ലവകുശ – ന്യു ജനറേഷൻ നാടോടിക്കാറ്റ്!

പ്രേ ബോ കൊ ഞ! പ്രേക്ഷകരെ ബോറടിപ്പിച്ചു കൊല്ലും ഞങ്ങൾ എന്ന ലക്ഷ്യത്തോടെ ലവലേശം ഗുണമില്ലാത്ത സന്ദർഭങ്ങളും സംഭാഷണങ്ങളും അവതരണവും സമാസം ചേർത്തു അവതരിപ്പിച്ച സിനിമയാണ് ലവകുശ.

നി കൊ ഞ ചാ! എന്ന സിനിമയക്ക് ശേഷം ഗിരീഷ് മനോ സംവിധാനം നിർവഹിച്ച ഈ ന്യു ജനറേഷൻ നാടോടിക്കാറ്റിന്റെ രചന നിർവഹിച്ചത് നടൻ നീരജ് മാധവാണ്. ലവനും കുശനുമായി നീരജ് മാധവും അജു വർഗീസും മികച്ച രീതിയിൽ ഹാസ്യം കൈകാര്യം ചെയ്തു എന്ന് മാത്രമാണ് ലവകുശയിലെ ഏക സവിശേഷത. ബിജു മേനോനും നായകതുല്യ വേഷത്തിൽ ഈ സിനിമയിലുണ്ട്.

ആർ.ജെ.ഫിലിംസിനു വേണ്ടി ജെയ്സൺ ഇളംകുളം നിർമ്മിച്ച ലവകുശ,കാർട്ടൂൺ പരമ്പരകളെ അനുസ്മരിപ്പിക്കുന്ന വിധത്തിലുള്ള ഹാസ്യരംഗങ്ങളാൽ കോർത്തിണക്കിയ രണ്ടരമണിക്കൂർ കോമാളിത്തരമാണ്. നാടോടിക്കാറ്റിലെ ദാസനെയും വിജയനെയും പുതിയ രീതിയിൽ അവതരിപ്പിച്ചതാണ് ലവനും കുശനും.

പ്രമേയം: ⭐️⭐️
മലയാള സിനിമ ചരിത്രത്തിലെ നാഴികല്ലുകളാണ് ദാസനും വിജയനും. നാടോടിക്കാറ്റ് എന്ന സിനിമയുടെ മൂന്ന് ഭാഗങ്ങളും കണ്ടുചിരിക്കാത്ത മലയാളികളുണ്ടാകില്ല. ദാസനും വിജയനും, CID മൂസയും അബദ്ധത്തിൽ കുറ്റങ്ങൾ തെളിയിക്കുന്നത് രസകരമായ പ്രമേയങ്ങളായിരുന്നു. എന്നാൽ, മേല്പറഞ്ഞ സിനിമകളുമായി നിരവധി സാദൃശ്യങ്ങളുള്ള കഥ എന്നതാണ് ലവകുശയുടെ പ്രധാന ന്യൂനതകളിൽ ഒന്ന്. സാധാരണക്കാരായ രണ്ടു ചെറുപ്പക്കാർ അസാധാരണ സംഭവങ്ങൾക്കു സാക്ഷിയാകുകയും സമൂഹ നന്മക്കു വഴിതെളിയിക്കുകയും ചെയ്യുക എന്നത് പ്രമേയപരമായി പുതുമയൊന്നും സമ്മാനിക്കുന്നില്ല.

തിരക്കഥ: ⭐️⭐️
നീരജ് മാധവ് ആദ്യമായി തിരക്കഥ എഴുതിയ സിനിമയാണ് ലവകുശ. ഒരു നവാഗത തിരക്കഥാരചയിതാവിന്റെ പരിചയക്കുറവൊന്നും കഥാസന്ദർഭങ്ങളിലോ സംഭാഷണങ്ങളിലോ കണ്ടില്ല. കണ്ടുമടുത്തതും പ്രവചിക്കാനാവുന്നതുമായ രീതിയിലായിരുന്നു അവയിൽ ഓരോന്നും. ലവനും കുശനും ബിജു മേനോന്റെ ജോൺ കാപ്പ എന്ന കഥാപാത്രവുമെല്ലാം കണ്ടുമടുത്തവ തന്നെ. ആദ്യ പകുതിയിലെ ഹാസ്യ രംഗങ്ങളിൽ ചിലതൊക്കെ പ്രേക്ഷകർ ആസ്വദിച്ചിരുന്നു. ട്രെയിനിലെ യാത്രക്കിടയിൽ സംഭവിക്കുന്നതെല്ലാം രസകരമായിരുന്നു. എന്നാൽ, രണ്ടാം പകുതിയിലെ നീന്തൽ പരിശീലനവും മേക്കപ്പും അസഹനീയ ഹാസ്യ രംഗങ്ങളായിരുന്നു. രണ്ടാം പകുതിയിൽ കുറെ ട്വിസ്റ്റുകളും സസ്‌പെൻസും കുത്തിനിറച്ചു കഥ മറ്റൊരു ദിശയിലേക്ക് സഞ്ചരിക്കുവാൻ തുടങ്ങി. എൺപതുകളിലെ പ്രിയദർശൻ സിനിമകളിലെ പോലെ കുറെ കഥാപാത്രങ്ങളും മണ്ടന്മാരായ വില്ലന്മാരും അടിപിടിയും അബദ്ധങ്ങളും എല്ലാം സമന്വയിപ്പിച്ചു അവതരിപ്പിച്ചു. അവസാനം, ലവകുശന്മാരുടെ സഹായത്തോടെ കുറ്റാന്വേഷണം പൂർത്തിയാക്കുന്നു. ഊഹിക്കാനാവുന്ന കഥയും സസ്പെൻസുകളുമായി സിനിമ അവസാനിക്കുന്നു. നല്ലൊരു നർത്തകനും അഭിനേതാവുമായി കഴിവ് തെളിയിച്ച നീരജിന്റെ കെട്ടുറപ്പുള്ള ഒരു തിരക്കഥക്കായി പ്രേക്ഷകർ കാത്തിരിക്കുന്നു.

സംവിധാനം: ⭐️⭐️
പുതുമയുള്ള കഥയും പേരും അവതരണവുമായി മലയാള സിനിമയിൽ തുടക്കം കുറിച്ച സംവിധായകനാണ് ഗിരീഷ് മനോ.എന്നാൽ രണ്ടാമത്തെ സിനിമയിലെത്തുമ്പോൾ,പുതുമയില്ലാത്ത പ്രമേയവും അവതരണ രീതിയും സ്വീകരിച്ചു പ്രേക്ഷകരെ ബോറടിപ്പിച്ചു. ആദ്യപകുതി ചടുലതയോടെ അവതരിപ്പിച്ചപ്പോൾ, രണ്ടാം പകുതി ഇഴഞ്ഞു നീങ്ങുന്ന അവസ്ഥയിലെത്തി. ഒരുപക്ഷെ ഇത്തരത്തിലുള്ള സിനിമകൾ വേഗത നഷ്ടപ്പെടുത്താതെ അവതരിപ്പിക്കുമ്പോൾ ആയിരിക്കണം അവ പ്രേക്ഷകരെ രസിപ്പിക്കുന്നത്.ഹാസ്യ രംഗങ്ങൾ കണ്ടുമടുത്തവ ആയതുകൊണ്ട് ഈ കഥ പുതുമയുള്ള ഒരു കഥാപശ്ചാത്തലത്തിൽ അവതരിപ്പിക്കാമായിരുന്നു.ഓരോ ട്വിസ്റ്റുകൾക്കു ശേഷം മറ്റൊരു ട്വിസ്റ്റുകൾ വന്നുചേരുന്നത് പ്രേക്ഷകരിൽ ആകാംഷ ജനിപ്പിക്കുന്ന വിധത്തിലുള്ള സാങ്കേതിക മികവ് ആ രംഗങ്ങളിൽ കണ്ടില്ല. ഗോപി സുന്ദറിന്റെ ശബ്ദകോലാഹലങ്ങൾ വേണ്ടുവോളം പശ്ചാത്തലത്തിൽ ആവശ്യത്തിനും അനാവശ്യത്തിനും ഉപയോഗിച്ചിട്ടുണ്ട്!

സാങ്കേതികം: ⭐️⭐️⭐️
ഒരു മെക്സിക്കൻ അപരതയ്ക്കു ശേഷം പ്രകാശ് വേലായുധൻ ഛായാഗ്രഹണം നിർവഹിച്ച സിനിമയാണ് ലവകുശ.ട്രെയിൻ യാത്രക്കിടയിലുള്ള രംഗങ്ങളെല്ലാം കൃത്രിമത്വം നിറഞ്ഞതായിരുന്നു എന്നത് വ്യക്തം.ട്രെയിൻ യാത്രക്കിടയിൽ നീര്ജും അജു വർഗീസും വാതലിനടുത്തു ചെന്ന് നിൽക്കുന്ന രംഗങ്ങൾ ഒഴിവാക്കാമായിരുന്നു. സ്വിമ്മിങ് പൂളിനടിയിലുള്ള രംഗങ്ങളും കൃത്രിമത്വം വ്യക്തമായിരുന്നു.ഒരു ഹാസ്യ സിനിമക്ക് അനിയോജ്യമായ കളർഫുൾ വിഷ്വൽസ് പോലും ഈ സിനിമയിൽ കണ്ടില്ല. അയ്യപ്പന്റെ ‘അമ്മ നെയ്യപ്പം ചുട്ടു എന്ന ഗാനത്തിന്റെ ചിത്രീകരണം രസകരമായിരുന്നു. ഗോപി സുന്ദർ ഈണമിട്ട ആ ഗാനം രസകരമായിരുന്നു. ഗോപി സുന്ദറിന്റെ മുൻകാല സിനിമകളിലെ പശ്ചാത്തല സംഗീതം കൂട്ടികൊഴച്ചു വീണ്ടും അവതരിപ്പിച്ചു ശബ്ദകോലാഹലങ്ങൾ സൃഷ്ട്ടിച്ചു. ചിലയിടങ്ങളിൽ അയ്യപ്പൻറെ അമ്മ എന്ന പാട്ടിന്റെ സംഗീതം ഉപയോഗിച്ചത് നന്നായിരുന്നു. ജോൺകുട്ടിയുടെ സന്നിവേശം സമ്പൂർണ്ണ നിരാശ സമ്മാനിച്ചു. ഇഴഞ്ഞുനീങ്ങുന്ന മന്ദഗതിയിലാണ് രണ്ടാംപകുതി അവസാനിച്ചത്. ലവനും കുശനും എയർ ഹോസ്ട്രെസ്സ് സ്‌കൂളിൽ ചെന്ന് കാണിച്ചുകൂട്ടുന്നത് കോമാളിത്തരങ്ങളിലൂടെ കണ്ടെത്തുന്ന ചില സത്യങ്ങൾ ഹാസ്യത്തിന് വേണ്ടി മാത്രം ഉപയോഗിച്ചവയാണ്. നാഥൻ കണ്ണൂരിന്റെ കലാസംവിധാനം ശരാശരിയിലൊതുങ്ങി.പൊളിഞ്ഞു കിടക്കുന്ന കെട്ടിടത്തിൽ മെയിൻ സ്വിച്ച് ഉൾപ്പടെയുള്ള സജ്ജീകരണങ്ങളും,പകൽ പോലെ പ്രകാശം പരത്തുന്ന വെളിച്ചവും അവിശ്വസനീയമായിരുന്ന.സമീറ സനീഷിന്റെ വസ്ത്രാലങ്കാരം പതിവുപോലെ മികവ് പുലർത്തി.

അഭിനയം: ⭐️⭐️⭐️
ലവനായി നീരജ് മാധവും കുശനായി അജു വർഗീസും മികച്ച അഭിനയം കാഴ്ചവെച്ചു. അജു വർഗീസിന്റെ സമീപകാലത്തെ ഏറ്റവും മികച്ച ഹാസ്യ കഥാപാത്രം ഇതുതന്നെയായിരിക്കും. ജോൺ കാപ്പ എന്ന പോലീസ് ഉദ്യോഗസ്ഥന്റെ വേഷത്തിൽ ബിജു മേനോനും തിളങ്ങി.ചില രംഗങ്ങളിൽ അദ്ദേഹത്തിന്റെ സ്ഥിരം ശൈലിയിലുള്ള അഭിനയ മുഹൂർത്തങ്ങളുണ്ട് ഈ സിനിമയിലുണ്ട്. വിജയ് ബാബു തനിക്കു ലഭിച്ച വേഷം രസകരമായി അവതരിപ്പിച്ചു. പലപ്പോഴും മുദ്ദ്ഗവ് സിനിമയിലെ റാംബോയെ ഓർമ്മിപ്പിച്ചു. നിർമ്മൽ പാലാഴിയുടെ കോഴിക്കോടൻ ഭാഷ രസകരമായിരുന്നു. ഇവരെ കൂടാതെ, മേജർ രവി, ബാലാജി ശർമ്മ, അശ്വിൻകുമാർ, വിഷ്ണു ഗോവിന്ദൻ, ദീപ്തി സതി, അദിതി രവി, അഞ്ജലി നായർ, തെസ്നി ഖാൻ, ബേബി അക്ഷര എന്നിവരും ഈ സിനിമയിൽ അഭിനയിച്ചിട്ടുണ്ട്.

വാൽക്കഷ്ണം: കഥയിൽ കഴമ്പില്ലാത്ത ഹാസ്യ സിനിമകൾ ഇഷ്ടപ്പെടുന്നവരെ ഒരുപരിധിവരെ ലവനും കുശനും തൃപ്തിപെടുത്തിയേക്കാം!

സംവിധാനം: ഗിരീഷ് മനോ
നിർമ്മാണം: ജെയ്സൺ ഇളംകുളം
എഴുത്ത്: നീരജ് മാധവ്
ഛായാഗ്രഹണം: പ്രകാശ് വേലായുധൻ
സന്നിവേശം: ജോൺ കുട്ടി
സംഗീതം: ഗോപി സുന്ദർ
ഗാനരചന: ബി.കെ.ഹരിനാരായണൻ
കലാസംവിധാനം: നാഥൻ കണ്ണൂർ
വസ്ത്രാലങ്കാരം: സമീറ സനീഷ്
ചമയം: റോണക്സ് സേവ്യർ
വിതരണം: ആർ.ജെ.ഫിലിം

Advertisements

അവരുടെ രാവുകൾ – ⭐


പ്രേക്ഷകരുടെ ദുരിത രാവുകൾ! – ⭐

മൂന്ന് ലക്ഷ്യങ്ങളുമായി കൊച്ചിയിലെത്തുന്ന മൂന്ന് ചെറുപ്പക്കാരുടെ കഥയാണ് ഷാനിൽ മുഹമ്മദ് അവതരിപ്പിച്ച അവരുടെ രാവുകൾ. അവതരണത്തിലെ പുതുമ ഒഴിച്ചുനിർത്തിയാൽ കണ്ടുമടുത്ത കേട്ടുപഴകിയ കഥ തന്നെയാണ് അവരുടെ രാവുകളും.

ആത്മവിശ്വാസം നഷ്ടപെടുന്ന ആഷിക്(ആസിഫ് അലി),സിദ്ധാർഥ്(ഉണ്ണി മുകുന്ദൻ),വിജയ്(വിനയ് ഫോർട്ട്) എന്നിവർ അപരിചിതനായ മധ്യവയസ്കനെ(നെടുമുടി വേണു) പരിചയപ്പെടുന്നു. അയാളിലൂടെ മൂവരും പലതും പുതുതായി പഠിക്കുകയും അവരവരുടെ ആത്മവിശ്വാസം വീണ്ടെടുത്ത് ജീവിതത്തിലെ ലക്ഷ്യങ്ങൾ നിറവേറ്റുകയും ചെയ്യുന്നതാണ് ഈ സിനിമയുടെ കഥ.

പ്രമേയം: ⭐⭐
ആത്മവിശ്വാസം നഷ്ടപ്പെട്ട് ആഗ്രഹങ്ങൾ സഫലീകരിക്കാൻ സാധിക്കാതെ മനോവിഷമം നേരിടുന്ന ഒട്ടനവധി ചെറുപ്പക്കാരെ നമ്മൾ ദിനംതോറും കാണുന്നതാണ്. ആത്മവിശ്വാസം വീണ്ടെടുക്കുവാനായി വിജയിക്കുന്നതുവരെ പരിശ്രമിക്കുക എന്നും ആത്മവിശ്വാസത്തിനു തടസ്സം നിൽക്കുന്ന മനസ്സിന്റെ ചിന്തയെ അകറ്റി നിർത്തുക എന്നതാണ് ഷാനിൽ മുഹമ്മദ് അവരുടെ രാവുകളിലൂടെ അവതരിപ്പിക്കുന്ന വിഷയം. മൂന്ന് ചെറുപ്പക്കാരുടെ ജീവിതത്തിലേക്ക് ജോൺസൺ എന്ന മധ്യവയസ്ക്കൻ സൃഷ്ടിക്കുന്ന മാറ്റങ്ങൾ അവർക്കു പ്രചോദനമാവുകയും സ്വന്തം ജീവിതത്തിൽ അത് പ്രയോഗിക്കുകയും ചെയ്യുന്നതാണ് ഈ സിനിമയുടെ കഥ.

തിരക്കഥ: ⭐
ഫിലിപ്സ് ആൻഡ് ദി മങ്കിപെൻ എന്ന ആദ്യ സിനിമയ്ക്ക് ശേഷം ഷാനിൽ മുഹമ്മദ് തിരക്കഥയും സംഭാഷണങ്ങളും എഴുതിയ സിനിമയാണിത്. രണ്ടു സിനിമകളിലും അവതരിപ്പിക്കുന്ന അടിസ്ഥാന പ്രമേയം എന്നത് ജീവിത വിജയത്തിന് ആത്മവിശ്വാസം അനിവാര്യമാണെന്നാണ്. ആദ്യ സിനിമയിൽ കുട്ടികളിലൂടെ അവതരിപ്പിച്ച അതെ പ്രമേയം രൂപമാറ്റങ്ങളോടെ മുതിർന്നവരിലേക്കു പറിച്ചു നട്ടതാണ് അവരുടെ രാവുകളുടെ കഥാംശം. മൂന്ന് ലക്ഷ്യങ്ങളുള്ള മൂന്ന് ചെറുപ്പക്കാർ ഒരേ കുടക്കീഴിൽ എത്തുന്നു. അവരെ നേർവഴിക്കു നടത്തുവാൻ ശ്രമിക്കുന്ന ജോൺസൺ എന്ന കഥാപാത്രം. ഒറ്റ വാചകത്തിൽ കേൾക്കുമ്പോൾ രസകരമാണെങ്കിലും, കഥയ്ക്ക് അനിയോജ്യമായ സന്ദർഭങ്ങൾ എഴുതുവാൻ ഷാനിലിനു സാധിച്ചില്ല എന്നതാണ് എഴുതക്കാരാണെന്ന നിലയിൽ ഷാനിലിന്റെ പരാജയം. സിനിമാനടനാകുവാൻ പരിശ്രമിക്കുന്ന നായക കഥാപാത്രത്തെ പല സിനിമകളിലും പ്രേക്ഷകർ കണ്ടു മടുത്തതാണ്. ക്രിക്കറ് പ്രേമിയായ വ്യക്തിക്കു ഒരു അപകടം സംഭവിക്കുമ്പോൾ അയാൾ സ്ത്രീ ലമ്പടനാകുന്നതും പ്രേക്ഷകരെ രസിപ്പിച്ചില്ല. അറിയാതെ ചെയ്തുപോയ ഒരു തെറ്റിന്റെ കുറ്റബോധത്താൽ ജീവിക്കുന്ന മൂന്നാമത്തവന്റെ കഥ മാത്രമാണ് ഒരല്പം ആശ്വാസം നൽകിയത്. ഒരു ലഘു സിനിമയിലൂടെ പറഞ്ഞവസാനിപ്പിക്കാവുന്ന ഒരു കഥയെ വലിച്ചുനീട്ടി അവതരിപ്പിച്ചതാണ് ഈ സിനിമയുടെ തിരക്കഥ. കഥാസന്ദർങ്ങൾക്കും കഥാപാത്രങ്ങളുടെ സ്വഭാവത്തിനും അനിയോജ്യമായ സംഭാഷണങ്ങളായിരുന്നു സിനിമയിലുടനീളം എന്നത് ആശ്വാസകരം. നെടുമുടി വേണു അവതരിപ്പിക്കുന്ന ജോൺസൺ എന്ന കഥാപാത്രം പൂർണതയില്ലാത്തതായി അനുഭവപെട്ടു. ഒരു കാരണവുമില്ലാതെ കുറെ ചെറുപ്പക്കാരെ സഹായിക്കുന്ന ഒരാൾ എന്ന ദുരൂഹതയോടെ സിനിമ അവസാനിക്കുകയും ചെയ്യുന്നു.

സംവിധാനം: ⭐
അവതരണത്തിലുള്ള പുതുമ എന്നത് മാത്രമാണ് അവരുടെ രാവുകളെ വ്യത്യസ്തമാകുന്നത്. നോൺ ലീനിയർ അവതരണ രീതി മലയാള സിനിമ പ്രേക്ഷകർക്ക് സുപരിചിതമാണെങ്കിലും, അതിന്റെ പുതുമ ഇപ്പോഴും നഷ്ടപ്പെട്ടിട്ടില്ല എന്നതാണ് സത്യം. മൂന്ന് ചെറുപ്പക്കാരുടെ ജീവിതത്തിലെ ആത്മവിശ്വാസം നഷ്ടപെടാനുണ്ടായ സാഹചര്യങ്ങൾ നോൺ ലീനിയർ അവതരണ ശൈലിയിലാണ് ഷാനിൽ അവതരിപ്പിച്ചത്. പക്ഷെ, പ്രേക്ഷകരെ ഒന്നടങ്കം ആശയ കുഴപ്പത്തിലാക്കി ഈ അവതരണ ശൈലി എന്ന് വേണം കരുതാൻ. അതിനോടൊപ്പം ഇഴഞ്ഞു നീങ്ങുന്ന കഥപറച്ചിൽ കൂടിയായപ്പോൾ സമ്പൂർണ ദുരന്തമായി ഈ പരീക്ഷണം. ആത്മവിശ്വാസം നേടിയെടുക്കുന്ന രംഗങ്ങളൊന്നും വിശ്വസനീയമായിരുന്നില്ല. അരമണിക്കൂറിൽ പറഞ്ഞവസാനിപ്പിക്കാവുന്ന ഒരു കഥയെ രണ്ടു മണിക്കൂറുകൊണ്ട് വലിച്ചുനീട്ടി പ്രേക്ഷകരുടെ ക്ഷമ പരീക്ഷിക്കുന്ന നിലവാരത്തിലേക്ക് സിനിമയെ മാറ്റിയതിനു പൂർണ്ണ ഉത്തരവാദിത്വം സംവിധായകനാണ്.

സാങ്കേതികം: ⭐⭐
വിഷ്ണു നാരായണൻ പകർത്തിയ ദൃശ്യങ്ങൾ ശരാശരി നിലവാരം പുലർത്തി. പാട്ടുകളുടെ ചിത്രീകരണം ഒരല്പം പുതുമ നൽകിയെന്നല്ലാതെ മറ്റൊരു സവിശേഷതയും ഛായാഗ്രഹണത്തിൽ കണ്ടില്ല. പ്രജീഷ് പ്രകാശിന്റെ സന്നിവേശം സിനിമയെ മന്ദഗതിയിലാക്കി. ഇഴഞ്ഞു നീങ്ങുന്നതും കഥയിൽ പ്രാധാന്യമില്ലാത്തതുമായ ഒട്ടനവധി കഥാസന്ദർഭങ്ങൾ ആദ്യാവസാനം മുഴച്ചുനിന്നു. നോൺ ലീനിയർ അവതരണ രീതി പ്രേക്ഷകരെ ഒന്നടങ്കം ആശയകുഴപ്പത്തിലാക്കുകയും ചെയ്തു. ശങ്കർ ശർമ്മ ഈണമിട്ട ഏതേതോ സ്വപ്നമോ എന്ന പാട്ടും സംഗീതവും ഇമ്പമുള്ളതായിരുന്നു. വിനീഷ് ബംഗ്ലന്റെ കലാസംവിധാനം കഥാസന്ദർഭങ്ങൾക്കു അനിയോജ്യമായിരുന്നില്ല. ആസിഫ് അലി അവതരിപ്പിച്ച ആഷിക് എന്ന കഥാപാത്രത്തിന്റെ വീടും പരിസരവും എഴുപതുകളെ ഓർമ്മിപ്പിക്കുന്നതായിരുന്നു. വയനാട്ടിലെ ഉൾഗ്രാമങ്ങൾ പോലും വികസനത്തിന്റെ പാതയിലാണ് എന്ന കാര്യം ബംഗ്ലൻ അറിയാഞ്ഞതാണോ ഇതിനു കാരണം?. അതേപോലെ, ആ രംഗങ്ങളിലുള്ള നാട്ടുകാരുടെ വസ്ത്രധാരണവും കഥ നടക്കുന്ന കാലഘട്ടവുമായി ഒത്തുചേർന്നു പോകുന്നില്ല.

അഭിനയം: ⭐⭐⭐
ആഷിക് എന്ന സിനിമാ മോഹിയായി സ്ഥിരം ശൈലി ആവർത്തിച്ച് പിടിച്ചുനിൽക്കുവാൻ ആസിഫ് അലിക്ക് സാധിച്ചു. വിനയ് ഫോർട്ട് പതിവ് രീതിയിൽ വിജയ് ആയി ഭേദപെട്ട പ്രകടനം കാഴ്ചവെച്ചു. ഉണ്ണി മുകുന്ദൻ നന്നേ ബുദ്ധിമുട്ടി സിദ്ധാർത്ഥ് എന്ന സ്ത്രീ ലംബടനെ അവതരിപ്പിച്ചു. മുകേഷും അജു വർഗീസും നെടുമുടി വേണുവും അവരവരുടെ രംഗങ്ങൾ മോശമാക്കാതെ അവതരിപ്പിച്ചു. ഹണി റോസും, ലെനയും, മിലാനയും വന്നുപോകുന്നു. ഇവരെ കൂടാതെ സുധി കോപ്പ, കിരൺ അരവിന്ദാക്ഷൻ, അംബിക മോഹൻ, നിഷ സാരംഗ് എന്നിവരും ഈ സിനിമയിൽ അഭിനയിക്കുന്നുണ്ട്. സണ്ണി വെയ്ൻ, ഷൈൻ ടോം ചാക്കോ, സഞ്ജു ശിവറാം എന്നിവർ അതിഥി താരങ്ങളായി അവസാനാമെത്തുന്നുണ്ട്.

വാൽക്കഷ്ണം: ആത്മവിശ്വാസം വീണ്ടെടുക്കുന്നത് ക്ഷമയോടെ കണ്ടിരിക്കാമെങ്കിൽ ഒരുവട്ടം അവരുടെ രാവുകൾ കാണാം!

രചന, സംവിധാനം: ഷാനിൽ മുഹമ്മദ്
നിർമ്മാണം: അജയ് കൃഷ്ണൻ
ബാനർ: അജയ് എൻറ്റർറ്റെയിമെൻറ്റ്സ്
ഛായാഗ്രഹണം: വിഷ്ണു നാരായണൻ
ചിത്രസന്നിവേശം: പ്രജീഷ് പ്രകാശ്
സംഗീതം: ശങ്കർ ശർമ്മ
കലാസംവിധാനം: വിനീഷ് ബംഗ്ലൻ
വസ്ത്രാലങ്കാരം: നിസ്സാർ റഹ്മത്
ചമയം: അമൽ
വിതരണം: സോപാനം എൻറ്റർറ്റെയിമെൻറ്റ്സ്

അഡ്വഞ്ചേഴ്സ് ഓഫ് ഓമനക്കുട്ടൻ – ⭐


ക്ഷമപരീക്ഷിക്കുന്ന അതിസാഹസികത! – ⭐

താനാരാണെന്നു തനിക്കറിയില്ലെങ്കിൽ താനെന്നോട് ചോദിക്ക് താനാരാണെന്ന്. ഞാനാരാണെന്നു എനിക്കറിയാമോ എന്ന് താനെന്നോട് ചോദിക്ക് അപ്പൊ ഞാൻ പറഞ്ഞു തരാം താനാരാണെന്നും ഞാനാരാണെന്നും!

ഓമനക്കുട്ടന്റെ മൂന്ന് മണിക്കൂർ സാഹസിക യാത്ര കണ്ടിറങ്ങുന്ന ശരാശരി പ്രേക്ഷകന്റെ
അവസ്ഥയെ തേന്മാവിൻ കൊമ്പത്തിലെ കുതിരവട്ടം പപ്പുവിന്റെ സംഭാഷണം കേട്ട മോഹൻലാലിന്റെ അവസ്ഥയോടു ഉപമിക്കാം.

അന്യഭാഷയിൽ നിർമ്മിക്കപ്പെടുന്ന പരീക്ഷണ സിനിമകളെ വിജയിപ്പിക്കുന്ന മലയാളികൾ മാതൃഭാഷയിലുള്ള പരീക്ഷണ സിനിമകളെ തിരസ്ക്കരിക്കുന്നു എന്ന ആക്ഷേപം ഓൺലൈൻ മാധ്യമങ്ങളിൽ ചർച്ചാവിഷയമാണ്. ഇന്ത്യൻ സിനിമ കണ്ടതിൽ ഏറ്റവും പുതുമയുള്ള പരീക്ഷണ സിനിമകളായിരുന്നു മൈഡിയർ കുട്ടിച്ചാത്തനും വൈശാലിയും തൂവാനത്തുമ്പികളും ഞാൻ ഗന്ധർവനും. മേല്പറഞ്ഞ സിനിമകൾ ഇരുകൈയ്യുംനീട്ടി സ്വീകരിച്ചവരാണ് മലയാളികൾ. അവരുടെ മുമ്പിലേക്ക് യുക്തിയെ ചോദ്യം ചെയ്യുന്ന ഒരു കഥയും പുതുമയുള്ള അവതരണമെന്ന പൊള്ളയായ വാദമുന്നയിച്ചു അവതരിപ്പിച്ച ഓമനക്കുട്ടന്റെ അതിസാഹസിക യാത്രയും സ്വീകരിക്കാത്തതിൽ അത്ഭുതമില്ല. ഭീരുവായി ജീവിച്ചിരുന്ന ഒരാൾ തന്റെ ഓർമ്മ നഷ്ടപ്പെടുമ്പോൾ ധീരനായി മാറുന്നു എന്ന പ്രമേയം പുതുമയുള്ളതാണ് എന്നത് സത്യം. എന്നാൽ, ഈ പ്രമേയം യുക്തിയില്ലാത്ത കഥാസന്ദർഭങ്ങളിലൂടെ അവതരിപ്പിച്ചാൽ അത് പരീക്ഷണമായി കണ്ടിരിക്കുന്നവരല്ല ബുദ്ധിയുള്ള പ്രേക്ഷകർ.

മലയാള സിനിമയിൽ പരിചയസമ്പത്തോ പാരമ്പര്യമോ അവകാശപ്പെടാനില്ലാത്തവരായ ഒരുകൂട്ടം പുതുമുഖങ്ങൾ അഡ്വഞ്ചേഴ്സ് ഓഫ് ഓമനക്കുട്ടൻ പോലൊരു സിനിമയുണ്ടാക്കി എന്നത് പ്രശംസനീയമാണ്. സംവിധായകൻ രോഹിത് വി.എസ്., തിരക്കഥാരചയിതാവ് സമീർ അബ്ദുൾ, നിർമ്മാതാക്കളായ ആന്റണി ബിനോയ്-ബിജു പുളിയോക്കൽ, ഛായാഗ്രാഹകൻ അഖിൽ ജോർജ്ജ്, സന്നിവേശകൻ ലിവിങ്സ്റ്റൺ, സംഗീത സംവിധായകൻ ഡോൺ വിൻസെന്റ് എന്നിവരാണ് ആ നവാഗത സുഹൃത്തുക്കൾ.

പ്രമേയം: ⭐⭐
ഇന്നോളം മലയാള സിനിമയിൽ അവതരിപ്പിച്ചിട്ടില്ലാത്ത ഒരു പ്രമേയമാണ് അഡ്വഞ്ചേഴ്സ് ഓഫ് ഓമനകുട്ടനിലൂടെ രോഹിതും സമീറും പറയുന്നത്. പാശ്ചാത്യ സിനിമകളിൽ മാത്രം പരീക്ഷിച്ചിട്ടുള്ള കഥകൾ മലയാള സിനിമയിലും കാണുമ്പോൾ പ്രേക്ഷകർക്ക് കൗതുകമാണ് തോന്നുന്നത്. സിനിമയുടെ പേരോളം തന്നെ സാഹസികമായ ഒരു കഥ രൂപപെടുത്തിയെടുക്കുവാൻ ഇരുവർക്കും സാധിച്ചു. കഥയിൽ ചോദ്യമില്ല എന്ന പഴമൊഴി സ്മരിച്ചുകൊണ്ട് കഥയിലെ മണ്ടത്തരങ്ങൾ ഇവിടെ എഴുതുന്നില്ല. പുതുമയുള്ളതും വ്യത്യസ്തവുമായൊരു പ്രമേയം ആസ്വാദനത്തിനു വകയുള്ള ഒരു കഥയായി എഴുതുവാൻ നവാഗത കൂട്ടത്തിനു കഴിഞ്ഞില്ല എന്നിടത്ത് തന്നെ അവർക്കു കാലിടറി.

തിരക്കഥ: ⭐
സമീർ അബ്ദുൾ എഴുതിയ തിരക്കഥ വ്യത്യസ്തമായിരുന്നെങ്കിലും അവയൊന്നും വിശ്വസനീയമായിരുന്നില്ല. തന്റെ ഓർമ്മ നഷ്ടപ്പെട്ടു എന്ന് സ്വയം തിരിച്ചറിയുമ്പോൾ, അയാൾ ആദ്യം ചെയ്യേണ്ട പ്രവർത്തി പോലീസിന്റെ സഹായം തേടുക എന്നതാകും. ഓമനക്കുട്ടന്റെ സുഹൃത്തുക്കൾ പോലും അദ്ദേഹത്തെ അന്വേഷിച്ചിറങ്ങുകയോ പിന്നീട് ഒരവസരത്തിൽ കാണുമ്പോൾ എവിടെയായിരുന്നുവെന്നു അന്വേഷിക്കുകയോ ചെയ്യുന്നില്ല. ഇത്തരത്തിലുള്ള മണ്ടത്തരങ്ങളാണ് സിനിമയുടെ ആദ്യാവസാനം എഴുതിയിരിക്കുന്നത്. പ്രിയദർശൻ സിനിമകൾ പോലെ സ്ലാപ്സ്റ്റിക്ക് ഹ്യുമറായിരുന്നു സമീർ അബ്ദുൾ ഉദ്ദേശിച്ചതെങ്കിൽ, ഉത്തരത്തിൽ നിന്നെടുക്കാൻ സാധിച്ചതുമില്ല കക്ഷത്തിലുള്ളത് പോവുകയും ചെയ്തു എന്ന് വേണം കരുതാൻ. ഒരല്പം ഫാന്റസി കലർന്നൊരു കഥാസന്ദർഭങ്ങളായിരുന്നു എങ്കിൽ പ്രേക്ഷകർ യുക്തിയുള്ള രംഗങ്ങൾക്ക് വേണ്ടി കാത്തിരിക്കില്ലായിരുന്നു. പ്രേക്ഷകരെ ഒന്നടങ്കം ആശയ കുഴപ്പത്തിലാക്കുന്ന കഥാഗതിയും കൂടി ചേർന്നപ്പോൾ സമ്പൂർണ സാഹസികമായി തിരക്കഥ രചന. ഈ കുറവുകൾക്കു ഒരാശ്വാസമെന്നത് ഓമനക്കുട്ടന്റെ കഥാപാത്ര രൂപീകരണമാണ്. ഭീരുവായ ഒരാൾ സാഹചര്യങ്ങൾ മൂലം ധീരനായി മാറുന്ന കഥാപാത്രത്തിന്റെ സഞ്ചാരം വിശ്വസനീയമായിരുന്നു. സമീർ എഴുതിയ സംഭാഷണങ്ങൾ രസകരമായിരുന്നു. പ്രത്യേകിച്ച് രണ്ടാം പകുതിയിലെ അജു വർഗീസും സിദ്ദിക്കും പറയുന്ന സംഭാഷണങ്ങൾ.

സംവിധാനം: ⭐⭐
സിനിമ സംവിധാനം സ്വപ്നമായി കൊണ്ടുനടക്കുന്നവർക്ക്‌ എന്നും ഒരു പ്രചോദനമാകും രോഹിത്തിനെ പോലുള്ളവർ. ഹൃസ്വ സിനിമകൾ മാത്രം സംവിധാനം ചെയ്ത പരിചയസമ്പത്തിന്റെ ആത്മവിശ്വാസത്തിൽ ഇത്തരത്തിലുള്ളൊരു പരീക്ഷണ സിനിമ സംവിധാനം ചെയ്യാൻ കാണിച്ച ധൈര്യത്തിന് അഭിനന്ദനങ്ങൾ! അവിശ്വസനീയ രംഗങ്ങൾ പതിഞ്ഞ താളത്തിൽ അവതരിപ്പിച്ചപ്പോൾ ഇരട്ടി ദുരന്തമായി. ഓമനക്കുട്ടന്റെ യാത്ര രസകരമായി അവതരിപ്പിച്ചിരുന്നെങ്കിൽ ആസിഫ് അലിയുടെ ജീവിതത്തിലെ വഴിതിരുവാകുമായിരുന്നു ഈ സിനിമയും ഓമനകുട്ടനെന്ന കഥാപാത്രവും. സിനിമ കണ്ടിറങ്ങുന്ന ഭൂരിഭാഗം പ്രേക്ഷകരും കഥയെന്താണെന്നു പോലും മറ്റുള്ളവരോട് ചോദിക്കുന്ന കാഴ്ചയാണ് കണ്ടത്. അന്തവും കുന്തവുമില്ലാതെ ദിശതെറ്റി സഞ്ചരിക്കുന്നതും വലിച്ചു നീട്ടിയതുമായ രംഗങ്ങളാൽ സമ്പന്നമാണ് ആദ്യപകുതി. രണ്ടാം പകുതിയിൽ ഒരല്പം വേഗത കൈവരിക്കുന്ന സിനിമ കണ്ടിരിക്കാവുന്ന അവസ്ഥയിലായി. അതിനു രോഹിതിനെ സഹായിച്ചത് അഖിൽ ജോർജ്ജിന്റെ ഛായാഗ്രഹണവും ഡോൺ വിൻസെന്റിന്റെ പശ്ചാത്തല സംഗീതവുമാണ്. അതോടൊപ്പം ആസിഫ് അലി, ഭാവന, സിദ്ദിഖ്, അജു വർഗീസ് എന്നിവരുടെ അഭിനയവും. രണ്ടേമുക്കാൽ മണിക്കൂർ ദൈർഘ്യമാണ്‌ ഓമനക്കുട്ടന്റെ സാഹസിക യാത്രക്ക് വിനയായ മറ്റൊരു ഘടകം. ഒരു മണിക്കൂറിൽ പറഞ്ഞവസാനിപ്പിക്കാവുന്ന ഒരു കഥയെ നെടുനീളൻ രംഗങ്ങളാൽ അവതരിപ്പിച്ച രോഹിതിന്റെ സംവിധാനം പൂർണ പരാജയമായിരുന്നു. യുക്തിയില്ലാത്ത സന്ദർഭങ്ങൾ സാധാരണക്കാർക്ക് ദഹിക്കാത്ത രീതിയിൽ അവതരിപ്പിക്കുന്നതാണോ പുതുമ? അങ്ങനെയാണെങ്കിൽ ഓമനക്കുട്ടൻ പുതുമയുള്ള സിനിമ തന്നെ.

സാങ്കേതികം: ⭐⭐⭐
ഓമനക്കുട്ടന്റെ യാത്ര ഒപ്പിയെടുത്ത ക്യാമറക്കണ്ണുകൾ അഖിൽ ജോർജ്ജിന്റേതാണ്. പുതുമകൾ നിറഞ്ഞ ഒട്ടനവധി ഫ്രയിമുകൾ സിനിമയിലുടനീളം കാണുവാൻ സാധിച്ചു. ഒരാളുടെ സ്വഭാവത്തെ കേന്ദ്രികരിച്ചു നടക്കുന്ന കഥയായതിനാൽ അയാളുടെ ഭാവാഭിനയവും ശരീരഭാഷയും പ്രേക്ഷകർക്ക് മനസിലാകുന്ന രീതിയിലാകണം രംഗങ്ങൾ ചിത്രീകരിക്കാൻ. ഓമനക്കുട്ടന്റെ ഇമചിമ്മുന്നതും കൈകൾ ചുരുട്ടിപിടിച്ചു നടക്കുന്നതും അടുത്തടുത്ത രംഗങ്ങളിൽ കാണിച്ചത് സ്വഭാവ വിവരണത്തിന് എളുപ്പമായി. ലിവിങ്സ്റ്റൺ മാത്യുവിന്റെ സന്നിവേശം ഇഴഞ്ഞു നീങ്ങുന്ന രീതിയിലായി. ചില രംഗങ്ങളുടെ ദൈർഘ്യം സാധാരണ സിനിമകളിൽ കാണുന്നതിലും കൂടുതലായിരുന്നു. ഇത്രയും രസകരമായ ഒരു കഥയ്ക്ക് എന്തുകൊണ്ടാണ് പതിഞ്ഞ താളത്തിലുള്ള സന്നിവേശ രീതി സ്വീകരിച്ചത് എന്ന് മനസിലാകുന്നില്ല. മനു മഞ്ജിത്, ഹരിനാരായണൻ, ഗുരു എന്നിവരുടെ വരികൾക്ക് അരുൺ മുരളീധരനും ഡോൺ വിൻസെന്റും ചേർന്നാണ് സംഗീതം നൽകിയത്. ഓർത്തിരിക്കാവുന്ന വരികളോ സംഗീതമോ ഒരു ഗാനത്തിന് പോലും സൃഷ്ടിക്കാനായില്ല. ഡോൺ വിൻസെന്റിന്റെ പശ്ചാത്തല സംഗീതം മികവ് പുലർത്തി. പ്രേക്ഷകരെ ഉറങ്ങിപോകാതെ പിടിച്ചിരുത്തിയതിന്റെ ഏറെ പങ്കും വഹിച്ചത് പശ്ചാത്തല സംഗീതത്തിന്റെ ഗുണമൊന്നുകൊണ്ടു മാത്രമാണ്. ഉണ്ണി വിശ്വനാഥിന്റെ കലാസംവിധാനം തരക്കേടില്ലായിരുന്നു. ഓമനക്കുട്ടന്റെ സ്വഭാവത്തിനനുസരിച്ചുള്ള ഒരു വസ്തുവും ഓമനക്കുട്ടൻ താമസിക്കുന്ന മുറിയിൽ കണ്ടില്ല. ധന്യ ബാലകൃഷ്ണന്റെ വസ്ത്രാലങ്കാരം മികവ് പുലർത്തി. ആദ്യ പകുതിയിലെ ഓമനക്കുട്ടന്റെ വേഷവിധാനവും രണ്ടാം പകുതിയിലെ വേഷങ്ങളും അയാളുടെ സ്വഭാവത്തിന്റെ പ്രതിഫലനങ്ങളായിരുന്നു.

അഭിനയം: ⭐⭐
ആസിഫ് അലി, ഭാവന, സിദ്ദിഖ്, അജു വർഗീസ്, കലാഭവൻ ഷാജോൺ, സൈജു കുറുപ്പ്, ശിവജി ഗുരുവായൂർ, വി.കെ.പ്രകാശ്, രാഹുൽ മാധവ്, ഫിറോസ്, ശ്രിന്ദ അഷബ്, അദിതി രവി, ആര്യ രോഹിത് എന്നിവരാണ് ഈ സിനിമയിലെ അഭിനേതാക്കൾ. ഭീരുവായ ഓമനക്കുട്ടനെ മോശമാക്കാതെ അവതരിപ്പിക്കുവാൻ ആസിഫ് അലിക്ക് സാധിച്ചു. ഇമ ചിമ്മുന്നതും ശരീര ഭാഷയിലുള്ള വ്യസ്തസ്ഥയും ഓമനക്കുട്ടന്റെ ഭീരുത്വത്തിനു വിശ്വസനീയത നൽകി. പക്ഷെ, സിനിമയുടെ തുടക്കത്തിൽ നിർത്താതെ ഇമ ചിമ്മിയിരുന്ന ഓമനക്കുട്ടൻ പിന്നീട് എപ്പോഴും അങ്ങനെ ചെയ്യുന്നത് കണ്ടതുമില്ല. ഇടയ്ക്കെപ്പോഴോ ഒഴിമുറിയിലെ ആസിഫ് അലിയുടെ കഥാപാത്രം അഭിനയത്തിൽ സ്വാധീനം ചെലുത്തിയതുപോലെ അനുഭവപെട്ടു. പല്ലവി എന്ന കന്നഡികയായി ഭാവന അഭിനയ മികവ് പുലർത്തി. സിദ്ദിക്കും അജു വർഗീസും അവരവരുടെ രംഗങ്ങൾ രസകരമായി അവതരിപ്പിച്ചു. മറ്റെല്ലാ നടീനടന്മാരും മോശമാക്കാതെയുള്ള അഭിനയം കാഴ്ചവെച്ചു.

വാൽക്കഷ്ണം: വിശ്വസനീയമായ കഥയോ രസകരമായ അവതരണമോയില്ലാത്ത മൂന്ന് മണിക്കൂർ മുഷിപ്പിക്കുന്ന ഓമനക്കുട്ടന്റെ യാത്ര അത്യന്തം അതിസാഹസികമായി.

സംവിധാനം: രോഹിത് വി.എസ്.
നിർമ്മാണം: ആന്റണി ബിനോയ്, ബിജു പുളിയോക്കൽ
ബാനർ: ഫോർ എം എന്ററെർറ്റെയിന്മെന്റ്സ്
രചന: സമീർ അബ്‌ദുൾ
ഛായാഗ്രഹണം: അഖിൽ ജോർജ്ജ്
സന്നിവേശം: ലിവിങ്സ്റ്റൺ മാത്യു
സംഗീതം: അരുൺ മുരളീധരൻ, ഡോൺ വിൻസെന്റ്
പശ്ചാത്തല സംഗീതം, ശബ്ദസംവിധാനം: ഡോൺ വിൻസെന്റ്
ഗാനരചന: മനു മഞ്ജിത്, ഹരിനാരായണൻ, ഗുരു
കലാസംവിധാനം: ഉണ്ണി വിശ്വനാഥൻ
ചമയം: രാജേഷ് നെന്മാറ
വസ്ത്രാലങ്കാരം: ധന്യ ബാലകൃഷ്ണൻ
സംഘട്ടനം: മാഫിയ ശശി
വിതരണം: ഫോർ എം റിലീസ്.

അലമാര – ⭐⭐


അലമാര ഒരു നിരുപദ്രവ വസ്തുവാണ്! – ⭐⭐

അലമാരയ്ക്കുളിലെ ഭീകര ജീവിയെ കണ്ടാസ്വദിക്കാൻ പോയ പ്രേക്ഷകർ നിരാശയോടെ മടങ്ങുകയും സംവിധായകനോട് കലിപ്പിലാകുകയും ചെയ്തു എന്നാണു മലയാള സിനിമ ലോകത്തെ പുതിയ വാർത്ത.

ആട് ഒരു ഭീകര ജീവിയാണ്, ആൻ മരിയ കലിപ്പിലാണ് എന്നീ സിനിമകൾക്ക് ശേഷം മിഥുൻ മാനുവൽ തോമസ് സംവിധാനം ചെയ്ത അലമാരയ്ക്കുളിലെ കാഴ്ച്ചകൾ കണ്ടുമടുത്തതും കേട്ടുപഴകിയതുമാണ്. തൊണ്ണൂറുകളിലെ ജയറാം-രാജസേനൻ സിനിമകളെ ഓർമ്മിപ്പിക്കുന്ന കഥയും കഥാസന്ദർഭങ്ങളും കഥാഗതിയും അവതരണവുമാണ് ഈ സിനിമയുടേതും. നവദമ്പതികളുടെ കുടുംബ ജീവിതത്തിൽ ഒരു അലമാര മൂലമുണ്ടാകുന്ന പ്രശ്നങ്ങളാണ് നർമ്മ മുഹൂർത്തങ്ങളിലൂടെ അവതരിപ്പിച്ചിരിക്കുന്നത്. ജോൺ മന്ത്രിക്കലാണ് അലമാരയുടെ തിരക്കഥയും സംഭാഷണങ്ങളും എഴുതിയത്.

സണ്ണി വെയ്ൻ, പുതുമുഖം അദിതി രവി, രഞ്ജി പണിക്കർ, മണികണ്ഠൻ ആചാരി, അജു വർഗീസ്, സൈജു കുറുപ്പ്, സുധി കോപ്പ, സാദിഖ്, ഇന്ദ്രൻസ്, സീമ ജി.നായർ എന്നിവരാണ് അലമാരയിലെ അഭിനേതാക്കൾ. ഫുൾ ഓൺ സ്റ്റൂഡിയുസിന്റെ ബാനറിൽ നിർമ്മിച്ചിരിക്കുന്ന അലമാര വിതരണം ചെയ്തിരിക്കുന്നത് ലാൽജോസിന്റെ എൽ.ജെ.ഫിലിംസാണ്.

പ്രമേയം: ⭐⭐
നവയുഗ ദമ്പതിമാരുടെ സ്വകാര്യതയ്ക്കിടയിൽ അമിതമായി ഇടപെടുന്ന മാതാപിതാക്കളും ബന്ധുക്കളും ഒരുപരിധി വരെ ദമ്പതികൾ തമ്മിലുള്ള പ്രശ്നങ്ങൾ വഷളാക്കുകയാണ് ചെയ്യുന്നത്. ഇന്ന് കേരളത്തിലെ ഒട്ടുമിക്ക കുടുംബങ്ങളിലും സംഭവിച്ചുകൊണ്ടിരിക്കുന്ന ഒരു വിഷയമാണ് മഹേഷ് ഗോപാൽ എഴുതിയ കഥ. പ്രമേയപരമായി പുതുമയൊന്നും അവകാശപ്പെടാനില്ല എങ്കിലും എല്ലാ കാലഘട്ടത്തിലും ഒരു ശരാശരി മലയാളി കുടുംബത്തിൽ സംഭവിക്കാൻ സാധ്യതയുള്ള ഒരു വിഷയമാണ് ഈ സിനിമയിലൂടെ ചർച്ചചെയ്യുന്നത്. അത് ഹാസ്യരൂപേണ അവതരിപ്പിക്കുവാൻ അണിയറ പ്രവർത്തകർ തിരഞ്ഞെടുത്തത് ഒരു അലമാരയായിരുന്നു.

തിരക്കഥ: ⭐⭐
ജോൺ മന്ത്രിക്കൽ എഴുതിയ കഥാസന്ദർഭങ്ങൾ ലവലേശം കഴമ്പില്ലാത്ത ഒന്നായിട്ടാണ് പ്രേക്ഷകർക്ക് തോന്നിയത്. ജയറാം അഭിനയിച്ച നിരവധി സിനിമകളിലും മലയാള ടെലിവിഷൻ സീരിയലുകളും നമ്മൾ കണ്ടിട്ടുള്ള കഥാസന്ദർഭങ്ങൾ അതേപടി തിരക്കഥയിൽ ഉൾപെടുത്തിയതുപോലെ അനുഭവപെട്ടു. ഇന്നത്തെ കാലഘട്ടത്തിൽ ഇങ്ങനെയൊക്കെ ചിന്തിക്കുന്ന ആളുകളുണ്ടോ എന്ന് തോന്നിപ്പിക്കുന്ന രംഗങ്ങളാണ് സിനിമയിലുടനീളം. സംഭാഷണങ്ങളിലുള്ള നർമ്മമാണ് ഒരല്പമെങ്കിലും പ്രേക്ഷകരെ രസിപ്പിക്കുന്നത്. അവിശ്വസനീയ രംഗങ്ങൾ കുത്തിനിറച്ച ഈ തിരക്കഥ ഏതു രീതിയിലാണ് സണ്ണി വെയ്‌നിനെ ആകർഷിച്ചത് എന്ന മനസിലാകുന്നില്ല. ഇത്രയും പഠിപ്പും വിവരവുമുള്ള ഒരു ചെറുപ്പക്കാരന് കേവലം ഒരു അലമാര മൂലമുണ്ടാകുന്ന ബാലിശമായ പ്രശനങ്ങൾ ഒത്തുതീർപ്പാക്കാൻ സാധിക്കുന്നില്ല എന്നത് ഒരിക്കലും അംഗീകരിക്കാൻ സാധിക്കുന്നതല്ല. ആക്ഷേപഹാസ്യേനെയുള്ള അവതരണമായിരുന്നുവെങ്കിൽ മേല്പറഞ്ഞ തെറ്റുകുറ്റങ്ങൾ ഒരുപരിധി വരെ പ്രേക്ഷകർ ക്ഷമിക്കുമായിരുന്നു. ഈ അലമാര ഒരു നിരുപദ്രവ ജീവിയാണെന്ന് പ്രേക്ഷകർ വിധിയെഴുതി കഴിഞ്ഞു.

സംവിധാനം: ⭐⭐
അവതരണത്തിന്റെ പുതുമകൊണ്ട് ശ്രദ്ധ നേടിയ ഒന്നാണ് ആട് ഒരു ഭീകര ജീവിയാണ് എന്ന സിനിമ. പ്രമേയത്തിലും അവതരണത്തിലും വ്യത്യസ്തതയുള്ള സിനിമയായിരുന്നു ആൻ മരിയ കലിപ്പിലാണ്. മേല്പറഞ്ഞ സിനിമകളിലുള്ള സവിശേഷതകൾ രണ്ടുമില്ലാത്ത സിനിമയാണ് അലമാര. രണ്ടരമണിക്കൂർ ദൈർഘ്യമുള്ള സിനിമയിൽ നല്ല മുഹൂർത്തങ്ങൾ കണ്ടെത്താൻ പ്രേക്ഷകർ പാടുപെടുന്ന കാഴ്ചയാണ് കണ്ടത്. കൃത്രിമത്വം നിറഞ്ഞതും ഏച്ചുകെട്ടലുകൾ തോന്നിപ്പിക്കുന്നതുമായ അവതരണ രീതിയാണ് പ്രേക്ഷകരെ ഏറെ മുഷിപ്പിച്ചത്. പെൺവീട്ടുകാർ അലമാര വീടിനകത്തു കൊണ്ടുചെല്ലുമ്പോൾ അവർ കേൾക്കെ പരദൂഷണം പറയുക, അലമാര ബാംഗളൂരിലെ വീട്ടിലേക്കു കൊണ്ടുപോകാത്തതിന് പെൺകുട്ടിയുടെ അച്ഛൻ മരുമകനോട് അത് ആവശ്യപ്പെടുന്ന രീതി, അലമാര തുറക്കാൻ സാധിക്കാത്ത അവസരത്തിൽ ആ ജോലി ഒരു മോഷ്ട്ടാവിനെ ഏൽപ്പിക്കുക തുടങ്ങിയ ഒട്ടനവധി രംഗങ്ങളുടെ അവതരണം അവിശ്വസനീയമായി അനുഭവപെട്ടു. എന്തു കോമാളിത്തരം കാണിച്ചാലും പ്രേക്ഷകർ അത് കണ്ടിരിക്കും എന്ന സംവിധായകന്റെ ചിന്ത അസ്ഥാനത്തായി. ടോറന്റിൽ പ്രദർശന വിജയം നേടിയാലും മതി എന്ന തോന്നലാണോ ഇതിനു പിന്നിൽ എന്ന് സംശയിക്കേണ്ടിയിരിക്കുന്നു. ഇതിലും മികച്ച സിനിമയുമായി മിഥുൻ തിരിച്ചുവരുമെന്ന പ്രതീക്ഷയോടെ പ്രേക്ഷകർ കാത്തിരിക്കുന്നു.

സാങ്കേതികം: ⭐⭐⭐
സതീഷ് കുറുപ്പ് പകർത്തിയ അലമാര കാഴ്ചകൾ ശരാശരി നിലവാരം പുലർത്തി. കണ്ടുമടുത്ത കാഴ്ചകൾക്ക് അപ്പുറത്തേക്ക് സിനിമയുടെ രംഗങ്ങൾ സഞ്ചരിക്കുന്നില്ല. ബാംഗ്ലൂർ നഗരത്തിലെ കാഴ്ച്ചകൾക്കും പുതുമയില്ല. സതീഷ് പകർത്തിയ രംഗങ്ങൾ വേഗതയോടെ കോർത്തിണക്കുവാൻ ലിജോ പോളിന് സാധിച്ചു. പഴയകാല മലയാള സിനിമകളെ ഓർമ്മിപ്പിക്കുന്ന രീതിയിലായിരുന്നു രംഗങ്ങളുടെ ചിത്രീകരണവും സന്നിവേശവും. സമീപകാലത്തെ ഏറ്റവും മികച്ച പ്രണയ ഗാനങ്ങളിൽ ഒന്നാണ് മനു മഞ്ജിത് എഴുതി സൂരജ് എസ്. കുറുപ്പ് ഈണമിട്ട “പൂവാകും നീയെൻ അരികിൽ ഇല്ലെങ്കിൽ ശലഭമാം ഞാനേകനല്ലേ” എന്ന ഗാനം. നല്ല വരികളും അതിനിണങ്ങിയ സംഗീതവും വിജയ് യേശുദാസ്-അഞ്ജു ജോസഫ് എന്നിവരുടെ ഗാനാലാപനവും മേല്പറഞ്ഞ ഗാനത്തിന്റെ മാറ്റുകൂട്ടി. സൂരജ് എസ്.കുറുപ്പിന്റെ പശ്ചാത്തല സംഗീതമാണ് സംവിധായകനെ സഹായിച്ച പ്രധാന ഘടകം. ഓരോ രംഗങ്ങൾക്കും അനിയോജ്യമായ പശ്ചാത്തല സംഗീതം നൽകുവാൻ സൂരജിന് സാധിച്ചത് സിനിമയ്ക്ക് ഗുണം ചെയ്തിട്ടുണ്ട്. അരുൺ വെഞ്ഞാറമൂടാണ് അലമാരയുടെ മൂന്ന് കാലഘട്ടങ്ങളിലുള്ള രൂപമാറ്റങ്ങൾ ഒരുക്കിയത്. സമീറ സനീഷിന്റെ വസ്ത്രാലങ്കാരവും റോണക്സ് സേവ്യർ ചമയവും നിർവഹിച്ചിരിക്കുന്നു.

അഭിനയം: ⭐⭐⭐
പുതുമുഖ നടന്മാരിൽ തനതായ ശൈലികൊണ്ട് വേറിട്ട നിൽക്കുന്ന അഭിനയമാണ് സണ്ണി വെയ്ൻ എന്ന നടന്റെത്. ക്യാമറയ്ക്കു മുമ്പിൽ അഭിനയിക്കുക എന്ന തോന്നലുണ്ടാക്കാത്ത അങ്ങേയറ്റം ലളിതമായിട്ടാണ് സണ്ണി ഓരോ കഥാപാത്രങ്ങളെയും അവതരിപ്പിക്കുന്നത്. കമ്മട്ടിപ്പാടത്തിലൂടെ മികച്ച സ്വഭാവ നടനുള്ള സംസ്ഥാന ചലച്ചിത്ര പുരസ്കാരം ലഭിച്ച മണികണ്ഠൻ ആചാരി ഈ സിനിമയിൽ സുപ്രൻ എന്ന അമ്മാവൻ കഥാപാത്രത്തെയാണ് ഏറെ രസകരമായി അവതരിപ്പിച്ചിരിക്കുന്നത്. ഇതുവരെ അഭിനയിച്ചതിൽ നിന്നും വ്യത്യസ്തതയുള്ള കഥാപാത്രമായ ഒരു പെൺങ്കോന്തൻ ഭർത്താവിന്റെ റോളിൽ രഞ്ജി പണിക്കർ തിളങ്ങി. പുതുമുഖം അദിതി രവി നായിക കഥാപാത്രത്തെ കയ്യടക്കത്തോടെ അവതരിപ്പിച്ചു. അജു വർഗീസും, സൈജു കുറുപ്പും, സുധി കോപ്പയും അവരവരുടെ രംഗങ്ങളിൽ മിതത്തോടെയും മികവോടെയും അഭിനയിച്ചു. ഏറെ വ്യത്യസ്തമായ ഒരു വില്ലൻ വേഷത്തിൽ ഇന്ദ്രൻസും മികച്ച പ്രകടനം കാഴ്ചവെച്ചു. സീമ ജി.നായർ തന്റെ സ്വതസിദ്ധമായ രീതിയിൽ അമ്മ വേഷം അവതരിപ്പിച്ചു. ഇവരെ കൂടാതെ ചെറിയ വേഷങ്ങളിൽ പുതുമുഖ നടീനടന്മാരും അഭിനയിച്ചിട്ടുണ്ട്.

വാൽക്കഷ്ണം: പ്രവചിക്കാനാവുന്ന കഥാസന്ദർഭങ്ങളുടെ കൃത്രിമത്വം നിറഞ്ഞ അവതരണമാണ് അലമാര.

സംവിധാനം: മിഥുൻ മാനുവൽ തോമസ്
നിർമ്മാണം: ഫുൾ ഓൺ സ്റ്റൂഡിയോസ്
കഥ: മഹേഷ് ഗോപാൽ
തിരക്കഥ, സംഭാഷണം: ജോൺ മന്ത്രിക്കൽ
ഛായാഗ്രഹണം: സതീഷ് കുറുപ്പ്
ചിത്രസന്നിവേശം: ലിജോ പോൾ
സംഗീതം: സൂരജ് എസ്. കുറുപ്പ്
ഗാനരചന: മനു മഞ്ജിത്
കലാസംവിധാനം: അരുൺ വെഞ്ഞാറമൂട്
ചമയം: റോണക്സ് സേവ്യർ
വസ്ത്രാലങ്കാരം: സമീറ സനീഷ്
വിതരണം: എൽ.ജെ.ഫിലിംസ്.

ഒരേ മുഖം – ⭐⭐


ആവർത്തനവിരസമീ മുഖം! – ⭐⭐

അവ്യക്ത കഥാപാത്രങ്ങളും അറുബോറൻ കഥാസന്ദർഭങ്ങളും അപക്വ സംവിധാനവും കൂടിച്ചേർന്ന അപ്രിയ സിനിമയാണ് ഒരേ മുഖം. കോളേജ് ക്യാംപസ്സ് കഥാപശ്ചാത്തലമാക്കിയ ഒരു സിനിമയിൽ പ്രണയവും ചട്ടമ്പിത്തരവും കാന്റീനും ഹോസ്റ്റലും അശ്ലീലവും അനിവാര്യമായ ഘടകങ്ങളാണെന്നു ലാൽ ജോസിന്റെ ക്ലാസ്മേറ്റ്സും, വൈശാഖിന്റെ സീനിയേഴ്‌സും നമ്മൾക്ക് കാണിച്ചു തന്നിട്ടുണ്ട്. മേല്പറഞ്ഞ രണ്ടു സിനിമകളിലും നമ്മൾ കണ്ട കഥാസന്ദർഭങ്ങളും കേട്ട സംഭാഷണങ്ങളും ഒരിക്കൽക്കൂടി കാണാനും കേൾക്കാനും ആഗ്രഹമുള്ളവർക്കായി ഒരുക്കിയ സിനിമയാണ് ഒരേ മുഖം.

രാജീവ് പിള്ള നായകനായി അഭിനയിച്ച കാശ് എന്ന ആദ്യ സിനിമ സംവിധാന ദുരന്തത്തിനു ശേഷം സജിത്ത് ജഗദ്‌നന്ദൻ സംവിധാനം ചെയ്തിരിക്കുന്ന ഒരേ മുഖത്തിൽ ധ്യാൻ ശ്രീനിവാസൻ കേന്ദ്രകഥാപാത്രത്തെ അവതരിപ്പിച്ചിരിക്കുന്നു. ദീപു എസ്.നായരും സന്ദീപ് സദാനന്ദനും ചേർന്നാണ് ഒരേ മുഖത്തിന്റെ തിരക്കഥയും സംഭാഷണങ്ങളും എഴുതിയത്. സതീഷ് കുറുപ്പ് ഛായാഗ്രഹണവും രഞ്ജൻ എബ്രഹാം ചിത്രസന്നിവേശവും ബിജിബാൽ പശ്ചാത്തല സംഗീത സംവിധാനവും നിർവഹിച്ചിരിക്കുന്നു. ബാക്ക്വാട്ടർ സ്റ്റൂഡിയോസിന്റെ ബാനറിൽ ഈ സിനിമ നിർമ്മിച്ചിരിക്കുന്നത് അനിൽ ബിശ്വാസും ജയലാൽ മേനോനും ചേർന്നാണ്. ലിസ്റ്റിൻ സ്റ്റീഫന്റെ മാജിക് ഫ്രെയിമ്സാണ് ഈ സിനിമ വിതരണം ചെയ്തിരിക്കുന്നത്.

പ്രമേയം: ⭐⭐⭐
മലയാള സിനിമയിലെ എക്കാലത്തെയും മികച്ച ക്യാംപസ്സ് സിനിമകളിൽ ഒന്നാണ് ലാൽ ജോസിന്റെ ക്ലാസ്സ്മേറ്റ്സ്. സുകുവിന്റെയും താരയുടെയും മുരളിയുടെയും ജീവിതത്തിൽ നടന്ന യഥാർത്ഥ സംഭവങ്ങളുടെ ചുരുളഴിയുന്നത് വർഷങ്ങൾക്കു ശേഷമുള്ള ഒരു കൊലപാതക ശ്രമത്തിലൂടെയാണ്. ഒരേ മുഖം എന്ന സിനിമയുടെ പ്രമേയവും ക്ലാസ്മേറ്റ്സ് സിനിമ പോലെയാണ്. 36 വർഷങ്ങൾക്കു മുമ്പ് നടന്ന ഇരട്ട കൊലപാതകത്തിന്റെ നിജസ്ഥിതി പുറംലോകമറിയുന്നത് ആരോ ഒരാളുടെ പ്രതികാരത്തിന്റെ ഭാഗമായി നടക്കുന്ന കൊലപാതകത്തിന്റെ കേസ് അന്വേഷണത്തിലൂടെയാണ്. മലയാള സിനിമ പ്രേമികൾക്ക് ഏറ്റവും പ്രിയപ്പെട്ടതാണ് കോളേജ് ക്യാംപസ്സ് കഥകൾ. അതിൽ ഒരല്പം പ്രണയവും സസ്‌പെൻസും ഉണ്ടെങ്കിൽ തൃപ്തരാകും പ്രേക്ഷകർ. അത് പഴയ കാലഘട്ടത്തിലൂടെ അവതരിപ്പിക്കുമ്പോൾ ആ സിനിമയ്ക്ക് മാറ്റു കൂടുകയാണ് പതിവ്. ഒരേ മുഖം എന്ന സിനിമയുടെ കഥയും മേല്പറഞ്ഞ ഘടകങ്ങളിലൂടെയാണ് അവതരിപ്പിച്ചിരിക്കുന്നത്.

തിരക്കഥ: ⭐
ദീപു എസ്.നായരും സന്ദീപ് സദാനന്ദനും ചേർന്നാണ് ഒരേ മുഖത്തിന്റെ കഥയും തിരക്കഥയും സംഭാഷണങ്ങളും എഴുതിയിരിക്കുന്നത്. നവാഗതരുടെ പരിചയക്കുറവുമൂലമാണോ അതോ ക്ലാസ്മേറ്റ്സും സീനിയേഴ്‌സും പ്രേമവും
കണ്ടിഷ്ടപ്പെട്ടു തലക്കുപിടിച്ചതിന്റെ കെട്ടുവിടാത്തതുകൊണ്ടാണോ ഇതുപോലൊരു സാഹസത്തിനു ഇരുവരും മുതിർന്നത്?. സിനിമയുടെ ആദ്യാവസാനം കണ്ടുമടുത്ത കഥാസന്ദർഭങ്ങളും കഥാപാത്രങ്ങളും സംഭാഷണങ്ങളും കൃത്യമായി എഴുതിച്ചേർക്കപെട്ട തിരക്കഥയാണ് ഈ സിനിമയുടേത്. സുഹൃത്തുക്കളുടെ ആത്മബന്ധമോ അവരുടെ പ്രണയമോ ഓരോ കഥാപാത്രങ്ങളുടെ സ്വഭാവ വിവരണമോ ഒന്നും തന്നെ കഥാസന്ദർഭങ്ങളാകുന്നില്ല. സഖറിയ പോത്തൻ എന്നയാളുടെ വ്യക്തിത്വം എങ്ങനെയായിരുന്നു എന്നതിനാണ് കൂടുതൽ പ്രാധാന്യം നൽകിയിരിക്കുന്നത്. പുതിയ കാലഘട്ടത്തിൽ കുറ്റാന്വേഷണവും ജേർണലിസവും കൂട്ടിയോജിപ്പിച്ച സ്ഥിരം സന്ദർഭങ്ങൾ അവർത്തനവിരസമായി അനുഭവപെട്ടു. എസ്റ്റേറ്റ് കൊലപാതകവും അതിലേക്കു നയിച്ച കഥാസന്ദർഭങ്ങളും സിനിമയുടെ തുടക്കത്തിൽ തന്നെ പ്രേക്ഷകർക്ക് എളുപ്പത്തിൽ ഊഹിക്കാനാവുന്നതാണ്. രണ്ടു കാലഘട്ടങ്ങളിലെ ഒരേ കഥാപാത്രങ്ങളുടെ പേരുകൾ ഓർത്തുവെക്കുക എന്നതായിരുന്നു പ്രേക്ഷകരെ മുഷിപ്പിച്ച മറ്റൊരു കാര്യം. തരക്കേടില്ലാത്തൊരു പ്രമേയം ലഭിച്ചിട്ടും നല്ലൊരു കഥയോ കഥാസന്ദർഭങ്ങളോ കഥാപാത്രങ്ങളോ ഒന്നും തന്നെ രൂപപ്പെടുത്തിയെടുക്കുവാൻ തിരക്കഥാകൃത്തുക്കൾ ശ്രമിച്ചില്ല എന്നത് ദൗർഭാഗ്യകരമാണ്.

സംവിധാനം: ⭐
പല സിനിമകളും യഥാർത്ഥത്തിൽ ജനിക്കുന്നത് എഡിറ്റിങ് ടേബിളിൽ ആണെന്ന് പരിഹാസത്തോടെ പറയുന്നത് കേട്ടിട്ടുണ്ട്. അത്തരത്തിലാണോ ഒരേ മുഖവും ഉണ്ടാക്കപ്പെട്ടതു എന്ന് സംശയിക്കേണ്ടിയിരിക്കുന്നു. ഒരു ബന്ധവുമില്ലാത്ത കുറെ സന്ദർഭങ്ങൾ സമന്വയിപ്പിച്ചു പശ്ചാത്തല സംഗീതത്തിന്റെ അകമ്പടിയോടെ അവതരിപ്പിച്ചാൽ അതൊരു ത്രില്ലർ സിനിമയാകുമോ? സജിത്ത് ജഗദ്‌നന്ദൻ എന്ന സംവിധായകന്റെ ശ്രമങ്ങൾ പാഴായിപോയത് സിനിമയുടെ അവതരണത്തിലാണ്. പുതിയ കാലഘട്ടവും പഴയ കാലഘട്ടവും അവതരിപ്പിച്ചപ്പോൾ കഥയിൽ ഒളിപ്പിച്ചുവെച്ച സസ്പെൻസ് പ്രേക്ഷകർ ഊഹിച്ചെടുത്തു. കഥാപാത്രങ്ങൾക്ക് അനിയോജ്യരല്ലാത്ത അഭിനേതാക്കളെയാണ് സംവിധായകൻ ഈ സിനിമയിൽ തിരഞ്ഞെടുത്തിരിക്കുന്നത്. എസ്റ്റേറ്റ് കൊലപാതകം നടന്നിട്ട് വർഷം കുറെയായിട്ടും അതിനിടയിൽ തോന്നാത്ത പ്രതികാരം ഇത്രയും വർഷങ്ങൾക്കു ശേഷം തോന്നുവാനുള്ള കാരണം അവ്യക്തമാണ്. ഒന്നിനും ഒരു വ്യക്തതയില്ലാതെയാണ് ഓരോ കഥാസന്ദർഭങ്ങളും ചിത്രീകരിച്ചിരിക്കുന്നത്. ഒരുപാട് നാളത്തെ കാത്തിരിപ്പിനൊടുവിൽ പ്രേക്ഷരുടെ മുന്നിലെത്തിയ ഒരേ മുഖം എന്നേക്കുമായി മറന്നേക്കാവുന്ന മുഖമായി മാറുമെന്ന് കരുതിയില്ല.

സാങ്കേതികം:⭐⭐⭐
അവതരണത്തിൽ പാകപ്പിഴകൾ ഏറെയുണ്ടെങ്കിലും ബിജിബാലിന്റെ പശ്ചാത്തല സംഗീതം രംഗങ്ങൾക്ക് അനിയോജ്യമായിരുന്നു. ത്രസിപ്പിക്കുന്ന രംഗങ്ങൾ ഒന്നുമില്ലാഞ്ഞിട്ടും പ്രേക്ഷകരെ പിടിച്ചിരുത്തുവാൻ ആയിട്ടുണ്ടെങ്കിൽ അത് പശ്ചാത്തല സംഗീതത്തിന്റെ മികവുകൊണ്ട് മാത്രമാണ്. സദിരുമായി വരികയായ് എന്ന് തുടങ്ങുന്ന പാട്ടിന്റെ ഈണം പകരുന്നതും ബിജിബാലാണ്. റഫീഖ് അഹമ്മദാണ് ഗാനരചന. ലാൽജി എഴുതിയ ആരും അറിയാത്തൊരു എന്ന് തുടങ്ങുന്ന പാട്ടും ഈ സിനിമയിലുണ്ട്. സതീഷ് കുറുപ്പിന്റെ ഛായാഗ്രഹണം പ്രത്യേകിച്ച് പുതുമകളൊന്നും സമ്മാനിക്കാതെ ശരാശരിയിലൊതുങ്ങി. പുതിയ കാലഘട്ടം മഞ്ഞ നിറത്തിലുള്ളതാക്കിയത് എന്ത് കാരണത്താലാണ്? രൂപേഷ് പീതാംബരന്റെ തീവ്രം എന്ന സിനിമയ്ക്ക് ശേഷം രണ്ടു കാലഘട്ടങ്ങൾ അവതരിപ്പിക്കുമ്പോൾ ഇത്തരത്തിലുള്ള പരീക്ഷണങ്ങൾ നടത്തുന്നത് ഒരേ മുഖത്തിലാണ്. രഞ്ജൻ എബ്രഹാമാണ് രംഗങ്ങൾ സന്നിവേശം ചെയ്തത്. ഒരു രംഗവും തൊട്ടടുത്ത രംഗവും തമ്മിൽ പരസ്പര ബദ്ധം പോലുമില്ലാതെയാണ് ഈ സിനിമ അവതരിപ്പിച്ചത്. സമീറ സനീഷിന്റെ വസ്ത്രാലങ്കാരം മികവ് പുലർത്തിയപ്പോൾ പ്രദീപ് രംഗന്റെ ചമയം ശരാശരിയിലൊതുങ്ങി. സാബു മോഹനാണ് കലാസംവിധാനം നിർവഹിച്ചത്.

അഭിനയം: ⭐⭐⭐
തുമ്പിയെക്കൊണ്ട് കല്ലെടുപ്പിക്കുക എന്ന പഴമൊഴിയുടെ ഉത്തമ ഉദാഹരണമാണ് സഖറിയ പോത്തൻ എന്ന കഥാപാത്രം അവതരിപ്പിക്കുവാൻ ധ്യാൻ ശ്രീനിവാസനെ തിരഞ്ഞെടുത്തത്. തിരയിലൂടെ ത്രസിപ്പിക്കുകയും കുഞ്ഞിരാമായണത്തിലൂടെ നമ്മളെ രസിപ്പിക്കുകയും ചെയ്ത ധ്യാൻ, തന്നാലാകുംവിധം സഖറിയ പോത്തനെ വിശ്വസനീയതയോടെ അവതരിപ്പിക്കുവാൻ ശ്രമിച്ചിട്ടുണ്ട്. തന്റെ അഭിനയ ജീവിതത്തിൽ ധ്യാൻ നേരിട്ടതിൽ ഏറ്റവും വെല്ലുവിളി ഉയർത്തിയ കഥാപാത്രമായിരിക്കും സഖറിയ പോത്തൻ. ദാസ് എന്ന കഥാപാത്രത്തെ അജു വർഗീസ് തന്റെ സ്ഥിരം ശൈലിയിൽ രസകരമായി അവതരിപ്പിച്ചു. ഈ സിനിമയിലെ മറ്റെല്ലാ നടീനടന്മാരും അവരവരുടെ കഥാപാത്രങ്ങൾ മോശമാക്കാതെ അവതരിപ്പിച്ചിട്ടുണ്ട്. ദീപക് പറമ്പോൾ, അർജുൻ നന്ദകുമാർ, ജൂബി നൈനാൻ, മണിയൻ പിള്ള രാജു, രഞ്ജി പണിക്കർ, ചെമ്പൻ വിനോദ് ജോസ്, ദേവൻ, നോബി, കോട്ടയം പ്രദീപ്, ശ്രീജിത്ത് രവി, ഹരീഷ് പരേഡി, പ്രയാഗ മാർട്ടിൻ, ഗായത്രി സുരേഷ്, സ്നേഹ, ജുവൽ മേരി, അഭിരാമി, നീന കുറുപ്പ്, ദേവി അജിത്, സ്നേഹ ശ്രീകുമാർ എന്നിവരാണ് മറ്റു പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്.

വാൽക്കഷ്ണം: സമ്പൂർണ്ണ നിരാശ സമ്മാനിക്കുന്ന ഒരുപിടി കഥാസന്ദർഭങ്ങളും ഒരേ മുഖങ്ങളും!

സംവിധാനം: സജിദ് ജഗദ്‌നന്ദൻ
നിർമ്മാണം: അനിൽ ബിശ്വാസ്, ജയലാൽ മേനോൻ
രചന: ദീപു എസ്.നായർ, സന്ദീപ് സദാനന്ദൻ
ഛായാഗ്രഹണം: സതീഷ് കുറുപ്പ്
ചിത്രസന്നിവേശം: രഞ്ജൻ എബ്രഹാം
ഗാനരചന: റഫീഖ് അഹമ്മദ്, ലാൽജി കാട്ടിപ്പറമ്പൻ
സംഗീതം: ബിജിബാൽ
കലാസംവിധാനം: സാബു മോഹൻ
ചമയം: പ്രദീപ് രംഗൻ
വസ്ത്രാലങ്കാരം: സമീറ സനീഷ്
ശബ്ദലേഖനം: എൻ. ഹരികുമാർ
വിതരണം: മാജിക് ഫ്രെയിമ്സ്.

പ്രേതം – ⭐⭐⭐

ഹാസ്യരസഭയാനകം ഈ പ്രേതം! – ⭐⭐⭐

ഡോക്ടറാവണം എഞ്ചിനിയറാവണം കളക്ക്റ്ററാവണം എന്നാഗ്രഹിച്ച ആളുകളെല്ലാം ഇപ്പോൾ മെന്റലിസ്റ്റാകണമെന്നാണ് ആഗ്രഹിക്കുന്നത്. അതാണ് പ്രേതം എന്ന സിനിമയുടെയും ജോൺ ഡോൺ ബോസ്‌കോ എന്ന കഥാപാത്രത്തിന്റെയും വിജയം. അയ്യർ ദി ഗ്രെയ്റ്റിലെ സൂര്യനാരായണനെ പോലെയാവാനും, മണിച്ചിത്രത്താഴിലെ ഡോക്ടർ സണ്ണിയാവാനും, കമ്മീഷ്ണറിലെ ഭരത്ചന്ദ്രനെ പോലെയാവാനും കൊതിച്ച പോലെ, അടുത്ത തലമുറയിലെ കുട്ടികൾ പ്രേതത്തിലെ ജോൺ ഡോൺ ബോസ്‌കോ ആവാൻ ആഗഹിക്കുന്നതിൽ തെറ്റില്ല. കുട്ടികളെ അത്ഭുതപെടുത്തിയും കുടുംബങ്ങളെ ചിരിപ്പിച്ചു ഭയപ്പെടുത്തിയും പ്രേതം പ്രേക്ഷകരുടെ കയ്യടിനേടുന്നു.

സു…സു…സുധി വാൽക്മീകവും പുണ്യാളൻ അഗർബത്തീസും പ്രേതവും വ്യതസ്ഥമായതാണ് രഞ്ജിത്ത് ശങ്കറിനെയും ജയസൂര്യയെയും ഇപ്പോഴത്തെ ഏറ്റവും പ്രിയപ്പെട്ട സംവിധായകൻ-നടൻ കൂട്ടികെട്ടാക്കിയത്. ഒരുകാലത്തു ഒരു ജോഷി-മമ്മൂട്ടി സിനിമയോ, പ്രിയദർശൻ-മോഹൻലാൽ സിനിമയോ, ഷാജി കൈലാസ്-സുരേഷ് ഗോപി സിനിമയോ, സത്യൻ അന്തിക്കാട്-ശ്രീനിവാസൻ സിനിമയോ റിലീസാകുവാൻ കാത്തിരുന്നതുപോലെ ഇനിയുള്ള കാലം രഞ്ജിത്ത് ശങ്കർ-ജയസുര്യ സിനിമയ്ക്കായി കാത്തിരിക്കാം.

ഡ്രീംസ് ആൻഡ്‌ ബിയോണ്ടിന്റെ ബാനറിൽ രഞ്ജിത്ത് ശങ്കറും നടൻ ജയസൂര്യയും നിർമ്മിച്ചിരിക്കുന്ന പ്രേതം വിതരണം ചെയ്തത് സെൻട്രൽ പിക്ചേഴ്സ് ആണ്.

പ്രമേയം:⭐⭐⭐
പ്രേതമുണ്ടോ ഇല്ലയോ? എല്ലാവർക്കുമുള്ള സംശയമായാണ്. പ്രേതമുണ്ടെന്നു വിശ്വസിക്കുന്നവരുമുണ്ട് ഇല്ലാത്തവരുമുണ്ട്. പ്രേതത്തെ കണ്ടവരുമുണ്ട് കാണാത്തവരുമുണ്ട്. ദൈവമുണ്ടെങ്കിൽ അതിനെതിരെ മറ്റൊരു ശക്തിയുണ്ടെന്നു ഭൂരിഭാഗം മനുഷ്യരും വിശ്വസിക്കുന്നു. പ്രതികാര ദാഹിയായ പ്രേതത്തെ മലയാള സിനിമയിലൂടെ ഒരുപാട് കണ്ടിട്ടുണ്ട് നമ്മൾ. പ്രതികാരം ചെയ്യുന്ന പലവിധങ്ങളും കണ്ടിട്ടുണ്ട്. എന്നാൽ, പ്രതികാരത്തിനപ്പുറം സ്വന്തം മരണകാരണം അന്വേഷിച്ചറിയുവാൻ ശ്രമിക്കുന്ന പ്രേതത്തിന്റെ കഥ മലയാള സിനിമയിൽ ഇതാദ്യം. അതിനു നിമിത്തമാകുന്ന കുറെ മനുഷ്യരും ഒരു മെന്റലിസ്റ്റും. സത്യമോ മിഥ്യയോ, പ്രേതമുണ്ടെന്നു പ്രേക്ഷകരെ വിശ്വസിപ്പിക്കുവാൻ രഞ്ജിത്ത് ശങ്കറിന്റെ കഥയ്ക്ക്‌ സാധിച്ചു.

തിരക്കഥ:⭐⭐⭐
അവിശ്വസനീയമായ ഒരു കഥ വിശ്വസനീയമായ കഥാസന്ദർഭങ്ങളിലൂടെ അവതരിപ്പിക്കുക എന്നത് ശ്രമകരമായ ഒന്നാണ്. രഞ്ജിത്ത് ശങ്കർ എന്ന എഴുത്തുകാരന്റെ മികവു വെളിവാകുന്ന ഒന്നാണ് ഈ സിനിമയുടെ തിരക്കഥ. പ്രേതമുണ്ടെന്നു തോന്നിപ്പിക്കുന്ന കഥാസന്ദർഭങ്ങൾ, ആകാംഷയുടെ മുൾമുനയിൽ പ്രേക്ഷകരെ കൊണ്ടെത്തിക്കുന്ന കഥാഗതി എന്നിവയാണ് തിരക്കഥയുടെ മികവ്. സംഭാഷണങ്ങളിലുള്ള ദ്വയാർത്ഥ പ്രയോഗങ്ങൾ മാത്രമാണ് മോശമെന്ന് പറയാനുള്ളത്. ആദ്യ പകുതിയിൽ ഹാസ്യരംഗങ്ങൾക്ക് മാറ്റുക്കൂട്ടുവാൻ ആവശ്യത്തിലധികം അസഭ്യങ്ങൾ എഴുതിവെച്ചിട്ടുണ്ട്. ഷറഫുധീൻ അവതരിപ്പിച്ച പ്രിയൻ എന്ന കഥാപാത്രത്തിന്റെ സംഭാഷണങ്ങളിൽ ഹാസ്യമുണ്ടായിരുന്നെങ്കിലും കൂടുതലും അസഭ്യമായിരുന്നു. രണ്ടാം പകുതിയിലെ കഥാസന്ദർഭങ്ങളും സംഭാഷണങ്ങളും മികവു പുലർത്തി. കഥാവസാനം ഒരു കുറ്റാന്വേഷണ സിനിമയുടെ തലത്തിലേക്ക് ഉയരുന്നു ഈ സിനിമ. ഡോൺ ബോസ്‌കോയുടെ കഥാപാത്രരൂപീകരണവും മികച്ചതായിരുന്നു. രഞ്ജിത്ത് ശങ്കറിന് അഭിനന്ദനങ്ങൾ!

സംവിധാനം:⭐⭐⭐⭐
പാസഞ്ചർ മുതൽ സുധി വാൽക്മീകം വരെ സംവിധാനം ചെയ്തിട്ടുള്ള ഓരോ സിനിമകളും കൈകാര്യം ചെയ്ത വിഷയം വ്യതസ്ഥമായിരുന്നു. അവയിൽ നിന്നുമെല്ലാം വ്യതസ്ഥമാണ് പ്രേതം. പുതുമയുള്ള കഥാപശ്ചാത്തലം, ത്രസിപ്പിക്കുന്ന കഥാഗതി, ജയസുര്യ എന്ന നടന്റെ അഭിനയം, അജു വർഗീസ്‌-ഷറഫുധീൻ ടീമിന്റെ ഹാസ്യങ്ങൾ, ജിത്തു ദാമോദറിന്റെ വിഷ്വൽസ്, ജസ്റ്റിൻ ജോസിന്റെ ശബ്ദലേഖനം, ആനന്ദ് മധുസൂദനന്റെ പശ്ചാത്തല സംഗീതം എന്നിവയെല്ലാം കൃത്യമായ അളവിൽ ചേർത്തതുകൊണ്ടു രഞ്ജിത്ത് ശങ്കറിന് മികച്ചൊരു ഹൊറർ-കോമഡി സിനിമ അവതരിപ്പിക്കുവാൻ കഴിഞ്ഞു. മോക്ഷം കിട്ടാതെ അലയുന്ന ആത്മാക്കൾ നമ്മൾക്ക് ചുറ്റുമുണ്ടെന്നും അവരുമായി സംവദിക്കാനാകുമെന്നും വിശ്വസിപ്പിക്കാൻ രഞ്ജിത്ത് ശങ്കറിനും കൂട്ടർക്കും സാധിച്ചു. ഓരോ കഥയും അവതരിപ്പിക്കുവാൻ അനിയോജ്യമായ ലോക്കെഷനുകൾ, കഥ പറയുന്ന വേഗത, സസ്പെൻസ് നിലനിർത്തിയിരുന്ന രീതി തുടങ്ങിയ എല്ലാ ഘടഗങ്ങളും ചേരുംപടി ചേർക്കുക എന്നത് രഞ്ജിത്ത് ശങ്കറിന്റെ സംവിധാന മികവു തന്നെ.

സാങ്കേതികം:⭐⭐⭐
ജിത്തു ദാമോദർ എന്ന ഛായാഗ്രാഹകന്റെ നാളിതുവരെയുള്ള ഏറ്റവും മികച്ച വിഷ്വൽസ് പ്രേതം എന്ന സിനിമയിലെതാണ്. ചെറായി കടൽ തീരവും തിരമാലകളും അവിടെ സ്ഥിതി ചെയ്യുന്ന വലിയ വീടും രസാവഹമായ കാഴ്ചകളാണ്. അങ്ങനെയുള്ള ഒരു സ്ഥലത്തിനു ദുരൂഹതയുണ്ടെന്നു പ്രേക്ഷകർക്ക്‌ തോന്നുന്നത് ജിത്തു ദാമോദറിന്റെ ചായഗ്രഹണമികവു ഒന്നുകൊണ്ടു മാത്രമാണ്. പ്രേതത്തിന്റെ രൂപം കാണിക്കാതെ വളരെ കുറച്ചു രംഗങ്ങൾക്കൊണ്ട് ഭീതി ജനിപ്പിക്കുവാൻ ജിത്തുവിനു സാധിച്ചു. ബാഹുബലിയുടെ ശബ്ദലേഖനം നിർവഹിച്ച ജസ്റ്റിൻ ജോസാണ് പ്രേതത്തിന്റെ ശബ്ദലേഖനം നിർവഹിച്ചത്. അത്യുഗ്രൻ എന്നല്ലാതെ മറ്റൊരു വിശേഷണവുമില്ല. പ്രേതമുണ്ടെന്നു വിശ്വസിച്ചുപോകുന്ന രീതിയിലായിരുന്നു അവയോരോന്നും. അതുപോലെ മികവുതോന്നിയ മറ്റൊരു ഘടകം ആനന്ദ് മധുസൂദനന്റെ പശ്ചാത്തല സംഗീതമാണ്. രണ്ടാം പകുതിയിലെ സസ്പെൻസ് രംഗങ്ങളിലൂടെ പ്രേക്ഷകരെ ആകാംഷയുടെ മുൾമുനയിൽ നിർത്തുവാൻ പശ്ചാത്തല സംഗീതത്തിനു സാധിച്ചു. സാജൻ വാസുദേവിന്റെ ചിത്രസന്നിവേശം മികവു പുലർത്തി. കഥയിൽ പ്രാധാന്യമില്ലാത്ത ഒരൊറ്റ രംഗം പോലും ഈ സിനിമയിലില്ല. അതുപോലെ ചടുലമായ താളത്തിൽ രംഗങ്ങൾ കോർത്തിണക്കുവാനും സാജനു സാധിച്ചു. കഥയാവശ്യപെടുന്ന തരത്തിലുള്ള ലൊക്കേഷനുകളും അവിടെ വേണ്ടവിധത്തിലുള്ള മാറ്റങ്ങൾ വരുത്തി ദുരൂഹത കൂട്ടാനുളള വസ്തുക്കൾ ഉണ്ടെന്നു ഉറപ്പുവരുത്താനും അജയ് എന്ന കലാസംവിധായകൻ മറന്നില്ല. ജോൺ ഡോൺ ബോസ്‌കോവിന്റെ വേഷവിധാനം വ്യതസ്ഥമായിരുന്നു. വെള്ള സാരിയിൽ നിന്ന് പ്രേതത്തെ മോചിപ്പിചതിനു നന്ദി, ഏവർക്കും അഭിനന്ദനങ്ങൾ!

അഭിനയം:⭐⭐⭐
വ്യതസ്ഥ കഥാപാത്രങ്ങൾ വിശ്വസനീയതയോടെ അഭിനയിച്ചു പ്രേക്ഷകരുടെ പ്രശംസ പിടിച്ചു പറ്റുക എന്നത് എളുപ്പമല്ല. മേല്പറഞ്ഞതിൽ വിജയിച്ച ഒരു നടനാണ്‌ ജയസുര്യ. ജോൺ ഡോൺ ബോസ്‌കോയായി ജയസുര്യ മികച്ച അഭിനയം കാഴ്ചവെച്ചു. ഇത്രയും തന്മയത്വത്തോടെ ഒരു കഥാപാത്രവും ജയസുര്യ അവതരിപ്പിച്ചിട്ടില്ല.അജു വർഗീസ്‌, ഗോവിന്ദ് പത്മസൂര്യ, ഷറഫുദ്ദീൻ എന്നിവർ അവരവരുടെ കഥാപാത്രങ്ങൾ രസകരമായി അവതരിപ്പിച്ചു. ഹരീഷ് പരേഡിയും, സുനിൽ സുഖദയും, ധർമജൻ ബോൾഗാട്ടിയും, വിജയ്‌ ബാബുവും, ദേവനും, പേർളി മാണിയും, ശ്രുതി രാമകൃഷ്ണനും, ശരണ്യ മേനോനും, സതി പ്രേംജിയും അവരവരുടെ വേഷങ്ങൾ ചെറുതാണെങ്കിലും ഭംഗിയായി അവതരിപ്പിച്ചു. നൈല ഉഷ അതിഥി വേഷത്തിൽ അഭിനയിച്ചു.

വാൽക്കഷ്ണം: ചിരിപ്പിക്കുന്ന ത്രസിപ്പിക്കുന്ന ഭയപ്പെടുത്തുന്ന പ്രേതത്തിന്റെ പുതിയമുഖം!

രചന, സംവിധാനം: രഞ്ജിത്ത് ശങ്കർ
നിർമ്മാണം: രഞ്ജിത്ത് ശങ്കർ-ജയസുര്യ
ചായാഗ്രഹണം: ജിത്തു ദാമോദർ
ചിത്രസന്നിവേശം: സാജൻ വാസുദേവ്
സംഗീതം: ആനന്ദ് മധുസൂദനൻ
ശബ്ദലേഖനം: ജസ്റ്റിൻ ജോസ്
ഗാനരചന: റഫീക്ക് അഹമ്മദ്
കലാസംവിധാനം: അജയ് മാങ്ങാട്
വസ്ത്രാലങ്കാരം: അരുണ്‍ മനോഹർ, സരിത ജയസുര്യ
ചമയം: ശ്രീജിത്ത്‌ ഗുരുവായൂർ
വിതരണം: സെൻട്രൽ പിക്ചേഴ്സ്

ആൻമരിയ കലിപ്പിലാണ് – ⭐⭐

ആസ്വാദ്യകരമായ കലിപ്പത്തരങ്ങൾ – ⭐⭐

ആൻ മരിയ കലിപ്പിലാണ്! ആൻ ആരോടാണ് എന്തിനാണ് കലിപ്പിലാകുന്നത്? അവൾ എങ്ങനെയാണ് കലിപ്പ് തീർക്കുന്നത്? പൂമ്പാറ്റയും ആൻ മരിയയും ഒന്നിക്കുന്നതെന്തിനാണ്? ആൻ മരിയയേ ഏയ്ഞ്ചൽ സഹായിക്കുമോ? എന്നീ ചോദ്യങ്ങളുടെ ഉത്തരമാണ് മിഥുൻ മാനുവൽ തോമസ്‌ അണിയിച്ചൊരുക്കിയ ആൻ മരിയ കലിപ്പിലാണ് എന്ന സിനിമ.

കസബയ്ക്ക് ശേഷം ഗുഡ് വിൽ എന്റർറ്റെയിൻമെന്റ്സിന്റെ ബാനറിൽ ആലീസ് ജോർജ്‌ നിർമ്മിച്ചിരിക്കുന്ന ആൻ മരിയ കലിപ്പിലാണ് വിതരണം ചെയ്തിരിക്കുന്നത് പ്ലേയ്ഹൗസാണ്‌. ജോൺ മന്ത്രിക്കലും മിഥുൻ മാനുവൽ തോമസും ചേർന്നാണ് ഈ സിനിമയുടെ കഥയും തിരക്കഥയും സംഭാഷണങ്ങളും എഴുതിയിരിക്കുന്നത്. വിഷ്ണു ശർമ്മ ചായഗ്രഹണവും, ലിജോ പോൾ ചിത്രസന്നിവേശവും, ഷാൻ റഹ്മാൻ സംഗീതവും, സൂരജ് എസ്. കുറുപ്പ് പശ്ചാത്തല സംഗീത സംവിധാനവും നിർവഹിച്ചിരിക്കുന്നു.

പ്രമേയം:⭐⭐⭐
പുതുതലമുറയിലെ കുട്ടികളുടെ ആഗ്രഹങ്ങളും അതിനുവേണ്ടി പ്രയത്നിക്കാനുള്ള അവരുടെ ഇച്ഛശക്തിയും പഴയതലമുറയിൽ നിന്നും വ്യത്യസ്ഥമാണ്. കുട്ടികളുടെ കാഴ്ചപ്പാടിൽ തന്നെ വലിയൊരു മാറ്റം സംഭവിച്ചിരിക്കുന്നു. നീതി നിഷേധിക്കപ്പെടുമ്പോൾ കുട്ടികളും പ്രതികരിച്ചു തുടങ്ങിയിരിക്കുന്നു. അതിനു അവർ സ്വീകരിക്കുന്ന വഴി അവരുടെ ചുറ്റുപാടിൽ നിന്നും സ്വയം മനസ്സിലാക്കിയെടുക്കുന്ന കാര്യങ്ങൾ വഴിയാണ്. കുട്ടികളുടെ ആഗ്രഹം നടക്കാതെ മനസ്സ് തളരുമ്പോൾ, അവരെ പ്രോത്സാഹിപ്പിക്കുവാൻ കെട്ടുകഥകളിലൂടെ ചില അദിർശ്യ ശക്തികളെ അവർക്കു മനസ്സിലാക്കികൊടുക്കാറുണ്ട്. കുട്ടികൾ അത് വിശ്വസിച്ചു ധൈര്യം സംഭരിച്ചു ആഗ്രഹം സാഫല്യത്തിനായി ഇറങ്ങിത്തിരിക്കും. അത്തരത്തിലുള്ള ഒരു പ്രമേയമാണ് മിഥുൻ മാനുവലിന്റെ ആൻ മരിയ കലിപ്പിലാണ് കൈകാര്യം ചെയ്യുന്ന വിഷയം.

തിരക്കഥ:⭐⭐
കുട്ടികൾക്കും കുടുംബങ്ങൾക്കും ആസ്വദിച്ചു കണ്ടിരിക്കുവാനുള്ള എല്ലാ ചേരുവകളും കൃത്യമായി സമന്വയിപ്പിച്ചാണ് ഈ സിനിമയുടെ തിരക്കഥയും സംഭാഷണങ്ങളും എഴുതിയിരിക്കുന്നത്. ആദ്യ പകുതിയിലെ രംഗങ്ങൾ പലതും ആസ്വദിച്ചു കണ്ടിരിക്കാവുന്നതായിരുന്നു. കഥയിൽ പ്രാധാന്യമില്ലാത്തവയായിരുന്നു അവയിൽ ചിലതെന്ന് പിന്നീട് മനസ്സിലാകുന്നുണ്ട് എന്നത് ഒരു പോരായ്മയായി അനുഭവപ്പെടുന്നുണ്ട്. രണ്ടാം പകുതിയും ക്ലൈമാക്സും ആദ്യ പകുതിയേക്കാൾ വിശ്വസനീയമായിരുന്നു. വിശ്വസനീയതയുണ്ടെങ്കിലും പ്രവചിക്കാനാവുന്ന കഥാഗതിയിലൂടെ സിനിമ അവസാനിക്കുന്നു എന്നത് തിരക്കഥയുടെ മറ്റൊരു പോരായ്മയായി അവശേഷിക്കുന്നു. കൊച്ചു കൊച്ചു സന്ദേശങ്ങൾ നർമ്മ മുഹൂർത്തങ്ങളിലൂടെ അവതരിപ്പിച്ചിരിക്കുന്നു എന്നത് അഭിനന്ദനം അർഹിക്കുന്നതാണ്‌. കുട്ടികളുടെ മനസ്സ് കാണാൻ സമയമില്ലാത്ത മാതാപിതാക്കളുടെ ജോലിത്തിരക്കുകളും, കുട്ടികളുടെ ആഗ്രഹങ്ങൾ നടത്തികൊടുക്കാത്ത അച്ഛനമ്മമാരുടെ പിടിവാശികളും മികച്ച കഥാസന്ദർഭങ്ങളിലൂടെ തിരക്കഥയിൽ ഉൾപ്പെടുത്തിയിരിക്കുന്നു. ആസ്വാദനത്തിനുള്ള കഥാസന്ദർഭങ്ങൾ എഴുതിവന്നപ്പോൾ ജോണും മിഥുനും വിശ്വസനീയത എന്ന വസ്തുത മറന്നു എന്നതാണ് ഈ സിനിമയുടെ ന്യൂനത.

സംവിധാനം:⭐⭐
രസകരമായ അവതരണത്തിലൂടെ കുടുംബങ്ങളുടെയും കുട്ടികളുടെയും കയ്യടി നേടുവാൻ മിഥുനും കൂട്ടർക്കും സാധിച്ചു. ആൻ മരിയ എന്ന കഥാപാത്രത്തെ അവതരിപ്പിക്കുവാൻ സാറ അർജുനെ തിരഞ്ഞെടുത്തതു തന്നെയാണ് ഈ സിനിമയുടെ വിജയത്തിന് കാരണം. ആദ്യ രംഗം മുതൽ കഥാവസാനം വരെ കുട്ടികൾക്ക് ആസ്വദിക്കാനുള്ള രീതിയിലാണ് ഈ സിനിമ സംവിധാനം ചെയ്തിരിക്കുന്നത്. പക്ഷെ, ആസ്വാദ്യകരമായ അവതരണ രീതി സ്വീകരിച്ചപ്പോൾ പല രംഗങ്ങളും കൃത്രിമത്വം നിറഞ്ഞതായി അനുഭവപെട്ടു. ആദ്യ പകുതിയിലെ പല രംഗങ്ങളും തമാശക്ക് വേണ്ടി അവതരിപ്പിച്ചതുപോലെ അനുഭവപെട്ടു. സ്കൂളിലെ ഒരു അധ്യാപകനിൽ നിന്നും മോശമായ പെരുമാറ്റമുണ്ടാകുന്ന കുട്ടികൾ അവരുടെ മാതാപിതാക്കളോട് തുറന്ന് പറയാതെ എല്ലാം സഹിക്കുന്നു എന്നതൊക്കെ അവിശ്വസനീയമായി തോന്നി. ദുൽഖർ സൽമാന്റെ അതിഥി വേഷം മികവു പുലർത്തിയെങ്കിലും ഒരു മാലാഖയെപോലെ ആൻ മരിയക്ക് ധൈര്യം പകരുന്നതിനു വേണ്ടി ക്ലൈമാക്സിൽ വരുന്നത്‌ അത്ര വിശ്വസനീയമായി തോന്നിയില്ല. അതിനു പ്രധാന കാരണം ദുൽഖറിന്റെ കഥാപാത്രത്തിനു വ്യക്തതയില്ലാത്തതുകൊണ്ടാണ്. ആട് ഒരു ഭീകര ജീവിയുമായി താരതമ്യം ചെയ്യുമ്പോൾ, സംവിധായകൻ എന്ന നിലയിൽ മിഥുൻ മാനുവൽ തോമസ്‌ ഒരുപടി മുന്നിലായി.

സാങ്കേതികം:⭐⭐⭐
ഓരോ രംഗങ്ങളും കളർഫുള്ളാക്കുവാൻ വിഷ്ണു ശർമ്മയ്ക്ക് സാധിച്ചു. ആൻ മരിയയുടെ സ്‌കൂളും വീടും കക്കാടൻ മലയും തുടങ്ങി ഈ സിനിമയിലെ ഒട്ടുമിക്ക എല്ലാ ലോക്കേഷനുകളും കഥയോട് നീതിപുലത്തുന്നവയായിരുന്നു. ഹാസ്യത്തിന് വേണ്ടി ചിത്രീകരിച്ച ഒന്ന് രണ്ടു രംഗങ്ങൾ ഒഴിവാക്കാമായിരുന്നു എന്നത് മാത്രമാണ് ഒരു കല്ലുകടിയായി തോന്നിയത്. ലിജോ പോളിന്റെ ചിത്രസന്നിവേശം വേണ്ടത്ര മികവു പുലർത്തിയില്ല. ആദ്യ പകുതിയിലെ പലയിടങ്ങളിലും ഇഴച്ചിൽ അനുഭവപെട്ടു. കാർട്ടൂൺ രംഗങ്ങൾ ഉൾപെടുത്തിയതൊക്കെ കുട്ടികൾക്ക് വേണ്ടി മാത്രമാണ് എന്നത് വ്യകതമാണ്. പിന്നീടങ്ങോടു കാർട്ടൂൺ അവതരണ രീതി കണ്ടതുമില്ല. മനു മഞ്ചിത് എഴുതി ഷാൻ റഹ്മാൻ ഈണമിട്ട ഒരേയൊരു പാട്ട് മാത്രമാണ് ഈ സിനിമയിലുള്ളത്. ഒരു വട്ടം കേട്ട് മറക്കാം എന്നതിനുമപ്പുറം സവിശേഷതയൊന്നും ആ പാട്ടിനില്ല. സൂരജ് എസ്.കുറുപ്പിന്റെ പശ്ചാത്തല സംഗീതം മികവു പുലർത്തി. ഓരോ രംഗങ്ങളും ആസ്വാദ്യകരമാക്കുവാൻ സൂരജിന്റെ പശ്ചാത്തല സംഗീതത്തിനു കഴിഞ്ഞിട്ടുണ്ട്. മെഡിക്കൽ ക്യാമ്പ് ഒരുക്കിയ സെറ്റുകൾ കൃത്രിമത്വം തോന്നി എന്നതൊഴികെ ത്യാഗുവിന്റെ കലാസംവിധാനം മോശമായില്ല. സ്റ്റെഫി സേവ്യറിന്റെ വസ്ത്രാലങ്കാരം മികവു പുലർത്തി.

അഭിനയം:⭐⭐⭐
ആൻ മരിയ എന്ന കഥാപാത്രത്തെ കയ്യടക്കത്തോടെ അവതരിപ്പിക്കുവാൻ സാറാ അർജുന് സാധിച്ചു. മറ്റൊരു ബാലതാരത്തെയും സങ്കൽപ്പിക്കാൻ പോലും സാധിക്കാത്തവിധത്തിൽ അഭിനയിച്ചു കയ്യടി നേടുവാൻ സാറയ്ക്കു കഴിഞ്ഞു. ബേബിച്ചായൻ എന്ന കഥാപാത്രത്തെ സിദ്ദിക്ക് അനശ്വരമാക്കി. ദുൽഖർ സൽമാന്റെ അതിഥി വേഷം കുട്ടികളെ രസിപ്പിച്ചുവെങ്കിലും ഈ സിനിമയ്ക്ക് വലിയ ഗുണം ചെയ്തിട്ടില്ല. സണ്ണി വെയ്‌നും അജു വർഗീസും അവരവരുടെ കഥാപാത്രങ്ങളെ മോശമാക്കാതെ അവതരിപ്പിച്ചു. വില്ലൻ വേഷത്തിലെത്തിയ ജോൺ കൈപ്പള്ളിൽ എന്ന നടന്റെ അഭിനയം മികവു പുലർത്തി. സൈജു കുറുപ്പ്, ഷൈൻ ടോം ചാക്കോ, ലിയോണ ലിഷോയ്, അഞ്ജലി അനീഷ്‌, വിജയകുമാർ, ധർമജൻ, സേതുലക്ഷ്മി, ബിജുക്കുട്ടൻ എന്നിവരാണ് മറ്റു അഭിനേതാക്കൾ.

വാൽക്കഷ്ണം: കലിപ്പ് മരിയയെയും പൂമ്പാറ്റ ഗിരീഷിനെയും എയ്ഞ്ചലിനെയും കണ്ട കുട്ടികളും കുടുംബങ്ങളും ഹാപ്പിയാണ്!

സംവിധാനം: മിഥുൻ മാനുവൽ തോമസ്‌
നിർമ്മാണം: ആലീസ് ജോർജ്
ബാനർ: ഗുഡ് വിൽ എന്റർറ്റെയിൻമെന്റസ്
രചന: ജോൺ മന്ത്രിക്കൽ, മിഥുൻ മാനുവൽ
ചായാഗ്രഹണം: വിഷ്ണു ശർമ്മ
ചിത്രസന്നിവേശം: ലിജോ പോൾ
സംഗീതം: ഷാൻ റഹ്മാൻ
ഗാനരചന: മനു മഞ്ചിത്
പശ്ചാത്തല സംഗീതം: സൂരജ് എസ്.കുറുപ്പ്
കലാസംവിധാനം: ത്യാഗു തവന്നൂർ
വസ്ത്രാലങ്കാരം: സ്റ്റെഫി സേവ്യർ
ചമയം: റോണക്സ്‌ സേവ്യർ
വിതരണം: പ്ലേയ്ഹൗസ് റിലീസ്.

ഷാജഹാനും പരീക്കുട്ടിയും – ⭐⭐

image

ഒന്നു ചിരിക്കാം പിന്നെ മറക്കാം! – ⭐⭐

ഗുലുമാലും ത്രീ കിംഗ്‌സും ഇഷ്ടപെടുന്ന പ്രേക്ഷകർക്ക്‌ തീർച്ചയായി കണ്ടു രസിക്കാവുന്ന സിനിമയാണ് ബോബൻ സാമുവലിന്റെ ഷാജഹാനും പരീക്കുട്ടിയും. മുംതാസിന്റെ ഓർമ്മക്കായി താജ് മഹൽ പണിതുയർത്തിയ മുഗൾ ചക്രവർത്തി ഷാജഹാനെയും, കറുത്തമ്മയെ നഷ്ടപെട്ട വേദനയിൽ കടപ്പുറത്തു പാടിയലഞ്ഞ പരീക്കുട്ടിയെയും അറിയാത്തവർ വിരളമാണ്. വിരഹ ദുഃഖം അനുഭവിച്ച ഇവരെപ്പോലെ രണ്ടുപേരാണ് പ്രണവും പ്രിൻസും. ഇവരുടെ കാമുകിയായ ജിയയുടെ ഓർമ്മ നഷ്ടപ്പെടുന്നു. ഓർമ്മ വീണ്ടെടുക്കുവാനുള്ള ജിയയുടെ ശ്രമങ്ങൾക്കിടയിൽ അവൾ പ്രണവിനെയും പ്രിൻസിനെയും പ്രണയിച്ചിരുന്നു എന്ന് മനസിലാകുന്നത്. തുടർന്ന് നടക്കുന്ന രസകരമായ സംഭവങ്ങളാണ് ഈ സിനിമയുടെ കഥ.

ജനപ്രിയൻ, റോമൻസ്, ഹാപ്പി ജേർണി എന്നീ സിനിമകൾക്ക്‌ ശേഷം ബോബൻ സാമുവൽ സംവിധാനം നിർവഹിച്ച ഈ സിനിമയിൽ കുഞ്ചാക്കോ ബോബനും ജയസൂര്യയും അമല പോളും പ്രധാന കഥാപാത്രങ്ങളെ അവതരിപ്പിച്ചിരിക്കുന്നു. റോമൻസിന്റെ തിരക്കഥ എഴുതിയ വൈ.വി.രാജേഷാണ് ഈ സിനിമയുടെ രചന നിർവഹിച്ചിരിക്കുന്നത്. ആഷിക് ഉസ്മാൻ നിർമ്മിച്ചിരിക്കുന്ന ഈ സിനിമ വിതരണം ചെയ്തത് സെൻട്രൽ പിക്ചേഴ്സ്സാണ്.

പ്രമേയം: ⭐⭐
നായികയുടെ ഓർമ്മ വീണ്ടെടുക്കുവാനായി അവളുടെ ഭൂതകാലം അന്വേഷിച്ചിറങ്ങുന്നു. അവൾ രണ്ടു വ്യക്തികളെ രണ്ടു സാഹചര്യത്തിൽ പ്രണയിച്ചിരുന്നു. ഇങ്ങനെ മുമ്പോട്ടു പോകുന്ന ആദ്യ പകുതി. രണ്ടാം പകുതിയിൽ കഥ മറ്റൊരു ദിശയിലേക്ക് ട്വിസ്റ്റുകളോടെ സഞ്ചരിക്കുന്നു. ആദ്യ പകുതിയിൽ കണ്ടതൊന്നുമല്ല യഥാർത്ഥ സംഭവങ്ങൾ. കഥാവസാനം കൺഫ്യുഷണുകളോടെ പ്രേക്ഷകർ കുറച്ചു ചിരിച്ചു എന്ന ആശ്വാസത്തോടെ മടങ്ങുന്നു. ഇതാണ് ബോബൻ സാമുവലിനേയും ആഷിക് ഉസ്മാനെയും ഈ സിനിമയിലേക്ക് ആകർഷിച്ച ഘടകം.

തിരക്കഥ: ⭐⭐
വൈ.വി.രാജേഷ്‌ കഥയും തിരക്കഥയും സംഭാഷണങ്ങളും എഴുതിയ ഷാജഹാനും പരീക്കുട്ടിയും അദ്ദേഹത്തിന്റെ മുൻകാല സിനിമകൾ പോലെ തന്നെ ഒരിക്കൽ കണ്ടു ചിരിച്ചു പിന്നെ മറക്കാവുന്ന അതെ രീതിയിലാണ്. ഒരു എന്റർറ്റെയിനർ സിനിമയ്ക്ക് വേണ്ട എല്ലാ ഘടഗങ്ങളും കൃത്യമായി ഉൾകൊള്ളിച്ചുകൊണ്ടാണ് ഈ സിനിമയുടെ തിരക്കഥ എഴുതിയിരിക്കുന്നത്. ആദ്യ പകുതി കാണുമ്പോൾ ഇതൊരു ത്രികോണ പ്രണയകഥയാണോ എന്ന് തോന്നുകയും രണ്ടാം പകുതിയിൽ കഥ മറ്റൊരു രീതിയിൽ ചെന്നെത്തുകയും ചെയ്യുന്നുണ്ട്. അജു വർഗീസിന്റെ കഥാപാത്രവും സുരാജിന്റെ കഥാപാത്രവും രസകരമായാണ് തിരക്കഥയിൽ ഉൾപ്പെടുത്തിയത്. സംഭാഷണങ്ങളിലെ കോമഡിക്ക് വേണ്ടി പറയിപ്പിച്ച വളിപ്പുകൾ സിനിമയിലുടനീളമുണ്ട്. എന്നിരുന്നാലും ആസ്വാദനത്തിനു വേണ്ടി മാത്രം എഴുതിയിരിക്കുന്ന തിരക്കഥയും സംഭാഷണങ്ങളുമായതുകൊണ്ട് പ്രേക്ഷകർ ക്ഷമിച്ചു കണ്ടിരിക്കുമെന്ന് തിരക്കഥ രചയ്താവിനും ബോധ്യമാണ്. ഇതുപോലുള്ള തട്ടിക്കൂട്ട് തിരക്കഥകൾ ഇനിയും എത്രകാലം സിനിമയാക്കും എന്ന് കണ്ടറിയണം.

സംവിധാനം: ⭐⭐⭐
ജയസൂര്യയ്ക്ക് ഏറെ പ്രശംസ നേടിക്കൊടുത്ത സിനിമകളിൽ ഒന്നാണ് ജനപ്രിയൻ. കുഞ്ചാക്കോ ബോബനും ബിജു മേനോനും തിളങ്ങിയ മികച്ച എന്റർറ്റെയിനറായിരുന്നു റോമൻസ്. അന്ധനായ ക്രിക്കറ്റ് പ്രേമിയുടെ കഥയും ജയസുര്യയുടെ അഭിനയമികവുംകൊണ്ട് ശ്രദ്ധനേടിയ സിനിമയായിരുന്നു ഹാപ്പി ജേർണി. ബോബൻ സാമുവലിന്റെ ഈ മൂന്ന് സിനിമകളുമായി താരതമ്യം ചെയ്യുമ്പോൾ ഷാജഹാനും പരീക്കുട്ടിയും വളരെ പിന്നിലാണ്. ട്വിസ്റ്റുകൾ നിന്ന് ട്വിസ്റ്റുകളിലേക്കു കഥ സഞ്ചരിക്കുമ്പോൾ ഇങ്ങനെയൊക്കെ സംഭവിക്കുമോ എന്നൊരു തോന്നൽ പ്രേക്ഷകരുടെ മനസിൽ സ്വാഭിവകമായും തോന്നും. അവിടെയാണ് സംവിധായകനെന്ന നിലയിൽ ബോബൻ സാമുവൽ പരാജയപെട്ടത്‌. എന്നിരുന്നാലും കുട്ടികളോടൊപ്പം കുടുംബത്തോടൊപ്പം കണ്ടു രസിക്കാനാവുന്ന സിനിമയാണ് ഷാജഹാനും പരീക്കുട്ടിയും.

സാങ്കേതികം: ⭐⭐⭐
അനീഷ്‌ ലാലാണ് ഷാജഹാനും പരീക്കുട്ടിയുടെയും ചായാഗ്രഹണം നിർവഹിച്ചത്. കളർഫുൾ വിഷ്വൽസിലൂടെ പ്രേക്ഷകരെ പിടിചിരുത്തുവാൻ സാധിക്കുന്നുണ്ട് ഓരോ രംഗങ്ങൾക്കും. പാട്ടുകളുടെ ചിത്രീകരണവും മികവു പുലർത്തി. ലിജോ പോളാണ് രംഗങ്ങളുടെ സന്നിവേശം നിർവഹിച്ചത്. ഏറെ ട്വിസ്റ്റുകളുള്ള കഥയാണ് ഈ സിനിമയുടെത്. വേഗതയോടെ തന്നെയാണ് ഓരോ രംഗങ്ങളും കോർത്തിണക്കിയിരിക്കുന്നതും. രണ്ടാം പകുതിയിലെ ഒരു പാട്ടൊഴികെ കഥയിൽ അനാവശ്യമായി കുത്തിനിറച്ച രംഗങ്ങൾ ഒന്നുംതന്നെയില്ല. ഗോപി സുന്ദറാണ് പശ്ചാത്തല സംഗീത സംവിധാനം നിർവഹിച്ചത്. ഒരു എന്റർറ്റെയിനർ സിനിമയ്ക്ക് ആവശ്യമായ തട്ടുപൊളിപ്പൻ സംഗീതമാണ് ഓരോ രംഗങ്ങൾക്കും ഗോപി സുന്ദർ നൽകിയിരിക്കുന്നത്. ഗോപി സുന്ദർ ഈണമിട്ട ചിത്തിര മുത്തേ എന്ന പാട്ടും, നാദിർ ഷാ വരികൾ എഴുതുകയും സംഗീതം നൽകുകയും ചെയ്ത മധുരിക്കും ഓർമ്മകളെ എന്ന പാട്ടുമാണ് ഈ സിനിമയിലുള്ളത്. ഈ സിനിമയിലെ സുപ്രധാന വഴിത്തിരിവുണ്ടാകുന്ന ഒന്നാണ് പ്രണവ് അന്വേഷിക്കുന്ന ഒരു കാർ. കാറിന്റെ നിറം മാറുന്നതൊന്നും അത്ര വിശ്വസനീയമായി തോന്നിയില്ല. കുറേക്കൂടി വിശ്വസനീയതയുള്ള രീതിയിൽ കാറിന്റെ നിറം മാറുന്ന രംഗങ്ങൾ കലാസംവിധായകൻ ഗോകുൽ ദാസ് ഒരുക്കേണ്ടതായിരുന്നു. റോണക്സ്‌ സേവ്യറാണ് മേക്കപ്പ്.

അഭിനയം: ⭐⭐⭐
പ്രണവായി കുഞ്ചാക്കോ ബോബനും പ്രിൻസായി ജയസൂര്യയും ജിയയായി അമല പോളും അഭിനയിച്ചിരിക്കുന്നു. മൂന്നുപേരും അവരവരുടെ രീതിയിൽ പ്രേക്ഷകർക്ക്‌ ഇഷ്ടമാകുന്ന വിധത്തിൽ അഭിനയിച്ചിട്ടുണ്ട്. മേജർ ഇമ്മാനുവൽ രവി എന്ന കഥാപാത്രമായി അജു വർഗീസും, ഡിക്റ്റക്റ്റീവിന്റെ വേഷത്തിൽ സുരാജ് വെഞ്ഞാറമൂടും തകർപ്പൻ അഭിനയമാണ് കാഴ്ചവെച്ചത്. ഹാസ്യ രംഗങ്ങളിലെ ഇവരുടെ അഭിനയമികവ് ഒന്നുകൊണ്ട് മാത്രമാണ് ഈ സിനിമ രസകരമായി തോന്നിയത്. ഇവരെ കൂടാതെ വിജയരാഘവൻ, റാഫി, കലാഭവൻ ഷാജോൺ, ഷാജു ശ്രീധർ, ബൈജു എഴുപുന്ന, വി.കെ.ബൈജു, ഇന്ത്യൻ, നിക്കി ഗൽറാണി, വിനയപ്രസാദ്‌, ലെന, സീനത്ത് എന്നിവരാണ് മറ്റു അഭിനേതാക്കൾ.

വാൽക്കഷ്ണം: കുടുംബത്തോടൊപ്പം കുട്ടികളോടൊപ്പം കണ്ടുരസിക്കാവുന്ന ശരാശരി എന്റർറ്റെയിനറാണ് ഷാജഹാനും പരീക്കുട്ടിയും.

സംവിധാനം: ബോബൻ സാമുവൽ
നിർമ്മാണം: ആഷിക് ഉസ്മാൻ
രചന: വൈ.വി.രാജേഷ്‌
ചായാഗ്രഹണം: അനീഷ്‌ ലാൽ
ചിത്രസന്നിവേശം: ലിജോ പോൾ
സംഗീതം: ഗോപി സുന്ദർ, നാദിർഷാ
കലാസംവിധാനം: ഗോകുൽ ദാസ്‌
മേക്കപ്പ്: റോണക്സ്‌ സേവ്യർ
വസ്ത്രാലങ്കാരം: മഷർ ഹംസ
വിതരണം: സെൻട്രൽ പിക്ക്ചെഴ്സ്