സോളോ – പഞ്ചഭൂത ഏകഭാവം!

പഞ്ചഭൂതങ്ങളിലെ ജലം, വായു, അഗ്നി, ഭൂമി എന്നീ നാല് പ്രതിഭാസങ്ങളെ ആസ്‍പദമാക്കി ശിവന്റെ ഭാവങ്ങളോട് സമന്വയിപ്പിച്ചു അവതരിപ്പിച്ച നാല് സിനിമകളുടെ ആന്തോളജിയാണ് ബിജോയ് നമ്പ്യാരുടെ സോളോ. ഭാര്യയാൽ, കാമുകിയാൽ, അമ്മയാൽ, സഹോദരിയാൽ ഒറ്റപ്പെടുന്ന ഒരു പുരുഷന്റെ അവസ്ഥയാണ് സോളോ എന്ന ശീർഷകതിനർത്ഥം.

ഓരോ സാഹചര്യത്തിനനുസരിച്ചു സ്വന്തം രൂപം മാറാൻ സാധിക്കുന്ന വസ്തുവാണ് ജലം. കാമുകിയോട് സ്നേഹവും, ഭാര്യയോട് ദേഷ്യവും, മകളോട് വാത്സല്യവും പ്രകടിപ്പിക്കുന്ന ജലം പോലെയായ ശേഖറിന്റെ കഥയാണ് വേൾഡ് ഓഫ് ശേഖർ. ജലം പോലെ ഒരിക്കൽ ശാന്തവും മറ്റൊരിക്കൽ അശാന്തവുമാകുന്ന ശേഖറും അയാളുടെ പ്രണയിനി രാധികയുടെയും കഥയാണ് സോളോയിലെ ആദ്യ ചെറു-സിനിമ. മൂന്ന് ലോകങ്ങളായ ആകാശം, ഭൂമി, നരകം എന്നിവയുടെ പ്രതീകമായ ത്രിലോകിന്റെ പ്രതികാര കഥയാണ് വേൾഡ് ഓഫ് ത്രിലോക് എന്ന ചെറു-സിനിമയുടെ പ്രമേയം. പഞ്ചഭൂതങ്ങളിളെ വായുവിനോട് ഉപമിച്ചാണ് ത്രിലോകിന്റെ കഥ അവതരിപ്പിച്ചത്.ശിവന്റെ രൗദ്രഭാവത്തിൽ എല്ലാത്തിനെയും നശിപ്പിക്കാനുള്ള, അഗ്നിയോളം ശക്തിയുള്ള ശിവയുടെ പ്രതികാരത്തിന്റെ കഥയാണ് സോളോയിലെ മൂന്നാമത്തെ ചെറു-സിനിമ വേൾഡ് ഓഫ് ശിവയുടെ പ്രമേയം. ബാല്യത്തിൽ അമ്മയാൽ ഒറ്റപ്പെടുന്ന ശിവ, അച്ഛനെ കൊന്നവരോടുള്ള പ്രതികാരം വീട്ടുന്നതാണ് ഈ ചെറു-സിനിമയിലൂടെ സംവിധായകൻ അവതരിപ്പിക്കുന്നത്. പ്രണയവും, വിരഹവും ഒരുപോലെ വിഷയമാകുന്ന സോളോയിലെ അവസാന ചെറു-സിനിമയാണ് വേൾഡ് ഓഫ് രുദ്ര. ഭൂമിയോളം ക്ഷമയുള്ള രുദ്രയുടെ പ്രണയത്തിന്റെയും വിരഹത്തിന്റെയും സഹനത്തിന്റെയും കഥ, ആശയത്തിലും അവതരണത്തിലും വ്യത്യസ്തമായിരുന്നു.

പ്രമേയം: ⭐⭐⭐
പ്രമേയപരമായി ഏറെ പുതുമകൾ സമ്മാനിച്ച സോളോയിലൂടെ ശിവന്റെ ഭാവങ്ങൾ നായക കഥാപാത്രത്തിനും, പഞ്ചഭൂതങ്ങളിളെ നാല് പ്രതിഭാസങ്ങൾ കഥാപശ്ചാത്തലമാവുകയും അവ കഥാപാത്രത്തിന്റെ സ്വഭാവത്തെ സ്വാധീനിക്കുകയും ചെയ്യുന്നു. ഇത്രയും ശക്തമായ ഒരു പ്രമേയത്തിന്റെ പിന്തുണയോടെയാണ് നാല് സിനിമകളെയും സംവിധായകൻ ബന്ധിപ്പിച്ചത് എന്നത് ആന്തോളജി സിനിമകളെ അപേക്ഷിച്ചു മികവാണ്. കേരള കഫെയിലും, അഞ്ചു സുന്ദരികളിലും, പോപ്പിൻസിലും, ഡി കമ്പനിയിലും, ഒരേ യാത്രയിലും, നാല് പെണ്ണുങ്ങളിലും പ്രത്യക്ഷത്തിൽ ചെറു സിനിമകളിൽ തമ്മിൽ ബന്ധമൊന്നുമില്ല. എന്നാൽ, സോളോയിൽ അത്തരത്തിലുള്ള പ്രമേയപരമായി ബന്ധം ഉൾപെടുത്താൻ ബിജോയ് നമ്പ്യാരിനു കഴിഞ്ഞിട്ടുണ്ട്.

തിരക്കഥ: ⭐⭐
സംവിധായകൻ ബിജോയ് നമ്പ്യാരാണ് സോളോയുടെ കഥയും തിരക്കഥയും എഴുതിയത്. ധന്യ സുരേഷിന്റേതാണ് സംഭാഷണങ്ങൾ. മികവുറ്റ ഒരു പ്രമേയം ലഭിച്ചിട്ടും പ്രേക്ഷരെ തൃപ്തിപ്പെടുത്തുന്ന കഥയോ കഥാസന്ദർഭങ്ങളോ രചിക്കുവാൻ ബിജോയ്‌ക്കു സാധിച്ചില്ല എന്നിടത്താണ് സോളോ നിരാശപ്പെടുത്തുന്നത്. ശേഖറിന്റെ കഥ പ്രവചിക്കാവുന്ന വഴിയിലൂടെ തന്നെ സഞ്ചരിച്ചു. തമിഴ് മൊഴിമാറ്റ സിനിമകളിലെ സംഭാഷണങ്ങൾ പോലെ പലയിടങ്ങളിലും സംഭാഷണങ്ങൾ മുഴച്ചുനിന്നിരുന്നു. ജലം എന്ന പ്രതിഭാസത്തോടു നീതി പുലർത്തുന്നതായിരുന്നു കഥാസന്ദർഭങ്ങൾ.ത്രിലോകിന്റെ കഥ വേറിട്ട വഴിയിലൂടെ സഞ്ചരിച്ച പ്രതികാര കഥയായിരുന്നു. ആദ്യാവസാനം പ്രേക്ഷകരിൽ ആകാംഷ ജനിപ്പിച്ച കഥാസന്ദർഭങ്ങളും കഥാഗതിയും സംഭാഷണങ്ങളുമായിരുന്നു. എന്നാൽ, വായുവിനോട് ഉപമിച്ച ഈ കഥയിൽ പ്രത്യക്ഷത്തിൽ വായുവിനെ സാധൂകരിക്കുന്ന ഒന്നുംതന്നെ ചർച്ചചെയ്യുന്നില്ല. ശിവയുടെ പ്രതികാര കഥ കഴമ്പില്ലാത്ത പോലെ അനുഭവപെട്ടു. അമ്മയിൽ നിന്ന് ചെറുപ്പത്തിലേ ഒറ്റപ്പെട്ട ശിവ, അച്ഛനെ കൊന്നവരോടുള്ള പ്രതികാരത്തിനു വേണ്ടി ബോംബയിലെത്തുന്നു. എന്നാൽ, അച്ഛനോടുള്ള മകന്റെ അടുപ്പം ഒരു രംഗത്തിൽ പോലും കാണിക്കുന്നുമില്ല. ശിവന്റെ രൗദ്രഭാവവും അഗ്നി പോലെ എല്ലാം ചുട്ടെരിക്കാനുള്ള ശക്തിയും കഥാസന്ദർഭങ്ങളാകുന്നു. ശിവയുടെ കഥാപാത്ര രൂപീകരണം മികവുപുലർത്തി. സംഭാഷണങ്ങളും കഥയോട് നീതിപുലർത്തുന്നവയായിരുന്നു. ക്‌ളൈമാക്‌സ് രംഗത്തിലുള്ള ട്വിസ്റ്റ് പ്രവചിക്കാനാവുന്നതുമായിരുന്നു. അവസാന ചെറുകഥയായ രുദ്രയുടെ കഥ സമ്പൂർണ്ണ നിരാശയാണ് സമ്മാനിച്ചത്. കഥയിലെ യുക്തിയില്ലായ്മ്മയാണ് പ്രധാന പ്രശ്നമായത്. ഗൗരവമുള്ള കഥാസന്ദർഭങ്ങളും സംഭാഷണങ്ങളും പ്രേക്ഷകർ പരിഹസിച്ചുതള്ളുന്ന അവസ്ഥയിലായി. ഭൂമിയോളം ക്ഷമയുള്ള രുദ്ര കഥാവസാനം എല്ലാവരോടും ക്ഷമിക്കുന്നു സങ്കടങ്ങൾ സഹിക്കുന്നു എന്നത് പ്രേക്ഷകരിലേക്കുത്തുന്നില്ല. സംഭാഷണങ്ങൾ ഒട്ടുമിക്കതും നാടകീയമായിരുന്നു.

സംവിധാനം: ⭐⭐⭐
സെയ്താൻ, വാസിർ, ഡേവിഡ് എന്നീ സിനിമകൾക്ക് ശേഷം ബിജോയ് നമ്പ്യാർ സംവിധാനം ചെയ്യുന്ന സോളോ അദ്ദേഹത്തിന്റെ ആദ്യ മലയാള സിനിമയാണ്. മോഹൻലാൽ നായകനായ റിഫ്ലെക്ഷൻസ് എന്ന ചെറു സിനിമയാണ് ബിജോയിയുടെ ഏക മലയാള സിനിമ ബന്ധം. മണിരത്നത്തിന്റെ മികച്ച ശിഷ്യനാണെന്നു താനെന്നു സോളോയിലൂടെ തെളിയിക്കുവാൻ ബിജോയ്‌ക്കു സാധിച്ചു. സാങ്കേതിക മികവോടെ അവതരണത്തിൽ വ്യത്യസ്തത സൃഷ്ടിക്കുവാൻ ബിജോയ്‌ക്കു കഴിഞ്ഞിട്ടുണ്ട്.പ്രണയം വിഷയമാക്കിയ ആദ്യ സിനിമയും അവസാന സിനിമയും പതിഞ്ഞ താളത്തിലും, പ്രതികാരം വിഷമായ രണ്ടാമത്തേതും മൂന്നാമതെത്തും ചടുലമായ വേഗതയിലുമാണ് അവതരിപ്പിച്ചത്. പുതുമകളൊന്നും അവകാശപ്പെടാനില്ലാത്ത കഥാസന്ദർഭങ്ങളെ സാങ്കേതികത്തികവോടെ അവതരിപ്പിച്ചു ബിജോയ് കയ്യടി നേടി. അഭിനേതാക്കളെ തിരഞ്ഞെടുക്കുന്നതിൽ പൂർണ വിജയം കൈവരിക്കാൻ ബിജോയ്‌ക്കു സാധിച്ചില്ല.

സാങ്കേതികം: ⭐⭐⭐⭐
മധു നീലകണ്ഠൻ, ഗിരീഷ് ഗംഗാധരൻ, സെജൽ ഷാ എന്നിവരുടെ ഛായാഗ്രഹണം മികവുറ്റതായിരുന്നു. ഓരോ പ്രമേയത്തോടും ഓരോ കഥയോടും ഓരോ സന്ദർഭങ്ങളോടും നീതിപുലർത്തുന്ന ചിത്രീകരണമായിരുന്നു നാല് സിനിമകളിലും കാണുവാൻ സാധിച്ചത്. പ്രണയ രംഗങ്ങളിൽ മനോഹാരിതയും പ്രതികാര രംഗങ്ങളിൽ തീവ്രതയും സൃഷ്ടിക്കുന്ന ഛായാഗ്രഹമായിരുന്നു മൂവരും കാഴ്ചവെച്ചത്.ശ്രീകർ പ്രസാദിന്റെ സന്നിവേശം അതിഗംഭീരമായിരുന്നു ആദ്യ മൂന്ന് സിനിമകളിലും. പ്രേക്ഷകരിൽ ആകാംഷ ജനിപ്പിക്കുന്ന രീതിയിലായിരുന്നു രംഗങ്ങൾ കോർത്തിണക്കിയാണ്. ശേഖറിന്റെ പ്രണയകഥയും ശിവയുടെ പ്രതികാര കഥയുമാണ് സന്നിവേശമികവിൽ പ്രേക്ഷകർക്ക് ഇഷ്ടമായത്. രുദ്രയുടെ കഥ പ്രാധാന്യമില്ലാത്ത രംഗങ്ങളിലൂടെ അവതരിപ്പിച്ചു വലിച്ചുനീട്ടി ബോറടിപ്പിച്ചു.

പ്രശാന്ത് പിള്ള, സൂരജ് എസ് കുറുപ്പ്, ഗോവിന്ദ് മേനോൻ, തൈക്കുടം ബ്രിഡ്ജ്, മസാല കോഫി, ഗൗരവ് ഗോദ്കിന്ദി, രാഗിണി ഭഗവത്, അഭിനവ് ബൻസാൽ, അഗാം, ഫിൽറ്റർ കോഫി, സെസ് ഓൺ ദി ബീറ്റ് എന്നിവരാണ് സോളോയുടെ സംഗീതവും പശ്ചാത്തല സംഗീതവും നിർവഹിച്ചത്. ശിവയുടെ കഥയിലെ പശ്ചാത്തല സംഗീതം ഒറ്റവാക്കിൽ പറഞ്ഞാൽ ഗംഭീരം. അതുപോലെ, രുദ്രയുടെ കഥയിലെ സീത കല്യാണം എന്ന പാട്ടും മനോഹരമായിരുന്നു. പത്തിലധികം പാട്ടും പശ്ചാത്തല സംഗീതവും കഥാസന്ദർഭങ്ങളുടെ മാറ്റു കൂട്ടുന്നവയായിരുന്നു. സമീപകാലത്തു സംഗീതത്തിലൂടെ കഥ പറഞ്ഞ സിനിമയൊന്നും മലയാളത്തിലിറങ്ങിയിട്ടില്ല. ശ്രീ ശങ്കർ-വിഷ്ണു ഗോവിന്ദ് എന്നിവരുടെ ശബ്ദ സംവിധാനം, അമരന്റെ കലാസംവിധാനം, ഗോപിക ഗുൽവാഡിയുടെ വസ്ത്രാലങ്കാരം, ജാവേദിന്‍റെ സംഘട്ടനം എന്നിവയെല്ലാം നാല് കഥകളോടും നീതിപുലർത്തി.

അഭിനയം: ⭐⭐⭐
നാല് കഥാപാത്രങ്ങളെയും വ്യസ്ത്യസ്തമായി അവതരിപ്പിച്ചു ദുൽഖർ സൽമാൻ മികവ് പുലർത്തി. അവയിൽ ഏറ്റവും മികച്ചത് ശിവയുടെ വേഷമായിരുന്നു.സംഭാഷണങ്ങൾ പോലുമില്ലാതെ ശിവയെ ദുൽഖർ ഗംഭീരമാക്കി.ആദ്യ സിനിമയിൽ ധൻസിക, സൗബിൻ ഷാഹിർ, ജോൺ വിജയ്, സതീഷ്, സിദ്ധാർഥ് മേനോൻ,അനുപമ കുമാർ, ഷീലു എബ്രഹാം, നിത്യശ്രീ, കിഷോർ എന്നിവരാണ് അഭിനേതാക്കൾ.രണ്ടാമത്തെ സിനിമയിൽ രഞ്ജി പണിക്കർ, ആർതി വെങ്കടേഷ്, അൻസൻ പോൾ, ആൻ അഗസ്റ്റിൻ എന്നിവരാണ് അഭിനയിച്ചത്.ശിവയുടെ കഥയിൽ മനോജ് കെ. ജയൻ, ശ്രുതി ഹരിഹരൻ, പ്രകാശ് ബെലവാഡി, ഗോവിന്ദ് മേനോൻ, സായി തമൻകാർ, ദിനേശ് പ്രഭാകർ, പീതാംബര മേനോൻ, ആശാ ജയറാം, റോഹൻ മനോജ്, എ.ർ.മണികണ്ഠൻ എന്നിവരാണ് അഭിനേതാക്കൾ.നേഹ ശർമ്മ, ദിനോ മോറിയ, നാസ്സർ, സുഹാസിനി, മാണിത്, ദീപ്തി സതി, സുരേഷ് മേനോൻ, സുജാത സെയ്ഗാൾ എന്നിവരാണ് രുദ്രയുടെ കഥയിൽ അഭിനയിച്ചത്.

വാൽക്കഷ്ണം: അവതരണത്തിന്റെ പുതുമയിലും സാങ്കേതിക മികവിലും സോളോ യുവാക്കളെ ആസ്വദിപ്പിക്കുന്നു.

എഴുത്ത്, സംവിധാനം: ബിജോയ് നമ്പ്യാർ
നിർമ്മാണം: എബ്രഹാം മാത്യു, ബിജോയ് നമ്പ്യാർ
സംഭാഷണങ്ങൾ: ധന്യ സുരേഷ്
ഛായാഗ്രഹണം: മധു നീലകണ്ഠൻ, ഗിരീഷ് ഗംഗാധരൻ, സെജൽ ഷാ
സന്നിവേശം: ശ്രീകർ പ്രസാദ്
സംഗീതം: പ്രശാന്ത് പിള്ള, സൂരജ് എസ് കുറുപ്പ്, ഗോവിന്ദ് മേനോൻ, തൈക്കുടം ബ്രിഡ്ജ്, മസാല കോഫി, ഗൗരവ് ഗോദ്കിന്ദി, രാഗിണി ഭഗവത്, അഭിനവ് ബൻസാൽ, അഗാം, ഫിൽറ്റർ കോഫി, സെസ് ഓൺ ദി ബീറ്റ്
കലാസംവിധാനം: അമരൻ
വസ്ത്രാലങ്കാരം: ഗോപിക ഗുൽവാഡി
ശബ്ദസംവിധാനം: ശ്രീശങ്കർ, ഗോവിന്ദ്
സംഘട്ടനം: ജാവേദ്
വിതരണം: ഗെറ്റ്എവേ ഫിലിംസ്.

Advertisements

രാമന്റെ ഏദൻതോട്ടം – ⭐⭐


ബന്ധനങ്ങളുടെ ഏദൻതോട്ടം! – ⭐⭐

അനർവചനീയ അനുഭൂതി നൽകുന്ന ഒന്നാണ് പ്രണയം. ഓരോരുത്തർക്കും പ്രണയം തോന്നുന്നത് ജീവിതത്തിലെ ഓരോ കാലഘട്ടത്തിലാകും അതിനു പല കരണങ്ങളുമുണ്ടാകും. പ്രണയത്തിനു പല മുഖങ്ങളുമുണ്ടാകും. ചിലർക്കത് ദിവ്യപ്രണയമാകാം മറ്റുചിലർക്ക് കാമമാകാം. പ്രണയിക്കുന്നയാളിനെ ഒരിക്കലും സ്വന്തമാക്കുവാൻ സാധിക്കുകയില്ല എന്ന തിരിച്ചറിവ് സ്വയം തോന്നുന്ന നിമിഷങ്ങളിലാകും അയാളോടുള്ള പ്രണയം ഏറ്റവും തീവ്രമാകുന്നത്. ചിലർ അതിനു പുറകെ പോകുന്നവരാകും മറ്റുചിലർ അതിനെ ഉള്ളിലൊതുക്കും വേറെചിലർ അതിനെ പറയാതെ പറയുന്ന പ്രണയമെന്നോ സൗഹൃദമെന്നോ വിശേഷിപ്പിക്കും. രാമന്റെ ഏദൻതോട്ടം എന്ന സിനിമ ചർച്ചചെയ്യുന്ന വിഷയവും പ്രണയത്തിന്റെ പലതലങ്ങളാണ്.

ഡ്രീംസ് ആൻഡ് ബിയോണ്ടിന്റെ ബാനറിൽ രഞ്ജിത്ത് ശങ്കർ നിർമ്മിച്ച്, അദ്ദേഹം തന്നെ എഴുതി സംവിധാനം നിർവഹിച്ച രാമന്റെ ഏദൻതോട്ടം വിതരണം ചെയ്തിരിക്കുന്നത് സെൻട്രൽ പിക്ചേഴ്സ്സാണ്. രാമനായി കുഞ്ചാക്കോ ബോബനും, മാലിനിയായി അനു സിത്താരയും, എൽവിസ്സായി ജോജു ജോർജ്ജും വർമ്മാജിയായി രമേശ് പിഷാരടിയും സലീമായി ശ്രീജിത്ത് രവിയും അഭിനയിച്ചിരിക്കുന്നു.

പ്രമേയം: ⭐⭐
പ്രണയത്തിന്റെയും സൗഹൃദത്തിന്റെയും ഇതുവരെ കാണാത്ത മുഖങ്ങളായിരുന്നു പത്മരാജന്റെ തൂവാനത്തുമ്പികളും കമലിന്റെ മേഘമൽഹാറും ശ്യാമപ്രസാദിന്റെ ഒരേ കടലും ബ്ലെസ്സിയുടെ പ്രണയവും നമുക്ക് സമ്മാനിച്ചത്. രഞ്ജിത്ത് ശങ്കറിന്റെ രാമന്റെ ഏദൻതോട്ടവും മേല്പറഞ്ഞ സിനിമകൾ പോലെ പ്രണയത്തിന്റെ വേറിട്ട മുഖം വരച്ചുകാട്ടുന്നു. രാമനും മാലിനിക്കും എൽവിസിനും വർമ്മാജിക്കും സലീമിനും ശത്രുഘ്‌നനും തുടങ്ങി രാമന്റെ ഏദൻതോട്ടത്തിലെ ഓരോ അതിഥികളും പ്രണയം പ്രകടിപ്പിക്കുന്നത് ഓരോ രീതിയിലാണ്. വിവാഹേതര ബന്ധത്തെ അവിഹിതമെന്നു വിളിക്കുന്നവരുമുണ്ട് സൗഹൃദമെന്നു വിളിക്കുന്നവരുമുണ്ട്. ഓരോ വ്യക്തികളുടെയും കാഴ്ചപ്പാടുകളെ ആശ്രയിച്ച ഒന്നായിരിക്കും അത്തരത്തിലുള്ള സൗഹൃദങ്ങൾ. അതിർവരമ്പുകൾ ലംഘിക്കാത്ത വിവാഹേതര സൗഹൃദങ്ങളെ സമൂഹം എങ്ങനെ നോക്കിക്കാണുമെന്നും ഈ സിനിമയിൽ വിഷയമാകുന്നു. കുടുംബ ബന്ധം തകരാതിരിക്കുവാനും കുട്ടികളുടെ ഭാവിയും സുരക്ഷയും ഓർത്തുകൊണ്ട് എല്ലാം സഹിച്ചു ആൺമേധാവിത്വത്തിനു മുമ്പിൽ എപ്പോഴും തോറ്റുകൊടുക്കുന്നതിനു പകരം സ്ത്രീകൾ പ്രതികരിക്കണമെന്നും സ്വയം പ്രാപ്തി നേടണമെന്ന പ്രമേയവും ഈ സിനിമയിൽ ചർച്ചാവിഷയമാകുന്നുണ്ട്. സ്ത്രീ സ്വാതന്ത്ര്യം, സ്വപ്നസാക്ഷാത്കാരം തുടങ്ങിയവയും കഥാസന്ദർഭങ്ങളിൽ വന്നുപോകുന്നുണ്ട്. പറഞ്ഞുപഴകിയ പ്രമേയമാണെങ്കിലും കേരളത്തിലെ കുടുംബ പ്രേക്ഷകർക്ക് എന്നും കണ്ടിരിക്കാൻ രസമുള്ള വിഷയമാണ് മേല്പറഞ്ഞവയെല്ലാം.

തിരക്കഥ: ⭐⭐
നഗരങ്ങളിൽ കാടുകൾ സൃഷ്ടിക്കുക എന്ന ആശയം സമൂഹത്തിലെത്തിക്കുന്ന അക്കീര മിയാവാക്കി എന്ന പ്രകൃതിസ്നേഹിയെ പോലെയൊരാളാണ് രാമൻ. അയാളുടെ ഏദൻതോട്ടത്തിൽ അതിഥിയായി എത്തുന്നു നർത്തകി കൂടിയായ മാലിനി. ആൺമേധാവിത്വത്തിനു അടിമയായി ജീവിക്കുന്ന മാലിനിയെ ജീവിതത്തിലെ സ്വപ്ങ്ങൾ യാഥാർഥ്യമാക്കുവാൻ രാമൻ പ്രചോദനം നൽകുന്നു. അതോടെ ഇരുവരും സൗഹൃദത്തിലാകുന്നു. രഞ്ജിത്ത് ശങ്കർ എന്ന എഴുത്തുകാരന്റെ രചനാപാടവം പ്രതിഫലിച്ച കഥാസന്ദർഭങ്ങളായിരുന്നു അവയെല്ലാം. എന്നാൽ, ആ സൗഹൃദം മറ്റൊരു തലത്തിലേക്ക് സഞ്ചരിക്കേണ്ട ആവശ്യകതയുണ്ടോ എന്ന ആശയക്കുഴപ്പത്തിലായി രഞ്ജിത്ത് ശങ്കർ എന്ന തിരക്കഥാകൃത്ത്. സൗഹൃദമാണോ പ്രണയമാണോ എന്ന നിർവചിക്കാൻ സാധിക്കാത്ത തരത്തിലായി പിന്നീടുള്ള കഥാസന്ദർഭങ്ങൾ. മാലിനിയും രാമനും തമ്മിലുള്ള ബന്ധമെന്താണ് എന്ന കഥാസന്ദർഭങ്ങളിലൂടെ അവതരിപ്പിക്കുവാൻ രഞ്ജിത്ത് ശങ്കറിന് കഴിഞ്ഞില്ല. രാമന്റെയും മാലിനിയുടെയും കഥാപാത്രങ്ങളുടെ സ്വഭാവം ഓരോ അവസരത്തിലും ഓരോ രീതിയിലായി തോന്നി. അവർ തമ്മിലുള്ള സംഭാഷങ്ങളിൽ ഉടനീളം നാടകീയത നിറഞ്ഞുനിന്നിരുന്നു. ഒരേ ചിന്താഗതിയുള്ള രാമന്റെയും മാലിനിയുടെയും അപൂർവ സൗഹൃദം കാണുവാൻ പ്രതീക്ഷിച്ച പ്രേക്ഷകരെ നിരാശപ്പെടുത്തുന്ന കഥാഗതിയായിരുന്നു സിനിമയുടേത്. വിവാഹേതര സൗഹൃദത്തിൽ നിലയുറപ്പിക്കുന്നതിനു പകരം പല ഉപവിഷയങ്ങളിലേക്കും കഥാകൃത്ത് പ്രേക്ഷകരെ കൊണ്ടുചെന്നത് അവരെ ആശയകുഴപ്പത്തിലാക്കി. ഈ കുറവുകളൊക്കെയുണ്ടെങ്കിലും ഇന്നത്തെ കുടുംബങ്ങൾ തീർച്ചയായും കണ്ടിരിക്കേണ്ട കുറെ രംഗങ്ങൾ ഈ സിനിമയിലുണ്ട്.

സംവിധാനം: ⭐⭐⭐
പാസഞ്ചർ മുതൽ പ്രേതം വരെ ഒന്നിനൊന്നു വ്യത്യസ്ത സിനിമകൾ സംവിധാനം ചെയ്ത രഞ്ജിത്ത് ശങ്കർ പരീക്ഷിക്കാത്ത ഒരു പ്രമേയമാണ് രാമന്റെ എദൻതോട്ടം. ഇന്നത്തെ കുടുംബങ്ങളിൽ നടന്നുകൊണ്ടിരിക്കുന്ന സംഭവങ്ങൾ റിയലസ്റ്റിക്കായി അവതരിപ്പിക്കുവാൻ രഞ്ജിത്ത് ശങ്കർ പരമാവധി ശ്രമിച്ചിട്ടുണ്ട്. കഥാപാത്രങ്ങൾക്ക് അനിയോജ്യരായ നടീനടമാരെ കണ്ടെത്തുന്നതിൽ വിജയിച്ചു. കുഞ്ചാക്കോ ബോബന് സമീപകാലത്തു ലഭിച്ച ഏറ്റവും മികച്ച കഥാപാത്രമാണ് രാമൻ. മാലിനിയായി പലവരുടെയും മുഖം ഓർമ്മവരുമെങ്കിലും അനു സിത്താരയാണ് ഏറ്റവും അനിയോജ്യമെന്നു സിനിമ കാണുമ്പോൾ ബോധ്യമാകും. ഒഴുക്കൻ മട്ടിലുള്ള അവതരണമാണ് ഈ സിനിമയ്ക്ക് അനിയോജ്യം എന്ന് മനസ്സിലാക്കിയ രഞ്ജിത്ത് ശങ്കർ ആസ്വാദനത്തിനു വേണ്ടിയുള്ള ചേരുവകളായ നർമ്മവും പാട്ടുകളും കൃത്യതയോടെ ചേർക്കുവാൻ മറന്നില്ല. വി. സാജന്റെ സന്നിവേശവും മധു നീലകണ്ഠന്റെ വിഷ്വൽസും അതിനു സംവിധായകനെ സഹായിച്ചു. പതിഞ്ഞ താളത്തിലുള്ള പ്രണയകഥകൾ ഇഷ്ടപെടുന്ന പ്രേക്ഷകർക്ക് ഒരുതവണ കണ്ടിരിക്കാം ഏദൻതോട്ടത്തിലെ കാഴ്ച്ചകൾ. അശ്രദ്ധയോടെയാണ് പല രംഗങ്ങളിലെയും ഡബ്ബിങ് നിർവഹിച്ചത്. ജോജുവിന്റെയും രമേശ് പിഷാരടിയുടെയും സംഭാഷണങ്ങൾ പലതും ചിത്രീകരണത്തിന് ശേഷം മാറ്റിയെഴുതിയതായി അനുഭവപെട്ടു. മുൻകാല രഞ്ജിത്ത് ശങ്കർ സിനിമകൾ പ്രതീക്ഷിച്ചു പോകുന്നവർക്ക് നിരാശയാകും ഈ സിനിമ സമ്മാനിക്കുന്നത്.

സാങ്കേതികം: ⭐⭐⭐
മധു നീലകണ്ഠന്റെ അത്യുഗ്രൻ ഛായാഗ്രഹണമാണ് ഏദൻതോട്ടത്തിന്റെ ജീവൻ നിലനിർത്തുന്നത്. ആദ്യപകുതിയിൽ ഏദൻതോട്ടത്തിന്റെ പച്ചപ്പ്‌ മുഴുവൻ ഒപ്പിയെടുക്കുവാനും, ഗൗരവമുള്ള ഒരു വിഷയത്തിലേക്കു കഥ സഞ്ചരിച്ചു തുടങ്ങിയപ്പോൾ റിയാലസ്റ്റിക്കായ ഒരു ഫീൽ നൽകുവാൻ മധു നീലകണ്ഠന് സാധിച്ചു. രാമനും മാലിനിയും ഏദൻതോട്ടത്തിൽ കണ്ടുമുട്ടുന്ന രംഗങ്ങളെല്ലാം മികവാർന്ന രീതിയിൽ ചിത്രീകരിക്കുവാൻ മധു നീലകണ്ഠന് കഴിഞ്ഞു. സന്തോഷ് വർമ്മ എഴുതി ബിജിബാൽ ഈണമിട്ട പാട്ടുകളും ശ്രവ്യസുന്ദരമായിരുന്നു. ശ്രേയ ഘോഷാൽ പാടിയ കാടിന്റെ എന്ന തുടങ്ങുന്ന ഗാനത്തിന്റെ വരികളും സംഗീതവും മികവുറ്റതായിരുന്നു. സിനിമയുടെ വേഗതക്കു അനുസരിച്ചുള്ള പശ്ചാത്തല സംഗീതം നൽകുവാൻ ബിജിബാലിന് കഴിഞ്ഞു. പറയാതെ പറയുന്ന പ്രണയത്തിനു അനുസരിച്ചുള്ള പശ്ചാത്തല സംഗീതം ചിട്ടപ്പെടുത്തുവാൻ ബിജിബാലിന് സാധിച്ചില്ല. വി. സാജന്റെ സന്നിവേശം കഥയുടെ ഒഴിക്കിനനുസരിച്ചുള്ളതായിരുന്നു. കഥയിൽ അനിവാര്യമല്ലാത്ത രംഗങ്ങളോ കഥാപാത്രങ്ങളോ ഈ സിനിമയിലില്ല. അജയ് മാങ്ങാടിന്റെ കലാസംവിധാനത്തിൽ ഏദൻതോട്ടം ഗംഭീരമായി. കുതിരയും നായകുട്ടികളും അന്തേവാസികളായതും മികവുപുലർത്തി. കാടിന്റെ ദൃശ്യഭംഗി വിഷ്വൽസിൽ കണ്ടെങ്കിലും കാട്ടിലെ പക്ഷികളുടെയോ മറ്റു ജീവജാലങ്ങളുടെയോ ശബ്ദങ്ങൾ ഉപയോഗപ്പെടുത്താൻ തപസ് നായകിനായില്ല. അരുൺ മനോഹറിന്റെ വസ്ത്രാലങ്കാരവും ശ്രീജിത്തിന്റെ ചമയവും അനു സിത്താരയെ ശാലീനതയുള്ള ഒരാളായി മാറ്റുന്നതിൽ സഹായിച്ചിട്ടുണ്ട്.

അഭിനയം: ⭐⭐⭐⭐
കുഞ്ചാക്കോ ബോബൻ, അനു സിത്താര, ജോജു ജോർജ്ജ്, രമേശ് പിഷാരടി, അജു വർഗീസ്, ശ്രീജിത്ത് രവി, ഗോപാലൻ, മുത്തുമണി എന്നിവരാണ് ഏദൻതോട്ടത്തിലെ അഭിനേതാക്കൾ. മാലിനിയായി മിതത്വമാർന്ന അഭിനയം കാഴ്ചവെച്ചുകൊണ്ട് അനു സിത്താര ഏവരുടെയും പ്രിയ നായികയായി മാറി. ഒരുപാടു വ്യത്യസ്ത മാനസിക ബുദ്ധിമുട്ടുകൾ അവതരിപ്പിക്കേണ്ട രംഗങ്ങളിൽ അമിതാഭിനയം കാഴ്ചവെയ്ക്കാതെ മാലിനിയെ അവതരിപ്പിച്ചു കയ്യടി നേടി. ചാക്കോച്ചനു ലഭിച്ച അഭിനയ സാധ്യതയുള്ള ഒരു വേഷമായിരുന്നു രാമൻ. രാമന്റെ സങ്കടവും ഒറ്റപ്പെടലും നിസ്സഹയാവസ്ഥയും പ്രണയവുമെല്ലാം മികവോടെ അവതരിപ്പിക്കുവാൻ കുഞ്ചാക്കോ ബോബന് സാധിച്ചു. എല്ലാത്തരം വേഷങ്ങളും തനിക്കുചേരും എന്ന് ജോജു ജോർജ്ജ് തെളിയിച്ചു. കഥാപാത്രത്തിന് ശബ്ദം നൽകിയപ്പോഴുള്ള അശ്രദ്ധ ഒഴിച്ച് നിർത്തിയാൽ മറ്റൊരു കുറവും ജോജുവിന്റെ അഭിനയത്തിനില്ല. ഹാസ്യരസ സംഭാഷണങ്ങളിലൂടെ രമേശ് പിഷാരടി വർമ്മാജി എന്ന കഥാപാത്രത്തെ ഗംഭീരമാക്കി. ശ്രീജിത്ത് രവിയും മുത്തുമണിയും അജു വർഗീസും ഗോപാലനും അവരവരുടെ രംഗങ്ങൾ മോശമാക്കാതെ അവതരിപ്പിച്ചു.

വാൽക്കഷ്ണം: ബന്ധങ്ങളുടെയും ബന്ധനങ്ങളുടെയും ഏദൻതോട്ടത്തിലെ കാഴ്ച്ചകൾ കുടുംബത്തോടൊപ്പം ഒരുവട്ടം കണ്ടിരിക്കാം!

രചന, സംവിധാനം: രഞ്ജിത്ത് ശങ്കർ
നിർമ്മാണം: ഡ്രീംസ് ആൻഡ് ബിയോണ്ട്
ഛായാഗ്രഹണം: മധു നീലകണ്ഠൻ
ചിത്രസന്നിവേശം: വി. സാജൻ
ഗാനരചന: സന്തോഷ് വർമ്മ
സംഗീതം: ബിജിബാൽ
കലാസംവിധാനം: അജയ് മങ്ങാട്
ശബ്ദസംവിധാനം: തപസ് നായക്
ചമയം: ശ്രീജിത്ത് ഗുരുവായൂർ
വസ്ത്രാലങ്കാരം: അരുൺ മനോഹർ
വിതരണം: സെൻട്രൽ പിക്ചേഴ്സ്.

കോമ്രേഡ് ഇൻ അമേരിക്ക – ⭐⭐ 


നിക്കാരഗ്വനാകാശം ഹോണ്ടുറാസ്ഭൂമി മെക്സിക്കൻകടൽ! – ⭐⭐

ദുൽഖർ സൽമാനും ബാഗും യാത്രകളും നവയുഗ സിനിമയിലെ അഭിവാജ്യ ഘടകങ്ങളായിരിക്കുകയാണ്. എ.ബി.സി.ഡി, നീലാകാശം പച്ചക്കടൽ ചുവന്നഭൂമി തുടങ്ങിയ ദുൽഖറിന്റെ ആദ്യകാല സിനിമകൾ മുതൽ ചാർളി വരെയുള്ള സിനിമകളിലെ വിജയഘടഗങ്ങളായി ഉൾപ്പെടുത്തിയവയാണ് ബാഗും യാത്രകളും. എൺപതുകളുടെ മദ്ധ്യത്തിൽ നിർമ്മിക്കപ്പെട്ട സിനിമകളിലെ വിജയഘടകങ്ങളായിരുന്നു മമ്മൂട്ടിയും കുട്ടിയും പെട്ടിയും. തൊണ്ണൂറകളിലെ വിജയ ഫോർമുലയായിരുന്നു മോഹൻലാലും മീശപിരിയും വരിക്കാശ്ശേരി മനയും. അതിനു സമാനമായ ഒന്നായിരിക്കുകയാണ് ദുൽഖറും ബാഗും യാത്രകളും.

അമൽ നീരദ് നിർമ്മിക്കുകയും സംവിധാനം ചെയ്യുകയും ചെയ്ത കോമ്രേഡ് ഇൻ അമേരിക്ക അഥവാ സിയാ എന്ന സിനിമയിലും ദുൽഖർ സൽമാനും ബാഗും യാത്രകളുമാണ് പ്രമേയമാകുന്നത്. ഇടതുപക്ഷ പ്രസ്ഥാനത്തിൽ വിശ്വസിക്കുന്ന അജി മാത്യു എന്ന പാലാക്കാരൻ നസ്രാണി ഒരു കാമുകനാണ്. അയാളുടെ ജീവിതത്തിലെ ഒരു നിർണ്ണായക ഘട്ടത്തിൽ നടത്തേണ്ടിവരുന്ന യാത്രയാണ് അമൽ നീരദ് ഈ സിനിമയിലൂടെ അവതരിപ്പിക്കുന്നത്. സാങ്കേതിക തികവുകൊണ്ടും അഭിനയ മികവുകൊണ്ടും രസകരമായ സംഭാഷണങ്ങളാലും ഒരുവട്ടം കണ്ടിരിക്കാവുന്ന സിനിമയായി കോമ്രേഡ് ഇൻ അമേരിക്കയെ വിലയിരുത്താം.

പ്രമേയം: ⭐⭐
കോമ്രേഡ് ഇൻ അമേരിക്ക എന്ന ടൈറ്റിൽ കേൾക്കുമ്പോൾ ഇതൊരു ഇടതുപക്ഷ രാഷ്ട്രീയ സിനിമയാണോ എന്ന സംശയം ഏവർക്കും തോന്നാം. പോസ്റ്ററുകളിൽ കാണുന്ന ചിത്രങ്ങൾ കണ്ടാൽ ഇതൊരു സ്പോർട്സ് സിനിമയാണെന്നും തോന്നാം. കണ്ണിൽ കണ്ണിൽ എന്ന പാട്ടിന്റെ ചിത്രീകരണം കണ്ടാൽ ഒരു മുഴുനീള പ്രണയകഥയാണോ എന്നും സംശയിക്കുന്നതിൽ തെറ്റില്ല. എന്നാൽ, മേല്പറഞ്ഞ ഘടകങ്ങളൊക്കെയുള്ള ഒരു യാത്രയാണ് ഈ സിനിമയുടെ പ്രമേയം. ഒരു റോഡ് മൂവി എന്നോ ട്രാവൽ മൂവി എന്നോ ഈ സിനിമയെ വിശേഷിപ്പിക്കാം. ഒറ്റവാചകത്തിൽ കേൾക്കുമ്പോൾ പുതുമയുള്ള പ്രമേയം എന്ന തോന്നിപ്പിക്കുമെങ്കിലും, അതിനോട് നീതിപുലർത്തുന്ന കഥയല്ല ഷിബിൻ ഫ്രാൻസിസ് എഴുതിയത്. അമൽ നീരദിന്റെ വിഷ്വൽ മാജിക്കിന് മുമ്പിൽ കഥയ്ക്കെന്തു പ്രസക്തി എന്ന തോന്നലാണോ ഇതിനു പിന്നിൽ?

തിരക്കഥ: ⭐⭐
പാവാട എന്ന സിനിമയ്ക്ക് ശേഷം ഷിബിൻ ഫ്രാൻസിസ് കഥയും തിരക്കഥയും സംഭാഷണങ്ങളും എഴുതിയ സിനിമയാണ് കോമ്രേഡ് ഇൻ അമേരിക്ക. ഇടതുപക്ഷ രാഷ്ട്രീയവും സൗഹൃദവും, അപ്പൻ-മകൻ ആത്മബന്ധവും, പ്രണയവും സമന്വയിപ്പിച്ച ആദ്യപകുതിയിലെ കഥാസന്ദർഭങ്ങൾ അത്യന്തം രസകരമായ സംഭാഷണങ്ങളിലൂടെ എഴുതുവാൻ ഷിബിൻ ഫ്രാൻസീസിന് സാധിച്ചിട്ടുണ്ട്. പാർട്ടി ഓഫീസിലെത്തി സങ്കൽപ്പത്തിലെ ചെഗുവേരയോടും ലെനിനോടും കാൾ മാർക്സിനോടും തന്റെ യാത്രയുടെ കാരണം അജി മാത്യു വിശദീകരിക്കുന്ന രംഗവും സംഭാഷണങ്ങളും മികവുപുലർത്തി. അതുപോലെ, രണ്ടാം പകുതിയുടെ അവസാനമുള്ള അപ്പനുമായുള്ള അജി മാത്യുവിന്റെ ഫോൺ സംഭാഷണങ്ങളും ഹൃദയസ്പർശിയായി എഴുതുയിട്ടുണ്ട്. എന്നാൽ, ആദ്യാവസാനമുള്ള കഥാഗതി പ്രവചിക്കാനായതും അവിശ്വസനീയമായതും സിനിമയുടെ ആസ്വാദനത്തെ സാരമായി ബാധിച്ചിട്ടുണ്ട്. ആദ്യ പകുതിയിലെ കഥാസന്ദർഭങ്ങൾ എല്ലാംതന്നെ കണ്ടുമടുത്തവയാണ്. രണ്ടാം പകുതിയിലെ യാത്രകളിലെ സന്ദർഭങ്ങൾ പുതുമനിറഞ്ഞതായിരുന്നുവെങ്കിലും ഒരല്പം അവിശ്വസനീയവുമായിരുന്നു. യഥാർത്ഥ സംഭവങ്ങളെ ആസ്പദമാക്കിയ തിരക്കഥയായിരുന്നുവെങ്കിലും അവയൊന്നും സിനിമ കണ്ടിരിക്കുന്ന പ്രേക്ഷകർക്ക് ബോധ്യമാകുന്ന രീതിയിൽ തിരക്കഥയിൽ ഉൾപ്പെടുത്തിയിട്ടില്ല. ദുൽഖർ സൽമാൻ ആരാധകരെ തൃപ്തിപ്പെടുത്തുന്ന രസചേരുവകളെല്ലാം ഉള്ളതിനാൽ ഈ സിനിമയും വാണിജ്യവിജയം നേടുവാൻ സാധ്യതയുണ്ട്.

സംവിധാനം: ⭐⭐⭐
കുള്ളന്റെ ഭാര്യ എന്ന ലഘു ചിത്രത്തിലൂടെ ഒന്നിച്ച അമൽ നീരദും ദുൽഖർ സൽമാനും ആദ്യമായിട്ടാണ് ഒരു മുഴുനീള സിനിമയ്ക്ക് വേണ്ടി കൈകോർക്കുന്നത്. ദുൽഖർ സൽമാന്റെ ആരാധകരെ തൃപ്തിപ്പെടുത്തുന്ന എല്ലാ ചേരുവകളും കൃത്യമായി ചേർക്കുവാൻ സംവിധായകൻ മറന്നില്ല എന്നിടത്താണ് ഈ സിനിമ വ്യത്യസ്തമാകുന്നത്. രണദേവ് എന്ന ഛായാഗ്രാഹകന്റെ അത്യുഗ്രൻ വിഷ്വൽസും പ്രവീൺ പ്രഭാകറിന്റെ കൃത്യതയുള്ള സന്നിവേശവും ദുൽഖർ സൽമാൻ എന്ന അഭിനേതാവിന്റെ ഊർജസ്വലമായ അഭിനയവും സിനിമയ്ക്ക് ഒരുപാട് ഗുണം ചെയ്തിട്ടുണ്ട്. അമൽ നീരദ് സിനിമകളിൽ നിന്നും പ്രതീക്ഷിക്കുന്നതെല്ലാം ഈ സിനിമയിലുണ്ട്. പതിവിനു വിപരീതമായി സ്ലോ മോഷൻ രംഗങ്ങൾ ഇല്ലാത്ത ആദ്യ അമൽ നീരദ് സിനിമകൂടിയാണിത്. അമൽ നീരദിന്റെ മുൻകാല സിനിമകളെ അപേക്ഷിച്ചു പരീക്ഷണാർത്ഥത്തിൽ അവതരിപ്പിച്ച രണ്ടാം പകുതിയാണ് ഈ സിനിമയുടേത്. അവിശ്വസനീയമായ ഒരു കഥാപശ്ചാത്തലം അതിലും അവിശ്വസനീയമായ രീതിയിൽ വളരെ ലാഘവത്തോടെ അവതരിപ്പിച്ചപ്പോൾ അത് പ്രേക്ഷകർക്ക് രസിച്ചില്ല. ആസ്വാദനത്തിനുള്ള എല്ലാ ചേരുവകളുമുള്ള ആദ്യ പകുതിയിൽ നിന്ന് ഒട്ടും രസിപ്പിക്കാത്ത രണ്ടാം പകുതിയിലേക്കു കടന്നപ്പോൾ അവയെല്ലാം സിനിമയ്ക്ക് തിരിച്ചടിയായി. രണ്ടാം പകുതിയിലെ രംഗങ്ങൾ ഭീകരത സൃഷ്ടിക്കുമെന്നു സംഭാഷണങ്ങളിലൂടെ പറയുന്നുണ്ടെങ്കിലും അവയൊക്കെ നിസ്സാരമായതുപോലെ പ്രേക്ഷകർക്ക് അനുഭവപെട്ടു. ഒറ്റവാചകത്തിൽ പറഞ്ഞാൽ ഇതൊരു കോമ്രേഡിന്റെ കഥയുമല്ല അമേരിക്കൻ കാഴ്ചകളുമില്ല!

സാങ്കേതികം: ⭐⭐⭐⭐
രണദേവിന്റെ പുത്തനുണർവ് പകരുന്ന ഫ്രയിമുകൾ സിനിമയ്ക്ക് ഗുണകരമായിട്ടുണ്ട്. കോട്ടയത്തിന്റെ ഗ്രാമീണതയും ലാറ്റിൻ അമേരിക്കയുടെ വരണ്ടഭൂമിയും മികവോടെ ചിത്രീകരിക്കുവാൻ രണദേവനായി. എന്നാൽ, രണ്ടാം പകുതിയിലെ രംഗങ്ങൾക്ക് വേണ്ടത്ര തീവ്രത ലഭിച്ചില്ല. ആക്ഷൻ രംഗങ്ങളോ ദുർകടമായ യാത്രകളോ കഥയാവശ്യപെടുന്ന ഭീതിജനിപ്പിക്കാനായില്ല എന്നതുമാത്രമാണ് ഒരു പോരായ്മയായി തോന്നിയത്. പ്രവീൺ പ്രഭാകറിന്റെ സന്നിവേശം കഥയാവശ്യപെടുന്ന വേഗത സിനിമയ്ക്ക് നൽകുവാനായി. കഥയിൽ പ്രാധാന്യമില്ലാത്ത രംഗങ്ങളോ കഥാപാത്രങ്ങളോ സിനിമയിലുണ്ടായിരുന്നില്ല. ഗോപി സുന്ദറാണ് പശ്ചാത്തല സംഗീതവും പാട്ടുകളുടെ സംഗീതവും നിർവഹിച്ചത്. ഗോപി സുന്ദറിന്റെ പശ്ചാത്തല സംഗീതം ചില രംഗങ്ങളിൽ മികവുപുലർത്തി. അജി മാത്യുവിന്റെ രംഗപ്രവേശനത്തിനായി ഉപയോഗിച്ച പശ്ചാത്തല സംഗീതം അതിനുദാഹരണം. റഫീഖ് അഹമ്മദ് എഴുതിയ രണ്ടു പാട്ടുകളിൽ “വാനം തിളതിളയ്ക്കണു” എന്ന മെക്സിക്കൻ പശ്ചാത്തലത്തിലുള്ള ഗാനം മികവുപുലർത്തി. സജി കൊരട്ടിയുടെ ചമയം കഥാപാത്രങ്ങൾക്ക് യോജിച്ചവയായിരുന്നു. രണ്ടാം പകുതിയിലെ യാത്രയ്ക്കിടയിലുള്ളവ പ്രത്യേകിച്ച് മികവുറ്റതായിരുന്നു. ചെഗുവേരയും മാർക്‌സും ലെനിനും സ്റ്റാലിനും അതിഗംഭീരമായി. സമീറ സനീഷിന്റെ വസ്ത്രാലങ്കാരവും കഥാപാത്രങ്ങൾക്ക് യോജിച്ചവയായി. തപസ് നായ്കിന്റെ ശബ്ദസംവിധാനം മോശമായിരുന്നു. അനിൽ അരസ്സ്‌ നിർവഹിച്ച പാലാ ബസ് സ്റ്റാൻഡിൽ ചിത്രീകരിച്ച സംഘട്ടനം ആരാധകരെ മാത്രം തൃപ്തിപ്പെടുത്തുന്നതായിരുന്നു.

അഭിനയം: ⭐⭐⭐
അജി മാത്യു എന്ന സഖാവിനെയും അജി എന്ന കാമുകനെയും അജിപ്പനെന്ന മകനെയും സുഹൃത്തിനെയും കയ്യടക്കത്തോടെ അവതരിപ്പിക്കുവാൻ ദുൽഖർ സൽമാന് സാധിച്ചു. ആരാധകർക്ക് ആവേശമുണർത്തുന്ന ആക്ഷൻ രംഗങ്ങളിലും കൗമാരക്കാർക്ക് ഉണർവ്വ് പകരുന്ന കാമുകനായും ദുൽഖർ തിളങ്ങി. ഈ സിനിമയിലെ ഏറ്റവും മികച്ച അഭിനയം കാഴ്ചവെച്ചത് മാത്യു എന്ന കഥാപാത്രത്തെ അവതരിപ്പിച്ച സിദ്ദിക്കാണ്‌. പാലാക്കാരൻ അച്ചായനായും സ്നേഹമുള്ള അപ്പനായും അഭിനയമികവ് പുലർത്താൻ സിദ്ദിഖിനായി. രസകരമായ അഭിനയം കാഴ്ചവെച്ചു ഏവരെയും ചിരിപ്പിക്കാൻ സൗബിൻ ഷാഹിറിനും ദിലീഷ് പോത്തനും ജോൺ വിജയ്ക്കും സാധിച്ചു. പി.കെ., സ്‌കൂൾ ബസ് എന്നീ സിനിമകളുടെ ഛായാഗ്രാഹകൻ സി.കെ.മുരളീധരന്റെ മകൾ കാർത്തിക മുരളീധരനാണ് ഈ സിനിമയിലെ നായിക. അമേരിക്കൻ മലയാളി പെൺകുട്ടിയെ മോശമാക്കാതെ അവതരിപ്പിക്കുവാൻ കാർത്തികയ്ക്കു സാധിച്ചു. ഇവരെ കൂടാതെ ചാന്ദിനി ശ്രീധരൻ, ജിനു ജോസഫ്, മണിയൻപിള്ള രാജു, സുജിത് ശങ്കർ, അലൻസിയാർ, വി.കെ.ശ്രീരാമൻ, സുമിത് നവൽ, പാർവതി, സുരഭിലക്ഷ്മി എന്നിവരാണ് ഈ സിനിമയിലെ പ്രധാന അഭിനേതാക്കൾ.

വാൽക്കഷ്ണം: എല്ലാത്തരം സിനിമകളും ഇഷ്ടപെടുന്ന പ്രേക്ഷകർക്ക് ഒരുവട്ടം കണ്ടിരിക്കാവുന്ന എന്റർറ്റെയിനറാണ് കോമ്രേഡ് ഇൻ അമേരിക്ക!

നിർമ്മാണം, സംവിധാനം: അമൽ നീരദ്
രചന: ഷിബിൻ ഫ്രാൻസിസ്
ഛായാഗ്രഹണം: രണദേവ്
ചിത്രസന്നിവേശം: പ്രവീൺ പ്രഭാകർ
സംഗീതം: ഗോപി സുന്ദർ
ഗാനരചന: റഫീഖ് അഹമ്മദ്, കരോലിന, മൻസൂർ
കലാസംവിധാനം: പ്രതാപ് രവീന്ദ്രൻ
ചമയം: സജി കൊരട്ടി
വസ്ത്രാലങ്കാരം: സമീറ സനീഷ്
സംഘട്ടനം: അനൽ അരസ്സ്, മാർക്ക്
ശബ്ദസംവിധാനം: തപസ് നായക്
വിതരണം: എ ആൻഡ് എ റിലീസ്.

മുന്തിരിവള്ളികൾ തളിർക്കുമ്പോൾ – ⭐⭐⭐


ദാമ്പത്യ പ്രണയം പൂവിടുമ്പോൾ… – ⭐⭐⭐

“നമുക്ക് ഗ്രാമങ്ങളിൽ ചെന്ന് രാപാർക്കാം, അതികാലത്ത് മുന്തിരിതോട്ടങ്ങളിൽപോയി മുന്തിരിവള്ളി തളിർത്തു പൂവിടുകയും മാതള നാരകം പൂക്കുകയും ചെയ്തോ എന്ന് നോക്കാം.
അവിടെ വെച്ചു ഞാൻ നിനക്കെന്റെ പ്രേമം തരും.” – കെ.കെ.സുധാകരന്റെ ‘നമുക്ക് ഗ്രാമങ്ങളിൽ ചെന്ന് രാപ്പാർക്കാം’ എന്ന നോവലിലെ ഒരു വാചകം.

ഒരു വ്യക്തിയുടെ സമസ്തമേഖലകളിലെയും വിജയം ദാമ്പത്യ ജീവിതത്തിലെ വിജയത്തെ ആശ്രയിച്ചിരിക്കുന്നു. തകർന്ന കുടുംബബന്ധങ്ങൾ മറ്റു മേഖലകളിലെ പരാജയത്തിന് കാരണമാകുന്നു. ‘എന്റെ ഭാര്യയാണ് എന്റെ ജീവിതം’ എന്ന സന്ദേശം അർത്ഥവത്താക്കുന്ന ഒരുപിടി നല്ല മുഹൂർത്തങ്ങളിലൂടെ ആവിഷ്കരിച്ചിരിക്കുന്ന ഈ സിനിമയിൽ ഒട്ടനവധി സന്ദേശങ്ങൾ കുടുംബങ്ങൾക്കായി ഉൾപ്പെടുത്തിയിട്ടുണ്ട്.

വി.ജെ.ജെയ്മ്സിന്റെ ‘പ്രണയോപനിഷത്’ എന്ന ചെറുകഥയെ ആസ്പദമാക്കി എം.സിന്ധുരാജ് രചന നിർവഹിച്ച മുന്തിരിവള്ളികൾ തളിർക്കുമ്പോൾ സംവിധാനം ചെയ്തിരിക്കുന്നത് ജിബു ജേക്കബാണ്. പ്രമോദ് പിള്ള ഛായാഗ്രഹണവും, സൂരജ് എസ്. ചിത്രസന്നിവേശവും, ബിജിബാൽ പശ്ചാത്തല സംഗീതവും, എം.ജയചന്ദ്രൻ-ബിജിബാൽ ടീം പാട്ടുകളുടെ സംഗീത സംവിധാനവും നിർവഹിച്ചിരിക്കുന്നു. ബാംഗ്ലൂർ ഡെയ്‌സ്, കാട് പൂക്കുന്ന നേരം എന്നീ സിനിമകൾക്ക്‌ ശേഷം വീക്കെൻഡ് ബ്ലോക്ബസ്റ്ററിന്റെ ബാനറിൽ സോഫീയ പോൾ നിർമ്മിച്ചിരിക്കുന്ന ഈ സിനിമയിൽ മോഹൻലാലും മീനയും പ്രധാന കഥാപാത്രങ്ങളെ അവതരിപ്പിച്ചിരിക്കുന്നു.

പ്രമേയം: ⭐⭐⭐
ദമ്പതികൾ തമ്മിൽ എങ്ങനെ സ്നേഹിക്കണമെന്നും, ആശയവിനിമയം എങ്ങനെ ഫലപ്രദമാക്കാം എന്നും, മറ്റു ബന്ധങ്ങളുടെ പ്രലോഭനങ്ങളിൽ നിന്നും എങ്ങനെ രക്ഷപെടാമെന്നും, മക്കളോട് എങ്ങനെ സ്നേഹം പ്രകടിപ്പിക്കണമെന്നും, മാതാപിതാക്കൾ തമ്മിലുള്ള സ്നേഹം കുട്ടികളുടെ സ്വഭാവരൂപീകരണത്തിൽ സ്വാധീനം ചെലുത്തുന്നുണ്ട് എന്നും ഈ സിനിമയിലൂടെ ചർച്ചചെയ്യുന്നു. കുടുംബങ്ങളിൽ വലിയ അളവിൽ സ്വാധീനം ചെലുത്തുവാൻ സാധ്യതയുള്ള ഒരു വിഷയം ഒരുപാട് നാളുകൾക്കു ശേഷമാണ് മലയാള സിനിമയിൽ പ്രേമേയമാകുന്നത്. ഒരുപക്ഷെ അത് തന്നെയാകും ഈ സിനിമയുടെ വിജയവും.

തിരക്കഥ: ⭐⭐⭐
എം.സിന്ധുരാജ് തിരക്കഥയും സംഭാഷണങ്ങളും രചിച്ച മുന്തിരിവള്ളികൾ തളിർക്കുമ്പോളിൽ ദാമ്പത്യ ജീവിതത്തിലെ അസ്വാരസ്യങ്ങൾ സൃഷ്ടിക്കുന്ന പല സംഭവങ്ങളും ചർച്ചാവിഷയമാകുന്നുണ്ട്. അവിഹിത ബന്ധങ്ങളും അമിതമായ ഫോൺ ഉപയോഗവും മൂലം കുടുംബത്തിൽ ചിലവിടാൻ സമയമില്ലായ്മ ഉണ്ടാവുകയും ചെയ്യുന്നു. മേല്പറഞ്ഞ വിഷയം കുടുംബങ്ങളെ ബാധിക്കാതിരിക്കണമെങ്കിൽ, കുടുംബനാഥൻ അയാളുടെ സുഹൃത്തുക്കളെയോ മറ്റു ബന്ധങ്ങളെയോ സ്നേഹിക്കുന്നതിനേക്കാൾ തന്റെ ഭാര്യയെ സ്നേഹിക്കുക എന്ന സന്ദേശമാണ് ഈ സിനിമയിലൂടെ സമൂഹത്തിനു നൽകുന്നത്. ഈ ആശയം പ്രേക്ഷകരിലേക്കെത്തിക്കുവാനുള്ള കഥാസന്ദർഭങ്ങളാണ് ഈ സിനിമയുടെ തിരക്കഥയിലുള്ളത്. വിശ്വസനീയമായ കഥാസന്ദർഭങ്ങളും സംഭാഷണങ്ങളുമാണ് ഈ സിനിമയെ വ്യത്യസ്ഥമാക്കുന്നത്. സിനിമയുടെ ആദ്യപകുതിയുടെ തുടക്കത്തിൽ മേല്പറഞ്ഞ വിഷയത്തിലേക്കു എത്തിച്ചേരുവാൻ ഒട്ടനവധി കഥാസന്ദർഭങ്ങൾ ഉൾപ്പെടുത്തേണ്ട ആവശ്യകത ഉണ്ടായിരുന്നില്ല. അതുപോലെ മൂലകഥയിൽ പ്രാധാന്യമില്ലാത്ത കുറെ കഥാപാത്രങ്ങൾ സിനിമയിൽ ഉടനീളമുണ്ട്. ഈ പറഞ്ഞ കുറവുകളൊക്കെ തിരക്കഥയിൽ ഉണ്ടെങ്കിലും, എന്റെ ജീവിതം എന്റെ ഭാര്യയാണ് എന്നത്തിന്റെ പൂർണ അർഥം പ്രേക്ഷക മനസ്സുകളിലേക്ക് ആഴ്നിറങ്ങുവാൻ സാധിക്കുന്ന രീതിയിൽ തിരക്കഥ എഴുതുവാൻ എം.സിന്ധുരാജിന് സാധിച്ചു എന്നതാണ് തിരക്കഥാകൃത്തിന്റെ വിജയം. അഭിനന്ദനങ്ങൾ!

സംവിധാനം:⭐⭐⭐
വെള്ളിമൂങ്ങ എന്ന ആദ്യ സിനിമയിലൂടെ പ്രേക്ഷകരുടെ മനംകവർന്ന സംവിധായകനാണ് ജിബു ജേക്കബ്. നല്ല പ്രമേയവും കഥയും തിരഞ്ഞെടുത്തു കുടുംബങ്ങൾക്ക് ഇഷ്ടപെടുന്ന രീതിയിലുള്ള കഥാസന്ദർഭങ്ങൾ കൂട്ടിച്ചേർത്തു കഥാപാത്രങ്ങൾക്ക് അനിയോജ്യരായ നടീനടമാരെ അഭിനയിപ്പിച്ചു കൃത്യതയോടെ സംവിധാനം നിർവഹിച്ചു നല്ലൊരു സന്ദേശം സമൂഹത്തിലെത്തിക്കുവാൻ ജിബു ജേക്കബ് നടത്തിയ പരിശ്രമം വിജയിച്ചിരിക്കുന്നു. ഇഴഞ്ഞു നീങ്ങുന്ന അവതരണവും സിനിമയുടെ ദൈർഘ്യവും, കഥയിൽ പ്രാധാന്യമില്ലാത്ത കഥാപാത്രങ്ങളും മാത്രമാണ് ഈ സിനിമയുടെ പോരായ്മയായി അവശേഷിക്കുന്നത്. ദൃശ്യത്തിന് ശേഷം പ്രേക്ഷകർക്ക് ഇഷ്ടപെടുന്ന മോഹൻലാലിനെ അവതരിപ്പിച്ചു എന്നതാണ് ഈ സിനിമയുടെ വിജയഘടകങ്ങളിൽ ഒന്ന്. സിനിമയുടെ രണ്ടാം പകുതിയും ക്‌ളൈമാക്‌സും മികവോടെ അവതരിപ്പിച്ചതാണ് മറ്റൊരു ഘടകം. ഇനിയും ഇതുപോലുള്ള സിനിമകൾ നിർമ്മിക്കുവാൻ സോഫിയ പോളിനും സാധിക്കട്ടെ. സ്നേഹത്തിന്റെ മുന്തിരിവള്ളികൾ കുടുംബങ്ങളിൽ പൂത്തുതളിർക്കട്ടെ!

സാങ്കേതികം: ⭐⭐⭐
പ്രമോദ് പിള്ളയുടെ ഛായാഗ്രഹണം സിനിമയുടെ കഥയോടും പശ്ചാത്തലത്തിനോടും ചേർന്ന് നിൽക്കുന്നു. എന്നാൽ സൂരജിന്റെ സന്നിവേശം വേണ്ടുവോളം മികവ് പുലർത്തിയില്ല. സിനിമയുടെ ആദ്യ പകുതിയിലെ രംഗങ്ങൾ പലതും കഥയിൽ പ്രാധാന്യമില്ലാത്തതും വലിച്ചുനീട്ടിയിരിക്കുന്ന രീതിയിലുമായി അനുഭവപെട്ടു. സിനിമയുടെ ദൈർഘ്യം ഒരല്പം കൂടുതലായത് പ്രേക്ഷകരിൽ മുഷിപ്പുണ്ടാക്കുന്നതിനു വഴിയൊരുക്കിയിട്ടുണ്ട്. ബിജിബാലിന്റെ പശ്ചാത്തല സംഗീത സംവിധാനം രംഗങ്ങളുടെ മാറ്റുകൂട്ടുന്നതിനു സഹായിച്ചിട്ടുണ്ട്. റഫീഖ് അഹമ്മദ്, മധു വാസുദേവ്, അജിത്കുമാർ എന്നിവരുടെ വരികൾക്ക് എം.ജയചന്ദ്രനും ബിജിബാലും ഈണമിട്ട മൂന്ന് പാട്ടുകളാണുള്ളത്. ശരാശരിയിലൊതുങ്ങുന്ന പാട്ടുകളാണ് മൂന്നും. അജയ് മങ്ങാടിന്റെ കലാസംവിധാനവും സജി കൊരട്ടിയുടെ ചമയവും മികവ് പുലർത്തി. നിസാർ റഹ്മത്തിന്റെ വസ്ത്രാലങ്കാര മികവിനാൽ മോഹൻലാൽ പതിവിലും പ്രായക്കുറവ് തോന്നിപ്പിക്കുന്ന രീതിയിലായി. രംഗനാഥ് രവിയാണ് ശബ്ദരൂപീകരണം നിർവഹിച്ചത്.

അഭിനയം: ⭐⭐⭐⭐
മോഹൻലാൽ, മീന, അനൂപ് മേനോൻ, ശ്രിന്ദ അഷബ്, ഐമ റോസ്മി സെബാസ്റ്റ്യൻ, മാസ്റ്റർ സനൂപ്, അലൻസിയാർ ലേ ലോപസ്, സുരാജ് വെഞ്ഞാറമൂട്, കലാഭവൻ ഷാജോൺ, ഷറഫുദ്ധീൻ, സുധീർ കരമന, സുരേഷ് കൃഷ്ണ, മേഘനാഥൻ, സോഹൻ സീനുലാൽ, ജോയ് മാത്യു, രാഹുൽ മാധവ്, കെ.എൽ.ആന്റണി, ലിഷോയ്, രാജേഷ് പറവൂർ, ഗണപതി, നന്ദു, ശശി കലിങ്ക, കുമരകം രഘുനാഥ്, ആശ ശരത്,
നേഹ സക്‌സേന, ബിന്ദു പണിക്കർ, രശ്മി ബോബൻ, മഞ്ജു സുനിൽ, ലീന ആന്റണി, അംബിക മോഹൻ എന്നിവരാണ് ഈ സിനിമയിലെ അഭിനേതാക്കൾ. ഉലഹന്നാൻ എന്ന കഥാപാത്രത്തെ തന്മയത്വത്തോടെ അവതരിപ്പിക്കുവാൻ മറ്റൊരു നടനും സാധിക്കുകയില്ല എന്ന് അടിവരയിട്ടു സ്ഥാപിച്ചിരിക്കുകയാണ് നടനവിസ്മയം മോഹൻലാൽ. ഇത്രയും ആസ്വാദ്യകരമായി പ്രണയത്തെ അവതരിപ്പിക്കുവാൻ മോഹൻലാലിനല്ലാതെ മലയാള സിനിമയിൽ നിലവിലുള്ള ഒരു നടനും സാധിക്കുകയില്ല എന്നത് നിസംശയം പറയാം. പാവാട ബാബുവിന് ശേഷം അഭിനയ സാധ്യതയുള്ള വേണുക്കുട്ടൻ എന്ന കഥാപാത്രത്തെ മികവോടെ അവതരിപ്പിച്ചു കയ്യടി നേടുവാൻ അനൂപ് മേനോന് സാധിച്ചു. ദൃശ്യത്തിന് ശേഷം മീനയ്ക്കും ലഭിച്ച നല്ല വേഷമാണ് ഈ സിനിമയിലെ ആനിയമ്മ. അലൻസിയാർ, ഷാജോൺ, ഐമ റോസ്മി, ശ്രിന്ദ, മഞ്ജു സുനിൽ എന്നിവരും അവരവർക്കു ലഭിച്ച കഥാപാത്രം ഗംഭീരമാക്കി.

വാൽക്കഷ്ണം: സ്നേഹത്തിന്റെ സന്തോഷത്തിന്റെ മുന്തിരിവള്ളികൾ നിങ്ങളുടെ കുടുംബത്തിലും പടർന്നുപിടിക്കണമെങ്കിൽ ഈ സിനിമ തീർച്ചയായും കണ്ടിരിക്കണം!

സംവിധാനം: ജിബു ജേക്കബ്
രചന: എം.സിന്ധുരാജ്
നിർമ്മാണം: സോഫിയാ പോൾ
ബാനർ: വീക്കെൻഡ് ബ്ലോക്ബസ്റ്റർ
ഛായാഗ്രഹണം: പ്രമോദ് പിള്ള
ചിത്രസന്നിവേശം: സൂരജ് എസ്.
പശ്ചാത്തല സംഗീതം: ബിജിബാൽ
ഗാനരചന: റഫീഖ് അഹമ്മദ്, മധു വാസുദേവ്, അജിത്കുമാർ ഡി.ബി.
സംഗീതം: എം.ജയചന്ദ്രൻ, ബിജിബാൽ
കലാസംവിധാനം: അജയൻ മാങ്ങാട്
ചമയം: സജി കൊരട്ടി
വസ്ത്രാലങ്കാരം: നിസാർ റഹ്മത്
ശബ്ദമിശ്രണം: അജിത് എ.ജോർജ്
ശബ്ദരൂപീകരണം: രംഗനാഥ് രവി
വിതരണം: വീക്കെൻഡ് ബ്ലോക്ബസ്റ്റർ റിലീസ്.

ആനന്ദം – ⭐⭐⭐


ആനന്ദം പകരുന്ന സൗഹൃദ-പ്രണയ കാഴ്ചകൾ! – ⭐⭐⭐

കലാലയ ജീവിതത്തിലെ സൗഹൃദങ്ങളും പരിഭവങ്ങളും പ്രണയങ്ങളും എല്ലാക്കാലവും നമ്മടെ ഓർമ്മകളിൽ നിറഞ്ഞു നിൽക്കും. ആ ഓർമ്മകൾ നൽകുന്ന ആനന്ദം ഒരിക്കൽക്കൂടി ആസ്വദിക്കുവാൻ ഗണേഷ് രാജ്-വിനീത് ശ്രീനിവാസൻ ടീം ഒരുക്കിയ സിനിമയാണ് ആനന്ദം.

കോളേജിൽ നിന്നും സുഹൃത്തുക്കളോടൊപ്പം വിനോദസഞ്ചാരത്തിനു പോകുന്ന ദിവസങ്ങളിലാകും ഒട്ടുമിക്ക പ്രണയങ്ങളും സൗഹൃദങ്ങളും ഉടലെടുക്കുന്നതും ദൃഢമാകുന്നതും. അത്തരത്തിലുള്ള ഒരു വിനോദസഞ്ചാരത്തിനിടയിൽ അരങ്ങേറുന്ന സംഭവവികാസങ്ങളാണ് സാങ്കേതികമികവോടെ ഗണേഷ് രാജ് അവതരിപ്പിച്ചിരിക്കുന്നത്. രസകരമായ അവതരണമായതിനാൽ തിരക്കഥയിലെ പാകപ്പിഴകൾ മറന്നുകൊണ്ട് ഏവരും ആനന്ദം ആസ്വദിക്കുന്ന കാഴ്ചയാണ് കണ്ടത്.

കാസ്റ്റ് ആൻഡ് ക്രൂവും ഹാബിറ്റ് ഓഫ് ലൈഫും സംയുക്തമായി നിർമ്മിച്ചിരിക്കുന്ന ആനന്ദത്തിന്റെ രചനയും സംവിധാനവും നിർവഹിച്ചിരിക്കുന്നത് വിനീത് ശ്രീനിവാസന്റെ ശിഷ്യന്മാരിൽ ഒരാളായിരുന്ന ഗണേഷ് രാജാണ്. വിനീത് ശ്രീനിവാസൻ ആദ്യമായി നിർമ്മിച്ചിരിക്കുന്ന ആനന്ദത്തിൽ വരുൺ എന്ന കഥാപാത്രമായി അരുൺ കുര്യനും, കുപ്പി എന്ന് വിളിപ്പേരുള്ള കഥാപാത്രത്തെ വിശാഖ് നായരും, വെസ്റ്റേൺ റോക്ക് സംഗീതത്തിന്റെ ആരാധകനായ ഗൗതമായി റോഷൻ മാത്യുവും, പഞ്ചപാവം കാമുകനായ അക്ഷയ് ആയി തോമസ് മാത്യുവും, ദിയയായി സിദ്ധി മഹാജങ്കടിയും, ദർശനയായി അനാർക്കലി മരയ്ക്കാറും, ദേവികയായി അനു ആന്റണിയും അഭിനയിച്ചിരിക്കുന്നു.

പ്രമേയം: ⭐⭐
കൗമാരക്കാരുടെ പ്രണയവും സൗഹൃദവും പ്രമേയമാക്കിയ മലയാള സിനിമകളെല്ലാം പ്രേക്ഷകർക്ക് എന്നും പ്രിയപ്പെട്ടതാണ്. എൻജിനിയറിങ് കോളേജ് സൗഹൃദം പ്രമേയമാക്കിയ തെലുങ്ക് സിനിമ ഹാപ്പി ഡെയ്‌സിന്റെ മലയാളം പതിപ്പ് കേരളത്തിൽ വമ്പൻ തരംഗം സൃഷ്ടിച്ചിരുന്നു. ആ കാലഘട്ടത്തിൽ അതേ തരത്തിലുള്ള പ്രമേയം മലയാളത്തിൽ സിനിമയാക്കിയിരുന്നെകിൽ എന്നാഗ്രഹിക്കാത്തവർ ഉണ്ടായിരുന്നില്ല. ആനന്ദം എന്ന സിനിമയിൽ ചർച്ചചെയ്യുന്നതും കോളേജ് പ്രണയവും സൗഹൃദവും പരിഭവവും തന്നെയാണ്.

തിരക്കഥ: ⭐⭐
സംവിധായകൻ ഗണേഷ് രാജ് ആദ്യമായി തിരക്കഥയും സംഭാഷണങ്ങളും എഴുതിയ ആനന്ദം ഒരു യാത്രയിലൂടെ ഇതൾവിരിയുന്ന പ്രണയകഥയാണ്. പ്രണയത്തോടൊപ്പം സൗഹൃദവും പരിഭവവും ഒക്കെ വിഷയമാകുന്നു. സിനിമയുടെ ആദ്യാവസാനം യുക്തിയെ ചോദ്യം ചെയ്യുന്ന ഒട്ടനവധി കഥാസന്ദർഭങ്ങൾ ഈ സിനിമയിലുണ്ടായിരുന്നു. കോളേജിൽ നിന്നും വിനോദ സഞ്ചാരത്തിനു പോകുമ്പോൾ ഇത്തരത്തിലുള്ള കാര്യങ്ങൾ സംഭവിക്കുമോ എന്ന് തോന്നിപ്പോകുന്ന വിധത്തിലാണ് കഥാസന്ദർഭങ്ങൾ എഴുതിയിരിക്കുന്നത്. അതിഭാവകത്വം നിറഞ്ഞ സന്ദർഭങ്ങൾക്കിടയിൽ സൗഹൃദത്തിന്റെ വിലയറിയുന്ന ഒട്ടനവധി മുഹൂർത്തങ്ങളും സംഭാഷണങ്ങളും ഉണ്ടായിരുന്നു എന്നതല്ലാതെ മറ്റൊരു പുതുമയുമില്ലാത്ത തിരക്കഥയാണ് ഈ സിനിമയുടേത്. കഥാപാത്രരൂപികരണം മികച്ചു നിന്നിരുന്നുവെങ്കിലും കഥാസന്ദർഭങ്ങൾ നിരാശപ്പെടുത്തി. യാത്രകളിലെ കാഴ്ചകൾ എന്നും ആകാംഷ ജനിപ്പിക്കുന്നതാണെങ്കിലും യാത്രകളിലെ കഴമ്പില്ലാത്ത കഥാസന്ദർഭങ്ങൾ നിരാശമാത്രം സമ്മാനിക്കുന്നു. കൗമാരക്കാർക്ക് ഇഷ്ടമാകുന്ന രസകരമായ രീതിയിലാണ് ഈ സിനിമയിലെ സംഭാഷണങ്ങൾ. ഈ സിനിമയിലെ ഏഴു പ്രധാന കഥാപാത്രങ്ങളും നമ്മടെ കോളേജ് കാലഘട്ടത്തിൽ നമ്മൾ കണ്ടിട്ടുള്ളവരാണ്. അതുകൊണ്ടു അവരെയും അവരുടെ സൗഹൃദവും പ്രണയവും ഏവർക്കും ഇഷ്ടപെടുമെന്നാണ് തോന്നുന്നത്.

സംവിധാനം: ⭐⭐⭐
ഓരോ സിനിമയും പ്രേക്ഷകർ ആസ്വദിക്കുന്നത് ഓരോ തരത്തിലാണ്. ചിലർ കഥയിലെ പുതുമതേടി പോകുമ്പോൾ മറ്റുചിലർ അവയുടെ അവതരണമികവിൽ ആസ്വാദനത്തിനുള്ള വകയുണ്ടോ എന്നാണ് നോക്കുന്നത്. തട്ടത്തിൻ മറയത്ത് കഥാപരമായി പുതുമ നൽകുന്നില്ലെങ്കിലും, അവതരണമികവിൽ വളരെയേറെ മുന്നിലായിരുന്നു. അതുപോലെ, ആനന്ദവും അവതരണമികവുകൊണ്ട് പ്രേക്ഷകർ സ്വീകരിക്കുവാൻ സാധ്യതയുള്ള സിനിമയാണ്. വ്യത്യസ്ഥ സ്വഭാവക്കാരായ ഏഴു കഥാപാത്രങ്ങളും അവരുടെ സൗഹൃദവും പ്രണയവും രസകരമായ സംഭാഷണങ്ങളിലൂടെ അവതരിപ്പിച്ചിരിക്കുന്നു. നല്ല അഭിനേതാക്കളെ കണ്ടെത്തുന്നതിലും മനോഹരമായ ഫ്രേയിമുകൾ ഒരുക്കുന്നതിലും ചടുലമായ രംഗങ്ങളുടെ കോർത്തിണക്കൽകൊണ്ടും രംഗങ്ങളോട് ചേർന്ന് നിൽക്കുന്ന സംഗീതംകൊണ്ടും പുത്തനുണർവ് പകരുവാൻ ഈ സിനിമയ്ക്ക് കഴിഞ്ഞു. ഗണേഷ് രാജ് എന്ന സംവിധായകന്റെ അവതരണമികവിൽ മറ്റെല്ലാ ന്യൂനതകളും മറന്നു രണ്ടു മണിക്കൂർ ആസ്വദിക്കാനുള്ള എല്ലാ ചേരുവകളും കോർത്തിണക്കി കൗമാരക്കാരെ രസിപ്പിക്കുവാൻ ആനന്ദിപ്പിക്കുവാൻ ഈ സിനിമയ്ക്ക് സാധിക്കും എന്നുറപ്പാണ്!

സാങ്കേതികം: ⭐⭐⭐⭐
നേരത്തിലൂടെ പ്രേമത്തിലൂടെ മലയാള സിനിമ പ്രേമികൾക്ക് സുപരിചിതനായ ആനന്ദ് സി. ചന്ദ്രൻ അത്യുഗ്രൻ വിഷ്വൽസ് ഒരുക്കി പ്രേക്ഷകർക്ക് കാഴ്ചകളിലൂടെ ആനന്ദം പകർന്നു. ഹംപിയിലെയും ഗോവയിലെയും കാണാകാഴ്ചകൾ മനോഹരമായി ക്യാമറയിൽ ഒപ്പിയെടുത്തു സിനിമയ്ക്ക് ഫ്രഷ്‌നെസ്സ് നൽകുവാൻ ആനന്ദ് സി. ചന്ദ്രന് സാധിച്ചു. നവാഗതനായ അഭിനവ് ആണ് ചടുലതയയോടെ രംഗങ്ങൾ സന്നിവേശം ചെയ്തത്. പുതുമയുള്ള അവതരണ രീതിയ്ക്ക് മാറ്റുക്കൂട്ടുവാൻ സന്നിവേശത്തിനു സാധിച്ചു. അനാവശ്യ രംഗങ്ങൾ ഒന്നുമില്ലാതെ രണ്ടു മണിക്കൂറിനുള്ളിൽ സിനിമയുടെ കഥ പറഞ്ഞ രീതിയാണ് പ്രേക്ഷകർക്കു ഏറ്റവും ഇഷ്ടപെട്ടത്. സച്ചിൻ വാര്യരുടെ സംഗീതത്തിൽ നാല് പാട്ടുകളാണ് ഈ സിനിമയിലുള്ളത്. കഥയോടും കഥാസന്ദർഭങ്ങളോടും നീതിപുലർത്തുന്ന പാട്ടുകളാണ് ഈ സിനിമയുള്ളത്.”നിലാവേ…” എന്ന പാട്ടാണ് ഏറ്റവും രസകരമായി തോന്നിയത്. വിനീത് ശ്രീനിവാസനും, മനു മഞ്ജിത്തും, അനു എലിസബത്തും ആണ് ഗാനരചന നിർവഹിച്ചത്. സച്ചിൻ വാര്യർ തന്നെയാണ് ഈ സിനിമയുടെ പശ്ചാത്തല സംഗീതവും നിർവഹിച്ചിരിക്കുന്നത്. രംഗങ്ങളോട് ചേർന്ന് നിൽക്കുന്ന രീതിയിലാണ് പശ്ചാത്തല സംഗീത സംവിധാനവും നിർവഹിച്ചിരിക്കുന്നത്. സജിയുടെ വസ്ത്രാലങ്കാരവും ജിതേഷിന്റെ ചമയവും മികവുപുലർത്തി.

അഭിനയം: ⭐⭐⭐⭐⭐
മലയാള സിനിമയിലേക്ക് ഏഴു മിടുക്കരായ നടീനടന്മാരെ ഈ സിനിമയിലൂടെ ലഭിച്ചിരിക്കുന്നു. പരുക്കനായ എന്നാൽ ഉള്ളിൽ സ്നേഹമുള്ള വരുൺ എന്ന കഥാപാത്രമായി അരുൺ കുര്യനും, സൗഹൃദത്തിനും സുഹൃത്തുകൾക്കും വിലകല്പിക്കുന്ന കൂട്ടത്തിലെ രസികനായ കുപ്പി എന്ന കഥാപാത്രമായി വിശാഖ് നായരും, കള്ളകാമുകൻ റോക്സ്റ്റാർ ഗൗതമായി റോഷൻ മാത്യുവും, നിഷ്കളങ്ക കാമുകൻ അക്ഷയ് ആയി തോമസ് മാത്യുവും, പ്രസരിപ്പോടെ പ്രകാശം പരത്തുന്ന ദിയയായി സിദ്ധി മഹാജങ്കടിയും, ചിരിയിലൂടെ മാത്രം നമ്മളെ വീഴ്‌ത്തുന്ന ദർശനയായി അനാർക്കലി മരയ്ക്കാരും, ദേവികയായി അന്നു ആന്റണിയും പ്രേക്ഷകരെ രസിപ്പിക്കുന്ന രീതിയിൽ അഭിനയിച്ചു. ഡോക്ടർ റോണിയ്ക്കു ലഭിച്ച ഏറ്റവും മികച്ച കഥാപാത്രമായിരിക്കും ഈ സിനിമയിലെ ചാക്കോ മാഷ്. രസകരമായി തന്നെ ആ കഥാപാത്രത്തെ അവതരിപ്പിക്കുവാൻ റോണിക്ക് സാധിച്ചു. ഇവരെ കൂടാതെ രഞ്ജി പണിക്കർ, ദിനേശ് നായർ, കോട്ടയം പ്രദീപ് എന്നിവരുമുണ്ട് ഈ സിനിമയിൽ.അതുകൂടാതെ മറ്റൊരു താരത്തിന്റെ സാന്നിധ്യവും ഈ സിനിമയ്ക്ക് ഗുണം ചെയ്തിട്ടുണ്ട്.

വാൽക്കഷ്ണം: കൗമാരക്കാരുടെ പ്രിയപ്പെട്ട ആനന്ദങ്ങളിൽ ഒന്നാകുവാൻ ആനന്ദം എന്ന സിനിമയ്ക്ക് സാധിക്കുമെന്നുറപ്പ്!

രചന, സംവിധാനം: ഗണേഷ് രാജ്
നിർമ്മാണം: വിനീത് ശ്രീനിവാസൻ
ഛായാഗ്രഹണം: ആനന്ദ് സി. ചന്ദ്രൻ
ചിത്രസന്നിവേശം: അഭിനവ് സുന്ദർ നായക്
ഗാനരചന: വിനീത് ശ്രീനിവാസൻ, മനു മഞ്ജിത്, അനു എലിസബത്ത് ജോസ്
സംഗീതം: സച്ചിൻ വാര്യർ
ചമയം: ജിതേഷ്
വസ്ത്രാലങ്കാരം: സജി
വിതരണം: എൽ.ജെ.ഫിലിംസ്.

തോപ്പിൽ ജോപ്പൻ – ⭐⭐


ആരാധകരെ 50% രസിപ്പിക്കും 50% വെറുപ്പിക്കും ജോപ്പൻ! – ⭐⭐

50% നൗഷാദ് ആലത്തൂരും 50% ജീവൻ നാസറും പണം ചിലവഴിച്ചു ഗ്രാന്റേ ഫിലിം കോർപറേഷന്റെയും എസ്.എൻ.ഗ്രൂപ്പിന്റെയും ബാനറിൽ നിർമ്മിച്ച തോപ്പിൽ ജോപ്പന്റെ മനസ്സിൽ 50% പ്രണയവും ശരീരത്തിൽ 50% മദ്യവും എന്ന അളവിലാണുള്ളത്. ഏറെ നാളുകൾക്കു ശേഷം ജോണി ആന്റണി സംവിധാനം ചെയ്ത ഈ സിനിമയിൽ നല്ല സിനിമകൾ ഇഷ്ടപ്പെടുന്നവരെ 50% ത്രിപ്ത്തിപെടുത്തുന്ന ഘടകങ്ങൾ പോലുമില്ല. നിഷാദ് കോയ എഴുതിയ തിരക്കഥയിൽ 50% രസിപ്പിക്കുന്ന ഫലിതങ്ങളും 50% വളിപ്പ് തമാശകളുമാണുള്ളത്.

പ്രമേയം:⭐
തോപ്പ്രംകുടിയിലെ തോപ്പിൽ തറവാട്ടിലെ അവിവിവാഹിതനായ തോപ്പിൽ ജോപ്പന്റെ പ്രണയവും പ്രണയനൈരാശ്യവും പ്രണയ സാഫല്യത്തിനായുള്ള കാത്തിരിപ്പും അതിനു വേണ്ടിയുള്ള പ്രയത്നങ്ങളുമാണ് ഈ സിനിമയുടെ പ്രമേയം. നിഷാദ് കോയയുടേതാണ് കഥ. കൗമാര പ്രായത്തിൽ ആദ്യനോട്ടത്തിൽ തന്നെ ജോപ്പന് പ്രണയം തോന്നിയ ആനി ഇന്ന് മറ്റൊരാളുടെ ഭാര്യയാണെന്ന ദുഃഖം താങ്ങാനാവാത്ത ജോപ്പൻ മുഴുകുടിയനായി മാറിയിരിക്കുന്നു. ഈ സാഹചര്യത്തിൽ ജോപ്പന്റെ ജീവിതത്തിൽ മരിയ എന്ന പെൺകുട്ടി കടന്നുവരുന്നു. തുടർന്നുണ്ടാകുന്ന സംഭവങ്ങളാണ് തോപ്പിൽ ജോപ്പന്റെ കഥ.

തിരക്കഥ: ⭐⭐
ഓർഡിനറി, മധുര നാരങ്ങ എന്നീ സിനിമകൾക്ക് ശേഷം നിഷാദ് കോയ രചന നിർവഹിക്കുന്ന തോപ്പിൽ ജോപ്പൻ ഒരു പ്രണയകഥയാണ്. സ്നേഹിച്ച പെൺകുട്ടിയെ നഷ്ടപ്പെട്ടതിന്റെ വേദനയിൽ കുടിയനായി നടക്കുന്ന ജോപ്പന്റെ ജീവിതത്തിൽ നടക്കുന്ന സംഭവങ്ങളാണ് ഈ സിനിമയുടെ കഥാസന്ദർഭങ്ങൾ. കബഡി കളിയിലൂടെ ആരംഭിക്കുന്ന കഥ ചെന്നെത്തുന്നത് കബഡി കളിയിലെ എതിർ ടീമിന്റെ ക്യാപ്‌റ്റനും ദുഷ്ടനുമായ പോലീസ് ഉദ്യോഗസ്ഥനുമായുള്ള സംഘട്ടനത്തിലാണ്. അവിടെന്നു പിന്നീട് മരിയ കഥാപാത്രവുമായുള്ള ജോപ്പന്റെ സൗഹൃദത്തിലാണ് കഥയുടെ സഞ്ചാരം. ഒടുവിൽ ആനി എന്ന ജോപ്പന്റെ കാമുകിയെ വീണ്ടും കണ്ടുമുട്ടുന്നു. അതിനിടയിൽ ധ്യാന കേന്ദ്രം, മരിയയുടെ ഒളിച്ചോട്ടം തുടങ്ങിയ കഥാസന്ദർഭങ്ങളും വന്നുപോകുന്നു. മേല്പറഞ്ഞതുപോലെ ഒരു അന്തവും കുന്തവുമില്ലാതെ ദിശയില്ലാതെ സഞ്ചരിക്കുന്ന പട്ടം പോലെയാണ് ഈ സിനിമയുടെ തിരക്കഥ രചന. പ്രവചിക്കാനാവുന്ന കഥാഗതിയും വളിപ്പ് തമാശകളും മാത്രമാണ് ഈ സിനിമയിലുടനീളമുള്ളത്. തോപ്പിൽ ജോപ്പന്റെ കഥാപാത്രരൂപീകരണം പോലും ഓരോസമയവും ഓരോ രീതിയിലാണ്. അലസമായ തിരക്കഥ രചന എന്നതാണ് ഒറ്റവാക്കിൽ പറയുവാനുള്ളത്.

സംവിധാനം: ⭐⭐
ജോണി ആന്റണി സിനിമകളുടെ സ്ഥിരം ചേരുവകളൊന്നും ഈ സിനിമയിലില്ല. റിയലിസ്റ്റിക് കഥാസന്ദർഭങ്ങളിലൂടെയാണ് കഥയുടെ അവതരണം. മമ്മൂട്ടി എന്ന അഭിനേതാവിനെയോ മമ്മൂട്ടി എന്ന താരത്തെയോ പൂർണ്ണതയോടെ അവതരിപ്പിക്കുവാൻ ജോണി ആന്റണിയ്ക്കു സാധിച്ചില്ല. മുൻകാല ജോണി ആന്റണി സിനിമകളായ തുറുപ്പുഗുലാനും പട്ടണത്തിൽ ഭൂതവും അപേക്ഷിച്ചു ഭേദമാണ് ഈ സിനിമ. ഒരു കോട്ടയം കുഞ്ഞച്ചനോ കുട്ടപ്പായിയോ പ്രതീക്ഷിച്ചു പോകുന്നവരെ നിരാശപ്പെടുത്തുന്ന അച്ചായൻ കഥാപാത്രമാണ് തോപ്പിൽ ജോപ്പൻ. മമ്മൂട്ടിയുടെ മഴയത്തുള്ള ഡാൻസും മമ്ത മോഹൻദാസുമായുള്ള ആ പാട്ടും ആരാധകരെ പോലും വെറുപ്പിച്ചു. പ്രവചിക്കാനാവുന്ന കഥാസന്ദർഭങ്ങൾ പതിഞ്ഞ താളത്തിൽ അവതരിപ്പിച്ചപ്പോൾ പ്രേക്ഷകർക്കു നന്നേ ബോറടിച്ചു. പ്രേക്ഷകരെ രണ്ടു മണിക്കൂർ പിടിച്ചിരുത്തുവാനുള്ള ഒരു പുതുമയും തോപ്പിൽ ജോപ്പനിലില്ല. മമ്മൂട്ടിയെ സ്നേഹിക്കുന്നവർക്ക് ഒരുവട്ടം കണ്ടിരിക്കാവുന്ന ഒരു സിനിമ എന്നതിലുപരി ഒരു സവിശേഷതകളുമില്ല.

സാങ്കേതികം: ⭐⭐⭐
സുനോജ് വേലായുധമാണ് ഈ സിനിമയുടെ ഛായാഗ്രഹണം. ഇടുക്കിയിലെ കണ്ടുമടുത്ത കാഴ്ചകൾക്ക് അപ്പുറം പുതുമകളൊന്നും ഛായാഗ്രഹണത്തിലില്ല. മഴ പെയ്യുന്ന ഫ്രയിമുകളെല്ലാം കൃത്രിമത്വം തോന്നിപ്പിക്കുന്ന രീതിയിലായതു വ്യക്തമായി മനസ്സിലാകും. പതിഞ്ഞ താളത്തിലാണ് രഞ്ജൻ എബ്രഹാം രംഗങ്ങൾ കോർത്തിണക്കിയിരിക്കുന്നത്. അത് തന്നെയാണ് ഈ സിനിമയുടെ പ്രധാന ന്യൂനതകളിൽ ഒന്ന്. കഥാസന്ദർഭങ്ങൾക്കു അനിയോജ്യമല്ലാത്ത പശ്ചാത്തല സംഗീതമാണ് വിദ്യാസാഗർ ഈ സിനിമയ്ക്ക് നൽകിയിരിക്കുന്നത്. അതുപോലെ പാട്ടുകളും നിലവാരം പുലർത്തിയില്ല. ഏലേലംകിടി എന്ന തുടങ്ങുന്ന പാട്ട് മാത്രമാണ് ഭേദമായി തോന്നിയത്. സാലു കെ.ജോർജിന്റെ കലാസംവിധാനം കഥാപശ്ചാത്തലത്തിനു യോജിച്ചതായിരുന്നു. സമീറ സനീഷിന്റെ വസ്ത്രാലങ്കാരത്തിൽ തോപ്പിൽ ജോപ്പൻ കൂടുതൽ സുന്ദരനായിരുന്നു.

അഭിനയം: ⭐⭐⭐
അച്ചായൻ കഥാപാത്രങ്ങളെ തനതായ ശൈലിയിൽ അവതരിപ്പിക്കുവാൻ മലയാള സിനിമയിലെ മഹാനടനുള്ള കഴിവ് പ്രേക്ഷകർ കണ്ടാസ്വദിച്ചതാണ്. കോട്ടയം കുഞ്ഞച്ചനും സംഘത്തിലെ കുട്ടപ്പായിയും അനശ്വരമാക്കിയ മമ്മൂട്ടിയുടെ വ്യത്യസ്ത അച്ചായൻ കഥാപാത്രമാണ് തോപ്പിൽ ജോപ്പൻ. മരിയ എന്ന കഥാപാത്രത്തെ മമ്ത മികച്ച രീതിയിൽ അവതരിപ്പിച്ചപ്പോൾ ആനിയായി ആൻഡ്രിയ നിരാശപ്പെടുത്തി. സോഹൻ സീനുലാലും സാജു നവോദയയും ഹാസ്യരംഗങ്ങളിൽ തിളങ്ങിയപ്പോൾ സലിംകുമാർ വെറുപ്പിക്കുന്ന രീതിയിൽ അഭിനയിച്ചു. മമ്മൂട്ടിയോടൊപ്പം സോഹൻ സീനുലാൽ, അലൻസിയാർ, സാജു നവോദയ, ശ്രീജിത്ത് രവി, ഹരിശ്രീ അശോകൻ, സലിംകുമാർ, രഞ്ജി പണിക്കർ, സുരേഷ് കൃഷ്ണ, സുധീർ, ജൂഡ് ആന്തണി ജോസഫ്, മേഘനാഥൻ, ലിഷോയ്, കലാഭവൻ ഹനീഫ്, മോഹൻജോസ്, ആൻഡ്രിയ ജെർമിയ, മമ്ത മോഹൻദാസ്, കവിയൂർ പൊന്നമ്മ, രശ്മി ബോബൻ, അക്ഷര കിഷോർ, ശാന്തകുമാരി എന്നിവരും പ്രധാന കഥാപാത്രങ്ങളെ അവതരിപ്പിച്ചിരിക്കുന്നു.

വാൽക്കഷ്ണം: മമ്മൂട്ടിയുടെ ആരാധകരെ മാത്രം രസിപ്പിക്കുന്ന സിനിമ!

സംവിധാനം: ജോണി ആന്റണി
രചന: നിഷാദ് കോയ
നിർമ്മാണം: നൗഷാദ് ആലത്തൂർ, ജീവൻ നാസർ
ബാനർ: ഗ്രാന്റേ ഫിലിം കോർപറേഷൻ, എസ്.എൻ.ഗ്രൂപ്പ്
ഛായാഗ്രഹണം: സുനോജ് വേലായുധം
ചിത്രസന്നിവേശം: രഞ്ജൻ എബ്രഹാം
സംഗീതം, പശ്ചാത്തല സംഗീതം: വിദ്യാസാഗർ
ഗാനരചന: റഫീഖ് അഹമ്മദ്, വയലാർ ശരത്ചന്ദ്ര വർമ്മ
കലാസംവിധാനം: സാലു കെ. ജോർജ്
വസ്ത്രാലങ്കാരം: സമീറ സനീഷ്
വിതരണം: ഗ്രാന്റേ ഫിലിം കോർപറേഷൻ.

വൈറ്റ് – ⭐

രണ്ടര മണിക്കൂർ ലണ്ടൻ സഫാരി – ⭐

വെള്ളക്കാരുടെ നാടാണല്ലോ ലണ്ടൻ. പിന്നെ, പരിശുദ്ധിയുടെ നിറമാണല്ലോ വെള്ള. അതുകൂടാതെ നമ്മുടെയൊക്കെ ജീവിതം വെള്ളനിറമുള്ള ബ്ലാങ്ക് പേപ്പറുമാണ്. അതിലുപരി നായികയായ ഹുമ ഖുറേഷി വെളുത്ത നിറമുള്ള സുന്ദരിയാണ്. ഇതിനൊക്കെ പുറമേ വെളുത്ത വർഗക്കാർ ഈ സിനിമയിൽ അഭിനയിച്ചിട്ടുമുണ്ട്. മേല്പറഞ്ഞ സവിശേഷതകൾ ഉള്ളതുകൊണ്ടാണെന്നു തോന്നുന്നു ഉദയ് അനന്തൻ ഈ സിനിമയ്ക്ക് വൈറ്റ് എന്ന നാമകരണം ചെയ്തത്.

സിനിമയായും മെഗാ സീരിയലായും ടീ വിയിൽ സംപ്രേഷണം ചെയ്യാൻ സാധിക്കുന്ന വിധത്തിലാണ് ഉദയ് അനന്തൻ വൈറ്റ് സംവിധാനം ചെയ്തിരിക്കുന്നത്. വൈറ്റിനു വേണ്ടി എന്റർറ്റെയിന്മെന്റ് ചാനലുകളും യാത്രാവിവരണ ചാനലായ സഫാരിയും തമ്മിൽ കടുത്ത മത്സരത്തിലാണ്. വൈറ്റിന്റെ ടീ വി സംപ്രേഷണ അവകാശം സഫാരി ചാനലിനു ലഭിച്ചാൽ ഒരു 100 എപ്പിസോഡിനു സാധ്യതയുണ്ട്.

ഒരു നീണ്ട ഇടവേളയ്ക്കു ശേഷം ഉദയ് അനന്തൻ സംവിധാനം നിർവഹിച്ച വൈറ്റ്
നിർമ്മിച്ചിരിക്കുന്നത് ആർ.വി.ഫിലിംസും ഇറോസ് ഇന്റെർനാഷണലും ചേർന്നാണ്.

പ്രമേയം:⭐
രണ്ടു പ്രായത്തിലുള്ള വ്യക്തികളാണ് പ്രകാശ്‌ റോയിയും റോഷ്ണിയും. അവിചാരിതമായി കണ്ടുമുട്ടുന്ന ഇരുവരുടെയും പരിചയം വളർന്നു സൗഹൃദവും, പിന്നീട് ഒരാൾക്ക് മറ്റൊരാളോട് പ്രണയമാവുകയും ചെയ്യുന്നു. അവർ പ്രണയസാഫല്യത്തിലെത്തുമോ? എന്നതാണ് ഈ സിനിമയുടെ കഥ. പ്രകാശ്‌ റോയ് വിവാഹിതനാണ് എന്നറിഞ്ഞുകൊണ്ടാണ് റോഷ്ണി അയാളെ പ്രണയിക്കുന്നത്. പക്ഷെ, പ്രകാശ് റോഷ്ണിയെ കണ്ടെത്തുന്നതും കൂടെകൂട്ടുന്നതും മറ്റൊരു കാരണത്താലാണ്. കണ്ടുമടുത്ത പ്രമേയവും കഥയും തന്നെയാണ് വൈറ്റ് എന്ന സിനിമ എന്നത് മമ്മൂട്ടിയുടെ ആരാധകരെ നിരാശരാകുന്ന ഘടകങ്ങളിൽ ഒന്ന്.

തിരക്കഥ:⭐
പ്രവീണ്‍ ബാലകൃഷ്ണൻ, നന്ദിനി വത്സൻ, ഉദയ് അനന്തൻ എന്നിവർ ചേർന്നാണ് വൈറ്റിന്റെ കഥയും തിരക്കഥയും സംഭാഷണങ്ങളും എഴുതിയിരിക്കുന്നത്. കേട്ടുപഴകിയ പ്രണയകഥകളിൽ നമ്മൾ കണ്ടുവന്നിട്ടുള്ള കഥാസന്ദർഭങ്ങളും സാധാരണ പ്രേക്ഷകന് ദഹിക്കാത്ത സംഭാഷണങ്ങളും കൃത്യമായി സമന്വയിപ്പിച്ച തിരക്കഥയാണ് ഈ സിനിമയുടെത്. അതിനു മാറ്റുകൂട്ടുന്ന ക്ലൈമാക്സ് രംഗങ്ങളും കൂടെ ചേർന്നപ്പോൾ സമ്പൂർണ്ണ ദുരന്തമായി വൈറ്റ് എന്ന സിനിമ. ഓരോ വ്യകതികളുടെ ജീവിതവും ഒരു ബ്ലാങ്ക് പേപ്പറുപോലെയാണ് എന്ന പ്രകാശ്‌ റോയ് പറയുന്ന സംഭാഷണവും, കഥാവസാനം ശങ്കർ രാമകൃഷ്ണൻ അവതരിപ്പിച്ച അൻവർ പറയുന്ന ഒരു സംഭാഷണവും മാത്രമാണ് മികച്ചതായി തോന്നിയത്. ഈ സിനിമ കണ്ടിറങ്ങുന്ന ഓരോ പ്രേക്ഷകനും സ്വയം ചോദിക്കുന്ന ഒരു ചോദ്യമുണ്ട്. എന്താണ് വൈറ്റ്? ഉത്തരം ഉദയ് അനന്തന് മാത്രമറിയാം!

സംവിധാനം:⭐
ഓരോ കഥയും പ്രേക്ഷകരുടെ അഭിരുചിക്കനുസരിച്ച് അവതരിപ്പിക്കുക എന്നതാണ് യുക്തിയുള്ള സംവിധായകർ ചെയ്യേണ്ടത്. രണ്ടു മനസ്സുകൾ തമ്മിൽ പ്രണയം തോന്നണമെങ്കിൽ അതിനു പിന്നിൽ ശക്തമായ ഒരു കാരണമുണ്ടാകണം. അത്തരത്തിലുള്ള ഒരു കാരണം ഈ കഥയിലുണ്ടെങ്കിലും അവയൊന്നും പ്രേക്ഷകന് ഗ്രഹിക്കാൻ സാധിക്കാത്ത രീതിയിലാണ് ചിത്രീകരിച്ചിരിക്കുന്നത്. സമ്പന്നമായ ലൊക്കേഷനുകളിൽ ചിത്രീകരിച്ചിരിക്കുന്ന രംഗങ്ങൾ ദൃശ്യമികവുണ്ടായിരുന്നു എന്നതുകൊണ്ട്‌ ആ രംഗത്തിലൂടെ സംവിധായകൻ പറയാനുദ്ദേശിച്ച വിഷയം പ്രേക്ഷകരിലേക്കെത്തണമെന്നില്ല. എവിടെയൊക്കെയോ കണ്ടുമറന്നതൊക്കെ ആവർത്തിച്ച് കാണേണ്ടി വന്ന അവസ്ഥയായി പ്രേക്ഷകർക്ക്‌. കഥാപാത്രങ്ങൾക്ക് അനിയോജ്യരല്ലാത്ത അഭിനേതാക്കളെ അന്വേഷിച്ചു കണ്ടെത്തുന്നതിൽ സംവിധായകനെ സഹായിച്ച ഒരുപറ്റം വിദേശികൾക്ക് പ്രത്യേക നന്ദി. രാഹുൽ രാജ് ഈണമിട്ട പാട്ടുകൾ മികച്ചതായിരുന്നുവെങ്കിലും അവയെല്ലാം അസ്ഥാനത്താണ് സിനിമയിൽ ഉപയോഗിച്ചിരിക്കുന്നത്. ഇന്ത്യയിൽ ചിത്രീകരിച്ച ക്ലൈമാക്സ് കൂടെ കണ്ടതോടെ കുട്ടികളും സ്ത്രീകളുമടക്കം ക്ഷമ നശിച്ചു തിയറ്ററിൽ നിന്നിറങ്ങിപോകുന്ന അവസ്ഥയിലായി സിനിമയുടെ ഗതി.

സാങ്കേതികം:⭐⭐⭐
ലണ്ടനിലെ മനോഹാരിത മുഴുവൻ ഒപ്പിയെടുത്ത അമർജീത് സിംഗ് അഭിനന്ദനം അർഹിക്കുന്നു. ദ്രിശ്യമികവോടെ ചിത്രീകരിച്ച രംഗങ്ങൾ ഓരോന്നും പ്രേക്ഷകന് പുതുമയുള്ള അനുഭവമായിരുന്നു. പാട്ടുകളുടെ ചിത്രീകരണവും ലൊക്കേഷനുകളും അതിമനോഹരമായ കാഴ്ചയായിരുന്നു. മലയാള ഭാഷ സംസാരിക്കാൻ ബുദ്ധിമുട്ടുള്ള അന്യഭാഷ നടീനടന്മാരുടെ ക്ലോസ് അപ്പ് രംഗങ്ങൾ ഒഴിവാക്കാമായിരുന്നു എന്നത് മാത്രമാണ് അമർജീത്തിന്റെ ഛായാഗ്രഹണത്തിൽ പോരായ്മയായി തോന്നിയത്. അച്ചു വിജയനാണ് രംഗങ്ങളുടെ സന്നിവേശം നിർവഹിച്ചത്. വിദേശത്തു ചിത്രീകരിക്കുന്ന പ്രണയകഥകൾ പതിഞ്ഞ താളത്തിൽ മാത്രമേ അവതരിപ്പിക്കാനാവുകയുള്ളു എന്നൊരു നിയമം സിനിമയിലുണ്ടോ? കണ്ടിരിക്കുന്ന ഓരോ പ്രേക്ഷകന്റെയും ക്ഷമ നശിക്കുന്നത്രയും പതുക്കെയാണ് ഈ സിനിമയിലെ രംഗങ്ങൾ. പ്രേക്ഷകർ ഉറങ്ങാതെയിരിക്കുവാൻ വേണ്ടിയാണ് രാഹുൽ രാജിന്റെ വക ശബ്ദകോലാഹലങ്ങൾ കൃത്യമായ ഇടവേളകളിൽ ഉൾപ്പെടുത്തിയിരിക്കുന്നത്. പശ്ചാത്തല സംഗീതം പ്രണയ രംഗങ്ങളിൽ മികവു പുലർത്തി എന്നാൽ മറ്റു ചിലയിടത്തു അരോചകമായി തോന്നി. ശ്വേതാ മോഹൻ പാടിയ “ഒരു വേള” എന്ന പാട്ട് കഥാപശ്ചാത്തലത്തിനു യോജിക്കുന്ന ഒന്നായിരുന്നു. റഫീക്ക് അഹമ്മദിന്റെ വരികൾക്ക് രാഹുൽ രാജ് ഈണമിട്ട 3 പാട്ടുകളാണ് ഈ സിനിമയിലുള്ളത്. കരിഷ്മ ആചാര്യയുടെ വസ്ത്രാലങ്കാരം മികവു പുലർത്തി.

അഭിനയം:⭐⭐
പ്രണയകഥകൾ പ്രമേയമാക്കിയ വിരളം സിനിമകളിലെ നിത്യയൗവനം മെഗാസ്റ്റാർ മമ്മൂട്ടി അഭിനയിച്ചിട്ടുള്ളു. പ്രകാശ് റോയ് എന്ന സമ്പന്നനായ വ്യക്തിയുടെ വേഷം മമ്മൂട്ടി തനതായ ശൈലിയിൽ സ്ഥിരം ഭാവാഭിനയങ്ങളിലൂടെ അവതരിപ്പിച്ചു. ഹിന്ദി സിനിമകളിലൂടെ മലയാളികൾക്ക് സുപരിചിതയായ ഹുമ ഖുറേഷി ആദ്യമായി അഭിനയിക്കുന്ന മലയാള സിനിമയാണ് വൈറ്റ്. മലയാള ഭാഷ സംസാരിക്കുവാൻ അറിയില്ലാത്ത നടിയായിരുന്നിട്ടും റോഷ്ണി എന്ന കഥാപാത്രത്തോട് നൂറു ശതമാനം നീതി പുലർത്തുവാൻ ഹുമ ശ്രമിച്ചിട്ടുണ്ട്. സിനിമയുടെ ഭൂരിഭാഗം രംഗങ്ങളിലും മമ്മൂട്ടിയും ഹുമയുമാണ് ഉള്ളത്. മറ്റു രണ്ടു പ്രധാന കഥാപാത്രങ്ങളായി സിദ്ദിക്കും ശങ്കർ രാമകൃഷ്ണനും ഈ സിനിമയുടെ ഭാഗമാകുന്നുണ്ട്. കെ.പി.എ.സി. ലളിത, സോനാ നായർ, കലാഭവൻ അൻസാർ എന്നിവരും വിദേശികളായ അഭിനേതാക്കളും ഈ സിനിമയിൽ അഭിനയിച്ചിട്ടുണ്ട്.

വാൽക്കഷ്ണം: സമ്പൂർണ്ണ നിരാശ നൽക്കുന്ന സിനിമയാണ് വൈറ്റ്.

സംവിധാനം: ഉദയ് അനന്തൻ
രചന: പ്രവീണ്‍ ബാലകൃഷ്ണൻ, നന്ദിനി വത്സൻ, ഉദയ് അനന്തൻ
നിർമ്മാണം: ജ്യോതി ദേശ്പാണ്ഡെ
ചായാഗ്രഹണം: അമർജീത് സിംഗ്
ചിത്രസന്നിവേശം: അച്ചു വിജയൻ
സംഗീതം: രാഹുൽ രാജ്
ഗാനരചന: റഫീക്ക് അഹമ്മദ്
കലാസംവിധാനം: പ്രദീപ്‌ എം.
വസ്ത്രാലങ്കാരം: കരിഷ്മ ആചാര്യ
ശബ്ദലേഖനം: രാജേഷ്‌ പി.എം.
വിതരണം: ഈറോസ് ഇന്റർനാഷണൽ.

കിസ്മത്ത് – ⭐

ഈ സിനിമയുടെ കിസ്മത്ത് പ്രേക്ഷകർ തീരുമാനിക്കട്ടെ! – ⭐

ഷാനവാസ് കെ.ബാവക്കുട്ടി പൊന്നാനി മുൻസിപ്പൽ കൗൺസിലറായി ജോലി ചെയ്തിരുന്ന കാലഘട്ടത്തിൽ നടന്ന ഒരു യഥാർത്ഥ സംഭവമാണ് കിസ്മത്ത് എന്ന സിനിമയായി പ്രേക്ഷകരുടെ മുൻപിലേക്കെത്തുന്നത്. 28 വയസ്സ് പ്രായമുള്ള ഒരു ദളിത് യുവതിയും 21 വയസ്സുള്ള ഒരു ഇസ്ലാം യുവാവും തമ്മിലുള്ള പ്രണയകഥയാണ് കിസ്മത്ത്. ഷാനവാസ് കെ. ബാവക്കുട്ടി രചനയും സംവിധാനവും നിർവഹിച്ചിരിക്കുന്ന കിസ്മത്തിൽ ഷെയിൻ നിഗം, ശ്രുതി മേനോൻ എന്നിവരാണ് കമിതാക്കളുടെ വേഷത്തിൽ അഭിനയിക്കുന്നത്.

പട്ടം സിനിമയ്ക്ക് വേണ്ടി ഷൈലജയും കളക്ട്ടീവ് ഫേസ് വണിന്റെ ബാനറിൽ രാജിവ് രവിയും സംയുക്തമായി നിർമ്മിച്ചിരിക്കുന്ന കിസ്മത്ത് വിതരണം ചെയ്തിരിക്കുന്നത് ലാൽ ജോസിന്റെ എൽ.ജെ.ഫിലിംസാണ്.

പ്രമേയം: ⭐
നഷ്ടപ്രണയം പ്രമേയമാക്കിയ അന്നയും റസൂലും, എന്ന് നിന്റെ മൊയ്‌ദീൻ എന്നിവ മലയാള സിനിമ പ്രേമികളുടെ മനസ്സിനെ സ്പർശിച്ച സിനിമകളാണ്. മേല്പറഞ്ഞ സിനിമകളുടെ കഥാതന്തു യഥാർത്ഥ സംഭവങ്ങളെ ആസ്പദമാക്കിയായിരുന്നു. അവയെല്ലാം വൻവിജയങ്ങളായപ്പോൾ കുറെ സംവിധായകരും എഴുത്തുകാരും അത്തരത്തിലുള്ള പ്രമേയങ്ങളുടെ പുറകെ അന്വേഷണം തുടങ്ങി. ഷാനവാസ് ബാവക്കുട്ടി എന്ന നവാഗത എഴുത്തുകാരൻ അവരിലൊരാളാണ്. അന്നയും റസൂലും എന്ന സിനിമയുടെ പ്രമേയവും കഥയും ഫോർട്ട്‌ കൊച്ചി പശ്ചാത്തലത്തിൽ നിന്നും പൊന്നാനിയിലേക്കു പറിച്ചുനട്ടു എന്നതല്ലാതെ എഴുത്തുകാരന്റെ കഴിവ് തെളിയിക്കുന്ന ഒന്നും ഈ സിനിമയുടെ പ്രമേയത്തിലോ കഥയിലോ ഇല്ല.നായക കഥാപാത്രമായ ഇർഫാന് നായികയായ അനിതയോട് തോന്നുന്നത് പ്രേമമാണോ അതോ കാമമാണോ എന്നുവരെ സിനിമ കണ്ടിരിക്കുന്ന പ്രേക്ഷകന് സംശയം തോന്നുന്ന രീതിയിലാണ് ഈ സിനിമയുടെ കഥ.

തിരക്കഥ: ⭐
അന്നയും റസൂലും മലയാളത്തിലെ നല്ല പ്രണയ ചിത്രങ്ങളിൽ ഒന്നായി മാറിയത് ഫഹദ് ഫാസിലിന്റെ താരമൂല്യമോ രാജീവ്‌ രവിയുടെ സംവിധാനമികവോ കൊണ്ടല്ല. അതുപോലെ പ്രിഥ്വിരാജിന്റെ പൗരുഷമോ പാർവതിയുടെ സൗന്ദര്യമോ അല്ല എന്ന് നിന്റെ മൊയ്‌ദീൻ മലയാളത്തിലെ ഏറ്റവും മികച്ച നഷ്ടപ്രണയകഥയായി മാറിയത്. കഥയോടും പ്രമേയത്തോടും നീതിപുലർത്തുന്നതും യാഥാർഥ്യത്തോട് ചേർന്നു നിൽക്കുന്നതുമായ കഥാസന്ദർഭങ്ങളും സംഭാഷണങ്ങളും ഉള്ളതുകൊണ്ടാണ്. കഥയുമായി ബന്ധമില്ലായെങ്കിലും കഥ നടക്കുന്ന പശ്ചാത്തലത്തിൽ നടന്നേക്കാവുന്ന കുറെ രംഗങ്ങൾ കുത്തിനിറച്ചതുകൊണ്ടു അവയൊന്നും നല്ല തിരക്കഥകൾ ആകണമെന്നില്ല. കാരണം, പ്രധാന കഥയുമായി ബന്ധമില്ലാത്ത രംഗങ്ങൾ സിനിമയുടെ ദൈർഘ്യം വർദ്ധിപ്പിക്കുമെന്നല്ലാതെ മറ്റൊരു ഗുണവും ചെയ്യുന്നില്ല. രണ്ടു മതത്തിൽ വിശ്വസിക്കുന്ന വ്യക്തികൾ പ്രണയിക്കുമ്പോൾ, അവരുടെ സ്നേഹത്തേക്കാൾ മതത്തിനു പ്രാധാന്യം നൽക്കുന്ന ഒരു സമൂഹത്തിലാണ് നമ്മൾ ഇന്നും ജീവിക്കുന്നത് എന്ന സന്ദേശം പ്രേക്ഷകരിലേക്കെത്തിക്കുവാനാണ് ഷാനവാസ് കെ. ബാവക്കുട്ടി ശ്രമിച്ചത്. മലയാള സിനിമയിൽ കാലാകാലങ്ങളായി ചർച്ച ചെയ്ത മടുത്ത പഴഞ്ചൻ കഥാസന്ദർഭങ്ങളുടെ പുതിയ രീതി എന്നല്ലാതെ മറ്റൊന്നും ഈ തിരക്കഥയെ വിശേഷിപ്പിക്കാനാവില്ല.

സംവിധാനം: ⭐⭐
പതിഞ്ഞ താളത്തിൽ റിയലിസ്റ്റിക്കായി അവതരിപ്പിക്കുന്ന എല്ലാ സിനിമകളും ക്ലാസ്സ്‌ എന്ന വിശേഷണം ലഭിക്കുവാൻ സാധ്യതയുള്ളതുകൊണ്ടാണോ ഈ സിനിമയും മേല്പറഞ്ഞ രീതി സ്വീകരിച്ചത്? കഴമ്പില്ലാത്ത രംഗങ്ങൾ എത്ര റിയലിസ്റ്റിക്കായി അവതരിപ്പിച്ചാലും അതുകണ്ടു ആശ്ചര്യപെടുന്ന വിഡ്ഢികളല്ല മലയാളികൾ എന്ന് സംവിധായകൻ മനസ്സിലാക്കേണ്ടതുണ്ട്. ഷാനവാസ് കെ. ബാവകുട്ടയിൽ കഴിവുള്ള ഒരു എഴുത്തുകാരനും സംവിധായകനുമുണ്ട്. അന്നയും റസൂലും എന്ന സിനിമ പോലൊരു സിനിമയെടുക്കുവാൻ ശ്രമിച്ചതിന് പകരം പുതുമയുള്ള ഒരു വിഷയം കണ്ടെത്തി അവതരിപ്പിച്ചിരുന്നുവെങ്കിൽ മറ്റൊരു രാജീവ്‌ രവിയാകാൻ സാധ്യതയുള്ള വ്യക്തിയാണ് ഷാനവാസ് കെ. ബാവകുട്ടി എന്ന് എത്രയും വേഗം സ്വയം തിരിച്ചറിയട്ടെ എന്ന് ആശംസിക്കുന്നു.

സാങ്കേതികം: ⭐⭐
കിസ്മത്ത് എന്ന സിനിമയെ ചിലരെങ്കിലും ഇഷ്ടപെടുന്നുവെങ്കിൽ അതിനു കാരണം സുഷിൻ ശ്യാം ഒരുക്കിയ പശ്ചാത്തല സംഗീതമാണ്. കമിതാക്കളുടെ പ്രണയ രംഗങ്ങളിൽ നൽകിയിരിക്കുന്ന സംഗീതവും അവർ പിരിയുമ്പോൾ നൽകിയിരിക്കുന്ന സംഗീതവും മനസ്സിനെ സ്പർശിക്കുന്നവയായിരുന്നു. സുഷിൻ തന്നെ ഈണമിട്ട കിസപാതയിൽ എന്ന പാട്ടും, സുമേഷ് പരമേശ്വർ ഈണമിട്ട നിളമണൽതരികളിൽ എന്ന് തുടങ്ങുന്ന പാട്ടും ഇമ്പമുള്ളതായി അനുഭവപെട്ടു. റഫീക്ക് അഹമ്മദ്, അൻവർ അലി, മൊയ്‌ദീൻ വൈദ്യർ എന്നിവരാണ് ഗാനരചയ്താക്കൾ. സുരേഷ് രാജന്റെ വിഷ്വൽസ് മങ്ങിയ കഥാപശ്ചാത്തലം സൃഷ്ടിച്ചു എന്നതല്ലാതെ മറ്റൊരു പുതുമയും നൽകിയില്ല. ബി. അജിത്കുമാർ-ജിതിൻ മനോഹർ എന്നിവരാണ് ഈ സിനിമയിലെ രംഗങ്ങൾ സന്നിവേശം നിർവഹിച്ചത്. ഇഴഞ്ഞു നീങ്ങുന്ന കഥാഗതി പ്രേക്ഷകരെ ബോറടിപ്പിച്ചു എന്നതല്ലാതെ മറ്റൊന്നും പറയുവാനില്ല. ആദ്യ പകുതിയിലെ രംഗങ്ങൾ അനാവശ്യമായി വലിച്ചുനീട്ടി ഒന്നരമണിക്കൂർ എത്തിക്കുവാൻ കഠിന പ്രയത്നം ചെയ്യേണ്ടിവന്നിട്ടുണ്ടാകണം. പ്രമോദ് തോമസ്‌ നിർവഹിച്ച ശബ്ദമിശ്രണം മികവു പുലർത്തി. ചമയവും വസ്ത്രാലങ്കാരവും തുടങ്ങി മറ്റെല്ലാ സാങ്കേതിക വശങ്ങളും സംവിധായകന്റെ അവതരണ രീതിയോട് നീതിപുലർത്തി.

അഭിനയം: ⭐⭐⭐
വിനയ് ഫോർട്ട്‌ എന്ന നടന്റെ അതുജ്വല അഭിനയമാണ് ഈ സിനിമയുടെ പ്രധാന പ്ലസ് പോയിന്റ്. ഒരു പോലീസുകാരനെ അത്രത്തോളം നിരീക്ഷിച്ചിട്ടാണ് അജയ് മേനോൻ എന്ന കഥാപാത്രത്തെ വിനയ് ഫോർട്ട്‌ അവതരിപ്പിച്ചിരിക്കുന്നത്. വിനയ് ഫോർട്ട്‌ അഭിനയിച്ചതിൽ ഏറ്റവും മികച്ചത് എന്ന് വിശേഷിപ്പിക്കാവുന്ന ഒന്നായിരിക്കും ഈ സിനിമയിലെ പോലീസുകാരൻ.അഭിനന്ദനങ്ങൾ! ഷെയിൻ നിഗം തനിക്കാവുന്ന വിധത്തിൽ ഇർഫാൻ എന്ന യുവാവിനെ അവതരിപ്പിച്ചു. പൊന്നാനിയിൽ ജനിച്ചുവളർന്ന ഇർഫാന് ഇടയ്ക്കിടെ സംസാരത്തിൽ കൊച്ചി ഭാഷ വരുന്നത് ഒരു നടനെന്ന രീതിയിൽ ഷെയിനോ ഷാനവാസ് ബാവക്കുട്ടിയോ ശ്രദ്ധിക്കാതെപോയത്‌ പ്രേക്ഷകർ ശ്രദ്ധിച്ചിട്ടുണ്ട്. അനിതയെ മോശമാക്കാതെ അവതരിപ്പിക്കുവാൻ ശ്രുതി മേനോൻ ശ്രമിച്ചിട്ടുണ്ട്. അലൻസിയാർ ലേ, വിജയൻ, സുനിൽ സുഖദ, ജയപ്രകാശ് എന്നിവരും കുറെ പുതുമുഖങ്ങളും അവരവരുടെ കഥാപാത്രങ്ങളോട് നീതിപുലർത്തിയിട്ടുണ്ട്.

വാൽക്കഷ്ണം: അന്നയെ അനിതയാക്കാം, റസൂലിനെ ഇർഫാനാക്കാം, ഫോർട്ട്‌കൊച്ചിയെ പൊന്നാനിയുമാക്കാം. പക്ഷെ, കിസ്മത്ത് ഒരിക്കലും അന്നയും റസൂലുമാകില്ല.

രചന, സംവിധാനം: ഷാനവാസ് കെ.ബാവക്കുട്ടി
നിർമ്മാണം: ഷൈലജ, രാജീവ്‌ രവി
ചായാഗ്രഹണം: സുരേഷ് രാജൻ
ചിത്രസന്നിവേശം: ബി.അജിത്കുമാർ, ജിതിൻ മനോഹർ
സംഗീതം: സുമേഷ് പരമേശ്വർ, ഷമേജ് ശ്രീധർ, സുഷിൻ ശ്യാം
പശ്ചാത്തല സംഗീതം: സുഷിൻ ശ്യാം
ഗാനരചന: റഫീക്ക് അഹമ്മദ്, അൻവർ അലി, മഹാകവി മോയിൻകുട്ടി വൈദ്യർ
ചമയം: ആർ.ജി.വയനാടൻ
വസ്ത്രാലങ്കാരം: മഷർ ഹംസ
കലാസംവിധാനം: നാഗരാജ്
ശബ്ദമിശ്രണം: പ്രമോദ് തോമസ്‌
ശബ്ദലേഖനം: അരുണ്‍ രാമവർമ്മ
വിതരണം: എൽ.ജെ.ഫിലിംസ്.

അനുരാഗ കരിക്കിൻ വെള്ളം – ⭐⭐⭐

image

സ്വാദിഷ്ടമായ പ്രണയ ദാഹശമനി – ⭐⭐⭐

ദൈവത്തിന്റെ സ്വന്തം നാട്ടിലെ കുടുംബങ്ങളിൽ ചുക്കുവെള്ളവും, ജീരകവെള്ളവും, മല്ലിയിലയിട്ട് തളപ്പിച്ച വെള്ളവും ദാഹശമനിയായി ഉപയോഗിക്കാറുണ്ട്. ഔഷധമൂല്യമുള്ള കരിങ്ങാലി വെള്ളവും ജീരക വെള്ളവും ശാരീരിക രോഗങ്ങൾ മാറ്റുവാൻ ഉത്തമമാണ്. പ്രണയ നൈരാശ്യം മൂലമുണ്ടാകുന്ന മനസ്സിന്റെ വേദന എല്ലാ പ്രായത്തിലുള്ളവരെയും കാലാകാലങ്ങളായി ബാധിച്ചു വരുന്നതു മനസ്സിലാക്കിയ ഒരുപിടി സുഹൃത്തുക്കൾ പ്രണയ ദാഹശമനത്തിനായി ഉണ്ടാക്കിയ രുചിയുള്ള സിനിമയാണ് അനുരാഗ കരിക്കിൻ വെള്ളം.

കുടുംബസമേതം ആസ്വദിച്ചിരുന്നു കാണാവുന്ന സിനിമയാണ് നവാഗതനായ ഖാലിദ്‌ റഹ്മാൻ പ്രേക്ഷകർക്ക്‌ നൽകിയിരിക്കുന്നത്. നവീൻ ഭാസ്‌കറിന്റെ തിരക്കഥയും, ജിംഷി ഖാലിദ്‌ ഒരുക്കിയ ഫ്രെയിമുകളും, പ്രശാന്ത്‌ പിള്ളയുടെ പശ്ചാത്തല സംഗീതവും ഈ വെള്ളത്തിന്റെ രുചികൂട്ടുന്നു. ഓഗസ്റ്റ് സിനിമാസിന്റെ ബാനറിൽ ഷാജി നടേശൻ, സന്തോഷ്‌ ശിവൻ, ആര്യ, പ്രിഥ്വിരാജ് സുകുമാരൻ എന്നിവർ ചേർന്നാണ് ഈ സിനിമ നിർമ്മിച്ചിരിക്കുന്നത്.

പ്രമേയം: ⭐⭐⭐
പ്രണയം നമ്മളെ പഠിപ്പിക്കുന്ന ഗുണപാഠങ്ങൾ എന്തൊക്കെയാണ്? ഒരാൾ പ്രണയത്തിലാകുമ്പോൾ അയാളുടെ സ്വഭാവത്തിലും പെരുമാറ്റത്തിലും സംസാരത്തിലും ചിന്തകളിലും മാറ്റങ്ങൾ സംഭവിക്കുമെന്നും, പ്രണയിനിയെ സ്വന്തമാക്കണമെന്ന ലക്ഷ്യത്തിലെത്തുവാൻ സ്വന്തം ജീവിതത്തെ ഗൗരവത്തോടെ കാണുമെന്നുമുള്ള വിഷയങ്ങൾ ലളിതമായ കഥയുടെ രൂപത്തിൽ അവതരിപ്പിച്ച സിനിമയാണ് അനുരാഗ കരിക്കിൻ വെള്ളം. രണ്ടു തലമുറയിലെ വ്യക്തികളുടെ കാഴ്ചപ്പാടിലൂടെ ഒരു കാമുകി അവരെ ഏതൊക്കെ രീതിയിൽ സ്വാധീനിക്കുന്നു എന്നും ഈ സിനിമയിലൂടെ നവീൻ ഭാസ്കർ പറഞ്ഞുതരുന്നു.

തിരക്കഥ: ⭐⭐⭐
മൺസൂൺ മാംഗോസ് എന്ന സിനിമയ്ക്ക് ശേഷം നവീൻ ഭാസ്കർ രചന നിർവഹിച്ചിരിക്കുന്ന സിനിമയാണിത്. പ്രണയത്തിലായിരുന്ന പുതു തലമുറയിൽപ്പെട്ട ഒരു വ്യക്തി കാമുകിയുടെ സന്തോഷങ്ങൾക്കും വികാരങ്ങൾക്കും വിലകല്പിക്കാതെ ആ പ്രണയം നഷ്ടപെടുത്തുമ്പോൾ, മറുവശത്ത് പഴയ തലമുറയിൽപെട്ടയാൾ അയാളുടെ നഷ്ട പ്രണയത്തെ വീണ്ടും സ്വന്തമാക്കുവാൻ ശ്രമിക്കുന്നു. ഇരുവരുടെയും സ്വഭാവത്തിൽ പ്രണയംമൂലമുണ്ടാകുന്ന മാറ്റങ്ങൾ റിയലസ്റ്റികായി അവതരിപ്പിച്ചിരിക്കുന്നു. പള്ളി സെമിത്തേരിയിൽ നടക്കുന്ന രംഗമൊഴികെ മറ്റെല്ലാ രംഗങ്ങളും നൂറു ശതമാനം വിശ്വസനീയതയോടെ കഥാസന്ദർഭങ്ങളാക്കിയിരിക്കുന്നു. ഹാസ്യത്തിന് വേണ്ടി എഴുതപെട്ട സംഭാഷങ്ങണളോ ദ്വയാർത്ഥ ഡയലോഗുകളോ ഒന്നുമില്ലാത്ത തിരക്കഥയാണ് നവീൻ ഭാസ്‌ക്കർ എഴുതിയിരിക്കുന്നത്. മൺസൂൺ മാംഗോസിലൂടെ നിരാശപ്പെടുത്തിയ നവീൻ ഭാസ്ക്കറിന്റെ ശക്തമായ തിരിച്ചുവരാവാകട്ടെ ഈ സിനിമ.

സംവിധാനം: ⭐⭐⭐
ഖാലിദ്‌ റഹ്മാൻ ഒരു നവാഗതനാണെന്നു തോന്നാത്ത രീതിയിലാണ് ആദ്യ സിനിമ സംവിധാനം ചെയ്തിരിക്കുന്നത്. കേരളത്തിലെ ശരാശരി കുടുംബങ്ങളിലെ കാഴ്ചകൾ റിയാസിലസ്റ്റിക്കായി അവതരിപ്പിക്കുവാൻ ഖാലിദിന് സാധിച്ചു. അതുപോലെ കഥാപാത്രങ്ങൾക്ക് അനിയോജ്യരായ നടീനടന്മാരെ കണ്ടെത്തി അഭിനയിപ്പിച്ചു എന്നതും അഭിനന്ദനം അർഹിക്കുന്നു കാര്യമാണ്. ലളിതമായ രീതിയിൽ ഏച്ചുകെട്ടലുകളില്ലാതെ രസകരമായി കോർത്തിണക്കിയ രംഗങ്ങളും അവയ്ക്ക് അനിയോജ്യമായ പശ്ചാത്തല സംഗീതവും പ്രേക്ഷകർ ഏറെ ആസ്വദിച്ചു. സിനിമയിലുടനീളം ചിലയിടങ്ങളിലായി ഇഴച്ചിൽ അനുഭവപെട്ടു എന്നതൊഴികെ സംവിധാനത്തിൽ കഴിവ് തെളിയിക്കുവാൻ ഖാലിദ്‌ റഹ്മാന് കഴിഞ്ഞിട്ടുണ്ട്.

സാങ്കേതികം: ⭐⭐⭐
ഷൈജു ഖാലിദിന്റെ സഹോദരൻ ജിംഷി ഖാലിദാണ് ഈ സിനിമയുടെ രംഗങ്ങൾ ചിത്രീകരിച്ചിരിക്കുന്നത്. ക്യാമറ ഗിമ്മിക്‌സൊന്നും ഉപയോഗിക്കാതെ പ്രേക്ഷകർക്ക്‌ റിലേറ്റ് ചെയ്യാനാവുന്ന രീതിയിലുള്ള ലൊക്കേഷനുകളും ഫ്രയിമുകളുമാണ് ഈ സിനിമയിലുടനീളമുള്ളത്. പുതുമുഖം നൗഫൽ അബ്ദുള്ള കോർത്തിണക്കിയ രംഗങ്ങൾ സിനിമയുടെ വേഗതയെ നിയന്ത്രിക്കുന്നതായിരുന്നു. ചിലയിടങ്ങളിൽ വേഗതയോടെയും മറ്റുചിലയിടങ്ങളിൽ ഇഴഞ്ഞുനീങ്ങുന്ന അവസ്ഥയിലുമാണ് ചിത്രസന്നിവേശം നിർവഹിച്ചിരിക്കുന്നത്. പ്രശാന്ത്‌ പിള്ളയുടെ പശ്ചാത്തല സംഗീതം ഈ സിനിമയുടെ നെടുംതൂണായി നിലകൊള്ളുന്നു. ഓരോ രംഗങ്ങളും പ്രേക്ഷകരുടെ മനസ്സിൽ ആഴത്തിൽ പതിയുന്നതിന്റെ പ്രധാന കാരണം പശ്ചാത്തല സംഗീതമാണ്. മൂന്ന് പാട്ടുകളും അത്രകണ്ട് ശ്രദ്ധ നേടുന്നില്ല എന്നത് ഒരു പ്രണയകഥ പറയുന്ന സിനിമയെ സംബന്ധിച്ചു പോരായ്മതന്നെയാണ്. ധന്യ ബാലകൃഷ്ണൻ കഥാപാത്രങ്ങൾക്ക് നൽകിയ വേഷങ്ങൾ മികവു പുലർത്തി.

അഭിനയം: ⭐⭐⭐⭐
ബിജു മേനോൻ, ആസിഫ് അലി, രജീഷ വിജയൻ, ആശ ശരത്, സൗബിൻ ഷാഹിർ, ശ്രീനാഥ് ഭാസി, സുധീർ കരമന, മണിയൻപിള്ള രാജു, ഇർഷാദ്, സുധി കോപ്പ, നന്ദിനി, ചിന്നു എന്നിവരാണ് ഈ സിനിമയിലെ പ്രധാന അഭിനേതാക്കൾ. പുതുമുഖം രജീഷ വിജയൻ ആണ് ഈ സിനിമയിലെ താരം. ഇത്രയും രസകരമായും റിയലസ്റ്റിക്കായും ഒരു പുതുമുഖ നടിക്ക് അഭിനയിക്കാനറിയുമെങ്കിൽ മലയാള സിനിമയിലെ ഒരുപിടി നല്ല കഥാപാത്രങ്ങൾ രജീഷയെ തേടിയെത്തുമെന്നുറപ്പ്. പരുക്കനായ പോലീസ് ഉദ്യോഗസ്ഥനിൽ നിന്ന് ശാന്തനായ അച്ഛനായി മാറിയ രഘു എന്ന കഥാപാത്രത്തെ ബിജു മേനോൻ മികച്ച രീതിയിൽ അവതരിപ്പിച്ചു. ഇന്നത്തെ തലമുറയെ പ്രതിനിധികരിക്കുന്ന കഥാപാത്രങ്ങളായി ആസിഫ് അലിയും, സൗബിൻ ഷാഹിറും, ശ്രീനാഥ് ഭാസിയും അവരവരുടെ കഥാപാത്രങ്ങളെ ഭംഗിയായി അവതരിപ്പിച്ചിരിക്കുന്നു. ആശ ശരത്തും, സുധീർ കരമനയും, മണിയൻപിള്ള രാജുവും, ഇർഷാദും നല്ല നടീനടന്മാരാണെന്നു വീണ്ടും തെളിയിക്കുന്നു.

വാൽക്കഷ്ണം: കുടുംബസമേതം കണ്ടുരസിക്കാം ഓർത്തുസുഖിക്കാം രുചിച്ചുനോക്കാം ഈ അനുരാഗ കരിക്കിൻ വെള്ളം.

സംവിധാനം: ഖാലിദ്‌ റഹ്മാൻ
നിർമ്മാണം: ഓഗസ്റ്റ് സിനിമ
രചന: നവീൻ ഭാസ്കർ
ചായാഗ്രഹണം: ജിംഷി ഖാലിദ്
ചിത്രസന്നിവേശം: നൗഫൽ അബ്ദുള്ള
സംഗീതം: പ്രശാന്ത്‌ പിള്ള
ഗാനരചന: ബി.കെ.ഹരിനാരായണൻ, ശബരീഷ് വർമ്മ
കലാസംവിധാനം: സാബു മോഹൻ
വസ്ത്രാലങ്കാരം: ധന്യ ബാലകൃഷ്ണൻ
മേക്കപ്പ്: റോണക്സ്‌ സേവ്യർ
ശബ്ദനിയന്ത്രണം: രാധാകൃഷ്ണൻ
വിതരണം: ഓഗസ്റ്റ് സിനിമ റിലീസ്.