1971 ബിയോണ്ട് ബോർഡേഴ്സ് – ⭐


2017 ബിയോണ്ട് ടോളറൻസ് – ⭐

നേന്ത്രക്കായ, മുരിങ്ങക്കായ, ചേന, കുമ്പളങ്ങ, പടവലങ്ങ, ബീൻസ്, പച്ചമുളക്, മഞ്ഞൾപൊടി, തേങ്ങാ ചിരണ്ടിയത്, തൈര്, ജീരകം, കറിവേപ്പില, ചെറിയഉള്ളി, വെളിച്ചെണ്ണ എന്നിവ കൃത്യമായ അളവിൽ ചേർത്താൽ തനതായ കേരളം വിഭവം അവിയൽ തയ്യാർ. മേല്പറഞ്ഞ പച്ചക്കറികൾ സ്വന്തം കൃഷിയിടങ്ങളിൽ നിന്നാണ് ലഭിക്കുന്നതെങ്കിൽ അത്യുത്തമം!

ഇത് പാചക നിരൂപണമല്ല. 1971 ബിയോണ്ട് ബോർഡേഴ്സ് എന്ന സിനിമയുടെ തിരക്കഥ എഴുതുവാൻ സംവിധായകൻ മേജർ രവി സ്വീകരിച്ച രീതിയോട് ഉപമിച്ചതാണ്. മേജർ രവിയുടെ മുൻകാല പട്ടാള ചിത്രങ്ങളായ കീർത്തിചക്ര, കുരുക്ഷേത്ര, പിക്കറ്റ് 43 എന്നിവയുടെ കഥാസന്ദർഭങ്ങൾ പുതിയ കഥാപശ്ചാത്തലത്തിലേക്കു മാറ്റിയെഴുതി അവതരിപ്പിച്ച സിനിമയാണ് 1971 ബിയോണ്ട് ബോർഡേഴ്സ്. ഒറ്റവാചകത്തിൽ പറഞ്ഞാൽ, അദ്ദേഹത്തിന്റെ തന്നെ മുൻകാല സിനിമകളിലെ വിജയ ഘടകങ്ങൾ ചേർത്തൊരുക്കി അവിയൽ പരുവത്തിലാക്കിയ ഒരു സിനിമ. സ്വന്തം സിനിമകളിലെ തിരക്കഥകളിൽ നിന്നും കടമെടുത്തു എന്നത് ആശ്വാസകരം!

കർമ്മയോദ്ധ എന്ന സിനിമയ്ക്ക് ശേഷം റെഡ് റോസ് ക്രിയേഷൻസിന്റെ ബാനറിൽ ഹനീഫ് മുഹമ്മദ് നിർമ്മിക്കുന്ന മോഹൻലാൽ-മേജർ രവി സിനിമയാണ് 1971 ബിയോണ്ട് ബോർഡേഴ്സ്. മേജർ രവിയുടെ തിരക്കഥയ്ക്ക് സംഭാഷണങ്ങൾ എഴുതിയത് ഷിജു നമ്പ്യാത്താണ്. സുജിത് വാസുദേവ് ഛായാഗ്രഹണവും, സംജിത് സന്നിവേശവും, സാലു കെ. ജോർജ് കലാസംവിധാനവും, ഗോപി സുന്ദർ പശ്ചാത്തല സംഗീതവും, മാഫിയ ശശി സംഘട്ടന സംവിധാനവും നിർവഹിച്ചിരിക്കുന്നു.

പ്രമേയം: ⭐⭐
ഇന്ത്യൻ ക്യാമ്പുകളിൽ ആക്രമണം നടത്തിയ പാക്കിസ്ഥാനാണ് യുദ്ധത്തിന് തുടക്കമിട്ടത്. 1971ൽ നടന്ന ഈ ഇന്ത്യ-പാകിസ്ഥാൻ യുദ്ധം നീണ്ടുനിന്നത് 13 ദിവസമാണ്. ഡിസംബർ 16നു പാകിസ്ഥാൻ അടിയറവു പറഞ്ഞതോടെ കിഴക്കേ പാകിസ്ഥാൻ എന്നറിയപ്പെട്ടിരുന്ന രാജ്യം(ഇപ്പോഴത്തെ ബംഗ്ലാദേശ്)രൂപപെട്ടത്. ആ യുദ്ധത്തിൽ വീരമൃത്യുവരിച്ച യോദ്ധാക്കൾക്കുള്ള സമർപ്പണമാണ് മേജർ രവിയുടെ 1971 ബിയോണ്ട് ബോർഡേഴ്സ് എന്ന സിനിമ. ആ യുദ്ധത്തിനിടെ പാക്കിസ്ഥാൻ പട്ടാളക്കാരനും ഇന്ത്യൻ പട്ടാളക്കാരും തമ്മിൽ ഉടലെടുത്ത ബന്ധമാണ് ഈ സിനിമയുടെ പ്രമേയം. അവർ തമ്മിൽ ശത്രുതയാണെങ്കിലും പരസ്പര ബഹുമാനം കാത്തുസൂക്ഷിച്ചിരുന്നു. ആ യുദ്ധം നയിച്ച പട്ടാളക്കാരുടെ ജീവിതകഥയാണ് ഈ സിനിമയിലൂടെ മേജർ അവതരിപ്പിക്കുന്നത്.

തിരക്കഥ: ⭐
കീർത്തിചക്രയിലെ വൈകാരിക നിമിഷങ്ങളും കുരുക്ഷേത്രയിലെ രാജ്യസ്നേഹവും പിക്കറ്റ് 43യിലെ മതസൗഹാർദ്ദവും മോഹൻലാലിന്റെ താരമൂല്യവും സമന്വയിപ്പിച്ചു എഴുതിയ കഥാസന്ദർഭങ്ങളാണ് ഈ സിനിമയുടേത്. വിഭജന കാലത്തുള്ള ചരിത്രമോ യുദ്ധസമയത്തുള്ള അന്തരീക്ഷമോ തിരക്കഥയിൽ എവിടെയും പരാമർശിക്കുന്നില്ല. യുദ്ധം സംഭവിക്കാനുള്ള കാരണങ്ങളും അന്ന് സംഭവിച്ചിട്ടുള്ള ദുരന്തങ്ങളും വിക്കിപീഡിയയിൽ ലഭ്യമാണ്. അതിലെഴുതിയ പോലെയൊന്നുമല്ല ഈ സിനിമയുടെ കഥാസന്ദർഭങ്ങൾ. പട്ടാളക്കാരുടെ കുടുംബത്തെപ്പറ്റിയുള്ള ഓർമ്മകളും യുദ്ധഭൂമിയിൽ വീരമൃത്യുവരുന്നവരെ ദുരവസ്ഥയും പാകിസ്ഥാൻ പട്ടാളവുമായി അനാവശ്യ ശത്രുതയുടെ ആവശ്യകതയില്ല എന്നുമാണ് ഈ സിനിമയിലൂടെ മേജർ രവി പറയുവാൻ ശ്രമിക്കുന്നത്. മേല്പറഞ്ഞ രംഗങ്ങളിലുള്ള ആവർത്തനവിരസത കണ്ടുമടുത്ത പ്രേക്ഷകരെ കൂടുതൽ മുഷിപ്പിക്കാനായി മേജർ സഹദേവനെ ധീര യോദ്ധാവാക്കാനുള്ള രംഗങ്ങൾ വേറെ. മോഹൻലാലും വില്ലന്മാരും ഒഴികെയുള്ള ഓരോ കഥാപാത്രങ്ങളിലും മൂപ്പൻ എഫെക്റ്റ് കൊണ്ടുവരാൻ മേജർ ശ്രമിച്ചിട്ടുണ്ട്. പുലിമുരുകനിലെ പുകഴ്ത്തൽ രീതി സ്വീകരിച്ചതാണെങ്കിൽ, ഈ സിനിമയ്ക്കോ മേജർ സഹദേവൻ എന്ന കഥാപാത്രത്തിനോ പുകഴ്ത്തലിന്റെ ആവശ്യകതയില്ല. നായകൻ നേരിടുന്നത് മൃഗത്തെയാകുമ്പോൾ നായകനെ അതിമാനുഷികനായി ചിത്രീകരിക്കേണ്ട ആവശ്യതയുണ്ട്. അതിലുപരി, സിനിമ കണ്ടുകൊണ്ടിരിക്കുന്ന പ്രേക്ഷകരിൽ മുരുകന്റെ കഴിവ് പറഞ്ഞുഫലിപ്പിക്കേണ്ടതുണ്ട്. അതുകൊണ്ടാണ് മൂപ്പൻ എന്ന കഥാപാത്രത്തിന് അത്തരത്തിലുള്ള സംഭാഷണങ്ങൾ നൽകിയത്. അതെ രീതി സ്വീകരിച്ച മേജർ രവിക്കും സംഭാഷണങ്ങൾ എഴുതിയ ഷിജു നമ്പ്യാത്തും പുലിമുരുകനിലെ സംഭാഷണങ്ങൾ അത്തരത്തിലായതു എന്തുകൊണ്ടെന്ന് മനസിലായില്ല എന്നുവേണം കരുതാൻ. നിവിൻ പോളി നായകനാകുന്ന മേജർ രവിയുടെ സിനിമയ്ക്കായി പ്രേക്ഷകർ കാത്തിരിക്കുന്നു എന്ന് മേജർ രവി അറിയരുതേ എന്ന പ്രാർത്ഥിച്ചുകൊണ്ട് നിർത്തുന്നു.

സംവിധാനം: ⭐⭐
പുനർജനി, കീർത്തിചക്ര, മിഷൻ 90 ഡെയ്‌സ്, തൂഫാൻ, കുരുക്ഷേത്ര, കാണ്ഡഹാർ, കർമ്മയോദ്ധ, ഒരേ യാത്രയിൽ, പിക്കറ്റ് 43 തുടങ്ങിയ ഒൻപതു സിനിമകൾ സംവിധാനം ചെയ്ത ഒരാളാണ് മേജർ രവി. ഇത്രയും പരിചയസമ്പത്തുള്ള ഒരു സംവിധായകൻ പക്വതയില്ലാത്ത അവതരണ രീതി സ്വീകരിക്കുമ്പോൾ പ്രേക്ഷകരുടെ പ്രതീക്ഷ തകിടം മറയുകയാണ് ചെയ്യുന്നത്. പഴഞ്ചൻ അവതരണ രീതിയും ആവേശകരമല്ലാത്ത യുദ്ധ രംഗങ്ങളും അവിശ്വസനീയമായ രീതിയിലാണ് മേജർ രവി അവതരിപ്പിച്ചത്. കഥാവസാനമുള്ള യുദ്ധ രംഗങ്ങളിൽ ആരൊക്കെയാണ് കൊല്ലപ്പെട്ടത് എന്നുപോലും അവ്യക്തമായിരുന്നു. ടാങ്ക് ഉപയോഗിച്ചുള്ള യുദ്ധ രംഗങ്ങൾ മാത്രമാണ് ഒരല്പമെങ്കിലും മികവ് പുലർത്തിയത്. കഥാപാത്രങ്ങൾക്ക് അനിയോജ്യമല്ലാത്ത അഭിനേതാക്കളെ അന്വേഷിച്ചു കണ്ടുപിടിച്ചു അഭിനയിപ്പിച്ച മേജർ രവിയെ സമ്മതിക്കണം. അന്യഭാഷയിൽ സിനിമ വിറ്റഴിക്കുക എന്നതാണ് ലക്ഷ്യമെങ്കിൽ, ആ ഭാഷകളിലെ കഴിവുള്ള അഭിനേതാക്കളെ കണ്ടെത്തുകയെങ്കിലും ചെയ്യാമായിരുന്നു. മോഹൻലാൽ എന്ന അഭിനേതാവിനേക്കാൾ ഉപരി അദ്ദേഹത്തിന്റെ താരമൂല്യത്തെയാണ് മേജർ രവി ആരാധിക്കുന്നത്. മലയാളത്തിന് പുറമെ തമിഴിലും ഹിന്ദിയിലും തെലുങ്കിലും ആരാധകരുള്ള മോഹൻലാൽ എന്ന താരത്തെ വിറ്റഴിച്ചു നേട്ടങ്ങൾ നേടുക എന്ന ലക്ഷ്യത്തോടെയാണ് ഈ സിനിമ മേജർ രവി സംവിധാനം ചെയ്തത് എന്നത് വ്യക്തം. അതിനുദാഹരണമാണ് കൃത്യമായ ഇടവേളകളിൽ സംഭാഷണങ്ങളിലൂടെ മേജർ സഹദേവനെ വാനോളം പുകഴ്ത്തുന്നത്. മേജർ മഹാദേവന്റെ അഞ്ചാമത്തെ വരവിനുള്ള തയ്യാറെടുപ്പിലാണ് മേജർ രവി എന്നുള്ള വാർത്തകൾ ആരാധകരും പ്രേക്ഷകരും ഞെട്ടലോടെയാണ് കേൾക്കുന്നത്.

സാങ്കേതികം: ⭐⭐⭐
സുജിത് വാസുദേവ് നിർവഹിച്ച ഛായാഗ്രഹണം മികവ് പുലർത്തി. ഈ സിനിമയുടെ ജീവൻ നിലനിർത്തിയ ഏക ഘടകമെന്നത് ഛായാഗ്രഹണമാണ്. ടാങ്ക് ചെയ്‌സ് രംഗങ്ങളും ക്‌ളൈമാക്‌സിലെ യുദ്ധങ്ങളും വിശ്വസനീയതയോടെ ചിത്രീകരിച്ചു. പേസിപ്പോകാതെ എന്ന തമിഴ്‍ ഗാനചിത്രീകരണവും മനോഹരമായിരുന്നു. ഒരു വാക്കിനാൽ എന്ന ഗാനത്തിന്റെ ചിത്രീകരണത്തിലെ ട്രെയിൻ പോകുന്ന രംഗമൊഴികെ മറ്റെല്ലാ രംഗങ്ങളും മികവ് പുലർത്തി. സാലു കെ. ജോർജ് എന്ന കലാസംവിധായകൻ അതിഗംഭീരമായ രീതിയിലാണ് യുദ്ധ ഭൂമിയിലെ സെറ്റുകൾ തയ്യാറാക്കിയിരിക്കുന്നത്. ഗോപി സുന്ദറിന്റെ പശ്ചാത്തല സംഗീതം ആവേശമുണർത്തുന്ന രീതിയിലായിരുന്നില്ല. സംജിത് കൂട്ടിയോജിപ്പിച്ച രംഗങ്ങൾ ഇഴഞ്ഞുനീങ്ങുന്ന പോലെ അനുഭവപെട്ടു. ചടുലത അർഹിക്കുന്ന യുദ്ധ രംഗങ്ങൾ പോലും വേഗതയില്ലാതെ അനുഭവപെട്ടു. നജിം അർഷാദ് ഈണമിട്ട ഹിന്ദി ഗാനം യുദ്ധത്തിനിടയിൽ കേൾക്കുമ്പോൾ പ്രത്യേകതയുള്ള പോലെ തോന്നി. രാഹുൽ സുബ്രമണ്യവും സിദ്ധാർഥ് വിപിനും ഈണമിട്ട മലയാള ഗാനവും തമിഴ് ഗാനവും തരക്കേടില്ലായിരുന്നു. മാഫിയ ശശിയാണ് സംഘട്ടനങ്ങൾ സംവിധാനം ചെയ്തത്. യുദ്ധത്തിന്റെ വീര്യം പകുതിയിൽ ചോർന്നുപോകുന്ന രീതിയിലായിരുന്നു പല സംഘട്ടന രംഗങ്ങളും. സായ് നിർവഹിച്ച ചമയം കൃത്രിമത്വം നിറഞ്ഞതായിരുന്നു. സുദേവനാണ് വസ്ത്രാലങ്കാരം.

അഭിനയം: ⭐⭐
മേജർ സഹദേവനായും മേജർ മഹാദേവനായും അഭിനയിച്ച മോഹൻലാൽ രണ്ടു കഥാപാത്രങ്ങളെയും ഒരുപോലെ അവതരിപ്പിച്ചു. രണ്ടു കഥാപാത്രങ്ങളിലും അഭിനയത്തിന്റെ കാര്യത്തിൽ വ്യത്യസ്ത കൊണ്ടുവരാനൊന്നും അദ്ദേഹം ശ്രമിച്ചിട്ടില്ല. രണ്ടു കഥാപാത്രങ്ങളും കാഴ്ചയിലും പെരുമാറ്റത്തിലും ഒരുപോലെ തന്നെ. പാക് ആർമിയുടെ തലവനായി ഹിന്ദി നടൻ അരുണോദയ് സിംഗ് തിളങ്ങി. ഈ സിനിമയിലെ ഏറ്റവും ശ്രദ്ധിക്കപ്പെട്ട അഭിനയവും അരുണോദയിന്റെതാണ്. ഇവരെ കൂടാതെ ആശാ ശരത്, അല്ലു സിരിഷ്, രഞ്ജി പണിക്കർ, സുധീർ സുകുമാരൻ, കണ്ണൻ പട്ടാമ്പി, സൈജു കുറുപ്പ്, സുധീർ കരമന, വിജയകൃഷ്ണൻ, മണിക്കുട്ടൻ, ടിനി ടോം, കൃഷ്ണകുമാർ, പത്മരാജ് രതീഷ്, ദേവൻ, ബാലാജി, ഷാജു ശ്രീധർ, കൃഷ്ണപ്രസാദ്‌, മേഘനാഥൻ, കോഴിക്കോട് നാരായണൻ നായർ, കൊല്ലം തുളസി, സേതുലക്ഷ്മി എന്നിവരും ഈ സിനിമയിലെ പ്രധാന കഥാപാത്രങ്ങളാകുന്നു. അവരവരുടെ വേഷങ്ങൾ തരക്കേടില്ലാതെ ഏവരും അഭിനയിച്ചു.

വാൽക്കഷ്ണം: ആവേശമുണർത്തുന്ന യുദ്ധ രംഗങ്ങളുമില്ല വികാരമുണർത്തുന്ന പട്ടാള സിനിമയുമല്ല!

തിരക്കഥ, സംവിധാനം: മേജർ രവി
സംഭാഷണം: ഷിജു നമ്പ്യാത്
നിർമ്മാണം: ഹനീഫ് മുഹമ്മദ്
ബാനർ: റെഡ് റോസ് ക്രിയേഷൻസ്
ഛായാഗ്രഹണം: സുജിത് വാസുദേവ്
ചിത്രസന്നിവേശം: സംജിത്
പശ്ചാത്തല സംഗീതം: ഗോപി സുന്ദർ
കലാസംവിധാനം: സാലു കെ.ജോർജ്
സംഗീതം: സിദ്ധാർഥ് വിപിൻ, നജിം അർഷാദ്, രാഹുൽ സുബ്രമണ്യം
ഗാനരചന: ഹരിനാരായണൻ, മോഹൻ രാജൻ, കമാൽ കാർത്തിക്, നിഖിൽ മട്ടത്തിൽ
ചമയം: സായ്
വസ്ത്രാലങ്കാരം: സുദേവൻ
സംഘട്ടനം: മാഫിയ ശശി
നൃത്തസംവിധാനം: പ്രസന്ന സുജിത്
വിതരണം: റെഡ് റോസ് റിലീസ്.

അനുരാഗ കരിക്കിൻ വെള്ളം – ⭐⭐⭐

image

സ്വാദിഷ്ടമായ പ്രണയ ദാഹശമനി – ⭐⭐⭐

ദൈവത്തിന്റെ സ്വന്തം നാട്ടിലെ കുടുംബങ്ങളിൽ ചുക്കുവെള്ളവും, ജീരകവെള്ളവും, മല്ലിയിലയിട്ട് തളപ്പിച്ച വെള്ളവും ദാഹശമനിയായി ഉപയോഗിക്കാറുണ്ട്. ഔഷധമൂല്യമുള്ള കരിങ്ങാലി വെള്ളവും ജീരക വെള്ളവും ശാരീരിക രോഗങ്ങൾ മാറ്റുവാൻ ഉത്തമമാണ്. പ്രണയ നൈരാശ്യം മൂലമുണ്ടാകുന്ന മനസ്സിന്റെ വേദന എല്ലാ പ്രായത്തിലുള്ളവരെയും കാലാകാലങ്ങളായി ബാധിച്ചു വരുന്നതു മനസ്സിലാക്കിയ ഒരുപിടി സുഹൃത്തുക്കൾ പ്രണയ ദാഹശമനത്തിനായി ഉണ്ടാക്കിയ രുചിയുള്ള സിനിമയാണ് അനുരാഗ കരിക്കിൻ വെള്ളം.

കുടുംബസമേതം ആസ്വദിച്ചിരുന്നു കാണാവുന്ന സിനിമയാണ് നവാഗതനായ ഖാലിദ്‌ റഹ്മാൻ പ്രേക്ഷകർക്ക്‌ നൽകിയിരിക്കുന്നത്. നവീൻ ഭാസ്‌കറിന്റെ തിരക്കഥയും, ജിംഷി ഖാലിദ്‌ ഒരുക്കിയ ഫ്രെയിമുകളും, പ്രശാന്ത്‌ പിള്ളയുടെ പശ്ചാത്തല സംഗീതവും ഈ വെള്ളത്തിന്റെ രുചികൂട്ടുന്നു. ഓഗസ്റ്റ് സിനിമാസിന്റെ ബാനറിൽ ഷാജി നടേശൻ, സന്തോഷ്‌ ശിവൻ, ആര്യ, പ്രിഥ്വിരാജ് സുകുമാരൻ എന്നിവർ ചേർന്നാണ് ഈ സിനിമ നിർമ്മിച്ചിരിക്കുന്നത്.

പ്രമേയം: ⭐⭐⭐
പ്രണയം നമ്മളെ പഠിപ്പിക്കുന്ന ഗുണപാഠങ്ങൾ എന്തൊക്കെയാണ്? ഒരാൾ പ്രണയത്തിലാകുമ്പോൾ അയാളുടെ സ്വഭാവത്തിലും പെരുമാറ്റത്തിലും സംസാരത്തിലും ചിന്തകളിലും മാറ്റങ്ങൾ സംഭവിക്കുമെന്നും, പ്രണയിനിയെ സ്വന്തമാക്കണമെന്ന ലക്ഷ്യത്തിലെത്തുവാൻ സ്വന്തം ജീവിതത്തെ ഗൗരവത്തോടെ കാണുമെന്നുമുള്ള വിഷയങ്ങൾ ലളിതമായ കഥയുടെ രൂപത്തിൽ അവതരിപ്പിച്ച സിനിമയാണ് അനുരാഗ കരിക്കിൻ വെള്ളം. രണ്ടു തലമുറയിലെ വ്യക്തികളുടെ കാഴ്ചപ്പാടിലൂടെ ഒരു കാമുകി അവരെ ഏതൊക്കെ രീതിയിൽ സ്വാധീനിക്കുന്നു എന്നും ഈ സിനിമയിലൂടെ നവീൻ ഭാസ്കർ പറഞ്ഞുതരുന്നു.

തിരക്കഥ: ⭐⭐⭐
മൺസൂൺ മാംഗോസ് എന്ന സിനിമയ്ക്ക് ശേഷം നവീൻ ഭാസ്കർ രചന നിർവഹിച്ചിരിക്കുന്ന സിനിമയാണിത്. പ്രണയത്തിലായിരുന്ന പുതു തലമുറയിൽപ്പെട്ട ഒരു വ്യക്തി കാമുകിയുടെ സന്തോഷങ്ങൾക്കും വികാരങ്ങൾക്കും വിലകല്പിക്കാതെ ആ പ്രണയം നഷ്ടപെടുത്തുമ്പോൾ, മറുവശത്ത് പഴയ തലമുറയിൽപെട്ടയാൾ അയാളുടെ നഷ്ട പ്രണയത്തെ വീണ്ടും സ്വന്തമാക്കുവാൻ ശ്രമിക്കുന്നു. ഇരുവരുടെയും സ്വഭാവത്തിൽ പ്രണയംമൂലമുണ്ടാകുന്ന മാറ്റങ്ങൾ റിയലസ്റ്റികായി അവതരിപ്പിച്ചിരിക്കുന്നു. പള്ളി സെമിത്തേരിയിൽ നടക്കുന്ന രംഗമൊഴികെ മറ്റെല്ലാ രംഗങ്ങളും നൂറു ശതമാനം വിശ്വസനീയതയോടെ കഥാസന്ദർഭങ്ങളാക്കിയിരിക്കുന്നു. ഹാസ്യത്തിന് വേണ്ടി എഴുതപെട്ട സംഭാഷങ്ങണളോ ദ്വയാർത്ഥ ഡയലോഗുകളോ ഒന്നുമില്ലാത്ത തിരക്കഥയാണ് നവീൻ ഭാസ്‌ക്കർ എഴുതിയിരിക്കുന്നത്. മൺസൂൺ മാംഗോസിലൂടെ നിരാശപ്പെടുത്തിയ നവീൻ ഭാസ്ക്കറിന്റെ ശക്തമായ തിരിച്ചുവരാവാകട്ടെ ഈ സിനിമ.

സംവിധാനം: ⭐⭐⭐
ഖാലിദ്‌ റഹ്മാൻ ഒരു നവാഗതനാണെന്നു തോന്നാത്ത രീതിയിലാണ് ആദ്യ സിനിമ സംവിധാനം ചെയ്തിരിക്കുന്നത്. കേരളത്തിലെ ശരാശരി കുടുംബങ്ങളിലെ കാഴ്ചകൾ റിയാസിലസ്റ്റിക്കായി അവതരിപ്പിക്കുവാൻ ഖാലിദിന് സാധിച്ചു. അതുപോലെ കഥാപാത്രങ്ങൾക്ക് അനിയോജ്യരായ നടീനടന്മാരെ കണ്ടെത്തി അഭിനയിപ്പിച്ചു എന്നതും അഭിനന്ദനം അർഹിക്കുന്നു കാര്യമാണ്. ലളിതമായ രീതിയിൽ ഏച്ചുകെട്ടലുകളില്ലാതെ രസകരമായി കോർത്തിണക്കിയ രംഗങ്ങളും അവയ്ക്ക് അനിയോജ്യമായ പശ്ചാത്തല സംഗീതവും പ്രേക്ഷകർ ഏറെ ആസ്വദിച്ചു. സിനിമയിലുടനീളം ചിലയിടങ്ങളിലായി ഇഴച്ചിൽ അനുഭവപെട്ടു എന്നതൊഴികെ സംവിധാനത്തിൽ കഴിവ് തെളിയിക്കുവാൻ ഖാലിദ്‌ റഹ്മാന് കഴിഞ്ഞിട്ടുണ്ട്.

സാങ്കേതികം: ⭐⭐⭐
ഷൈജു ഖാലിദിന്റെ സഹോദരൻ ജിംഷി ഖാലിദാണ് ഈ സിനിമയുടെ രംഗങ്ങൾ ചിത്രീകരിച്ചിരിക്കുന്നത്. ക്യാമറ ഗിമ്മിക്‌സൊന്നും ഉപയോഗിക്കാതെ പ്രേക്ഷകർക്ക്‌ റിലേറ്റ് ചെയ്യാനാവുന്ന രീതിയിലുള്ള ലൊക്കേഷനുകളും ഫ്രയിമുകളുമാണ് ഈ സിനിമയിലുടനീളമുള്ളത്. പുതുമുഖം നൗഫൽ അബ്ദുള്ള കോർത്തിണക്കിയ രംഗങ്ങൾ സിനിമയുടെ വേഗതയെ നിയന്ത്രിക്കുന്നതായിരുന്നു. ചിലയിടങ്ങളിൽ വേഗതയോടെയും മറ്റുചിലയിടങ്ങളിൽ ഇഴഞ്ഞുനീങ്ങുന്ന അവസ്ഥയിലുമാണ് ചിത്രസന്നിവേശം നിർവഹിച്ചിരിക്കുന്നത്. പ്രശാന്ത്‌ പിള്ളയുടെ പശ്ചാത്തല സംഗീതം ഈ സിനിമയുടെ നെടുംതൂണായി നിലകൊള്ളുന്നു. ഓരോ രംഗങ്ങളും പ്രേക്ഷകരുടെ മനസ്സിൽ ആഴത്തിൽ പതിയുന്നതിന്റെ പ്രധാന കാരണം പശ്ചാത്തല സംഗീതമാണ്. മൂന്ന് പാട്ടുകളും അത്രകണ്ട് ശ്രദ്ധ നേടുന്നില്ല എന്നത് ഒരു പ്രണയകഥ പറയുന്ന സിനിമയെ സംബന്ധിച്ചു പോരായ്മതന്നെയാണ്. ധന്യ ബാലകൃഷ്ണൻ കഥാപാത്രങ്ങൾക്ക് നൽകിയ വേഷങ്ങൾ മികവു പുലർത്തി.

അഭിനയം: ⭐⭐⭐⭐
ബിജു മേനോൻ, ആസിഫ് അലി, രജീഷ വിജയൻ, ആശ ശരത്, സൗബിൻ ഷാഹിർ, ശ്രീനാഥ് ഭാസി, സുധീർ കരമന, മണിയൻപിള്ള രാജു, ഇർഷാദ്, സുധി കോപ്പ, നന്ദിനി, ചിന്നു എന്നിവരാണ് ഈ സിനിമയിലെ പ്രധാന അഭിനേതാക്കൾ. പുതുമുഖം രജീഷ വിജയൻ ആണ് ഈ സിനിമയിലെ താരം. ഇത്രയും രസകരമായും റിയലസ്റ്റിക്കായും ഒരു പുതുമുഖ നടിക്ക് അഭിനയിക്കാനറിയുമെങ്കിൽ മലയാള സിനിമയിലെ ഒരുപിടി നല്ല കഥാപാത്രങ്ങൾ രജീഷയെ തേടിയെത്തുമെന്നുറപ്പ്. പരുക്കനായ പോലീസ് ഉദ്യോഗസ്ഥനിൽ നിന്ന് ശാന്തനായ അച്ഛനായി മാറിയ രഘു എന്ന കഥാപാത്രത്തെ ബിജു മേനോൻ മികച്ച രീതിയിൽ അവതരിപ്പിച്ചു. ഇന്നത്തെ തലമുറയെ പ്രതിനിധികരിക്കുന്ന കഥാപാത്രങ്ങളായി ആസിഫ് അലിയും, സൗബിൻ ഷാഹിറും, ശ്രീനാഥ് ഭാസിയും അവരവരുടെ കഥാപാത്രങ്ങളെ ഭംഗിയായി അവതരിപ്പിച്ചിരിക്കുന്നു. ആശ ശരത്തും, സുധീർ കരമനയും, മണിയൻപിള്ള രാജുവും, ഇർഷാദും നല്ല നടീനടന്മാരാണെന്നു വീണ്ടും തെളിയിക്കുന്നു.

വാൽക്കഷ്ണം: കുടുംബസമേതം കണ്ടുരസിക്കാം ഓർത്തുസുഖിക്കാം രുചിച്ചുനോക്കാം ഈ അനുരാഗ കരിക്കിൻ വെള്ളം.

സംവിധാനം: ഖാലിദ്‌ റഹ്മാൻ
നിർമ്മാണം: ഓഗസ്റ്റ് സിനിമ
രചന: നവീൻ ഭാസ്കർ
ചായാഗ്രഹണം: ജിംഷി ഖാലിദ്
ചിത്രസന്നിവേശം: നൗഫൽ അബ്ദുള്ള
സംഗീതം: പ്രശാന്ത്‌ പിള്ള
ഗാനരചന: ബി.കെ.ഹരിനാരായണൻ, ശബരീഷ് വർമ്മ
കലാസംവിധാനം: സാബു മോഹൻ
വസ്ത്രാലങ്കാരം: ധന്യ ബാലകൃഷ്ണൻ
മേക്കപ്പ്: റോണക്സ്‌ സേവ്യർ
ശബ്ദനിയന്ത്രണം: രാധാകൃഷ്ണൻ
വിതരണം: ഓഗസ്റ്റ് സിനിമ റിലീസ്.

കിംഗ്‌ ലയർ – ⭐⭐

image

നുണകളുടെ ‘രാജാവ് നഗ്നനാണ്’ – ⭐⭐

“കുറച്ചു ആളുകളെ എപ്പോഴും പറ്റിക്കാം, കുറെ ആളുകളെ കുറച്ചു സമയവും പറ്റിക്കാം, പക്ഷെ എല്ലാ ആളുകളെയും മുഴുവൻ സമയവും പറ്റിക്കാനവില്ല”എന്ന എബ്രഹാം ലിങ്കൺ  വാചകം ഓർക്കുന്നു.

ജനപ്രിയ നായകൻ ദിലീപും ജനപ്രിയ സംവിധായകർ സിദ്ദിക്ക് ലാലും ആദ്യമായി ഒന്നിക്കുന്ന സിനിമ കിംഗ്‌ ലയറിലൂടെ പെരും നുണയനായ സത്യ നാരായണന്റെ കഥ പറയുന്നു.

ജീവിക്കാൻ വേണ്ടി കൊച്ചു നുണകളൊക്കെ പറഞ്ഞു കഴിയുന്ന സത്യനാരയണന്റെ പ്രധാന തൊഴിൽ വ്യാജ സർട്ടിഫിക്കറ്റുകൾ ഉണ്ടാക്കികൊടുക്കുക എന്നതാണ്. സത്യനാരായണൻ സ്നേഹിക്കുന്ന അഞ്ജലിയുടെ മുമ്പിൽ താൻ നരേൻ എന്ന കോടീശ്വരനായ ബിസിനെസ്സുകാരനാണെന്ന നുണ പറയുന്നു. ആ നുണയിൽ തുടങ്ങി പിന്നീട് ഒരുപാട് നുണകൾ പറയുന്ന സത്യനാരായണൻ അഞ്ജലിയുടെ സ്നേഹം പിടിച്ചുപറ്റുന്നു. ആ നുണകൾ പൊളിയാതിരിക്കാനും അഞ്ജലിയുടെ ആഗ്രഹം സാധിച്ചുകൊടുക്കുവാനും ആനന്ദ് വർമ്മ എന്ന ഫാഷൻ ഡിസയ്നറിനെ പരിച്ചയമുണ്ടെന്നും നുണ പറയുന്നു. അങ്ങനെ യഥാർത്ഥ ആനന്ദ് വർമ്മ സത്യനാരയണന്റെ മുമ്പിലെത്തുന്നു. തുടർന്ന് ഉണ്ടാകുന്ന രസകരമായ സംഭവങ്ങളാണ് ഈ സിനിമയുടെ കഥ.

പ്രമേയം: ⭐⭐
ഒരു നുണ പറഞ്ഞാൽ പിന്നെ ഒൻപത് നുണകൾ പറയേണ്ടി വരുമെന്ന പഴംചൊല്ല് അറിയാത്തവരായി ആരുമുണ്ടാകില്ല. നുണ മാത്രം പറഞ്ഞു ശീലിച്ച ഒരു വ്യക്തി പിന്നീട് നുണ പറയുന്നത് തൊഴിലിന്റെ ഭാഗമാക്കുന്നു, കാമുകിയെ സ്വന്തമാക്കാൻ ഉപയോഗിക്കുന്നു, ഒടുവിൽ നുണ പറഞ്ഞത് നിലനിർത്തുവാൻ വേണ്ടി വലിയൊരു ദൗത്യം ഏറ്റെടുക്കേണ്ടി വരുന്നു. ഇതാണ് ഈ സിനിമയുടെ പ്രമേയം.

തിരക്കഥ: ⭐⭐
മലയാള സിനിമയിൽ 80കളുടെ അവസാനം ഹാസ്യത്തിന് പുതിയൊരു മാനം നൽകിയ എഴുത്തുകാരും സംവിധായകരുമായിരുന്നു സിദ്ദിക്കും ലാലും. ഓരോ രംഗങ്ങളിലും സംഭാഷണങ്ങളിലും പ്രേക്ഷകരെ ചിരിപ്പിക്കുന്ന ഒരു ഘടകം ഉണ്ടായിരിക്കും. അതുകൊണ്ട് ഈ കൂട്ടുകെട്ടിന്റെ തൂലികയിൽ പിറന്ന സിനിമയ്ക്ക് വാനോളമായിരുന്നു പ്രതീക്ഷയും. ആ പ്രതീക്ഷളെ തകിടം മറിച്ചുകൊണ്ട് നിരാശപെടുത്തുന്ന കഥാസന്ദർഭങ്ങളും കേട്ട് പഴകിയ തമാശകളും അസഭ്യങ്ങളും സമന്വയിപ്പിച്ചതാണ് ഈ സിനിമയുടെ തിരക്കഥ. 1983, പാവാട തുടങ്ങിയ സിനിമകള്ക്ക് വേണ്ടി സംഭാഷണങ്ങൾ എഴുതിയ ബിപിൻ ചന്ദ്രനാണ് ഈ സിനിമയുടെ സംഭാഷണങ്ങൾ എഴുതിയത്. ഒട്ടും നിലവാരമില്ലാത്ത ചിരി വരാത്ത സംഭാഷണങ്ങൾ മാത്രമാണ് ഈ സിനിമയിലുള്ളത്. ഒരു ഹാസ്യ സിനിമയ്ക്ക് യുക്തിയുടെ ആവശ്യകതയില്ല എന്ന ന്യായം പറയുന്ന ഇന്നത്തെ തലമുറയിലെ സിനിമാക്കാർ എന്തുകൊണ്ടാണ് പഴയ മലയാള സിനിമകളിൽ യുക്തിയെ ചോദ്യം ചെയ്യാത്ത ഹാസ്യം മിടുക്കരായ എഴുത്തുകാർ എഴുതിയിട്ടുണ്ട് എന്ന് ഓർക്കാത്തത്. ഇത്രെയും മോശമായ ഹാസ്യ രംഗങ്ങളുള്ള ഈ സിനിമ സിദ്ദിക്ക് ലാൽ സിനിമയാണെന്ന് വിശ്വസിക്കാൻ പറ്റുന്നില്ല.

സംവിധാനം: ⭐⭐
ഒരു ചെറിയ ഇടവേളയ്ക്കു ശേഷം ലാൽ സംവിധാനം നിർവഹിച്ച കിംഗ്‌ ലയർ ശരാശരി നിലവാരത്തിൽ പോലും ഉൾപെടുത്താൻ സാധിക്കുന്നില്ല. കണ്ടുമടുത്തതും പ്രവചിക്കാനവുന്നതുമായ കഥാസന്ദർഭങ്ങളെ അതേപടി ചിത്രീകരിച്ചു എന്നതല്ലാതെ സംവിധായകൻ ഒന്നും ചെയ്തിട്ടില്ല. 2 മണിക്കൂർ 40 മിനിറ്റ് ദൈർഘ്യമുള്ള ഈ സിനിമ പ്രേക്ഷകരെ മുഷിപ്പിച്ചു. ആൽബിയുടെ ചായഗ്രഹണവും ദിലീപിന്റെ അഭിനയവും ഈ സിനിമയുടെ വിജയത്തിന് കാരണമാകുന്നു.

സാങ്കേതികം: ⭐⭐⭐
മേല്പറഞ്ഞത് പോലെ ഈ സിനിമയുടെ വിജയ ഘടകങ്ങളിൽ ഒന്ന് ആൽബിയുടെ മനോഹരമായ വിഷ്വൽസാണ്. ഓരോ രംഗങ്ങളും കളർഫുൾ രീതിയിൽ ചിത്രീകരിച്ചത് സിനിമയ്ക്ക് ഏറെ ഗുണം ചെയ്തിട്ടുണ്ട്. പാട്ടുകളുടെ ചിത്രീകരണവും ഫാഷൻ ഷോ മത്സരവും മികവുറ്റ ഫ്രെയിമുകളായിരുന്നു. ആദ്യപകുതിയിലും രണ്ടാമത്തെ പകുതിയിലും ഒട്ടുമിക്ക രംഗങ്ങളും ഇഴഞ്ഞു നീങ്ങുന്ന രീതിയിൽ തോന്നിയത്‌  രംഗങ്ങൾ കോർത്തിണക്കിയതിന്റെ പിഴവുകൾ മൂലമാണ്. രതീഷ്‌ രാജന് സന്നിവേശം നിർവഹിച്ചത്. വയലാർ ശരത് എഴുതി അലക്സ് പോൾ ഈണമിട്ട പെരുംനുണ പുഴ എന്ന് തുടങ്ങുന്ന ഒരേയൊരു പാട്ട് മാത്രമാണ് ഈ സിനിമയിലുള്ളത്. കേട്ടപാടെ മറന്നുപോകുന്ന രീതിയിൽ ചിട്ടപെടുത്തിയ ഒരു പാട്ട്. ദീപക് ദേവിന്റെ പശ്ചാത്തല സംഗീതം പ്രത്യേകിച്ച് പുതുമകൾ ഒന്നും തന്നെ നൽകാതെ സിനിമയുടെ കൂടെ ചേർന്ന് നിൽക്കുന്നു. റോഷൻ ജി. യുടെ മേയ്ക്കപ്പ് പല രംഗങ്ങളിലും അമിതമായി അനുഭവപെട്ടു. പ്രശാന്ത് മാധവ് ഒരുക്കിയ സെറ്റുകൾ മികവുറ്റതായിരുന്നു.

അഭിനയം: ⭐⭐⭐
കുട്ടികളെയും കുടുംബങ്ങളെയും കയ്യിലെടുക്കാനുള്ള ദിലീപിന്റെ അസാമാന്യ കഴിവ് ഈ സിനിമയ്ക്ക് ഗുണം ചെയ്യുമെന്ന് ഉറപ്പാണ്. സിനിമയുടെ കഥയോ തിരക്കഥയോ സംവിധാനമോ മോശമാണെങ്കിലും ദിലീപിന് ലഭിച്ച നായക കഥാപാത്രത്തെ  എല്ലാവർക്കും ഇഷ്ടപെടുന്ന രീതിയിൽ അഭിനയിച്ചു ഫലിപ്പിക്കുവാനുള്ള കഴിവ് പ്രശസനീയമാണ്. തനിക്കു ലഭിച്ച വേഷം മോശമാക്കാതെ അവതരിപ്പിക്കുവാൻ ബാലു വർഗീസിനും കഴിഞ്ഞിട്ടുണ്ട്. പ്രേമപനി കേരളത്തിൽ പടർത്തിയ നായികമാരിൽ ഒരാളായ മഡോണയാണ് ഈ സിനിമയിലെ നായിക. ക്ലൈമാക്സ് രംഗങ്ങളിൽ മികച്ച അഭിനയം കാഴ്ചവെക്കുവാൻ മഡോണയ്ക്ക് സാധിച്ചു. ലാലും ഹരീഷും ആശ ശരത്തും ജോയ് മാത്യുവും അവരവരുടെ വേഷങ്ങളിൽ തിളങ്ങി. ഇവരെ കൂടാതെ ശിവജി ഗുരുവായൂർ, ജോർജ്, ചാലി പാല, അമിത് ചക്കാലക്കൽ, ബാലചന്ദ്രൻ ചുള്ളിക്കാട്, ബിപിൻ ചന്ദ്രൻ എന്നിവരുമുണ്ട് ഈ സിനിമയിൽ.

വാൽക്കഷ്ണം: ജനപ്രിയ നായകൻറെ ആരാധകരെ മാത്രം രസിപ്പിക്കുന്ന സിനിമ!

സംവിധാനം: ലാൽ
കഥ: സിദ്ദിക്ക്
തിരക്കഥ: സിദ്ദിക്ക് ലാൽ
സംഭാഷണം: ബിപിൻ ചന്ദ്രൻ
നിർമ്മാണം: അവുസേപ്പച്ചൻ
ചായാഗ്രഹണം: ആൽബി
ചിത്രസന്നിവേശം: രതീഷ്‌ രാജ്
സംഗീതം: അലക്സ് പോൾ
പശ്ചാത്തല സംഗീതം: ദീപക് ദേവ്
കലാസംവിധാനം: പ്രശാന്ത്‌ മാധവ്
ഗാനരചന: വയലാർ ശരത് ചന്ദ്ര വർമ്മ
മേയ്ക്കപ്പ്: റോഷൻ ജി.
വസ്ത്രാലങ്കാരം: ഷിബു പരമേശ്വരൻ
ശബ്ദമിശ്രണം: വിനോദ് പി.ശിവറാം
വിതരണം: ഗ്രാൻഡ്‌ റിലീസ്.

പാവാട – ⭐⭐

image

നിറം മങ്ങിയ പാവാട ⭐⭐

മദ്യപാനത്തിന് അടിമപെട്ട രണ്ടു അപരിചിതരാണ് പാമ്പ് ജോയിയും പാവാട ബാബുവും. ഒരു ദിവസാരംഭം മുതൽ ഉറങ്ങുന്നത് വരെ മദ്യത്തിൽ മുങ്ങികുളിക്കുന്ന ഇരുവരും ഒരു പ്രത്യേക സാഹചര്യത്തിൽ സുഹൃത്തുക്കളാകുന്നു. ഇരുവർക്കും അവരുടെ ജീവിതത്തിൽ ഓർമ്മിക്കാനിഷ്ടമില്ലാത്ത ചില സംഭവങ്ങളുണ്ട്. രണ്ടു പേരുടെയും പൂർവകാല സംഭവങ്ങൾ തമ്മിൽ ബന്ധമുണ്ടെന്നു തിരിച്ചറിയുന്നതോടെ കഥയിൽ പുതിയ വഴിതിരുവുകൾ ഉണ്ടാകുന്നു. പാമ്പ് ജോയിയായി പ്രിഥ്വിരാജും, പാവാട ബാബുവായി അനൂപ്‌ മേനോനും അഭിനയിച്ചിരിക്കുന്നു.

മണിയൻ പിള്ള രാജു നിർമ്മിച്ച്‌ ജി. മാർത്താണ്ടൻ സംവിധാനം നിർവഹിച്ച പാവാടയുടെ രചന നിർവഹിച്ചിരിക്കുന്നത് ബിപിൻ ചന്ദ്രനാണ്. നെടുമുടി വേണു, മണിയൻ പിള്ള രാജു, കലാഭവൻ ഷാജോൺ, സുധീർ കരമന, ചെമ്പൻ ജോസ്, സിദ്ദിക്ക്, മുരളി ഗോപി, രൺജി പണിക്കർ, സായ്കുമാർ, ജയകൃഷ്ണൻ, മണികുട്ടൻ, മിയ ജോർജ്, ആശ ശരത് എന്നിവരാണ്‌ പ്രധാന അഭിനേതാക്കൾ.

പ്രമേയം: ⭐⭐⭐
മലയാള സിനിമയിൽ അധികം ചർചചെയ്യപെട്ടിട്ടില്ലത്ത ഒരു പ്രമേയമാണ് ബിപിൻ ചന്ദ്രനും ഷെബിൻ ഫ്രാൻസിസും തിരഞ്ഞെടുത്തിരിക്കുന്നത്. ഒരു പക്ഷെ ആരുടെയെങ്കിലും ജീവിതാനുഭവം ആയേക്കാം. പ്രമേയത്തിലുള്ള പുതുമ കഥയിലും കൊണ്ടുവരാൻ ഇരുവരും ശ്രമിച്ചിട്ടുണ്ട്. സിനിമയുടെ ആദ്യ പകുതിയിൽ ഒരു സൂചനപോലും പ്രേക്ഷകർക്ക്‌ നൽക്കാതെ ഇടവേളക്കു തൊട്ടു മുമ്പാണ് പാവാട എന്നത് എന്താണെന്ന് പ്രേക്ഷകർക്ക്‌ മനസിലാകുന്നത്.

തിരക്കഥ: ⭐⭐
ബിപിൻ ചന്ദ്രൻ എന്ന എഴുത്തുകാരന്റെ കഴിവ് മനസ്സിലാകുന്നത്‌ സിനിമയുടെ രണ്ടാം പകുതിയിലാണ്. അമ്മയും മകനും തമ്മിലുള്ള ആത്മബന്ധം മികച്ച രീതിയിൽ തിരക്കഥയിൽ ഉൾപെടുത്തിയിട്ടുണ്ട്. പ്രേക്ഷകരുടെ കണ്ണ് നനയിക്കുന്ന രീതിയിലുള്ള സംഭാഷണങ്ങളും മികവുറ്റതായി. സിനിമ കണ്ടിറങ്ങുന്ന പ്രേക്ഷകന് ആദ്യ പകുതിയിലെ രംഗങ്ങളിൽ പകുതിയിൽ കൂടുതലും കഥയ്ക്ക്‌ ആവശ്യമില്ലത്തതായിരുന്നു എന്ന് തോന്നുന്നതിൽ തെറ്റില്ല. പാവാട ബാബുവിന്റെ ജീവിതവും പാമ്പ് ജോയിയുടെ ജീവിതവും കുറച്ചുകൂടി രസകരമായ സന്ദർഭങ്ങളിലൂടെ അവതരിപ്പിച്ചിരുന്നുവെങ്കിൽ ഈ സിനിമ ഭേദമാകുമായിരുന്നു. സിനിമയുടെ അവസാനം എല്ലാം ശുഭമായി അവസാനിക്കുവാൻ വേണ്ടി കഥാസന്ദർഭങ്ങളെ വളച്ചൊടിച്ചു എന്നത് വ്യക്തമാണ്. പാവാട ബാബു അയാളുടെ കയ്യൊപ്പ് ശ്രദ്ധിക്കാതെ പേപ്പറിൽ എഴുത്തുന്ന രംഗം ഇതിനുദാഹരണം.

സംവിധാനം: ⭐
അഛദിൻ എന്ന സിനിമയ്ക്ക് ശേഷം ജി. മാർതാണ്ടൻ സംവിധാനം ചെയ്ത ഈ സിനിമയും ശരാശരിയായി അവസാനിക്കുവാനാണ് സാധ്യത. നല്ലൊരു പ്രമേയവും കഥയും, ശരാശരി നിലവാരമുള്ള തിരക്കഥയും, കഴിവുള്ള അഭിനേതാക്കളെയും പൂർണമായി ഉപയോഗപെടുത്തുവാൻ സംവിധായകന് സാധിച്ചില്ല. ഇഴഞ്ഞു നീങ്ങുന്ന ആദ്യ പകുതിയാണ് സിനിമയുടെ പ്രധാന പോരായ്മകളിൽ ഒന്ന്. സിനിമയുടെ അവസാന രംഗത്തിൽ മലയാളികൾ ഇഷ്ടപെടുന്ന ഒരു വ്യക്തി പ്രധാനപെട്ട കഥാപാത്രങ്ങളിൽ ഒന്നായി അഭിനയിപ്പിച്ചത്‌ സിനിമയ്ക്ക് യാതൊരു ഗുണവും ചെയ്യാതെ പോയത്, ആ കഥാപാത്രം ആ വ്യക്തിക്ക്  അനിയോജ്യമല്ലാത്തതിനാലാണ്. ഇത് നടീ നടന്മാരെ തിരഞ്ഞെടുതതിലുള്ള  സംവിധായകന്റെ പിഴവാണ്. എന്നിരുന്നാലും മാർതാണ്ടന്റെ മുൻകാല സിനിമകളെ അപേക്ഷിച്ച് ഭേദമാണ് പാവാട.

സാങ്കേതികം: ⭐⭐
പ്രദീപ്‌ നായരാണ് ഈ സിനിമയുടെ ചായാഗ്രഹണം നിർവഹിച്ചത്. എടുത്തു പറയേണ്ട ചായഗ്രഹണ മികവൊന്നും ഒരു രംഗത്തിൽ പോലുമില്ല. കഥ മുൻപോട്ടു നയിക്കുവാനായി സംവിധയകൻ പറഞ്ഞുകൊടുത്ത രംഗങ്ങൾ ചിത്രീകരിച്ചു എന്നതല്ലാതെ പുതുമയുള്ള ഫ്രെയിമുകൾ ഒന്നുമില്ല. ജോൺ കുട്ടിയുടെ ചിത്രസന്നിവേശം രണ്ടാം പകുതിയിൽ മികച്ചു നിന്നത് സിനിമയ്ക്ക് ഗുണം ചെയ്തിട്ടുണ്ട്. ആദ്യ പകുതിയിലെ കുറെ ആവശ്യമില്ലാത്ത രംഗങ്ങൾ ഒഴിവാക്കിയിരുന്നുവെങ്കിൽ ഒരൽപം വേഗത്തിൽ സിനിമ അവസാനിക്കുമായിരുന്നു. ഹരിനാരായണൻ എഴുതിയ വരികൾക്ക് സംഗീതം നൽകിയത് എബി ടോം സിറിയക് ആണ്. ജയസുര്യ ആലപിച്ച ആദ്യഗാനം മാത്രം ഓർമ്മയിൽ നിൽക്കുന്നുള്ളൂ. ഗോപി സുന്ദറിന്റെ പശ്ചാത്തല സംഗീതം രണ്ടാം പകുതിയിലെ ചില രംഗങ്ങളിൽ മികവു പുലർത്തി. പ്രദീപ്‌ രംഗന്റെ മേക്കപ്പും, സമീറ സനീഷിന്റെ വസ്ത്രാലങ്കാരവും മോശമായില്ല.

അഭിനയം: ⭐⭐⭐
പ്രിഥ്വിരാജിന്റെ പാമ്പ് ജോയിയും അനൂപ്‌ മേനോന്റെ പാവാട ബാബുവും ഇരുവരുടെയും അഭിനയ ജീവിതത്തിലെ വ്യതസ്ഥ കഥാപാത്രങ്ങളിൽ ഒന്നാകുന്നു. തമാശ രംഗങ്ങളിലെക്കൾ ഒരുപടി മുകളിലാണ്  സെന്റിമെന്റ്സ് രംഗങ്ങളിലെ പ്രിഥ്വിയുടെ അഭിനയം. സ്ഥിരം മാനറിസങ്ങൾ കൈവിടാതെ അനൂപ്‌ മേനോനും തന്റെ കഥാപാത്രത്തോട് നീതി പുലർത്തി. ചെറിയ വേഷങ്ങളിൽ അഭിനയിച്ച സിദ്ദിക്കും നെടുമുടി വേണും ആശ ശരത്തും മികച്ച അഭിനയം കാഴ്ചവെച്ചു.

വാൽക്കഷ്ണം: സംവിധാന പിഴവ് മൂലം നിറം മങ്ങിയ പാവാട.

സംവിധാനം: ജി. മാർത്താണ്ടൻ
നിർമ്മാണം: മണിയൻ പിള്ള രാജു
കഥ: ഷെബിൻ ഫ്രാൻസിസ്, ബിപിൻ ചന്ദ്രൻ
തിരക്കഥ, സംഭാഷണം: ബിപിൻ ചന്ദ്രൻ
ചായാഗ്രഹണം: പ്രദീപ്‌ നായർ
ചിത്രസന്നിവേശം: ജോൺ കുട്ടി
ഗാനരചന: ഹരിനാരായണൻ
സംഗീതം: എബി ടോം സിറിയക്
പശ്ചാത്തല സംഗീതം: ഗോപി സുന്ദർ
കലാസംവിധാനം: സുജിത് രാഘവ്
മേക്കപ്പ്: പ്രദീപ്‌ രംഗൻ
വസ്ത്രാലങ്കാരം: സമീറ സനീഷ്
വിതരണം: ആന്റോ ജോസഫ്‌