രാമന്റെ ഏദൻതോട്ടം – ⭐⭐


ബന്ധനങ്ങളുടെ ഏദൻതോട്ടം! – ⭐⭐

അനർവചനീയ അനുഭൂതി നൽകുന്ന ഒന്നാണ് പ്രണയം. ഓരോരുത്തർക്കും പ്രണയം തോന്നുന്നത് ജീവിതത്തിലെ ഓരോ കാലഘട്ടത്തിലാകും അതിനു പല കരണങ്ങളുമുണ്ടാകും. പ്രണയത്തിനു പല മുഖങ്ങളുമുണ്ടാകും. ചിലർക്കത് ദിവ്യപ്രണയമാകാം മറ്റുചിലർക്ക് കാമമാകാം. പ്രണയിക്കുന്നയാളിനെ ഒരിക്കലും സ്വന്തമാക്കുവാൻ സാധിക്കുകയില്ല എന്ന തിരിച്ചറിവ് സ്വയം തോന്നുന്ന നിമിഷങ്ങളിലാകും അയാളോടുള്ള പ്രണയം ഏറ്റവും തീവ്രമാകുന്നത്. ചിലർ അതിനു പുറകെ പോകുന്നവരാകും മറ്റുചിലർ അതിനെ ഉള്ളിലൊതുക്കും വേറെചിലർ അതിനെ പറയാതെ പറയുന്ന പ്രണയമെന്നോ സൗഹൃദമെന്നോ വിശേഷിപ്പിക്കും. രാമന്റെ ഏദൻതോട്ടം എന്ന സിനിമ ചർച്ചചെയ്യുന്ന വിഷയവും പ്രണയത്തിന്റെ പലതലങ്ങളാണ്.

ഡ്രീംസ് ആൻഡ് ബിയോണ്ടിന്റെ ബാനറിൽ രഞ്ജിത്ത് ശങ്കർ നിർമ്മിച്ച്, അദ്ദേഹം തന്നെ എഴുതി സംവിധാനം നിർവഹിച്ച രാമന്റെ ഏദൻതോട്ടം വിതരണം ചെയ്തിരിക്കുന്നത് സെൻട്രൽ പിക്ചേഴ്സ്സാണ്. രാമനായി കുഞ്ചാക്കോ ബോബനും, മാലിനിയായി അനു സിത്താരയും, എൽവിസ്സായി ജോജു ജോർജ്ജും വർമ്മാജിയായി രമേശ് പിഷാരടിയും സലീമായി ശ്രീജിത്ത് രവിയും അഭിനയിച്ചിരിക്കുന്നു.

പ്രമേയം: ⭐⭐
പ്രണയത്തിന്റെയും സൗഹൃദത്തിന്റെയും ഇതുവരെ കാണാത്ത മുഖങ്ങളായിരുന്നു പത്മരാജന്റെ തൂവാനത്തുമ്പികളും കമലിന്റെ മേഘമൽഹാറും ശ്യാമപ്രസാദിന്റെ ഒരേ കടലും ബ്ലെസ്സിയുടെ പ്രണയവും നമുക്ക് സമ്മാനിച്ചത്. രഞ്ജിത്ത് ശങ്കറിന്റെ രാമന്റെ ഏദൻതോട്ടവും മേല്പറഞ്ഞ സിനിമകൾ പോലെ പ്രണയത്തിന്റെ വേറിട്ട മുഖം വരച്ചുകാട്ടുന്നു. രാമനും മാലിനിക്കും എൽവിസിനും വർമ്മാജിക്കും സലീമിനും ശത്രുഘ്‌നനും തുടങ്ങി രാമന്റെ ഏദൻതോട്ടത്തിലെ ഓരോ അതിഥികളും പ്രണയം പ്രകടിപ്പിക്കുന്നത് ഓരോ രീതിയിലാണ്. വിവാഹേതര ബന്ധത്തെ അവിഹിതമെന്നു വിളിക്കുന്നവരുമുണ്ട് സൗഹൃദമെന്നു വിളിക്കുന്നവരുമുണ്ട്. ഓരോ വ്യക്തികളുടെയും കാഴ്ചപ്പാടുകളെ ആശ്രയിച്ച ഒന്നായിരിക്കും അത്തരത്തിലുള്ള സൗഹൃദങ്ങൾ. അതിർവരമ്പുകൾ ലംഘിക്കാത്ത വിവാഹേതര സൗഹൃദങ്ങളെ സമൂഹം എങ്ങനെ നോക്കിക്കാണുമെന്നും ഈ സിനിമയിൽ വിഷയമാകുന്നു. കുടുംബ ബന്ധം തകരാതിരിക്കുവാനും കുട്ടികളുടെ ഭാവിയും സുരക്ഷയും ഓർത്തുകൊണ്ട് എല്ലാം സഹിച്ചു ആൺമേധാവിത്വത്തിനു മുമ്പിൽ എപ്പോഴും തോറ്റുകൊടുക്കുന്നതിനു പകരം സ്ത്രീകൾ പ്രതികരിക്കണമെന്നും സ്വയം പ്രാപ്തി നേടണമെന്ന പ്രമേയവും ഈ സിനിമയിൽ ചർച്ചാവിഷയമാകുന്നുണ്ട്. സ്ത്രീ സ്വാതന്ത്ര്യം, സ്വപ്നസാക്ഷാത്കാരം തുടങ്ങിയവയും കഥാസന്ദർഭങ്ങളിൽ വന്നുപോകുന്നുണ്ട്. പറഞ്ഞുപഴകിയ പ്രമേയമാണെങ്കിലും കേരളത്തിലെ കുടുംബ പ്രേക്ഷകർക്ക് എന്നും കണ്ടിരിക്കാൻ രസമുള്ള വിഷയമാണ് മേല്പറഞ്ഞവയെല്ലാം.

തിരക്കഥ: ⭐⭐
നഗരങ്ങളിൽ കാടുകൾ സൃഷ്ടിക്കുക എന്ന ആശയം സമൂഹത്തിലെത്തിക്കുന്ന അക്കീര മിയാവാക്കി എന്ന പ്രകൃതിസ്നേഹിയെ പോലെയൊരാളാണ് രാമൻ. അയാളുടെ ഏദൻതോട്ടത്തിൽ അതിഥിയായി എത്തുന്നു നർത്തകി കൂടിയായ മാലിനി. ആൺമേധാവിത്വത്തിനു അടിമയായി ജീവിക്കുന്ന മാലിനിയെ ജീവിതത്തിലെ സ്വപ്ങ്ങൾ യാഥാർഥ്യമാക്കുവാൻ രാമൻ പ്രചോദനം നൽകുന്നു. അതോടെ ഇരുവരും സൗഹൃദത്തിലാകുന്നു. രഞ്ജിത്ത് ശങ്കർ എന്ന എഴുത്തുകാരന്റെ രചനാപാടവം പ്രതിഫലിച്ച കഥാസന്ദർഭങ്ങളായിരുന്നു അവയെല്ലാം. എന്നാൽ, ആ സൗഹൃദം മറ്റൊരു തലത്തിലേക്ക് സഞ്ചരിക്കേണ്ട ആവശ്യകതയുണ്ടോ എന്ന ആശയക്കുഴപ്പത്തിലായി രഞ്ജിത്ത് ശങ്കർ എന്ന തിരക്കഥാകൃത്ത്. സൗഹൃദമാണോ പ്രണയമാണോ എന്ന നിർവചിക്കാൻ സാധിക്കാത്ത തരത്തിലായി പിന്നീടുള്ള കഥാസന്ദർഭങ്ങൾ. മാലിനിയും രാമനും തമ്മിലുള്ള ബന്ധമെന്താണ് എന്ന കഥാസന്ദർഭങ്ങളിലൂടെ അവതരിപ്പിക്കുവാൻ രഞ്ജിത്ത് ശങ്കറിന് കഴിഞ്ഞില്ല. രാമന്റെയും മാലിനിയുടെയും കഥാപാത്രങ്ങളുടെ സ്വഭാവം ഓരോ അവസരത്തിലും ഓരോ രീതിയിലായി തോന്നി. അവർ തമ്മിലുള്ള സംഭാഷങ്ങളിൽ ഉടനീളം നാടകീയത നിറഞ്ഞുനിന്നിരുന്നു. ഒരേ ചിന്താഗതിയുള്ള രാമന്റെയും മാലിനിയുടെയും അപൂർവ സൗഹൃദം കാണുവാൻ പ്രതീക്ഷിച്ച പ്രേക്ഷകരെ നിരാശപ്പെടുത്തുന്ന കഥാഗതിയായിരുന്നു സിനിമയുടേത്. വിവാഹേതര സൗഹൃദത്തിൽ നിലയുറപ്പിക്കുന്നതിനു പകരം പല ഉപവിഷയങ്ങളിലേക്കും കഥാകൃത്ത് പ്രേക്ഷകരെ കൊണ്ടുചെന്നത് അവരെ ആശയകുഴപ്പത്തിലാക്കി. ഈ കുറവുകളൊക്കെയുണ്ടെങ്കിലും ഇന്നത്തെ കുടുംബങ്ങൾ തീർച്ചയായും കണ്ടിരിക്കേണ്ട കുറെ രംഗങ്ങൾ ഈ സിനിമയിലുണ്ട്.

സംവിധാനം: ⭐⭐⭐
പാസഞ്ചർ മുതൽ പ്രേതം വരെ ഒന്നിനൊന്നു വ്യത്യസ്ത സിനിമകൾ സംവിധാനം ചെയ്ത രഞ്ജിത്ത് ശങ്കർ പരീക്ഷിക്കാത്ത ഒരു പ്രമേയമാണ് രാമന്റെ എദൻതോട്ടം. ഇന്നത്തെ കുടുംബങ്ങളിൽ നടന്നുകൊണ്ടിരിക്കുന്ന സംഭവങ്ങൾ റിയലസ്റ്റിക്കായി അവതരിപ്പിക്കുവാൻ രഞ്ജിത്ത് ശങ്കർ പരമാവധി ശ്രമിച്ചിട്ടുണ്ട്. കഥാപാത്രങ്ങൾക്ക് അനിയോജ്യരായ നടീനടമാരെ കണ്ടെത്തുന്നതിൽ വിജയിച്ചു. കുഞ്ചാക്കോ ബോബന് സമീപകാലത്തു ലഭിച്ച ഏറ്റവും മികച്ച കഥാപാത്രമാണ് രാമൻ. മാലിനിയായി പലവരുടെയും മുഖം ഓർമ്മവരുമെങ്കിലും അനു സിത്താരയാണ് ഏറ്റവും അനിയോജ്യമെന്നു സിനിമ കാണുമ്പോൾ ബോധ്യമാകും. ഒഴുക്കൻ മട്ടിലുള്ള അവതരണമാണ് ഈ സിനിമയ്ക്ക് അനിയോജ്യം എന്ന് മനസ്സിലാക്കിയ രഞ്ജിത്ത് ശങ്കർ ആസ്വാദനത്തിനു വേണ്ടിയുള്ള ചേരുവകളായ നർമ്മവും പാട്ടുകളും കൃത്യതയോടെ ചേർക്കുവാൻ മറന്നില്ല. വി. സാജന്റെ സന്നിവേശവും മധു നീലകണ്ഠന്റെ വിഷ്വൽസും അതിനു സംവിധായകനെ സഹായിച്ചു. പതിഞ്ഞ താളത്തിലുള്ള പ്രണയകഥകൾ ഇഷ്ടപെടുന്ന പ്രേക്ഷകർക്ക് ഒരുതവണ കണ്ടിരിക്കാം ഏദൻതോട്ടത്തിലെ കാഴ്ച്ചകൾ. അശ്രദ്ധയോടെയാണ് പല രംഗങ്ങളിലെയും ഡബ്ബിങ് നിർവഹിച്ചത്. ജോജുവിന്റെയും രമേശ് പിഷാരടിയുടെയും സംഭാഷണങ്ങൾ പലതും ചിത്രീകരണത്തിന് ശേഷം മാറ്റിയെഴുതിയതായി അനുഭവപെട്ടു. മുൻകാല രഞ്ജിത്ത് ശങ്കർ സിനിമകൾ പ്രതീക്ഷിച്ചു പോകുന്നവർക്ക് നിരാശയാകും ഈ സിനിമ സമ്മാനിക്കുന്നത്.

സാങ്കേതികം: ⭐⭐⭐
മധു നീലകണ്ഠന്റെ അത്യുഗ്രൻ ഛായാഗ്രഹണമാണ് ഏദൻതോട്ടത്തിന്റെ ജീവൻ നിലനിർത്തുന്നത്. ആദ്യപകുതിയിൽ ഏദൻതോട്ടത്തിന്റെ പച്ചപ്പ്‌ മുഴുവൻ ഒപ്പിയെടുക്കുവാനും, ഗൗരവമുള്ള ഒരു വിഷയത്തിലേക്കു കഥ സഞ്ചരിച്ചു തുടങ്ങിയപ്പോൾ റിയാലസ്റ്റിക്കായ ഒരു ഫീൽ നൽകുവാൻ മധു നീലകണ്ഠന് സാധിച്ചു. രാമനും മാലിനിയും ഏദൻതോട്ടത്തിൽ കണ്ടുമുട്ടുന്ന രംഗങ്ങളെല്ലാം മികവാർന്ന രീതിയിൽ ചിത്രീകരിക്കുവാൻ മധു നീലകണ്ഠന് കഴിഞ്ഞു. സന്തോഷ് വർമ്മ എഴുതി ബിജിബാൽ ഈണമിട്ട പാട്ടുകളും ശ്രവ്യസുന്ദരമായിരുന്നു. ശ്രേയ ഘോഷാൽ പാടിയ കാടിന്റെ എന്ന തുടങ്ങുന്ന ഗാനത്തിന്റെ വരികളും സംഗീതവും മികവുറ്റതായിരുന്നു. സിനിമയുടെ വേഗതക്കു അനുസരിച്ചുള്ള പശ്ചാത്തല സംഗീതം നൽകുവാൻ ബിജിബാലിന് കഴിഞ്ഞു. പറയാതെ പറയുന്ന പ്രണയത്തിനു അനുസരിച്ചുള്ള പശ്ചാത്തല സംഗീതം ചിട്ടപ്പെടുത്തുവാൻ ബിജിബാലിന് സാധിച്ചില്ല. വി. സാജന്റെ സന്നിവേശം കഥയുടെ ഒഴിക്കിനനുസരിച്ചുള്ളതായിരുന്നു. കഥയിൽ അനിവാര്യമല്ലാത്ത രംഗങ്ങളോ കഥാപാത്രങ്ങളോ ഈ സിനിമയിലില്ല. അജയ് മാങ്ങാടിന്റെ കലാസംവിധാനത്തിൽ ഏദൻതോട്ടം ഗംഭീരമായി. കുതിരയും നായകുട്ടികളും അന്തേവാസികളായതും മികവുപുലർത്തി. കാടിന്റെ ദൃശ്യഭംഗി വിഷ്വൽസിൽ കണ്ടെങ്കിലും കാട്ടിലെ പക്ഷികളുടെയോ മറ്റു ജീവജാലങ്ങളുടെയോ ശബ്ദങ്ങൾ ഉപയോഗപ്പെടുത്താൻ തപസ് നായകിനായില്ല. അരുൺ മനോഹറിന്റെ വസ്ത്രാലങ്കാരവും ശ്രീജിത്തിന്റെ ചമയവും അനു സിത്താരയെ ശാലീനതയുള്ള ഒരാളായി മാറ്റുന്നതിൽ സഹായിച്ചിട്ടുണ്ട്.

അഭിനയം: ⭐⭐⭐⭐
കുഞ്ചാക്കോ ബോബൻ, അനു സിത്താര, ജോജു ജോർജ്ജ്, രമേശ് പിഷാരടി, അജു വർഗീസ്, ശ്രീജിത്ത് രവി, ഗോപാലൻ, മുത്തുമണി എന്നിവരാണ് ഏദൻതോട്ടത്തിലെ അഭിനേതാക്കൾ. മാലിനിയായി മിതത്വമാർന്ന അഭിനയം കാഴ്ചവെച്ചുകൊണ്ട് അനു സിത്താര ഏവരുടെയും പ്രിയ നായികയായി മാറി. ഒരുപാടു വ്യത്യസ്ത മാനസിക ബുദ്ധിമുട്ടുകൾ അവതരിപ്പിക്കേണ്ട രംഗങ്ങളിൽ അമിതാഭിനയം കാഴ്ചവെയ്ക്കാതെ മാലിനിയെ അവതരിപ്പിച്ചു കയ്യടി നേടി. ചാക്കോച്ചനു ലഭിച്ച അഭിനയ സാധ്യതയുള്ള ഒരു വേഷമായിരുന്നു രാമൻ. രാമന്റെ സങ്കടവും ഒറ്റപ്പെടലും നിസ്സഹയാവസ്ഥയും പ്രണയവുമെല്ലാം മികവോടെ അവതരിപ്പിക്കുവാൻ കുഞ്ചാക്കോ ബോബന് സാധിച്ചു. എല്ലാത്തരം വേഷങ്ങളും തനിക്കുചേരും എന്ന് ജോജു ജോർജ്ജ് തെളിയിച്ചു. കഥാപാത്രത്തിന് ശബ്ദം നൽകിയപ്പോഴുള്ള അശ്രദ്ധ ഒഴിച്ച് നിർത്തിയാൽ മറ്റൊരു കുറവും ജോജുവിന്റെ അഭിനയത്തിനില്ല. ഹാസ്യരസ സംഭാഷണങ്ങളിലൂടെ രമേശ് പിഷാരടി വർമ്മാജി എന്ന കഥാപാത്രത്തെ ഗംഭീരമാക്കി. ശ്രീജിത്ത് രവിയും മുത്തുമണിയും അജു വർഗീസും ഗോപാലനും അവരവരുടെ രംഗങ്ങൾ മോശമാക്കാതെ അവതരിപ്പിച്ചു.

വാൽക്കഷ്ണം: ബന്ധങ്ങളുടെയും ബന്ധനങ്ങളുടെയും ഏദൻതോട്ടത്തിലെ കാഴ്ച്ചകൾ കുടുംബത്തോടൊപ്പം ഒരുവട്ടം കണ്ടിരിക്കാം!

രചന, സംവിധാനം: രഞ്ജിത്ത് ശങ്കർ
നിർമ്മാണം: ഡ്രീംസ് ആൻഡ് ബിയോണ്ട്
ഛായാഗ്രഹണം: മധു നീലകണ്ഠൻ
ചിത്രസന്നിവേശം: വി. സാജൻ
ഗാനരചന: സന്തോഷ് വർമ്മ
സംഗീതം: ബിജിബാൽ
കലാസംവിധാനം: അജയ് മങ്ങാട്
ശബ്ദസംവിധാനം: തപസ് നായക്
ചമയം: ശ്രീജിത്ത് ഗുരുവായൂർ
വസ്ത്രാലങ്കാരം: അരുൺ മനോഹർ
വിതരണം: സെൻട്രൽ പിക്ചേഴ്സ്.

Advertisements

ലക്ഷ്യം – ⭐


അലക്ഷ്യം അവിശ്വസനീയം! – ⭐

രണ്ടു വ്യക്തികൾ രണ്ടു ലക്ഷ്യങ്ങൾ. ഒരാൾക്ക്‌ തന്റെ നിരപരാധിത്വം തെളിയിക്കണമെന്ന ലക്ഷ്യവും മറ്റൊരാൾക്ക് വിലപിടിപ്പുള്ള ഒരു മോഷണ വസ്തു സ്വന്തമാക്കണമെന്ന ലക്ഷ്യവും. ജീത്തു ജോസഫ് എഴുതിയ കഥാസന്ദർഭങ്ങൾ ആകാംഷ ജനിപ്പിക്കുന്നതായിരുന്നുവെങ്കിലും, കഥാഗതി അവിശ്വസനീയമായിരുന്നു. അത്തരത്തിലുള്ള ഒരു കഥയുടെ അലക്ഷ്യമായ അവതരണമാണ് അൻസാർ ഖാൻ സ്വീകരിച്ചത്.

ജീത്തു ജോസഫും, ടെജി മണലേലിലും, ജോയ് തോമസ് ശക്തികുളങ്ങരയും ചേർന്നാണ് ലക്ഷ്യം നിർമ്മിച്ചത്. നവാഗതനായ അൻസാർ ഖാന്റെ കഥയ്ക്ക് തിരക്കഥയും സംഭാഷണങ്ങളും എഴുതിയത് ജീത്തു ജോസഫാണ്. സിനു സിദ്ധാർഥ് ഛായാഗ്രഹണവും, അയൂബ് ഖാൻ സന്നിവേശവും, അനിൽ ജോൺസൺ പശ്ചാത്തലസംഗീതവും നിർവഹിച്ചിരിക്കുന്നു.

പ്രമേയം: ⭐
കൊലപാതകകുറ്റത്തിന് ശിക്ഷ ലഭിച്ച വിമലും മോഷണക്കുറ്റത്തിന് ജയിലടച്ച മുസ്തഫയും പോലീസ് ജീപ്പിൽ സഞ്ചരിച്ചുകൊണ്ടിരിക്കവേ ഒരുപകടം സംഭവിക്കുകയും, ആ ജീപ്പ് കാടിനുള്ളിലെ കൊക്കയിലേക്ക് വീഴുകയും ചെയ്യുന്നു. ഇരുവരെയും ബന്ധിപ്പിക്കുന്ന വിലങ്ങു കൈകളിൽ ഉള്ളതിനാൽ പരസ്പര സഹായത്തോടെ മാത്രമേ ഇരുവർക്കും രക്ഷപെടാൻ സാധിക്കുകയുള്ളു. കൈകളിലുള്ള വിലങ്ങല്ലാത്ത ഇരുവരെയും ബന്ധിപ്പിക്കുന്ന മറ്റൊരു ഘടകം കൂടിയുണ്ട്. ആ ഘടകമാണ് ഈ സിനിമയുടെ സസ്പെൻസ്. അൻസാർ ഖാന്റേതാണ് കഥ.

തിരക്കഥ: ⭐
ഇന്ത്യയിലെ ഒട്ടുമിക്ക ഭാഷകളിലും വാണിജ്യവിജയം നേടിയ സിനിമയാണ് ദൃശ്യം. സിനിമ പ്രേമികളെ ആകാംഷയുടെ മുൾമുനയിൽ നിർത്തിയ സിനിമയാണ് മെമ്മറീസ്. വേറിട്ട സസ്പെൻസിലൂടെ അവതരിപ്പിച്ച ഒന്നായിരുന്നു ഡിറ്റെക്റ്റിവ്. മേല്പറഞ്ഞ മൂന്ന് സിനിമകളും പ്രേക്ഷകർ സ്വീകരിച്ചരിച്ചതിനു കാരണം ജീത്തു ജോസഫിന്റെ രചനാപാടവം ഒന്നുകൊണ്ടു മാത്രമാണ്. വിശ്വസനീയമായ കഥാഗതിയും സസ്പെൻസ് നിലനിർത്തിയിരുന്ന രീതിയുമാണ് മൂന്ന് സിനിമകളുടെയും പ്രത്യേകത. ലക്ഷ്യം എന്ന സിനിമയുടെ തിരക്കഥയിലെ വഴിത്തിരുവുകളിൽ പലതും യുക്തിക്ക് നിരക്കാത്തതായിരുന്നു. ഇന്ദ്രജിത്ത് അവതരിപ്പിച്ച വിമൽ എന്നയാളെ കൊലപാതകിയാണെന്നു കരുതുവാനുള്ള സാഹചര്യ തെളിവുകൾ ഉണ്ടെന്നു പറയപ്പെടുന്നുണ്ടെങ്കിലും, അവയൊന്നും കഴമ്പുള്ളതായിരുന്നില്ല. കാമുകിയുടെ കൂട്ടുകാരികൾക്കു മുഴുവനറിയാവുന്ന ഒന്നായിരുന്നു വിമലിന്റെയും ശാലിനിയുടെയും പ്രണയം. ആ അവസരത്തിൽ ശാലിനിയെ വകവരുത്താൻ വിമൽ ശ്രമിക്കുമെന്ന് ഏവരും കരുതും എന്ന സാഹചര്യം അവിശ്വസനീയമായിരുന്നു. അതുപോലെ, കൊലയാളിയാരാണെന്നു പലതവണ സംശയം തോന്നിപ്പിക്കുന്ന സന്ദർഭങ്ങളിലൂടെ വിമൽ കണ്ടന്നുപോകുന്നുണ്ടെങ്കിലും അവയൊന്നും മനസിലാകാത്ത അത്രയും മന്ദബുദ്ധിയല്ല വിമൽ എന്ന കഥാപാത്രം. മേല്പറഞ്ഞവയാണ് യുക്തിയെ ചോദ്യം ചെയ്യുന്ന ഒന്ന് രണ്ടു കഥാസന്ദർഭങ്ങൾ. സിനിമയുടെ ആദ്യാവസാനം സംഭാഷണങ്ങളിൽ കൃത്രിമത്വം നിറഞ്ഞിരുന്നു. കാമുകിയെ കൊന്നയാളെ കണ്ടുപിടിക്കാൻ സഹായിക്കാൻ സമ്മതിക്കുന്ന മുസ്തഫയോട് വിമൽ വിലപേശുന്ന സംഭാഷണങ്ങൾ തന്നെ ഉദാഹരണം. സിനിമയുടെ ആദ്യപകുതിയുടെ അവസാനമുള്ള സസ്പെൻസും, ക്‌ളൈമാക്‌സിനോട് ചേർന്നുള്ള രണ്ടാമത്തെ സസ്‌പെൻസും നിലനിർത്തിയിരുന്ന രീതി മാത്രമാണ് ഏക ആശ്വാസം. ജീത്തുവിന്റെ ഭാവനയിൽ ഉടലെടുക്കുന്ന മറ്റൊരു ദൃശ്യത്തിനായി കാത്തിരിക്കാം.

സംവിധാനം: ⭐⭐
ജീത്തു ജോസഫിന്റെ സഹായിയിരുന്ന അൻസാർ ഖാന്റെ സംവിധാന രീതിയാണ് ഒരുപരിധിവരെ ലക്ഷ്യം എന്ന സിനിമയെ വ്യത്യസ്തമാക്കുന്നത്. സസ്പെൻസ് നിലനിർത്തിയ രീതി പ്രേക്ഷകരിൽ ആകാംഷ ജനിപ്പിക്കുന്നതായിരുന്നു. ഊഴം എന്ന സിനിമയിലേത് പോലെ നോൺ ലീനിയർ അവതരണമാണ് ഈ സിനിമയിലും. കാടിന്റെ ഭീകരത അവതരിപ്പിക്കാൻ ഗ്രാഫിക്സിന്റെ സഹായത്തോടെ ശ്രമിച്ചിരുന്നുവെങ്കിലും, ആ ശ്രമം പാഴായിപ്പോയി. കരടിയുടെ ആക്രമണത്തിൽ നിന്നും രക്ഷപെടുന്ന രംഗം അതിനുദാഹരണം. രണ്ടു മണിക്കൂറിൽ കൂടാതെയുള്ള കഥയുടെ അവതരണം പ്രേക്ഷകരിൽ ബോറടി സൃഷ്ടിച്ചില്ല. സംവിധായകന്റെ ആദ്യ സിനിമ എന്ന പരിചയക്കുറവ് സിനിമയിലുടനീളം കണ്ടിരുന്നു. എന്നിരുന്നാലും, സസ്പെൻസ് സിനിമകൾ ഇഷ്ടപെടുന്ന പ്രേക്ഷകരെ ത്രിപ്തിപെടുത്തുവാൻ അൻസാർ ഖാന്റെ ലക്ഷ്യത്തിനു സാധിച്ചു എന്ന് കരുതാം.

സാങ്കേതികം: ⭐⭐⭐
കഥയുടെ ഗൗരവം നഷ്ടമാകാതെ കാടിന്റെ വശ്യത മുഴുവൻ ഒപ്പിയെടുത്തുകൊണ്ടു മികച്ച കാഴ്ചകൾ ഒരുക്കിയ ഛായാഗ്രാഹകൻ സിനു സിദ്ധാർഥ് പ്രത്യേക അഭിനന്ദനം അർഹിക്കുന്നു. ടോണി മാക്മിത്ത് നിർവഹിച്ച ഗ്രാഫിക്സ് വേണ്ടത്ര വിശ്വസനീയത നൽകാതിരുന്നത് ഒരുപരിധിവരെ മറച്ചുപിടിക്കാൻ സിനു സിദ്ധാർത്ഥിന്റെ ചായഗ്രഹണത്തിനു കഴിഞ്ഞിട്ടുണ്ട്. അയൂബ് ഖാന്റെ സന്നിവേശം ആദ്യപകുതിയിലെ രംഗങ്ങളെ ത്രസിപ്പിക്കുന്ന രീതിയിലാക്കുവാൻ സഹായിച്ചിട്ടുണ്ട്. ഒരു ഹൃസ്വചിത്രത്തിനു മാത്രം സാധ്യതയുള്ള കഥയെ അധികം വലിച്ചുനീട്ടാതെ രണ്ടുമണിക്കൂറിനുള്ളിൽ അവതരിപ്പിച്ചത് ആസ്വാദനത്തിനു ഗുണകരമായി. മാഫിയ ശശിയും അൻപ് അറിവും ചേർന്ന് സംവിധാനം നിർവഹിച്ച സംഘട്ടന രംഗങ്ങൾ ശരാശരിയിലൊതുങ്ങി. സന്തോഷ് വർമ്മ എഴുതി എം.ജയചന്ദ്രൻ ഈണമിട്ട ഒരേയൊരു ഗാനം മാത്രമാണ് ഈ സിനിമയിലുള്ളത്. അനിൽ ജോൺസൺ നിർവഹിച്ച പശ്ചാത്തല സംഗീതം ശ്രദ്ധ നേടുന്നില്ല. ഹസ്സൻ വണ്ടൂരിന്റെ ചമയം കൃത്രിമത്വം നിറഞ്ഞതായിരുന്നു. ജീപ്പപകടം സംഭവിച്ചപ്പോൾ അതിലുണ്ടായിരുന്ന പോലീസുകാരുടെ മുഖത്തും ദേഹത്തും പരിക്കുകൾ സംഭവിച്ചതായി കണ്ടു. എന്നാൽ, ഇന്ദ്രജിത്തിനും ബിജു മേനോനും പരിക്കുകൾ നെറ്റിയിലും മുഖത്തും മാത്രമായി ഒതുങ്ങി. ലിന്റ ജീത്തുവിന്റെ വസ്ത്രാലങ്കാരം കഥാസന്ദർഭങ്ങൾക്കു അനിയോജ്യമായിരുന്നു.

അഭിനയം: ⭐⭐
വിമൽ എന്ന കഥാപാത്രമായി ഇന്ദ്രജിത്തും മുസ്തഫയായി ബിജു മേനോനും തരക്കേടില്ലാത്ത അഭിനയം കാഴ്ചവെച്ചു. പരുക്കൻ സ്വഭാവമുള്ള ഒരു വ്യക്തിത്വമാണ് വിമലിന്റേത്. സിനിമയിലുടനീളം ആ ഭാവം പ്രകടമാക്കുവാൻ ഇന്ദ്രജിത്തിന് സാധിച്ചു. ആദ്യപകുതിയിൽ ഹാസ്യവും രണ്ടാംപകുതിയിൽ ഗൗരവും ഒരുപോലെ അവതരിപ്പിച്ചു കയ്യടിനേടി മലയാളികളുടെ പ്രിയപ്പെട്ട നായകൻ ബിജു മേനോൻ. ബിജു മേനോന്റെ സംഭാഷണ ശൈലിയാണ് പ്രേക്ഷകരെ ഏറെ രസിപ്പിച്ചത്. ജീപ്പ് മറഞ്ഞു പരുക്കേറ്റവരുടെ കൈകാലുകൾക്ക് പരിക്കൊന്നും സംഭവിച്ചില്ല എന്നത് സംവിധായകൻ പറഞ്ഞുകൊടുത്താൽ മാത്രം ഓർക്കേണ്ട പരിചയസമ്പത്താണോ ഇന്ദ്രജിത്തിനും ബിജു മേനോനും ഉള്ളത് എന്ന സംശയം പ്രേക്ഷകർക്ക് തോന്നിയിട്ടുണ്ടെങ്കിൽ അവരെ തെറ്റുപറയാനാകില്ല. അഭിനയ സാദ്ധ്യതകൾ ഏറെയുള്ള കഥാപാത്രമായിരുന്നു ശിവദയുടേത്. സുധി വാല്മീകത്തിൽ കണ്ട ഊർജ്ജമൊന്നും ശിവദയുടെ അഭിനയത്തിൽ കണ്ടില്ല. ഇവരെ കൂടാതെ കിഷോർ സത്യ, ഷമ്മി തിലകൻ, സുധി കോപ്പ, മഹേഷ്, ടോഷ് ക്രിസ്റ്റി എന്നിവരാണ് ഈ സിനിമയിലെ മറ്റു പ്രധാന അഭിനേതാക്കൾ.

വാൽക്കഷ്ണം: യുക്തിയില്ലാത്ത കഥ, ത്രസിപ്പിക്കാത്ത രംഗങ്ങൾ, അവിശ്വസനീയ കഥാഗതി, ലക്ഷ്യത്തിലെത്താത്തൊരു സിനിമ!

കഥ, സംവിധാനം: അൻസാർ ഖാൻ
തിരക്കഥ, സംഭാഷണം: ജീത്തു ജോസഫ്
നിർമ്മാണം: ജോയ് തോമസ്, ടെജി മണലേൽ, ജീത്തു ജോസഫ്
ഛായാഗ്രഹണം: സിനു സിദ്ധാർഥ്
ചിത്രസന്നിവേശം: അയൂബ് ഖാൻ
സംഗീതം: എം.ജയചന്ദ്രൻ
പശ്ചാത്തല സംഗീതം: അനിൽ ജോൺസൺ
ഗാനരചന: സന്തോഷ് വർമ്മ
കലാസംവിധാനം: എം.ബാവ
സംഘട്ടനം: മാഫിയ ശശി, അൻപ് അറിവ്
ചമയം: ഹസ്സൻ വണ്ടൂർ
വസ്ത്രാലങ്കാരം: ലിന്റ ജീത്തു
ഗ്രാഫിക്സ്: ടോണി മാക്മിത്ത്
വിതരണം: കാസ്, കലാസംഘം, റൈറ്റ് റിലീസ്.

കോമ്രേഡ് ഇൻ അമേരിക്ക – ⭐⭐ 


നിക്കാരഗ്വനാകാശം ഹോണ്ടുറാസ്ഭൂമി മെക്സിക്കൻകടൽ! – ⭐⭐

ദുൽഖർ സൽമാനും ബാഗും യാത്രകളും നവയുഗ സിനിമയിലെ അഭിവാജ്യ ഘടകങ്ങളായിരിക്കുകയാണ്. എ.ബി.സി.ഡി, നീലാകാശം പച്ചക്കടൽ ചുവന്നഭൂമി തുടങ്ങിയ ദുൽഖറിന്റെ ആദ്യകാല സിനിമകൾ മുതൽ ചാർളി വരെയുള്ള സിനിമകളിലെ വിജയഘടഗങ്ങളായി ഉൾപ്പെടുത്തിയവയാണ് ബാഗും യാത്രകളും. എൺപതുകളുടെ മദ്ധ്യത്തിൽ നിർമ്മിക്കപ്പെട്ട സിനിമകളിലെ വിജയഘടകങ്ങളായിരുന്നു മമ്മൂട്ടിയും കുട്ടിയും പെട്ടിയും. തൊണ്ണൂറകളിലെ വിജയ ഫോർമുലയായിരുന്നു മോഹൻലാലും മീശപിരിയും വരിക്കാശ്ശേരി മനയും. അതിനു സമാനമായ ഒന്നായിരിക്കുകയാണ് ദുൽഖറും ബാഗും യാത്രകളും.

അമൽ നീരദ് നിർമ്മിക്കുകയും സംവിധാനം ചെയ്യുകയും ചെയ്ത കോമ്രേഡ് ഇൻ അമേരിക്ക അഥവാ സിയാ എന്ന സിനിമയിലും ദുൽഖർ സൽമാനും ബാഗും യാത്രകളുമാണ് പ്രമേയമാകുന്നത്. ഇടതുപക്ഷ പ്രസ്ഥാനത്തിൽ വിശ്വസിക്കുന്ന അജി മാത്യു എന്ന പാലാക്കാരൻ നസ്രാണി ഒരു കാമുകനാണ്. അയാളുടെ ജീവിതത്തിലെ ഒരു നിർണ്ണായക ഘട്ടത്തിൽ നടത്തേണ്ടിവരുന്ന യാത്രയാണ് അമൽ നീരദ് ഈ സിനിമയിലൂടെ അവതരിപ്പിക്കുന്നത്. സാങ്കേതിക തികവുകൊണ്ടും അഭിനയ മികവുകൊണ്ടും രസകരമായ സംഭാഷണങ്ങളാലും ഒരുവട്ടം കണ്ടിരിക്കാവുന്ന സിനിമയായി കോമ്രേഡ് ഇൻ അമേരിക്കയെ വിലയിരുത്താം.

പ്രമേയം: ⭐⭐
കോമ്രേഡ് ഇൻ അമേരിക്ക എന്ന ടൈറ്റിൽ കേൾക്കുമ്പോൾ ഇതൊരു ഇടതുപക്ഷ രാഷ്ട്രീയ സിനിമയാണോ എന്ന സംശയം ഏവർക്കും തോന്നാം. പോസ്റ്ററുകളിൽ കാണുന്ന ചിത്രങ്ങൾ കണ്ടാൽ ഇതൊരു സ്പോർട്സ് സിനിമയാണെന്നും തോന്നാം. കണ്ണിൽ കണ്ണിൽ എന്ന പാട്ടിന്റെ ചിത്രീകരണം കണ്ടാൽ ഒരു മുഴുനീള പ്രണയകഥയാണോ എന്നും സംശയിക്കുന്നതിൽ തെറ്റില്ല. എന്നാൽ, മേല്പറഞ്ഞ ഘടകങ്ങളൊക്കെയുള്ള ഒരു യാത്രയാണ് ഈ സിനിമയുടെ പ്രമേയം. ഒരു റോഡ് മൂവി എന്നോ ട്രാവൽ മൂവി എന്നോ ഈ സിനിമയെ വിശേഷിപ്പിക്കാം. ഒറ്റവാചകത്തിൽ കേൾക്കുമ്പോൾ പുതുമയുള്ള പ്രമേയം എന്ന തോന്നിപ്പിക്കുമെങ്കിലും, അതിനോട് നീതിപുലർത്തുന്ന കഥയല്ല ഷിബിൻ ഫ്രാൻസിസ് എഴുതിയത്. അമൽ നീരദിന്റെ വിഷ്വൽ മാജിക്കിന് മുമ്പിൽ കഥയ്ക്കെന്തു പ്രസക്തി എന്ന തോന്നലാണോ ഇതിനു പിന്നിൽ?

തിരക്കഥ: ⭐⭐
പാവാട എന്ന സിനിമയ്ക്ക് ശേഷം ഷിബിൻ ഫ്രാൻസിസ് കഥയും തിരക്കഥയും സംഭാഷണങ്ങളും എഴുതിയ സിനിമയാണ് കോമ്രേഡ് ഇൻ അമേരിക്ക. ഇടതുപക്ഷ രാഷ്ട്രീയവും സൗഹൃദവും, അപ്പൻ-മകൻ ആത്മബന്ധവും, പ്രണയവും സമന്വയിപ്പിച്ച ആദ്യപകുതിയിലെ കഥാസന്ദർഭങ്ങൾ അത്യന്തം രസകരമായ സംഭാഷണങ്ങളിലൂടെ എഴുതുവാൻ ഷിബിൻ ഫ്രാൻസീസിന് സാധിച്ചിട്ടുണ്ട്. പാർട്ടി ഓഫീസിലെത്തി സങ്കൽപ്പത്തിലെ ചെഗുവേരയോടും ലെനിനോടും കാൾ മാർക്സിനോടും തന്റെ യാത്രയുടെ കാരണം അജി മാത്യു വിശദീകരിക്കുന്ന രംഗവും സംഭാഷണങ്ങളും മികവുപുലർത്തി. അതുപോലെ, രണ്ടാം പകുതിയുടെ അവസാനമുള്ള അപ്പനുമായുള്ള അജി മാത്യുവിന്റെ ഫോൺ സംഭാഷണങ്ങളും ഹൃദയസ്പർശിയായി എഴുതുയിട്ടുണ്ട്. എന്നാൽ, ആദ്യാവസാനമുള്ള കഥാഗതി പ്രവചിക്കാനായതും അവിശ്വസനീയമായതും സിനിമയുടെ ആസ്വാദനത്തെ സാരമായി ബാധിച്ചിട്ടുണ്ട്. ആദ്യ പകുതിയിലെ കഥാസന്ദർഭങ്ങൾ എല്ലാംതന്നെ കണ്ടുമടുത്തവയാണ്. രണ്ടാം പകുതിയിലെ യാത്രകളിലെ സന്ദർഭങ്ങൾ പുതുമനിറഞ്ഞതായിരുന്നുവെങ്കിലും ഒരല്പം അവിശ്വസനീയവുമായിരുന്നു. യഥാർത്ഥ സംഭവങ്ങളെ ആസ്പദമാക്കിയ തിരക്കഥയായിരുന്നുവെങ്കിലും അവയൊന്നും സിനിമ കണ്ടിരിക്കുന്ന പ്രേക്ഷകർക്ക് ബോധ്യമാകുന്ന രീതിയിൽ തിരക്കഥയിൽ ഉൾപ്പെടുത്തിയിട്ടില്ല. ദുൽഖർ സൽമാൻ ആരാധകരെ തൃപ്തിപ്പെടുത്തുന്ന രസചേരുവകളെല്ലാം ഉള്ളതിനാൽ ഈ സിനിമയും വാണിജ്യവിജയം നേടുവാൻ സാധ്യതയുണ്ട്.

സംവിധാനം: ⭐⭐⭐
കുള്ളന്റെ ഭാര്യ എന്ന ലഘു ചിത്രത്തിലൂടെ ഒന്നിച്ച അമൽ നീരദും ദുൽഖർ സൽമാനും ആദ്യമായിട്ടാണ് ഒരു മുഴുനീള സിനിമയ്ക്ക് വേണ്ടി കൈകോർക്കുന്നത്. ദുൽഖർ സൽമാന്റെ ആരാധകരെ തൃപ്തിപ്പെടുത്തുന്ന എല്ലാ ചേരുവകളും കൃത്യമായി ചേർക്കുവാൻ സംവിധായകൻ മറന്നില്ല എന്നിടത്താണ് ഈ സിനിമ വ്യത്യസ്തമാകുന്നത്. രണദേവ് എന്ന ഛായാഗ്രാഹകന്റെ അത്യുഗ്രൻ വിഷ്വൽസും പ്രവീൺ പ്രഭാകറിന്റെ കൃത്യതയുള്ള സന്നിവേശവും ദുൽഖർ സൽമാൻ എന്ന അഭിനേതാവിന്റെ ഊർജസ്വലമായ അഭിനയവും സിനിമയ്ക്ക് ഒരുപാട് ഗുണം ചെയ്തിട്ടുണ്ട്. അമൽ നീരദ് സിനിമകളിൽ നിന്നും പ്രതീക്ഷിക്കുന്നതെല്ലാം ഈ സിനിമയിലുണ്ട്. പതിവിനു വിപരീതമായി സ്ലോ മോഷൻ രംഗങ്ങൾ ഇല്ലാത്ത ആദ്യ അമൽ നീരദ് സിനിമകൂടിയാണിത്. അമൽ നീരദിന്റെ മുൻകാല സിനിമകളെ അപേക്ഷിച്ചു പരീക്ഷണാർത്ഥത്തിൽ അവതരിപ്പിച്ച രണ്ടാം പകുതിയാണ് ഈ സിനിമയുടേത്. അവിശ്വസനീയമായ ഒരു കഥാപശ്ചാത്തലം അതിലും അവിശ്വസനീയമായ രീതിയിൽ വളരെ ലാഘവത്തോടെ അവതരിപ്പിച്ചപ്പോൾ അത് പ്രേക്ഷകർക്ക് രസിച്ചില്ല. ആസ്വാദനത്തിനുള്ള എല്ലാ ചേരുവകളുമുള്ള ആദ്യ പകുതിയിൽ നിന്ന് ഒട്ടും രസിപ്പിക്കാത്ത രണ്ടാം പകുതിയിലേക്കു കടന്നപ്പോൾ അവയെല്ലാം സിനിമയ്ക്ക് തിരിച്ചടിയായി. രണ്ടാം പകുതിയിലെ രംഗങ്ങൾ ഭീകരത സൃഷ്ടിക്കുമെന്നു സംഭാഷണങ്ങളിലൂടെ പറയുന്നുണ്ടെങ്കിലും അവയൊക്കെ നിസ്സാരമായതുപോലെ പ്രേക്ഷകർക്ക് അനുഭവപെട്ടു. ഒറ്റവാചകത്തിൽ പറഞ്ഞാൽ ഇതൊരു കോമ്രേഡിന്റെ കഥയുമല്ല അമേരിക്കൻ കാഴ്ചകളുമില്ല!

സാങ്കേതികം: ⭐⭐⭐⭐
രണദേവിന്റെ പുത്തനുണർവ് പകരുന്ന ഫ്രയിമുകൾ സിനിമയ്ക്ക് ഗുണകരമായിട്ടുണ്ട്. കോട്ടയത്തിന്റെ ഗ്രാമീണതയും ലാറ്റിൻ അമേരിക്കയുടെ വരണ്ടഭൂമിയും മികവോടെ ചിത്രീകരിക്കുവാൻ രണദേവനായി. എന്നാൽ, രണ്ടാം പകുതിയിലെ രംഗങ്ങൾക്ക് വേണ്ടത്ര തീവ്രത ലഭിച്ചില്ല. ആക്ഷൻ രംഗങ്ങളോ ദുർകടമായ യാത്രകളോ കഥയാവശ്യപെടുന്ന ഭീതിജനിപ്പിക്കാനായില്ല എന്നതുമാത്രമാണ് ഒരു പോരായ്മയായി തോന്നിയത്. പ്രവീൺ പ്രഭാകറിന്റെ സന്നിവേശം കഥയാവശ്യപെടുന്ന വേഗത സിനിമയ്ക്ക് നൽകുവാനായി. കഥയിൽ പ്രാധാന്യമില്ലാത്ത രംഗങ്ങളോ കഥാപാത്രങ്ങളോ സിനിമയിലുണ്ടായിരുന്നില്ല. ഗോപി സുന്ദറാണ് പശ്ചാത്തല സംഗീതവും പാട്ടുകളുടെ സംഗീതവും നിർവഹിച്ചത്. ഗോപി സുന്ദറിന്റെ പശ്ചാത്തല സംഗീതം ചില രംഗങ്ങളിൽ മികവുപുലർത്തി. അജി മാത്യുവിന്റെ രംഗപ്രവേശനത്തിനായി ഉപയോഗിച്ച പശ്ചാത്തല സംഗീതം അതിനുദാഹരണം. റഫീഖ് അഹമ്മദ് എഴുതിയ രണ്ടു പാട്ടുകളിൽ “വാനം തിളതിളയ്ക്കണു” എന്ന മെക്സിക്കൻ പശ്ചാത്തലത്തിലുള്ള ഗാനം മികവുപുലർത്തി. സജി കൊരട്ടിയുടെ ചമയം കഥാപാത്രങ്ങൾക്ക് യോജിച്ചവയായിരുന്നു. രണ്ടാം പകുതിയിലെ യാത്രയ്ക്കിടയിലുള്ളവ പ്രത്യേകിച്ച് മികവുറ്റതായിരുന്നു. ചെഗുവേരയും മാർക്‌സും ലെനിനും സ്റ്റാലിനും അതിഗംഭീരമായി. സമീറ സനീഷിന്റെ വസ്ത്രാലങ്കാരവും കഥാപാത്രങ്ങൾക്ക് യോജിച്ചവയായി. തപസ് നായ്കിന്റെ ശബ്ദസംവിധാനം മോശമായിരുന്നു. അനിൽ അരസ്സ്‌ നിർവഹിച്ച പാലാ ബസ് സ്റ്റാൻഡിൽ ചിത്രീകരിച്ച സംഘട്ടനം ആരാധകരെ മാത്രം തൃപ്തിപ്പെടുത്തുന്നതായിരുന്നു.

അഭിനയം: ⭐⭐⭐
അജി മാത്യു എന്ന സഖാവിനെയും അജി എന്ന കാമുകനെയും അജിപ്പനെന്ന മകനെയും സുഹൃത്തിനെയും കയ്യടക്കത്തോടെ അവതരിപ്പിക്കുവാൻ ദുൽഖർ സൽമാന് സാധിച്ചു. ആരാധകർക്ക് ആവേശമുണർത്തുന്ന ആക്ഷൻ രംഗങ്ങളിലും കൗമാരക്കാർക്ക് ഉണർവ്വ് പകരുന്ന കാമുകനായും ദുൽഖർ തിളങ്ങി. ഈ സിനിമയിലെ ഏറ്റവും മികച്ച അഭിനയം കാഴ്ചവെച്ചത് മാത്യു എന്ന കഥാപാത്രത്തെ അവതരിപ്പിച്ച സിദ്ദിക്കാണ്‌. പാലാക്കാരൻ അച്ചായനായും സ്നേഹമുള്ള അപ്പനായും അഭിനയമികവ് പുലർത്താൻ സിദ്ദിഖിനായി. രസകരമായ അഭിനയം കാഴ്ചവെച്ചു ഏവരെയും ചിരിപ്പിക്കാൻ സൗബിൻ ഷാഹിറിനും ദിലീഷ് പോത്തനും ജോൺ വിജയ്ക്കും സാധിച്ചു. പി.കെ., സ്‌കൂൾ ബസ് എന്നീ സിനിമകളുടെ ഛായാഗ്രാഹകൻ സി.കെ.മുരളീധരന്റെ മകൾ കാർത്തിക മുരളീധരനാണ് ഈ സിനിമയിലെ നായിക. അമേരിക്കൻ മലയാളി പെൺകുട്ടിയെ മോശമാക്കാതെ അവതരിപ്പിക്കുവാൻ കാർത്തികയ്ക്കു സാധിച്ചു. ഇവരെ കൂടാതെ ചാന്ദിനി ശ്രീധരൻ, ജിനു ജോസഫ്, മണിയൻപിള്ള രാജു, സുജിത് ശങ്കർ, അലൻസിയാർ, വി.കെ.ശ്രീരാമൻ, സുമിത് നവൽ, പാർവതി, സുരഭിലക്ഷ്മി എന്നിവരാണ് ഈ സിനിമയിലെ പ്രധാന അഭിനേതാക്കൾ.

വാൽക്കഷ്ണം: എല്ലാത്തരം സിനിമകളും ഇഷ്ടപെടുന്ന പ്രേക്ഷകർക്ക് ഒരുവട്ടം കണ്ടിരിക്കാവുന്ന എന്റർറ്റെയിനറാണ് കോമ്രേഡ് ഇൻ അമേരിക്ക!

നിർമ്മാണം, സംവിധാനം: അമൽ നീരദ്
രചന: ഷിബിൻ ഫ്രാൻസിസ്
ഛായാഗ്രഹണം: രണദേവ്
ചിത്രസന്നിവേശം: പ്രവീൺ പ്രഭാകർ
സംഗീതം: ഗോപി സുന്ദർ
ഗാനരചന: റഫീഖ് അഹമ്മദ്, കരോലിന, മൻസൂർ
കലാസംവിധാനം: പ്രതാപ് രവീന്ദ്രൻ
ചമയം: സജി കൊരട്ടി
വസ്ത്രാലങ്കാരം: സമീറ സനീഷ്
സംഘട്ടനം: അനൽ അരസ്സ്, മാർക്ക്
ശബ്ദസംവിധാനം: തപസ് നായക്
വിതരണം: എ ആൻഡ് എ റിലീസ്.

രക്ഷാധികാരി ബൈജു (ഒപ്പ്) – ⭐⭐⭐


ഗൃഹാതുരത്വ ഓർമ്മകളിലൂടെ ഒരല്പനേരം – ⭐⭐⭐

ഓരോ തലമുറയിലെ കുട്ടികൾക്കും അവരുടേതായ പ്രിയപ്പെട്ട വിനോദങ്ങളുണ്ടാകും. മൊബൈൽ ഫോണും കംപ്യൂട്ടർ ഗെയിമുകളും ഇന്നത്തെ തലമുറയിലെ കുട്ടികൾക്ക് ജീവിതം ആസ്വദിക്കാനുള്ള ഏറ്റവും പ്രധാനപ്പെട്ട വിനോദ ഉപാദികളാണ്. ഒന്നോ രണ്ടോ തലമുറ മുമ്പുള്ള, ഇന്നത്തെ യുവാക്കളായ അന്നത്തെ കുട്ടികൾ സമയം ചിലവഴിച്ചുകൊണ്ടിരുന്നതും ഓരോ വിനോദങ്ങളിൽ ഏർപ്പെട്ടിരുന്നതും പാടത്തും പറമ്പിലും നാട്ടിൻപുറത്തെ കൊച്ചു മൈതാനങ്ങളിലുമായാണ്. കാലമെത്ര കഴിഞ്ഞാലും അവയെല്ലാം ഒരുപിടി മനോഹരമായ ഓർമ്മകളായി എന്നും അവരുടെ ഉള്ളിൽ അവശേഷിക്കുന്നു. അത്തരത്തിലുള്ള കുറെ സുന്ദര നിമിഷങ്ങൾ ഇന്നത്തെ തലമുറയിലെ കുട്ടികൾക്ക് മനസിലാക്കുവാനും പഴയ തലമുറയിലുള്ളവർക്കു അവരുടെ ബാല്യകാലസ്മരണങ്ങൾ ഓർത്തെടുക്കുവാനും സാധിക്കുന്ന സിനിമയാണ് രക്ഷാധികാരി ബൈജു(ഒപ്പ്‌).

റോസ് ഗിറ്റാറിനാൽ എന്ന സിനിമയ്ക്ക് ശേഷം രഞ്ജൻ പ്രമോദ് രചനയും സംവിധാനവും നിർവഹിച്ച സിനിമയാണ് രക്ഷാധികാരി ബൈജു. പുതുമുഖം ടി.എസ് അർജുനാണ് ഈ സിനിമയുടെ കഥ എഴുതിയത്. 100ത് മങ്കി മൂവീസിനു വേണ്ടി അലക്‌സാണ്ടർ മാത്യുവും സതീഷ് കോലവും നിർമ്മിച്ച രക്ഷാധികാരി ബൈജു ഇറോസ് ഇൻറ്റർനാഷണലാണ് വിതരണം ചെയ്തിരിക്കുന്നത്.

പ്രമേയം: ⭐⭐
കേരളത്തിലെ ഏതു കൊച്ചു ഗ്രാമപ്രദേശത്ത് ചെന്നാലും അവിടെയൊക്കെ ബൈജുവിനെ പോലെയുള്ള ആളുകളെ കാണാൻ സാധിക്കും. ആ പ്രദേശത്തുള്ള നിവാസികളൊക്കെ ഏതു പ്രധാനപ്പെട്ട കാര്യത്തിനും സമീപിക്കുന്നത് ബൈജുവിനെ പോലെയുള്ളവരെയായിരിക്കും. അതുപോലെ ഗ്രാമനിവാസികളായ യുവാക്കളും കുട്ടികളും ദിവസേന വൈകുന്നേരങ്ങളിൽ ഒത്തുകൂടുന്ന ഒരു ചായക്കടയോ കവലയോ മൈതാനമോ ഉണ്ടാകും. അവരുടെ ദിനചര്യകളിൽ പ്രത്യേകിച്ചു മാറ്റങ്ങൾ ഒന്നുമുണ്ടാകില്ല. അവിടെയുള്ളവരുടെ വിനോദത്തിനായി ആരംഭിക്കുന്ന ആർട്സ് ആൻഡ് സ്പോർട്സ് ക്ലബ്ബും അതിന്റെ പ്രവർത്തനങ്ങളും കായിക വിനോദങ്ങളും എല്ലാ പ്രദേശങ്ങളിലും കാണപെടുന്നതാണ്. കുമ്പളം എന്ന കൊച്ചുഗ്രാമത്തിൽ ബൈജുവിന്റേയും കൂട്ടരുടെയും നേതൃത്വത്തിൽ തുടങ്ങുന്ന കുമ്പളം ബ്രദേഴ്സ് എന്ന ക്ലബ്ബും കായികവിനോദങ്ങളുടെ കൂട്ടായ്മയ്ക്ക് വേണ്ടിയാണ് ആരംഭിക്കുന്നത്. മേല്പറഞ്ഞ കുമ്പളം ഗ്രാമനിവാസികളുടെയും അവരുടെ ഒരേയൊരു മൈതാനത്തിന്റ രക്ഷാധികാരി ബൈജുവിന്റെയും കഥയാണ് രക്ഷാധികാരി ബൈജു എന്ന സിനിമയിലൂടെ രഞ്ജൻ പ്രമോദ് പറയുന്നത്.

തിരക്കഥ: ⭐⭐⭐⭐
രണ്ടാം ഭാവവും, മീശമാധവനും, മനസ്സിനക്കരയും, നരനും എഴുതിയ രഞ്ജൻ പ്രമോദിന്റെ തൂലികയിൽ പിറന്ന ഗംഭീര തിരക്കഥയാണ് രക്ഷാധികാരി ബൈജു. ഗൃഹാതുരത്വമുണർത്തുന്ന ഒരുപിടി നല്ല മുഹൂർത്തങ്ങൾ അത്യന്തം രസകരമായി കോർത്തിണക്കിയ കഥാസന്ദർഭങ്ങളാണ് സിനിമയുടെ ആദ്യാവസാനം. മഹേഷിന്റെ പ്രതികാരം എന്ന സിനിമയുടെ തിരക്കഥയ്ക്ക് ശേഷം ഇത്രയും ഹൃദയത്തോട് ചേർന്ന് നിന്നെഴുതിയ തിരക്കഥയൊന്നും അടുത്തകാലത്തു മലയാള സിനിമയിൽ കണ്ടിട്ടില്ല. ഹാസ്യത്തിന്റെ മേമ്പൊടിയോടെ ദ്വയാർത്ഥ പ്രയോഗമില്ലാത്ത ശുദ്ധമായ നർമ്മ സംഭാഷണങ്ങളിലൂടെ അവതരിപ്പിച്ച രംഗങ്ങളെല്ലാം പ്രേക്ഷകർ ആസ്വദിച്ചു. ഓരോ കഥാപാത്രങ്ങളുടെയും രൂപീകരണമാണ് തിരക്കഥയുടെ മറ്റൊരു സവിശേഷതയായി തോന്നിയത്. അവരിലെ പലരിലും നമ്മളെ തന്നെ കാണുവാൻ സാധിക്കുമായിരുന്നു. വിശ്വസനീയതയുള്ള സന്ദർഭങ്ങൾ, ഏച്ചുകെട്ടലുകളില്ലാത്ത സംഭാഷണങ്ങൾ, സുപരിചതരായ കഥാപാത്രങ്ങൾ, ഹൃദയസ്പർശിയായ ക്‌ളൈമാക്‌സ് തുടങ്ങിയവയാണ് തിരക്കഥയിലെ പ്രത്യേകതകൾ. കുട്ടിക്കാലം മുതൽ നമുക്ക് ചുറ്റും കണ്ട കാഴ്ചകളെല്ലാം കുട്ടികൾക്കും കുടുംബത്തിനൊപ്പം വീണ്ടും കാണുമ്പോളുള്ള സന്തോഷം പ്രേക്ഷകരിൽ പ്രകടമായിരുന്നു. ഇനിയും ഇതുപോലെ രസകരമായ തിരക്കഥകൾ എഴുതുവാൻ രഞ്ജൻ പ്രമോദിന് കഴിയട്ടെ.

സംവിധാനം: ⭐⭐⭐⭐
കഥാസന്ദർഭങ്ങളുടെ കൃത്രിമത്വമില്ലാത്ത അവതരണമാണ് ഓരോ സിനിമയെയും പ്രേക്ഷകരുടെ പ്രിയപെട്ടതാകുന്നത്. കേരളത്തിലെ നാട്ടിൻപുറങ്ങളിൽ ചെന്നാൽ നേരിൽ കാണുന്ന കാഴ്ചകൾ അതേപടി വിശ്വസനീയമായി അവതരിപ്പിച്ച രഞ്ജൻ പ്രമോദിന്റെ സംവിധാന രീതി പ്രശംസനീയമാണ്. കഥാപശ്ചാത്തലത്തിനു അനിയോജ്യമായ ഒരു ലൊക്കേഷനിൽ ഈ സിനിമ ചിത്രീകരിക്കാനായി എന്നത് കഥയുടെ വിശ്വസനീയതയ്ക്കു ആക്കം കൂട്ടിയിട്ടുണ്ട്. അഭിനേതാക്കളുടെ മിതമാർന്ന പ്രകടനവും, സിങ്ക് സൗണ്ട് ഉപയോഗിച്ചുള്ള സംഭാഷണങ്ങളുടെ റെക്കോർഡിങ്ങും സിനിമയുടെ അവതരണത്തിന് ഗുണം ചെയ്തിട്ടുണ്ട്. ആ ഗ്രാമനിവാസികളുടെ മൈതാനത്തിന്റെ കഥയോടൊപ്പം ബൈജുവിന്റെയും സുഹൃത്തുക്കളുടെയും കുടുംബത്തിലുള്ളവരുടെയും ജീവിതത്തിലെ വിഷമങ്ങളും സന്തോഷങ്ങളും കഷ്ടപ്പാടുകളും പ്രണയവും വിരഹവും കൃത്യമായി സമന്വയിപ്പിച്ചാണ് രഞ്ജൻ പ്രമോദ് അവതരിപ്പിച്ചത്. എൺപതുകളുടെ അവസാനം നിർമ്മിക്കപ്പെട്ടിട്ടുള്ള ചില സത്യൻ അന്തിക്കാട്-ശ്രീനിവാസൻ സിനിമകളെ ഓർമ്മിപ്പിക്കിന്നവിധമാണ് ഈ സിനിമയുടെ അവതരണം. ഒരുപാട് നാളുകൾക്കു ശേഷമുള്ള രഞ്ജൻ പ്രമോദ് എന്ന എഴുത്തുകാരന്റെയും സംവിധായകന്റെയും രണ്ടാംവരവ് ഗംഭീരമായി.

സാങ്കേതികം: ⭐⭐⭐⭐
സിനിമയുടെ ദൈർഘ്യം കഥയാവശ്യപെടുന്നതിലും ഒരല്പം കൂടുതലായിരുന്നു എന്നത് ആസ്വാദനത്തെ ദോഷകരമായി ബാധിച്ചു. സംജിത് മുഹമ്മദ് തന്റെ സ്ഥിരം ശൈലി കൈവിടാതെ സൂക്ഷമമായി രംഗങ്ങൾ കോർത്തിണക്കിയിട്ടുണ്ട്. കഥയിൽ പ്രാധാന്യമില്ലാത്ത ഒന്ന് രണ്ടു കഥാപാത്രങ്ങളെ ഒഴുവാക്കിയിരുന്നുവെങ്കിൽ ദൈർഘ്യം കുറയ്ക്കാമായിരുന്നു. പ്രശാന്ത് രവീന്ദ്രനാണ് രംഗങ്ങൾ ക്യാമറയിൽ പകർത്തിയത്. ഓരോ ഫ്രയിമുകളും നൂറു ശതമാനം വിശ്വസനീയതയോടെയാണ് ചിത്രീകരിച്ചത്. ക്യാമറ ഗിമ്മിക്‌സുകളോ കൃത്രിമത്വ ലൈറ്റുകളോ ഒന്നും ഉപയോഗിക്കാതെ ചിത്രീകരിച്ച ഈ സിനിമയിലെ ഓരോ രംഗങ്ങളും ഹൃദ്യമായിരുന്നു. എടുത്തു പറയേണ്ട പ്രശംസിക്കേണ്ട ഒന്നാണ് ബിജിബാലിന്റെ പശ്ചാത്തല സംഗീതം. ഓരോ കഥാസന്ദർഭങ്ങളോടും ഇഴുകിച്ചേർന്ന പശ്ചാത്തല സംഗീതമായിരുന്നു ബിജിബാൽ ചിട്ടപ്പെടുത്തിയത്. ഹരിനാരായണൻ എഴുതി ബിജിബാൽ ഈണമിട്ട ആകാശം പന്തലുകെട്ടി എന്ന പാട്ടും മികവുറ്റതായിരുന്നു. പ്രമോദ് തോമസാണ് സിങ്ക് സൗണ്ട് രീതിയിലുള്ള ശബ്ദമിശ്രണത്തിനു നേതൃത്വം നൽകിയത്. രംഗങ്ങളുടെ വിശ്വസനീയതയ്ക്കു മാറ്റുകൂട്ടുവാൻ സഹായിച്ച ഘടകങ്ങളിൽ ഒന്നാണ് ചിത്രീകരണത്തിനിടയിലുള്ള ശബ്ദമിശ്രണം. സമീറ സനീഷിന്റെ വസ്ത്രാലങ്കാരം കഥാപാത്രങ്ങൾക്ക് യോജിച്ചവയായിരുന്നു. ശ്രീജിത്ത് ഗുരുവായൂരാണ് ചമയം നിർവഹിച്ചത്.

അഭിനയം: ⭐⭐⭐⭐
ഒരു സിനിമയിലെ എല്ലാ അഭിനേതാക്കളും തനതായ ശൈലിയിൽ അവരവരുടെ കഥാപാത്രങ്ങളെ അവതരിപ്പിക്കുന്നത് വിരളം മാത്രം സംഭവിക്കുന്ന ഒന്നാണ്. ബൈജു എന്ന കഥാപാത്രത്തെ അവതരിപ്പിക്കവാൻ ബിജു മേനോനെയല്ലാതെ മറ്റൊരാളെ സങ്കല്പിക്കാനാകില്ല. അത്രയ്ക്ക് രസകരമായ രീതിയിൽ അലസതയുള്ള ഒരു ചെറുപ്പക്കാരന്റെ കഥാപാത്രം മികവോടെ ബിജു മേനോൻ അവതരിപ്പിച്ചു. മറ്റൊരു മികച്ച അഭിനയം കാഴ്ചവെച്ചത് ഹരീഷ് പെരുമണ്ണയാണ്. അധികം സംഭാഷണങ്ങൾ ഒന്നുമില്ലാത്ത വിനീത് എന്ന ചെറുപ്പക്കാരനെ ഹാസ്യരസമുള്ള ഭാവാഭിനയത്തിലൂടെ ഹരീഷ് അവതരിപ്പിച്ചു. അജു വർഗീസിന്റെ ജോഡിയായി അഭിനയിച്ച പുതുമുഖം ശ്രീകലയുടെ അഭിനയം വളരെ മികച്ചുനിന്നു. മനോജ് എന്ന വേഷത്തിൽ ദീപക് പറമ്പോളും തിളങ്ങി. സ്വതസിദ്ധമായ അഭിനയമാണ് വിജയരാഘവന്റെ അച്ഛൻ കഥാപാത്രത്തെ മികവുറ്റതാക്കിയത്. അജു വർഗീസും ജനാർദ്ദനനും ഇന്ദ്രൻസും അലൻസിയാറും മണികണ്ഠനും ദിലീഷ് പോത്തനും ഹന്നാ റെജിയും അവരവരുടെ കഥാപാത്രങ്ങളെ ഗംഭീരമാക്കി. ഇവരെ കൂടാതെ പത്മരാജ് രതീഷ്, ശശി കലിങ്ക, ആബിദ്, നെബീഷ്, ഹക്കിം, ചേതൻ ലാൽ, മാസ്റ്റർ വിശാൽ, അഞ്ജലി അനീഷ്, ശ്രീധന്യ, അംബിക മോഹൻ, അനഘ എന്നിവരും ഈ സിനിമയിൽ അഭിനയിച്ചിട്ടുണ്ട്. ഏവർക്കും അഭിനന്ദനങ്ങൾ!

വാൽക്കഷ്ണം: ഗൃഹാതുരത്വമുണർത്തുന്ന ഒരുപിടി നല്ല മുഹൂർത്തങ്ങൾ കോർത്തിണക്കിയ കുടുംബചിത്രമാണ് രക്ഷാധികാരി ബൈജു!

രചന, സംവിധാനം: രഞ്ജൻ പ്രമോദ്
കഥ: ടി.എസ്.അർജുൻ
നിർമ്മാണം: അലക്‌സാണ്ടർ മാത്യു, സതീഷ് കോലം
ബാനർ: 100ത് മങ്കി മൂവീസ്
ഛായാഗ്രഹണം: പ്രശാന്ത് രവീന്ദ്രൻ
ചിത്രസന്നിവേശം: സംജിത് മുഹമ്മദ്
ഗാനരചന: ഹരിനാരായണൻ
സംഗീതം: ബിജിബാൽ
കലാസംവിധാനം: അജയ് മാങ്ങാട്
ശബ്ദസംവിധാനം: പ്രമോദ് തോമസ്
ചമയം: ശ്രീജിത്ത് ഗുരുവായൂർ
വസ്ത്രാലങ്കാരം: സമീറ സനീഷ്
വിതരണം: ഇറോസ് ഇൻറ്റർനാഷണൽ.

സത്യ – ⭐


ചിന്തിച്ചില്ലാ…ശെരിക്കും ചിന്തിച്ചില്ലാ! – ⭐

സ്നേഹപ്രകാരമുള്ള മുന്നറിയിപ്പ്!

ഈ സിനിമ കാണാൻ പോകുന്നവർ നിർബന്ധമായും അങ്ങേയറ്റം ക്ഷമയുള്ള സുഹൃത്തുക്കളെ കൂടെ കൂട്ടുക!

ചിന്തിച്ചോ, നിങ്ങൾ ചിന്തിച്ചോ? എന്ന് ഈ സിനിമയിലെ പാട്ടിന്റെ വരികളിലൂടെ ഒരു സൂചന നൽകിയ ഗാനരചയ്താവ് ഹരിനാരായണന്റെ വാക്കുകൾ നിർമ്മാതാവ് ഫിറോസ് സഹീദ് ചെവിക്കൊണ്ടില്ല. ഷെഹ്‌നാസ് സിനിമയ്ക്ക് വേണ്ടി ഫിറോസാണ് സത്യ നിർമ്മിച്ചത്. പ്രതിഭ ഫിലിംസാണ് പ്രദർശനത്തിനെത്തിച്ചത്.

അന്തരിച്ച സംവിധായകൻ ദീപന്റെ ഓർമ്മകൾക്ക് അന്ത്യാഞ്ജലി അർപ്പിച്ചുകൊണ്ടാണ് സത്യ തുടങ്ങുന്നത്. ലീഡർ എന്ന സിനിമയിലൂടെ സംവിധാന രംഗത്തെത്തിയ ഷാജി കൈലാസ് ശിഷ്യനാണ് ദീപൻ. തുടർന്ന്, പുതിയ മുഖം, ഹീറോ, സിം, ഗ്യാങ്സ് ഓഫ് വടക്കുംനാഥൻ, ഡോൾഫിൻസ് എന്നീ സിനിമകളും സംവിധാനം നിർവഹിച്ചു. ദീപന്റെ അവസാന സിനിമയായ സത്യയുടെ രചന നിർവഹിച്ചത് എ.കെ.സാജനാണ്.

പ്രമേയം: ⭐
പ്രത്യേക ലക്ഷ്യങ്ങളുള്ള ചൂതുകളിക്കാരനാണ് സത്യ ക്രിസ്റ്റഫർ. സത്യ തന്റെ ജീവിതത്തിലെ ഒരു നിർണ്ണായക ഘട്ടത്തിൽ റോസി എന്ന അഭിസാരികയെ തേടിയിറങ്ങുന്നതാണ് ഈ സിനിമയുടെ കഥ. റോസിയെ തന്റെ ലക്ഷ്യങ്ങൾക്ക് ഉപയോഗിക്കാൻ സത്യയ്ക്കാകുമോ? ലക്ഷ്യത്തിലെത്തുന്നതിനു വേണ്ടി സത്യ നേരിടുന്ന പ്രതിസന്ധികൾ മറികടക്കാൻ സത്യയ്ക്കു സാധിക്കുമോ? സങ്കീർണ്ണമായ ഈ കഥയെഴുതുന്നതിനിടയിൽ പ്രമേയമൊന്നും രൂപപെടുത്തിയെടുക്കുവാൻ എ.കെ.സാജൻ ശ്രമിച്ചില്ല എന്നത് ആശ്വാസകരം!

തിരക്കഥ: ⭐
ഉദ്യോഗജനകമായ കഥാസന്ദർഭങ്ങളും ആശ്ചര്യപ്പെടുത്തുന്ന കഥാഗതിയും ആകാംഷയുടെ മുൾമുനയിൽ നിർത്തുന്ന ക്‌ളൈമാക്‌സും കഷ്ടപ്പെട്ട് ചിന്തിച്ചു എഴുതിയ എ.കെ.സാജന് പ്രത്യേക പരാമർശം ട്രോളന്മാരുടെ ജ്യൂറി നൽകുവാൻ സാധ്യതയുണ്ട്! മൂത്രശങ്ക തോന്നുന്ന നായികയ്ക്ക് കാര്യം സാധിക്കുവാനായി ബിയർ ബോട്ടിൽ നൽകുക, ബൈക്ക് പൊട്ടിത്തെറിച്ചിട്ടും ഒരു പോറൽപോലും സംഭവിക്കാതെ വില്ലന്മാർ തിരികെയെത്തുക, നൂറു വില്ലന്മാരെ നായകൻ ഇടിച്ചുവീഴ്ത്തുക, കൃത്യമായ ഇടവേളകളിൽ കുത്തിനിറച്ച ഐറ്റെം ഡാൻസുകൾ തുടങ്ങിയവയാണ് ചില ഉദ്യോഗജനക കഥാസന്ദർഭങ്ങൾ. സിനിമ കാണുന്നവരുടെ ആകാംഷ കൂട്ടുവാനായി എഴുതിയ രംഗമാണ് പോലീസ് ഉദ്യോഗസ്ഥനായുള്ള സത്യയുടെ ചീട്ടുകളി. പത്തു മിനിറ്റുകൾക്കുള്ളിൽ ലക്ഷ്യത്തിലെത്തേണ്ട സത്യയെ പോലീസ് ചീട്ടുകളിച്ചു ജയിക്കാൻ വെല്ലുവിളിക്കുന്നു. അവിടെ പാലുകാച്ചൽ ഇവിടെ താലികെട്ട് എന്ന് തോന്നിപ്പിക്കുന്നതായിരുന്നു മേല്പറഞ്ഞ ആ രംഗം. ക്‌ളൈമാക്‌സിൽ പ്രധാന വില്ലനെ കൊല്ലാതെവിടുന്നത് ഈ സിനിമയുടെ രണ്ടാം ഭാഗത്തിന് വേണ്ടിയാണോ എന്ന ആശങ്കയും ഭീതിയും പ്രേക്ഷകരുടെ മുഖത്ത് പ്രകടമായിരുന്നു. കഥാവസാനം ലക്ഷ്യത്തിലെത്തുന്ന നായകന് എല്ലാ സൗഭാഗ്യങ്ങളും ലഭിച്ചു അയാൾ കോടീശ്വരനാകുന്നു. ആ വേദനിക്കുന്ന കോടീശ്വരൻ ഒരു പടുകൂറ്റൻ ചൂത്താട്ടകേന്ദ്രം തുടങ്ങുന്നിടത്തു കഥ അവസാനിക്കുന്നു.

സംവിധാനം: ⭐
ദീപന്റെ മുൻകാല സിനിമകളിൽ നിന്നും വ്യത്യസ്ത അവതരണ രീതിയാണ് സത്യയുടേത്. കഥാഗതിയിലുള്ള വഴിത്തിരിവുകളോ സസ്പെൻസ് നിലനിർത്തിയിരുന്ന രീതിയോ ശ്രദ്ധിക്കാതെ, നായകനെ അതിബുദ്ധിമാനായും അതിമാനുഷികനായും അവതരിപ്പിക്കാൻ ശ്രമിച്ചതാണ് സിനിമയ്ക്ക് ദോഷകരമായത്. നായകനും നായികയും കാറിൽ സഞ്ചരിക്കുന്ന രംഗങ്ങളെല്ലാം ചിത്രീകരിച്ച രീതി കൃത്രിമത്വം നിറഞ്ഞതായിരുന്നു. കഥാപാത്രങ്ങളെ അവതരിപ്പിക്കാൻ തിരഞ്ഞെടുത്ത അഭിനേതാക്കളുടെ കാര്യം പറയേണ്ടതില്ല. അത്രയ്ക്കും പരിതാപകരമായിരുന്നു പലരുടെയും പ്രകടനം. കെട്ടുറപ്പുള്ള ഒരു തിരക്കഥയുടെ അഭാവം ഒരുവശവും കണ്ടുമടുത്ത പഴഞ്ചൻ അവതരണം മറുവശത്തും. സമ്പൂർണ്ണ നിരാശ സമ്മാനിക്കുന്ന സിനിമ എന്നതാണ് ഒറ്റവാചകത്തിൽ ഈ സിനിമയ്ക്ക് നൽക്കാനാവുന്ന വിശേഷണം.

സാങ്കേതികം: ⭐⭐
ട്രോളന്മാർ ആഘോഷമാക്കിയ ഭക്തരതി ഗാനങ്ങളായ ‘ചിലങ്കകൾ’,’ചിന്തിച്ചോ നീ’ എന്നിവ ചിട്ടപ്പെടുത്തിയത് ഗോപി സുന്ദറാണ്. ഹരിനാരായണനും ജിലു ജോസഫുമാണ് ഗാനരചന. ആലാപന മികവുകൊണ്ട് രണ്ടു പാട്ടുകളും കേൾക്കാൻ രസമുള്ളവയാണ് എന്നത് സത്യം. പക്ഷെ, അവ രണ്ടും ഐറ്റെം ഡാൻസിന് ചേരുന്നവയായിരുന്നില്ല. രൗദ്രം എന്ന സിനിമയുടെ പാശ്ചാത്തല സംഗീതം അതേപടി പകർത്തി ജയറാമിന്റെ മാസ്സ് കൂൾ രംഗത്തിനു നൽകിയിട്ടുണ്ട്. സംഘട്ടന രംഗങ്ങൾക്ക് ശബ്ദകോലാഹലങ്ങൾ വേറെയും. ഭരണി കെ. ധരനാണ് ഛായാഗ്രഹണം നിർവഹിച്ചത്. തീർത്തും നിരാശപ്പെടുത്തിയ ഒന്നാണ് ഈ സിനിമയിലെ രംഗങ്ങൾ. റോഡ് മൂവി എന്ന അവകാശവാദത്തോടെ വന്ന ഈ സിനിമയിലെ ഏറ്റവും കൃത്രിമത്വം നിറഞ്ഞതായിരുന്നു റോഡിലെ ഓരോ രംഗങ്ങളും. സംജിത് സന്നിവേശം നിർവഹിച്ച രീതി ഒരല്പം ആശ്വാസകരമായിരുന്നു. സിനിമ രണ്ടു മണിക്കൂറിനുള്ളിൽ അവസാനിപ്പിച്ചതിനു പ്രത്യേക നന്ദി! ആക്ഷൻ സിനിമകൾ ഇഷ്ടമാകുന്ന പ്രേക്ഷകർക്ക് ആസ്വദിക്കാനാവുന്ന സംഘട്ടനങ്ങളാണ് കനൽ കണ്ണൻ ഒരുക്കിയിരിക്കുന്നത്. കല മാസ്റ്ററാണ് നൃത്ത സംവിധാനം. ചിലങ്കകൾ എന്ന ഗാനത്തിന്റെ നൃത്ത സംവിധാനം മികവ് പുലർത്തി. എസ്. ബി. സതീഷാണ് വസ്ത്രാലങ്കാരം. ആക്ഷൻ സിനിമകൾക്ക് യോജിച്ച സെറ്റുകൾ ഒരുക്കുവാൻ ബോബന് സാധിച്ചു.

അഭിനയം: ⭐⭐
നിത്യഹരിത നായകൻ ജയറാമിന്റെ പ്രിയപ്പെട്ട നടനും സുഹൃത്തുമാണ് കമൽഹാസൻ. കമൽഹാസന്റെ ചില കഥാപാത്രങ്ങളെ അനുസ്മരിപ്പിക്കുന്ന രീതിയിലാണ് സത്യ എന്ന കഥാപാത്രം ജയറാം അവതരിപ്പിച്ചത്. സംഭാഷണങ്ങളുടെ ഉച്ചരാണം പോലും കമൽഹാസനെ പോലെയാക്കുവാൻ ജയറാം ശ്രമിച്ചിട്ടുണ്ട്. ഏറെ നാളായി ആക്ഷൻ സിനിമകളിൽ അഭിനയിക്കാതെയിരുന്ന ജയറാം തന്റെ കഴിവ് മുഴുവൻ ഉപയോഗപ്പെടുത്താതെയാണ് ഈ കഥാപാത്രത്തെ അവതരിപ്പിച്ചത്. ജയറാമിനെ കൂടാതെ റോമ, പാർവതി നമ്പ്യാർ, സാജു നവോദയ, രാഹുൽ ദേവ്, രോഹിണി, അനിൽ മുരളി, അജു വർഗീസ്, അബു സലിം, സോഹൻ സീനുലാൽ, മൻരാജ്, നളിനി എന്നിവരാണ് സത്യയിലെ പ്രധാന അഭിനേതാക്കൾ. മേല്പറഞ്ഞതിൽ ഒരാൾപോലും ആത്മാർത്ഥതയോടെ കഥാപാത്രത്തെ അവതരിപ്പിച്ചതായി തോന്നിയില്ല എന്നത് ദുഃഖകരമായ സത്യമാണ്.

വാൽക്കഷ്ണം: സമ്പൂർണ്ണ ചലച്ചിത്ര ദുരന്തമാണ് സത്യ!

സംവിധാനം: ദീപൻ
രചന: എ.കെ.സാജൻ
നിർമ്മാണം: ഫിറോസ് സഹീദ്
ഛായാഗ്രഹണം: ഭരണി കെ.ധരൻ
ചിത്രസന്നിവേശം: സംജിത്
ഗാനരചന: ഹരിനാരായണൻ, ജിലു ജോസഫ്
സംഗീതം: ഗോപി സുന്ദർ
സംഘട്ടനം: കനൽ കണ്ണൻ
നൃത്തസംവിധാനം: കല മാസ്റ്റർ
ചമയം: രതീഷ് അമ്പാടി
കലാസംവിധാനം: ബോബൻ
വസ്ത്രാലങ്കാരം: എസ്.ബി.സതീഷ്
ശബ്ദസംവിധാനം: അജിത് എ.ജോർജ്
എഫറ്റ്‌സ്: മുരുകേഷ്
വിതരണം: പ്രതിഭ ഫിലിംസ്.

സഖാവ് – ⭐⭐⭐


ചങ്കുറപ്പിന്റെ വിപ്ലവ വീരഗാഥ! – ⭐⭐⭐

രാഷ്ട്രീയ പ്രവർത്തനത്തിലൂടെ സാമൂഹിക സേവനത്തിനിറങ്ങുവാൻ ആത്മാർത്ഥമായി ആഗ്രഹിക്കുന്ന നവയുഗ തലമുറ തീർച്ചയായും കണ്ടിരിക്കേണ്ട സിനിമയാണ് സഖാവ്. ഏവർക്കും പ്രജോദനമാകുന്ന പ്രമേയം, എൺപതു-തൊണ്ണൂറ് കാലഘട്ടത്തിന്റെ വിശ്വസനീയമായ അവതരണം, ഏച്ചുകെട്ടലുകളില്ലാത്ത സംഭാഷണങ്ങൾ, ആവേശമുണർത്തുന്ന പശ്ചാത്തല സംഗീതം എന്നിവ സഖാവിന്റെ സവിശേഷതകളിൽ ഉൾപ്പെടുന്നു. മറുപക്ഷം, രണ്ടേമുക്കാൽ മണിക്കൂർ സമയമെടുത്തുള്ള കഥയുടെ അവതരണം ആസ്വാദനത്തിനൊരു കല്ലുകടിയായി അവശേഷിക്കുന്നു.

യൂണിവേഴ്സൽ സിനിമയുടെ ബാനറിൽ ബി.രാകേഷ് നിർമ്മിച്ച സഖാവിന്റെ രചനയും സംവിധാനവും നിർവഹിച്ചത് നടനും നല്ല സിനിമയ്ക്കുള്ള ദേശീയ അംഗീകാരം നേടിയ സിനിമയുടെ സംവിധായകനുമായ സിദ്ധാർഥ് ശിവയാണ്. സഖാവ് കൃഷ്ണൻ, സഖാവ് കൃഷ്ണകുമാർ എന്നീ കഥാപാത്രങ്ങളെയാണ് നിവിൻ പോളി അവതരിപ്പിക്കുന്നത്. ഐശ്വര്യ രാജേഷ്, അപർണ്ണ ഗോപിനാഥ്, ഗായത്രി സുരേഷ് എന്നിവരാണ് ഈ സിനിമയിലെ നായികമാർ.

പ്രമേയം: ⭐⭐⭐
ഒരാളുടെ വ്യക്തിത്വം മറ്റൊരാളുടെ സ്വഭാവത്തിൽ മാറ്റങ്ങൾ സൃഷ്ടിക്കുക എന്ന പ്രമേയം അധികമൊന്നും അവതരിപ്പിക്കാത്ത ഒരിടമാണ് മലയാള സിനിമ. ഇന്നത്തെ തലമുറയിലെ രാഷ്ട്രീയ പ്രവർത്തകർ പലരും രാഷ്ട്രീയ പ്രവർത്തനത്തെ ഒരു തൊഴിലായി മാത്രം കണ്ടുകൊണ്ടാണ് ഓരോ പാർട്ടിയിലും ചേരുന്നത്. അവർക്കൊക്കെ പ്രജോദനമാകേണ്ടത് പഴയ തലമുറയിലെ ശക്തരായ നേതാക്കളുടെ ജീവിതകഥയാണ്. സഖാവ് കൃഷ്ണനെന്ന നേതാവിന്റെ ജീവിതത്തിൽ നടന്ന സംഭവങ്ങൾ നവയുഗ സഖാവായ കൃഷ്ണകുമാറിന്റെ സ്വഭാവത്തെയും ചിന്തകളെയും പ്രവർത്തികളെയും സ്വാധീനിക്കുന്നതാണ് ഈ സിനിമയുടെ കഥ.

തിരക്കഥ: ⭐⭐⭐
ഇന്ത്യയിലെ രാഷ്ട്രീയ പ്രസ്ഥാനങ്ങൾക്ക് ചുക്കാൻ പിടിച്ച നേതാക്കളുടെ ജീവിതകഥ
പുതുതലമറയ്ക്കു അറിയുവാൻ സാധ്യതയില്ല. സഖാവ് ഇ.എം.എസ്. നമ്പൂതിരിപ്പാടും സഖാവ് എ.കെ.ഗോപലനും സഖാവ് കൃഷ്ണപിള്ളയും സഖാവ് ഇ.കെ.നായനാരും കമ്മ്യൂണിസ്റ്റ് പാർട്ടിയുടെ നെടുംതൂണുകളായ നേതാക്കളായിരുന്നു. മുന്നാറിലെ തൊഴിലാളി പ്രശ്നങ്ങൾ പരിഹരിച്ചു തൊഴിലാളി സംഘടനകൾ രൂപപെടുത്തിയെടുത്തതിൽ കമ്മ്യൂണിസ്റ്റ് പാർട്ടിയും നേതാക്കളും നടത്തിയ ഒറ്റയാൾ പോരാട്ടത്തിന്റെ കഥകളൊക്കെ ചരിത്രമാണ്. രോമാഞ്ചമുണർത്തുന്ന ഇത്തരം ചരിത്ര സംഭവങ്ങൾ വിശ്വസനീയമായ കഥാസന്ദർഭങ്ങളിലാക്കി എഴുതുവാൻ സിദ്ധാർഥ് ശിവയ്ക്കു സാധിച്ചു. മേല്പറഞ്ഞ സംഭവങ്ങൾ നവയുഗ തലമുറയിലെ രാഷ്ട്രീയ പ്രവർത്തകർക്ക് പ്രജോദനമാകുന്ന രീതിയിലുള്ള രംഗങ്ങളിലൂടെ കോർത്തിണക്കുവാനും സിദ്ധാർത്ഥ് ശിവയ്ക്കു കഴിഞ്ഞിട്ടുണ്ട്‌. സഖാക്കളേ ആവേശത്തിലാഴ്ത്തുന്ന സംഭാഷണങ്ങൾ എഴുതുന്നതിലും തിരക്കഥാകൃത്തെന്ന നിലയിൽ സിദ്ധാർഥ് ശിവ വിജയിച്ചിട്ടുണ്ട്. ആദ്യ പകുതിയിലെ നർമ്മത്തിന് വേണ്ടി കെട്ടിച്ചമച്ച സംഭാഷണങ്ങൾ ഒഴിവാക്കാമായിരുന്നു. പ്രവചിക്കാനാവുന്ന ഒരു ക്‌ളൈമാക്‌സിൽ സിനിമ അവസാനിച്ചു എന്നത് മാത്രമാണ് പുതുമയില്ലാത്ത തോന്നിയത്.

സംവിധാനം: ⭐⭐
ഉദയായുടെ കൊച്ചൗവ്വ പൗലോ അയ്യപ്പ കൊയ്‌ലോ എന്ന സിനിമയ്ക്ക് ശേഷം സിദ്ധാർഥ് ശിവ സംവിധാനം ചെയ്യുന്ന സിനിമയാണിത്. ചരിത്രം പറയുന്ന സിനിമകൾ പൊതുവെ മന്ദഗതിയിലായിരിക്കും അവതരിപ്പിക്കുക. എന്നാൽ, അത് കണ്ടു മനസ്സിലാക്കാനുള്ള ക്ഷമ ഇന്നത്തെ തലമുറയിലെ പ്രേക്ഷകർക്ക് ഉണ്ടോ എന്നത് ഒരു ചോദ്യമാണ്? സഖാവെന്ന ഈ സിനിമ ഒരു അവധിക്കാലത്താണ് പ്രേക്ഷകരുടെ മുമ്പിലെത്തിയത്. അവധികാലം ആഘോഷിക്കാൻ കുടുംബത്തോടൊപ്പം സിനിമ കാണാൻ ആഗ്രഹിക്കുമ്പോൾ അവരുടെ പ്രതീക്ഷ വാനോളമായിരിക്കും. ആ സന്ദർഭത്തിൽ, മന്ദഗതിയിലുള്ള ഒരു ചരിത്ര സിനിമ മികച്ചതാണെങ്കിൽ കൂടി, അത് എത്രത്തോളം പ്രേക്ഷകരിൽ സ്വാധീനം ചെലുത്തുമെന്നത് വരുംനാളുകളിൽ കണ്ടറിയാം. ഇഴഞ്ഞു നീങ്ങുന്ന രംഗങ്ങൾ എന്നതൊഴിച്ചാൽ മറ്റൊരു കുറവും സഖാവെന്ന സിനിമയിക്കില്ല. ഇന്നത്തെ തലമുറയിലുള്ള സഖാക്കൾക്ക് കണ്ടുപഠിക്കാനുള്ള പലതും ഈ സിനിമയിൽ കഥാസന്ദർഭങ്ങളാകുന്നുണ്ട്. അവയുടെ സത്യസന്ധമായ അവതരണമാണ് സഖാവ് സിനിമയെ മറ്റു രാഷ്ട്രീയ സിനിമകളിൽ നിന്നും വ്യത്യസ്തമാക്കുന്നത്. പഴയ കാലഘട്ടത്തിലെ ഓരോ രംഗങ്ങളും ആവേശമുണർത്തുന്ന രീതിയിൽ സാങ്കേതികമികവോടെ അവതരിപ്പിക്കുവാൻ സംവിധായകന് സാധിച്ചു. ആ സന്ദർഭങ്ങൾ ഇന്നത്തെ സഖാക്കളുടെ പ്രതിനിധിയായ സഖാവ് കൃഷ്ണകുമാറിൽ സ്വാധീനം ചെലുത്തുന്ന രീതിയും പുതുമ ഉള്ളതായിരുന്നു. ആദ്യ പകുതിയിലെ കഥാപാത്രങ്ങളുടെ സ്വഭാവ വിവരണത്തിന് സംവിധായകൻ നൽകിയ സമയം സിനിമയുടെ ദൈർഘ്യത്തെ ഒരുപാട് വർദ്ധിപ്പിച്ചു. സഖാവ് കൃഷ്ണകുമാറിന്റെ സ്വഭാവം ആശുപത്രി രംഗങ്ങളിലൂടെ മാത്രം വിവരിച്ചാൽ പ്രേക്ഷകർക്ക് ഗ്രഹിക്കാവുന്നതേയുള്ളു. അനാവശ്യമായ ഒട്ടനവധി രംഗങ്ങൾ ആദ്യപകുതിയിൽ കുത്തിനിറച്ചതു ദോഷകരമായി സിനിമയെ ബാധിച്ചിട്ടുണ്ട്. എന്നിരുന്നാലും, സിനിമയുടെ പ്രമേയവും കഥയും പുതുമയുള്ളതായതിനാൽ പ്രേക്ഷകർ ഈ സിനിമ സ്വീകരിക്കാനാണ് സാധ്യത.

സാങ്കേതികം: ⭐⭐⭐⭐
ഓരോ രംഗങ്ങൾക്കും മാറ്റുകൂട്ടുന്നു തരത്തിൽ ഊർജം പകരുന്നതായിരുന്നു പ്രശാന്ത് പിള്ളയുടെ പശ്ചാത്തല സംഗീതം. സമരകാലഘട്ടത്തിലെ രംഗങ്ങളുടെ അവസാനം ചുവന്ന കോടി പാറുമ്പോളുള്ള സംഗീതം ഓരോ സഖാവിന്റെ സിരകളിലും രക്തയോട്ടം കൂട്ടുന്നതായിരുന്നു. പ്രശാന്ത് പിള്ള ഈണമിട്ട മധുമതിയേ, ഉദിച്ചുയരുന്നേ എന്നീ പാട്ടുകൾ മികവ് പുലർത്തി. പഴയ കാലഘട്ടത്തിലെ കാഴ്ചകൾ ദൃശ്യമികവോടെയും വിശ്വസനീയതയോടെയും ചിത്രീകരിക്കുവാൻ ജോർജ്ജ് സി. വില്യംസിന് സാധിച്ചു. പീരുമേടിന്റെ പച്ചപ്പ്‌ മുഴുവനും ഒപ്പിയെടുക്കുവാൻ ഛായാഗ്രാഹകന് കഴിഞ്ഞിട്ടുണ്ട്. രാത്രിയിൽ നടക്കുന്ന സംഘട്ടന രംഗങ്ങളിൽ റിയാലസ്റ്റിക്കായ വെളിച്ചം മാത്രം ഉപയോഗിച്ചു ചിത്രീകരിച്ചത് ആ രംഗങ്ങൾക്ക് വിശ്വസനീയത നൽകി. വിനീബ് കൃഷ്ണനാണ് രംഗങ്ങൾ കൂട്ടിയോജിപ്പിച്ചത്. കഥയിൽ പ്രാധാന്യമില്ലാത്ത ആദ്യപകുതിയിലെ രംഗങ്ങൾ ഒഴുവാക്കാമായിരുന്നു. സഖാവ് കൃഷ്ണകുമാറിന്റെ സ്വഭാവ വിവരണം ആശുപത്രിയിലെ രംഗങ്ങളിലൂടെ മാത്രം അവതരിപ്പിക്കാമായിരുന്നു. അതിനു പകരം ഹാസ്യത്തിന് വേണ്ടി കുത്തിനിറച്ച തുടക്കത്തിലേ രംഗങ്ങൾ കഥയിൽ പ്രാധാന്യമില്ലാത്തവയായിരുന്നു. അത് ദൈർഘ്യം വർധിപ്പിച്ചു എന്നല്ലാതെ സിനിമയുടെ ആസ്വാദനത്തിനു ഉപകാരപ്പെട്ടില്ല. എൺപതു കാലഘട്ടം ഒരുക്കുന്നതിൽ കലാസംവിധായകൻ സാബു മോഹൻ വിജയിച്ചു. ഫാക്ടറിയും വാഹനങ്ങളും പെട്ടിക്കടകളും പാർട്ടി ഓഫിസും വിശ്വസനീയമായ രീതിയിലാണ് ഒരുക്കിയിരിക്കുന്നത്. കഥാപാത്രങ്ങൾക്ക് അനിയോജ്യമായ വേഷങ്ങൾ നൽകി ധന്യ ബാലകൃഷ്ണൻ തന്റെ ജോലി കൃത്യതയോടെ നിർവഹിച്ചു. എഴുപതു വയസ്സുകാരനായ സഖാവ് കൃഷ്ണനായി നിവിൻ പോളിയെ മാറ്റുന്നതിനിടയിൽ മറ്റു കഥാപാത്രങ്ങളുടെ ചമയം ശ്രദ്ധിക്കാൻ രഞ്ജിത്ത് അമ്പാടി ശ്രമിച്ചില്ല. അതിനുദാഹരണമാണ് സഖാവ് ജാനകിയുടെ ചമയം. മുഖത്ത് മാത്രം പ്രായം തോന്നിപ്പിക്കുന്ന രീതിയിലായിരുന്നു ഐശ്വര്യ രാജേഷിന്റെ ചമയം. അൻപറിവാണ് സംഘട്ടനങ്ങൾ ഒരുക്കിയത്.

അഭിനയം: ⭐⭐⭐⭐
ചങ്കുറപ്പിന്റെ പ്രതീകമായ സഖാവ് കൃഷ്ണനെന്ന വിപ്ലവ നേതാവിനെ തന്നാലാകുംവിധം പക്വതയോടെ അവതരിപ്പിക്കുവാൻ നിവിൻ പോളി നടത്തിയ പരിശ്രമം അഭിനന്ദനാർഹമാണ്. സഖാവ് കൃഷ്ണകുമാർ എന്ന കൗശലകാരനായ നവയുഗ സഖാവിനെ തന്റെ തനതായ ശൈലിയിൽ നിവിൻ പോളി അവതരിപ്പിച്ചിട്ടുണ്ട്. യശ്ശശരീരനായ അതുല്യ പ്രതിഭ കുതിരവട്ടം പപ്പുവിന്റെ മകൻ ബിനു പപ്പു പ്രഭാകരൻ ഈരാളി എന്ന കഥാപാത്രമായി മികവുറ്റ പ്രകടനം കാഴ്ചവെച്ചു. സഖാവ് ജാനകിയായി ഐശ്വര്യ രാജേഷും, മഹേഷായി അൽത്താഫ് സലീമും, ഡോക്ടറിന്റെ വേഷത്തിൽ ശ്രീനിവാസനും അവരവരുടെ രംഗങ്ങളിൽ അഭിനയമികവ് പുലർത്തി. ഇവരെ കൂടാതെ അപർണ്ണ ഗോപിനാഥ്, ഗായത്രി സുരേഷ്, മുസ്തഫ, സന്തോഷ് കീഴാറ്റൂർ, പി.ബാലചന്ദ്രൻ, സുധീഷ്, പ്രൊഫസ്സർ അലിയാർ, ബൈജു, പ്രേംകുമാർ, ടോണി ലൂക്ക് കോച്ചേരി, സൂരജ് എസ്. കുറുപ്പ്, മണിയൻപിള്ള രാജു, രഞ്ജി പണിക്കർ, വി.കെ.ബൈജു, സംവിധായകൻ വി.കെ.പ്രകാശ്, നിഷാന്ത് സാഗർ, ചാലി പാലാ, കലാഭവൻ റഹ്മാൻ, അഞ്ജലി അനീഷ്, സീമ ജി. നായർ, ശ്രീലക്ഷ്മി, ഷെല്ലി കുമാർ എന്നിവരും ഈ സിനിമയിലെ പ്രധാന കഥാപാത്രങ്ങളെ അവതരിപ്പിച്ചിട്ടുണ്ട്.

വാൽക്കഷ്ണം: ചങ്കുറപ്പുള്ള സഖാക്കളുടെ വിപ്ലവ വീരഗാഥ ക്ഷമയോടെ കണ്ടിരിക്കാമെങ്കിൽ ഈ സിനിമ പ്രേക്ഷകർക്ക്‌ പ്രജോദനമാകുമെന്നുറപ്പ്!

രചന, സംവിധാനം: സിദ്ധാർത്ഥ ശിവ
നിർമ്മാണം: ബി.രാകേഷ്
ബാനർ: യൂണിവേഴ്‌സൽ സിനിമ
ഛായാഗ്രഹണം: ജോർജ് സി. വില്യംസ്
ചിത്രസന്നിവേശം: വിനീബ് കൃഷ്ണൻ
സംഗീതം, പശ്ചാത്തല സംഗീതം: പ്രശാന്ത് പിള്ള
ഗാനരചന: സന്തോഷ് വർമ്മ, ശബരീഷ് വർമ്മ, സൂരജ് എസ്. കുറുപ്പ്, അൻവർ അലി, സിദ്ധാർഥ് ശിവ
കലാസംവിധാനം: സാബു മോഹൻ
ചമയം: രഞ്ജിത്ത് അമ്പാടി
വസ്ത്രാലങ്കാരം: ധന്യ ബാലകൃഷ്ണൻ
സംഘട്ടനം: അൻപറിവ്
വിതരണം: ആന്റോ ജോസഫ്.

പുത്തൻപണം – ⭐


കാസർക്കോടൻ ഷേണായ്: ഒരു തോക്കുനഷ്ടപെട്ടവന്റെ കഥ! – ⭐

അന്ന്, നവംബർ 8നു അഞ്ഞൂറിന്റെയും ആയിരത്തിന്റെയും നോട്ടുകൾ പിൻവലിച്ചുകൊണ്ടു പ്രധാനമന്ത്രി ഏവരെയും ഞെട്ടിച്ചു. ഇന്ന്, ഏപ്രിൽ 12നു പുത്തൻപണം എന്ന സിനിമ പുറത്തിറക്കി രഞ്ജിത്ത് ഏവരെയും ഞെട്ടിച്ചു. ആവേശകരമായ ആദ്യ 20 മിനിറ്റുകൾക്ക് ശേഷം കാറ്റഴിച്ചുവിട്ട ബലൂൺ പോലെ ദിശതെറ്റി സഞ്ചരിച്ചു ഒടുവിൽ മൂക്കുംകുത്തി നിലംപതിച്ച ഒന്നാണ് രഞ്ജിത്തിന്റെ പുത്തൻപണം. സിനിമയുടെ തുടക്കത്തിൽ പടം പുത്തനാണെന്നു തോന്നിപ്പിക്കുമെങ്കിലും, കഥാവസാനം അതൊരു പൂത്തപടമായിരുന്നു എന്ന പ്രേക്ഷകർക്ക് ബോധ്യമാകുന്ന രംഗങ്ങളും അവതരണവുമാണ് രഞ്ജിത്ത് സ്വീകരിച്ചത്. അധികം വൈകാതെ പ്രദർശനശാലകളിൽ നിന്നും പുത്തൻപണം പിൻവലിക്കാനാണ് സാധ്യത.

ത്രീ കളർ സിനിമയുടെ ബാനറിൽ സംവിധായകൻ രഞ്ജിത്ത്, അബാം മൂവീസിന്റെ സാരഥി അബ്രഹാം മാത്യു, നടൻ അരുൺ നാരായണൻ എന്നിവരാണ് പുത്തൻപണം നിർമ്മിച്ചിരിക്കുന്നത്. കഥയും തിരക്കഥയും സംഭാഷണങ്ങളും എഴുതിയത് രഞ്ജിത്താണ്. കാസർകോട് ഭാഷയിലുള്ള കന്നഡ കലർന്ന മലയാള സംഭാഷണങ്ങൾ എഴുതിയിരിക്കുന്നത് ടേക്ക് ഓഫിന്റെ തിരക്കഥാകൃത്തായ പി.വി.ഷാജികുമാറാണ്. ത്രീ കളർ സിനിമ തന്നെയാണ് ഈ സിനിമ കേരളത്തിൽ വിതരണം ചെയ്തിരിക്കുന്നത്.

പ്രമേയം: ⭐⭐
നോട്ടുനിരോധനമുൾപ്പടെ ഒന്നിൽ കൂടുതൽ പ്രമേയങ്ങൾ ചർച്ചചെയ്യുന്ന സിനിമയാണ് പുത്തൻപണം. നോട്ടുനിരോധനം കള്ളപ്പണക്കാരെ പ്രതികൂലമായി ബാധിച്ച നിരവധി വാർത്തകൾ നമ്മൾ കേട്ടിരുന്നു. വൻകിട ബിസിനെസ്സുകാർ തങ്ങളുടെ അനധികൃത സ്വത്തുക്കൾ വെളുപ്പിക്കാൻ ശ്രമിക്കുന്നതായ വാർത്തകൾ പത്രങ്ങളിലൂടെ നമ്മൾ അറിഞ്ഞിരുന്നു. അത്തരത്തിലുള്ള ഒരു പ്രശ്നത്തിൽ, കാസർക്കോട്ടുകാരനായ നിത്യാനന്ദ ഷേണായിക്ക് ഇരുപത്തിയഞ്ച് കോടി രൂപ നഷ്ടമാകുന്നു. ആ പണം തിരിച്ചുപിടിക്കുവാൻ ഷേണായിയും കൂട്ടരും ശ്രമിക്കുന്നതിനിടയിൽ മറ്റു ചില പ്രശ്നങ്ങൾ ചെന്നുപെടുന്നു. അതിനെ തുടർന്നുണ്ടാകുന്ന സംഭവവികാസങ്ങളാണ് രഞ്ജിത്ത് തന്റെ പുത്തൻ സിനിമയായ പുത്തൻപണത്തിലൂടെ അവതരിപ്പിക്കുന്നത്. ഇന്നേവരെ ഇന്ത്യയിലെ ഒരു ഭാഷയിലും നോട്ടു നിരോധനം പ്രമേയമാക്കിയ സിനിമകൾ നിർമ്മിച്ചിട്ടില്ല എന്ന അവകാശവാദം ഉന്നയിക്കുന്ന അണിയറപ്രവർത്തകർ മറന്നുപോയ വിഷയമെന്തെന്നാൽ, ഈ സിനിമയുടെ പ്രമേയം നോട്ടു നിരോധനമല്ല അതിലുപരി കളഞ്ഞുപോയ തോക്കു അന്വേഷിച്ചിറങ്ങിയ അധോലോകനായകന്റെ ദുരവസ്ഥയാണെന്ന വസ്തുതയാണ്. “ഷേണായി ആൻഡ് ദി ഗൺബോയ്” എന്നോ “കാസർക്കോടൻ ഷേണായ്: ഒരു തോക്കുനഷ്ട്ടപ്പെട്ടവന്റെ കഥ” എന്നോ ഈ സിനിമയ്ക്ക് നാമകരണം ചെയ്യുന്നതായിരുന്നു ഉചിതം!

തിരക്കഥ: ⭐
ഒരു പ്രമേയമോ കഥയോ കഥാസന്ദർഭങ്ങളായി രൂപപ്പെടുത്തുമ്പോൾ അതിന്റെ കാതൽ നഷ്ടപെട്ടുപോകുന്ന അവസ്ഥ സിനിമയ്ക്ക് ദോഷകരമാകും എന്നതിന്റെ ഉത്തമ ഉദാഹരണമാണ് പുത്തൻപണം. നോട്ടുനിരോധനം വിഷയമാക്കി എഴുതിത്തുടങ്ങിയിട്ട് പകുതിവഴിയിൽ എത്തിയപ്പോൾ ആരെയോ ഭയന്ന് കഥ മറ്റൊരു ദിശയിലേക്കു തിരിച്ചുവിട്ടതുപോലെ അനുഭവപെട്ടു. ദാവൂദ് ഇബ്രാഹിമിനോട് വരെ ആത്മബന്ധമുള്ള അധോലോകനായകൻ നിത്യാനന്ദ ഷേണായ് കേവലം ഒരു പത്തു വയസ്സുകാരന്റെ മുമ്പിൽ തോക്ക് കെഞ്ചിനടക്കുന്നതു കണ്ടപ്പോൾ, ദേവാസുരവും പ്രാഞ്ചിയേട്ടനും ഇന്ത്യൻറുപ്പിയുമൊക്കെ എഴുതിയത് ഇതേ രഞ്ജിത്ത് തന്നെയാണോ എന്ന തോന്നലുണ്ടായി. നോട്ടുനിരോധനത്തിൽ തുടങ്ങിയ കഥ ഒടുവിൽ ചെന്നെത്തിയത് തോക്കു അന്വേഷണത്തിലാണ് എന്നത് അവിശ്വസനീയമാണ്. തോക്കു അന്വേഷിക്കുന്നതിനിടെയുള്ള കഥാസന്ദർഭങ്ങൾ ഹാസ്യത്തിന് വേണ്ടി കൃത്രിമമായി കെട്ടിച്ചമച്ചത്താണെന്നു വളരെ വ്യക്തമായി അനുഭവപെട്ടു. അതിനു മാറ്റുകൂട്ടുവാൻ ആവശ്യത്തിനും അനാവശ്യത്തിനും ഒട്ടനവധി കഥാപാത്രങ്ങളും. നിത്യാനന്ദ ഷേണായിക്ക് അധോലോക പരിവേഷം നൽകി അവതരിപ്പിച്ചിട്ടു അവസാനം പോലീസിനെയും പത്തു വയസ്സുകാരനെയും കണ്ടപ്പോൾ പേടിക്കുന്നത് എന്തുകൊണ്ടാണ്? ഇതേയാൾ കഥാവസാനം അതിമാനുഷിക പരിവേഷത്തോടെ ഗുണ്ടകളെ ഒറ്റയ്ക്ക് നേരിടുന്നു. നായകന്റെ കഥാപാത്ര രൂപീകരണം പോലും രഞ്ജിത്ത് കൈവിട്ടു കളഞ്ഞ അവസ്ഥയാണ് സിനിമയിലുടനീളം കണ്ടത്. ടേക്ക് ഓഫിന്റെ തിരക്കഥകൃത്ത് പി.വി.ഷാജികുമാറും രഞ്ജിത്തും ചേർന്നാണ് സംഭാഷണങ്ങൾ എഴുതിയത്. ആദ്യമൊക്കെ കേൾക്കാൻ രസമുണ്ടായിരുന്നെങ്കിലും, അവസാനമായപ്പോഴേക്കും കാസർകോടൻ ഭാഷ വിരക്തി മാത്രമാണ് സമ്മാനിച്ചത്. ഈ സിനിമയ്ക്കോ നിത്യാനന്ദ ഷേണായിക്കോ കാസർകോടൻ ഭാഷ നൽകിയതിന്റെ ആവശ്യകത എന്തെന്ന് മനസിലാകുന്നില്ല. ഭാഷയിലുള്ള വ്യസ്തസ്ഥയ്ക്ക് വേണ്ടിയാണെങ്കിൽ അത് അസ്ഥാനത്തുകൊണ്ടു എന്ന് വരുംനാളുകളിൽ ബോധ്യമാകും.

സംവിധാനം: ⭐
പ്രതീക്ഷയുടെ അമിതഭാരമായിട്ടാണ് ഓരോ രഞ്ജിത്ത് സിനിമകളും പ്രേക്ഷകർക്ക് മുമ്പിൽ പ്രദർശനത്തിനെത്തുന്നത്. മമ്മൂട്ടിയുമായി ഒന്നിക്കുന്ന ഒരു രഞ്ജിത്ത് സിനിമ എന്ന പേരിലും, ഏവർക്കും ഇഷ്ടപെട്ട ഇന്ത്യൻ റുപ്പി എന്ന സിനിമയുമായി സമാനതയുള്ള ഒരു നാമകരണവും പുത്തൻപണത്തിനു ആവശ്യത്തിലധികം പ്രതീക്ഷ പ്രേക്ഷകന് നൽകി. അതെല്ലാം അസ്ഥാനത്തായി അവസ്ഥയാണ് സിനിമകണ്ടിറങ്ങുന്ന പ്രേക്ഷകന് സമ്മാനിക്കുന്നത്. സിനിമയുടെ അവതരണ രീതിയാണ് അതിനു കാരണമായത്. പ്രാധാന്യമില്ലാത്ത കഥാപാത്രങ്ങൾ, വേഗതയില്ലാത്ത അവതരണം, പ്രവചിക്കാനാവുന്ന വഴിത്തിരുവുകൾ, ഗ്രഹിക്കാൻ ബുദ്ധിമുട്ടുള്ള സംഭാഷണങ്ങൾ, നല്ല പാട്ടുകളുടെ അഭാവം തുടങ്ങി അവതരണത്തിൽ പാളിപ്പോയ നിരവധി ഘടകങ്ങളാണ് ഈ സിനിമയിലുള്ളത്. കഥാവസാനം നിത്യാനന്ദ ഷേണായിയെ അതിമാനുഷികനാക്കിയ അവിശ്വസനീയമായ സംഘട്ടന രംഗങ്ങളും. ഇതൊരു ആക്ഷേപഹാസ്യ സിനിമയാണോ അതോ അന്വേഷണ സ്വഭാവമുള്ള ത്രില്ലർ സിനിമയാണോ എന്നായിരുന്നു പ്രേക്ഷകരുടെ സംശയം. ഈ സിനിമയും പുത്തൻപണവും തമ്മിലുള്ള ബദ്ധമെന്തെന്നാണ് സിനിമ കണ്ടിറങ്ങുന്ന പ്രേക്ഷകർ ചിന്തിക്കുന്നത്. രഞ്ജിത്തിന്റെ മികച്ചൊരു തിരിച്ചുവരവിനായി കാത്തിരിക്കുന്നു.

സാങ്കേതികം: ⭐⭐⭐
തമിഴ് സിനിമകളിലെ പ്രശസ്ത ഛായാഗ്രാഹകൻ ഓം പ്രകാശാണ് പുത്തൻപണത്തിന്റെ ഛായാഗ്രഹണം നിർവഹിച്ചത്. പുതുമയുള്ള കളർടോൺ ഉപയോഗിച്ചാണ് ഓം പ്രകാശ് ഈ സിനിമ ചിത്രീകരിച്ചത്. ഒരു ത്രില്ലർ സ്വഭാവമുള്ള സിനിമയ്ക്കുതകുന്ന ഛായാഗ്രഹണം എന്നതിലുപരി സവിശേഷതയുള്ള ഫ്രേയിമുകളൊന്നും ഈ സിനിമയിൽ കണ്ടില്ല. മനോജ് കണ്ണോത്താണ് രംഗങ്ങളുടെ സന്നിവേശം നിർവഹിച്ചത്. രണ്ടാം പകുതിയിലെ ഒട്ടുമിക്ക രംഗങ്ങളും ഇഴഞ്ഞുനീങ്ങുന്ന അവസ്ഥയിലായത് പ്രേക്ഷകരെ മുഷിപ്പിച്ചു. തോക്കു തേടിയുള്ള യാത്രയിൽ ഒരു പ്രയോജനവുമില്ലാത്ത ഒരു പാട്ടും അവസാനം തിരുകികയറ്റി പ്രേക്ഷകരെ ബോറടിപ്പിച്ചു. ശബ്ദകോലാഹലങ്ങൾ കൃത്യതയോടെ രംഗങ്ങൾക്ക് അകമ്പടിയായി എന്നതാണ് അച്ചു രാജാമണി നിർവഹിച്ച പശ്ചാത്തല സംഗീതത്തെ കുറിച്ച് പറയേണ്ടത്. റഫീഖ് അഹമ്മദ്, ഹരിനാരായണൻ എന്നിവരാണ് ഗാനരചന. ഷാൻ റഹ്‌മാൻ ഈണമിട്ട രണ്ടു പാട്ടുകളും ശ്രദ്ധനേടുന്നില്ല. രഞ്ജിത്ത് അമ്പാടിയുടെ ചമയവും സമീറ സനീഷിന്റെ വസ്ത്രാലങ്കാരവും കഥാപാത്രങ്ങൾക്ക് അനിയോജ്യമായിരുന്നു. സന്തോഷ് രാമന്റെ കലാസംവിധാനത്തിൽ ഒരുക്കിയ ചവറുകൂമ്പാരം മികവ് പുലർത്തി.

അഭിനയം: ⭐⭐⭐
മമ്മൂട്ടി, മാസ്റ്റർ സ്വരാജ്, മാമുക്കോയ, ബൈജു, സിദ്ദിഖ്, ജോയ് മാത്യു, സായികുമാർ, ഹരീഷ് പെരുമണ്ണ, ഇന്ദ്രൻസ്, നിർമ്മൽ പാലാഴി, സുരേഷ് കൃഷ്ണ, ബിനു കുതിരവട്ടം പപ്പു, പി.ബാലചന്ദ്രൻ, അനിൽ മുരളി, ഗണപതി, വിശാഖ് നായർ, കോട്ടയം നസീർ, കുഞ്ചൻ, ചെമ്പിൽ അശോകൻ, കലാഭവൻ ഹനീഫ്, രാജീവ് കളമശേരി, വിനോദ് കെടാമംഗലം, പ്രശാന്ത് അലക്‌സാണ്ടർ, രഞ്ജി പണിക്കർ, വിജയകുമാർ, അബു സലിം, മദൻമോഹൻ, പ്രവീൺ, മജീദ്, അരുൺ, ഇനിയ, നിരഞ്ജന അനൂപ്, ഷീലു അബ്രഹാം, പാർവതി നമ്പ്യാർ എന്നിവരാണ് ഈ സിനിമയിലെ പ്രധാന അഭിനേതാക്കൾ. നിത്യാനന്ദ ഷേണായിയുടെ രൂപഭാവങ്ങളും ശരീരഭാഷയും കാസർക്കോടൻ സംഭാഷണങ്ങളും മമ്മൂട്ടി മികവോടെ അവതരിപ്പിച്ചു. മമ്മൂട്ടിയുടെ വ്യക്തതയുള്ള ഉച്ചാരണം ആ കഥാപാത്രത്തിന് കൂടുതൽ വിശ്വസനീയത നൽകുന്നു. നാളിതുവരെ ലഭിച്ച ഓരോ കഥാപാത്രവും തന്നാലാകുംവിധം ഗംഭീരമാക്കാനുള്ള കഴിവ് സിദ്ദിഖിനുണ്ട്. പോലീസ് കഥാപാത്രങ്ങൾ നിരവധി അവതരിപ്പിച്ചിട്ടുണ്ടെങ്കിലും, അവയിൽ നിന്നും വ്യത്യസ്തമായിരുന്നു പുത്തൻപണത്തിലെ സിദ്ദിഖിന്റെ പോലീസ് കഥാപാത്രം. സുരാജ് വെഞ്ഞാറമൂടിന് ശേഷം തിരോന്തരം ഭാഷ മികവോടെ സംസാരിക്കുവാൻ കഴിവുള്ള നടനാണ് ബൈജു. ബാലതാരമായി സിനിമയിലെത്തിയ ബൈജുവിന് ഒരുപാട് നാളുകൾക്കു ശേഷം ലഭിച്ച ഒരു വില്ലൻ വേഷമാണ് ഈ സിനിമയിലേത്. ഹാസ്യത്തിന്റെ മേമ്പൊടിയോടെ ആ കഥാപാത്രം ബൈജു ഗംഭീരമാക്കി. പ്രാധാന്യമേറെയുള്ള ഒരു കഥാപാത്രമായിരുന്നു പത്തു വയസ്സുകാരൻ മുത്തുവിന്റേത്. മാസ്റ്റർ സ്വരാജ് തനിക്കാവുംവിധം പരിശ്രമിച്ചുവെങ്കിലും, പലയിടങ്ങളിലും അത് അമിതാഭിനയമായി അനുഭവപെട്ടു. ഇന്ദ്രൻസും ഹരീഷും മാമുക്കോയയും വിശാഖ് നായരും അവരവരുടെ കഥാപാത്രങ്ങൾ നന്നായി അവതരിപ്പിച്ചു.

വാൽക്കഷ്ണം: മമ്മൂട്ടിയുടെ ആരാധകരെ പോലും മുഷിപ്പിക്കുന്ന പുത്തൻപണം ഉടൻ പിൻവലിക്കാനാണ് സാധ്യത!

തിരക്കഥ, സംവിധാനം: രഞ്ജിത്ത്
സംഭാഷണം: രഞ്ജിത്ത്, പി.വി.ഷാജികുമാർ
നിർമ്മാണം: രഞ്ജിത്ത്, അരുൺ നാരായണൻ, അബ്രഹാം മാത്യു
ബാനർ: ത്രീ കളർ സിനിമ
ഛായാഗ്രഹണം: ഓം പ്രകാശ്
സന്നിവേശം: മനോജ് കണ്ണോത്
സംഗീതം: ഷാൻ റഹ്‌മാൻ
ഗാനരചന: ഹരിനാരായണൻ, റഫീഖ് അഹമ്മദ്
പശ്ചാത്തല സംഗീതം: അച്ചു രാജാമണി
കലാസംവിധാനം: സന്തോഷ് രാമൻ
ചമയം: രഞ്ജിത്ത് അമ്പാടി
വസ്ത്രാലങ്കാരം: സമീറ സനീഷ്
വിതരണം: ത്രീ കളർ സിനിമ റിലീസ്.

1971 ബിയോണ്ട് ബോർഡേഴ്സ് – ⭐


2017 ബിയോണ്ട് ടോളറൻസ് – ⭐

നേന്ത്രക്കായ, മുരിങ്ങക്കായ, ചേന, കുമ്പളങ്ങ, പടവലങ്ങ, ബീൻസ്, പച്ചമുളക്, മഞ്ഞൾപൊടി, തേങ്ങാ ചിരണ്ടിയത്, തൈര്, ജീരകം, കറിവേപ്പില, ചെറിയഉള്ളി, വെളിച്ചെണ്ണ എന്നിവ കൃത്യമായ അളവിൽ ചേർത്താൽ തനതായ കേരളം വിഭവം അവിയൽ തയ്യാർ. മേല്പറഞ്ഞ പച്ചക്കറികൾ സ്വന്തം കൃഷിയിടങ്ങളിൽ നിന്നാണ് ലഭിക്കുന്നതെങ്കിൽ അത്യുത്തമം!

ഇത് പാചക നിരൂപണമല്ല. 1971 ബിയോണ്ട് ബോർഡേഴ്സ് എന്ന സിനിമയുടെ തിരക്കഥ എഴുതുവാൻ സംവിധായകൻ മേജർ രവി സ്വീകരിച്ച രീതിയോട് ഉപമിച്ചതാണ്. മേജർ രവിയുടെ മുൻകാല പട്ടാള ചിത്രങ്ങളായ കീർത്തിചക്ര, കുരുക്ഷേത്ര, പിക്കറ്റ് 43 എന്നിവയുടെ കഥാസന്ദർഭങ്ങൾ പുതിയ കഥാപശ്ചാത്തലത്തിലേക്കു മാറ്റിയെഴുതി അവതരിപ്പിച്ച സിനിമയാണ് 1971 ബിയോണ്ട് ബോർഡേഴ്സ്. ഒറ്റവാചകത്തിൽ പറഞ്ഞാൽ, അദ്ദേഹത്തിന്റെ തന്നെ മുൻകാല സിനിമകളിലെ വിജയ ഘടകങ്ങൾ ചേർത്തൊരുക്കി അവിയൽ പരുവത്തിലാക്കിയ ഒരു സിനിമ. സ്വന്തം സിനിമകളിലെ തിരക്കഥകളിൽ നിന്നും കടമെടുത്തു എന്നത് ആശ്വാസകരം!

കർമ്മയോദ്ധ എന്ന സിനിമയ്ക്ക് ശേഷം റെഡ് റോസ് ക്രിയേഷൻസിന്റെ ബാനറിൽ ഹനീഫ് മുഹമ്മദ് നിർമ്മിക്കുന്ന മോഹൻലാൽ-മേജർ രവി സിനിമയാണ് 1971 ബിയോണ്ട് ബോർഡേഴ്സ്. മേജർ രവിയുടെ തിരക്കഥയ്ക്ക് സംഭാഷണങ്ങൾ എഴുതിയത് ഷിജു നമ്പ്യാത്താണ്. സുജിത് വാസുദേവ് ഛായാഗ്രഹണവും, സംജിത് സന്നിവേശവും, സാലു കെ. ജോർജ് കലാസംവിധാനവും, ഗോപി സുന്ദർ പശ്ചാത്തല സംഗീതവും, മാഫിയ ശശി സംഘട്ടന സംവിധാനവും നിർവഹിച്ചിരിക്കുന്നു.

പ്രമേയം: ⭐⭐
ഇന്ത്യൻ ക്യാമ്പുകളിൽ ആക്രമണം നടത്തിയ പാക്കിസ്ഥാനാണ് യുദ്ധത്തിന് തുടക്കമിട്ടത്. 1971ൽ നടന്ന ഈ ഇന്ത്യ-പാകിസ്ഥാൻ യുദ്ധം നീണ്ടുനിന്നത് 13 ദിവസമാണ്. ഡിസംബർ 16നു പാകിസ്ഥാൻ അടിയറവു പറഞ്ഞതോടെ കിഴക്കേ പാകിസ്ഥാൻ എന്നറിയപ്പെട്ടിരുന്ന രാജ്യം(ഇപ്പോഴത്തെ ബംഗ്ലാദേശ്)രൂപപെട്ടത്. ആ യുദ്ധത്തിൽ വീരമൃത്യുവരിച്ച യോദ്ധാക്കൾക്കുള്ള സമർപ്പണമാണ് മേജർ രവിയുടെ 1971 ബിയോണ്ട് ബോർഡേഴ്സ് എന്ന സിനിമ. ആ യുദ്ധത്തിനിടെ പാക്കിസ്ഥാൻ പട്ടാളക്കാരനും ഇന്ത്യൻ പട്ടാളക്കാരും തമ്മിൽ ഉടലെടുത്ത ബന്ധമാണ് ഈ സിനിമയുടെ പ്രമേയം. അവർ തമ്മിൽ ശത്രുതയാണെങ്കിലും പരസ്പര ബഹുമാനം കാത്തുസൂക്ഷിച്ചിരുന്നു. ആ യുദ്ധം നയിച്ച പട്ടാളക്കാരുടെ ജീവിതകഥയാണ് ഈ സിനിമയിലൂടെ മേജർ അവതരിപ്പിക്കുന്നത്.

തിരക്കഥ: ⭐
കീർത്തിചക്രയിലെ വൈകാരിക നിമിഷങ്ങളും കുരുക്ഷേത്രയിലെ രാജ്യസ്നേഹവും പിക്കറ്റ് 43യിലെ മതസൗഹാർദ്ദവും മോഹൻലാലിന്റെ താരമൂല്യവും സമന്വയിപ്പിച്ചു എഴുതിയ കഥാസന്ദർഭങ്ങളാണ് ഈ സിനിമയുടേത്. വിഭജന കാലത്തുള്ള ചരിത്രമോ യുദ്ധസമയത്തുള്ള അന്തരീക്ഷമോ തിരക്കഥയിൽ എവിടെയും പരാമർശിക്കുന്നില്ല. യുദ്ധം സംഭവിക്കാനുള്ള കാരണങ്ങളും അന്ന് സംഭവിച്ചിട്ടുള്ള ദുരന്തങ്ങളും വിക്കിപീഡിയയിൽ ലഭ്യമാണ്. അതിലെഴുതിയ പോലെയൊന്നുമല്ല ഈ സിനിമയുടെ കഥാസന്ദർഭങ്ങൾ. പട്ടാളക്കാരുടെ കുടുംബത്തെപ്പറ്റിയുള്ള ഓർമ്മകളും യുദ്ധഭൂമിയിൽ വീരമൃത്യുവരുന്നവരെ ദുരവസ്ഥയും പാകിസ്ഥാൻ പട്ടാളവുമായി അനാവശ്യ ശത്രുതയുടെ ആവശ്യകതയില്ല എന്നുമാണ് ഈ സിനിമയിലൂടെ മേജർ രവി പറയുവാൻ ശ്രമിക്കുന്നത്. മേല്പറഞ്ഞ രംഗങ്ങളിലുള്ള ആവർത്തനവിരസത കണ്ടുമടുത്ത പ്രേക്ഷകരെ കൂടുതൽ മുഷിപ്പിക്കാനായി മേജർ സഹദേവനെ ധീര യോദ്ധാവാക്കാനുള്ള രംഗങ്ങൾ വേറെ. മോഹൻലാലും വില്ലന്മാരും ഒഴികെയുള്ള ഓരോ കഥാപാത്രങ്ങളിലും മൂപ്പൻ എഫെക്റ്റ് കൊണ്ടുവരാൻ മേജർ ശ്രമിച്ചിട്ടുണ്ട്. പുലിമുരുകനിലെ പുകഴ്ത്തൽ രീതി സ്വീകരിച്ചതാണെങ്കിൽ, ഈ സിനിമയ്ക്കോ മേജർ സഹദേവൻ എന്ന കഥാപാത്രത്തിനോ പുകഴ്ത്തലിന്റെ ആവശ്യകതയില്ല. നായകൻ നേരിടുന്നത് മൃഗത്തെയാകുമ്പോൾ നായകനെ അതിമാനുഷികനായി ചിത്രീകരിക്കേണ്ട ആവശ്യതയുണ്ട്. അതിലുപരി, സിനിമ കണ്ടുകൊണ്ടിരിക്കുന്ന പ്രേക്ഷകരിൽ മുരുകന്റെ കഴിവ് പറഞ്ഞുഫലിപ്പിക്കേണ്ടതുണ്ട്. അതുകൊണ്ടാണ് മൂപ്പൻ എന്ന കഥാപാത്രത്തിന് അത്തരത്തിലുള്ള സംഭാഷണങ്ങൾ നൽകിയത്. അതെ രീതി സ്വീകരിച്ച മേജർ രവിക്കും സംഭാഷണങ്ങൾ എഴുതിയ ഷിജു നമ്പ്യാത്തും പുലിമുരുകനിലെ സംഭാഷണങ്ങൾ അത്തരത്തിലായതു എന്തുകൊണ്ടെന്ന് മനസിലായില്ല എന്നുവേണം കരുതാൻ. നിവിൻ പോളി നായകനാകുന്ന മേജർ രവിയുടെ സിനിമയ്ക്കായി പ്രേക്ഷകർ കാത്തിരിക്കുന്നു എന്ന് മേജർ രവി അറിയരുതേ എന്ന പ്രാർത്ഥിച്ചുകൊണ്ട് നിർത്തുന്നു.

സംവിധാനം: ⭐⭐
പുനർജനി, കീർത്തിചക്ര, മിഷൻ 90 ഡെയ്‌സ്, തൂഫാൻ, കുരുക്ഷേത്ര, കാണ്ഡഹാർ, കർമ്മയോദ്ധ, ഒരേ യാത്രയിൽ, പിക്കറ്റ് 43 തുടങ്ങിയ ഒൻപതു സിനിമകൾ സംവിധാനം ചെയ്ത ഒരാളാണ് മേജർ രവി. ഇത്രയും പരിചയസമ്പത്തുള്ള ഒരു സംവിധായകൻ പക്വതയില്ലാത്ത അവതരണ രീതി സ്വീകരിക്കുമ്പോൾ പ്രേക്ഷകരുടെ പ്രതീക്ഷ തകിടം മറയുകയാണ് ചെയ്യുന്നത്. പഴഞ്ചൻ അവതരണ രീതിയും ആവേശകരമല്ലാത്ത യുദ്ധ രംഗങ്ങളും അവിശ്വസനീയമായ രീതിയിലാണ് മേജർ രവി അവതരിപ്പിച്ചത്. കഥാവസാനമുള്ള യുദ്ധ രംഗങ്ങളിൽ ആരൊക്കെയാണ് കൊല്ലപ്പെട്ടത് എന്നുപോലും അവ്യക്തമായിരുന്നു. ടാങ്ക് ഉപയോഗിച്ചുള്ള യുദ്ധ രംഗങ്ങൾ മാത്രമാണ് ഒരല്പമെങ്കിലും മികവ് പുലർത്തിയത്. കഥാപാത്രങ്ങൾക്ക് അനിയോജ്യമല്ലാത്ത അഭിനേതാക്കളെ അന്വേഷിച്ചു കണ്ടുപിടിച്ചു അഭിനയിപ്പിച്ച മേജർ രവിയെ സമ്മതിക്കണം. അന്യഭാഷയിൽ സിനിമ വിറ്റഴിക്കുക എന്നതാണ് ലക്ഷ്യമെങ്കിൽ, ആ ഭാഷകളിലെ കഴിവുള്ള അഭിനേതാക്കളെ കണ്ടെത്തുകയെങ്കിലും ചെയ്യാമായിരുന്നു. മോഹൻലാൽ എന്ന അഭിനേതാവിനേക്കാൾ ഉപരി അദ്ദേഹത്തിന്റെ താരമൂല്യത്തെയാണ് മേജർ രവി ആരാധിക്കുന്നത്. മലയാളത്തിന് പുറമെ തമിഴിലും ഹിന്ദിയിലും തെലുങ്കിലും ആരാധകരുള്ള മോഹൻലാൽ എന്ന താരത്തെ വിറ്റഴിച്ചു നേട്ടങ്ങൾ നേടുക എന്ന ലക്ഷ്യത്തോടെയാണ് ഈ സിനിമ മേജർ രവി സംവിധാനം ചെയ്തത് എന്നത് വ്യക്തം. അതിനുദാഹരണമാണ് കൃത്യമായ ഇടവേളകളിൽ സംഭാഷണങ്ങളിലൂടെ മേജർ സഹദേവനെ വാനോളം പുകഴ്ത്തുന്നത്. മേജർ മഹാദേവന്റെ അഞ്ചാമത്തെ വരവിനുള്ള തയ്യാറെടുപ്പിലാണ് മേജർ രവി എന്നുള്ള വാർത്തകൾ ആരാധകരും പ്രേക്ഷകരും ഞെട്ടലോടെയാണ് കേൾക്കുന്നത്.

സാങ്കേതികം: ⭐⭐⭐
സുജിത് വാസുദേവ് നിർവഹിച്ച ഛായാഗ്രഹണം മികവ് പുലർത്തി. ഈ സിനിമയുടെ ജീവൻ നിലനിർത്തിയ ഏക ഘടകമെന്നത് ഛായാഗ്രഹണമാണ്. ടാങ്ക് ചെയ്‌സ് രംഗങ്ങളും ക്‌ളൈമാക്‌സിലെ യുദ്ധങ്ങളും വിശ്വസനീയതയോടെ ചിത്രീകരിച്ചു. പേസിപ്പോകാതെ എന്ന തമിഴ്‍ ഗാനചിത്രീകരണവും മനോഹരമായിരുന്നു. ഒരു വാക്കിനാൽ എന്ന ഗാനത്തിന്റെ ചിത്രീകരണത്തിലെ ട്രെയിൻ പോകുന്ന രംഗമൊഴികെ മറ്റെല്ലാ രംഗങ്ങളും മികവ് പുലർത്തി. സാലു കെ. ജോർജ് എന്ന കലാസംവിധായകൻ അതിഗംഭീരമായ രീതിയിലാണ് യുദ്ധ ഭൂമിയിലെ സെറ്റുകൾ തയ്യാറാക്കിയിരിക്കുന്നത്. ഗോപി സുന്ദറിന്റെ പശ്ചാത്തല സംഗീതം ആവേശമുണർത്തുന്ന രീതിയിലായിരുന്നില്ല. സംജിത് കൂട്ടിയോജിപ്പിച്ച രംഗങ്ങൾ ഇഴഞ്ഞുനീങ്ങുന്ന പോലെ അനുഭവപെട്ടു. ചടുലത അർഹിക്കുന്ന യുദ്ധ രംഗങ്ങൾ പോലും വേഗതയില്ലാതെ അനുഭവപെട്ടു. നജിം അർഷാദ് ഈണമിട്ട ഹിന്ദി ഗാനം യുദ്ധത്തിനിടയിൽ കേൾക്കുമ്പോൾ പ്രത്യേകതയുള്ള പോലെ തോന്നി. രാഹുൽ സുബ്രമണ്യവും സിദ്ധാർഥ് വിപിനും ഈണമിട്ട മലയാള ഗാനവും തമിഴ് ഗാനവും തരക്കേടില്ലായിരുന്നു. മാഫിയ ശശിയാണ് സംഘട്ടനങ്ങൾ സംവിധാനം ചെയ്തത്. യുദ്ധത്തിന്റെ വീര്യം പകുതിയിൽ ചോർന്നുപോകുന്ന രീതിയിലായിരുന്നു പല സംഘട്ടന രംഗങ്ങളും. സായ് നിർവഹിച്ച ചമയം കൃത്രിമത്വം നിറഞ്ഞതായിരുന്നു. സുദേവനാണ് വസ്ത്രാലങ്കാരം.

അഭിനയം: ⭐⭐
മേജർ സഹദേവനായും മേജർ മഹാദേവനായും അഭിനയിച്ച മോഹൻലാൽ രണ്ടു കഥാപാത്രങ്ങളെയും ഒരുപോലെ അവതരിപ്പിച്ചു. രണ്ടു കഥാപാത്രങ്ങളിലും അഭിനയത്തിന്റെ കാര്യത്തിൽ വ്യത്യസ്ത കൊണ്ടുവരാനൊന്നും അദ്ദേഹം ശ്രമിച്ചിട്ടില്ല. രണ്ടു കഥാപാത്രങ്ങളും കാഴ്ചയിലും പെരുമാറ്റത്തിലും ഒരുപോലെ തന്നെ. പാക് ആർമിയുടെ തലവനായി ഹിന്ദി നടൻ അരുണോദയ് സിംഗ് തിളങ്ങി. ഈ സിനിമയിലെ ഏറ്റവും ശ്രദ്ധിക്കപ്പെട്ട അഭിനയവും അരുണോദയിന്റെതാണ്. ഇവരെ കൂടാതെ ആശാ ശരത്, അല്ലു സിരിഷ്, രഞ്ജി പണിക്കർ, സുധീർ സുകുമാരൻ, കണ്ണൻ പട്ടാമ്പി, സൈജു കുറുപ്പ്, സുധീർ കരമന, വിജയകൃഷ്ണൻ, മണിക്കുട്ടൻ, ടിനി ടോം, കൃഷ്ണകുമാർ, പത്മരാജ് രതീഷ്, ദേവൻ, ബാലാജി, ഷാജു ശ്രീധർ, കൃഷ്ണപ്രസാദ്‌, മേഘനാഥൻ, കോഴിക്കോട് നാരായണൻ നായർ, കൊല്ലം തുളസി, സേതുലക്ഷ്മി എന്നിവരും ഈ സിനിമയിലെ പ്രധാന കഥാപാത്രങ്ങളാകുന്നു. അവരവരുടെ വേഷങ്ങൾ തരക്കേടില്ലാതെ ഏവരും അഭിനയിച്ചു.

വാൽക്കഷ്ണം: ആവേശമുണർത്തുന്ന യുദ്ധ രംഗങ്ങളുമില്ല വികാരമുണർത്തുന്ന പട്ടാള സിനിമയുമല്ല!

തിരക്കഥ, സംവിധാനം: മേജർ രവി
സംഭാഷണം: ഷിജു നമ്പ്യാത്
നിർമ്മാണം: ഹനീഫ് മുഹമ്മദ്
ബാനർ: റെഡ് റോസ് ക്രിയേഷൻസ്
ഛായാഗ്രഹണം: സുജിത് വാസുദേവ്
ചിത്രസന്നിവേശം: സംജിത്
പശ്ചാത്തല സംഗീതം: ഗോപി സുന്ദർ
കലാസംവിധാനം: സാലു കെ.ജോർജ്
സംഗീതം: സിദ്ധാർഥ് വിപിൻ, നജിം അർഷാദ്, രാഹുൽ സുബ്രമണ്യം
ഗാനരചന: ഹരിനാരായണൻ, മോഹൻ രാജൻ, കമാൽ കാർത്തിക്, നിഖിൽ മട്ടത്തിൽ
ചമയം: സായ്
വസ്ത്രാലങ്കാരം: സുദേവൻ
സംഘട്ടനം: മാഫിയ ശശി
നൃത്തസംവിധാനം: പ്രസന്ന സുജിത്
വിതരണം: റെഡ് റോസ് റിലീസ്.

ജോർജ്ജേട്ടൻസ് പൂരം – ⭐⭐


പൊട്ടാത്ത ചളുപ്പടക്കങ്ങളും ആളൊഴിഞ്ഞ പൂരപ്പറമ്പും! – ⭐⭐

ജനപ്രിയനായകന്റെ അവധിക്കാല സിനിമകൾ കുട്ടികൾക്ക് ആസ്വദിക്കാനുള്ളതാണെന്ന് അദ്ദേഹവും ആരാധകരും അവകാശപെടാറുള്ളതാണ്. ദിലീപിന്റെ മുൻകാല വിഷു ചിത്രങ്ങളുടെ പട്ടികയെടുത്താൽ അത് വ്യക്തമാകും. പാപ്പി അപ്പച്ചയും, മായാമോഹിനിയും, റിംഗ് മാസ്റ്ററും, കിംഗ് ലയറുമൊക്കെ അവധിക്കാലത്ത് പ്രദർശനത്തിനെത്തിയ സിനിമകളാണ്. മേല്പറഞ്ഞ സിനിമകൾ നിങ്ങളെ രസിപ്പിച്ചിട്ടുണ്ടെങ്കിൽ ജോർജ്ജേട്ടൻസ് പൂരവും നിങ്ങളെ രസിപ്പിച്ചേക്കാം. അതല്ലാതെ ശുദ്ധമായ ഹാസ്യ രംഗങ്ങളുള്ള ആസ്വാദ്യകരമായ സിനിമ ആഗ്രഹിക്കുന്നവർ ജോർജ്ജേട്ടൻസ് പൂരം ഒഴിവാക്കുന്നതാകും ഭേദം.

ഡോക്ടർ ലൗ എന്ന കുഞ്ചാക്കോ ബോബൻ സിനിമയ്ക്ക് ശേഷം കെ.ബിജു സംവിധാനം ചെയ്ത ജോർജ്ജേട്ടൻസ് പൂരത്തിന്റെ രചന നിർവഹിച്ചത് വൈ.വി.രാജേഷാണ്. കഥയെഴുതിയത് സംവിധായകൻ ബിജു തന്നെയാണ്. ശിവാനി സുരാജും അജയ് ഘോഷും ബിജോയ് ചന്ദ്രനും ചേർന്നാണ് ജോർജ്ജേട്ടൻസ് പൂരം നിർമ്മിച്ചത്. വിനോദ് ഇല്ലമ്പള്ളി ഛായാഗ്രഹണവും, ലിജോ പോൾ സന്നിവേശവും ഗോപി സുന്ദർ പശ്ചാത്തല സംഗീതവും നിർവഹിച്ചിരിക്കുന്നു.

പ്രമേയം: ⭐
സാമൂഹിക സേവനം ചെയ്യുന്നു എന്ന തട്ടിപ്പിൽ ഒരു തൊഴിലും ചെയ്യാതെ ജീവിക്കുന്ന നാൽവർ സംഘം. അവരുടെ പ്രിയപ്പെട്ട സ്ഥലമാണ് മത്തായി പറമ്പ്. ഉടമസ്ഥ അവകാശമില്ലെങ്കിലും ജോർജ്ജേട്ടനും സുഹൃത്തുക്കളും അറിയാതെ മത്തായി പറമ്പിൽ ഒന്നും നടക്കില്ല. ആ സ്ഥലത്തിന്റെ യഥാർത്ഥ അവകാശി വരുന്നതോടെ കഥ മറ്റൊരു ദിശയിലേക്കു തിരിയുന്നു. കാലാകാലങ്ങളായി കണ്ടുമടുത്ത പ്രമേയവും കഥയും തന്നെയാണ് ജോർജ്ജേട്ടൻസ് പൂരത്തിലും കാഴ്ച്ചയാകുന്നത്. മലയാള സിനിമ പുതിയ പാതയിലൂടെ സഞ്ചരിച്ചു തുടങ്ങിയതൊന്നും ഈ സിനിമയുടെ അണിയറപ്രവർത്തകർ അറിഞ്ഞിട്ടില്ല എന്ന് കരുതുന്നു. പൂരത്തിന് കുട്ടികളെങ്കിലും കയറുമോ എന്ന് കണ്ടറിയാം!

തിരക്കഥ: ⭐⭐
വൈ.വി.രാജേഷ് എന്ന തിരക്കഥാകൃത്തിന്റെ മുൻകാല സിനിമകളുടെ വിജയ ചേരുവകൾ തെറ്റാതെ എഴുതിയ തിരക്കഥയാണ് ജോർജ്ജേട്ടൻസ് പൂരത്തിന്റേതും. പുതുമയില്ലാത്ത കഥാസന്ദർഭങ്ങൾ, പരിചിതമായ കഥാപാത്രങ്ങൾ, പ്രവചിക്കാനാവുന്ന കഥാഗതി, ചിരിവരാത്ത സംഭാഷണങ്ങൾ എന്നിവ സമന്വയിപ്പിച്ചു എഴുതിയതാണ് ഈ സിനിമയുടെ തിരക്കഥ. പതിവ് രീതിയിൽ നിന്ന് മാറ്റിപ്പിടിച്ച ഒരേയൊരു ഘടകം കഥാവസാനമുള്ള കബഡി കളിയാണ്. അവധികാലം ആഘോഷിക്കുവാൻ വേണ്ടി സിനിമ കാണാനെത്തുന്ന കുട്ടികളെയും കുടുംബ പ്രേക്ഷകരെയും ചിരിപ്പിക്കുക എന്നതായിരുന്നു വൈ.വി.രാജേഷിന്റെ ഉദ്ദേശമെങ്കിൽ, അസഭ്യങ്ങളും ദ്വയാർത്ഥ പ്രയോഗങ്ങളുമുള്ള സംഭാഷണങ്ങളെങ്കിലും ഈ സിനിമയിൽ നിന്ന് ഒഴിവാക്കാമായിരുന്നു. സെൻട്രൽ ജയിൽ എന്ന ക്രൂര സിനിമാപീഡനം കണ്ട ജനപ്രിയ നായകന്റെ ആരാധകർക്ക് ഒരു ആശ്വാസമായിരിക്കാം ജോർജ്ജേട്ടൻസ് പൂരം.

സംവിധാനം: ⭐⭐
ആറു വർഷങ്ങൾക്കു മുമ്പ് കെ. ബിജു സംവിധാനം ചെയ്ത ഡോക്ടർ ലൗ എന്ന സിനിമയ്ക്ക് വേണ്ടി സ്വീകരിച്ച അതെ അവതരണ രീതിയാണ് ഈ സിനിമയ്ക്ക് വേണ്ടിയും സ്വീകരിച്ചത്. ഒരുപാട് മാറ്റങ്ങൾ സിനിമയുടെ അവതരണ രീതിയിൽ സംഭവിച്ചു എന്ന വസ്തുത അദ്ദേഹം അറിഞ്ഞിട്ടില്ല എന്ന് കരുതാം. കൊച്ചുകുട്ടികൾക്ക് പോലും പ്രവചിക്കാനാവുന്ന അവതരണമാണ് ഈ സിനിമയുടെ പോരായ്മകളിൽ പ്രധാനം. ജനപ്രിയ നായകന്റെ സമ്മതവും, പണം മുടക്കാൻ നിർമ്മാതാക്കളെയും ലഭിച്ചതിനു ശേഷമാണ് ഈ സിനിമയുടെ തിരക്കഥ എഴുതി തുടങ്ങിയതെന്ന് സംശയിക്കേണ്ടിയിരിക്കുന്നു. തിരക്കഥയും അവതരണ രീതിയും മുൻകൂറായി മനസ്സിലായിക്കാൽ പുതുമുഖ നടന്മാർ പോലും ഈ സിനിമയിൽ അഭിനയിക്കുവാൻ സാധ്യത കാണുന്നില്ല. അവധിക്കാലത്തെ വൻകിട സിനിമകൾക്ക് മുമ്പിൽ പൊട്ടാത്ത ചളുപടക്കങ്ങളുള്ള ഈ പൂരക്കാഴ്ച കാണുവാൻ ജനങ്ങൾ വരുമോയെന്നു വരുംനാളുകളിൽ അറിയാം. ജനപ്രിയനായകനു ഭാഗ്യം തുണച്ചില്ലെങ്കിൽ, പ്രദർശനശാലകൾ ആളൊഴിഞ്ഞ പൂരപ്പറമ്പ് പോലെയാകാനാണ് സാധ്യത!

സാങ്കേതികം: ⭐⭐⭐
വിനോദ് ഇല്ലമ്പള്ളിയുടെ ഛായാഗ്രഹണം ശരാശരിയിലൊതുങ്ങി. കണ്ടുമടുത്ത തൃശൂർ കാഴ്ച്ചകൾ തന്നെയാണ് ഈ സിനിമയിലും. പാട്ടുകളുടെ ചിത്രീകരണം കളർഫുള്ളായിരുന്നു എന്നത് ഒരു സവിശേഷതയല്ലെങ്കിലും സിനിമയിലെ മറ്റു രംഗങ്ങളെ അപേക്ഷിച്ചു ഭേദമായിരുന്നു. ലിജോ പോളിന്റെ സന്നിവേശം പ്രത്യേകിച്ച് പുതുമകളൊന്നും സമ്മാനിച്ചില്ല. രണ്ടാം പകുതിയുടെ അവസാന ഭാഗത്തിലുള്ള കബഡികളികൾ സ്ലോ മോഷനിൽ അവതരിപ്പിച്ചതുകൊണ്ടു പ്രേക്ഷകരിൽ ആവേശം ജനിപ്പിക്കാനായില്ല. രംഗങ്ങൾക്ക് ഒരല്പമെങ്കിലും ഉണർവ്വ് പകർന്നത് ഗോപി സുന്ദറിന്റെ പശ്ചാത്തല സംഗീതം കാരണമാണ്. അതുപോലെ, ഗോപി സുന്ദർ ഈണമിട്ട പാട്ടുകൾ കേൾക്കാനും ഏറ്റുപാടാനും തോന്നുന്നവയായിരുന്നു. ജോലീം കൂലീം എന്ന പാട്ടും ഓമൽ ചിരിയോ എന്ന പാട്ടും എഴുതിയിരിക്കുന്നത് ഹരിനാരായണനാണ്. ഷോബി പോൾരാജിന്റെ നൃത്ത സംവിധാനം മികവ് പുലർത്തിയിരുന്നു. ഏറെ നാളുകൾക്കു ശേഷം ദിലീപിന്റെ രസകരമായ നൃത്തം കണ്ടത് ഓമൽ ചിരിയോ എന്ന ഗാന ചിത്രീകരണത്തിലാണ്. അൻപറീവിന്റെ സംഘട്ടന രംഗങ്ങൾ ജനപ്രിയ നായകന്റെ ആരാധകരെ ആവേശഭരിതരാക്കുന്ന രീതിയിലായിരുന്നു. പി.എൻ.മണിയുടെ ചമയം പല രംഗങ്ങളിലും അമിതമായി അനുഭവപെട്ടു. നിസ്സാർ റഹ്മത്തിന്റെ വസ്ത്രാലങ്കാരം കഥാപാത്രങ്ങൾക്ക് ചേരുന്നവയായിരുന്നു.

അഭിനയം: ⭐⭐⭐
ജനപ്രിയനായകൻ ദിലീപ്, രജീഷ വിജയൻ, ചെമ്പൻ വിനോദ് ജോസ്, രഞ്ജി പണിക്കർ, ടീ.ജി.രവി, വിനയ് ഫോർട്ട്, ഷറഫുദ്ധീൻ, തിരു ആക്ട്ലാബ്, അസീം ജമാൽ, ജയരാജ് വാര്യർ, സുനിൽ സുഖദ, ശശി കലിങ്ക, ജനാർദ്ദനൻ, കെ.ൽ.ആന്റണി, ജയശങ്കർ, ഹരികൃഷ്ണൻ, കലാഭവൻ ഹനീഫ്, ഗണപതി, മാസ്റ്റർ ജീവൻ, കലാരഞ്ജിനി, സതി പ്രേംജി, കുളപ്പുള്ളി ലീല എന്നിവരാണ് ഈ സിനിമയിലെ പ്രധാന അഭിനേതാക്കൾ. ദിലീപ് തന്റെ സ്ഥിരം ശൈലിയിൽ കുട്ടികളെ ആകർഷിക്കുന്ന രീതിയിൽ ജോർജ്ജേട്ടനായി അഭിനയിച്ചു. അശ്ലീലം ആവശ്യത്തിനും അനാവശ്യത്തിനും പറഞ്ഞു ഷറഫുദ്ധീൻ വെറുപ്പിക്കൽ തുടർന്നു. വിനയ് ഫോർട്ടും രഞ്ജി പണിക്കരും ചെമ്പൻ വിനോദും അവരവരുടെ കഥാപാത്രങ്ങൾ തന്മയത്വത്തോടെ അവതരിപ്പിച്ചു. മികച്ച നടിക്കുള്ള സംസ്ഥാന പുരസ്‌കാരം നേടിയ രജീഷ വിജയൻ വെറുതെ വന്നുപോയി. ചെറുതും വലുതുമായ കഥാപാത്രങ്ങൾ അവതരിപ്പിച്ച ഒട്ടനവധി അഭിനേതാക്കളും ഈ സിനിമയിലുണ്ട്.

വാൽക്കഷ്ണം: ജനപ്രിയനായകന്റെ കുട്ടി ആരാധകർക്കായി ഒരുക്കിയ പൂരകാഴ്ച്ചകൾ മുതിർന്നവരെ തൃപ്തിപ്പെടുത്തില്ല.

കഥ, സംവിധാനം: കെ.ബിജു
നിർമ്മാണം: അജയ് ഘോഷ്, ബിജോയ് ചന്ദ്രൻ, ശിവാനി സുരാജ്
ബാനർ: ചാന്ദ് വി. ക്രിയേഷൻസ്
തിരക്കഥ, സംഭാഷണം: വൈ.വി.രാജേഷ്
ഛായാഗ്രഹണം: വിനോദ് ഇല്ലമ്പള്ളി
ചിത്രസന്നിവേശം: ലിജോ പോൾ
സംഗീതം: ഗോപി സുന്ദർ
ഗാനരചന: ഹരിനാരായണൻ
കലാസംവിധാനം: സുജിത് രാഘവ്
ചമയം: പി.എൻ.മണി
വസ്ത്രാലങ്കാരം: നിസ്സാർ റഹ്മത്
സംഘട്ടനം: അൻപറിവ്
നൃത്തസംവിധാനം: ഷോബി പോൾരാജ്
വിതരണം: ചാന്ദ് വി. റിലീസ്.

ദി ഗ്രേറ്റ് ഫാദർ – ⭐⭐

താരരാജാവിന്റെ താരപ്പകിട്ടിൽ ഒരുവട്ടം കണ്ടിരിക്കാം! – ⭐⭐

കാലികപ്രസക്തിയുള്ള ഒരു പ്രമേയത്തെ കണ്ടുപരിചിതമായ കഥാസന്ദർഭങ്ങളിലൂടെ പ്രവചിക്കാനാവുന്ന കഥാഗതിയിലൂടെ അവതരിപ്പിച്ചിരിക്കുന്ന സിനിമയാണ് ദി ഗ്രേറ്റ് ഫാദർ. സസ്പെൻസ് നിലനിർത്തിയിരിക്കുന്ന രീതിയും ത്രസിപ്പിക്കുന്ന സംഭാഷണങ്ങളും മമ്മൂട്ടിയുടെ അഭിനയവും അദ്ദേഹത്തിന്റെ ആരാധകരെ ആവേശഭരിതരാക്കും എന്നുറപ്പ് !അതിനപ്പുറത്തേക്കുള്ള മികവൊന്നും ഈ സിനിമയുടെ കഥാസന്ദർഭങ്ങൾക്കോ അവയുടെ അവതരണത്തിനോ ഇല്ല എന്നതാണ് ദൗർഭാഗ്യകരമായ സത്യം.

നവാഗതനായ ഹനീഫ് അദേനി രചനയും സംവിധാനവും നിർവഹിച്ച ദി ഗ്രേറ്റ് ഫാദർ നിർമ്മിച്ചിരിക്കുന്നതും വിതരണം ചെയ്തിരിക്കുന്നതും ഓഗസ്റ്റ് സിനിമാസാണ്. പൃഥ്വീരാജ്, ആര്യ, സന്തോഷ് ശിവൻ, ഷാജി നടേശൻ എന്നിവരാണ് ഈ സിനിമയുടെ നിർമ്മാതാക്കൾ. മമ്മൂട്ടി, ആര്യ, ശാം, സ്നേഹ, ബേബി അനിഘ, മിയ, കലാഭവൻ ഷാജോൺ, സോഹൻ സിനുലാൽ, സന്തോഷ് കീഴാറ്റൂർ, മുകുന്ദൻ, കലാഭവൻ പ്രജോദ്, പ്രശാന്ത്, സുനിൽ സുഖദ, വി.കെ.ബൈജു, ഐ.എം.വിജയൻ, ബാലാജി ശർമ്മ, ഡോക്ടർ റോണി ഡേവിഡ്, ഷാജി നടേശൻ, ദീപക് പറമ്പൊൾ, അനീഷ് മേനോൻ, മാളവിക മോഹൻ, അനു ജോസഫ് എന്നിവരാണ് ഈ സിനിമയിലെ പ്രധാന അഭിനേതാക്കൾ.

പ്രമേയം: ⭐⭐
ദൈവത്തിന്റെ സ്വന്തം നാടെന്നു വിശേഷിപ്പിക്കുന്ന കേരളത്തിൽ കഴിഞ്ഞ കുറെ മാസങ്ങളായി കേൾക്കുന്ന പീഡന കഥകൾ ഞെട്ടിക്കുന്നതാണ്. എഴുപതു കഴിഞ്ഞ വൃദ്ധ മുതൽ ഏഴു മാസം പോലും തികയാത്ത കുട്ടികളെ വരെ പീഡിപ്പിക്കുന്ന മാനസിക രോഗികൾ ഉള്ള നാടായി മാറിക്കൊണ്ടിരിക്കുന്ന ദൈവത്തിന്റെ സ്വന്തം കേരളം. അത്തരത്തിലുള്ള പശ്ചാത്തലത്തിൽ ഏറെ ഗൗരവമുള്ള ഒരു വിഷയമാണ് ഹനീഫ് അദേനി ഈ സിനിമയിലൂടെ ചർച്ചചെയ്യുന്നത്. കുറച്ചു മാസങ്ങൾക്കു മുമ്പ് പുറത്തിറങ്ങിയ ഒരു മലയാള സിനിമയിലും ഇതേ പ്രമേയമാണ് അവതരിപ്പിച്ചത്. ശക്തമായൊരു പ്രമേയം ലഭിച്ചിട്ടും അതിനൊത്തൊരു കഥയെഴുതുവാൻ ഹനീഫ് അദേനി ശ്രമിച്ചില്ല എന്നിടത്താണ് ഈ സിനിമയുടെ പരാജയം. മമ്മൂട്ടിയുടെ ആരാധകർക്കും കുടുംബകഥകൾ ഇഷ്ടപെടുന്നവർക്കും ആസ്വാദ്യകരമായ ഒരു കഥ കൃത്രിമമായി രൂപപെടുത്തി എടുക്കുകയാണ് ഹനീഫ് അദേനി ചെയ്തത്.

തിരക്കഥ: ⭐⭐
കഴിഞ്ഞ കുറച്ചു നാളുകളായി പ്രേക്ഷകർ കുടുംബത്തോടൊപ്പമാണ് സിനിമ കാണുവാൻ പോകുന്നത്. അതുകൂടാതെ, മമ്മൂട്ടിയുടെ ആരാധകർക്കായി എല്ലാ ചേരുവകളും ചേർത്തൊരു സിനിമ പുറത്തിറങ്ങിയിട്ട് കുറെ മാസങ്ങളുമായി. മേല്പറഞ്ഞ രണ്ടു വസ്തുതകളും മനസ്സിൽ കണ്ടെഴുതിയ കഥാസന്ദർഭങ്ങളാണ് ഈ സിനിമയുടെ തിരക്കഥയിലുടനീളം. കുടുംബ പ്രേക്ഷകർക്കായി എഴുതിയ വൈകാരികത നിറഞ്ഞ രംഗങ്ങളാണ് ആദ്യ പകുതിയിലെങ്കിൽ, കൊലപാതകിയെ തേടിയിറങ്ങുന്ന സസ്പെൻസ് മുഹൂർത്തങ്ങളാണ് രണ്ടാം പകുതിയിൽ. ആദ്യ പകുതിയിലെ രംഗങ്ങൾ ഭൂരിഭാഗവും ഊഹിക്കാനാവുന്നതും കുറെ സിനിമകളിൽ കണ്ടുമടുത്തതുമാണ്. രണ്ടാം പകുതിയിലേക്കു കടക്കുമ്പോൾ, കൊലപാതികയേ തേടിയിറങ്ങുന്ന രംഗങ്ങളിൽ പുതുമയില്ലായെങ്കിലും കൊലപാതകിയെ ആരാണെന്ന സൂചനയൊന്നും നൽകാതെ സസ്പെൻസ് നിലനിർത്തിയിരുന്ന രീതി മികവ് പുലർത്തി. ആസ്വാദനത്തിനു വേണ്ടി എഴുതിയ കഥാസന്ദർഭങ്ങളിൽ അബദ്ധങ്ങൾ വേണ്ടുവോളമുണ്ട്. കൊലപാതകി നിരന്തരം മൊബൈൽ ഫോണിൽ നിന്ന് ഡേവിഡ് നൈനാനെയും മറ്റു പലരെയും ഫോൺ ചെയ്യുന്നുണ്ട്. അത്തരത്തിൽ പെരുമാറുന്ന ഒരാൾ വസിക്കുന്ന സ്ഥലം കണ്ടെത്താൻ ഡേവിഡും ആര്യ അവതരിപ്പിക്കുന്ന പോലീസ് കഥാപാത്രവും നെട്ടോട്ടമോടുന്നതു കാണുമ്പോൾ പ്രേക്ഷകർക്ക് ചിരിയാണ് വരുന്നത്. കഥാവസാനം കൊലപാതകിയോടു പ്രതികാരവും ചെയ്തു പോകുന്ന നായകനോട് പോലീസിന്റെ വക പ്രശംസയും. ഈ കുറവുകളൊക്കെ ക്ഷമിച്ചു സിനിമ കണ്ടവർക്ക് ആശ്വാസമായത് സംഭാഷണങ്ങളാണ്. ഡേവിഡും ആൻഡ്രുസും തമ്മിലുള്ള സംഭാഷണങ്ങൾ പ്രേക്ഷകരെ ആവേശഭരിതരാക്കുന്നതായിരുന്നു. ഈ സിനിമയ്ക്ക് വേണ്ടി ഒരല്പം പുതുമ അർഹിക്കുന്ന കഥാസന്ദർഭങ്ങൾ ഹനീഫ് അദേനി എഴുതാത്തത് ഒരു തിരിച്ചടിയാകുമോ എന്ന് വരും നാളുകളിൽ അറിയാം.

സംവിധാനം: ⭐⭐⭐
കേരളത്തിൽ നടന്നുകൊണ്ടിരിക്കുന്ന ചൂടേറിയ ഒരു വിഷയം, മമ്മൂട്ടി, ആര്യ എന്നിവരുടെ താരമൂല്യം, ഓഗസ്റ്റ് സിനിമാസ് പോലൊരു നിർമ്മാണ കമ്പിനി തുടങ്ങിയ ചേരുവകളൊക്കെ കൂടെയുണ്ടായിട്ടും പ്രേക്ഷകരെ ത്രസിപ്പിക്കുന്ന ഒരു സസ്പെൻസ് ത്രില്ലർ ഒരുക്കുവാൻ ഹനീഫ് അദേനിയ്ക്ക് സാധിച്ചില്ല. മമ്മൂട്ടിയുടെ അഭിനയമികവും ആര്യയുടെ താരപ്പകിട്ടും, സസ്പെൻസ് നിലനിർത്തിയ രീതിയും, സുഷിൻ ശ്യാമിന്റെ പശ്ചാത്തല സംഗീതവുമാണ് സിനിമയ്ക്ക് ഗുണം ചെയ്തത്. തിരക്കഥയിലുള്ള ന്യൂനതകൾ പരിഹരിക്കപ്പെടുന്നത് സാങ്കേതിക മികവോടെയുള്ള അവതരണം ഒന്നുകൊണ്ടു മാത്രമാണ്. മികച്ചൊരു സസ്പെൻസ് സിനിമ ഒരുക്കണോ അതോ മമ്മൂട്ടിയുടെ ആരാധകരെ സന്തോഷിപ്പിക്കണോ എന്ന ആശയകുഴപ്പത്തിലായ ഹനീഫ് അദേനി ആദ്യത്തേത് തിരഞ്ഞെടുത്തിരുന്നുവെങ്കിൽ, യവനികയും ഈ തണുത്ത വെളുപ്പാൻ കാലത്തും ഉത്തരവും പോലെയൊരു ഉഗ്രൻ സസ്പെൻസ് സിനിമ പ്രേക്ഷകർക്ക് ലഭിക്കുമായിരുന്നു. സിനിമ കണ്ടിറങ്ങുന്ന മമ്മൂട്ടിയുടെ ആരാധകർ സംതൃപ്തരായതുകൊണ്ടു ഹനീഫിന് ആശ്വസിക്കാം.

സാങ്കേതികം: ⭐⭐⭐
റോബി വർഗീസ് രാജ് തന്റെ കഴിവിന്റെ പരമാവധി പുറത്തെടുത്ത സിനിമയാണ് ദി ഗ്രേറ്റ് ഫാദർ. മമ്മൂട്ടിയുടെ ആദ്യ കാർ ജമ്പ് രംഗം മുതൽ ക്‌ളൈമാക്‌സ് സംഘട്ടനം വരെ ആരാധകരെ ആവേശംകൊള്ളിക്കുന്ന രീതിയിലായിരുന്നു ഫ്രേയിമുകൾ. മഴ പെയ്യുന്ന രംഗങ്ങളിൽ കൃത്രിമത്വം തോന്നി എന്നതല്ലാതെ മറ്റൊരു കുറവും ഛായാഗ്രഹണത്തിൽ കണ്ടില്ല. ആദ്യാവസാനം സിനിമയ്ക്ക് ഒരു ഉണർവ്വ് പകരുവാൻ റോബി വർഗീസിന്റെ രംഗങ്ങൾക്കു സാധിച്ചു. ആദ്യ പകുതിയുടെ തുടക്കത്തിലും രണ്ടാം പകുതിയുടെ തുടക്കത്തിലും ഒരല്പം ഇഴഞ്ഞു നീങ്ങുന്ന രീതിയിലായി രംഗങ്ങളുടെ സന്നിവേശം. പക്ഷെ, കഥയിൽ പ്രാധാന്യമില്ലാത്ത രംഗങ്ങളൊന്നും ഈ സിനിമയിൽ കണ്ടില്ല എന്നതാണ് നൗഫൽ അബ്ദുള്ളയുടെ മികവ്. സുഷിൻ ശ്യാമിന്റെ പശ്ചാത്തല സംഗീതം പ്രേക്ഷകരെ ഒരുപരിധിവരെ ആവേശഭരിതരാക്കുവാൻ സഹായിച്ചു. ഈ സിനിമയിലെ മമ്മൂട്ടിയുടെ ആദ്യ രംഗത്തിലെ പശ്ചാത്തല സംഗീതം ഇതിനുദാഹരണം. അതുപോലെ ക്‌ളൈമാക്‌സിൽ കൊലപാതകിക്ക് നൽകിയിരിക്കുന്ന പാശ്ചാത്യ ശൈലിയിലുള്ള പശ്ചാത്തല സംഗീതവും മികവ് പുലർത്തി. ഹരി നാരായണന്റെ വരികൾക്ക് സംഗീതം നൽകിയത് ഗോപി സുന്ദറാണ്. ഒരുവട്ടം കേട്ടുമറക്കാം എന്നതിനപ്പുറം സവിശേഷതയൊന്നും പാട്ടുകൾക്കില്ല. ജി നിർവഹിച്ച സംഘട്ടന രംഗങ്ങൾ തരക്കേടില്ലായിരുന്നു. കാർ ജമ്പ് രംഗങ്ങളും സിനിമയുടെ തുടക്കത്തിലെ കാർ അപകടവും മികവ് പുലർത്തി. എന്നാൽ, ക്‌ളൈമാക്‌സിലെ സംഘട്ടന രംഗം ശരാശരിയിലൊതുങ്ങി. സുബാഷിഷ് ആണ് കലാസംവിധാനം നിർവഹിച്ചത്. ക്‌ളൈമാക്‌സിലെ ഒഴിഞ്ഞ കെട്ടിടത്തിന്റെ രൂപം വിശ്വസനീയത നൽകുന്നതായിരുന്നു. അതിനൊപ്പം പ്രതിനായകന്റെ മുഖത്തുള്ള ചമയവും പുതുമയുള്ളതായിരുന്നു. റോണക്സ് സേവര്യറാണ് ചമയം. സ്നേഹയുടെ മുഖത്തെ മേക്കപ് ഒരല്പം കൂടുതലായതു പോലെയും തോന്നി. സ്റ്റെഫി സേവ്യറിന്റെ വസ്ത്രാലങ്കാരത്തിൽ ഡേവിഡ് നൈനാൻ കൂടുതൽ പൗരുഷമുള്ള ഒരാളായി അനുഭവപെട്ടു.

അഭിനയം: ⭐⭐⭐
ഡേവിഡ് നൈനാൻ മമ്മൂട്ടിയുടെ കരങ്ങളിൽ ഭദ്രമായിരുന്നു. ഡേവിഡ് നൈനാന്റെ പകയും സങ്കടവും ഒരുപോലെ ആദ്യാവസാനം മികവോടെ അവതരിപ്പിക്കുവാൻ മമ്മൂട്ടിയ്ക്ക് സാധിച്ചു. ബിലാൽ ജോൺ കുരിശിങ്കൽ ഏറെക്കുറെ ഇതേ മാനസിക വ്യഥ അനുഭവിക്കേണ്ടി വരുന്ന ഒരു കഥാപാത്രമാണ്. അതിൽ നിന്നും വ്യത്യസ്തമായിട്ടാണ് ഡേവിഡ് നൈനാനെ മമ്മൂട്ടി അവതരിപ്പിച്ചത്. പ്രതീക്ഷ തെറ്റിക്കാതെ വളരെ മികവോടെ സാറാ ഡേവിഡിനെ ബേബി അനിഖ അവതരിപ്പിച്ചു. മലയാളത്തിലേക്കുള്ള ആര്യയുടെ രണ്ടാംവാരവും മികവ് പുലർത്തി. കഥാപാത്ര രൂപീകരണത്തിൽ പോരായ്മ ഉണ്ടെങ്കിലും, ആൻഡ്രുഡ് ഈപ്പനെ രസകരമായി ആര്യ അവതരിപ്പിച്ചിട്ടുണ്ട്. കലാഭവൻ ഷാജോണും ബാലാജിയും മിയയും തങ്ങളുടെ വേഷങ്ങളിൽ തിളങ്ങി. ഇവരെ കൂടാതെ ഈ സിനിമയിൽ വേഷമിട്ട എല്ലാവരും അവരവരുടെ വേഷങ്ങൾ മോശമാക്കാതെ അവതരിപ്പിച്ചു.

വാൽക്കഷ്ണം: കാലികപ്രസക്തിയുള്ള പ്രമേയത്തിന്റെ കണ്ടുമടുത്ത അവതരണമാണ് ദി ഗ്രേറ്റ് ഫാദർ!

രചന, സംവിധാനം: ഹനീഫ് അദേനി
നിർമ്മാണം: പൃഥ്വിരാജ്, ആര്യ, സന്തോഷ് ശിവൻ, ഷാജി നടേശൻ
ബാനർ: ഓഗസ്റ്റ് സിനിമാസ്
ഛായാഗ്രഹണം: റോബി വർഗീസ് രാജ്
ചിത്രസന്നിവേശം: നൗഫൽ അബ്ദുള്ള
പശ്ചാത്തല സംഗീതം: സുഷിൻ ശ്യാം
സംഗീതം: ഗോപി സുന്ദർ
ഗാനരചന: ഹരിനാരായണൻ
കലാസംവിധാനം: സുഭാഷിഷ്‌
ചമയം: റോണക്സ് സേവ്യർ
വസ്ത്രാലങ്കാരം: സ്റ്റെഫി സേവ്യർ
സംഘട്ടനം: ജി.
നൃത്തസംവിധാനം: ഷോബി പോൾരാജ്
ശബ്ദസംവിധാനം: രംഗനാഥ് രവി
വിതരണം: ഓഗസ്റ്റ് സിനിമ റിലീസ്.