തമിഴ് മൊഴിമാറ്റ സിനിമകളിലെ സംഭാഷണങ്ങൾ പോലെ പലയിടങ്ങളിലും സംഭാഷണങ്ങൾ മുഴച്ചുനിന്നിരുന്നു. ജലം എന്ന പ്രതിഭാസത്തോടു നീതി പുലർത്തുന്നതായിരുന്നു കഥാസന്ദർഭങ്ങൾ.ത്രിലോകിന്റെ കഥ വേറിട്ട വഴിയിലൂടെ സഞ്ചരിച്ച പ്രതികാര കഥയായിരുന്നു. ആദ്യാവസാനം പ്രേക്ഷകരിൽ ആകാംഷ ജനിപ്പിച്ച കഥാസന്ദർഭങ്ങളും കഥാഗതിയും സംഭാഷണങ്ങളുമായിരുന്നു. എന്നാൽ, വായുവിനോട് ഉപമിച്ച ഈ കഥയിൽ പ്രത്യക്ഷത്തിൽ വായുവിനെ സാധൂകരിക്കുന്ന ഒന്നുംതന്നെ ചർച്ചചെയ്യുന്നില്ല. ശിവയുടെ പ്രതികാര കഥ കഴമ്പില്ലാത്ത പോലെ അനുഭവപെട്ടു. അമ്മയിൽ നിന്ന് ചെറുപ്പത്തിലേ ഒറ്റപ്പെട്ട ശിവ, അച്ഛനെ കൊന്നവരോടുള്ള പ്രതികാരത്തിനു വേണ്ടി ബോംബയിലെത്തുന്നു. എന്നാൽ, അച്ഛനോടുള്ള മകന്റെ അടുപ്പം ഒരു രംഗത്തിൽ പോലും കാണിക്കുന്നുമില്ല. ശിവന്റെ രൗദ്രഭാവവും അഗ്നി പോലെ എല്ലാം ചുട്ടെരിക്കാനുള്ള ശക്തിയും കഥാസന്ദർഭങ്ങളാകുന്നു. ശിവയുടെ കഥാപാത്ര രൂപീകരണം മികവുപുലർത്തി. സംഭാഷണങ്ങളും കഥയോട് നീതിപുലർത്തുന്നവയായിരുന്നു. ക്‌ളൈമാക്‌സ് രംഗത്തിലുള്ള ട്വിസ്റ്റ് പ്രവചിക്കാനാവുന്നതുമായിരുന്നു. അവസാന ചെറുകഥയായ രുദ്രയുടെ കഥ സമ്പൂർണ്ണ നിരാശയാണ് സമ്മാനിച്ചത്. കഥയിലെ യുക്തിയില്ലായ്മ്മയാണ് പ്രധാന പ്രശ്നമായത്. ഗൗരവമുള്ള കഥാസന്ദർഭങ്ങളും സംഭാഷണങ്ങളും പ്രേക്ഷകർ പരിഹസിച്ചുതള്ളുന്ന അവസ്ഥയിലായി. ഭൂമിയോളം ക്ഷമയുള്ള രുദ്ര കഥാവസാനം എല്ലാവരോടും ക്ഷമിക്കുന്നു സങ്കടങ്ങൾ സഹിക്കുന്നു എന്നത് പ്രേക്ഷകരിലേക്കുത്തുന്നില്ല. സംഭാഷണങ്ങൾ ഒട്ടുമിക്കതും നാടകീയമായിരുന്നു.

സംവിധാനം: ⭐⭐⭐
സെയ്താൻ, വാസിർ, ഡേവിഡ് എന്നീ സിനിമകൾക്ക് ശേഷം ബിജോയ് നമ്പ്യാർ സംവിധാനം ചെയ്യുന്ന സോളോ അദ്ദേഹത്തിന്റെ ആദ്യ മലയാള സിനിമയാണ്. മോഹൻലാൽ നായകനായ റിഫ്ലെക്ഷൻസ് എന്ന ചെറു സിനിമയാണ് ബിജോയിയുടെ ഏക മലയാള സിനിമ ബന്ധം. മണിരത്നത്തിന്റെ മികച്ച ശിഷ്യനാണെന്നു താനെന്നു സോളോയിലൂടെ തെളിയിക്കുവാൻ ബിജോയ്‌ക്കു സാധിച്ചു. സാങ്കേതിക മികവോടെ അവതരണത്തിൽ വ്യത്യസ്തത സൃഷ്ടിക്കുവാൻ ബിജോയ്‌ക്കു കഴിഞ്ഞിട്ടുണ്ട്.പ്രണയം വിഷയമാക്കിയ ആദ്യ സിനിമയും അവസാന സിനിമയും പതിഞ്ഞ താളത്തിലും, പ്രതികാരം വിഷമായ രണ്ടാമത്തേതും മൂന്നാമതെത്തും ചടുലമായ വേഗതയിലുമാണ് അവതരിപ്പിച്ചത്. പുതുമകളൊന്നും അവകാശപ്പെടാനില്ലാത്ത കഥാസന്ദർഭങ്ങളെ സാങ്കേതികത്തികവോടെ അവതരിപ്പിച്ചു ബിജോയ് കയ്യടി നേടി. അഭിനേതാക്കളെ തിരഞ്ഞെടുക്കുന്നതിൽ പൂർണ വിജയം കൈവരിക്കാൻ ബിജോയ്‌ക്കു സാധിച്ചില്ല.

സാങ്കേതികം: ⭐⭐⭐⭐
മധു നീലകണ്ഠൻ, ഗിരീഷ് ഗംഗാധരൻ, സെജൽ ഷാ എന്നിവരുടെ ഛായാഗ്രഹണം മികവുറ്റതായിരുന്നു. ഓരോ പ്രമേയത്തോടും ഓരോ കഥയോടും ഓരോ സന്ദർഭങ്ങളോടും നീതിപുലർത്തുന്ന ചിത്രീകരണമായിരുന്നു നാല് സിനിമകളിലും കാണുവാൻ സാധിച്ചത്. പ്രണയ രംഗങ്ങളിൽ മനോഹാരിതയും പ്രതികാര രംഗങ്ങളിൽ തീവ്രതയും സൃഷ്ടിക്കുന്ന ഛായാഗ്രഹമായിരുന്നു മൂവരും കാഴ്ചവെച്ചത്.ശ്രീകർ പ്രസാദിന്റെ സന്നിവേശം അതിഗംഭീരമായിരുന്നു ആദ്യ മൂന്ന് സിനിമകളിലും. പ്രേക്ഷകരിൽ ആകാംഷ ജനിപ്പിക്കുന്ന രീതിയിലായിരുന്നു രംഗങ്ങൾ കോർത്തിണക്കിയാണ്. ശേഖറിന്റെ പ്രണയകഥയും ശിവയുടെ പ്രതികാര കഥയുമാണ് സന്നിവേശമികവിൽ പ്രേക്ഷകർക്ക് ഇഷ്ടമായത്. രുദ്രയുടെ കഥ പ്രാധാന്യമില്ലാത്ത രംഗങ്ങളിലൂടെ അവതരിപ്പിച്ചു വലിച്ചുനീട്ടി ബോറടിപ്പിച്ചു.

പ്രശാന്ത് പിള്ള, സൂരജ് എസ് കുറുപ്പ്, ഗോവിന്ദ് മേനോൻ, തൈക്കുടം ബ്രിഡ്ജ്, മസാല കോഫി, ഗൗരവ് ഗോദ്കിന്ദി, രാഗിണി ഭഗവത്, അഭിനവ് ബൻസാൽ, അഗാം, ഫിൽറ്റർ കോഫി, സെസ് ഓൺ ദി ബീറ്റ് എന്നിവരാണ് സോളോയുടെ സംഗീതവും പശ്ചാത്തല സംഗീതവും നിർവഹിച്ചത്. ശിവയുടെ കഥയിലെ പശ്ചാത്തല സംഗീതം ഒറ്റവാക്കിൽ പറഞ്ഞാൽ ഗംഭീരം. അതുപോലെ, രുദ്രയുടെ കഥയിലെ സീത കല്യാണം എന്ന പാട്ടും മനോഹരമായിരുന്നു. പത്തിലധികം പാട്ടും പശ്ചാത്തല സംഗീതവും കഥാസന്ദർഭങ്ങളുടെ മാറ്റു കൂട്ടുന്നവയായിരുന്നു. സമീപകാലത്തു സംഗീതത്തിലൂടെ കഥ പറഞ്ഞ സിനിമയൊന്നും മലയാളത്തിലിറങ്ങിയിട്ടില്ല. ശ്രീ ശങ്കർ-വിഷ്ണു ഗോവിന്ദ് എന്നിവരുടെ ശബ്ദ സംവിധാനം, അമരന്റെ കലാസംവിധാനം, ഗോപിക ഗുൽവാഡിയുടെ വസ്ത്രാലങ്കാരം, ജാവേദിന്‍റെ സംഘട്ടനം എന്നിവയെല്ലാം നാല് കഥകളോടും നീതിപുലർത്തി.

അഭിനയം: ⭐⭐⭐
നാല് കഥാപാത്രങ്ങളെയും വ്യസ്ത്യസ്തമായി അവതരിപ്പിച്ചു ദുൽഖർ സൽമാൻ മികവ് പുലർത്തി. അവയിൽ ഏറ്റവും മികച്ചത് ശിവയുടെ വേഷമായിരുന്നു.സംഭാഷണങ്ങൾ പോലുമില്ലാതെ ശിവയെ ദുൽഖർ ഗംഭീരമാക്കി.ആദ്യ സിനിമയിൽ ധൻസിക, സൗബിൻ ഷാഹിർ, ജോൺ വിജയ്, സതീഷ്, സിദ്ധാർഥ് മേനോൻ,അനുപമ കുമാർ, ഷീലു എബ്രഹാം, നിത്യശ്രീ, കിഷോർ എന്നിവരാണ് അഭിനേതാക്കൾ.രണ്ടാമത്തെ സിനിമയിൽ രഞ്ജി പണിക്കർ, ആർതി വെങ്കടേഷ്, അൻസൻ പോൾ, ആൻ അഗസ്റ്റിൻ എന്നിവരാണ് അഭിനയിച്ചത്.ശിവയുടെ കഥയിൽ മനോജ് കെ. ജയൻ, ശ്രുതി ഹരിഹരൻ, പ്രകാശ് ബെലവാഡി, ഗോവിന്ദ് മേനോൻ, സായി തമൻകാർ, ദിനേശ് പ്രഭാകർ, പീതാംബര മേനോൻ, ആശാ ജയറാം, റോഹൻ മനോജ്, എ.ർ.മണികണ്ഠൻ എന്നിവരാണ് അഭിനേതാക്കൾ.നേഹ ശർമ്മ, ദിനോ മോറിയ, നാസ്സർ, സുഹാസിനി, മാണിത്, ദീപ്തി സതി, സുരേഷ് മേനോൻ, സുജാത സെയ്ഗാൾ എന്നിവരാണ് രുദ്രയുടെ കഥയിൽ അഭിനയിച്ചത്.

വാൽക്കഷ്ണം: അവതരണത്തിന്റെ പുതുമയിലും സാങ്കേതിക മികവിലും സോളോ യുവാക്കളെ ആസ്വദിപ്പിക്കുന്നു.

എഴുത്ത്, സംവിധാനം: ബിജോയ് നമ്പ്യാർ
നിർമ്മാണം: എബ്രഹാം മാത്യു, ബിജോയ് നമ്പ്യാർ
സംഭാഷണങ്ങൾ: ധന്യ സുരേഷ്
ഛായാഗ്രഹണം: മധു നീലകണ്ഠൻ, ഗിരീഷ് ഗംഗാധരൻ, സെജൽ ഷാ
സന്നിവേശം: ശ്രീകർ പ്രസാദ്
സംഗീതം: പ്രശാന്ത് പിള്ള, സൂരജ് എസ് കുറുപ്പ്, ഗോവിന്ദ് മേനോൻ, തൈക്കുടം ബ്രിഡ്ജ്, മസാല കോഫി, ഗൗരവ് ഗോദ്കിന്ദി, രാഗിണി ഭഗവത്, അഭിനവ് ബൻസാൽ, അഗാം, ഫിൽറ്റർ കോഫി, സെസ് ഓൺ ദി ബീറ്റ്
കലാസംവിധാനം: അമരൻ
വസ്ത്രാലങ്കാരം: ഗോപിക ഗുൽവാഡി
ശബ്ദസംവിധാനം: ശ്രീശങ്കർ, ഗോവിന്ദ്
സംഘട്ടനം: ജാവേദ്
വിതരണം: ഗെറ്റ്എവേ ഫിലിംസ്.

Advertisements

പുത്തൻപണം – ⭐


കാസർക്കോടൻ ഷേണായ്: ഒരു തോക്കുനഷ്ടപെട്ടവന്റെ കഥ! – ⭐

അന്ന്, നവംബർ 8നു അഞ്ഞൂറിന്റെയും ആയിരത്തിന്റെയും നോട്ടുകൾ പിൻവലിച്ചുകൊണ്ടു പ്രധാനമന്ത്രി ഏവരെയും ഞെട്ടിച്ചു. ഇന്ന്, ഏപ്രിൽ 12നു പുത്തൻപണം എന്ന സിനിമ പുറത്തിറക്കി രഞ്ജിത്ത് ഏവരെയും ഞെട്ടിച്ചു. ആവേശകരമായ ആദ്യ 20 മിനിറ്റുകൾക്ക് ശേഷം കാറ്റഴിച്ചുവിട്ട ബലൂൺ പോലെ ദിശതെറ്റി സഞ്ചരിച്ചു ഒടുവിൽ മൂക്കുംകുത്തി നിലംപതിച്ച ഒന്നാണ് രഞ്ജിത്തിന്റെ പുത്തൻപണം. സിനിമയുടെ തുടക്കത്തിൽ പടം പുത്തനാണെന്നു തോന്നിപ്പിക്കുമെങ്കിലും, കഥാവസാനം അതൊരു പൂത്തപടമായിരുന്നു എന്ന പ്രേക്ഷകർക്ക് ബോധ്യമാകുന്ന രംഗങ്ങളും അവതരണവുമാണ് രഞ്ജിത്ത് സ്വീകരിച്ചത്. അധികം വൈകാതെ പ്രദർശനശാലകളിൽ നിന്നും പുത്തൻപണം പിൻവലിക്കാനാണ് സാധ്യത.

ത്രീ കളർ സിനിമയുടെ ബാനറിൽ സംവിധായകൻ രഞ്ജിത്ത്, അബാം മൂവീസിന്റെ സാരഥി അബ്രഹാം മാത്യു, നടൻ അരുൺ നാരായണൻ എന്നിവരാണ് പുത്തൻപണം നിർമ്മിച്ചിരിക്കുന്നത്. കഥയും തിരക്കഥയും സംഭാഷണങ്ങളും എഴുതിയത് രഞ്ജിത്താണ്. കാസർകോട് ഭാഷയിലുള്ള കന്നഡ കലർന്ന മലയാള സംഭാഷണങ്ങൾ എഴുതിയിരിക്കുന്നത് ടേക്ക് ഓഫിന്റെ തിരക്കഥാകൃത്തായ പി.വി.ഷാജികുമാറാണ്. ത്രീ കളർ സിനിമ തന്നെയാണ് ഈ സിനിമ കേരളത്തിൽ വിതരണം ചെയ്തിരിക്കുന്നത്.

പ്രമേയം: ⭐⭐
നോട്ടുനിരോധനമുൾപ്പടെ ഒന്നിൽ കൂടുതൽ പ്രമേയങ്ങൾ ചർച്ചചെയ്യുന്ന സിനിമയാണ് പുത്തൻപണം. നോട്ടുനിരോധനം കള്ളപ്പണക്കാരെ പ്രതികൂലമായി ബാധിച്ച നിരവധി വാർത്തകൾ നമ്മൾ കേട്ടിരുന്നു. വൻകിട ബിസിനെസ്സുകാർ തങ്ങളുടെ അനധികൃത സ്വത്തുക്കൾ വെളുപ്പിക്കാൻ ശ്രമിക്കുന്നതായ വാർത്തകൾ പത്രങ്ങളിലൂടെ നമ്മൾ അറിഞ്ഞിരുന്നു. അത്തരത്തിലുള്ള ഒരു പ്രശ്നത്തിൽ, കാസർക്കോട്ടുകാരനായ നിത്യാനന്ദ ഷേണായിക്ക് ഇരുപത്തിയഞ്ച് കോടി രൂപ നഷ്ടമാകുന്നു. ആ പണം തിരിച്ചുപിടിക്കുവാൻ ഷേണായിയും കൂട്ടരും ശ്രമിക്കുന്നതിനിടയിൽ മറ്റു ചില പ്രശ്നങ്ങൾ ചെന്നുപെടുന്നു. അതിനെ തുടർന്നുണ്ടാകുന്ന സംഭവവികാസങ്ങളാണ് രഞ്ജിത്ത് തന്റെ പുത്തൻ സിനിമയായ പുത്തൻപണത്തിലൂടെ അവതരിപ്പിക്കുന്നത്. ഇന്നേവരെ ഇന്ത്യയിലെ ഒരു ഭാഷയിലും നോട്ടു നിരോധനം പ്രമേയമാക്കിയ സിനിമകൾ നിർമ്മിച്ചിട്ടില്ല എന്ന അവകാശവാദം ഉന്നയിക്കുന്ന അണിയറപ്രവർത്തകർ മറന്നുപോയ വിഷയമെന്തെന്നാൽ, ഈ സിനിമയുടെ പ്രമേയം നോട്ടു നിരോധനമല്ല അതിലുപരി കളഞ്ഞുപോയ തോക്കു അന്വേഷിച്ചിറങ്ങിയ അധോലോകനായകന്റെ ദുരവസ്ഥയാണെന്ന വസ്തുതയാണ്. “ഷേണായി ആൻഡ് ദി ഗൺബോയ്” എന്നോ “കാസർക്കോടൻ ഷേണായ്: ഒരു തോക്കുനഷ്ട്ടപ്പെട്ടവന്റെ കഥ” എന്നോ ഈ സിനിമയ്ക്ക് നാമകരണം ചെയ്യുന്നതായിരുന്നു ഉചിതം!

തിരക്കഥ: ⭐
ഒരു പ്രമേയമോ കഥയോ കഥാസന്ദർഭങ്ങളായി രൂപപ്പെടുത്തുമ്പോൾ അതിന്റെ കാതൽ നഷ്ടപെട്ടുപോകുന്ന അവസ്ഥ സിനിമയ്ക്ക് ദോഷകരമാകും എന്നതിന്റെ ഉത്തമ ഉദാഹരണമാണ് പുത്തൻപണം. നോട്ടുനിരോധനം വിഷയമാക്കി എഴുതിത്തുടങ്ങിയിട്ട് പകുതിവഴിയിൽ എത്തിയപ്പോൾ ആരെയോ ഭയന്ന് കഥ മറ്റൊരു ദിശയിലേക്കു തിരിച്ചുവിട്ടതുപോലെ അനുഭവപെട്ടു. ദാവൂദ് ഇബ്രാഹിമിനോട് വരെ ആത്മബന്ധമുള്ള അധോലോകനായകൻ നിത്യാനന്ദ ഷേണായ് കേവലം ഒരു പത്തു വയസ്സുകാരന്റെ മുമ്പിൽ തോക്ക് കെഞ്ചിനടക്കുന്നതു കണ്ടപ്പോൾ, ദേവാസുരവും പ്രാഞ്ചിയേട്ടനും ഇന്ത്യൻറുപ്പിയുമൊക്കെ എഴുതിയത് ഇതേ രഞ്ജിത്ത് തന്നെയാണോ എന്ന തോന്നലുണ്ടായി. നോട്ടുനിരോധനത്തിൽ തുടങ്ങിയ കഥ ഒടുവിൽ ചെന്നെത്തിയത് തോക്കു അന്വേഷണത്തിലാണ് എന്നത് അവിശ്വസനീയമാണ്. തോക്കു അന്വേഷിക്കുന്നതിനിടെയുള്ള കഥാസന്ദർഭങ്ങൾ ഹാസ്യത്തിന് വേണ്ടി കൃത്രിമമായി കെട്ടിച്ചമച്ചത്താണെന്നു വളരെ വ്യക്തമായി അനുഭവപെട്ടു. അതിനു മാറ്റുകൂട്ടുവാൻ ആവശ്യത്തിനും അനാവശ്യത്തിനും ഒട്ടനവധി കഥാപാത്രങ്ങളും. നിത്യാനന്ദ ഷേണായിക്ക് അധോലോക പരിവേഷം നൽകി അവതരിപ്പിച്ചിട്ടു അവസാനം പോലീസിനെയും പത്തു വയസ്സുകാരനെയും കണ്ടപ്പോൾ പേടിക്കുന്നത് എന്തുകൊണ്ടാണ്? ഇതേയാൾ കഥാവസാനം അതിമാനുഷിക പരിവേഷത്തോടെ ഗുണ്ടകളെ ഒറ്റയ്ക്ക് നേരിടുന്നു. നായകന്റെ കഥാപാത്ര രൂപീകരണം പോലും രഞ്ജിത്ത് കൈവിട്ടു കളഞ്ഞ അവസ്ഥയാണ് സിനിമയിലുടനീളം കണ്ടത്. ടേക്ക് ഓഫിന്റെ തിരക്കഥകൃത്ത് പി.വി.ഷാജികുമാറും രഞ്ജിത്തും ചേർന്നാണ് സംഭാഷണങ്ങൾ എഴുതിയത്. ആദ്യമൊക്കെ കേൾക്കാൻ രസമുണ്ടായിരുന്നെങ്കിലും, അവസാനമായപ്പോഴേക്കും കാസർകോടൻ ഭാഷ വിരക്തി മാത്രമാണ് സമ്മാനിച്ചത്. ഈ സിനിമയ്ക്കോ നിത്യാനന്ദ ഷേണായിക്കോ കാസർകോടൻ ഭാഷ നൽകിയതിന്റെ ആവശ്യകത എന്തെന്ന് മനസിലാകുന്നില്ല. ഭാഷയിലുള്ള വ്യസ്തസ്ഥയ്ക്ക് വേണ്ടിയാണെങ്കിൽ അത് അസ്ഥാനത്തുകൊണ്ടു എന്ന് വരുംനാളുകളിൽ ബോധ്യമാകും.

സംവിധാനം: ⭐
പ്രതീക്ഷയുടെ അമിതഭാരമായിട്ടാണ് ഓരോ രഞ്ജിത്ത് സിനിമകളും പ്രേക്ഷകർക്ക് മുമ്പിൽ പ്രദർശനത്തിനെത്തുന്നത്. മമ്മൂട്ടിയുമായി ഒന്നിക്കുന്ന ഒരു രഞ്ജിത്ത് സിനിമ എന്ന പേരിലും, ഏവർക്കും ഇഷ്ടപെട്ട ഇന്ത്യൻ റുപ്പി എന്ന സിനിമയുമായി സമാനതയുള്ള ഒരു നാമകരണവും പുത്തൻപണത്തിനു ആവശ്യത്തിലധികം പ്രതീക്ഷ പ്രേക്ഷകന് നൽകി. അതെല്ലാം അസ്ഥാനത്തായി അവസ്ഥയാണ് സിനിമകണ്ടിറങ്ങുന്ന പ്രേക്ഷകന് സമ്മാനിക്കുന്നത്. സിനിമയുടെ അവതരണ രീതിയാണ് അതിനു കാരണമായത്. പ്രാധാന്യമില്ലാത്ത കഥാപാത്രങ്ങൾ, വേഗതയില്ലാത്ത അവതരണം, പ്രവചിക്കാനാവുന്ന വഴിത്തിരുവുകൾ, ഗ്രഹിക്കാൻ ബുദ്ധിമുട്ടുള്ള സംഭാഷണങ്ങൾ, നല്ല പാട്ടുകളുടെ അഭാവം തുടങ്ങി അവതരണത്തിൽ പാളിപ്പോയ നിരവധി ഘടകങ്ങളാണ് ഈ സിനിമയിലുള്ളത്. കഥാവസാനം നിത്യാനന്ദ ഷേണായിയെ അതിമാനുഷികനാക്കിയ അവിശ്വസനീയമായ സംഘട്ടന രംഗങ്ങളും. ഇതൊരു ആക്ഷേപഹാസ്യ സിനിമയാണോ അതോ അന്വേഷണ സ്വഭാവമുള്ള ത്രില്ലർ സിനിമയാണോ എന്നായിരുന്നു പ്രേക്ഷകരുടെ സംശയം. ഈ സിനിമയും പുത്തൻപണവും തമ്മിലുള്ള ബദ്ധമെന്തെന്നാണ് സിനിമ കണ്ടിറങ്ങുന്ന പ്രേക്ഷകർ ചിന്തിക്കുന്നത്. രഞ്ജിത്തിന്റെ മികച്ചൊരു തിരിച്ചുവരവിനായി കാത്തിരിക്കുന്നു.

സാങ്കേതികം: ⭐⭐⭐
തമിഴ് സിനിമകളിലെ പ്രശസ്ത ഛായാഗ്രാഹകൻ ഓം പ്രകാശാണ് പുത്തൻപണത്തിന്റെ ഛായാഗ്രഹണം നിർവഹിച്ചത്. പുതുമയുള്ള കളർടോൺ ഉപയോഗിച്ചാണ് ഓം പ്രകാശ് ഈ സിനിമ ചിത്രീകരിച്ചത്. ഒരു ത്രില്ലർ സ്വഭാവമുള്ള സിനിമയ്ക്കുതകുന്ന ഛായാഗ്രഹണം എന്നതിലുപരി സവിശേഷതയുള്ള ഫ്രേയിമുകളൊന്നും ഈ സിനിമയിൽ കണ്ടില്ല. മനോജ് കണ്ണോത്താണ് രംഗങ്ങളുടെ സന്നിവേശം നിർവഹിച്ചത്. രണ്ടാം പകുതിയിലെ ഒട്ടുമിക്ക രംഗങ്ങളും ഇഴഞ്ഞുനീങ്ങുന്ന അവസ്ഥയിലായത് പ്രേക്ഷകരെ മുഷിപ്പിച്ചു. തോക്കു തേടിയുള്ള യാത്രയിൽ ഒരു പ്രയോജനവുമില്ലാത്ത ഒരു പാട്ടും അവസാനം തിരുകികയറ്റി പ്രേക്ഷകരെ ബോറടിപ്പിച്ചു. ശബ്ദകോലാഹലങ്ങൾ കൃത്യതയോടെ രംഗങ്ങൾക്ക് അകമ്പടിയായി എന്നതാണ് അച്ചു രാജാമണി നിർവഹിച്ച പശ്ചാത്തല സംഗീതത്തെ കുറിച്ച് പറയേണ്ടത്. റഫീഖ് അഹമ്മദ്, ഹരിനാരായണൻ എന്നിവരാണ് ഗാനരചന. ഷാൻ റഹ്‌മാൻ ഈണമിട്ട രണ്ടു പാട്ടുകളും ശ്രദ്ധനേടുന്നില്ല. രഞ്ജിത്ത് അമ്പാടിയുടെ ചമയവും സമീറ സനീഷിന്റെ വസ്ത്രാലങ്കാരവും കഥാപാത്രങ്ങൾക്ക് അനിയോജ്യമായിരുന്നു. സന്തോഷ് രാമന്റെ കലാസംവിധാനത്തിൽ ഒരുക്കിയ ചവറുകൂമ്പാരം മികവ് പുലർത്തി.

അഭിനയം: ⭐⭐⭐
മമ്മൂട്ടി, മാസ്റ്റർ സ്വരാജ്, മാമുക്കോയ, ബൈജു, സിദ്ദിഖ്, ജോയ് മാത്യു, സായികുമാർ, ഹരീഷ് പെരുമണ്ണ, ഇന്ദ്രൻസ്, നിർമ്മൽ പാലാഴി, സുരേഷ് കൃഷ്ണ, ബിനു കുതിരവട്ടം പപ്പു, പി.ബാലചന്ദ്രൻ, അനിൽ മുരളി, ഗണപതി, വിശാഖ് നായർ, കോട്ടയം നസീർ, കുഞ്ചൻ, ചെമ്പിൽ അശോകൻ, കലാഭവൻ ഹനീഫ്, രാജീവ് കളമശേരി, വിനോദ് കെടാമംഗലം, പ്രശാന്ത് അലക്‌സാണ്ടർ, രഞ്ജി പണിക്കർ, വിജയകുമാർ, അബു സലിം, മദൻമോഹൻ, പ്രവീൺ, മജീദ്, അരുൺ, ഇനിയ, നിരഞ്ജന അനൂപ്, ഷീലു അബ്രഹാം, പാർവതി നമ്പ്യാർ എന്നിവരാണ് ഈ സിനിമയിലെ പ്രധാന അഭിനേതാക്കൾ. നിത്യാനന്ദ ഷേണായിയുടെ രൂപഭാവങ്ങളും ശരീരഭാഷയും കാസർക്കോടൻ സംഭാഷണങ്ങളും മമ്മൂട്ടി മികവോടെ അവതരിപ്പിച്ചു. മമ്മൂട്ടിയുടെ വ്യക്തതയുള്ള ഉച്ചാരണം ആ കഥാപാത്രത്തിന് കൂടുതൽ വിശ്വസനീയത നൽകുന്നു. നാളിതുവരെ ലഭിച്ച ഓരോ കഥാപാത്രവും തന്നാലാകുംവിധം ഗംഭീരമാക്കാനുള്ള കഴിവ് സിദ്ദിഖിനുണ്ട്. പോലീസ് കഥാപാത്രങ്ങൾ നിരവധി അവതരിപ്പിച്ചിട്ടുണ്ടെങ്കിലും, അവയിൽ നിന്നും വ്യത്യസ്തമായിരുന്നു പുത്തൻപണത്തിലെ സിദ്ദിഖിന്റെ പോലീസ് കഥാപാത്രം. സുരാജ് വെഞ്ഞാറമൂടിന് ശേഷം തിരോന്തരം ഭാഷ മികവോടെ സംസാരിക്കുവാൻ കഴിവുള്ള നടനാണ് ബൈജു. ബാലതാരമായി സിനിമയിലെത്തിയ ബൈജുവിന് ഒരുപാട് നാളുകൾക്കു ശേഷം ലഭിച്ച ഒരു വില്ലൻ വേഷമാണ് ഈ സിനിമയിലേത്. ഹാസ്യത്തിന്റെ മേമ്പൊടിയോടെ ആ കഥാപാത്രം ബൈജു ഗംഭീരമാക്കി. പ്രാധാന്യമേറെയുള്ള ഒരു കഥാപാത്രമായിരുന്നു പത്തു വയസ്സുകാരൻ മുത്തുവിന്റേത്. മാസ്റ്റർ സ്വരാജ് തനിക്കാവുംവിധം പരിശ്രമിച്ചുവെങ്കിലും, പലയിടങ്ങളിലും അത് അമിതാഭിനയമായി അനുഭവപെട്ടു. ഇന്ദ്രൻസും ഹരീഷും മാമുക്കോയയും വിശാഖ് നായരും അവരവരുടെ കഥാപാത്രങ്ങൾ നന്നായി അവതരിപ്പിച്ചു.

വാൽക്കഷ്ണം: മമ്മൂട്ടിയുടെ ആരാധകരെ പോലും മുഷിപ്പിക്കുന്ന പുത്തൻപണം ഉടൻ പിൻവലിക്കാനാണ് സാധ്യത!

തിരക്കഥ, സംവിധാനം: രഞ്ജിത്ത്
സംഭാഷണം: രഞ്ജിത്ത്, പി.വി.ഷാജികുമാർ
നിർമ്മാണം: രഞ്ജിത്ത്, അരുൺ നാരായണൻ, അബ്രഹാം മാത്യു
ബാനർ: ത്രീ കളർ സിനിമ
ഛായാഗ്രഹണം: ഓം പ്രകാശ്
സന്നിവേശം: മനോജ് കണ്ണോത്
സംഗീതം: ഷാൻ റഹ്‌മാൻ
ഗാനരചന: ഹരിനാരായണൻ, റഫീഖ് അഹമ്മദ്
പശ്ചാത്തല സംഗീതം: അച്ചു രാജാമണി
കലാസംവിധാനം: സന്തോഷ് രാമൻ
ചമയം: രഞ്ജിത്ത് അമ്പാടി
വസ്ത്രാലങ്കാരം: സമീറ സനീഷ്
വിതരണം: ത്രീ കളർ സിനിമ റിലീസ്.

1971 ബിയോണ്ട് ബോർഡേഴ്സ് – ⭐


2017 ബിയോണ്ട് ടോളറൻസ് – ⭐

നേന്ത്രക്കായ, മുരിങ്ങക്കായ, ചേന, കുമ്പളങ്ങ, പടവലങ്ങ, ബീൻസ്, പച്ചമുളക്, മഞ്ഞൾപൊടി, തേങ്ങാ ചിരണ്ടിയത്, തൈര്, ജീരകം, കറിവേപ്പില, ചെറിയഉള്ളി, വെളിച്ചെണ്ണ എന്നിവ കൃത്യമായ അളവിൽ ചേർത്താൽ തനതായ കേരളം വിഭവം അവിയൽ തയ്യാർ. മേല്പറഞ്ഞ പച്ചക്കറികൾ സ്വന്തം കൃഷിയിടങ്ങളിൽ നിന്നാണ് ലഭിക്കുന്നതെങ്കിൽ അത്യുത്തമം!

ഇത് പാചക നിരൂപണമല്ല. 1971 ബിയോണ്ട് ബോർഡേഴ്സ് എന്ന സിനിമയുടെ തിരക്കഥ എഴുതുവാൻ സംവിധായകൻ മേജർ രവി സ്വീകരിച്ച രീതിയോട് ഉപമിച്ചതാണ്. മേജർ രവിയുടെ മുൻകാല പട്ടാള ചിത്രങ്ങളായ കീർത്തിചക്ര, കുരുക്ഷേത്ര, പിക്കറ്റ് 43 എന്നിവയുടെ കഥാസന്ദർഭങ്ങൾ പുതിയ കഥാപശ്ചാത്തലത്തിലേക്കു മാറ്റിയെഴുതി അവതരിപ്പിച്ച സിനിമയാണ് 1971 ബിയോണ്ട് ബോർഡേഴ്സ്. ഒറ്റവാചകത്തിൽ പറഞ്ഞാൽ, അദ്ദേഹത്തിന്റെ തന്നെ മുൻകാല സിനിമകളിലെ വിജയ ഘടകങ്ങൾ ചേർത്തൊരുക്കി അവിയൽ പരുവത്തിലാക്കിയ ഒരു സിനിമ. സ്വന്തം സിനിമകളിലെ തിരക്കഥകളിൽ നിന്നും കടമെടുത്തു എന്നത് ആശ്വാസകരം!

കർമ്മയോദ്ധ എന്ന സിനിമയ്ക്ക് ശേഷം റെഡ് റോസ് ക്രിയേഷൻസിന്റെ ബാനറിൽ ഹനീഫ് മുഹമ്മദ് നിർമ്മിക്കുന്ന മോഹൻലാൽ-മേജർ രവി സിനിമയാണ് 1971 ബിയോണ്ട് ബോർഡേഴ്സ്. മേജർ രവിയുടെ തിരക്കഥയ്ക്ക് സംഭാഷണങ്ങൾ എഴുതിയത് ഷിജു നമ്പ്യാത്താണ്. സുജിത് വാസുദേവ് ഛായാഗ്രഹണവും, സംജിത് സന്നിവേശവും, സാലു കെ. ജോർജ് കലാസംവിധാനവും, ഗോപി സുന്ദർ പശ്ചാത്തല സംഗീതവും, മാഫിയ ശശി സംഘട്ടന സംവിധാനവും നിർവഹിച്ചിരിക്കുന്നു.

പ്രമേയം: ⭐⭐
ഇന്ത്യൻ ക്യാമ്പുകളിൽ ആക്രമണം നടത്തിയ പാക്കിസ്ഥാനാണ് യുദ്ധത്തിന് തുടക്കമിട്ടത്. 1971ൽ നടന്ന ഈ ഇന്ത്യ-പാകിസ്ഥാൻ യുദ്ധം നീണ്ടുനിന്നത് 13 ദിവസമാണ്. ഡിസംബർ 16നു പാകിസ്ഥാൻ അടിയറവു പറഞ്ഞതോടെ കിഴക്കേ പാകിസ്ഥാൻ എന്നറിയപ്പെട്ടിരുന്ന രാജ്യം(ഇപ്പോഴത്തെ ബംഗ്ലാദേശ്)രൂപപെട്ടത്. ആ യുദ്ധത്തിൽ വീരമൃത്യുവരിച്ച യോദ്ധാക്കൾക്കുള്ള സമർപ്പണമാണ് മേജർ രവിയുടെ 1971 ബിയോണ്ട് ബോർഡേഴ്സ് എന്ന സിനിമ. ആ യുദ്ധത്തിനിടെ പാക്കിസ്ഥാൻ പട്ടാളക്കാരനും ഇന്ത്യൻ പട്ടാളക്കാരും തമ്മിൽ ഉടലെടുത്ത ബന്ധമാണ് ഈ സിനിമയുടെ പ്രമേയം. അവർ തമ്മിൽ ശത്രുതയാണെങ്കിലും പരസ്പര ബഹുമാനം കാത്തുസൂക്ഷിച്ചിരുന്നു. ആ യുദ്ധം നയിച്ച പട്ടാളക്കാരുടെ ജീവിതകഥയാണ് ഈ സിനിമയിലൂടെ മേജർ അവതരിപ്പിക്കുന്നത്.

തിരക്കഥ: ⭐
കീർത്തിചക്രയിലെ വൈകാരിക നിമിഷങ്ങളും കുരുക്ഷേത്രയിലെ രാജ്യസ്നേഹവും പിക്കറ്റ് 43യിലെ മതസൗഹാർദ്ദവും മോഹൻലാലിന്റെ താരമൂല്യവും സമന്വയിപ്പിച്ചു എഴുതിയ കഥാസന്ദർഭങ്ങളാണ് ഈ സിനിമയുടേത്. വിഭജന കാലത്തുള്ള ചരിത്രമോ യുദ്ധസമയത്തുള്ള അന്തരീക്ഷമോ തിരക്കഥയിൽ എവിടെയും പരാമർശിക്കുന്നില്ല. യുദ്ധം സംഭവിക്കാനുള്ള കാരണങ്ങളും അന്ന് സംഭവിച്ചിട്ടുള്ള ദുരന്തങ്ങളും വിക്കിപീഡിയയിൽ ലഭ്യമാണ്. അതിലെഴുതിയ പോലെയൊന്നുമല്ല ഈ സിനിമയുടെ കഥാസന്ദർഭങ്ങൾ. പട്ടാളക്കാരുടെ കുടുംബത്തെപ്പറ്റിയുള്ള ഓർമ്മകളും യുദ്ധഭൂമിയിൽ വീരമൃത്യുവരുന്നവരെ ദുരവസ്ഥയും പാകിസ്ഥാൻ പട്ടാളവുമായി അനാവശ്യ ശത്രുതയുടെ ആവശ്യകതയില്ല എന്നുമാണ് ഈ സിനിമയിലൂടെ മേജർ രവി പറയുവാൻ ശ്രമിക്കുന്നത്. മേല്പറഞ്ഞ രംഗങ്ങളിലുള്ള ആവർത്തനവിരസത കണ്ടുമടുത്ത പ്രേക്ഷകരെ കൂടുതൽ മുഷിപ്പിക്കാനായി മേജർ സഹദേവനെ ധീര യോദ്ധാവാക്കാനുള്ള രംഗങ്ങൾ വേറെ. മോഹൻലാലും വില്ലന്മാരും ഒഴികെയുള്ള ഓരോ കഥാപാത്രങ്ങളിലും മൂപ്പൻ എഫെക്റ്റ് കൊണ്ടുവരാൻ മേജർ ശ്രമിച്ചിട്ടുണ്ട്. പുലിമുരുകനിലെ പുകഴ്ത്തൽ രീതി സ്വീകരിച്ചതാണെങ്കിൽ, ഈ സിനിമയ്ക്കോ മേജർ സഹദേവൻ എന്ന കഥാപാത്രത്തിനോ പുകഴ്ത്തലിന്റെ ആവശ്യകതയില്ല. നായകൻ നേരിടുന്നത് മൃഗത്തെയാകുമ്പോൾ നായകനെ അതിമാനുഷികനായി ചിത്രീകരിക്കേണ്ട ആവശ്യതയുണ്ട്. അതിലുപരി, സിനിമ കണ്ടുകൊണ്ടിരിക്കുന്ന പ്രേക്ഷകരിൽ മുരുകന്റെ കഴിവ് പറഞ്ഞുഫലിപ്പിക്കേണ്ടതുണ്ട്. അതുകൊണ്ടാണ് മൂപ്പൻ എന്ന കഥാപാത്രത്തിന് അത്തരത്തിലുള്ള സംഭാഷണങ്ങൾ നൽകിയത്. അതെ രീതി സ്വീകരിച്ച മേജർ രവിക്കും സംഭാഷണങ്ങൾ എഴുതിയ ഷിജു നമ്പ്യാത്തും പുലിമുരുകനിലെ സംഭാഷണങ്ങൾ അത്തരത്തിലായതു എന്തുകൊണ്ടെന്ന് മനസിലായില്ല എന്നുവേണം കരുതാൻ. നിവിൻ പോളി നായകനാകുന്ന മേജർ രവിയുടെ സിനിമയ്ക്കായി പ്രേക്ഷകർ കാത്തിരിക്കുന്നു എന്ന് മേജർ രവി അറിയരുതേ എന്ന പ്രാർത്ഥിച്ചുകൊണ്ട് നിർത്തുന്നു.

സംവിധാനം: ⭐⭐
പുനർജനി, കീർത്തിചക്ര, മിഷൻ 90 ഡെയ്‌സ്, തൂഫാൻ, കുരുക്ഷേത്ര, കാണ്ഡഹാർ, കർമ്മയോദ്ധ, ഒരേ യാത്രയിൽ, പിക്കറ്റ് 43 തുടങ്ങിയ ഒൻപതു സിനിമകൾ സംവിധാനം ചെയ്ത ഒരാളാണ് മേജർ രവി. ഇത്രയും പരിചയസമ്പത്തുള്ള ഒരു സംവിധായകൻ പക്വതയില്ലാത്ത അവതരണ രീതി സ്വീകരിക്കുമ്പോൾ പ്രേക്ഷകരുടെ പ്രതീക്ഷ തകിടം മറയുകയാണ് ചെയ്യുന്നത്. പഴഞ്ചൻ അവതരണ രീതിയും ആവേശകരമല്ലാത്ത യുദ്ധ രംഗങ്ങളും അവിശ്വസനീയമായ രീതിയിലാണ് മേജർ രവി അവതരിപ്പിച്ചത്. കഥാവസാനമുള്ള യുദ്ധ രംഗങ്ങളിൽ ആരൊക്കെയാണ് കൊല്ലപ്പെട്ടത് എന്നുപോലും അവ്യക്തമായിരുന്നു. ടാങ്ക് ഉപയോഗിച്ചുള്ള യുദ്ധ രംഗങ്ങൾ മാത്രമാണ് ഒരല്പമെങ്കിലും മികവ് പുലർത്തിയത്. കഥാപാത്രങ്ങൾക്ക് അനിയോജ്യമല്ലാത്ത അഭിനേതാക്കളെ അന്വേഷിച്ചു കണ്ടുപിടിച്ചു അഭിനയിപ്പിച്ച മേജർ രവിയെ സമ്മതിക്കണം. അന്യഭാഷയിൽ സിനിമ വിറ്റഴിക്കുക എന്നതാണ് ലക്ഷ്യമെങ്കിൽ, ആ ഭാഷകളിലെ കഴിവുള്ള അഭിനേതാക്കളെ കണ്ടെത്തുകയെങ്കിലും ചെയ്യാമായിരുന്നു. മോഹൻലാൽ എന്ന അഭിനേതാവിനേക്കാൾ ഉപരി അദ്ദേഹത്തിന്റെ താരമൂല്യത്തെയാണ് മേജർ രവി ആരാധിക്കുന്നത്. മലയാളത്തിന് പുറമെ തമിഴിലും ഹിന്ദിയിലും തെലുങ്കിലും ആരാധകരുള്ള മോഹൻലാൽ എന്ന താരത്തെ വിറ്റഴിച്ചു നേട്ടങ്ങൾ നേടുക എന്ന ലക്ഷ്യത്തോടെയാണ് ഈ സിനിമ മേജർ രവി സംവിധാനം ചെയ്തത് എന്നത് വ്യക്തം. അതിനുദാഹരണമാണ് കൃത്യമായ ഇടവേളകളിൽ സംഭാഷണങ്ങളിലൂടെ മേജർ സഹദേവനെ വാനോളം പുകഴ്ത്തുന്നത്. മേജർ മഹാദേവന്റെ അഞ്ചാമത്തെ വരവിനുള്ള തയ്യാറെടുപ്പിലാണ് മേജർ രവി എന്നുള്ള വാർത്തകൾ ആരാധകരും പ്രേക്ഷകരും ഞെട്ടലോടെയാണ് കേൾക്കുന്നത്.

സാങ്കേതികം: ⭐⭐⭐
സുജിത് വാസുദേവ് നിർവഹിച്ച ഛായാഗ്രഹണം മികവ് പുലർത്തി. ഈ സിനിമയുടെ ജീവൻ നിലനിർത്തിയ ഏക ഘടകമെന്നത് ഛായാഗ്രഹണമാണ്. ടാങ്ക് ചെയ്‌സ് രംഗങ്ങളും ക്‌ളൈമാക്‌സിലെ യുദ്ധങ്ങളും വിശ്വസനീയതയോടെ ചിത്രീകരിച്ചു. പേസിപ്പോകാതെ എന്ന തമിഴ്‍ ഗാനചിത്രീകരണവും മനോഹരമായിരുന്നു. ഒരു വാക്കിനാൽ എന്ന ഗാനത്തിന്റെ ചിത്രീകരണത്തിലെ ട്രെയിൻ പോകുന്ന രംഗമൊഴികെ മറ്റെല്ലാ രംഗങ്ങളും മികവ് പുലർത്തി. സാലു കെ. ജോർജ് എന്ന കലാസംവിധായകൻ അതിഗംഭീരമായ രീതിയിലാണ് യുദ്ധ ഭൂമിയിലെ സെറ്റുകൾ തയ്യാറാക്കിയിരിക്കുന്നത്. ഗോപി സുന്ദറിന്റെ പശ്ചാത്തല സംഗീതം ആവേശമുണർത്തുന്ന രീതിയിലായിരുന്നില്ല. സംജിത് കൂട്ടിയോജിപ്പിച്ച രംഗങ്ങൾ ഇഴഞ്ഞുനീങ്ങുന്ന പോലെ അനുഭവപെട്ടു. ചടുലത അർഹിക്കുന്ന യുദ്ധ രംഗങ്ങൾ പോലും വേഗതയില്ലാതെ അനുഭവപെട്ടു. നജിം അർഷാദ് ഈണമിട്ട ഹിന്ദി ഗാനം യുദ്ധത്തിനിടയിൽ കേൾക്കുമ്പോൾ പ്രത്യേകതയുള്ള പോലെ തോന്നി. രാഹുൽ സുബ്രമണ്യവും സിദ്ധാർഥ് വിപിനും ഈണമിട്ട മലയാള ഗാനവും തമിഴ് ഗാനവും തരക്കേടില്ലായിരുന്നു. മാഫിയ ശശിയാണ് സംഘട്ടനങ്ങൾ സംവിധാനം ചെയ്തത്. യുദ്ധത്തിന്റെ വീര്യം പകുതിയിൽ ചോർന്നുപോകുന്ന രീതിയിലായിരുന്നു പല സംഘട്ടന രംഗങ്ങളും. സായ് നിർവഹിച്ച ചമയം കൃത്രിമത്വം നിറഞ്ഞതായിരുന്നു. സുദേവനാണ് വസ്ത്രാലങ്കാരം.

അഭിനയം: ⭐⭐
മേജർ സഹദേവനായും മേജർ മഹാദേവനായും അഭിനയിച്ച മോഹൻലാൽ രണ്ടു കഥാപാത്രങ്ങളെയും ഒരുപോലെ അവതരിപ്പിച്ചു. രണ്ടു കഥാപാത്രങ്ങളിലും അഭിനയത്തിന്റെ കാര്യത്തിൽ വ്യത്യസ്ത കൊണ്ടുവരാനൊന്നും അദ്ദേഹം ശ്രമിച്ചിട്ടില്ല. രണ്ടു കഥാപാത്രങ്ങളും കാഴ്ചയിലും പെരുമാറ്റത്തിലും ഒരുപോലെ തന്നെ. പാക് ആർമിയുടെ തലവനായി ഹിന്ദി നടൻ അരുണോദയ് സിംഗ് തിളങ്ങി. ഈ സിനിമയിലെ ഏറ്റവും ശ്രദ്ധിക്കപ്പെട്ട അഭിനയവും അരുണോദയിന്റെതാണ്. ഇവരെ കൂടാതെ ആശാ ശരത്, അല്ലു സിരിഷ്, രഞ്ജി പണിക്കർ, സുധീർ സുകുമാരൻ, കണ്ണൻ പട്ടാമ്പി, സൈജു കുറുപ്പ്, സുധീർ കരമന, വിജയകൃഷ്ണൻ, മണിക്കുട്ടൻ, ടിനി ടോം, കൃഷ്ണകുമാർ, പത്മരാജ് രതീഷ്, ദേവൻ, ബാലാജി, ഷാജു ശ്രീധർ, കൃഷ്ണപ്രസാദ്‌, മേഘനാഥൻ, കോഴിക്കോട് നാരായണൻ നായർ, കൊല്ലം തുളസി, സേതുലക്ഷ്മി എന്നിവരും ഈ സിനിമയിലെ പ്രധാന കഥാപാത്രങ്ങളാകുന്നു. അവരവരുടെ വേഷങ്ങൾ തരക്കേടില്ലാതെ ഏവരും അഭിനയിച്ചു.

വാൽക്കഷ്ണം: ആവേശമുണർത്തുന്ന യുദ്ധ രംഗങ്ങളുമില്ല വികാരമുണർത്തുന്ന പട്ടാള സിനിമയുമല്ല!

തിരക്കഥ, സംവിധാനം: മേജർ രവി
സംഭാഷണം: ഷിജു നമ്പ്യാത്
നിർമ്മാണം: ഹനീഫ് മുഹമ്മദ്
ബാനർ: റെഡ് റോസ് ക്രിയേഷൻസ്
ഛായാഗ്രഹണം: സുജിത് വാസുദേവ്
ചിത്രസന്നിവേശം: സംജിത്
പശ്ചാത്തല സംഗീതം: ഗോപി സുന്ദർ
കലാസംവിധാനം: സാലു കെ.ജോർജ്
സംഗീതം: സിദ്ധാർഥ് വിപിൻ, നജിം അർഷാദ്, രാഹുൽ സുബ്രമണ്യം
ഗാനരചന: ഹരിനാരായണൻ, മോഹൻ രാജൻ, കമാൽ കാർത്തിക്, നിഖിൽ മട്ടത്തിൽ
ചമയം: സായ്
വസ്ത്രാലങ്കാരം: സുദേവൻ
സംഘട്ടനം: മാഫിയ ശശി
നൃത്തസംവിധാനം: പ്രസന്ന സുജിത്
വിതരണം: റെഡ് റോസ് റിലീസ്.

അങ്കമാലി ഡയറീസ് – ⭐⭐⭐

വ്യത്യസ്തയുടെ പുത്തൻ ദൃശ്യാനുഭവം – ⭐⭐⭐

അങ്കമാലി സ്വദേശക്കാരായ കച്ചവടക്കാരുടെയും പന്നിയിറച്ചി വില്പനക്കാരുടെയും കൊട്ടേഷൻ സംഘങ്ങളുടെയും ജീവിതത്തിന്റെ പച്ചയായ ചലച്ചിത്ര ആവിഷ്ക്കാരമാണ് അങ്കമാലി ഡയറീസ്. മലയാള സിനിമയിലും അന്യഭാഷാ സിനിമകളിലും നിരവധി കൊട്ടേഷൻ സംഘങ്ങളുടെ പോരാട്ടത്തിന്റെ കഥ സിനിമയാക്കിയിട്ടുണ്ട്. അവയിൽ നിന്നെല്ലാം വ്യത്യസ്തമായ അവതരണ ശൈലിയാണ് ലിജോ ജോസ് പെല്ലിശ്ശേരി സംവിധാനം നിർവഹിച്ച അങ്കമാലി ഡയറീസിനെ സവിശേഷമാക്കുന്നത്. മലയാള സിനിമ പ്രേമികൾ ഇന്നോളം ആസ്വദിച്ചിട്ടില്ലാത്ത പുത്തൻ ദൃശ്യാനുഭവമാണ് ലിജോ ജോസും ഗിരീഷ് ഗംഗാധരനും ഷമീർ മുഹമ്മദും പ്രശാന്ത് പിള്ളയും ഒരുക്കിയിരിക്കുന്നത്.

വിൻസെന്റ് പെപ്പെയും പോർക്ക് വർക്കിയും അപ്പാനി രവിയും യുക്ലാമ്പ് രാജനും 10 എം.എൽ.തോമസും കണാകുണാ മാർട്ടിയും ലിച്ചിയും സഖിയും തുടങ്ങി അങ്കമാലി ഡയറീസിലെ ഓരോരുത്തരും ഇപ്പോഴും അങ്കമാലിയിലുണ്ടാകും എന്ന് തോന്നിപ്പിക്കുന്ന അവതരണ മികവും അഭിനയ മികവുമാണ് അങ്കമാലി ഡയറീസിനെ വ്യത്യസ്തമാക്കുന്നത്. കഥാപാത്രങ്ങൾക്ക് അനിയോജ്യരായ 86 പുതുമുഖ നടീനടന്മാരെ കണ്ടെത്തുകയും, അവരെ ഈ സിനിമയിൽ കഥാപാത്രങ്ങളായി ജീവിപ്പിക്കുകയും ചെയ്ത ലിജോ ജോസ് പെല്ലിശ്ശേരിയെ എത്ര അഭിനന്ദിച്ചാലും മതിവരില്ല. ഓരോ നടീനടന്മാരും ഈ സിനിമയിൽ ഗംഭീര അഭിനയ പ്രകടനമാണ് കാഴ്ചവെച്ചിരിക്കുന്നത്. ഇത്തരത്തിൽ പുതുമുഖങ്ങളെ മാത്രം അണിനിരത്തി ഒരു സിനിമ നിർമ്മിക്കുക എന്ന വെല്ലുവിളി സ്വീകരിച്ച നിർമ്മാതാവ് വിജയ് ബാബുവും അഭിനന്ദനം അർഹിക്കുന്നു.

പ്രമേയം: ⭐
പലവട്ടം പലഭാഷകളിലായി പറഞ്ഞു പഴകിയ ഒന്നാണ് കൊട്ടേഷൻ സംഘങ്ങൾ തമ്മിലുള്ള പകപോക്കൽ. ഗാംഗ്സ് ഓഫ് വാസ്സ്യേപ്പൂരും സുബ്രമണ്യപുരവും കമ്മട്ടിപ്പാടവും മേല്പറഞ്ഞ സിനിമകൾ ഉൾപെടുന്നവയാണ്. അതെ ശ്രേണിയിലുള്ള ഒന്നാണ് അങ്കമാലി ഡയറീസ്. കൊട്ടേഷൻ സംഘങ്ങളുടെ ജീവിതത്തിൽ കുടുംബത്തേക്കാൾ പ്രാധാന്യം നൽകുന്നത് സൗഹൃദങ്ങൾക്കാണ്. അങ്കമാലിയിലെ പള്ളിയങ്ങാടി ഗാംഗ്സ് നടത്തുന്ന പന്നിയിറച്ചി കച്ചവടവും ചൂതാട്ടവും കൊട്ടേഷനുമെല്ലാം അവരുടെ ജീവിതത്തെ പ്രതികൂലമായി ബാധിക്കുന്നു. മറ്റു കൊട്ടേഷൻ സംഘങ്ങളുമായി വാക്ക്പോരും വഴക്കുമാകുന്നു. അങ്കമാലി അങ്ങാടിയിലും പള്ളിയിലും പരിസര പ്രദേശങ്ങളും ജീവിക്കുന്ന അങ്കമാലി കട്ട ലോക്കൽസിന്റെ കഥയാണ് ചെമ്പൻ വിനോദ് ജോസ് എഴുതിയത്. പ്രമേയപരമായി പുതുമയൊന്നും അവകാശപ്പെടാനില്ല എങ്കിലും അങ്കമാലിക്കാരായ ലോക്കൽസിന്റെ കഥ സിനിമയാക്കുന്നത് ഇതാദ്യം.

തിരക്കഥ: ⭐⭐
അങ്കമാലിക്കാരനായ ചെമ്പൻ വിനോദ് ജോസ് ആദ്യമായിട്ടാണ് ഒരു സിനിമയ്ക്ക് കഥയും തിരക്കഥയും സംഭാഷണങ്ങളും എഴുതുന്നത്. അദ്ദേഹം ജനിച്ചു വളർന്ന നാടിന്റെ കഥ എന്ന് പറയുമ്പോൾ ഒരുപക്ഷെ നേരിട്ട് കണ്ടു മനസ്സിലാക്കിയ അല്ലെങ്കിൽ സ്വയം അനുഭവിച്ചറിഞ്ഞ സന്ദർഭങ്ങളാകും തിരക്കഥയാക്കിയിരിക്കുന്നത്. കുറച്ചു വർഷങ്ങൾക്കു മുമ്പുവരെ അങ്കമാലിയിൽ കൊട്ടേഷൻ സംഘങ്ങളുടെ രൂക്ഷ ശല്യമുണ്ടായിരുന്നു. അവരുടെ ജീവിതം സൂക്ഷ്മമായി നിരീക്ഷിച്ചു എഴുതിയതാണ് ഈ സിനിമയുടെ തിരക്കഥ എന്ന് നിസംശയം പറയാം. കാരണം, ഓരോ സന്ദർഭങ്ങളും സംഭാഷണങ്ങളും സിനിമയുടെ പ്രമേയത്തോടും കഥയോടും നീതി പുലർത്തുന്നവയായിരുന്നു. ഏതു ദേശത്തെ ലോക്കൽസിന്റെ ജീവിതമെടുത്താലും അങ്കമാലി ഡയറീസിൽ കണ്ട അതെ കാഴ്ചകളാണ് കാണാൻ സാധിക്കുക. കഥാസന്ദർഭങ്ങൾക്കു മാറ്റമൊന്നും ഉണ്ടാകാൻ സാധ്യതയില്ലാത്ത ഒന്നായിരിക്കും കൊട്ടേഷൻ സംഘങ്ങൾ തമ്മിലുള്ള വഴക്കുകൾ. അവയ്ക്കൊന്നും പ്രത്യേകിച്ച് പുതുമയൊന്നും അവകാശപ്പെടാനില്ലതാനും. എന്നാൽ, സംഭാഷണങ്ങൾ എഴുതിയിരിക്കുന്നത് മികവ് പുലർത്തി. കൃത്യമായ നിരീക്ഷണത്തിൽ തന്നെയാണ് ഓരോ സന്ദർഭങ്ങളും കഥാപാത്രങ്ങൾക്കും അനിയോജ്യമായ സംഭാഷണങ്ങൾ എഴുതിയിരിക്കുന്നത്. ഇനിയും ഇതുപോലുള്ള പച്ചയായ ജീവിതകഥകൾ കണ്ടെത്താൻ ചെമ്പൻ വിനോദിനു സാധിക്കട്ടെ!

സംവിധാനം: ⭐⭐⭐⭐
അവതരണത്തിന്റെ വ്യത്യസ്തയാൽ അതാത് കാലഘട്ടങ്ങളിൽ ശ്രദ്ധിക്കപ്പെട്ട സിനിമകളായിരുന്നു ഭരതന്റെ ചാട്ടയും പത്മരാജന്റെ അരപ്പട്ട കെട്ടിയ ഗ്രാമത്തിലും. കെ.ജി.ജോർജ് സംവിധാനം ചെയ്തിട്ടുള്ള ഒട്ടുമിക്ക സിനിമകളും യാഥാർഥ്യത്തിൽ സംഭവിച്ചതാണോ എന്ന തോന്നലുണ്ടാക്കും വിധം മികവുറ്റതായിരുന്നു. അടൂർ ഗോപാലകൃഷ്ണനും അരവിന്ദനും കെ.ജി.ജോർജും പത്മരാജനും ഭരതനും വേറിട്ട അവതരണത്തിലൂടെ സിനിമ സംവിധാനം ചെയ്തു പ്രഗൽഭരായവരാണ്. ഇന്നത്തെ കാലഘട്ടത്തിൽ അത്തരത്തിലുള്ള സിനിമ സംവിധാനം ചെയ്യുന്നവരിൽ പ്രമുഖനാണ് ലിജോ ജോസ് പെല്ലിശ്ശേരി. 11 മിനിറ്റ് ദൈർഘ്യമുള്ള ക്‌ളൈമാക്‌സ് ഒരൊറ്റ ഷോട്ടിലൂടെ അവതരിപ്പിക്കുക, ഒരുപാട് ദൈർഘ്യമുള്ള ഷോട്ടുകളിലൂടെ രംഗങ്ങൾ റിയലസ്റ്റിക്കായി അവതരിപ്പിക്കുക, 86 പുതുമുഖങ്ങളെ സിനിമയിലെ മുഴുവൻ കഥാപാത്രങ്ങളാക്കുക എന്നിവയാണ് ഈ സിനിമയിലൂടെ ലിജോ ജോസ് പെല്ലിശ്ശേരി പരീക്ഷിച്ചു വിജയിപ്പിച്ചത്. മലയാള സിനിമയിലെ റിയലസ്റ്റിക് സിനിമകളുടെ പട്ടികയെടുത്താൽ അവയിൽ ഭൂരിഭാഗം സിനിമകളും പതിഞ്ഞ താളത്തിലായിരിക്കും അവതരിപ്പിച്ചിട്ടുണ്ടാകുക. എന്നാൽ, ആസ്വാദനത്തിനു വേണ്ടിയുള്ള എല്ലാ ചേരുവകളും കൃത്യമായ അളവിൽ ചേർത്തിട്ടാണ് ചടുലമായ രീതിയിൽ ഈ സിനിമ ലിജോ ജോസ് അവതരിപ്പിച്ചത്. അതുകൊണ്ടു തന്നെയാണ് അങ്കമാലി ഡയറീസ് പ്രേക്ഷകർ ഇരുകൈയ്യുംനീട്ടി സ്വീകരിച്ചത്. ലിജോ ജോസിനും വിജയ് ബാബുവിനും അഭിനന്ദനങ്ങൾ!

സാങ്കേതികം: ⭐⭐⭐⭐⭐
അങ്കമാലി ഡയറീസിന്റെ വിജയത്തിൽ നിർണ്ണായക പങ്കുവഹിച്ച മൂന്നുപേരാണ് ഛായാഗ്രാഹകൻ ഗിരീഷ് ഗംഗാധരൻ, ചിത്രസന്നിവേശകൻ ഷമീർ മുഹമ്മദ്, പശ്ചാത്തല സംഗീതം നൽകിയ പ്രശാന്ത് പിള്ള. അതിഗംഭീരമായ ഛായാഗ്രഹണവും അത്യുഗ്രൻ സന്നിവേശവും ഓരോ രംഗങ്ങളുടെയും മാറ്റ് പതിന്മടങ്ങു കൂട്ടുന്ന പശ്ചാത്തല സംഗീതവുമായിരുന്നു സിനിമയിലുടനീളം. ഈ സിനിമയിലെ ദൈർഘ്യമുള്ള രംഗങ്ങൾ എത്രത്തോളം പ്രയത്നിച്ചാണ് ചിത്രീകരിച്ചത് എന്ന വസ്തുത ഇപ്പോഴും പ്രേക്ഷകർക്ക് അത്ഭുതമായി അവശേഷിക്കുന്നു. രംഗങ്ങളുടെ ചടുലമായതും വ്യത്യസ്തമായതുമായ സന്നിവേശവും പ്രേക്ഷർക്ക് പുതുമയുള്ളതായി അനുഭവപെട്ടു. ഇവ രണ്ടിനും പുറമെ പ്രശാന്ത് പിള്ള നൽകിയ പശ്ചാത്തലസംഗീതം പ്രേക്ഷകരെ ആകാംഷാഭരിതരാക്കുന്ന രീതിയിലായിരുന്നു. പെപ്പെയും ലിച്ചിയും ഇരുവരുടെയും പ്രണയം തിരിച്ചറിയുന്ന രംഗത്തിലെ സംഗീതം കേൾക്കാൻ ഏറെ രസമുള്ളതായിരുന്നു. ജോളി ബാസ്റ്റിൻ സംവിധാനം ചെയ്ത സംഘട്ടന രംഗങ്ങൾ വിശ്വസനീയമായി അനുഭവപെട്ടു. ബാറിൽ നിന്ന് തുടങ്ങി റോഡിൽ അവസാനിച്ച സംഘട്ടനവും, പന്നി ഫാമിന്റെ മുൻവശത്തെ പറമ്പിൽ ചിത്രീകരിച്ച സംഘട്ടന രംഗങ്ങളും, പള്ളി പെരുന്നാളിന്റെ ഇടയിൽവെച്ചു സംഭവിച്ച സംഘട്ടന രംഗങ്ങളും വ്യത്യസ്തവും വിശ്വസനീയവുമായിരുന്നു. ഇന്ദുലാൽ കവാദി നിർവഹിച്ച കലാസംവിധാനം സന്ദർഭങ്ങളോടും, സ്റ്റെഫി സേവ്യറിന്റെ വസ്ത്രാലങ്കാരവും റോണക്സ് സേവ്യറിന്റെ ചമയവും കഥാപാത്രങ്ങൾക്കു ഇണങ്ങുന്നവയായിരുന്നു. രംഗനാഥ് രവിയാണ് ശബ്ദസംവിധാനം നിർവഹിച്ചത്. ഏവർക്കും അഭിനന്ദനങ്ങൾ!

അഭിനയം: ⭐⭐⭐⭐⭐
വിൻസെന്റ് പെപ്പെയായി ആന്റണി വർഗീസ്, പോർക്ക് വർക്കിയായി കിച്ചു ടെല്ലസ്, ലിച്ചിയായി രേഷ്മ രാജൻ, 10 എം.എൽ.തോമസായി ബിട്ടോ ഡേവിസ്, യുക്ലാമ്പ് രാജനായി ടിറ്റോ വിൽ‌സൺ, അപ്പാനി രവിയായി ശരത്കുമാർ, സഖിയായി ബിന്നി റിങ്കി ബെഞ്ചമിൻ, കണകുണ മാർട്ടിയായി അനന്ദു, പരിപ്പ് മാർട്ടിയായി ശ്രീകാന്ത്, കുഞ്ഞൂട്ടിയായി സിനോജ്, ഭീമനായി വിനീത് വിശ്വം, പോലീസ് ഇൻസ്പെക്റ്റർ ആയി ഉല്ലാസ് ജോസ് ചെമ്പൻ, സീമയായി അമൃത അന്ന, ബാബുജിയായി അൻസൺ ആന്റണി എന്നിവരാണ് പ്രധാന കഥാപാത്രങ്ങളെ അവതരിപ്പിച്ചത്‌. ഇവരെ കൂടാതെ ഒട്ടനവധി പുതുമുഖങ്ങൾ ഈ സിനിമയിൽ അഭിനയിച്ചിട്ടുണ്ട്. നായകനായി അഭിനയിച്ച ആന്റണി മുതൽ ഒരു രംഗത്തിൽ മാത്രം അഭിനയിച്ച നടന്മാർവരെ കഥാപാത്രങ്ങളായി ജീവിക്കുന്ന കാഴ്ചയാണ് കണ്ടത്. മഞ്ഞിൽ വിരിഞ്ഞ പൂക്കളിലെ നരേന്ദ്രന് ശേഷം മലയാള സിനിമയിലെ ഏറ്റവും മികച്ച പുതുമുഖ നടന്റെ അഭിനയമേതെന്ന ചോദ്യത്തിന് ഉത്തരമാണ് ആന്റണി വർഗീസ്. അതുപോലെ അപ്പാനി രവിയെ അവതരിപ്പിച്ച ശരത്കുമാറും യുക്ലാംബ് രാജനെ അവതരിപ്പിച്ച ടിറ്റോയും സമീപകാലത്തെ ഏറ്റവും മികച്ച വില്ലൻവേഷങ്ങളായിരുന്നു എന്ന് നിസംശയം പറയാം. ഏവർക്കും അഭിനന്ദനങ്ങൾ!

വാൽക്കഷ്ണം: സംവിധാന മികവിൽ സങ്കേത്തികത്തികവിൽ അഭിനയ ചാരുതയിൽ ഒരു റിയലസ്റ്റിക് ആക്ഷൻ എന്റർറ്റെയിനർ!

സംവിധാനം: ലിജോ ജോസ് പെല്ലിശ്ശേരി
രചന: ചെമ്പൻ വിനോദ് ജോസ്
നിർമ്മാണം: വിജയ് ബാബു
ബാനർ: ഫ്രൈഡേ ഫിലിംസ്
ഛായാഗ്രഹണം: ഗിരീഷ് ഗംഗാധരൻ
ചിത്രസന്നിവേശം: ഷമീർ മുഹമ്മദ്
സംഗീതം: പ്രശാന്ത് പിള്ള
കലാസംവിധാനം: ഇന്ദുലാൽ കവാദി
സംഘട്ടനം: ജോളി ബാസ്റ്റിൻ
ശബ്ദസംവിധാനം: രംഗനാഥ് രവി
ചമയം: റോണക്സ് സേവ്യർ
വസ്ത്രാലങ്കാരം: സ്റ്റെഫി സേവ്യർ
വിതരണം: ഫ്രൈഡേ ടിക്കറ്റ്‌സ്

പുലിമുരുകൻ – ⭐⭐⭐


രോമാഞ്ചമുണർത്തുന്ന ആക്ഷൻ എന്റർറ്റെയിനർ! – ⭐⭐⭐

മുരുകാ മുരുകാ പുലിമുരുകാ…
ഇനി അമ്പരമുയരണം വേൽമുരുകാ…
പോരിനിറങ്ങിയ പോരഴകാ…
മിഴി ചെങ്കനലാകണം പുലിമുരുകാ…

(ബി.കെ.ഹരിനാരായണന്റെ വരികൾക്ക് ഗോപി സുന്ദർ ഈണമിട്ട മലയാള സിനിമാ പ്രേമികളുടെ പ്രിയപ്പെട്ട ഗാനം).

യുക്തിയില്ലാത്ത കഥാസന്ദർഭങ്ങളും നിലവാരമില്ലാത്ത സംഭാഷണങ്ങളും കൃത്യമായി സമന്വയിപ്പിച്ചു എഴുതിയ തിരക്കഥയെ അത്യുഗ്രൻ സാങ്കേതികമികവോടെ അവതരിപ്പിച്ച പക്കാ ആക്ഷൻ എന്റർറ്റെയിനറാണ് പുലിമുരുകൻ.

മുളകുപാടം ഫിലിംസിന്റെ ബാനറിൽ ടോമിച്ചൻ മുളകുപാടം നിർമ്മിച്ചിരിക്കുന്ന പുലിമുരുകന്റെ രചന നിർവഹിച്ചത് ഉദയകൃഷ്ണയാണ്. പോക്കിരിരാജ, സീനിയേഴ്സ്, മല്ലു സിംഗ്‌, സൗണ്ട് തോമ, വിശുദ്ധൻ, കസിൻസ് എന്നീ സിനിമകൾക്ക് ശേഷം വൈശാഖ് സംവിധാനം ചെയ്ത പുലിമുരുകനിൽ പ്രശസ്തരായ സാങ്കേതികപ്രവർത്തകരും അഭിനേതാക്കളും ഒന്നിച്ചിരിക്കുന്നു. മുളകുപാടം ഫിലിംസാണ് ഈ സിനിമയുടെ വിതരണം.

മെയ്വഴക്കത്തിന്റെ മുരുകാവതാരം മോഹൻലാൽ, ആക്ഷൻ കുലപതി പീറ്റർ ഹെയ്ൻ, സംഗീത മാന്ത്രികൻ ഗോപി സുന്ദർ, ദൃശ്യവിരുന്നൊരുക്കിയ ഷാജി കുമാർ, ഇടിമുഴക്കം സൃഷ്ട്ടിച്ച ശബ്ദലേഖകൻ തപസ് നായക്, കാട്ടിലെ സെറ്റുകൾ ഒരുക്കിയ ജോസഫ് നെല്ലിക്കൽ, പണംമുടക്കിയ ടോമിച്ചൻ മുളകുപാടം, പുലിമുരുകനെ പുപ്പുലിമുരുകനാക്കിയ സംവിധായകൻ വൈശാഖ് എന്നിവർ കൈകോർത്തുകൊണ്ടു മലയാള സിനിമയുടെ യശസ്സ് വാനോളം ഉയർത്തിയിരിക്കുന്നു.

പ്രമേയം: ⭐⭐
നരഭോജികളായ പുലികളും കടുവകളും വാഴുന്ന പുലിയൂർ ഗ്രാമം. പുലികളെ അതിന്റെ മടയിൽ ചെന്ന് കൊല്ലുന്ന വേട്ടക്കാരൻ പുലിയൂർ മുരുകൻ. മൃഗവും(പുലിയും)മനുഷ്യനും (പുലിമുരുകനും)തമ്മിലുള്ള പോരാട്ടമാണ് പുലിമുരുകൻ എന്ന സിനിമയുടെ പ്രമേയം. പുലിയൂരിലെ പേടിസ്വപ്നമായി വരയൻ പുലികളെക്കാൾ വലിയ ശത്രുക്കൾ നാട്ടിലെ മനുഷ്യരാണെന്നു തിരിച്ചറിയുകയുന്ന പുലിമുരുകന്റെ കഥയാണിത്. ഉദയകൃഷ്ണ സ്വതന്ത്രമായി കഥയെഴുതുന്ന ആദ്യ സിനിമകൂടിയാണിത്. ലോഹിതദാസ്-ഐ.വി.ശശി-മമ്മൂട്ടി ടീമിന്റെ മൃഗയ എന്ന സിനിമയ്ക്ക് ശേഷം മലയാള സിനിമയിൽ എഴുതപെട്ട പുലിവേട്ട പ്രമേയമാക്കിയ കഥയാണ് പുലിമുരുകൻ.

തിരക്കഥ: ⭐
ഉദയകൃഷ്ണ സ്വതന്ത്ര തിരക്കഥാകൃത്താവുന്ന ആദ്യ സിനിമയുടെ തിരക്കഥയെ ഒറ്റവാക്കിൽ പരിതാപകരം എന്നല്ലാതെ മറ്റൊന്നും വിശേഷിപ്പിക്കുവാനില്ല. മൃഗങ്ങളും മനുഷ്യരും തമ്മിലുള്ള പോരാട്ടത്തിന്റെയും വേട്ടയുടെയും കഥ പറയുന്നതിനിടയിൽ കാട്ടിലെ കഞ്ചാവ് കൃഷിയും ചന്ദന കള്ളക്കടത്തും മരുന്ന് നിർമ്മാണവും കുത്തിക്കയറ്റി യുക്തിയെ ചോദ്യം ചെയ്യുന്ന കഥാസന്ദർഭങ്ങളാക്കിമാറ്റി. അതിനു മാറ്റുകൂട്ടുവാനായി അസഭ്യങ്ങൾ തിരുകികയറ്റിയ സംഭാഷണങ്ങളും അന്യഭാഷാ സിനിമകളെ ഓർമ്മിപ്പിക്കുന്ന തരത്തിലുള്ള മസാല സംഘട്ടന രംഗങ്ങൾക്ക് വേണ്ടിയുള്ള കഥാസന്ദർഭങ്ങളും കോർത്തിണക്കിയ ദുരന്തമാണ് ഈ സിനിമയുടെ തിരക്കഥ. സിനിമയുടെ രണ്ടാം പകുതിയിലെ ഒട്ടുമിക്ക രംഗങ്ങളുടെ കഥാസന്ദർഭങ്ങളും ചില തെലുങ്ക് സിനിമകളെ ഓർമ്മിപ്പിച്ചു. പൂങ്കായ് ശശി, ജൂലി എന്നീ കഥാപാത്രങ്ങളുടെ ആവശ്യകത എന്താണെന്നു മനസ്സിലാകുന്നില്ല. അതുപോലെ കൃത്യമായ ഇടവേളകളിൽ മൂപ്പനെ കൊണ്ടുവന്നു മുരുകനെ പുകഴ്ത്തുന്നതും അരോചകമായി തോന്നി. പുലിയുമായുള്ള ആദ്യ സംഘട്ടന രംഗം മാത്രം മതിയായിരുന്നു പുലിമുരുകന്റെ സവിശേഷതയെന്തെന്നു പ്രേക്ഷകർക്ക് മനസ്സിലാക്കുവാൻ. ഇത്രയും സിനിമകൾക്ക് തിരക്കഥ എഴുതിയ പരിചയസമ്പത്തുള്ള ഒരു എഴുത്തുകാരനിൽ നിന്നും ഒരല്പംകൂടി നിലവാരം പ്രതീക്ഷിക്കുന്നു.

സംവിധാനം: ⭐⭐⭐⭐
രണ്ടു വർഷത്തെ പ്രയത്നത്തിനൊടുവിൽ സിനിമാ പ്രേമികളെ ആസ്വാദനത്തിന്റെ കൊടുമുടിയിലെത്തിക്കുവാൻ സംവിധായകൻ വൈശാഖിനു സാധിച്ചു. നിലവാരമില്ലാത്ത തിരക്കഥയെ അസാധാരണ സിനിമാനുഭവമാക്കിയ വൈശാഖിനു അഭിനന്ദനങ്ങൾ! ഇന്ത്യൻ സിനിമയിലെ മികച്ച സങ്കേത്തിക പ്രവർത്തകരെ ഉൾപ്പെടുത്തി മികച്ചൊരു ആക്ഷൻ സിനിമയെടുക്കുവാൻ വൈശാഖിനു കഴിഞ്ഞിട്ടുണ്ട്. അനാവശ്യ കഥാപാത്രങ്ങളും ആക്ഷന് വേണ്ടി എഴുതപെട്ട രംഗങ്ങളും ഒഴുവാക്കി സിനിമയുടെ ദൈർഘ്യം കുറച്ചിരുന്നുവെങ്കിൽ എല്ലാത്തരം പ്രേക്ഷകരെയും ഈ സിനിമ ആസ്വദിപ്പിക്കുമായിരുന്നു. മോഹൻലാൽ എന്ന നടനെയും താരത്തെയും സമീപകാലത്തു പൂർണമായി ഉപയോഗിച്ച സംവിധായകരിൽ ഒരാളാണ് വൈശാഖ്. ലാലേട്ടൻ എന്ന നടന്റെ കുടുംബ സിനിമകൾ ഇഷ്ടപെടുന്ന പ്രേക്ഷകർക്കും ആക്ഷൻ സിനിമകൾ ഇഷ്ടപെടുന്ന പ്രേക്ഷകർക്കും ത്രില്ലർ സിനിമകൾ ഇഷ്ടപെടുന്ന പ്രേക്ഷകർക്കും ഒരുപോലെ ഇഷ്ടമാകുന്ന എല്ലാ ചേരുവകളും പുലിമുരുകനിൽ വൈശാഖ് ഉൾപ്പെടുത്തിയിട്ടുണ്ട്. സിനിമയുടെ ആരംഭത്തിൽ മാസ്റ്റർ അജാസും പുലിയും തമ്മിലുള്ള സംഘട്ടന രംഗവും, സിനിമയുടെ അവസാനം വില്ലന്മാരും പുലിയും മുരുകനും നടത്തുന്ന സംഘട്ടന രംഗങ്ങളും അത്യുഗ്രനായി ചിത്രീകരിച്ചിരിക്കുന്നു. പീറ്റർ ഹെയ്ൻ, ഗോപി സുന്ദർ, ജോസഫ് നെല്ലിക്കൽ, ഷാജി കുമാർ, ജോൺകുട്ടി, തപസ് നായക് തുടങ്ങിയ തിരക്കേറിയവരെ ഈ സിനിമയിൽ ഉൾപ്പെടുത്തുവാൻ തീരുമാനിച്ചതാണ് ഈ സിനിമ ഇത്രയും വലിയ നിലയിലെത്തിയത്. നരസിംഹം, ദൃശ്യം എന്നീ സിനിമകൾക്ക് ശേഷം മോഹൻലാലിൻറെ ആരാധകരെ ആവേശഭരിതരാക്കിയ മറ്റൊരു സിനിമയും അടുത്തകാലത്തുണ്ടായിട്ടില്ല. അഭിനന്ദനങ്ങൾ!

സാങ്കേതികം:⭐⭐⭐⭐⭐
മലയാള സിനിമ ഇന്നോളം കണ്ടിട്ടില്ലാത്ത അത്യുഗ്രൻ ആക്ഷൻ രംഗങ്ങൾ സംവിധാനം ചെയ്ത പീറ്റർ ഹെയ്ൻ അക്ഷരാർത്ഥത്തിൽ പ്രേക്ഷകരെ ഞെട്ടിച്ചു. രണ്ടര മണിക്കൂർ പ്രേക്ഷകരെ ആകാംഷയുടെ മുൾമുനയിൽ നിർത്തുവാൻ ഗോപി സുന്ദറിന്റെ പശ്ചാത്തല സംഗീതത്തിനും സാധിച്ചു. കാടിന്റെ ദൃശ്യചാരുത ഒപ്പിയെടുത്തുകൊണ്ടു ഷാജി കുമാർ കണ്ണിന്നു കുളിർമയുള്ള വിരുന്നൊരുക്കി. അതിഗംഭീരമായ വിഷ്വൽസാണ് ഷാജി ഈ സിനിമയ്ക്ക് വേണ്ടി ഒരുക്കിയത്. ജോൺകുട്ടിയുടെ സന്നിവേശവും മികവ് പുലർത്തി. കഥയിൽ പ്രാധാന്യമില്ലാത്ത ഒട്ടനവധി കഥാസന്ദർഭങ്ങൾ ഒഴുവാക്കാമായിരുന്നു. എന്നിരുന്നാലും അവയെല്ലാം ചിത്രീകരിച്ചിരിക്കുന്ന രീതി മികവുറ്റതായതിനാൽ പ്രേക്ഷകരെ മുഷിപ്പിച്ചില്ല. ഓരോ രംഗങ്ങളും മറ്റൊരു തലത്തിലെത്തിക്കുവാൻ തപസ് നായ്കിന്റെ ശബ്ദലേഖനത്തിനും കഴിഞ്ഞു. കാട്ടിലെ സെറ്റുകളും, മുരുകന്റെ വീടും, പുലിയെ കൊല്ലുന്ന ഗുഹയും തുടങ്ങി എല്ലാ സ്ഥലങ്ങളും വിശ്വസനീയമായി അനുഭവപ്പെട്ടത് ജോസഫ് നെല്ലിക്കലിന്റെ കലാസംവിധാന മികവുകൊണ്ടാണ്. സജി കൊരട്ടിയുടെ ചമയവും അരുൺ മനോഹറിന്റെ വസ്ത്രാലങ്കാരവും മുരുകന് ഇതുവരെ കാണാത്ത വേഷപ്പകർച്ച നൽകി. മലയാള സിനിമയിൽ പഴശ്ശിരാജയ്ക്കു ശേഷം സാങ്കേതികമികവോടെ അവതരിപ്പിച്ച ഏക സിനിമയാണിത്. ഏവർക്കും അഭിനന്ദനങ്ങൾ!

അഭിനയം: ⭐⭐⭐⭐
മോഹൻലാൽ, ലാൽ, ജഗപതി ബാബു, മകരന്ദ് ദേശ്പാണ്ഡെ, കിഷോർ, സിദ്ദിക്ക്, ബാല, വിനു മോഹൻ, സുരാജ് വെഞ്ഞാറമൂട്, നോബി, ഹരീഷ് പരേഡി, സുധീർ കരമന, നന്ദുലാൽ, ഗോപകുമാർ, ശശി കലിങ്ക, ചെമ്പിൽ അശോകൻ, ഇടവേള ബാബു, വിജയകൃഷ്ണൻ, ചാലി പാലാ, ആന്റണി പെരുമ്പാവൂർ, കണ്ണൻ പട്ടാമ്പി, സന്തോഷ് കീഴാറ്റൂർ, വിനോദ് കെടാമംഗലം, മാസ്റ്റർ അജാസ്, കമാലിനി മുഖർജി, നമിത, സേതുലക്ഷ്മി, അഞ്ജലി ഉപാസന എന്നിവർ പ്രധാന കഥാപാത്രങ്ങളെ അവതരിപ്പിച്ചിരിക്കുന്നു. അഭിനയമികവിന്റെ മെയ്വഴക്കത്തിന്റെ നടനവൈഭവത്തിന്റെ പര്യായമാണെന്ന് ഒരിക്കൽക്കൂടി തെളിയിച്ചിരിക്കുകയാണ് മോഹൻലാൽ. ഹാസ്യ രംഗങ്ങളും ആക്ഷൻ രംഗങ്ങളും ഒരേ മികവോടെ അഭിനയിച്ചു ഫലിപ്പിക്കുവാൻ മോഹൻലാലിന് സാധിച്ചു. പൂവള്ളി ഇന്ദുചൂഢനും മേജർ മഹാദേവനും ശേഷം പ്രേക്ഷകർ ഹർഷാരവത്തോടെ നെഞ്ചിലേറ്റിയ കഥാപാത്രമാണ് പുലിയൂർ മുരുകൻ. ബലരാമൻ എന്ന കഥാപാത്രമായി ലാലും, ഡാഡി ഗിരിജ എന്ന വില്ലൻ വേഷത്തിൽ തെലുങ്ക് നടൻ ജഗപതി ബാബുവും, ആർ.കെ.യായി കിഷോറും അഭിനയമികവ് പുലർത്തി. മുരുകന്റെ ഭാര്യവേഷം അവതരിപ്പിച്ച കമാലിനി മുഖർജിയും പൂങ്കായ് ശശിയായി സുരാജ് വെഞ്ഞാറമൂടും, ജൂലിയായ് നമിതയും നിരാശപ്പെടുത്തി.

വാൽക്കഷ്ണം: സാങ്കേതികമികവിന്റെ പുതിയരോദ്ധ്യായം മലയാള സിനിമയ്ക്ക് സമ്മാനിച്ച പുലിമുരുകൻ തിയറ്ററുകളിൽ തന്നെ കാണുന്ന പ്രേക്ഷകരെ ഈ സിനിമ നിരാശപ്പെടുത്തില്ല.

സംവിധാനം: വൈശാഖ്
നിർമ്മാണം: ടോമിച്ചൻ മുളകുപാടം
ബാനർ: മുളകുപാടം ഫിലിംസ്
രചന: ഉദയകൃഷ്ണ
സംഘട്ടനം: പീറ്റർ ഹെയ്ൻ
പശ്ചാത്തല സംഗീതം: ഗോപി സുന്ദർ
ശബ്ദലേഖനം: തപസ് നായക്
ഛായാഗ്രഹണം: ഷാജി കുമാർ
ചിത്രസന്നിവേശം: ജോൺകുട്ടി
കലാസംവിധാനം: ജോസഫ് നെല്ലിക്കൽ
ഗാനരചന: റഫീഖ് അഹമ്മദ്, ബി.കെ.ഹരിനാരായണൻ
ചമയം: സജി കൊരട്ടി
വസ്ത്രാലങ്കാരം: അരുൺ മനോഹർ
വിതരണം: മുളകുപാടം റിലീസ്.

ഇടി – ⭐⭐

അസ്ഥാനത്തു കൊള്ളുന്ന ഇടി! – ⭐⭐

കേരള കർണാടക ബോർഡറിലെ കൊളളനഹള്ളി എന്ന ഗ്രാമപ്രദേശം. വികസനം എന്താണെന്നുപോലും അറിഞ്ഞിട്ടില്ലാത്ത ഗ്രാമനിവാസികൾ. അവിടെ പൊളിഞ്ഞുകിടക്കുന്ന ഒരു കെട്ടിടമാണ് കൊള്ളനഹള്ളി പോലീസ് സ്റ്റേഷൻ. കൊലപാതകമോ അടിപിടിയോ കള്ളക്കടത്തോ കഞ്ചാവുവേട്ടയോ ഒന്നുമില്ലാത്ത ഒരു ഓണംകേറാമൂല. അത്തരത്തിലുള്ള ഒരു സ്ഥലത്തേക്ക് സ്വന്തം ആഗ്രഹപ്രകാരം ജോലിക്കെത്തുന്ന കർമ്മനിരധനായ പോലീസ് ഉദ്യോഗസ്ഥന്റെ കഥയാണ് ഇടി.

നടനും ഗായകനുമായ സാജിദ് യഹിയയാണ് ഇടി സംവിധാനം ചെയ്തിരിക്കുന്നത്.മാജിക് ലാന്റേൺ എന്ന ബാനറിൽ ഡോക്ടർ അജാസ് ഇബ്രാഹിമും അരുണും ചേർന്ന് നിർമ്മിച്ച ഇടി വിതരണം ചെയ്തിരിക്കുന്നത് ഇറോസ് ഇന്റർനാഷണലാണ്.

പ്രമേയം:⭐
പ്രേം നസീർ-ജയൻ കാലഘട്ടം മുതൽ മലയാള സിനിമകളിൽ കണ്ടുമടുത്ത പ്രമേയവും കഥയുമാണ് ഇടിയുടേത്. കർമ്മനിരധനായ പോലീസ് ഉദ്യോഗസ്ഥനും അധോലോകത്തെ കിടുകിടാ വിറപ്പിക്കുന്ന ഒരു വില്ലനും തമ്മിലുള്ള ഏറ്റുമുട്ടൽ. നാട്ടിലെ മോഷ്ടാക്കളെ പിടികൂടാൻ ശ്രമിക്കുന്നതിനിടയിൽ ഒരു നിമിത്തം പോലെ അധോലോക സംഘത്തലവനും പോലീസ് ഉദ്യോഗസ്ഥന്റെ നോട്ടപുള്ളിയാകുന്നു. കേട്ടുപഴകിയ കഥപോലെ കണ്ടു ബോറടിച്ച സന്ദർഭങ്ങളിലൂടെ കഥാവസാനം പോലീസ് ഉദ്യോഗസ്ഥൻ വിജയിക്കുന്നു. പുതിയ പ്രമേയങ്ങളും കഥകളും പരീക്ഷിച്ചു വിജയിക്കുന്ന കാലഘട്ടത്തിൽ തമിഴ്-തെലുങ്ക്‌ സിനിമകളെ ഓർമ്മിപ്പിക്കുന്ന പോലൊരു കഥ തിരഞ്ഞെടുക്കുവാൻ സാജിദ് യഹിയ തീരുമാനിച്ചത് എന്തുകൊണ്ടാണെന്ന് മനസ്സിലാകുന്നില്ല.

തിരക്കഥ:⭐
സാജിദ് യഹിയയും അറൂസ് ഇർഫാനും ചേർന്നാണ് ഇടിയുടെ കഥയും തിരക്കഥയും എഴുതിയിരിക്കുന്നത്. ആദ്യ രംഗം മുതൽ അവസാന രംഗം വരെയുള്ള ഒട്ടുമിക്ക എല്ലാ രംഗങ്ങളും പ്രവചിക്കാനാവുന്നതായിരുന്നു. അറൂസാണ് ഇടിയുടെ സംഭാഷണങ്ങൾ എഴുതിയത്. പഞ്ച് ഡയലോഗുകൾ ഉണ്ടെങ്കിലും അവയൊന്നും പ്രേക്ഷകരെ ആവേശത്തിലാകുന്നില്ല. യുക്തിയെ ചോദ്യം ചെയ്യുന്ന നിരവധി സന്ദർഭങ്ങളിലൂടെ എന്തൊക്കയോ കുറെ ബഹളങ്ങൾ സംഭവിക്കുന്നു. ആദ്യ പകുതിയിലെ ഒന്ന് രണ്ടു സംഭാഷണങ്ങൾ ചിരിപടർത്തിയെങ്കിലും അവയൊന്നും ഈ സിനിമയ്ക്ക് ആവശ്യമുള്ളതായിരുന്നില്ല. ഒരു പുതുമുഖ സംരംഭം എന്ന പരിഗണന പോലും ഇടിയ്ക്കു ലഭിക്കുമെന്ന് തോന്നുന്നില്ല.

സംവിധാനം:⭐⭐
ആക്ഷൻ സിനിമകൾക്ക്‌ കെട്ടുറപ്പുള്ള തിരക്കഥയേക്കാൾ പ്രധാനം സാങ്കേതിക മികവാണെന്നുളള തെറ്റുധാരണ പലവർക്കുമുണ്ട്. പല ആംഗിളിൽ ഉള്ള ഷോട്ടുകളും, ചടുലതയുള്ള സന്നിവേശവും, ഇടിമുഴക്കമെന്നു തോന്നിപ്പിക്കുന്ന പശ്ചാത്തല സംഗീതവും, സ്‌ലോ മോഷൻ നടത്തവും കൂട്ടിനുണ്ടെങ്കിൽ ആക്ഷൻ സിനിമ എളുപ്പത്തിൽ സംവിധാനം ചെയ്യാമെന്ന സാജിദ് യഹിയയുടെ തീരുമാനം തെറ്റിപ്പോയി. ആദ്യ പകുതിയിലെ സ്വപ്നം കാണുന്ന രണ്ടു സന്ദർഭങ്ങളും പുതുമയുള്ള രീതിയിൽ അവതരിപ്പിച്ചു എന്നത് മാത്രമാണ്‌ സംവിധാന മികവായി തോന്നിയത്. അന്യഭാഷാ സിനിമകൾ കണ്ട ഹാങ്ങ്ഓവറിൽ അവതരിപ്പിച്ച സാധാരണ ഒരു പോലീസ് കഥയാണ് ഇടി. ഒരു ക്ലീഷേ ആക്ഷൻ സിനിമയ്ക്ക് അനിവാര്യമായ എല്ലാ ചേരുവകളും കൃത്യമായി ചേർക്കുവാൻ സംവിധായകൻ മറക്കാത്തതുകൊണ്ടു ഒരുപക്ഷെ ജയസൂര്യ എന്ന നടന്റെ ആരാധകർക്കും, ഇടിപടങ്ങൾ ഇഷ്ടമുള്ള ഇന്നത്തെ തലമുറയ്ക്കും ഇഷ്ടമായേക്കാം ഇടി.

സാങ്കേതികം:⭐⭐⭐⭐
സൂരജ് സാരംഗ്, രാഹുൽ രാജ്, ഷമീർ മുഹമ്മദ്‌, രാജീവ്‌ കോവിലകം, ആക്ഷൻ ജി. എന്നിവരാണ് ഈ സിനിമയുടെ പ്രധാന സാങ്കേതികവശങ്ങൾ കൈകാര്യം ചെയ്തിരിക്കുന്നത്. രാഹുൽ രാജിന്റെ പശ്ചാത്തല സംഗീതവും ഷമീർ മുഹമ്മദിന്റെ സന്നിവേശവുമാണ് ഇടിയുടെ ഹൈലൈറ്റ്. ക്ലൈമാക്സിലെ ആക്ഷൻ രംഗങ്ങൾ മികവു പുലർത്തുവാൻ കാരണം പുതുമയുള്ള രീതിയിലുള്ള സംഘട്ടന രംഗങ്ങളും രംഗങ്ങളുടെ സന്നിവേശവും പശ്ചാത്തല സംഗീതവുമാണ്. ആക്ഷൻ ജി. എന്നയാളാണ് ഈ സിനിമയുടെ സംഘട്ടന രംഗങ്ങൾ സംവിധാനം ചെയ്തിരിക്കുന്നത്. ഇടി തീക്കനൽ പാറും ഇടി എന്ന പാട്ടും മികവു പുലർത്തി. സിനിമയുടെ ആരംഭം മുതൽ ചടുലതയോടെ ഓരോ രംഗങ്ങളും പുതുമയുള്ള രീതിയിൽ സന്നിവേശം ചെയ്ത ഷമീർ മുഹമ്മദ്‌ അഭിനന്ദനം അർഹിക്കുന്നു. സൂരജ് സാരംഗിന്റെ ചായാഗ്രഹണം ആക്ഷൻ സിനിമയ്ക്ക് ഉതകുന്ന രീതിയിലായിരുന്നു. കാസറഗോഡ് ലൊക്കേഷനും പുതുമ നൽക്കുന്ന ഒന്നായിരുന്നു. രാജീവ്‌ കോവിലകം ഒരുക്കിയ സെറ്റുകൾ മികവു പുലർത്തി. പ്രവീണ്‍ വർമ്മയുടെ വസ്ത്രാലങ്കാരവും റോണക്സ്‌ സേവ്യറുടെ ചമയവും ശരാശരിയിലൊതുങ്ങി.

അഭിനയം:⭐⭐⭐
ജയസൂര്യ, ജോജു ജോർജ്, സൈജു കുറുപ്പ്, യോഗ് ജപീ, സുനിൽ സുഖദ, സുധി കോപ്പ, സാജൻ പള്ളുരുത്തി, വിജയകുമാർ, മധുപാൽ, ഷെബിൻ ബിൻസൺ, ബൈജു എഴുപുന്ന, ശിവദ നായർ, വനിത കൃഷ്ണചന്ദ്രൻ, മോളി കണ്ണമാലി എന്നിവരാണ് ഈ സിനിമയിലെ പ്രധാന അഭിനേതാക്കൾ. ജയസൂര്യ ആദ്യമായി അഭിനയിക്കുന്ന മാസ്സ് മസാല ആക്ഷൻ സിനിമയാണ് ഇടി. ദാവൂദ് ഇബ്രാഹിം എന്ന കഥാപാത്രത്തെ തനിക്കാവുന്നവിധം അവതരിപ്പിക്കുവാൻ ജയസൂര്യക്ക് സാധിച്ചു. സിനിമയിലുടനീളം മുംബൈ പൊലീസിലെ ജയസൂര്യയുടെ കഥാപാത്രത്തിന്റെ ഹാങ്ങോവർ അഭിനയ രീതിയിൽ കണ്ടിരുന്നു. വാസു എന്ന മോഷ്ട്ടാവിന്റെ വേഷത്തിൽ ജോജു ജോർജും, യേശു എന്ന വാസുവിന്റെ സഹായിയായി സുധി കോപ്പയും നല്ല അഭിനയം കാഴ്ചവെച്ചു. മറ്റെല്ലാ അഭിനേതാക്കളും മോശമാക്കാതെ അവരവരുടെ കഥാപാത്രങ്ങളെ അവതരിപ്പിച്ചു.

വാൽക്കഷ്ണം: കേട്ടുപഴകിയൊരു കഥയും കണ്ടുമടുത്ത കഥാപാത്രങ്ങളും സ്ഥിരം അവതരണരീതിയും സമന്വയിപ്പിച്ച സിനിമയാണ് ഇടി.

സംവിധാനം: സാജിദ് യഹിയ
നിർമ്മാണം: അജാസ് ഇബ്രാഹിം, അരുണ്‍
തിരക്കഥ: അറൂസ് ഇർഫാൻ, സാജിദ് യഹിയ
സംഭാഷണം: അറൂസ് ഇർഫാൻ
ചായാഗ്രഹണം: സുജിത് സാരംഗ്
ചിത്രസന്നിവേശം: ഷമീർ മുഹമ്മദ്‌
സംഗീതം: രാഹുൽ രാജ്
കലാസംവിധാനം: രാജീവ്‌ കോവിലകം
സംഘട്ടനം: ആക്ഷൻ ജി.
വസ്ത്രാലങ്കാരം: പ്രവീണ്‍ വർമ്മ
ചമയം: റോണക്സ്‌ സേവ്യർ
ഗാനരചന: മനു മഞ്ചിത്
വിതരണം: ഇറോസ് ഇന്റർനാഷണൽ

കസബ – ⭐⭐

image

താരരാജാവും തറവേലകളും – ⭐⭐

കസബ – പോലീസ് സിനിമകളിലെ രംഗങ്ങളും അഡൽറ്റ്സ് ഒൺലി സിനിമകളിലെ സംഭാഷണങ്ങളും കൂട്ടികൊഴച്ചു മൂന്ന് നേരവും മനഃപാഠമാക്കി വെട്ടിത്തിരുത്തി കുത്തിക്കുറിച്ചു എഴുതി സംവിധാനം ചെയ്ത ഇതുപോലുള്ള ക്ലീഷേ സിനിമകൾക്കെ ആ പേര് ചേരു, മറ്റു സിനിമകൾക്ക് ചേരില്ല. ജസ്റ്റ്‌ റിമംബർ ദാറ്റ്!

കസബയുടെ സംവിധായകൻ നിഥിൻ രഞ്ജി പണിക്കർ ആദ്യമായി കണ്ട സിനിമയാണ് ഇൻസ്പെക്റ്റർ ബൽറാം. സഹ സംവിധായകനാകുന്ന ആദ്യ സിനിമയാണ് അച്ഛൻ രഞ്ജി പണിക്കരുടെ രൗദ്രം. ആദ്യം കണ്ട സിനിമയിലും ആദ്യമായി ജോലി നിർവഹിച്ച സിനിമയിലും നായക കഥാപാത്രം പോലീസ് ഉദ്യോഗസ്ഥനാണ്. ആ രണ്ടു കഥാപാത്രങ്ങളും അവതരിപ്പിച്ചത് മെഗാസ്റ്റാർ മമ്മൂട്ടിയും. സ്വതന്ത്ര സംവിധായകനായ ആദ്യ സിനിമ മേല്പറഞ്ഞ രണ്ടു സിനിമകളുടെയും പ്രചോദനമാണെന്ന് വ്യക്തം.

മേല്പറഞ്ഞ സിനിമകൾ പോലെ അച്ഛൻ രഞ്ജി പണിക്കരുടെ തൂലികയിൽ പിറന്ന പല സിനിമകളും പോലീസ് കഥാപാത്രങ്ങളും തന്നിലെ എഴുത്തുകാരനെ സ്വാധീനിച്ചിട്ടുണ്ട് എന്ന് നിഥിൻ പറഞ്ഞിട്ടുണ്ട്. രഞ്ജി പണിക്കരിലെ അച്ഛന് അഭിമാനിക്കാവുന്ന ഒന്നാണ് നിഥിൻ പറഞ്ഞ കാര്യങ്ങൾ. എന്നാൽ, നിഥിന്റെ ആദ്യ സിനിമയായ കസബ കാണുന്ന ഈ തലമുറയിലെ ഒരൊറ്റ കുട്ടി പോലും അല്ലെങ്കിൽ അദ്ദേഹത്തിന്റെ കുടുംബത്തിലെ വരുംതലമുറ പോലും ഇതുപോലുള്ള ഒരു സിനിമ ചെയ്യുവാൻ തയ്യാറാകില്ല എന്ന് എഴുതുന്നതിൽ ഖേദിക്കുന്നു.

പ്രമേയം:⭐
മലയാള സിനിമയിൽ കാലാകാലങ്ങളായി കണ്ടുവരുന്ന സ്ഥിരം പോലീസ് കുറ്റാന്വേഷണ കഥയാണ് കസബയുടേതും. പോലീസ് ഉദ്യോഗസ്ഥൻ കൂടിയായ നായകന്റെ പ്രിയപെട്ട ഒരാൾ കൊല്ലപ്പെടുന്നു. അത് അന്വേഷിക്കുവാനായി ഇറങ്ങി പുറപ്പെടുന്ന നായകൻ നേരിടുന്ന വെല്ലുവിളികളേ അതിജീവിച്ചു കഥാവസാനം നായകൻ ജയിക്കുന്നു. പുതുമയുള്ള പ്രമേയങ്ങൾ അവതരിപ്പിച്ചു കയ്യടിനേടുന്ന പുതുമുഖ സംവിധായകരുടെ പാത പിന്തുടരാതെ എന്തുകൊണ്ടാണ് ഇത്തരത്തിലുള്ള പഴഞ്ചൻ പ്രമേയവും കഥയും നിഥിൻ സ്വീകരിച്ചത് എന്നത് അവ്യക്തമാണ്.

തിരക്കഥ:⭐⭐
കേരള കർണ്ണാടക അതിർത്തിയിൽ നടക്കുന്ന കൊലപാതകവും അത് അന്വേഷിക്കാനെത്തുന്ന പോലീസ് ഉദ്യോഗസ്ഥനും. ആ ഉദ്യോഗസ്ഥൻ കുറ്റാന്വേഷണത്തിനിടയിൽ നേരിടേണ്ടി വരുന്ന പ്രശ്നങ്ങളെ മറികടന്നു കുറ്റവാളികളെ കണ്ടെത്തുന്നു. കണ്ടുമടുത്ത കഥാസന്ദർഭങ്ങളും അസഭ്യ സംഭാഷണങ്ങളും കൃത്യമായി എഴുതിച്ചേർക്കുവാൻ നിഥിനിലെ എഴുത്തുകാരൻ മറന്നില്ല. കൊലപാതകം ചെയ്ത കുറ്റവാളികളെ അന്വേഷിച്ചിറങ്ങിയ നായകൻ വേശ്യാലയം ശുദ്ധികരിക്കുവാൻ ശ്രമിക്കുന്നതും ഒരു അഭിസാരികയെ മർദിച്ച സഹപ്രവർത്തകനായ പോലീസ് ഉദ്യോഗസ്ഥനെ തല്ലിയതും രാജൻ സഖറിയയുടെ മനസ്സിന്റെ നന്മയാണെങ്കിൽ പിന്നെന്തിനാണ് ഭക്ഷണം വിളമ്പിതരുന്ന മറ്റൊരു സഹപ്രവർത്തകന്റെ ഭാര്യയോട് അസഭ്യം പറയുന്നത്? രാജൻ സഖറിയ എന്ന കഥാപാത്രരൂപീകരണത്തിലുള്ള പാളിച്ചകളാണ് ഇവയെല്ലാം. ഈ കഥാപാത്രം കുറ്റവാളികളെ കണ്ടെത്തുവാൻ ശ്രമിക്കുന്നുണ്ടെങ്കിലും അവയൊന്നും കണ്ടെത്തുന്നത് അന്വേഷണ മികവുകൊണ്ടല്ല. അലൻസിയർ അവതരിപ്പിക്കുന്ന തങ്കച്ചൻ എന്ന കഥാപാത്രവും, ജഗദീഷ് അവതരിപ്പിക്കുന്ന മുകുന്ദൻ എന്ന കഥാപാത്രവും നടത്തുന്ന ഏറ്റുപറച്ചിലുകൾ കാരണമാണ്. രാജൻ സഖറിയയുടെ കഥാപാത്ര രൂപീകരണത്തിനിടയിൽ കെട്ടുറപ്പുള്ള ഒരു തിരക്കഥ എഴുതുവാൻ നിഥിൻ രഞ്ജി പണിക്കറിനു സാധിച്ചില്ല.

സംവിധാനം: ⭐⭐
ഒരു മാസ്സ് മസാല എന്റർറ്റെയിനർ ഒരുക്കുവാനുള്ള പാഴായിപോയ ശ്രമമാണ് കസബ. പുതുമയുള്ള കഥാപശ്ചാത്തലമോ സസ്പെൻസ് നിലനിർത്തിയിരുന്ന രീതിയോ അഭിനയ മികവുള്ള നടീനടന്മാരോ ഒന്നും തന്നെയില്ലാത്ത ഈ സിനിമയെ ഒരുപരുധിവരെ രക്ഷിച്ചത് മമ്മൂട്ടിയുടെ താരമൂല്യമാണ്. മമ്മൂട്ടിയുടെ നായക കഥാപാത്രത്തേക്കാൾ കൂടുതൽ രംഗങ്ങൾ വരലക്ഷ്മിയ്ക്കും സമ്പത്തിനും നൽകിയിട്ടുണ്ട് സംവിധായകൻ. ഉദ്യോഗജനകമായ അവതരണ രീതിയോ ത്രസിപ്പിക്കുന്ന സംഭാഷണങ്ങളോ സസ്പെൻസോ ഒന്നുമില്ലാതെ അവസാനിച്ച ഒരു സാധാരണ സിനിമയായി കസബ. സിനിമ പുറത്തിറങ്ങുന്നതിന് മുമ്പേ നാളിതുവരെയുള്ള റെക്കോർഡുകളെല്ലാം മാറ്റിമറിച്ച സിനിമ, ഇതുവരെ കാണാത്ത ശൈലിയിൽ മമ്മൂട്ടിയെ അവതരിപ്പിക്കുവാൻ സാധിച്ച സിനിമ എന്നീ വിശേഷണങ്ങൾ കസബയ്ക്കും നിഥിൻ രഞ്ജി പണിക്കർക്കും സ്വന്തം.

സാങ്കേതികം: ⭐⭐⭐
സമീർ ഹഖ് ചിത്രീകരിച്ച രംഗങ്ങൾ ഒരു മസാല സിനിമയ്ക്ക് ചേരുന്ന രീതിയിലാണ്. അതിനു പാകത്തിലുള്ള ലൊക്കേഷനുകളും ലൈറ്റിംഗ് രീതിയുമാണ് സിനിമയിലുടനീളം കാണപെടുന്നത്. സംഘട്ടന രംഗങ്ങളുടെ ചിത്രീകരണവും മമ്മൂട്ടിയുടെ കഥാപാത്രത്തിന്റെ വേഷപ്പകർച്ചയുള്ള രംഗങ്ങളുടെ ചിത്രീകരണവും മികവു പുലർത്തി. നവാഗതനായ മൻസൂർ മാത്തുക്കുട്ടിയാണ് രംഗങ്ങൾ കോർത്തിണക്കിയത്. ആദ്യ പകുതിയിൽ കൈവരിച്ച വേഗതയൊന്നും രണ്ടാം പകുതിയിൽ കണ്ടില്ല. കഥയിൽ യാതൊരു വഴിത്തിരുമുണ്ടാക്കാത്ത ഒട്ടനവധി രംഗങ്ങൾ വലിച്ചുനീട്ടിയാണ് മൻസൂർ അവതരിപ്പിച്ചിരിക്കുന്നത്. സന്തോഷ്‌ രാമന്റെ കലാസംവിധാനത്തിൽ ഒരുക്കിയ പോലീസ് സ്റ്റേഷനും വേശ്യാലയവും വഴിയോര ബാറും മികവു പുലർത്തി. രാഹുൽ രാജാണ് പശ്ചാത്തല സംഗീതം നൽകിയത്. രാജൻ സഖറിയയുടെ നടത്തിന്റെ മ്യൂസിക് രസകരമായിരുന്നു. മറ്റു രംഗങ്ങളിൽ പ്രത്യേകതയുള്ളതോ ത്രസിപ്പിക്കുന്നതോ ആയ പശ്ചാത്തല സംഗീതമില്ല. കുറെ ശബ്ദകോലാഹലങ്ങൾ ചിട്ടപ്പെടുത്തി എന്നതിലുപരി മറ്റൊന്നും ചെയ്യുവാൻ രാഹുൽ രാജ് ശ്രമിച്ചിട്ടില്ല. സമീറ സനീഷിന്റെ വസ്ത്രാലങ്കാരം കഥാപാത്രങ്ങൾക്ക് യോജിച്ചവയായിരുന്നു.

അഭിനയം: ⭐⭐⭐
നാളിതുവരെ മമ്മൂട്ടി അവതരിപ്പിച്ച പോലീസ് കഥാപാത്രങ്ങളിൽ നിന്നും വ്യതസ്ഥതകൾ ഏറെയുള്ള കഥാപാത്രമാണ് രാജൻ സഖറിയ. വേറിട്ട മാനറിസങ്ങളുള്ള അഭിനയ ശൈലിയിലൂടെയാണ് ഈ കഥാപാത്രത്തെ മമ്മൂട്ടി അവതരിപ്പിച്ചിരിക്കുന്നത്. നടത്തിലുള്ള പ്രത്യേകത പശ്ചാത്തല സംഗീതത്തിന്റെ അകമ്പടിയോടെ കാണുമ്പോൾ രസകരമായിരുന്നു. പക്ഷെ, രാജൻ സഖറിയ മുണ്ട് ധരിച്ചു ജീപ്പിൽ നിന്നും ഇറങ്ങി നടക്കുന്ന ഒന്ന്-രണ്ട് രംഗങ്ങളിൽ നടത്തിത്തിന്റെ ശൈലി മാറിപ്പോകുന്നുതുമുണ്ട്. രാജൻ സഖറിയ എന്ന കഥാപാത്രത്തെ രസകരമായി അവതരിപ്പിക്കുവാൻ മമ്മൂട്ടി പരമാവധി ശ്രമിച്ചിട്ടുണ്ട്. അദ്ദേഹത്തിലെ അത്യുജ്വല നടനെ ഈ സിനിമയിൽ കാണാനാകാത്തതിൽ ഒരു ആരാധകനെന്ന നിലയിൽ ദുഖിക്കുന്നു.

മമ്മൂട്ടിയെ കൂടാതെ വരലക്ഷ്മി ശരത്കുമാർ, സമ്പത് രാജ്, ജഗദീഷ്, സിദ്ദിക്ക്, മക്ബൂൽ സൽമാൻ, ഷഹീൻ സിദ്ദിക്ക്, നേഹ സക്‌സേന, അലൻസിയാർ, ബിജു പപ്പൻ, ഇർഷാദ്, അബു സലിം, ശ്രീധന്യ എന്നിവരും പ്രധാന കഥാപാത്രങ്ങളെ അവതരിപ്പിച്ചിരിക്കുന്നു. ഏറെ വെല്ലുവിളികളുള്ള കഥാപാത്രമായ കമലയെയാണ് തെന്നിത്യൻ അഭിനേത്രി വരലക്ഷ്മി അവതരിപ്പിച്ചിരിക്കുന്നത്. വരലക്ഷ്മിയ്ക്ക് വേണ്ടി ശബ്ദം നൽകിയ ആ കലാകാരി അഭിനന്ദനം അർഹിക്കുന്നു. മികച്ച  ഡബ്ബിംഗ് ആയതിനാൽ വരലക്ഷ്മിയുടെ ഭാവാഭിനയത്തിന്റെ പോരായ്മകൾ അത്രകണ്ട് പ്രേക്ഷകർക്ക്‌ മനസ്സിലാകുന്നില്ല. ഷോബി തിലകൻ വീണ്ടും കഴിവ് തെളിയിച്ചതിനാൽ സമ്പത്തിന്റെ ഭാവഭിനയവും മോശമായില്ല. ജഗദീഷും സിദ്ദിക്കും ബിജു പപ്പനും അലൻസിയാറും അവരവരുടെ കഥാപാത്രങ്ങളെ മോശമാക്കാതെ അവതരിപ്പിച്ചു.

വാൽക്കഷ്ണം: താരരാജാവിന്റെ കപട ആരാധകർക്ക് കസബയൊരു ആക്ഷൻ കോമഡി എന്റർറ്റെയിനറും യഥാർത്ഥ ആരാധകർക്ക് ഇതൊരു നോസിയേറ്റിങ് വെർബൽ ഡൈറിയയും.

രചന, സംവിധാനം: നിഥിൻ പണിക്കർ
നിർമ്മാണം: ആലീസ് ജോർജ്
ചായാഗ്രഹണം: സമീർ ഹഖ്
ചിത്രസന്നിവേശം: മൻസൂർ മുത്തുകുട്ടി
പശ്ചാത്തല സംഗീതം: രാഹുൽ രാജ്
കലാസംവിധാനം: സന്തോഷ്‌ രാമൻ
മേക്കപ്പ്: റോണക്സ്‌ സേവ്യർ
വസ്ത്രാലങ്കാരം: സമീറ സനീഷ്
വിതരണം: ആന്റോ ജോസഫ്‌

കമ്മട്ടിപ്പാടം – ⭐⭐

image

ദി റിയൽ റെഡ് ബ്ലഡ്‌ ഷെഡ്‌! – ⭐⭐

“അക്കാണും മാമാലയോന്നും
നമ്മുടെതല്ലെന്മകനെ
ഇക്കായാൽ കയവും കരയും
ആരുടെയുമല്ലെൻ മകനേ!” – അൻവർ അലി

കമ്മട്ടിപ്പാടത്ത് ജീവിച്ചു മരിച്ച ഒരുപറ്റം ചങ്കൂറ്റമുള്ളവരുടെ ചോരയുടെ മണമുണ്ട് ഇന്ന് കാണുന്ന കൊച്ചി എന്ന മഹാനഗരത്തിന്. ആ മഹാനഗരം അന്നും ഇന്നും കമ്മട്ടിപ്പാടത്തുകാരുടെയല്ല.

എറണാകുളം ജില്ലയിലെ സൗത്ത്  കെ.എസ്.ആർ.ടി.സി. ബസ്‌ സ്റ്റാന്റിനു സമീപമുള്ള റെയിൽ പാളത്തിനടുത്ത് സ്ഥിതിചെയ്യുന്ന സ്ഥലമാണ് കമ്മട്ടിപ്പാടം. അവിടെ ജനിച്ചു വളർന്ന ബാലനും കൃഷ്ണനും ഗംഗയും ഇന്ന് ജീവനോടെയുണ്ടോ എന്നുപോലുമറിയില്ല. ഗുണ്ടകൾ അഥവാ ക്വട്ടേഷൻ സംഘങ്ങൾ എന്നാണ് ഇവർ അറിയപെട്ടിരുന്നത്. ഒരുപക്ഷേ കേരളത്തിലെ ആദ്യത്തെ ക്വട്ടേഷൻ സംഘങ്ങളാകം ബാലനും കൃഷ്നനും ഗംഗയും. ഇവരുടെ ജീവിതകഥ വെള്ളിത്തിരയിൽ എത്തിച്ചത് രാജീവ്‌ രവിയാണ്. കമ്മട്ടിപ്പാടം സിനിമയിൽ കൃഷ്ണനായി ദുൽഖർ സൽമാനും, ഗംഗയായി വിനായകനും, ബാലനായി പുതുമുഖം മണികണ്ഠനും അഭിനയിച്ചിരിക്കുന്നു.

ലോർഡ്‌ ലിവിംഗ്സ്റ്റൺ 7000 കണ്ടി എന്ന സിനിമയ്ക്ക് ശേഷം ഗ്ലോബൽ യുണൈറ്റഡ്‌ മീഡിയയുടെ ബാനറിൽ പ്രേം മേനോൻ നിർമ്മിച്ച കമ്മട്ടിപ്പാടത്തിന്റെ തിരക്കഥയും സംഭാഷണങ്ങളും എഴുതിയിരിക്കുന്നത് നടനും തിരക്കഥാകൃത്തുമായ പി.ബാലചന്ദ്രനാണ്. മധു നീലകണ്ഠൻ ചായഗ്രഹണവും, ബി.അജിത്കുമാർ ചിത്രസന്നിവേശവും, നാഗരാജ്-ഗോകുൽദാസ് എന്നിവർ കലാസംവിധാനവും, റോഷൻ മേയിക്കപ്പും, ജോൺ വർക്കി കെ(കൃഷ്ണകുമാർ)എന്നിവർ പശ്ചാത്തല സംഗീത സംവിധാനവും പാട്ടുകളുടെ സംഗീത സംവിധാനവും നിർവഹിച്ചിരിക്കുന്നു.

പ്രമേയം: ⭐⭐⭐
അധോലോക സംഘങ്ങൾ തമ്മിലുള്ള പകപോക്കൽ പ്രമേയമാക്കിയുള്ള ഒട്ടനവധി സിനിമകൾ ഇന്ത്യയിലെ പല ഭാഷകളിലായി സിനിമയാക്കിയിട്ടുണ്ട്. മലയാള സിനിമയിലും ഇത്തരത്തിലുള്ള പ്രമേയങ്ങൾ അവതരിപ്പിച്ചിട്ടുണ്ട്. ഒരു നഗരത്തിന്റെ ഹൃദയഭാഗത്ത്‌ സ്ഥിതിചെയ്യുന്ന ഒരു സ്ഥലവും അവിടെ നിലകൊണ്ടിരുന്ന ഗുണ്ടാസംഘങ്ങൾ ആ നഗരത്തിന്റെ വളർച്ചയുടെ ഭാഗമായിരുന്നു എന്നും പ്രേക്ഷകർക്ക്‌ മനസ്സിലാക്കികൊടുത്ത കഥയുള്ള ഒരു സിനിമ ഇതാദ്യം. സംവിധായകൻ രാജിവ് രവിയാണ് കമ്മട്ടിപ്പാടത്തിന്റെ കഥ എഴുതിയിരിക്കുന്നത്. ഒരു കഥ എന്നതിലുപരി കഥാപാത്രങ്ങളുടെ ജീവിതത്തിലെ പല കാലഘട്ടങ്ങൾ കാണിച്ചുതരുന്ന ഒരു സിനിമയാണിത്.

തിരക്കഥ: ⭐⭐
ഉള്ളടക്കം എന്ന കമൽ-മോഹൻലാൽ സിനിമ, പവിത്രം എന്ന ടി.കെ.രാജീവ്കുമാർ-മോഹൻലാൽ സിനിമ, വി.കെ.പ്രകാശിന്റെ ആദ്യ മലയാള സിനിമ പുനരധിവാസം എന്നീ സിനിമകളുടെ തിരക്കഥ എഴുതിക്കൊണ്ട് സിനിമയിലെത്തിയ പി.ബാലചന്ദ്രൻ പിന്നീട് അഭിനയ മേഘലയിലേക്ക് കടന്നു. അദ്ദേഹം ഒരു നീണ്ട ഇടവേളയ്ക്ക് ശേഷം വീണ്ടും രചിച്ച തിരക്കഥയാണ് ഈ സിനിമയുടേത്. കമ്മട്ടിപ്പാടത്ത് ജീവിച്ചിരുന്ന കഥാപാത്രങ്ങളെ ഇത്രയും സൂക്ഷ്മതയോടെ പിന്തുടർന്ന് എഴുതിയതാണോ എന്ന് തോന്നിപ്പിക്കുന്ന രീതിയിൽ ഓരോ കഥാപാത്രങ്ങളെയും അവതരിപ്പിച്ചിരിക്കുന്നു. അവരുടെ സംഭാഷണ രീതിയും തനതായ കൊച്ചി ശൈലിയും എല്ലാം കൃത്യമായി സംഭാഷണങ്ങളിൽ ഉൾപെടുത്തിയിട്ടുണ്ട്. കഥയ്ക്ക് പകരം കഥാപാത്രങ്ങൾ മുൻപോട്ടു നയിക്കുന്ന ഒരു സിനിമയാണിത്. അതുകൊണ്ട് എന്തിനാണ് ഓരോ കഥാപാത്രത്തിന്റെയും വിശദാംശങ്ങളിലേക്ക് ഇത്രയുമധികം കടന്നു ചെന്നത്? കൃഷ്ണന്റെ ബോംബയിലുള്ള ജോലിയും സുഹൃത്തുക്കളും ജയിലിലെ വഴക്കുകൾ എന്നിവയെല്ലാം അനാവശ്യമായി തിരക്കഥയിൽ ഉൾപ്പെടുത്തി സിനിമയുടെ ദൈർഘ്യം വർദ്ധിപ്പിച്ചു. ഗംഗയെ അന്വേഷിച്ചുള്ള യാത്രയിൽ കൃഷ്ണൻ തന്റെ ബാല്യകാല സംഭവങ്ങൾ ഓർക്കുന്നതായി തിരക്കഥയിലുണ്ട്. കൃഷ്ണന്റെ ബാല്യകാലവും, ഗംഗയും ബാലൻ ചേട്ടനും മറ്റു സുഹൃത്തുക്കളും അടങ്ങുന്ന കമ്മട്ടിപാടത്തെ കാഴ്ചകൾ ഒരുപാട് വലിച്ചുനീട്ടിയതായി തോന്നി. സിനിമയുടെ പ്രമേയവും കഥയും കമ്മട്ടിപ്പാടം എന്ന സ്ഥലത്തിലെ ക്വട്ടേഷൻ സംഘങ്ങളുടെ ഉത്ഭവം എങ്ങനെയായിരുന്നു എന്നായിരുന്നു എങ്കിൽ കുഴപ്പമില്ലായിരുന്നു. സുഹൃത്തിനെ അന്വേഷിച്ചുള്ള യാത്രയ്ക്ക് കൂടുതൽ പ്രാധാന്യം നൽക്കേണ്ടതായിരുന്നു. പ്രവചിക്കാനവുന്ന കഥാഗതിയും ട്വിസ്റ്റുകളും പ്രേക്ഷകരെ ത്രസിപ്പിക്കുന്നില്ല.

സംവിധാനം: ⭐⭐
അന്നയും റസൂലും, ഞാൻ സ്റ്റീവ് ലോപ്പസ് എന്നീ സിനിമകൾ പോലെ കമ്മട്ടിപ്പാടവും യാഥാർത്യത്തോടെ അവതരിപ്പിച്ചിരിക്കുന്ന സിനിമയാണ്. കഥാപാത്രങ്ങൾക്ക് അനിയോജ്യരായ നടീനടന്മാരെ കണ്ടെത്തിയതിൽ രാജീവ് രവി അഭിനന്ദനം അർഹിക്കുന്നു. സാങ്കേതികത്തികവോടെ അഭിനയമികവോടെ കമ്മട്ടിപ്പാടം അവതരിപ്പിക്കുവാൻ സംവിധായകന് കഴിഞ്ഞു. പക്ഷെ, പതിഞ്ഞ താളത്തിലുള്ള കഥയുടെ അവതരണം പ്രേക്ഷകരെ ബോറടിപ്പിച്ചു. ഇത്രയും ഇഴഞ്ഞു നീങ്ങുന്ന അവതരണ രീതിയുടെ അവശ്യം എന്തെന്ന് മനസ്സിലാകുന്നില്ല. പ്രവചിക്കാനവുന്ന കഥാസന്ദർഭങ്ങളെ അതിശയോക്തിയില്ലാതെ അവതരിപ്പിച്ചു എന്നത് മാത്രമാണ് ഇതിലെ സംവിധാന മികവ്. വേഗതയോടെ ഈ സിനിമ അവതരിപ്പിക്കാതിരുന്നത് പ്രേക്ഷകരുടെ ആസ്വാദനത്തെ ദോഷകരമായി ബാധിച്ചിട്ടുണ്ട്.

സാങ്കേതികം: ⭐⭐⭐
അന്നയും റസൂലും എന്ന സിനിമയിലൂടെ ചായഗ്രഹണത്തിനു സംസ്ഥാന അംഗീകാരം നേടിയ മധു നീലകണ്ഠൻ ഒരിക്കൽ കൂടി തന്റെ കഴിവ് തെളിയിചിരിക്കുകയാണ്. ഗംഭീരമായ ചായഗ്രഹണത്തിലൂടെ സംവിധായകന്റെ മനസ്സിലെ ആശയം പ്രേക്ഷകരിലേക്ക് നൽക്കുവാൻ മധു നീലകണ്ഠനു സാധിച്ചു. കുനാൽ ശർമ്മയുടെ ശബ്ദമിശ്രണവും, ജോൺ വർക്കിയുടെ പശ്ചാത്തല സംഗീതവും മധു നീലകണ്ഠൻ പകർത്തിയ ദൃശ്യങ്ങളുടെ മാറ്റുക്കൂട്ടുന്നു. കൊച്ചിയുടെ ഇരുണ്ടമുഖവും ഭീകരതയും പഴയ കാലഘട്ടവും പുതിയ കാലഘട്ടവും ഒരുക്കിയ കലാസംവിധായകരായ നാഗരാജും ഗോകുൽ ദാസും പ്രത്യേക അഭിനന്ദനം അർഹിക്കുന്നു. അതുപോലെ, മൂന്ന് കാലഘട്ടങ്ങളിൽ വന്നു പോകുന്ന കഥാപാത്രങ്ങളുടെ മേയിക്കപ്പ് മികവു പുലർത്തി. ഈ സവിശേഷതകൾക്ക് കല്ലുകടിയായി അനുഭവപെട്ടത്‌ ബി. അജിത്‌കുമാർ നിർവഹിച്ച രംഗങ്ങളുടെ സന്നിവേശമാണ്. അനാവശ്യമായി വലിച്ചുനീട്ടിയ ഒരുപാട് രംഗങ്ങൾ ഈ സിനിമയിലുണ്ട്. കഥാപാത്രങ്ങളുടെ സ്വഭാവ വിവരണത്തിനായി സമയം കളഞ്ഞത്‌ സിനിമാസ്വാദനത്തെ പ്രതികൂലമായി ബാധിച്ചിട്ടുണ്ട്. 3 മണിക്കൂറോളം ദൈർഘ്യമുള്ള ഈ സിനിമയിലെ പല രംഗങ്ങളും കഥയിൽ യാതൊരു അവശ്യവുമില്ലാത്തതാണെന്ന് നിസംശയം പറയാം. അതുകൊണ്ട് പല രംഗങ്ങളും ഇഴഞ്ഞുനീങ്ങുന്ന അവസ്ഥയിലാണ് അനുഭവപെട്ടത്‌. ഈ സിനിമയുടെ പ്രധാന ന്യൂനതകളിൽ ഒന്നായിമാറി ബി.അജിത്കുമാറിന്റെ ചിത്രസന്നിവേശം.

അഭിനയം: ⭐⭐⭐⭐
ദുൽഖർ സൽമാൻ, വിനായകൻ, മണികണ്ഠൻ, അനിൽ നെടുമങ്ങാട്, സൗബിൻ ഷാഹിർ, സുരാജ് വെഞ്ഞാറമൂട്, ഷൈൻ ടോം ചാക്കോ, അലൻസിയാർ, പി.ബാലചന്ദ്രൻ, വിനയ് ഫോർട്ട്‌, സിദ്ധാർഥ്, ശ്രീനാഥ് ചന്ദ്രൻ, ഗണപതി, ഷോൺ റോമി, അമാൽദ ലിസ്, മുത്തുമണി, അഞ്ജലി അനീഷ്‌ എന്നിവരാണ് ഈ സിനിമയിലെ അഭിനേതാക്കൾ. ഓരോ അഭിനേതാക്കളും കഥാപാത്രങ്ങളായി ജീവിക്കുകയാണെന്ന് തോന്നിയ സിനിമയാണിത്. നാടകത്തിൽ നിന്ന് സിനിമയിലെത്തിയ ഏറ്റവും ഒടുവിലത്തെ നടനാണ്‌ മണികണ്ഠൻ. ബാലൻ എന്ന ഗുണ്ടയുടെ വേഷത്തിൽ അഭിനയിപ്പിക്കുവാൻ ഇതിലും മികച്ച ഒരു നടനെ കണ്ടെത്തുവാനാകില്ല. സംഭാഷണങ്ങൾ ഇല്ലാത്ത രംഗങ്ങളിൽ പോലും ചിരികൊണ്ടും മൂളലുകൾകൊണ്ടും നോട്ടങ്ങൾകൊണ്ട് പോലും അഭിനയിച്ചിട്ടുണ്ട് ഈ പുതുമുഖ നടൻ. ഗംഗ എന്ന കഥാപാത്രമായി വിനായകനും നാളിതുവരെയുള്ള ഏറ്റവും മികച്ച അഭിനയമുഹൂർത്തങ്ങൾ ഈ സിനിമയിലൂടെ കാഴ്ചവെച്ചു. കൃഷ്ണനായി ദുൽഖർ സൽമാനും, സുരേന്ദ്രനാശാനായി അനിൽ നെടുമങ്ങാടും കഥാപാത്രങ്ങളോട് നൂറ്  ശതമാനം നീതി പുലർത്തുന്ന രീതിയിൽ അഭിനയിച്ചു. ഇവരെ കൂടാതെ ചെറിയ വേഷങ്ങളിൽ അഭിനയിച്ച പുതുമുഖ നടീനടന്മാർ പോലും അവരവരുടെ രംഗങ്ങൾ മികവുറ്റതാക്കി. ഏവർക്കും അഭിനന്ദനങ്ങൾ!

വാൽക്കഷ്ണം: ചോര വീണ മണ്ണിൽ നിന്നുയർന്നു വന്ന മഹാനഗരത്തിന്റെ ചുവന്ന മുഖം!

കഥ, സംവിധാനം: രാജീവ്‌ രവി
തിരക്കഥ: പി.ബാലചന്ദ്രൻ
നിർമ്മാണം: പ്രേം മേനോൻ
ചായാഗ്രഹണം: മധു നീലകണ്ഠൻ
ചിത്രസന്നിവേശം: ബി. അജിത്കുമാർ
ഗാനരചന: അൻവർ അലി
സംഗീതം: കെ., ജോൺ വർക്കി, വിനായകൻ
കലാസംവിധാനം: നാഗരാജ്, ഗോകുൽ ദാസ്
മേയിക്കപ്പ്: റോഷൻ
വസ്ത്രാലങ്കാരം: ശുഭ്ര അൻസൂൽ, മഷർ ഹംസ
ശബ്ദമിശ്രണം: കുനാൽ ശർമ്മ
സിങ്ക് സൗണ്ട്: രാധാകൃഷ്ണൻ
വിതരണം: സെഞ്ച്വറി ഫിലിംസ്.

ഡാർവിന്റെ പരിണാമം – ⭐⭐

image

യുക്തിയില്ലാത്തൊരു പരിണാമ കഥ! ⭐⭐

ലോകപ്രശസ്തനായ ചാൾസ് ഡാർവിന്റെ “ഉത്തമൻ അതിജീവിക്കുന്നു” എന്ന സിദ്ധാന്തം പ്രമേയമാക്കിയ സിനിമകൾ നിരവധിയുണ്ട്. സമൂഹ ജീവിയായ മനുഷ്യൻ നേരിടേണ്ടിവരുന്ന പ്രശ്നങ്ങളെല്ലാം അതിജീവിച്ചു മുൻപോട്ടു പോയവരെയാണ് ഉത്തമർ അഥവാ “സർവൈവൽ ഓഫ് ദി ഫിറ്റെസ്റ്റ്”എന്ന് വിശേഷിപ്പിക്കാവുന്നത്. 

ഓഗസ്റ്റ് സിനിമാസ് നിർമ്മിച്ച്‌ ജിജോ ആന്റണി സംവിധാനം നിർവഹിച്ച ഡാർവിന്റെ പരിണാമത്തിൽ ചർച്ചചെയ്യുന്ന പ്രമേയവും മനുഷ്യൻ നേരിടേണ്ടി വരുന്ന പ്രശ്നങ്ങളെ അതിജീവിക്കുന്നതിനെകുറിച്ചാണ്. ഈ സിനിമയിൽ ഡാർവിൻ എന്ന കേന്ദ്ര കഥാപാത്രത്തെ അവതരിപ്പിച്ചിരിക്കുന്നത് ചെമ്പൻ വിനോദ് ജോസാണ്. അനിൽ ആന്റോ എന്ന സാധാരണക്കാരൻ നേരിടേണ്ടി വരുന്ന ഒരു പ്രശ്നവും അതിനോടുള്ള ചെറുത്തുനിൽപ്പും, അതെല്ലാം അതിജീവിച്ചു മുന്നേറുന്നതുമാണ് ഈ സിനിമയുടെ കഥ. അനിൽ ആന്റോയായി പ്രിഥ്വിരാജ് അഭിനയിച്ചിരിക്കുന്നു. അതിജീവനത്തിനു വേണ്ടി ഡാർവിനും അനിലും തമ്മിലുള്ള പോരാട്ടമാണ് ഡാർവിന്റെ പരിണാമം എന്ന സിനിമ.

പ്രമേയം: ⭐⭐
കേരളത്തിൽ ഒരിടയ്ക്ക് നിരന്തരം സംഭവിച്ചുകൊണ്ടിരുന്ന പട്ടാപകൽ നടക്കുന്ന മോഷണങ്ങളും ഹെൽമെറ്റ്‌ ധരിച്ചു ബൈക്കിൽ വന്നു മാല പൊട്ടിക്കലും കൊട്ടേഷൻ സംഘങ്ങളുടെ ആക്രമണവും സാധാരണ ജനങ്ങളെ എത്രത്തോളം മോശമായി ബാധിക്കുന്നു എന്നത് ഗൗരവമുള്ള വിഷയമാണ്. ഇത്തരത്തിലുള്ള കുറ്റകൃത്യങ്ങൾക്കെതിരെ ഒരു  സാധാരണ പൗരൻ നടത്തുന്ന പ്രതികാരം രസകരമായ സന്ദർഭങ്ങളിലൂടെ അവതരിപ്പിക്കുന്നതാണ് ഈ സിനിമയുടെ പ്രമേയം.

തിരക്കഥ: ⭐⭐
സംവിധായകൻ ജിജോയും മനോജ്‌ നായരും ചേർന്നാണ് ഈ സിനിമയുടെ രചന നിർവഹിച്ചത്. ഈ സിനിമയുടെ പ്രധാന ഘടകം എന്നത്  ഡാർവിൻ എന്ന ഗുണ്ടയുടെ പരിണാമം ആണ്. ഡാർവിൻ ചെയ്ത കുറ്റകൃത്യങ്ങൾ ന്യായികരണമില്ലാത്തതാണ്. അതിനെതിരെ അനിൽ സ്വീകരിച്ച വഴികൾ രസകരമായിരുന്നുവെങ്കിലും അതൊന്നും ഒരു വ്യക്തിയുടെ സ്വഭാവമോ പ്രവർത്തികളൊ മാറ്റം വരുത്തുന്നവയല്ല. നാടിനെ വിറപ്പിക്കുന്ന നാട്ടുകാരുടെ പേടിസ്വപ്നമായ ഡാർവിൻ ഗുണ്ടയുടെ പരിണാമത്തിനു അവിശ്വസനീയമായ കാരണങ്ങളാണ് തിരക്കഥ രചയ്താക്കൾ എഴുതിയിരിക്കുന്നത്. അത് തന്നെയാണ് ഈ സിനിമയുടെ പ്രധാന പോരായ്മകളിലോന്ന്.

സംവിധാനം: ⭐⭐
വി.കെ.പ്രകാശ്‌ ശിഷ്യനായ ജിജോ ആന്റണി സംവിധാനം നിർവഹിച്ച രണ്ടാമത്തെ സിനിമയാണ് ഡാർവിന്റെ പരിണാമം. രസകരമായ കഥാസന്ദർഭങ്ങളെ അതിഭാവുകത്വമില്ലാതെയും വിശ്വസനീയതയോടെയും അവതരിപ്പിച്ച ആദ്യ പകുതി പ്രേക്ഷകരെ ഒന്നടങ്കം ചിരിപ്പിച്ചു. എന്നാൽ, സിനിമയുടെ രണ്ടാം പകുതിയിൽ അവിശ്വസനീയമായ വഴിതിരുവുകളും വിശദീകരണമില്ലാത്ത കഥാസന്ദർഭങ്ങളും മോശം സിനിമയിലേക്കുള്ള പരിണാമമായി മാറി. ഡാർവിൻ ഈ കഥയിലെ നായകനും അനിൽ വില്ലനുമാണന്നും ഈ സിനിമയുടെ തുടക്കത്തിൽ പറയുന്നത്‌. എത്ര ആലോചിച്ചിട്ടും ഡാർവിൻ ചെയ്ത കാര്യങ്ങൾ തെറ്റായിട്ടും അനിൽ ചെയ്ത കാര്യങ്ങൾ ന്യായമായിട്ടുമാണ് തോന്നിയത്. ഇത് നിരൂപകനെന്ന നിലയിലും പ്രേക്ഷകനെന്ന നിലയിലും എനിക്ക് മാത്രം തോന്നിയതുമാകം.

സാങ്കേതികം: ⭐⭐
യുക്തിയെ ചോദ്യം ചെയ്യുന്ന ഈ പരിണാമ കഥ കണ്ടിരിക്കുവാൻ തോന്നുന്ന രീതിയിലാക്കിയത് അഭിനന്ദൻ എന്ന വ്യക്തിയുടെ ചായഗ്രഹണ മികവുകൊണ്ട് മാത്രമാണ്. ഇതിനു വിപരീതമായി സമീപകാലത്ത് കണ്ടത്തിൽ മോശം എന്ന് തന്നെ തോന്നിപ്പിക്കുന്ന രംഗങ്ങളുടെ സന്നിവേശമാണ്‌ വിജയ്‌ ശങ്കർ നിർവഹിച്ചിരിക്കുന്നത്. 10 വർഷങ്ങൾക്കു മുമ്പ് ഡോൺ മാക്സും മറ്റും പരീക്ഷിച്ച ശൈലിയാണ് ഈ സിനിമയ്ക്ക് വേണ്ടി വിജയ്‌ ശങ്കർ സ്വീകരിച്ചത്. ശങ്കർ ശർമ്മ ഈണമിട്ട പാട്ടുകൾ ശ്രദ്ധ നേടിയില്ല. എന്നാൽ പശ്ചാത്തല സംഗീതം സിനിമയിലുടനീളം മികച്ചു നിന്നു. അനൽ അരശ്-അൻപറിവ് ടീമിന്റെ സംഘട്ടനം മികവു പുലർത്തിയില്ല. സംഘട്ടന രംഗങ്ങളെല്ലാം  പുതുമകളൊന്നുമില്ലാതെ പതിവ് രീതിയിൽ അനുഭവപെട്ടു.

അഭിനയം: ⭐⭐⭐
കേബിൾ ടീവി റിപ്പെയർ ജോലി ചെയ്തുവരുന്ന സാധാരണക്കാരന്റെ വേഷത്തിലാണ് പ്രിഥ്വിരാജ് അഭിനയിച്ചിരിക്കുന്നത്. അയാളുടെ കുടുംബത്തെ ബാധിച്ച ഒരു പ്രശ്നവും അതിനെതിരെ നടത്തുന്ന ചെറുത്തുനിൽപ്പും മാനസിക സംഘർഷങ്ങളും തന്മയത്വത്തോടെ അവതരിപ്പിക്കുവാൻ പ്രിഥ്വിയ്ക്ക് സാധിച്ചു. ഗുണ്ടയായ ഡാർവിൻ എന്ന കഥാപാത്രത്തെ മോശമാക്കാതെ അഭിനയിച്ചു ഫലിപ്പിക്കുവാൻ ചെമ്പൻ വിനോദ് ജോസിനും കഴിഞ്ഞു. പുതുമുഖ നായിക ചാന്ദിനി ശ്രീധരൻ ശ്രദ്ധനേടുന്ന അഭിനയം കാഴ്ചവെച്ചു. ഇവരെ കൂടാതെ സൗബിൻ ഷാഹിർ, അരുണ്‍ നാരായണൻ, കോട്ടയം പ്രദീപ്‌, ഷമ്മി തിലകൻ, ഹന്ന റെജി, നന്ദു, ജാഫർ ഇടുക്കി, ബാലു വർഗീസ്‌, മാമുക്കോയ, ധർമജൻ ബോൾഗാട്ടി, സാജിദ് യഹ്യ, സാബു, മുരുകൻ, വിവിത, സേതുലക്ഷ്മി എന്നിവരാണ് പ്രധാന അഭിനേതാക്കൾ.  

വാൽക്കഷ്ണം: ഇത് ഡാർവിന്റെ പരിണാമമോ അതോ അനിലിന്റെ പ്രതികാരമോ?

കഥ, സംവിധാനം: ജിജോ ആന്റണി
നിർമ്മാണം: ഓഗസ്റ്റ് സിനിമാസ്
തിരക്കഥ, സംഭാഷണം: മനോജ്‌ നായർ
ചായാഗ്രഹണം: അഭിനന്ദൻ രാമാനുജം
ചിത്രസന്നിവേശം: വിജയ്‌ ശങ്കർ
സംഗീതം: ശങ്കർ ശർമ്മ
കലാസംവിധാനം: രാജീവ്‌ കോവിലകം
സംഘട്ടനം: അനൽ അരശ്, അൻപറിവ്
വസ്ത്രാലങ്കാരം: സ്റ്റെഫി സേവ്യർ
മേയ്ക്കപ്പ്: അമൽ
ശബ്ദമിശ്രണം: രംഗനാഥ് രവീ
വിതരണം: ഓഗസ്റ്റ് സിനിമ

സ്റ്റൈൽ – ⭐

image

ഇതിഹാസ സംവിധായകന്റെ അതിസാഹസികം! ⭐

ഇതിഹാസ എന്ന സിനിമയുടെ തിരക്കഥകൃത്തും സംവിധായകനും വീണ്ടും ഒന്നിക്കുന്ന സിനിമയാണ് സ്റ്റൈൽ. പേര് സൂചിപ്പിക്കുന്ന പോലെ ഒരു മുഴുനീള സ്റ്റൈൽ ചിത്രം ഒരുക്കുവാൻ ശ്രമിച്ച ഇരുവർക്കും നിരാശജനകമായ ഒരു സിനിമ പുതുവത്സരത്തിൽ പ്രേക്ഷക്കർക്ക് നൽക്കുവാനാണ് കഴിഞ്ഞത്. കണ്ടുമടുത്ത കഥയും കഥാസന്ദർഭങ്ങളും കഥാപാത്രങ്ങളും സംഭാഷണങ്ങളും കഥാപശ്ചാത്തലവും പാട്ടുകളും അവസാനമില്ലാതെ നീളുന്ന സംഘട്ടനങ്ങളും മാത്രമാണ് സ്റ്റൈൽ എന്ന സിനിമ.  കഥയുടെ ഒരു ഘട്ടത്തിൽ പോലും പ്രേക്ഷകരെ രസിപ്പിക്കുന്ന ഒരു രംഗം പോലും ഈ സിനിമയിലില്ല.

പ്രമേയം: ⭐
ആക്ഷന് പ്രാധാന്യമുള്ള സിനിമയായതിനാൽ പുതുമയുള്ള പ്രമേയമോ കഥയോ ഇല്ലെങ്കിൽ പോലും പ്രേക്ഷകർ കണ്ടാസ്വദിചോളും എന്ന സംവിധായകൻറെ കണക്കുക്കൂട്ടൽ തെറ്റിപ്പോയ അവസ്ഥയാണ് ഈ സിനിമയുടെത്. സിനിമയുടെ ആദ്യാവസാനം പ്രേക്ഷകർക്ക്‌ പ്രവചിക്കാനുവുന്ന കഥ തന്നെയാണ് ഈ സിനിമയുടെ ദൗർബല്യം.

തിരക്കഥ: ⭐
പുതുമയില്ലാത്ത പ്രമേയവും കഥയും അവതരിപ്പിക്കുന്ന സാഹചര്യത്തിൽ, പുതുമയുള്ള കഥാസന്ദർഭങ്ങളും സംഭാഷണങ്ങളുമെങ്കിലും എഴുതുവാൻ തിരക്കഥ രചയ്താക്കൾ ശ്രമിക്കാത്തത് അവരുടെ അലസമായ സമീപനത്തെ തുറന്നുക്കാട്ടുന്നു. ഓരോ രാഗങ്ങളും അതിൽ അഭിനേതാക്കാൾ പറയുവാൻ പോകുന്ന സംഭാഷണങ്ങൾ വരെ പ്രവചിക്കനാകുന്ന വിധമാണ്‌ അനിൽ നാരായണനും ഡോമിനിക് അരുണും തിരക്കഥ എഴുതിയിരിക്കുന്നത്.

സംവിധാനം: ⭐⭐
പുതുമയുള്ള പ്രമേയം ആദ്യ സിനിമയിലൂടെ കൈകാര്യം ചെയ്തപ്പോൾ മലയാള സിനിമയ്ക്ക് നല്ലൊരു സംവിധായകനെ ലഭിച്ചു എന്ന് പ്രതീക്ഷിച്ച പ്രേക്ഷകരെ നിരാശപെടുത്തുന്ന രീതിയിലുള്ള കഥയുടെ അവതരണമാണ് സ്റ്റൈൽ എന്ന ബിനുവിന്റെ രണ്ടാമത്തെ സിനിമ. ക്ലീഷേ എന്ന പ്രയോഗം പഴയതാണെങ്കിലും, ഈ സിനിമയുടെ കാര്യത്തിൽ അത് തന്നെയാണ് ഏറ്റവും ഉചിതമായ പ്രയോഗം. സ്റ്റൈൽ  ഒരു അന്യഭാഷയിൽ ഒരുക്കിയിരുന്നെങ്കിൽ അന്യ സംസ്ഥാനതെങ്കിലും ഈ സിനിമ പ്രേക്ഷകർ സ്വീകരിക്കുമായിരുന്നു. യുക്തിയെ ചോദ്യം ചെയുന്ന ഒരൊറ്റ സിനിമ പോലും സമീപകാലത്ത് പ്രേക്ഷകർ സ്വീകരിച്ചിട്ടില്ല എന്നത് ബിനു മറന്നിരിക്കുന്നു.

സാങ്കേതികം: ⭐⭐
അതിഭാവുകത്വം നിറഞ്ഞ കഥാസന്ദർഭങ്ങൾ ക്യാമറയിൽ പകർത്തുക എന്നതാണ് ചായഗ്രഹണമെങ്കിൽ സിനോജ് പി.അയപ്പൻ വിജയിച്ചിരിക്കുന്നു. മറുപക്ഷം, സംവിധായകന്റെ മനസ്സിലുള്ള ആശയം പ്രേക്ഷകർക്ക്‌ കൂടി ആസ്വാദ്യകരമായ രീതിയിൽ ചിത്രീകരിക്കുക എന്നതാണ് ഒരു നല്ല ചായഗ്രാഹകൻ ചെയ്യേണ്ടത് എന്നതാണെങ്കിൽ സിനോജ് പരാജയപെട്ടിരിക്കുന്നു. ഓരോ ഫ്രെയിമിലും കൃത്രിമത്വം തോന്നിപ്പിക്കുന്ന വെളിച്ചം ഉപയോഗിച്ചിരിക്കുന്നത് ക്യാമറയിലൂടെ പ്രേക്ഷകർക്ക്‌ വരെ മനസ്സിലാകുംവിധമാണ് ചിത്രീകരിച്ചിരിക്കുന്നത്. വിവേക് ഹർഷന്റെ സന്നിവേശം സിനിമയുടെ വേഗതയ്ക്ക് അനിയോജ്യമാണെങ്കിലും പുതുമകൾ ഒന്നും അവകാശപെടാനില്ലാത്തവയാണ്. സ്റ്റണ്ട് ശിവയും റണ്‍ രവിയും ചേർന്ന് ഒരുക്കിയ സംഘട്ടന രംഗങ്ങൾ തെലുങ്ക് സിനിമയ്ക്ക് ഇണങ്ങുന്നവയാണ്. രാഹുൽ രാജിന്റെ പശ്ചാത്തല സംഗീതം കഥാസന്ദർഭങ്ങളോട് നീതി പുലർത്തുന്നവയാണ്. എവിടെയോ കേട്ട് മറന്ന വരികളും സംഗീതവുമാണ് ഈ സിനിമയിലെ പാട്ടുകൾ.

അഭിനയം:⭐⭐⭐
ടോം എന്ന നായക കഥാപാത്രത്തെ മോശമാക്കാതെ അവതരിപ്പിക്കുവാൻ ഉണ്ണി മുകുന്ദനു സാധിച്ചിട്ടുണ്ട്. പ്രതിനായക വേഷത്തിലെത്തിയ ടോവിനോ തോമസ്‌ തന്റെ വേഷം മികവുറ്റതാക്കി. ബാലു വർഗീസ്‌ സ്ഥിരം ശൈലിയിൽ കൊച്ചി ഭാഷ പ്രയോഗത്തിലൂടെ ഹാസ്യം കൈകാര്യം ചെയ്തിരിക്കുന്നു. പുതുമുഖ നായിക നിരാശപെടുത്തിയില്ല. മറ്റു കഥാപാത്രങ്ങൾ അവതരിപ്പിച്ചവരും മികച്ച രീതിയിൽ അവരരുടെ രംഗങ്ങളിൽ അഭിനയിച്ചിട്ടുണ്ട്.

വാൽക്കഷ്ണം: കണ്ടുമടുത്ത കഥാസന്ദർഭങ്ങൾ കോർത്തിണക്കിയ അറുബോറൻ സിനിമ!

സംവിധാനം: ബിനു എസ്.
രചന: അനിൽ നാരായണൻ, ഡോമിനിക് അരുണ്‍
നിർമ്മാണം: രാജേഷ്‌ അഗസ്റ്റിൻ
ചായാഗ്രഹണം: സിനോജ് അയ്യപ്പൻ
ചിത്രസന്നിവേശം: വിവേക് ഹർഷൻ
ഗാനരചന: മനു, ഹരി നാരായണൻ, സത്യൻ അന്തിക്കാട്‌
സംഗീതം: ജാസി ഗിഫ്റ്റ്
പശ്ചാത്തല സംഗീതം: രാഹുൽ രാജ്
കല സംവിധാനം: ദിൽജിത് ദാസ്‌
ചമയം: ഹസ്സൻ വണ്ടൂർ
നൃത്ത സംവിധാനം: ഷോബി, സുജാത
വസ്ത്രാലങ്കാരം: വൈശാഖ് രവി
സംഘട്ടനം: സ്റ്റണ്ട് ശിവ, റണ്‍ രവി
വിതരണം: എൽ. ജെ. ഫിലിംസ്