ലവകുശ – ന്യു ജനറേഷൻ നാടോടിക്കാറ്റ്!

പ്രേ ബോ കൊ ഞ! പ്രേക്ഷകരെ ബോറടിപ്പിച്ചു കൊല്ലും ഞങ്ങൾ എന്ന ലക്ഷ്യത്തോടെ ലവലേശം ഗുണമില്ലാത്ത സന്ദർഭങ്ങളും സംഭാഷണങ്ങളും അവതരണവും സമാസം ചേർത്തു അവതരിപ്പിച്ച സിനിമയാണ് ലവകുശ.

നി കൊ ഞ ചാ! എന്ന സിനിമയക്ക് ശേഷം ഗിരീഷ് മനോ സംവിധാനം നിർവഹിച്ച ഈ ന്യു ജനറേഷൻ നാടോടിക്കാറ്റിന്റെ രചന നിർവഹിച്ചത് നടൻ നീരജ് മാധവാണ്. ലവനും കുശനുമായി നീരജ് മാധവും അജു വർഗീസും മികച്ച രീതിയിൽ ഹാസ്യം കൈകാര്യം ചെയ്തു എന്ന് മാത്രമാണ് ലവകുശയിലെ ഏക സവിശേഷത. ബിജു മേനോനും നായകതുല്യ വേഷത്തിൽ ഈ സിനിമയിലുണ്ട്.

ആർ.ജെ.ഫിലിംസിനു വേണ്ടി ജെയ്സൺ ഇളംകുളം നിർമ്മിച്ച ലവകുശ,കാർട്ടൂൺ പരമ്പരകളെ അനുസ്മരിപ്പിക്കുന്ന വിധത്തിലുള്ള ഹാസ്യരംഗങ്ങളാൽ കോർത്തിണക്കിയ രണ്ടരമണിക്കൂർ കോമാളിത്തരമാണ്. നാടോടിക്കാറ്റിലെ ദാസനെയും വിജയനെയും പുതിയ രീതിയിൽ അവതരിപ്പിച്ചതാണ് ലവനും കുശനും.

പ്രമേയം: ⭐️⭐️
മലയാള സിനിമ ചരിത്രത്തിലെ നാഴികല്ലുകളാണ് ദാസനും വിജയനും. നാടോടിക്കാറ്റ് എന്ന സിനിമയുടെ മൂന്ന് ഭാഗങ്ങളും കണ്ടുചിരിക്കാത്ത മലയാളികളുണ്ടാകില്ല. ദാസനും വിജയനും, CID മൂസയും അബദ്ധത്തിൽ കുറ്റങ്ങൾ തെളിയിക്കുന്നത് രസകരമായ പ്രമേയങ്ങളായിരുന്നു. എന്നാൽ, മേല്പറഞ്ഞ സിനിമകളുമായി നിരവധി സാദൃശ്യങ്ങളുള്ള കഥ എന്നതാണ് ലവകുശയുടെ പ്രധാന ന്യൂനതകളിൽ ഒന്ന്. സാധാരണക്കാരായ രണ്ടു ചെറുപ്പക്കാർ അസാധാരണ സംഭവങ്ങൾക്കു സാക്ഷിയാകുകയും സമൂഹ നന്മക്കു വഴിതെളിയിക്കുകയും ചെയ്യുക എന്നത് പ്രമേയപരമായി പുതുമയൊന്നും സമ്മാനിക്കുന്നില്ല.

തിരക്കഥ: ⭐️⭐️
നീരജ് മാധവ് ആദ്യമായി തിരക്കഥ എഴുതിയ സിനിമയാണ് ലവകുശ. ഒരു നവാഗത തിരക്കഥാരചയിതാവിന്റെ പരിചയക്കുറവൊന്നും കഥാസന്ദർഭങ്ങളിലോ സംഭാഷണങ്ങളിലോ കണ്ടില്ല. കണ്ടുമടുത്തതും പ്രവചിക്കാനാവുന്നതുമായ രീതിയിലായിരുന്നു അവയിൽ ഓരോന്നും. ലവനും കുശനും ബിജു മേനോന്റെ ജോൺ കാപ്പ എന്ന കഥാപാത്രവുമെല്ലാം കണ്ടുമടുത്തവ തന്നെ. ആദ്യ പകുതിയിലെ ഹാസ്യ രംഗങ്ങളിൽ ചിലതൊക്കെ പ്രേക്ഷകർ ആസ്വദിച്ചിരുന്നു. ട്രെയിനിലെ യാത്രക്കിടയിൽ സംഭവിക്കുന്നതെല്ലാം രസകരമായിരുന്നു. എന്നാൽ, രണ്ടാം പകുതിയിലെ നീന്തൽ പരിശീലനവും മേക്കപ്പും അസഹനീയ ഹാസ്യ രംഗങ്ങളായിരുന്നു. രണ്ടാം പകുതിയിൽ കുറെ ട്വിസ്റ്റുകളും സസ്‌പെൻസും കുത്തിനിറച്ചു കഥ മറ്റൊരു ദിശയിലേക്ക് സഞ്ചരിക്കുവാൻ തുടങ്ങി. എൺപതുകളിലെ പ്രിയദർശൻ സിനിമകളിലെ പോലെ കുറെ കഥാപാത്രങ്ങളും മണ്ടന്മാരായ വില്ലന്മാരും അടിപിടിയും അബദ്ധങ്ങളും എല്ലാം സമന്വയിപ്പിച്ചു അവതരിപ്പിച്ചു. അവസാനം, ലവകുശന്മാരുടെ സഹായത്തോടെ കുറ്റാന്വേഷണം പൂർത്തിയാക്കുന്നു. ഊഹിക്കാനാവുന്ന കഥയും സസ്പെൻസുകളുമായി സിനിമ അവസാനിക്കുന്നു. നല്ലൊരു നർത്തകനും അഭിനേതാവുമായി കഴിവ് തെളിയിച്ച നീരജിന്റെ കെട്ടുറപ്പുള്ള ഒരു തിരക്കഥക്കായി പ്രേക്ഷകർ കാത്തിരിക്കുന്നു.

സംവിധാനം: ⭐️⭐️
പുതുമയുള്ള കഥയും പേരും അവതരണവുമായി മലയാള സിനിമയിൽ തുടക്കം കുറിച്ച സംവിധായകനാണ് ഗിരീഷ് മനോ.എന്നാൽ രണ്ടാമത്തെ സിനിമയിലെത്തുമ്പോൾ,പുതുമയില്ലാത്ത പ്രമേയവും അവതരണ രീതിയും സ്വീകരിച്ചു പ്രേക്ഷകരെ ബോറടിപ്പിച്ചു. ആദ്യപകുതി ചടുലതയോടെ അവതരിപ്പിച്ചപ്പോൾ, രണ്ടാം പകുതി ഇഴഞ്ഞു നീങ്ങുന്ന അവസ്ഥയിലെത്തി. ഒരുപക്ഷെ ഇത്തരത്തിലുള്ള സിനിമകൾ വേഗത നഷ്ടപ്പെടുത്താതെ അവതരിപ്പിക്കുമ്പോൾ ആയിരിക്കണം അവ പ്രേക്ഷകരെ രസിപ്പിക്കുന്നത്.ഹാസ്യ രംഗങ്ങൾ കണ്ടുമടുത്തവ ആയതുകൊണ്ട് ഈ കഥ പുതുമയുള്ള ഒരു കഥാപശ്ചാത്തലത്തിൽ അവതരിപ്പിക്കാമായിരുന്നു.ഓരോ ട്വിസ്റ്റുകൾക്കു ശേഷം മറ്റൊരു ട്വിസ്റ്റുകൾ വന്നുചേരുന്നത് പ്രേക്ഷകരിൽ ആകാംഷ ജനിപ്പിക്കുന്ന വിധത്തിലുള്ള സാങ്കേതിക മികവ് ആ രംഗങ്ങളിൽ കണ്ടില്ല. ഗോപി സുന്ദറിന്റെ ശബ്ദകോലാഹലങ്ങൾ വേണ്ടുവോളം പശ്ചാത്തലത്തിൽ ആവശ്യത്തിനും അനാവശ്യത്തിനും ഉപയോഗിച്ചിട്ടുണ്ട്!

സാങ്കേതികം: ⭐️⭐️⭐️
ഒരു മെക്സിക്കൻ അപരതയ്ക്കു ശേഷം പ്രകാശ് വേലായുധൻ ഛായാഗ്രഹണം നിർവഹിച്ച സിനിമയാണ് ലവകുശ.ട്രെയിൻ യാത്രക്കിടയിലുള്ള രംഗങ്ങളെല്ലാം കൃത്രിമത്വം നിറഞ്ഞതായിരുന്നു എന്നത് വ്യക്തം.ട്രെയിൻ യാത്രക്കിടയിൽ നീര്ജും അജു വർഗീസും വാതലിനടുത്തു ചെന്ന് നിൽക്കുന്ന രംഗങ്ങൾ ഒഴിവാക്കാമായിരുന്നു. സ്വിമ്മിങ് പൂളിനടിയിലുള്ള രംഗങ്ങളും കൃത്രിമത്വം വ്യക്തമായിരുന്നു.ഒരു ഹാസ്യ സിനിമക്ക് അനിയോജ്യമായ കളർഫുൾ വിഷ്വൽസ് പോലും ഈ സിനിമയിൽ കണ്ടില്ല. അയ്യപ്പന്റെ ‘അമ്മ നെയ്യപ്പം ചുട്ടു എന്ന ഗാനത്തിന്റെ ചിത്രീകരണം രസകരമായിരുന്നു. ഗോപി സുന്ദർ ഈണമിട്ട ആ ഗാനം രസകരമായിരുന്നു. ഗോപി സുന്ദറിന്റെ മുൻകാല സിനിമകളിലെ പശ്ചാത്തല സംഗീതം കൂട്ടികൊഴച്ചു വീണ്ടും അവതരിപ്പിച്ചു ശബ്ദകോലാഹലങ്ങൾ സൃഷ്ട്ടിച്ചു. ചിലയിടങ്ങളിൽ അയ്യപ്പൻറെ അമ്മ എന്ന പാട്ടിന്റെ സംഗീതം ഉപയോഗിച്ചത് നന്നായിരുന്നു. ജോൺകുട്ടിയുടെ സന്നിവേശം സമ്പൂർണ്ണ നിരാശ സമ്മാനിച്ചു. ഇഴഞ്ഞുനീങ്ങുന്ന മന്ദഗതിയിലാണ് രണ്ടാംപകുതി അവസാനിച്ചത്. ലവനും കുശനും എയർ ഹോസ്ട്രെസ്സ് സ്‌കൂളിൽ ചെന്ന് കാണിച്ചുകൂട്ടുന്നത് കോമാളിത്തരങ്ങളിലൂടെ കണ്ടെത്തുന്ന ചില സത്യങ്ങൾ ഹാസ്യത്തിന് വേണ്ടി മാത്രം ഉപയോഗിച്ചവയാണ്. നാഥൻ കണ്ണൂരിന്റെ കലാസംവിധാനം ശരാശരിയിലൊതുങ്ങി.പൊളിഞ്ഞു കിടക്കുന്ന കെട്ടിടത്തിൽ മെയിൻ സ്വിച്ച് ഉൾപ്പടെയുള്ള സജ്ജീകരണങ്ങളും,പകൽ പോലെ പ്രകാശം പരത്തുന്ന വെളിച്ചവും അവിശ്വസനീയമായിരുന്ന.സമീറ സനീഷിന്റെ വസ്ത്രാലങ്കാരം പതിവുപോലെ മികവ് പുലർത്തി.

അഭിനയം: ⭐️⭐️⭐️
ലവനായി നീരജ് മാധവും കുശനായി അജു വർഗീസും മികച്ച അഭിനയം കാഴ്ചവെച്ചു. അജു വർഗീസിന്റെ സമീപകാലത്തെ ഏറ്റവും മികച്ച ഹാസ്യ കഥാപാത്രം ഇതുതന്നെയായിരിക്കും. ജോൺ കാപ്പ എന്ന പോലീസ് ഉദ്യോഗസ്ഥന്റെ വേഷത്തിൽ ബിജു മേനോനും തിളങ്ങി.ചില രംഗങ്ങളിൽ അദ്ദേഹത്തിന്റെ സ്ഥിരം ശൈലിയിലുള്ള അഭിനയ മുഹൂർത്തങ്ങളുണ്ട് ഈ സിനിമയിലുണ്ട്. വിജയ് ബാബു തനിക്കു ലഭിച്ച വേഷം രസകരമായി അവതരിപ്പിച്ചു. പലപ്പോഴും മുദ്ദ്ഗവ് സിനിമയിലെ റാംബോയെ ഓർമ്മിപ്പിച്ചു. നിർമ്മൽ പാലാഴിയുടെ കോഴിക്കോടൻ ഭാഷ രസകരമായിരുന്നു. ഇവരെ കൂടാതെ, മേജർ രവി, ബാലാജി ശർമ്മ, അശ്വിൻകുമാർ, വിഷ്ണു ഗോവിന്ദൻ, ദീപ്തി സതി, അദിതി രവി, അഞ്ജലി നായർ, തെസ്നി ഖാൻ, ബേബി അക്ഷര എന്നിവരും ഈ സിനിമയിൽ അഭിനയിച്ചിട്ടുണ്ട്.

വാൽക്കഷ്ണം: കഥയിൽ കഴമ്പില്ലാത്ത ഹാസ്യ സിനിമകൾ ഇഷ്ടപ്പെടുന്നവരെ ഒരുപരിധിവരെ ലവനും കുശനും തൃപ്തിപെടുത്തിയേക്കാം!

സംവിധാനം: ഗിരീഷ് മനോ
നിർമ്മാണം: ജെയ്സൺ ഇളംകുളം
എഴുത്ത്: നീരജ് മാധവ്
ഛായാഗ്രഹണം: പ്രകാശ് വേലായുധൻ
സന്നിവേശം: ജോൺ കുട്ടി
സംഗീതം: ഗോപി സുന്ദർ
ഗാനരചന: ബി.കെ.ഹരിനാരായണൻ
കലാസംവിധാനം: നാഥൻ കണ്ണൂർ
വസ്ത്രാലങ്കാരം: സമീറ സനീഷ്
ചമയം: റോണക്സ് സേവ്യർ
വിതരണം: ആർ.ജെ.ഫിലിം

Advertisements

ഷെർലക് ടോംസ് – കുറ്റാന്വേഷണ വിഢിത്തരങ്ങൾ!

മലയാളത്തിൽ ഹാസ്യ സിനിമകൾ അണിയിച്ചൊരുക്കിയ ഷാഫി, ജനപ്രിയതാരം ബിജു മേനോൻ, ബുദ്ധിമാനായ എഴുത്തുകാരൻ സച്ചി എന്നിവർ ഒന്നിച്ച സിനിമയാണ് ഷെർലക് ടോംസ്.

വിശ്വവിഘ്യാതനായ ഷെർലക് ഹോംസ് എന്ന കുറ്റാന്വേഷകനെ പോലെ കുറ്റാന്വേഷണം ഇഷ്ടപെടുന്ന ടോംസ് എന്ന് വിളിപ്പേരുള്ള തോമസ് എന്നയാൾ കള്ളപ്പണക്കാരെ തേടിയിറങ്ങുന്നു. ഇന്ത്യൻ റെവന്യൂ സർവീസിലെ ഉദ്യോഗസ്ഥൻ തോമസ് എന്ന ടോംസിന്റെ കഥയാണ് നജീം കോയ-സച്ചി-ഷാഫി ടീമിന്റെ ഷെർലക് ടോംസ് എന്ന സിനിമ.

കെട്ടിച്ചമച്ച കുറ്റാന്വേഷണ കഥ വിഡ്ഢിത്തരങ്ങൾ നിറഞ്ഞ കഥാസന്ദർഭങ്ങളിലൂടെയും അസഭ്യ സംഭാഷണങ്ങളിലൂടെയും പഴഞ്ചൻ സംവിധാന രീതിയാലും അവതരിപ്പിക്കപ്പെട്ട സിനിമയാണിത്. ക്‌ളൈമാക്‌സിലെ ട്വിസ്റ്റ് മാത്രമാണ് ഷെർലക്‌ ടോംസിന്റെ ഏക സവിശേഷത.

പ്രമേയം: ⭐⭐
ഷെർലക് ഹോംസ്ന്റെ ആരാധകൻ ഇന്ത്യൻ റവന്യു സർവീസിലെ ഉദ്യോഗസ്ഥനാകുന്നു. അയാളുടെ കുടുംബജീവിതത്തിലെ പ്രശ്നങ്ങൾ ഔദ്യോഗിക ജീവിതത്തെ പ്രതികൂലമായി ബാധിക്കുന്നു. തുടർന്നുണ്ടാകുന്ന പ്രശ്നങ്ങൾ ഹാസ്യത്തിന്റെ മേമ്പൊടിയോടെ വലിയ പുതുമകളൊന്നുമില്ലാതെ കഥയുടെ രൂപത്തിലാക്കിയത് നജീം കോയയാണ്. 2 കണ്ട്രീസിന് ശേഷം നജീം കോയ എഴുതുന്ന കഥ എന്നത് പ്രേക്ഷകരിൽ ആകാംഷ ജനിപ്പിക്കുന്ന ഒന്നായിരുന്നു. എന്നാൽ, ഈ സിനിമയുടെ കാര്യത്തിൽ വിശ്വസനീയമായ ഒരു കഥ രൂപപെടുത്തിയെടുക്കാൻ നജീമിന് സാധിച്ചില്ല. രസകരമായ കഥാതന്തുവിനെ അവിശ്വസനീയമായ കഥാഗതിയിലൂടെ അവതരിപ്പിക്കാൻ ശ്രമിച്ചത് പ്രതികൂലമായി ബാധിച്ചു. ഷെർലക് ഹോംസ് എന്ന കുറ്റാന്വേഷകന്റെ വിളിപ്പേരുണ്ട് എന്നുള്ളതല്ലാതെ ബിജു മേനോൻ അവതരിപ്പിക്കുന്ന തോമസിന് സാക്ഷാൽ ഹോംസിനോട് ഉപമിക്കാവുന്ന ഒരു സവിശേഷതയുമില്ല. മാൻ ഓൺ എ ലെഡ്‌ജ്‌ എന്ന ഇംഗ്ലീഷ് സിനിമയിൽ നിന്നും പ്രചോദനമുൾക്കൊണ്ടാണ് നജീം കോയ ഈ സിനിമയുടെ കഥ രൂപപ്പെടുത്തിയത്.

തിരക്കഥ: ⭐⭐
നജീം കോയയും ഷാഫിയും സച്ചിയും ചേർന്നാണ് ഈ സിനിമയുടെ കഥാസന്ദർഭങ്ങൾ എഴുതിയത്. അതീവ ബുദ്ധിമാനായ തോമസിന്റെ കുറ്റാന്വേഷക കഴിവുകൾ കഥാസന്ദർഭങ്ങളാക്കുന്നതിന് പകരം, മദ്യപാനവും അസഭ്യവും പാട്ടും കുടുംബപ്രശ്നങ്ങളും സമന്വയിപ്പിച്ചു പ്രേക്ഷകരെ ബോറടിപ്പിക്കുന്ന കഥാസന്ദർഭങ്ങൾ ആയിരുന്നു ആദ്യ പകുതിയിലുടനീളം. കാറ്റഴിച്ചുവിട്ട ബലൂൺ പോലെ അന്തവും കുന്തവുമില്ലാതെ രണ്ടാം പകുതി കോമാളിത്തരങ്ങൾ കൊണ്ട് കുത്തിനിറച്ചു. ആത്മഹത്യാ ശ്രമവും അത് കാണാനെത്തുന്ന മണ്ടന്മാരായ നാട്ടുകാരും, രക്ഷിക്കാനെത്തുന്ന പോലീസും ഫയർ ഫോഴ്‌സും തുടങ്ങി എല്ലാവിധ കോപ്രായങ്ങളുംകൊണ്ട് സമ്പന്നമായിരുന്നു രണ്ടാം പകുതി. അവസാനം,ഷെർലക് ടോംസ് എന്ന സിനിമയുടെ ശീർഷകത്തോട്‌ നീതിപുലർത്തുവാൻ വേണ്ടി കണ്ടുപിടിച്ച ക്‌ളൈമാക്‌സും.മേല്പറഞ്ഞ കഥാസന്ദർഭങ്ങൾക്കു മാറ്റുകൂട്ടുന്നു അസഭ്യ സംഭാഷണങ്ങൾ എഴുതിയത് സച്ചിയാണ്. സച്ചിയോളം കഴിവുള്ള ഒരു തിരക്കഥാകൃത്തിൽ നിന്നും വിഡ്ഡിത്തരങ്ങൾ മാത്രമുള്ള ഇതുപോലൊരു തിരക്കഥ ബിജു മേനോൻ പോലും പ്രതീക്ഷിച്ചിട്ടുണ്ടാവില്ല.

സംവിധാനം: ⭐⭐
ഹാസ്യ സിനിമയ്ക്ക് വേണ്ടി എഴുതപെട്ട ഒരു തിരക്കഥയും കഥാപാത്രങ്ങളും സംഭാഷണങ്ങളും, നടീനടന്മാരെയും ലഭിച്ചപ്പോൾ ഷാഫി സ്ഥിരം അവതരണ രീതി തന്നെ സ്വീകരിച്ചു. കുട്ടികൾക്കും കുടുംബങ്ങൾക്കും ഒരുവട്ടം കണ്ടുമറക്കാവുന്ന ഒരു സിനിമ എന്നതിലുപരി പ്രാധാന്യം ഷാഫി ഈ സിനിമയ്ക്ക് നൽകിയതായി തോന്നിയില്ല.ഷെർലക് ടോംസ് അഥവാ തോമസിന്റെ കുടുംബജീവിത പ്രശ്നങ്ങൾ പലയാവർത്തി പറഞ്ഞു പ്രേക്ഷകരെ വെറുപ്പിച്ചു. രണ്ടാം പകുതിയിൽ ടോംസ് ആത്മഹത്യാ ചെയ്യുന്നതായിരുന്നു നല്ലതു എന്നുവരെ തോന്നിപ്പിക്കുന്ന അത്രയും വെറുപ്പ് പ്രേക്ഷകർക്ക് ഒന്നടങ്കം സിനിമയോട് തോന്നി. സലിംകുമാറും ജോബിയും ഹരീഷും കോട്ടയം നസീറും മികവോടെ അവരവരുടെ കഥാപാത്രങ്ങളെ അവതരിപ്പിച്ചതുകൊണ്ടു പ്രേക്ഷകർ രണ്ടേകാൽ മണിക്കൂർ പ്രദർശനശാലകളിൽ തന്നെ ഇരുന്നു.

സാങ്കേതികം: ⭐⭐
ആൽബിയുടെ ഛായാഗ്രഹണം സിനിമയ്ക്ക് അനിയോജ്യമായിരുന്നു. പുതുമയുള്ള ഷോട്ടുകൾ ഒന്നുമില്ലായിരുന്നുവെങ്കിലും, ഒരു ഹാസ്യ ചിത്രത്തിനു വേണ്ട രസകരമായ വിഷ്വൽസ് ചിത്രീകരിക്കുവാൻ ആൽബിക്ക് സാധിച്ചു. വി.സാജന്റെ സന്നിവേശം ആദ്യപകുതിയിൽ സമ്പൂർണ്ണ നിരാശയാണ് സമ്മാനിച്ചത്. ഇഴഞ്ഞു നീങ്ങുന്ന അവസ്ഥയിലായിരുന്നു ആദ്യപകുതിയിൽ രംഗങ്ങളിൽ ഭൂരിഭാഗവും. ഷെർലക് ടോംസിന്റെ ചെറുപ്പകാലം ചിത്രീകരിക്കാതെ തന്നെ അയാളുടെ സ്വഭാവം മനസിലാക്കികൊടുക്കുവാൻ സാധിക്കുമായിരുന്നു. അതുപോലെ, ആദ്യ പകുതിയിലെ മദ്യം വിൽക്കുന്ന കടയിൽ നിന്ന് തോമസിന്റെ സുഹൃത്തുക്കൾ മദ്യം മോഷ്ടിക്കാനുപയോഗിക്കുന്ന വിദ്യ ശ്രദ്ധിച്ചവർക്കെല്ലാം, ക്‌ളൈമാക്‌സ് ഊഹിക്കാനാവുന്നതായിരുന്നു. ഹരിനാരായണൻ എഴുതി ബിജിബാൽ ഈണമിട്ട പള്ളിക്കലച്ചന്റെ മോളെ എന്ന ഗാനം രസകരമായിരുന്നു. രാഹുൽ രാജാണ് പശ്ചാത്തല സംഗീതം നൽകിയത്. ഷെർലക് ടോംസിനു അനിയോജ്യമായ ഒരു കോമഡി പശ്ചാത്തല സംഗീതം ബിജു മേനോന്റെ കഥാപാത്രത്തിന് നൽകാമായിരുന്നു. സുജിത് രാഘവാണ് കലാസംവിധാനം നിർവഹിച്ചത്. 1993 കാലഘട്ടത്തിലെ സ്ക്കൂളും പുസ്തകങ്ങളും ചായക്കടയും വിശ്വസനീയത നൽകി. റോഷൻ നിർവഹിച്ച ചമയം ഓരോ കഥാപാത്രങ്ങൾക്കും അനിയോജ്യമായിരുന്നു. അതിൽ പ്രധാനമായിരുന്നു കലാഭവൻ ഷാജോണിന്റെ മേക്കപ്പ്. പല കാലഘട്ടങ്ങളിലൂടെ കടന്നുപോകുന്ന ആ കഥാപാത്രത്തിനും അയാളുടെ അവസ്ഥക്കും യോജിച്ചതായിരുന്നു മേക്കപ്പ്. എസ്.ബി.സതീഷ് ആണ് വസ്ത്രാലങ്കാരം നിർവഹിച്ചത്.

അഭിനയം: ⭐⭐⭐
ഷെർലക് ടോംസെന്ന കഥാപാത്രത്തെ തന്റെ സ്വദസിദ്ധമായ ശൈലിയിൽ ബിജു മേനോൻ അവതരിപ്പിച്ചു. ഏറെ നാളുകൾക്കു ശേഷം സലിം കുമാർ അമിതാഭിനയം കാഴ്ചവെക്കാതെ ആശാൻ കഥാപാത്രം അവതരിപ്പിച്ചു. സുരേഷ് കൃഷ്ണയും ഹരീഷും കോട്ടയം നസീറും റാഫിയും ജോബിയും ഷാജോണും ഹാസ്യ കഥാപാത്രങ്ങളിൽ തിളങ്ങി. ഏറെ പ്രയാസമുള്ള ഒരു കഥാപാത്രത്തെ ശ്രിന്ദ കയ്യടക്കത്തോടെ അവതരിപ്പിച്ചു. അമിതാഭിനയത്തിലേക്ക് വഴുതിവീഴാൻ സാധ്യതയുള്ള ഒന്നായിരുന്നു സദാസമയം വഴക്കു കൂടുന്ന ഭാര്യ കഥാപാത്രം. ഇവരെ കൂടാതെ വിജയരാഘവൻ, മിയ ജോർജ്, വിജയകുമാർ, പ്രശാന്ത് അലക്‌സാണ്ടർ, രാജേഷ് പറവൂർ, ജയൻ ചേർത്തല, ബാലാജി ശർമ്മ, വിനുത ലാൽ, ദിനേശ് പ്രഭാകർ, മോളി കണ്ണമാലി, നെൽസൺ, കലാഭവൻ ഹനീഫ്, വിനോദ് കെടാമംഗലം, അനിയപ്പൻ എന്നിവരും ഈ സിനിമയിലെ പ്രധാന കഥാപാത്രങ്ങളെ അവതരിപ്പിച്ചു.

വാൽക്കഷ്ണം: ഷെർലക് ടോംസ് സിനിമയുടെ രണ്ടാം പകുതിയിൽ പ്രേക്ഷകരോടെന്ന പോലെ ബിജു മേനോൻ ചോദിക്കുന്ന ചോദ്യമുണ്ട്. “നിങ്ങൾക്ക് വേറെ പണിയൊന്നുമില്ല?, മണ്ടന്മാർ!” ആ ചോദ്യത്തിന്റെ പൊരുൾ പ്രേക്ഷകർ തിരിച്ചറിഞ്ഞത് രണ്ടേകാൽ മണിക്കൂറുകൾക്കു ശേഷം പ്രദർശന ശാലകളിൽ നിന്നെറങ്ങുബോഴാണ്!

സംവിധാനം: ഷാഫി
കഥ: നജീം കോയ
തിരക്കഥ: സച്ചി, നജീം കോയ, ഷാഫി
സംഭാഷണങ്ങൾ: സച്ചി
നിർമ്മാണം: പ്രേം മേനോൻ
ബാനർ: ഗ്ലോബൽ യുണൈറ്റഡ് മീഡിയ
ഛായാഗ്രഹണം: ആൽബി
സന്നിവേശം: സാജൻ
സംഗീതം: ബിജിബാൽ
പശ്ചാത്തല സംഗീതം: രാഹുൽ രാജ്
ഗാനരചന: ഹരിനാരായണൻ
കലാസംവിധാനം: സുജിത് രാഘവ്
ചമയം: റോഷൻ
വസ്ത്രാലങ്കാരം: എസ്.ബി.സതീഷ്
വിതരണം: സെഞ്ച്വറി ഫിലിംസ്.

ലക്ഷ്യം – ⭐


അലക്ഷ്യം അവിശ്വസനീയം! – ⭐

രണ്ടു വ്യക്തികൾ രണ്ടു ലക്ഷ്യങ്ങൾ. ഒരാൾക്ക്‌ തന്റെ നിരപരാധിത്വം തെളിയിക്കണമെന്ന ലക്ഷ്യവും മറ്റൊരാൾക്ക് വിലപിടിപ്പുള്ള ഒരു മോഷണ വസ്തു സ്വന്തമാക്കണമെന്ന ലക്ഷ്യവും. ജീത്തു ജോസഫ് എഴുതിയ കഥാസന്ദർഭങ്ങൾ ആകാംഷ ജനിപ്പിക്കുന്നതായിരുന്നുവെങ്കിലും, കഥാഗതി അവിശ്വസനീയമായിരുന്നു. അത്തരത്തിലുള്ള ഒരു കഥയുടെ അലക്ഷ്യമായ അവതരണമാണ് അൻസാർ ഖാൻ സ്വീകരിച്ചത്.

ജീത്തു ജോസഫും, ടെജി മണലേലിലും, ജോയ് തോമസ് ശക്തികുളങ്ങരയും ചേർന്നാണ് ലക്ഷ്യം നിർമ്മിച്ചത്. നവാഗതനായ അൻസാർ ഖാന്റെ കഥയ്ക്ക് തിരക്കഥയും സംഭാഷണങ്ങളും എഴുതിയത് ജീത്തു ജോസഫാണ്. സിനു സിദ്ധാർഥ് ഛായാഗ്രഹണവും, അയൂബ് ഖാൻ സന്നിവേശവും, അനിൽ ജോൺസൺ പശ്ചാത്തലസംഗീതവും നിർവഹിച്ചിരിക്കുന്നു.

പ്രമേയം: ⭐
കൊലപാതകകുറ്റത്തിന് ശിക്ഷ ലഭിച്ച വിമലും മോഷണക്കുറ്റത്തിന് ജയിലടച്ച മുസ്തഫയും പോലീസ് ജീപ്പിൽ സഞ്ചരിച്ചുകൊണ്ടിരിക്കവേ ഒരുപകടം സംഭവിക്കുകയും, ആ ജീപ്പ് കാടിനുള്ളിലെ കൊക്കയിലേക്ക് വീഴുകയും ചെയ്യുന്നു. ഇരുവരെയും ബന്ധിപ്പിക്കുന്ന വിലങ്ങു കൈകളിൽ ഉള്ളതിനാൽ പരസ്പര സഹായത്തോടെ മാത്രമേ ഇരുവർക്കും രക്ഷപെടാൻ സാധിക്കുകയുള്ളു. കൈകളിലുള്ള വിലങ്ങല്ലാത്ത ഇരുവരെയും ബന്ധിപ്പിക്കുന്ന മറ്റൊരു ഘടകം കൂടിയുണ്ട്. ആ ഘടകമാണ് ഈ സിനിമയുടെ സസ്പെൻസ്. അൻസാർ ഖാന്റേതാണ് കഥ.

തിരക്കഥ: ⭐
ഇന്ത്യയിലെ ഒട്ടുമിക്ക ഭാഷകളിലും വാണിജ്യവിജയം നേടിയ സിനിമയാണ് ദൃശ്യം. സിനിമ പ്രേമികളെ ആകാംഷയുടെ മുൾമുനയിൽ നിർത്തിയ സിനിമയാണ് മെമ്മറീസ്. വേറിട്ട സസ്പെൻസിലൂടെ അവതരിപ്പിച്ച ഒന്നായിരുന്നു ഡിറ്റെക്റ്റിവ്. മേല്പറഞ്ഞ മൂന്ന് സിനിമകളും പ്രേക്ഷകർ സ്വീകരിച്ചരിച്ചതിനു കാരണം ജീത്തു ജോസഫിന്റെ രചനാപാടവം ഒന്നുകൊണ്ടു മാത്രമാണ്. വിശ്വസനീയമായ കഥാഗതിയും സസ്പെൻസ് നിലനിർത്തിയിരുന്ന രീതിയുമാണ് മൂന്ന് സിനിമകളുടെയും പ്രത്യേകത. ലക്ഷ്യം എന്ന സിനിമയുടെ തിരക്കഥയിലെ വഴിത്തിരുവുകളിൽ പലതും യുക്തിക്ക് നിരക്കാത്തതായിരുന്നു. ഇന്ദ്രജിത്ത് അവതരിപ്പിച്ച വിമൽ എന്നയാളെ കൊലപാതകിയാണെന്നു കരുതുവാനുള്ള സാഹചര്യ തെളിവുകൾ ഉണ്ടെന്നു പറയപ്പെടുന്നുണ്ടെങ്കിലും, അവയൊന്നും കഴമ്പുള്ളതായിരുന്നില്ല. കാമുകിയുടെ കൂട്ടുകാരികൾക്കു മുഴുവനറിയാവുന്ന ഒന്നായിരുന്നു വിമലിന്റെയും ശാലിനിയുടെയും പ്രണയം. ആ അവസരത്തിൽ ശാലിനിയെ വകവരുത്താൻ വിമൽ ശ്രമിക്കുമെന്ന് ഏവരും കരുതും എന്ന സാഹചര്യം അവിശ്വസനീയമായിരുന്നു. അതുപോലെ, കൊലയാളിയാരാണെന്നു പലതവണ സംശയം തോന്നിപ്പിക്കുന്ന സന്ദർഭങ്ങളിലൂടെ വിമൽ കണ്ടന്നുപോകുന്നുണ്ടെങ്കിലും അവയൊന്നും മനസിലാകാത്ത അത്രയും മന്ദബുദ്ധിയല്ല വിമൽ എന്ന കഥാപാത്രം. മേല്പറഞ്ഞവയാണ് യുക്തിയെ ചോദ്യം ചെയ്യുന്ന ഒന്ന് രണ്ടു കഥാസന്ദർഭങ്ങൾ. സിനിമയുടെ ആദ്യാവസാനം സംഭാഷണങ്ങളിൽ കൃത്രിമത്വം നിറഞ്ഞിരുന്നു. കാമുകിയെ കൊന്നയാളെ കണ്ടുപിടിക്കാൻ സഹായിക്കാൻ സമ്മതിക്കുന്ന മുസ്തഫയോട് വിമൽ വിലപേശുന്ന സംഭാഷണങ്ങൾ തന്നെ ഉദാഹരണം. സിനിമയുടെ ആദ്യപകുതിയുടെ അവസാനമുള്ള സസ്പെൻസും, ക്‌ളൈമാക്‌സിനോട് ചേർന്നുള്ള രണ്ടാമത്തെ സസ്‌പെൻസും നിലനിർത്തിയിരുന്ന രീതി മാത്രമാണ് ഏക ആശ്വാസം. ജീത്തുവിന്റെ ഭാവനയിൽ ഉടലെടുക്കുന്ന മറ്റൊരു ദൃശ്യത്തിനായി കാത്തിരിക്കാം.

സംവിധാനം: ⭐⭐
ജീത്തു ജോസഫിന്റെ സഹായിയിരുന്ന അൻസാർ ഖാന്റെ സംവിധാന രീതിയാണ് ഒരുപരിധിവരെ ലക്ഷ്യം എന്ന സിനിമയെ വ്യത്യസ്തമാക്കുന്നത്. സസ്പെൻസ് നിലനിർത്തിയ രീതി പ്രേക്ഷകരിൽ ആകാംഷ ജനിപ്പിക്കുന്നതായിരുന്നു. ഊഴം എന്ന സിനിമയിലേത് പോലെ നോൺ ലീനിയർ അവതരണമാണ് ഈ സിനിമയിലും. കാടിന്റെ ഭീകരത അവതരിപ്പിക്കാൻ ഗ്രാഫിക്സിന്റെ സഹായത്തോടെ ശ്രമിച്ചിരുന്നുവെങ്കിലും, ആ ശ്രമം പാഴായിപ്പോയി. കരടിയുടെ ആക്രമണത്തിൽ നിന്നും രക്ഷപെടുന്ന രംഗം അതിനുദാഹരണം. രണ്ടു മണിക്കൂറിൽ കൂടാതെയുള്ള കഥയുടെ അവതരണം പ്രേക്ഷകരിൽ ബോറടി സൃഷ്ടിച്ചില്ല. സംവിധായകന്റെ ആദ്യ സിനിമ എന്ന പരിചയക്കുറവ് സിനിമയിലുടനീളം കണ്ടിരുന്നു. എന്നിരുന്നാലും, സസ്പെൻസ് സിനിമകൾ ഇഷ്ടപെടുന്ന പ്രേക്ഷകരെ ത്രിപ്തിപെടുത്തുവാൻ അൻസാർ ഖാന്റെ ലക്ഷ്യത്തിനു സാധിച്ചു എന്ന് കരുതാം.

സാങ്കേതികം: ⭐⭐⭐
കഥയുടെ ഗൗരവം നഷ്ടമാകാതെ കാടിന്റെ വശ്യത മുഴുവൻ ഒപ്പിയെടുത്തുകൊണ്ടു മികച്ച കാഴ്ചകൾ ഒരുക്കിയ ഛായാഗ്രാഹകൻ സിനു സിദ്ധാർഥ് പ്രത്യേക അഭിനന്ദനം അർഹിക്കുന്നു. ടോണി മാക്മിത്ത് നിർവഹിച്ച ഗ്രാഫിക്സ് വേണ്ടത്ര വിശ്വസനീയത നൽകാതിരുന്നത് ഒരുപരിധിവരെ മറച്ചുപിടിക്കാൻ സിനു സിദ്ധാർത്ഥിന്റെ ചായഗ്രഹണത്തിനു കഴിഞ്ഞിട്ടുണ്ട്. അയൂബ് ഖാന്റെ സന്നിവേശം ആദ്യപകുതിയിലെ രംഗങ്ങളെ ത്രസിപ്പിക്കുന്ന രീതിയിലാക്കുവാൻ സഹായിച്ചിട്ടുണ്ട്. ഒരു ഹൃസ്വചിത്രത്തിനു മാത്രം സാധ്യതയുള്ള കഥയെ അധികം വലിച്ചുനീട്ടാതെ രണ്ടുമണിക്കൂറിനുള്ളിൽ അവതരിപ്പിച്ചത് ആസ്വാദനത്തിനു ഗുണകരമായി. മാഫിയ ശശിയും അൻപ് അറിവും ചേർന്ന് സംവിധാനം നിർവഹിച്ച സംഘട്ടന രംഗങ്ങൾ ശരാശരിയിലൊതുങ്ങി. സന്തോഷ് വർമ്മ എഴുതി എം.ജയചന്ദ്രൻ ഈണമിട്ട ഒരേയൊരു ഗാനം മാത്രമാണ് ഈ സിനിമയിലുള്ളത്. അനിൽ ജോൺസൺ നിർവഹിച്ച പശ്ചാത്തല സംഗീതം ശ്രദ്ധ നേടുന്നില്ല. ഹസ്സൻ വണ്ടൂരിന്റെ ചമയം കൃത്രിമത്വം നിറഞ്ഞതായിരുന്നു. ജീപ്പപകടം സംഭവിച്ചപ്പോൾ അതിലുണ്ടായിരുന്ന പോലീസുകാരുടെ മുഖത്തും ദേഹത്തും പരിക്കുകൾ സംഭവിച്ചതായി കണ്ടു. എന്നാൽ, ഇന്ദ്രജിത്തിനും ബിജു മേനോനും പരിക്കുകൾ നെറ്റിയിലും മുഖത്തും മാത്രമായി ഒതുങ്ങി. ലിന്റ ജീത്തുവിന്റെ വസ്ത്രാലങ്കാരം കഥാസന്ദർഭങ്ങൾക്കു അനിയോജ്യമായിരുന്നു.

അഭിനയം: ⭐⭐
വിമൽ എന്ന കഥാപാത്രമായി ഇന്ദ്രജിത്തും മുസ്തഫയായി ബിജു മേനോനും തരക്കേടില്ലാത്ത അഭിനയം കാഴ്ചവെച്ചു. പരുക്കൻ സ്വഭാവമുള്ള ഒരു വ്യക്തിത്വമാണ് വിമലിന്റേത്. സിനിമയിലുടനീളം ആ ഭാവം പ്രകടമാക്കുവാൻ ഇന്ദ്രജിത്തിന് സാധിച്ചു. ആദ്യപകുതിയിൽ ഹാസ്യവും രണ്ടാംപകുതിയിൽ ഗൗരവും ഒരുപോലെ അവതരിപ്പിച്ചു കയ്യടിനേടി മലയാളികളുടെ പ്രിയപ്പെട്ട നായകൻ ബിജു മേനോൻ. ബിജു മേനോന്റെ സംഭാഷണ ശൈലിയാണ് പ്രേക്ഷകരെ ഏറെ രസിപ്പിച്ചത്. ജീപ്പ് മറഞ്ഞു പരുക്കേറ്റവരുടെ കൈകാലുകൾക്ക് പരിക്കൊന്നും സംഭവിച്ചില്ല എന്നത് സംവിധായകൻ പറഞ്ഞുകൊടുത്താൽ മാത്രം ഓർക്കേണ്ട പരിചയസമ്പത്താണോ ഇന്ദ്രജിത്തിനും ബിജു മേനോനും ഉള്ളത് എന്ന സംശയം പ്രേക്ഷകർക്ക് തോന്നിയിട്ടുണ്ടെങ്കിൽ അവരെ തെറ്റുപറയാനാകില്ല. അഭിനയ സാദ്ധ്യതകൾ ഏറെയുള്ള കഥാപാത്രമായിരുന്നു ശിവദയുടേത്. സുധി വാല്മീകത്തിൽ കണ്ട ഊർജ്ജമൊന്നും ശിവദയുടെ അഭിനയത്തിൽ കണ്ടില്ല. ഇവരെ കൂടാതെ കിഷോർ സത്യ, ഷമ്മി തിലകൻ, സുധി കോപ്പ, മഹേഷ്, ടോഷ് ക്രിസ്റ്റി എന്നിവരാണ് ഈ സിനിമയിലെ മറ്റു പ്രധാന അഭിനേതാക്കൾ.

വാൽക്കഷ്ണം: യുക്തിയില്ലാത്ത കഥ, ത്രസിപ്പിക്കാത്ത രംഗങ്ങൾ, അവിശ്വസനീയ കഥാഗതി, ലക്ഷ്യത്തിലെത്താത്തൊരു സിനിമ!

കഥ, സംവിധാനം: അൻസാർ ഖാൻ
തിരക്കഥ, സംഭാഷണം: ജീത്തു ജോസഫ്
നിർമ്മാണം: ജോയ് തോമസ്, ടെജി മണലേൽ, ജീത്തു ജോസഫ്
ഛായാഗ്രഹണം: സിനു സിദ്ധാർഥ്
ചിത്രസന്നിവേശം: അയൂബ് ഖാൻ
സംഗീതം: എം.ജയചന്ദ്രൻ
പശ്ചാത്തല സംഗീതം: അനിൽ ജോൺസൺ
ഗാനരചന: സന്തോഷ് വർമ്മ
കലാസംവിധാനം: എം.ബാവ
സംഘട്ടനം: മാഫിയ ശശി, അൻപ് അറിവ്
ചമയം: ഹസ്സൻ വണ്ടൂർ
വസ്ത്രാലങ്കാരം: ലിന്റ ജീത്തു
ഗ്രാഫിക്സ്: ടോണി മാക്മിത്ത്
വിതരണം: കാസ്, കലാസംഘം, റൈറ്റ് റിലീസ്.

രക്ഷാധികാരി ബൈജു (ഒപ്പ്) – ⭐⭐⭐


ഗൃഹാതുരത്വ ഓർമ്മകളിലൂടെ ഒരല്പനേരം – ⭐⭐⭐

ഓരോ തലമുറയിലെ കുട്ടികൾക്കും അവരുടേതായ പ്രിയപ്പെട്ട വിനോദങ്ങളുണ്ടാകും. മൊബൈൽ ഫോണും കംപ്യൂട്ടർ ഗെയിമുകളും ഇന്നത്തെ തലമുറയിലെ കുട്ടികൾക്ക് ജീവിതം ആസ്വദിക്കാനുള്ള ഏറ്റവും പ്രധാനപ്പെട്ട വിനോദ ഉപാദികളാണ്. ഒന്നോ രണ്ടോ തലമുറ മുമ്പുള്ള, ഇന്നത്തെ യുവാക്കളായ അന്നത്തെ കുട്ടികൾ സമയം ചിലവഴിച്ചുകൊണ്ടിരുന്നതും ഓരോ വിനോദങ്ങളിൽ ഏർപ്പെട്ടിരുന്നതും പാടത്തും പറമ്പിലും നാട്ടിൻപുറത്തെ കൊച്ചു മൈതാനങ്ങളിലുമായാണ്. കാലമെത്ര കഴിഞ്ഞാലും അവയെല്ലാം ഒരുപിടി മനോഹരമായ ഓർമ്മകളായി എന്നും അവരുടെ ഉള്ളിൽ അവശേഷിക്കുന്നു. അത്തരത്തിലുള്ള കുറെ സുന്ദര നിമിഷങ്ങൾ ഇന്നത്തെ തലമുറയിലെ കുട്ടികൾക്ക് മനസിലാക്കുവാനും പഴയ തലമുറയിലുള്ളവർക്കു അവരുടെ ബാല്യകാലസ്മരണങ്ങൾ ഓർത്തെടുക്കുവാനും സാധിക്കുന്ന സിനിമയാണ് രക്ഷാധികാരി ബൈജു(ഒപ്പ്‌).

റോസ് ഗിറ്റാറിനാൽ എന്ന സിനിമയ്ക്ക് ശേഷം രഞ്ജൻ പ്രമോദ് രചനയും സംവിധാനവും നിർവഹിച്ച സിനിമയാണ് രക്ഷാധികാരി ബൈജു. പുതുമുഖം ടി.എസ് അർജുനാണ് ഈ സിനിമയുടെ കഥ എഴുതിയത്. 100ത് മങ്കി മൂവീസിനു വേണ്ടി അലക്‌സാണ്ടർ മാത്യുവും സതീഷ് കോലവും നിർമ്മിച്ച രക്ഷാധികാരി ബൈജു ഇറോസ് ഇൻറ്റർനാഷണലാണ് വിതരണം ചെയ്തിരിക്കുന്നത്.

പ്രമേയം: ⭐⭐
കേരളത്തിലെ ഏതു കൊച്ചു ഗ്രാമപ്രദേശത്ത് ചെന്നാലും അവിടെയൊക്കെ ബൈജുവിനെ പോലെയുള്ള ആളുകളെ കാണാൻ സാധിക്കും. ആ പ്രദേശത്തുള്ള നിവാസികളൊക്കെ ഏതു പ്രധാനപ്പെട്ട കാര്യത്തിനും സമീപിക്കുന്നത് ബൈജുവിനെ പോലെയുള്ളവരെയായിരിക്കും. അതുപോലെ ഗ്രാമനിവാസികളായ യുവാക്കളും കുട്ടികളും ദിവസേന വൈകുന്നേരങ്ങളിൽ ഒത്തുകൂടുന്ന ഒരു ചായക്കടയോ കവലയോ മൈതാനമോ ഉണ്ടാകും. അവരുടെ ദിനചര്യകളിൽ പ്രത്യേകിച്ചു മാറ്റങ്ങൾ ഒന്നുമുണ്ടാകില്ല. അവിടെയുള്ളവരുടെ വിനോദത്തിനായി ആരംഭിക്കുന്ന ആർട്സ് ആൻഡ് സ്പോർട്സ് ക്ലബ്ബും അതിന്റെ പ്രവർത്തനങ്ങളും കായിക വിനോദങ്ങളും എല്ലാ പ്രദേശങ്ങളിലും കാണപെടുന്നതാണ്. കുമ്പളം എന്ന കൊച്ചുഗ്രാമത്തിൽ ബൈജുവിന്റേയും കൂട്ടരുടെയും നേതൃത്വത്തിൽ തുടങ്ങുന്ന കുമ്പളം ബ്രദേഴ്സ് എന്ന ക്ലബ്ബും കായികവിനോദങ്ങളുടെ കൂട്ടായ്മയ്ക്ക് വേണ്ടിയാണ് ആരംഭിക്കുന്നത്. മേല്പറഞ്ഞ കുമ്പളം ഗ്രാമനിവാസികളുടെയും അവരുടെ ഒരേയൊരു മൈതാനത്തിന്റ രക്ഷാധികാരി ബൈജുവിന്റെയും കഥയാണ് രക്ഷാധികാരി ബൈജു എന്ന സിനിമയിലൂടെ രഞ്ജൻ പ്രമോദ് പറയുന്നത്.

തിരക്കഥ: ⭐⭐⭐⭐
രണ്ടാം ഭാവവും, മീശമാധവനും, മനസ്സിനക്കരയും, നരനും എഴുതിയ രഞ്ജൻ പ്രമോദിന്റെ തൂലികയിൽ പിറന്ന ഗംഭീര തിരക്കഥയാണ് രക്ഷാധികാരി ബൈജു. ഗൃഹാതുരത്വമുണർത്തുന്ന ഒരുപിടി നല്ല മുഹൂർത്തങ്ങൾ അത്യന്തം രസകരമായി കോർത്തിണക്കിയ കഥാസന്ദർഭങ്ങളാണ് സിനിമയുടെ ആദ്യാവസാനം. മഹേഷിന്റെ പ്രതികാരം എന്ന സിനിമയുടെ തിരക്കഥയ്ക്ക് ശേഷം ഇത്രയും ഹൃദയത്തോട് ചേർന്ന് നിന്നെഴുതിയ തിരക്കഥയൊന്നും അടുത്തകാലത്തു മലയാള സിനിമയിൽ കണ്ടിട്ടില്ല. ഹാസ്യത്തിന്റെ മേമ്പൊടിയോടെ ദ്വയാർത്ഥ പ്രയോഗമില്ലാത്ത ശുദ്ധമായ നർമ്മ സംഭാഷണങ്ങളിലൂടെ അവതരിപ്പിച്ച രംഗങ്ങളെല്ലാം പ്രേക്ഷകർ ആസ്വദിച്ചു. ഓരോ കഥാപാത്രങ്ങളുടെയും രൂപീകരണമാണ് തിരക്കഥയുടെ മറ്റൊരു സവിശേഷതയായി തോന്നിയത്. അവരിലെ പലരിലും നമ്മളെ തന്നെ കാണുവാൻ സാധിക്കുമായിരുന്നു. വിശ്വസനീയതയുള്ള സന്ദർഭങ്ങൾ, ഏച്ചുകെട്ടലുകളില്ലാത്ത സംഭാഷണങ്ങൾ, സുപരിചതരായ കഥാപാത്രങ്ങൾ, ഹൃദയസ്പർശിയായ ക്‌ളൈമാക്‌സ് തുടങ്ങിയവയാണ് തിരക്കഥയിലെ പ്രത്യേകതകൾ. കുട്ടിക്കാലം മുതൽ നമുക്ക് ചുറ്റും കണ്ട കാഴ്ചകളെല്ലാം കുട്ടികൾക്കും കുടുംബത്തിനൊപ്പം വീണ്ടും കാണുമ്പോളുള്ള സന്തോഷം പ്രേക്ഷകരിൽ പ്രകടമായിരുന്നു. ഇനിയും ഇതുപോലെ രസകരമായ തിരക്കഥകൾ എഴുതുവാൻ രഞ്ജൻ പ്രമോദിന് കഴിയട്ടെ.

സംവിധാനം: ⭐⭐⭐⭐
കഥാസന്ദർഭങ്ങളുടെ കൃത്രിമത്വമില്ലാത്ത അവതരണമാണ് ഓരോ സിനിമയെയും പ്രേക്ഷകരുടെ പ്രിയപെട്ടതാകുന്നത്. കേരളത്തിലെ നാട്ടിൻപുറങ്ങളിൽ ചെന്നാൽ നേരിൽ കാണുന്ന കാഴ്ചകൾ അതേപടി വിശ്വസനീയമായി അവതരിപ്പിച്ച രഞ്ജൻ പ്രമോദിന്റെ സംവിധാന രീതി പ്രശംസനീയമാണ്. കഥാപശ്ചാത്തലത്തിനു അനിയോജ്യമായ ഒരു ലൊക്കേഷനിൽ ഈ സിനിമ ചിത്രീകരിക്കാനായി എന്നത് കഥയുടെ വിശ്വസനീയതയ്ക്കു ആക്കം കൂട്ടിയിട്ടുണ്ട്. അഭിനേതാക്കളുടെ മിതമാർന്ന പ്രകടനവും, സിങ്ക് സൗണ്ട് ഉപയോഗിച്ചുള്ള സംഭാഷണങ്ങളുടെ റെക്കോർഡിങ്ങും സിനിമയുടെ അവതരണത്തിന് ഗുണം ചെയ്തിട്ടുണ്ട്. ആ ഗ്രാമനിവാസികളുടെ മൈതാനത്തിന്റെ കഥയോടൊപ്പം ബൈജുവിന്റെയും സുഹൃത്തുക്കളുടെയും കുടുംബത്തിലുള്ളവരുടെയും ജീവിതത്തിലെ വിഷമങ്ങളും സന്തോഷങ്ങളും കഷ്ടപ്പാടുകളും പ്രണയവും വിരഹവും കൃത്യമായി സമന്വയിപ്പിച്ചാണ് രഞ്ജൻ പ്രമോദ് അവതരിപ്പിച്ചത്. എൺപതുകളുടെ അവസാനം നിർമ്മിക്കപ്പെട്ടിട്ടുള്ള ചില സത്യൻ അന്തിക്കാട്-ശ്രീനിവാസൻ സിനിമകളെ ഓർമ്മിപ്പിക്കിന്നവിധമാണ് ഈ സിനിമയുടെ അവതരണം. ഒരുപാട് നാളുകൾക്കു ശേഷമുള്ള രഞ്ജൻ പ്രമോദ് എന്ന എഴുത്തുകാരന്റെയും സംവിധായകന്റെയും രണ്ടാംവരവ് ഗംഭീരമായി.

സാങ്കേതികം: ⭐⭐⭐⭐
സിനിമയുടെ ദൈർഘ്യം കഥയാവശ്യപെടുന്നതിലും ഒരല്പം കൂടുതലായിരുന്നു എന്നത് ആസ്വാദനത്തെ ദോഷകരമായി ബാധിച്ചു. സംജിത് മുഹമ്മദ് തന്റെ സ്ഥിരം ശൈലി കൈവിടാതെ സൂക്ഷമമായി രംഗങ്ങൾ കോർത്തിണക്കിയിട്ടുണ്ട്. കഥയിൽ പ്രാധാന്യമില്ലാത്ത ഒന്ന് രണ്ടു കഥാപാത്രങ്ങളെ ഒഴുവാക്കിയിരുന്നുവെങ്കിൽ ദൈർഘ്യം കുറയ്ക്കാമായിരുന്നു. പ്രശാന്ത് രവീന്ദ്രനാണ് രംഗങ്ങൾ ക്യാമറയിൽ പകർത്തിയത്. ഓരോ ഫ്രയിമുകളും നൂറു ശതമാനം വിശ്വസനീയതയോടെയാണ് ചിത്രീകരിച്ചത്. ക്യാമറ ഗിമ്മിക്‌സുകളോ കൃത്രിമത്വ ലൈറ്റുകളോ ഒന്നും ഉപയോഗിക്കാതെ ചിത്രീകരിച്ച ഈ സിനിമയിലെ ഓരോ രംഗങ്ങളും ഹൃദ്യമായിരുന്നു. എടുത്തു പറയേണ്ട പ്രശംസിക്കേണ്ട ഒന്നാണ് ബിജിബാലിന്റെ പശ്ചാത്തല സംഗീതം. ഓരോ കഥാസന്ദർഭങ്ങളോടും ഇഴുകിച്ചേർന്ന പശ്ചാത്തല സംഗീതമായിരുന്നു ബിജിബാൽ ചിട്ടപ്പെടുത്തിയത്. ഹരിനാരായണൻ എഴുതി ബിജിബാൽ ഈണമിട്ട ആകാശം പന്തലുകെട്ടി എന്ന പാട്ടും മികവുറ്റതായിരുന്നു. പ്രമോദ് തോമസാണ് സിങ്ക് സൗണ്ട് രീതിയിലുള്ള ശബ്ദമിശ്രണത്തിനു നേതൃത്വം നൽകിയത്. രംഗങ്ങളുടെ വിശ്വസനീയതയ്ക്കു മാറ്റുകൂട്ടുവാൻ സഹായിച്ച ഘടകങ്ങളിൽ ഒന്നാണ് ചിത്രീകരണത്തിനിടയിലുള്ള ശബ്ദമിശ്രണം. സമീറ സനീഷിന്റെ വസ്ത്രാലങ്കാരം കഥാപാത്രങ്ങൾക്ക് യോജിച്ചവയായിരുന്നു. ശ്രീജിത്ത് ഗുരുവായൂരാണ് ചമയം നിർവഹിച്ചത്.

അഭിനയം: ⭐⭐⭐⭐
ഒരു സിനിമയിലെ എല്ലാ അഭിനേതാക്കളും തനതായ ശൈലിയിൽ അവരവരുടെ കഥാപാത്രങ്ങളെ അവതരിപ്പിക്കുന്നത് വിരളം മാത്രം സംഭവിക്കുന്ന ഒന്നാണ്. ബൈജു എന്ന കഥാപാത്രത്തെ അവതരിപ്പിക്കവാൻ ബിജു മേനോനെയല്ലാതെ മറ്റൊരാളെ സങ്കല്പിക്കാനാകില്ല. അത്രയ്ക്ക് രസകരമായ രീതിയിൽ അലസതയുള്ള ഒരു ചെറുപ്പക്കാരന്റെ കഥാപാത്രം മികവോടെ ബിജു മേനോൻ അവതരിപ്പിച്ചു. മറ്റൊരു മികച്ച അഭിനയം കാഴ്ചവെച്ചത് ഹരീഷ് പെരുമണ്ണയാണ്. അധികം സംഭാഷണങ്ങൾ ഒന്നുമില്ലാത്ത വിനീത് എന്ന ചെറുപ്പക്കാരനെ ഹാസ്യരസമുള്ള ഭാവാഭിനയത്തിലൂടെ ഹരീഷ് അവതരിപ്പിച്ചു. അജു വർഗീസിന്റെ ജോഡിയായി അഭിനയിച്ച പുതുമുഖം ശ്രീകലയുടെ അഭിനയം വളരെ മികച്ചുനിന്നു. മനോജ് എന്ന വേഷത്തിൽ ദീപക് പറമ്പോളും തിളങ്ങി. സ്വതസിദ്ധമായ അഭിനയമാണ് വിജയരാഘവന്റെ അച്ഛൻ കഥാപാത്രത്തെ മികവുറ്റതാക്കിയത്. അജു വർഗീസും ജനാർദ്ദനനും ഇന്ദ്രൻസും അലൻസിയാറും മണികണ്ഠനും ദിലീഷ് പോത്തനും ഹന്നാ റെജിയും അവരവരുടെ കഥാപാത്രങ്ങളെ ഗംഭീരമാക്കി. ഇവരെ കൂടാതെ പത്മരാജ് രതീഷ്, ശശി കലിങ്ക, ആബിദ്, നെബീഷ്, ഹക്കിം, ചേതൻ ലാൽ, മാസ്റ്റർ വിശാൽ, അഞ്ജലി അനീഷ്, ശ്രീധന്യ, അംബിക മോഹൻ, അനഘ എന്നിവരും ഈ സിനിമയിൽ അഭിനയിച്ചിട്ടുണ്ട്. ഏവർക്കും അഭിനന്ദനങ്ങൾ!

വാൽക്കഷ്ണം: ഗൃഹാതുരത്വമുണർത്തുന്ന ഒരുപിടി നല്ല മുഹൂർത്തങ്ങൾ കോർത്തിണക്കിയ കുടുംബചിത്രമാണ് രക്ഷാധികാരി ബൈജു!

രചന, സംവിധാനം: രഞ്ജൻ പ്രമോദ്
കഥ: ടി.എസ്.അർജുൻ
നിർമ്മാണം: അലക്‌സാണ്ടർ മാത്യു, സതീഷ് കോലം
ബാനർ: 100ത് മങ്കി മൂവീസ്
ഛായാഗ്രഹണം: പ്രശാന്ത് രവീന്ദ്രൻ
ചിത്രസന്നിവേശം: സംജിത് മുഹമ്മദ്
ഗാനരചന: ഹരിനാരായണൻ
സംഗീതം: ബിജിബാൽ
കലാസംവിധാനം: അജയ് മാങ്ങാട്
ശബ്ദസംവിധാനം: പ്രമോദ് തോമസ്
ചമയം: ശ്രീജിത്ത് ഗുരുവായൂർ
വസ്ത്രാലങ്കാരം: സമീറ സനീഷ്
വിതരണം: ഇറോസ് ഇൻറ്റർനാഷണൽ.

സ്വർണ്ണ കടുവ – ⭐⭐


വേഗതയില്ലാത്ത കടുവാകഥ ഒരുവട്ടം കണ്ടിരിക്കാം! – ⭐⭐

മലയാള സിനിമയിൽ കാലാകാലങ്ങളായി കണ്ടുവരുന്ന സൽഗുണ സമ്പന്ന നായക സങ്കല്പങ്ങളെ പൊളിച്ചെഴുതിയ കഥാപാത്രരൂപീകരണമാണ് റിനി ഈപ്പൻ മാട്ടുമേൽ. നാളിതുവരെയുള്ള ഏറ്റവും മികച്ച അഭിനയവുമായി ബിജു മേനോൻ റിനി ഈപ്പനായി ജീവിക്കുകയായിരുന്നു. നല്ല നടനുള്ള സംസ്ഥാന പുരസ്കാരത്തിനുവരെ സാധ്യതയുള്ള അഭിനയമികവോടെയാണ് റിനി എന്ന നായക കഥാപാത്രത്തെ ബിജു മേനോൻ അവതരിപ്പിച്ചിരിക്കുന്നത്. മേല്പറഞ്ഞ രണ്ടു വസ്തുതകളാണ് സ്വർണ്ണ കടുവയുടെ പ്രത്യേകതകൾ. അമിത പ്രതീക്ഷയില്ലാതെ ഒരുവട്ടം കുടുംബസമേതം കണ്ടിരിക്കാവുന്ന സിനിമയാണ് സ്വർണ്ണ കടുവ.

ജോബ് ജി. ഫിലിംസിന്റെ ബാനറിൽ ജോബ് ജി. ഉമ്മൻ നിർമ്മിക്കുകയും വിതരണം ചെയ്യുകയും ചെയ്തിരിക്കുന്ന സ്വർണ്ണ കടുവയിൽ ബിജു മേനോൻ, ഇന്നസെന്റ്, ഹരീഷ് പെരുമണ്ണ, ഇനിയ സലാഹുദ്ധീൻ, പൂജിത മേനോൻ, സുരേഷ് കൃഷ്ണ, സുധീർ കരമന എന്നിവർ പ്രധാന കഥാപാത്രങ്ങളെ അവതരിപ്പിച്ചിരിക്കുന്നു.

പ്രമേയം: ⭐⭐
“എല്ലാ പൊന്നും എല്ലാ മണ്ണും എല്ലാ പെണ്ണും എല്ലാം എല്ലാം എനിക്കായ് എന്നൊരാൾ” എന്നതായിരുന്നു ഈ സിനിമയുടെ പരസ്യ വാചകങ്ങളിൽ ഒന്ന്. പൊന്നും മണ്ണും പെണ്ണും സ്വന്തമാക്കാൻ ഏതറ്റംവരെയും പോകുന്ന ഒരാൾ. ലക്ഷ്യത്തിലെത്തുവാൻ മറ്റുള്ളവരെ ചതിച്ചും വഞ്ചിച്ചും നേടുന്ന നേട്ടങ്ങളും അതിനയാൾ സ്വീകരിക്കുന്ന വഴികളുമാണ് ഈ സിനിമയുടെ പ്രമേയം. എം.ടി.വാസുദേവൻ നായർ എഴുതി ഐ.വി.ശശി സംവിധാനം ചെയ്തു മോഹൻലാൽ നായകനായ ഉയരങ്ങളിൽ എന്ന സിനിമയുടെ പ്രമേയത്തോട് ഏറെ സമാനതകളുള്ള ഒന്നാണ് സ്വർണ്ണ കടുവയുടേത്. നിരവധി മലയാള സിനിമകൾക്ക് തിരക്കഥ എഴുതുകയും മൂന്ന് സിനിമകൾ സംവിധാനം ചെയ്യുകയും ചെയ്ത ബാബു ജനാർദനനാണ് സ്വർണ്ണ കടുവയുടെ കഥയും തിരക്കഥയും സംഭാഷണങ്ങളും എഴുതിയത്.

തിരക്കഥ: ⭐⭐⭐
കെട്ടുറപ്പുള്ള തിരക്കഥയുടെ പിൻബലത്തിൽ അവതരിപ്പിച്ചിട്ടുള്ള സിനിമകളെല്ലാം പ്രേക്ഷകർ സ്വീകരിച്ച ചരിത്രമാണ് മലയാള സിനിമയുടേത്. ബാബു ജനാർദ്ദനന്റെ സിനിമകളെല്ലാം സങ്കീർണ്ണമായ കഥാസന്ദർഭങ്ങളുള്ളവയും ശക്തമായ കഥാപാത്രങ്ങളുള്ളവുമായിരുന്നു. സ്വർണ്ണ കടുവയിലെ റിനി ഈപ്പൻ മാട്ടുമ്മേൽ എന്ന കഥാപാത്രവും അയാൾ സഞ്ചരിക്കുന്ന വഴികളും അത്തരത്തിലുള്ളവയായിരുന്നു. ഒരു സത്യം മറച്ചുവെക്കുവാൻ ശ്രമിക്കുന്നതിനിടയിൽ തടസ്സം സൃഷ്ട്ടിച്ചവരെ ചതിച്ചും വഞ്ചിച്ചും കാര്യം സാധിച്ചെടുക്കുന്ന റിനി ഈപ്പൻ എന്ന കഥാപാത്രരൂപീകരണമാണ് ഈ സിനിമയുടെ തിരക്കഥയുടെ പ്രധാന ആകർഷണം. കഥയിലുടനീളം അവിശ്വസനീയമായ സന്ദർഭങ്ങളോ യുക്തിയെ ചോദ്യം ചെയ്യുന്ന കഥാഗതിയോ ഒന്നുമില്ലാതയാണ് ബാബു ജനാർദ്ദനൻ ഈ സിനിമയുടെ തിരക്കഥ എഴുതിയിരിക്കുന്നത്. ഒരുപാട് കഥാസന്ദർഭങ്ങളിലൂടെ വികസിക്കുന്ന ഒരു കഥയാണ് ഈ സിനിമയുടേത്. അതിനനിയോജ്യമായ സംഭാഷണങ്ങളും ബാബു ജനാർദ്ദനൻ എഴുതിയിട്ടുണ്ട്. നർമ്മ മുഹൂർത്തങ്ങളും സംഭാഷണങ്ങളും, സമകാലീന രാഷ്ട്രീയ സംഭവങ്ങളും, കുടുംബ ബന്ധങ്ങളിലെ പാകപ്പിഴകളും, തെറ്റും ശരിയും തിരിച്ചറിയുന്ന രീതിയും കൃത്യമായി തിരക്കഥയിലാക്കുവാൻ ബാബു ജനാർദ്ദനന് സാധിച്ചു. ഇനിയും ഇത്തരത്തിലുള്ള തിരക്കഥൾ എഴുതുവാൻ ബാബു ജനാർദ്ദനന് സാധിക്കട്ടെ.

സംവിധാനം: ⭐⭐
ഉദയപുരം സുൽത്താൻ, സുന്ദരപുരുഷൻ, മായാമോഹിനി, ശൃംഗാരവേലൻ എന്നീ സിനിമകളുടെ സംവിധായകൻ ജോസ് തോമസാണ് സ്വർണ്ണ കടുവയുടെ സംവിധായകൻ. ശരാശരിയ്ക്കു മുകളിൽ നിൽക്കുന്ന തിരക്കഥ ലഭിച്ചിട്ടും അതിനെ പൂർണമായി ഉൾക്കൊണ്ട് സിനിമ സംവിധാനം ചെയ്യുവാൻ ജോസ് തോമസിനായില്ല. ഇന്നത്തെ സിനിമ ആസ്വാദകരുടെ ഇഷ്ടാനിഷ്ടങ്ങൾ അറിയാതെയാണ് ഈ സിനിമ ജോസ് തോമസ് സംവിധാനം ചെയ്തിരിക്കുന്നത്. ആദ്യ പകുതിയിൽ ഏറെക്കുറെ രസകരമായ അവതരണം സ്വീകരിച്ച സംവിധായകൻ രണ്ടാം പകുതി കൈവിട്ടു കളഞ്ഞ അവസ്ഥയാണ് കണ്ടത്‌. ഇഴഞ്ഞു നീങ്ങുന്ന കഥാഗതിയും പ്രവചിക്കാനാവുന്ന അവതരണവും തീർത്തും നിരാശമാത്രം സമ്മാനിച്ചു. കെട്ടുറപ്പുള്ള തിരക്കഥയും നല്ല അഭിനേതാക്കളുടെ സാന്നിധ്യവുമാണ് ഒരുപരിധിവരെ ഈ സിനിമയെ രക്ഷപെടുത്തിയത്. എന്നിരുന്നാലും, മായാമോഹിനിയും ശൃങ്കാരവേലനും പോലുള്ള ദുരന്തങ്ങൾ സമ്മാനിച്ച സംവിധായകനിൽ അമിത പ്രതീക്ഷയില്ലാത്തതിനാൽ പ്രേക്ഷകർക്ക് ഒരു ബോറൻ അനുഭവമാകില്ല സ്വർണ്ണ കടുവ.

സാങ്കേതികം: ⭐⭐
സ്വർണ്ണ കടുവയുടെ കാഴ്ചകൾ ക്യാമറയിൽ പകർത്തിയത് മനോജ് പിള്ളയാണ്. റിയലസ്റ്റിക്കായ ഛായാഗ്രഹണമാണ് ഈ സിനിമയ്ക്ക് വേണ്ടി മനോജ് പിള്ള സ്വീകരിച്ചിരിക്കുന്നത്. ശരാശരിയിലൊതുങ്ങുന്ന വിഷ്വൽസ് എന്നതിനപ്പുറം പുതുമയൊന്നും സമ്മാനിക്കുവാൻ മനോജ് പിള്ളയ്ക്കായില്ല. ജോൺ കുട്ടിയാണ് രംഗങ്ങൾ സന്നിവേശം ചെയ്തിരിക്കുന്നത്. ആദ്യ പകുതിയേക്കാൾ കഥാസന്ദർഭങ്ങൾ ഏറെയുള്ള രണ്ടാം പകുതി പതിഞ്ഞ താളത്തിലാണ് സന്നിവേശം ചെയ്തിരിക്കുന്നത്. രണ്ടു മണിക്കൂറിൽ പറഞ്ഞുതീർക്കാവുന്ന കഥയെ വലിച്ചുനീട്ടി അവതരിപ്പിച്ചത് എന്തുകൊണ്ടാണെന്ന് മനസ്സിലാകുന്നില്ല. സന്തോഷ് വർമ്മയും ഹരിനാരായണനും എഴുതിയ വരികൾക്ക് സംഗീതം പകർന്നത് ബിജിബാലാണ്. ഈ സിനിമയിലെ പാട്ടുകൾ രണ്ടും നിരാശപ്പെടുത്തുന്നു. ഗോപി സുന്ദർ നിർവഹിച്ച പശ്ചാത്തല സംഗീതം അദ്ദേഹത്തിന്റെ മുൻകാല സിനിമകളെ അപേക്ഷിച്ചു ശോകമായിരുന്നു. ഇന്നസെൻറ് ഉൾപ്പടെ പല കഥാപാത്രങ്ങളും ഉപയോഗിച്ചിരിക്കുന്ന വിഗ് തലമുടി പോലും കൃത്രിമത്വം തോന്നിപ്പിക്കുന്നതായിരുന്നു. ഹസ്സൻ വണ്ടൂരാണ് ചമയം.

അഭിനയം: ⭐⭐⭐
റിനി ഈപ്പനായി നിറഞ്ഞാടുകയായിരുന്നു ബിജു മേനോൻ. ഹാസ്യവും വില്ലത്തരവും ഒരേപോലെ അവതരിപ്പിച്ചു ഫലിപ്പിക്കുവാൻ ബിജു മേനോന് സാധിച്ചു. ഇന്നസെന്റും തനിക്കു ലഭിച്ച കഥാപാത്രം വിശ്വസനീയതയോടെ അവതരിപ്പിച്ചു. ബിജു മേനോന്റെ കഥാപാത്രത്തിന്റെ സന്തത സഹചാരിയായി ഹരീഷ് പെരുമണ്ണയും അഭിനയ മികവ് പുലർത്തി. ഇനിയയും പൂജിതയും നായികമാരുടെ വേഷം ഭംഗിയായി അവതരിപ്പിച്ചു. സുരേഷ് കൃഷ്ണ, സുധീർ കരമന, ബൈജു, കിഷോർ സത്യാ, സന്തോഷ് കീഴാറ്റൂർ, കോട്ടയം നസീർ, നസീർ സംക്രാന്തി, കലാഭവൻ ജിന്റോ, സാജു കൊടിയൻ, വിനോദ് കെടാമംഗലം, സ്വസിക, ചിന്നു കുരുവിള, റോസ്‌ലിൻ ജോളി, സീമ ജി. നായർ, അഞ്ജു അരവിന്ദ് എന്നിവരാണ് പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്.

വാൽക്കഷ്ണം: സ്വർണ്ണം കവർന്ന കടുവയുടെ കഥയും പ്രേക്ഷക ഹൃദയം കവർന്ന ബിജു മേനോന്റെ അഭിനയവും ഒരുവട്ടം കണ്ടിരിക്കാം.

സംവിധാനം: ജോസ് തോമസ്
നിർമ്മാണം: ജോബ് ജി. ഉമ്മൻ
രചന: ബാബു ജനാർദനൻ
ഛായാഗ്രഹണം: മനോജ് പിള്ള
ചിത്രസന്നിവേശം: ജോൺകുട്ടി
പശ്ചാത്തല സംഗീതം: ഗോപി സുന്ദർ
ഗാനരചന: സന്തോഷ് വർമ്മ, ഹരിനാരായണൻ
സംഗീതം: ബിജിബാൽ
കലാസംവിധാനം: അരുൺ
ചമയം: ഹസ്സൻ വണ്ടൂർ
സംഘട്ടനം: മാഫിയ ശശി
വിതരണം: ജോ ആൻഡ് ജോ റിലീസ്.

കവി ഉദ്ദേശിച്ചത്? – ⭐⭐

വോളിബോളിന്റെ നാമത്തിൽ ഒരു പന്തയകഥ! – ⭐⭐

രമണിയേച്ചിയുടെ നാമത്തിൽ എന്ന ലഘു സിനിമയ്ക്ക് ശേഷം മുഖ്യധാര സിനിമയിലേക്ക് തോമസും ലിജു തോമസും അരങ്ങേറ്റം കുറിച്ചത് ചില ഉദ്ദേശങ്ങളോടെയാണ്. അത്തരത്തിലുള്ള ആദ്യ സംരംഭമാണ് കവി ഉദ്ദേശിച്ചത്. കവി ഉദ്ദേശിച്ചതതെന്താണെന്നു മനസ്സിലാക്കിയ ആസിഫ് അലിയും സജിൻ ജാഫറും അവരുടെ നിർമ്മാണ കമ്പിനിയായ ആദംസ് വേൾഡ് ഓഫ് ഇമാജിനേഷന്റെ പേരിൽ ഈ സിനിമ നിർമ്മിച്ചു.

അള്ളിമൂല എന്ന ഗ്രാമനിവാസികളുടെ പ്രിയപ്പെട്ട കായിക വിനോദമാണ് വോളിബോൾ. വോളിബോൾ വിനോദത്തിനു വേണ്ടി കുടുംബം വരെ പന്തയത്തിനു ഉപയോഗിക്കുന്നവരാണ് അള്ളിമൂലയിലെ കുടുംബങ്ങൾ. അവരിൽ പ്രമുഖരായ വട്ടത്തിൽ തറവാട്ടിലെ ബോസ്‌കോയും വോളിബോൾ പന്തയംവെച്ചു നടത്തുന്നതിൽ പിന്നോട്ടല്ല. വട്ടത്തിൽ ബോസ്‌കോയുടെ ആജന്മ ശത്രുവാണ് കാവാലം ജിമ്മി. ഗാങ്സ് ഓഫ് അള്ളിമൂല എന്ന വോളിബോൾ ടീമിന്റെ സാരഥിയാണ് കാവാലം ജിമ്മി. ജിമ്മിയും സുഹൃത്തുക്കളും വട്ടത്തിൽ ബോസ്‌കോയും സുഹൃത്തുക്കളും തമ്മിൽ കടുത്ത ശത്രുതയിലാണ്.

ഒരിക്കൽ, ഇവർ തമ്മിൽ വോളിബോൾ വിനോദത്തിനായി പന്തയംവെയ്ക്കുന്നു. ഗാങ്സ് ഓഫ് അള്ളിമൂല ടീമിന്റെ പരിശീലകനായി മിന്നൽ സൈമൺ വരുന്നതോടെ കഥ ഏറെ രസകരമാകുന്നു. കാവാലം ജിമ്മിയായി ആസിഫ് അലിയും, മിന്നൽ സൈമണായി ബിജു മേനോനും, വട്ടത്തിൽ ബോസ്‌കോയായി നരേനും അഭിനയിച്ചിരിക്കുന്നു.

സൈജു കുറുപ്പ്, ബാലു വർഗീസ്, ബിജു കുട്ടൻ, സുധി കോപ്പ, അഭിഷേക്, ഗണപതി, മനോജ് ഗിന്നസ്, പ്രദീപ് കോട്ടയം, ശശി കലിങ്ക, സുനിൽ സുഖദ, ബാലാജി, ദിനേശ് നായർ, പ്രശാന്ത് അലക്‌സാണ്ടർ, ആലപ്പി അഷ്‌റഫ്, കെ.ടി.സി.അബ്ദുള്ള, അഞ്ജു കുര്യൻ, സിജ റോസ്, ലെന, ബിന്ദു പണിക്കർ, ചിത്ര ഷേണായ്, വീണ നായർ എന്നിവരാണ് കവി ഉദ്ദേശിച്ചതിലെ മറ്റു പ്രധാന അഭിനേതാക്കൾ.

പ്രമേയം: ⭐⭐
ആജന്മ ശത്രുക്കളായ രണ്ടുപേർ അവരുടെ പ്രണയസാഫല്യത്തിനു വേണ്ടി വോളിബോൾ കായിക വിനോദത്തിന്റെ പേരിൽ പന്തയംവെച്ച് കലഹിക്കുന്നതാണ് കവി ഉദ്ദേശിച്ചത് എന്ന സിനിമയുടെ പ്രമേയം. തോമസും മാർട്ടിൻ ഡ്യൂറോയും ചേർന്നാണ് ഈ സിനിമയുടെ കഥ എഴുതിയത്. ഗ്രാമീണ പശ്ചാത്തലവും ഗൃഹാതുരതയും സൗഹൃദവും പ്രണയവും ബാല്യകാലസ്മരണകളും വോളിബോൾ കളിയുമെല്ലാം കോർത്തിണക്കിയതാണ് ഈ സിനിമയുടെ കഥ. കേട്ടുപഴകിയ പ്രമേയമാണെങ്കിലും വോളിബോൾ കായിക വിനോദം പശ്ചാത്തലമാക്കിയ അധികം സിനിമകളൊന്നും മലയാളത്തിലുണ്ടായിട്ടില്ല എന്നതാണ് ഏക പ്രത്യേകത.

തിരക്കഥ: ⭐⭐
ഗ്രാമീണ പശ്ചാത്തലത്തിൽ കഥ പറഞ്ഞിട്ടുള്ള മലയാള സിനിമകളിൽ കാലാകാലങ്ങളായി കണ്ടുവരുന്ന സ്ഥിരം കാഴ്ചകളായ ഒരുപറ്റം ചെറുപ്പക്കാരും അവരുടെ സൗഹൃദവും പ്രണയവും ശത്രുതയും കായിക വിനോദവും പന്തയംവെക്കലും നിസ്സഹായാവസ്ഥയും അടിപിടിയും എല്ലാമടങ്ങുന്നതാണ് ഈ സിനിമയുടെയും തിരക്കഥ. തോമസും മാർട്ടിൻ ഡ്യൂറോയും ചേർന്നാണ് ഈ സിനിമയുടെ തിരക്കഥയും സംഭാഷണങ്ങളും എഴുതിയത്. നവാഗതരായ ഇരുവരും രസകരമായ ഒരു സിനിമയ്ക്ക് യോജിച്ച തിരക്കഥ എഴുതണം
എന്ന ലക്ഷ്യം മനസ്സിൽവെച്ചുകൊണ്ടാണ് ഈ സിനിമയ്ക്കുവേണ്ടി തിരക്കഥ എഴുതിയത്. ഒരു രസകരമായ സിനിമയ്ക്കു വേണ്ടിയുള്ള എല്ലാ ചേരുവകളും കൃത്യമായി ഉൾപ്പെടുത്തിയാണ് പ്രേക്ഷകരെ മുഷിപ്പിക്കാതെ മുമ്പോട്ടു കൊണ്ടുപോയത്. കഥാസന്ദർഭങ്ങളും സംഭാഷണങ്ങളും കഥാഗതിയും എല്ലാം പ്രവചിക്കാനാവുന്നതായിരുന്നു എന്നതുതന്നെയാണ് ഈ സിനിമയുടെ പ്രധാന പോരായ്മകളിൽ ഒന്ന്. രമണിയേച്ചിയുടെ നാമത്തിൽ എന്ന ലഘു സിനിമ പോലെ, കവി ഉദ്ദേശിച്ചതിലും കഥാസന്ദർഭങ്ങളെക്കാൾ പ്രാധാന്യം അണിയറപ്രവർത്തകർ നൽകിയത് ആവിഷ്കാരത്തിനായിരുന്നു. ഒരല്പം ഭേദപെട്ട തിരക്കഥയായിരുന്നുവെങ്കിൽ മറ്റൊരു 1983 ആകുമായിരുന്നു ഈ സിനിമയും.

സംവിധാനം: ⭐⭐⭐
തോമസും ലിജു തോമസും ചേർന്നാണ് കവി ഉദ്ദേശിച്ചത് സംവിധാനം ചെയ്തത്. പ്രവചിക്കാനാവുന്ന കഥാസന്ദർഭങ്ങളിലെ ന്യൂനതകൾ രസകരമായ അവതരണ രീതികൊണ്ട് സവിശേഷമാക്കിയ കാഴ്ചയാണ് പ്രേക്ഷകർ കണ്ടത്. വോളിബോൾ കളിയെ ഇത്രയും വിശ്വസനീയതയോടെയും ത്രില്ലടിപ്പിക്കുന്ന രീതിയിലും അവതരിപ്പിച്ചതാണ് ഈ സിനിമയുടെ രക്ഷയായത്. കഥാപാത്രങ്ങൾക്ക് അനിയോജ്യരായ നടീനടന്മാരെ തിരഞ്ഞെടുക്കുന്നതിൽ പൂർണമായി വിജയിക്കുവാൻ സംവിധായകർക്ക് സാധിച്ചു. കണ്ടുമടുത്തതും കേട്ടപഴകിയതുമായ കഥാസന്ദർഭങ്ങളാൽ സമ്പന്നമാണ് ആദ്യപകുതിയെങ്കിലും, രണ്ടാമത്തെ പകുതീയുടെ അവസാന ഭാഗങ്ങൾ ഉദ്യോഗജനകമായി ചിത്രീകരിക്കുവാൻ ഇരുവർക്കും സാധിച്ചു. ഒരു ലഘു സിനിമയെടുത്തത് കണ്ടിഷ്ടപ്പെട്ട ആസിഫ് അലി ഈ സിനിമയുടെ സംവിധായകർക്ക് തുറന്നുകൊടുത്തത് സിനിമയിലേക്കുള്ള കവാടമാണ്. തോമസും ലിജുവും പോലെ അനേകായിരം സിനിമ പ്രേമികൾ ദിനംതോറും ലഘു സിനിമകൾ സംവിധാനം ചെയ്യുന്നുണ്ട്. അവർക്കും ഇത്തരത്തിലുള്ള ഒരു അവസരം നൽകാൻ ആസിഫ് അലിയെ പോലെ മറ്റാരെങ്കിലും കടന്നുവരട്ടെ.

സാങ്കേതികം: ⭐⭐⭐
കണ്ണൂർ ഇരുട്ടിയിലെ ഗ്രാമപ്രദേശമാണ് അള്ളിമൂലയാക്കി ചിത്രീകരിച്ചിരിച്ചത്. സ്ഥിരം കാഴ്ചകളിൽ നിന്നും പുതുമനൽക്കുന്ന ഒന്നും ഷെഹനാദ് ജലാൽ നിർവഹിച്ച ഛായാഗ്രഹണത്തിനില്ല. ആവേശഭരിതമായ ചടുലതയോടെ വോളിബോൾ കളി ചിത്രീകരിച്ചതാണ് ഛായാഗ്രഹണത്തിലുള്ള മേന്മ. സുനിൽ എസ്. പിള്ളയാണ് രംഗങ്ങൾ കോർത്തിണക്കിയത്. സിനിമയുടെ കഥ നിയന്ത്രിക്കുന്നതനിസരിച്ചു രംഗങ്ങൾ കൂട്ടിയോജിപ്പിച്ചു എന്നതുമാത്രമാണ് സുനിൽ ചെയ്തത്. വോളിബോൾ കളിയുടെ ചിത്രീകരണവും സന്നിവേശവും മികവുപുലർത്തി. ജെയ്ക്സ് ബിജോയ് ആണ് പശ്ചാത്തല സംഗീതം. ഉദ്യോഗജനകമായ കഥാസന്ദർഭങ്ങളിൽ പശ്ചാത്തല സംഗീതമുണ്ടായിരുന്നോ എന്നുപോലും പ്രേക്ഷകർ ഓർക്കുന്നില്ല. റഫീഖ് അഹമ്മദ് എഴുതിയ ഇന്നലെയും എന്ന പാട്ടിനു സംഗീതം നൽകിയത് വിനു തോമസാണ്. മൂന്ന് പാട്ടുകളുള്ള ഈ സിനിമയിൽ ഒരു പാട്ടിനു ജെയ്ക്സ് ബിജോയിയും സംഗീതം നൽകിയിട്ടുണ്ട്. വോളിബോൾ കളിയ്ക്കുള്ള സെറ്റുകൾ ഒരുക്കിയ നിമേഷ് താനൂർ അഭിനന്ദനം അർഹിക്കുന്നു. രമ്യ സുരേഷിന്റെ വസ്ത്രാലങ്കാരം കഥാപാത്രങ്ങൾക്ക് അനിയോജ്യമായിരുന്നു.

അഭിനയം: ⭐⭐⭐
ആസിഫ് അലിയും ബിജു മേനോനും അവരവരുടെ കഥാപാത്രങ്ങളെ രസകരമായ രീതിയിൽ അവതരിപ്പിച്ചു. ഉടായിപ്പു കഥാപാത്രങ്ങൾ അലസമായി അവതരിപ്പിക്കുവാൻ ബിജു മേനോനോളം കഴിവ് മറ്റാർക്കുമില്ല. നായിക വേഷത്തിലെത്തിയ അഞ്ജു കുര്യനും കിട്ടിയ കഥാപാത്രം മോശമാക്കിയില്ല. വട്ടത്തിൽ ബോസ്‌കോ എന്ന കഥാപാത്രമായി നരേനും വേഷമിട്ടു. ഒരല്പം അമിതാഭിനയം അവിടിവിടങ്ങളിലായി ഉണ്ടായിരുന്നോ എന്ന് തോന്നിപോകുന്നവിധമാണ് നരേൻ അഭിനയിച്ചത്. ബാലു വർഗീസും അഭിഷേകും സുധി കോപ്പയും ആസിഫ് അലിയ്ക്കു മികച്ച പിന്തുണ നൽകി. വില്ലൻ വേഷത്തിലെത്തിയ സൈജു കുറുപ്പും സുനിൽ സുഖദയും, അമ്മ വേഷത്തിലെത്തിയ ബിന്ദു പണിക്കരും സ്ഥിരം മാനറിസങ്ങൾ വീണ്ടും ആവർത്തിച്ചു. ഇതുവരെ ലഭിക്കാത്ത ഒരു വേഷമാണ് ലെന ഈ സിനിമയിൽ അവതരിപ്പിച്ചത്. അത് നല്ലരീതിയിൽ അവതരിപ്പിക്കുവാനും ലെനയ്ക്ക് കഴിഞ്ഞിട്ടുണ്ട്. ഇവരെക്കൂടാതെ ചെറുതും വലുതുമായി ഒട്ടനവധി കഥാപാത്രങ്ങൾ ഈ സിനിമയിലുണ്ട്.

വാൽക്കഷ്ണം: ഗൃഹാതുരതയും സൗഹൃദവും വോളിബോളും കോർത്തിണക്കിയ രസകരമായ സിനിമ!

സംവിധാനം: തോമസ്, ലിജു തോമസ്
നിർമ്മാണം: ആസിഫ് അലി, സജിൻ ജാഫർ
ബാനർ: ആദംസ് വേൾഡ് ഓഫ് ഇമാജിനേഷൻ
രചന: തോമസ്, മാർട്ടിൻ ഡ്യുറോ
ഛായാഗ്രഹണം: ഷെഹനാദ് ജലാൽ
ചിത്രസന്നിവേശം: സുനിൽ എസ്. പിള്ള
ഗാനരചന: റഫീഖ് അഹമ്മദ്, ജ്യോതിഷ് കാശി
സംഗീതം: ജെയ്ക്സ് ബിജോയ്, വിനു തോമസ്
പശ്ചാത്തല സംഗീതം: ജെയ്ക്സ് ബിജോയ്
കലാസംവിധാനം: നിമേഷ് താനൂർ
വസ്ത്രാലങ്കാരം: രമ്യ സുരേഷ്
ചമയം: അമൽ
സംഘട്ടനം: മാഫിയ ശശി
നൃത്തസംവിധാനം: ഷോബിൻ പോൾരാജ്
വിതരണം: ആദംസ് റിലീസ്.

ഓലപ്പീപ്പി – ⭐⭐


ഗൃഹാതുരത്വം മുഴക്കുന്ന ഓലപ്പീപ്പി – ⭐⭐

മുത്തശ്ശി കഥകൾ കേട്ടു വളരാൻ ഭാഗ്യം ലഭിച്ച തലമുറയിൽ ഉൾപെടുന്നവരാണ് നമ്മൾ. മാതാപിതാക്കളെക്കാൾ നമ്മളെ സ്നേഹിച്ചും ലാളിച്ചും വളർത്തിയവരാണ് നമ്മടെ മുത്തശ്ശിമാർ. കുട്ടികാലത്തെ അവരോടൊപ്പമുള്ള ഓർമ്മകൾ എന്നും ഹൃദയത്തിൽ സൂക്ഷിക്കുന്നവരായിരിക്കും നമ്മൾ മലയാളികൾ. തറവാട് വീടും പാടവും പറമ്പും ഊഞ്ഞാലും പട്ടവും തുടങ്ങി കളിക്കൂട്ടുകാരുടെ കൂടെ കളിച്ച ഓർമ്മകൾ നമ്മൾ എന്നും നിധിപോലെ കാത്തുസൂക്ഷിക്കുന്നു. അത്തരത്തിൽ ഗൃഹാതുരത്വമുണർത്തുന്ന ഒരുപിടി ഓർമ്മകളിലേക്ക് സഞ്ചരിക്കുന്ന ഉണ്ണി മേനോന്റെയും അയാളുടെ മുത്തശ്ശിയുടെയും കഥയാണ് കൃഷ് കൈമൾ രചനയും സംവിധാനവും നിർവഹിച്ച ഓലപ്പീപ്പി.

പ്രമേയം: ⭐⭐
ഭൂപരിഷ്കൃത നിയമം കേരളത്തിൽ വന്നതോടെ ക്ഷയിച്ചുപോയ ഒട്ടനവധി തറവാടുകൾ കേരളത്തിലുണ്ട്. പട്ടിണിയും ദാരിദ്ര്യവും മോശമായ അവസ്ഥയിലെത്തിച്ച ഒരു നായർ തറവാട്ടിലെ മുത്തശ്ശിയുടെയും കൊച്ചുമകന്റെയും കഥയാണ് ഓലപ്പീപ്പി. ആ കൊച്ചുമകൻ വളർന്നു 30 വർഷങ്ങൾക്കു ശേഷം തന്റെ തറവാടും മുത്തശ്ശിയുടെ ഓർമ്മകളും വീണ്ടെടുക്കുവാനായി കേരളത്തിലെത്തുന്നതാണ് ഈ സിനിമയുടെ പ്രമേയം.

തിരക്കഥ: ⭐
നിരവധി മലയാള സിനിമകളുടെ ഛായാഗ്രഹണം നിർവഹിച്ചിട്ടുള്ള കൃഷ് കൈമൾ ആദ്യമായ് തിരക്കഥ എഴുതിയ ഓലപ്പീപ്പി അദ്ദേഹത്തിന്റെ ജീവിതാനുഭവങ്ങളുടെയും വായിച്ച പുസ്തകങ്ങളുടെയും അടിസ്ഥാനത്തിൽ എഴുതപെട്ട ഒന്നാണെന്ന് പ്രേക്ഷകന് മനസ്സിലാക്കാൻ സാധിക്കും. സിനിമയുടെ ആദ്യാവസാനം കണ്ടുമടുത്ത കഥാസന്ദർഭങ്ങളും കേട്ടുപഴകിയതും കൃത്രിമത്വം നിറഞ്ഞതുമായ സംഭാഷണങ്ങളും പ്രവചിക്കാനാവുന്ന കഥാഗതിയും തുടങ്ങി ക്ലിഷേകളാൽ സമ്പന്നമാണ് ഈ സിനിമ. നല്ലൊരു പ്രമേയം ലഭിച്ചിട്ടും പുതുമയുള്ള കഥാസന്ദർഭങ്ങൾ എഴുതുവാൻ കൃഷ് കൈമൾ ശ്രമിച്ചില്ല. അലസമായ തിരക്കഥ രചനയല്ലായിരുന്നുവെങ്കിൽ മറ്റൊരു ക്ലാസ് സിനിമയാകുമായിരുന്നു ഓലപ്പീപ്പി.

സംവിധാനം: ⭐⭐
നൊമ്പരമുണർത്തുന്ന മുഹൂർത്തങ്ങളിലൂടെയാണ് ഓരോ കഥാസന്ദർഭങ്ങളും കൃഷ് കൈമൾ അവതരിപ്പിച്ചിരിക്കുന്നത്. മുത്തശ്ശിയും കൊച്ചുമകനും തമ്മിലുള്ള തീവ്രമായ ആത്മബന്ധം പ്രേക്ഷകരുടെ കണ്ണുനനയിക്കുന്നു. ദാരിദ്ര്യവും പട്ടിണിയും പ്രതികൂലമായ സാഹചര്യം സൃഷ്ടിക്കുന്നുണ്ടെങ്കിലും അതെല്ലാം അതിജീവിച്ചു മുത്തശ്ശി കൊച്ചുമകന് ഭക്ഷണം നൽകുന്നു. ഉണ്ണി മേനോന്റെ ഓർമ്മകളിലൂടെ പഴയകാലഘട്ടത്തിന്റെ പതിഞ്ഞ താളത്തിലുള്ള അവതരണവും പരിചിതമായ കഥാസന്ദർഭങ്ങളും പ്രവചിക്കാനാവുന്ന സംഭാഷണങ്ങളും ഓലപ്പീപ്പിയെ ദോഷകരമായി ബാധിച്ചിട്ടുണ്ട്.

സാങ്കേതികം: ⭐⭐⭐
കൃഷ് കൈമൾ നിർവഹിച്ച ഛായാഗ്രഹണം ശരാശരിയിലൊതുങ്ങി. രണ്ടു കാലഘട്ടങ്ങളുടെ അവതരണത്തിലും ലൊക്കേഷനുകളും പ്രത്യേകിച്ച് വ്യതാസങ്ങളൊന്നും കണ്ടിരുന്നില്ല. ഇഴഞ്ഞു നീങ്ങുന്ന അവസ്ഥയിലാണ് വി. സാജൻ രംഗങ്ങൾ കോർത്തിണക്കിയത്. അനിൽ ജോൺസൺ നിർവഹിച്ച പശ്ചാത്തല സംഗീതം മികവുറ്റതായിരുന്നു. എം. ബാവയുടെ കലാസംവിധാനം രണ്ടു കാലഘട്ടങ്ങളിലുള്ള വീടിന്റെ അവസ്ഥ ഒരുക്കുന്നതിൽ മികവ് പുലർത്തി. ട്വിൻസ് ആണ് വസ്ത്രാലങ്കാരം നിർവഹിച്ചത്.

അഭിനയം: ⭐⭐⭐
നാടകനടിയായിരുന്ന പുന്നശ്ശേരി കാഞ്ചനയുടെ അത്യുഗ്രൻ അഭിനയമാണ് ഓലപ്പീപ്പിയുടെ ഏറ്റവും മികച്ച ഘടകം. 85 വയസ്സുള്ള കാഞ്ചന മുത്തശ്ശിയായി ജീവിക്കുകയായിരുന്നു. ബിജു മേനോനാണ് ഉണ്ണി എന്ന കഥാപാത്രത്തെ അവതരിപ്പിച്ചിരിക്കുന്നത്. ഉണ്ണിയുടെ കുട്ടിക്കാലം അവതരിപ്പിച്ചത് മാസ്റ്റർ ദേവാണ്. പാരീസ് ലക്ഷ്മി, അഞ്ജലി അനീഷ്, ശ്രീജിത്ത് രവി, സേതുലക്ഷ്മി, ജബ്ബാർ ചെമ്മാട് എന്നിവരാണ് പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്.

വാൽക്കഷ്ണം: കുടുംബസമേതം ഒരുവട്ടം കണ്ടിരിക്കാവുന്ന നൊസ്റ്റാൾജിക് മെലോഡ്രാമയാണ് ഓലപ്പീപ്പി.

രചന, സംവിധാനം: കൃഷ് കൈമൾ
ഛായാഗ്രഹണം: കൃഷ് കൈമൾ
നിർമ്മാണം: സുനിൽ ഇബ്രാഹിം
ബാനർ: വൈബ്സോൺ മൂവീസ്
ചിത്രസന്നിവേശം: വി. സാജൻ
ഗാനരചന: ദിനനാഥ് പുത്തഞ്ചേരി
സംഗീതം: അനിൽ ജോൺസൺ
കലാസംവിധാനം: എം.ബാവ
ചമയം: റോണക്സ് സേവ്യർ
വസ്ത്രാലങ്കാരം: ട്വിൻസ്
വിതരണം: ഇറോസ് ഇന്റർനാഷണൽ.

മരുഭൂമിയിലെ ആന -⭐⭐

കേരളത്തിലിറങ്ങിയ ചളു ആന! – ⭐⭐

കോമഡി സിനിമകൾ തിയറ്ററിൽ നിറഞ്ഞോടുകയും ബിജു മേനോന്റെ സിനിമ കാണുവാൻ കുടുംബങ്ങൾ കാത്തിരിക്കുകയും ചെയ്യുന്ന സാഹചര്യത്തിൽ, കഥയെന്തു തന്നെയായാലും കഥാസന്ദർഭങ്ങളിൽ യുക്തിയില്ലായെങ്കിലും സംഭാഷണങ്ങളിൽ ദ്വയാർത്ഥ പ്രയോഗങ്ങളുണ്ടെങ്കിലും നിർമ്മാതാക്കൾക്ക് ലാഭം കിട്ടുമെന്ന തെറ്റുധാരണയുടെ അനന്തഫലമാണ് മരുഭൂമിയിലെ ആന.

ഡേവിഡ്‌ കാച്ചപ്പിള്ളി നിർമ്മിച്ച മരുഭൂമിയിലെ ആനയുടെ കഥയെഴുതിയത് ശരത്ചന്ദ്രൻ വയനാടാണ്. സംവിധായകൻ വി.കെ.പ്രകാശിന് വേണ്ടി വൈ.വി.രാജേഷ്‌ തിരക്കഥയും സംഭാഷണങ്ങളും എഴുതിയ നാലാമത്തെ സിനിമയാണ് മരുഭൂമിയിലെ ആന. ബിജു മേനോൻ, കൃഷ്ണ ശങ്കർ, ഹരീഷ് പെരുമണ്ണ, ബാലു വർഗീസ്‌, ലാലു അലക്സ്, സാജു നവോദയ, സുനിൽ സുഖദ, സംസ്കൃതി ഷേണായ്, അജയ് ഘോഷ്, റോസ്ലിൻ ജോളി എന്നിവരാണ് പ്രധാന അഭിനേതാക്കൾ.

പ്രമേയം:⭐⭐
ആൾമാറാട്ടം നടത്തി പണമുണ്ടാക്കുക പ്രശ്നങ്ങൾ പരിഹരിക്കുക എന്ന പ്രമേയം 80കളിലെ ഒട്ടുമിക്ക മലയാള സിനിമകളിലും വിഷയമാക്കിയിട്ടുണ്ട്. ഗിരീഷ്‌ സംവിധാനം ചെയ്ത അക്കര നിന്നൊരു മാരൻ എന്ന സിനിമയിൽ ശ്രീനിവാസനെ അറബിവേഷം കെട്ടിച്ചു കുറെ ആളുകളെ പറ്റിക്കുന്ന രംഗമുണ്ട്. ഈ സിനിമയുടെ പ്രമേയവും ഏകദേശം അതുപോലെ തന്നെ. അറബി കേരളത്തിലെത്താൻ ഒരു കരണമുണ്ടാക്കി എന്നത് മാത്രമാണ് വ്യത്യാസം. അറബിയെ വിറ്റു കാശാക്കുക എന്ന പ്രമേയത്തിന് മാറ്റുകൂട്ടാൻ അറബി ഒരു മലയാളികൂടിയാണ് എന്ന് വരുത്തിത്തീർക്കുന്ന ഒന്ന് രണ്ടു കാരണങ്ങളും എഴുതിച്ചേർത്തു. ശരത്ചന്ദ്രൻ വയനാടാണ് ഈ സിനിമയുടെ കഥയെഴുതിയത്.

തിരക്കഥ:⭐⭐
കൃത്രിമത്വം നിറഞ്ഞ കഥാസന്ദർഭങ്ങളും നിലവാരമില്ലാത്ത കോമഡികളും ഉറക്കമുളച്ചെഴുതിയ വൈ.വി.രാജേഷിനു നമോവാകം. കൊച്ചു കുട്ടികളുടെ കഥാപുസ്തകങ്ങളിൽ കാണുന്ന ട്വിസ്റ്റുകൾ പോലെയാണ് ക്ലൈമാക്സ് കണ്ടപ്പോൾ തോന്നിയത്. പ്രശ്നങ്ങളുടെ നടുവിൽ ജീവിക്കുന്ന പാവപെട്ട നായകൻ. പ്രതിനായകന്റെ സ്ഥാനത്തു കാമുകിയുടെ പണക്കാരനായ അച്ഛൻ. പ്രത്യേക സാഹചര്യത്തിൽ നായകൻ തന്റെ ദുരിതങ്ങൾക്ക് പരിഹാരമായി തരികിടകൾ കാണിച്ചു പിടിച്ചുനിൽക്കുവാൻ ശ്രമിക്കുന്നു. ക്ലൈമാക്സിൽ എല്ലാവരും കള്ളത്തരങ്ങൾ അറിയുന്നു, പക്ഷെ ശുഭപര്യവസായിയായി കഥ അവസാനിക്കുന്നു. ദ്വയാർത്ഥ പ്രയോഗങ്ങളുള്ള സംഭാഷണങ്ങൾ കുത്തിനിറച്ചു സമ്പൂർണ്ണ ദുരന്തമാക്കി ഈ സിനിമയുടെ തിരക്കഥ. സലാപ്സ്റ്റിക് കോമഡികളായ ഗുലുമാലും ത്രീ കിംഗ്‌സും ഒരുക്കിയ വൈ.വി.രാജേഷ്‌-വി.കെ.പി.ടീമിനു പറ്റിയ അബദ്ധമാണ് മരുഭൂമിയിലെ ആന.

സംവിധാനം:⭐⭐
യുക്തിയില്ലാത്ത കഥാസന്ദർഭങ്ങളായാലും ബിജു മേനോൻ ഉള്ളതുകൊണ്ട് പ്രേക്ഷകർ കണ്ടിരുന്നോളും എന്ന വി.കെ.പ്രകാശിന്റെ കണക്കുകൂട്ടൽ തെറ്റിപ്പോയി. വി.കെ.പി. എന്ന പേരുകേട്ടാൽ സാങ്കേതിക പ്രവർത്തകരും അഭിനേതാക്കളും കഥാനോക്കാതെ സമ്മതംമൂളും എന്നതുകൊണ്ടാണ് മരുഭൂമിയിലെ ആന പോലുള്ള സിനിമകൾക്ക്‌ നിർമ്മാതാക്കളെ ലഭിക്കുന്നത്. പരീക്ഷണ സിനിമകൾ സംവിധാനം ചെയ്യുവാൻ കഴിവുള്ള വി.കെ.പ്രകാശ്‌ ആസ്വാദ്യകരമായ ചേരുവകളെല്ലാം ഉൾപ്പെടുത്തിയാണ് മരുഭൂമിയിലെ ആന സംവിധാനം ചെയ്തിരിക്കുന്നത്. ഒരു എന്റർറ്റെയിനർ ഒരുക്കുന്നതിൽ വിജയിച്ചു എന്നതിൽ തർക്കമില്ല. പക്ഷെ ഇത്തരത്തിലുള്ള കഥകളും തമാശകളുമുള്ള മുൻകാല സിനിമകൾ കാണാത്ത ഇന്നത്തെ തലമുറയിലെ പ്രേക്ഷകർ മാത്രമേ ചിരിക്കുന്നുള്ളു എന്ന വസ്തുത വി.കെ.പി. മനസ്സിലാകുന്നില്ല എന്നത് ദൗർഭാഗ്യകാര്യമാണ്.

സാങ്കേതികം:⭐⭐⭐
അജയ് ഡേവിഡ്‌ കാച്ചപ്പിള്ളി പകർത്തിയ ദോഹയിലെ ദൃശ്യങ്ങൾ സമ്പന്നമായിരുന്നു. കേരളത്തിലെ കാഴ്ചകൾ പ്രത്യേകിച്ച് പുതുമകളൊന്നും ഇല്ലാതെ കഥാസന്ദർഭങ്ങളോട് യോജിച്ചു പോകുന്നവയായിരുന്നു. വി.സാജനാണ് രംഗങ്ങൾ കോർത്തിണക്കിയത്. രണ്ടു മണിക്കൂർ ദൈർഘ്യത്തിൽ അവസാനിപ്പിച്ചതിനാൽ സിനിമ കണ്ടിരുന്ന പ്രേക്ഷകരുടെ ക്ഷമ നശിച്ചില്ല. ഹരിനാരായണന്റെ വരികൾക്ക് രതീഷ്‌ വേഗ ഈണമിട്ട മണ്ണപ്പം എന്ന് തുടങ്ങുന്ന പാട്ട് മികവുറ്റതായിരുന്നു. പി.ജയചന്ദ്രനാണ് ഗായകൻ. ആ പാട്ടിന്റെ ചിത്രീകരണവും മികവു പുലർത്തി. ഈ സിനിമയുടെ പശ്ചാത്തല സംഗീത സംവിധാനം നിർവഹിച്ചത് ബിജിബാലാണ്. പ്രത്യേകിച്ചു പുതുമകൾ ഒന്നുമില്ലാതെ സ്ഥിരം കോമഡി സിനിമകളിൽ കേട്ടുമറന്ന പശ്ചാത്തല സംഗീതം തന്നെയായിരുന്നു. സുജിത് രാഘവാണ് കലാസംവിധാനം. പി.എൻ.മണിയുടെ ചമയം പലയിടങ്ങളിലും പാളിപ്പോയി. പരിക്കുപറ്റിയ ബാലു വർഗീസിന്റെ കഥാപാത്രത്തിന്റെ മുഖത്തെ മുറിവുകൾ അടുത്തടുത്ത രംഗങ്ങളിൽ കൂടിയും കുറഞ്ഞുമിരുന്നു. കുമാർ എടപ്പാൾ ആണ് വസ്ത്രാലങ്കാരം.

അഭിനയം:⭐⭐⭐
തനിക്കു ലഭിക്കുന്ന വേഷമേതായാലും കയ്യടക്കത്തോടെ അഭിനയിച്ചു ഫലിപ്പിക്കുവാൻ ബിജു മേനോനുള്ള കഴിവ് പ്രശംസനീയമാണ്. ജയറാമിനും ദിലീപിനും ശേഷം കുടുംബങ്ങളുടെ പ്രിയപ്പെട്ട നായകനായിമാറി ബിജു മേനോൻ. ഈ സിനിമയിലെ അറബി വേഷവും അദ്ദേഹത്തിന്റെ കഴിവുകൊണ്ട് മാത്രമാണ് ശ്രദ്ധനേടാൻ പോകുന്നത്. പ്രേമത്തിലെ കോയക്ക് ശേഷം കൃഷ്ണശങ്കറിന്‌ ലഭിച്ച നായകതുല്യ കഥാപാത്രമാണ് ഈ സിനിമയിലെത്. ആ കഥാപാത്രത്തെ മോശമാക്കാതെ അവതരിപ്പിക്കുവാൻ കൃഷ്ണശങ്കറിന്‌ സാധിച്ചു. ഹരീഷ് പെരുമണ്ണയും സാജു നവോദയയുമാണ് മലയാള സിനിമയിലെ ഏറ്റവും പുതിയ ഹാസ്യ നടന്മാർ. രണ്ടുപേരും അവരവരുടെ അഭിനയത്തിലൂടെ പ്രേക്ഷകരെ ചിരിപ്പിച്ചു. ബാലു വർഗീസ്‌ സ്ഥിരം ശൈലിയിൽ കഥാപാത്രമായി തിളങ്ങി. മരുഭൂമിയിലെ ആനയെ മുഴുവൻ നേരവും പ്രേക്ഷകർ കണ്ടിരിക്കുവാൻ കാരണം അഭിനേതാക്കളുടെ പ്രകടനം ഒന്നുകൊണ്ടുമാത്രമാണ്.

വാൽക്കഷ്ണം: ഈ ആനയെ ഉടനടി തിരിച്ചു മരുഭൂമിയിലേക്ക് കയറ്റി അയക്കുമെന്നുറപ്പ്!

സംവിധാനം:വി.കെ.പ്രകാശ്‌
നിർമ്മാണം:ഡേവിഡ്‌ കാച്ചപ്പിള്ളി
കഥ:ശരത്ചന്ദ്രൻ വയനാട്
തിരക്കഥ,സംഭാഷണം:വൈ.വി.രാജേഷ്‌
ചായാഗ്രഹണം:അജയ് ഡേവിഡ്‌ കാച്ചപ്പിള്ളി
ചിത്രസന്നിവേശം:വി.സാജൻ
ഗാനരചന:ഹരിനാരായണൻ
സംഗീതം:രതീഷ്‌ വേഗ
പശ്ചാത്തല സംഗീതം:ബിജിബാൽ
കലാസംവിധാനം:സുജിത് രാഘവ്
ചമയം:പി.എൻ.മണി
വസ്ത്രാലങ്കാരം:കുമാർ എടപ്പാൾ
വിതരണം:ചാന്ദ് വി. ക്രിയേഷൻസ് റിലീസ്

അനുരാഗ കരിക്കിൻ വെള്ളം – ⭐⭐⭐

image

സ്വാദിഷ്ടമായ പ്രണയ ദാഹശമനി – ⭐⭐⭐

ദൈവത്തിന്റെ സ്വന്തം നാട്ടിലെ കുടുംബങ്ങളിൽ ചുക്കുവെള്ളവും, ജീരകവെള്ളവും, മല്ലിയിലയിട്ട് തളപ്പിച്ച വെള്ളവും ദാഹശമനിയായി ഉപയോഗിക്കാറുണ്ട്. ഔഷധമൂല്യമുള്ള കരിങ്ങാലി വെള്ളവും ജീരക വെള്ളവും ശാരീരിക രോഗങ്ങൾ മാറ്റുവാൻ ഉത്തമമാണ്. പ്രണയ നൈരാശ്യം മൂലമുണ്ടാകുന്ന മനസ്സിന്റെ വേദന എല്ലാ പ്രായത്തിലുള്ളവരെയും കാലാകാലങ്ങളായി ബാധിച്ചു വരുന്നതു മനസ്സിലാക്കിയ ഒരുപിടി സുഹൃത്തുക്കൾ പ്രണയ ദാഹശമനത്തിനായി ഉണ്ടാക്കിയ രുചിയുള്ള സിനിമയാണ് അനുരാഗ കരിക്കിൻ വെള്ളം.

കുടുംബസമേതം ആസ്വദിച്ചിരുന്നു കാണാവുന്ന സിനിമയാണ് നവാഗതനായ ഖാലിദ്‌ റഹ്മാൻ പ്രേക്ഷകർക്ക്‌ നൽകിയിരിക്കുന്നത്. നവീൻ ഭാസ്‌കറിന്റെ തിരക്കഥയും, ജിംഷി ഖാലിദ്‌ ഒരുക്കിയ ഫ്രെയിമുകളും, പ്രശാന്ത്‌ പിള്ളയുടെ പശ്ചാത്തല സംഗീതവും ഈ വെള്ളത്തിന്റെ രുചികൂട്ടുന്നു. ഓഗസ്റ്റ് സിനിമാസിന്റെ ബാനറിൽ ഷാജി നടേശൻ, സന്തോഷ്‌ ശിവൻ, ആര്യ, പ്രിഥ്വിരാജ് സുകുമാരൻ എന്നിവർ ചേർന്നാണ് ഈ സിനിമ നിർമ്മിച്ചിരിക്കുന്നത്.

പ്രമേയം: ⭐⭐⭐
പ്രണയം നമ്മളെ പഠിപ്പിക്കുന്ന ഗുണപാഠങ്ങൾ എന്തൊക്കെയാണ്? ഒരാൾ പ്രണയത്തിലാകുമ്പോൾ അയാളുടെ സ്വഭാവത്തിലും പെരുമാറ്റത്തിലും സംസാരത്തിലും ചിന്തകളിലും മാറ്റങ്ങൾ സംഭവിക്കുമെന്നും, പ്രണയിനിയെ സ്വന്തമാക്കണമെന്ന ലക്ഷ്യത്തിലെത്തുവാൻ സ്വന്തം ജീവിതത്തെ ഗൗരവത്തോടെ കാണുമെന്നുമുള്ള വിഷയങ്ങൾ ലളിതമായ കഥയുടെ രൂപത്തിൽ അവതരിപ്പിച്ച സിനിമയാണ് അനുരാഗ കരിക്കിൻ വെള്ളം. രണ്ടു തലമുറയിലെ വ്യക്തികളുടെ കാഴ്ചപ്പാടിലൂടെ ഒരു കാമുകി അവരെ ഏതൊക്കെ രീതിയിൽ സ്വാധീനിക്കുന്നു എന്നും ഈ സിനിമയിലൂടെ നവീൻ ഭാസ്കർ പറഞ്ഞുതരുന്നു.

തിരക്കഥ: ⭐⭐⭐
മൺസൂൺ മാംഗോസ് എന്ന സിനിമയ്ക്ക് ശേഷം നവീൻ ഭാസ്കർ രചന നിർവഹിച്ചിരിക്കുന്ന സിനിമയാണിത്. പ്രണയത്തിലായിരുന്ന പുതു തലമുറയിൽപ്പെട്ട ഒരു വ്യക്തി കാമുകിയുടെ സന്തോഷങ്ങൾക്കും വികാരങ്ങൾക്കും വിലകല്പിക്കാതെ ആ പ്രണയം നഷ്ടപെടുത്തുമ്പോൾ, മറുവശത്ത് പഴയ തലമുറയിൽപെട്ടയാൾ അയാളുടെ നഷ്ട പ്രണയത്തെ വീണ്ടും സ്വന്തമാക്കുവാൻ ശ്രമിക്കുന്നു. ഇരുവരുടെയും സ്വഭാവത്തിൽ പ്രണയംമൂലമുണ്ടാകുന്ന മാറ്റങ്ങൾ റിയലസ്റ്റികായി അവതരിപ്പിച്ചിരിക്കുന്നു. പള്ളി സെമിത്തേരിയിൽ നടക്കുന്ന രംഗമൊഴികെ മറ്റെല്ലാ രംഗങ്ങളും നൂറു ശതമാനം വിശ്വസനീയതയോടെ കഥാസന്ദർഭങ്ങളാക്കിയിരിക്കുന്നു. ഹാസ്യത്തിന് വേണ്ടി എഴുതപെട്ട സംഭാഷങ്ങണളോ ദ്വയാർത്ഥ ഡയലോഗുകളോ ഒന്നുമില്ലാത്ത തിരക്കഥയാണ് നവീൻ ഭാസ്‌ക്കർ എഴുതിയിരിക്കുന്നത്. മൺസൂൺ മാംഗോസിലൂടെ നിരാശപ്പെടുത്തിയ നവീൻ ഭാസ്ക്കറിന്റെ ശക്തമായ തിരിച്ചുവരാവാകട്ടെ ഈ സിനിമ.

സംവിധാനം: ⭐⭐⭐
ഖാലിദ്‌ റഹ്മാൻ ഒരു നവാഗതനാണെന്നു തോന്നാത്ത രീതിയിലാണ് ആദ്യ സിനിമ സംവിധാനം ചെയ്തിരിക്കുന്നത്. കേരളത്തിലെ ശരാശരി കുടുംബങ്ങളിലെ കാഴ്ചകൾ റിയാസിലസ്റ്റിക്കായി അവതരിപ്പിക്കുവാൻ ഖാലിദിന് സാധിച്ചു. അതുപോലെ കഥാപാത്രങ്ങൾക്ക് അനിയോജ്യരായ നടീനടന്മാരെ കണ്ടെത്തി അഭിനയിപ്പിച്ചു എന്നതും അഭിനന്ദനം അർഹിക്കുന്നു കാര്യമാണ്. ലളിതമായ രീതിയിൽ ഏച്ചുകെട്ടലുകളില്ലാതെ രസകരമായി കോർത്തിണക്കിയ രംഗങ്ങളും അവയ്ക്ക് അനിയോജ്യമായ പശ്ചാത്തല സംഗീതവും പ്രേക്ഷകർ ഏറെ ആസ്വദിച്ചു. സിനിമയിലുടനീളം ചിലയിടങ്ങളിലായി ഇഴച്ചിൽ അനുഭവപെട്ടു എന്നതൊഴികെ സംവിധാനത്തിൽ കഴിവ് തെളിയിക്കുവാൻ ഖാലിദ്‌ റഹ്മാന് കഴിഞ്ഞിട്ടുണ്ട്.

സാങ്കേതികം: ⭐⭐⭐
ഷൈജു ഖാലിദിന്റെ സഹോദരൻ ജിംഷി ഖാലിദാണ് ഈ സിനിമയുടെ രംഗങ്ങൾ ചിത്രീകരിച്ചിരിക്കുന്നത്. ക്യാമറ ഗിമ്മിക്‌സൊന്നും ഉപയോഗിക്കാതെ പ്രേക്ഷകർക്ക്‌ റിലേറ്റ് ചെയ്യാനാവുന്ന രീതിയിലുള്ള ലൊക്കേഷനുകളും ഫ്രയിമുകളുമാണ് ഈ സിനിമയിലുടനീളമുള്ളത്. പുതുമുഖം നൗഫൽ അബ്ദുള്ള കോർത്തിണക്കിയ രംഗങ്ങൾ സിനിമയുടെ വേഗതയെ നിയന്ത്രിക്കുന്നതായിരുന്നു. ചിലയിടങ്ങളിൽ വേഗതയോടെയും മറ്റുചിലയിടങ്ങളിൽ ഇഴഞ്ഞുനീങ്ങുന്ന അവസ്ഥയിലുമാണ് ചിത്രസന്നിവേശം നിർവഹിച്ചിരിക്കുന്നത്. പ്രശാന്ത്‌ പിള്ളയുടെ പശ്ചാത്തല സംഗീതം ഈ സിനിമയുടെ നെടുംതൂണായി നിലകൊള്ളുന്നു. ഓരോ രംഗങ്ങളും പ്രേക്ഷകരുടെ മനസ്സിൽ ആഴത്തിൽ പതിയുന്നതിന്റെ പ്രധാന കാരണം പശ്ചാത്തല സംഗീതമാണ്. മൂന്ന് പാട്ടുകളും അത്രകണ്ട് ശ്രദ്ധ നേടുന്നില്ല എന്നത് ഒരു പ്രണയകഥ പറയുന്ന സിനിമയെ സംബന്ധിച്ചു പോരായ്മതന്നെയാണ്. ധന്യ ബാലകൃഷ്ണൻ കഥാപാത്രങ്ങൾക്ക് നൽകിയ വേഷങ്ങൾ മികവു പുലർത്തി.

അഭിനയം: ⭐⭐⭐⭐
ബിജു മേനോൻ, ആസിഫ് അലി, രജീഷ വിജയൻ, ആശ ശരത്, സൗബിൻ ഷാഹിർ, ശ്രീനാഥ് ഭാസി, സുധീർ കരമന, മണിയൻപിള്ള രാജു, ഇർഷാദ്, സുധി കോപ്പ, നന്ദിനി, ചിന്നു എന്നിവരാണ് ഈ സിനിമയിലെ പ്രധാന അഭിനേതാക്കൾ. പുതുമുഖം രജീഷ വിജയൻ ആണ് ഈ സിനിമയിലെ താരം. ഇത്രയും രസകരമായും റിയലസ്റ്റിക്കായും ഒരു പുതുമുഖ നടിക്ക് അഭിനയിക്കാനറിയുമെങ്കിൽ മലയാള സിനിമയിലെ ഒരുപിടി നല്ല കഥാപാത്രങ്ങൾ രജീഷയെ തേടിയെത്തുമെന്നുറപ്പ്. പരുക്കനായ പോലീസ് ഉദ്യോഗസ്ഥനിൽ നിന്ന് ശാന്തനായ അച്ഛനായി മാറിയ രഘു എന്ന കഥാപാത്രത്തെ ബിജു മേനോൻ മികച്ച രീതിയിൽ അവതരിപ്പിച്ചു. ഇന്നത്തെ തലമുറയെ പ്രതിനിധികരിക്കുന്ന കഥാപാത്രങ്ങളായി ആസിഫ് അലിയും, സൗബിൻ ഷാഹിറും, ശ്രീനാഥ് ഭാസിയും അവരവരുടെ കഥാപാത്രങ്ങളെ ഭംഗിയായി അവതരിപ്പിച്ചിരിക്കുന്നു. ആശ ശരത്തും, സുധീർ കരമനയും, മണിയൻപിള്ള രാജുവും, ഇർഷാദും നല്ല നടീനടന്മാരാണെന്നു വീണ്ടും തെളിയിക്കുന്നു.

വാൽക്കഷ്ണം: കുടുംബസമേതം കണ്ടുരസിക്കാം ഓർത്തുസുഖിക്കാം രുചിച്ചുനോക്കാം ഈ അനുരാഗ കരിക്കിൻ വെള്ളം.

സംവിധാനം: ഖാലിദ്‌ റഹ്മാൻ
നിർമ്മാണം: ഓഗസ്റ്റ് സിനിമ
രചന: നവീൻ ഭാസ്കർ
ചായാഗ്രഹണം: ജിംഷി ഖാലിദ്
ചിത്രസന്നിവേശം: നൗഫൽ അബ്ദുള്ള
സംഗീതം: പ്രശാന്ത്‌ പിള്ള
ഗാനരചന: ബി.കെ.ഹരിനാരായണൻ, ശബരീഷ് വർമ്മ
കലാസംവിധാനം: സാബു മോഹൻ
വസ്ത്രാലങ്കാരം: ധന്യ ബാലകൃഷ്ണൻ
മേക്കപ്പ്: റോണക്സ്‌ സേവ്യർ
ശബ്ദനിയന്ത്രണം: രാധാകൃഷ്ണൻ
വിതരണം: ഓഗസ്റ്റ് സിനിമ റിലീസ്.

ലീല -⭐⭐

image

കാമമോഹിത ലീലാവിലാസം – ⭐⭐

“പിള്ളേച്ചോ എനിക്കൊന്ന് ഭോഗിക്കണം” എന്ന് കുട്ടിയപ്പൻ അണച്ചുക്കൊണ്ട് പറഞ്ഞു. ആരെ, എന്നെയാണോ വേണ്ടത് ഈ പാതിരായ്ക്ക്? എനിക്ക് ദേഷ്യം വന്നു. എന്റെ പിള്ളേച്ച ചുമ്മാ കളിക്കല്ലേ എന്ന് ടോർച്ച്കൊണ്ട് പുറം ചൊറിഞ്ഞുകൊണ്ട് പറഞ്ഞു. “ഇതൊരു പ്രത്യേകതരം ഭോഗമാണ്. അതിനൊരു ഏർപ്പാടുണ്ടാക്കണം”.

2010 ഒക്ടോബർ-നവംബർ മാസത്തിലെ മാതൃഭൂമി ആഴ്ചപതിപ്പിൽ പ്രസിദ്ധീകരിച്ച ലീല എന്ന ചെറുകഥയിലെ സംഭാഷണങ്ങളാണ് മേൽപറഞ്ഞത്‌. ഉണ്ണി ആർ. എഴുതിയ ലീല എന്ന ചെറുകഥയെ ആസ്പദമാക്കി അദ്ദേഹം തന്നെ രചന നിർവഹിച്ച സിനിമയാണ് ലീല. ഇതാദ്യമായിട്ടാണ് മറ്റൊരാളുടെ തിരക്കഥ രഞ്ജിത്ത് സംവിധാനം ചെയ്യുന്നത്. രഞ്ജിത്തിന്റെ ഉടമസ്ഥതയിലുള്ള ക്യാപിറ്റോൾ തിയറ്റേഴ്സാണ് ലീല നിർമ്മിച്ചിരിക്കുന്നത്.

പ്രമേയം: ⭐⭐⭐
ഭ്രാന്തൻ ചിന്തകളുമായി ജീവിക്കുന്ന ഒരു താന്തോന്നി തന്റെ വിചിത്ര ആഗ്രഹം സഫലീകരിക്കുവാൻ ശ്രമിക്കുന്നതിനിടയിൽ സ്വയം തിരച്ചറിയുന്ന പച്ചയായ സത്യങ്ങൾ അയാളുടെ ചിന്തകളെയും ആഗ്രഹങ്ങളെയും സ്വാധീനിക്കുന്നതാണ് ഈ സിനിമയുടെ പ്രമേയം. ആനയുടെ തുമ്പിക്കൈയിൽ ചാരിനിർത്തി ഒരു പെണ്ണിനെ അനുഭവിക്കണം എന്ന ആഗ്രഹത്തിന് വേണ്ടി ശ്രമിക്കുന്ന കുട്ടിയപ്പന്റെ കഥയാണ് ഈ സിനിമയിലൂടെ ഉണ്ണി ആർ.-രഞ്ജിത്ത് ടീം അവതരിപ്പിക്കുന്നത്‌.

തിരക്കഥ: ⭐⭐
ഉണ്ണി ആർ. തന്റെ ചെറുകഥ വികസിപ്പിച്ചു എഴുതിയ കഥാസന്ദർഭങ്ങൾ കഴമ്പില്ലാത്ത രീതിയിൽ അനുഭവപെട്ടു. കുട്ടിയപ്പന്റെ ഭ്രാന്തൻ സ്വഭാവങ്ങൾ പ്രേക്ഷകർക്ക്‌ മനസ്സിലാക്കികൊടുക്കുവാൻ നിരവധി സന്ദർഭങ്ങൾ മെനഞ്ഞെടുത്ത ഉണ്ണി ആർ., ലീല എന്ന കഥാപാത്രത്തെ സിനിമയുടെ അവസാന 30 മിനിറ്റ് മാത്രമേ ഓർക്കുന്നുള്ളൂ. സിനിമയിലുടനീളം പുരുഷ മേധാവിത്വത്തെയും മതങ്ങളോടുള്ള മലയാളികളുടെ കാഴ്ച്ചപാടുകളെയും ആക്ഷേപഹാസ്യരൂപേണെ പരിഹസിക്കുവാനും ഉണ്ണി ആർ. മറന്നില്ല. സംഭാഷണങ്ങളിലൂടെ രസകരമായ കുറെ ആശയങ്ങൾ പ്രേക്ഷകരോട് പറയുവാൻ ഉണ്ണി ആർ. ശ്രമിച്ചിട്ടുണ്ട്. ഗുരുവായൂരപ്പൻ എന്നല്ലാതെ ഗുരുവായൂരച്ചൻ എന്നലല്ലോ നമ്മൾ പറയാറുള്ളത് എന്ന് തുടങ്ങി മാലാഘമാർ തിരിച്ചു പോകുമ്പോൾ എലക്റ്റ്രിക് കമ്പിയിൽ തൊടാതെ പോകണമെന്ന് വരെ രസകരമായ ആക്ഷേപഹാസ്യ സംഭാഷണങ്ങൾ ഉണ്ണി ആർ. എഴുതിയിട്ടുണ്ട്.

സംവിധാനം: ⭐⭐⭐
രഞ്ജിത്ത് എന്ന സംവിധായകന്റെ കഴിവ് പരമാവധി ഉപയോഗിച്ച് പ്രേക്ഷകർക്ക്‌ ദഹിക്കാൻ ഒരല്പം പ്രയാസമുള്ള ഒരു കഥയെ കണ്ടിരിക്കാവുന്ന രീതിയിൽ അവതരിപ്പിച്ചു. മലയാള സിനിമ പ്രേക്ഷകർ കണ്ടുശീലിച്ച സ്പൂൺ ഫീഡിംഗ് രീതി ഉപേക്ഷിച്ചു ഒരല്പം ചിന്തിക്കാനുള്ള അവസരം ഈ സിനിമയിലൂടെ രഞ്ജിത്ത് പ്രേക്ഷകർക്ക്‌ നൽക്കുന്നുണ്ട്. കുട്ടിയപ്പനും ലീലയ്ക്കും എന്ത് സംഭവിക്കും എന്ന ആശങ്ക ജനിപ്പിക്കുവാനും ഏവരെയും ത്രസിപ്പിക്കുന്ന രീതിയിൽ കഥ അവസാനിപ്പിക്കുവാനും രഞ്ജിത്ത് ശ്രമിച്ചു. സിനിമ കണ്ടിറങ്ങുന്ന പ്രേക്ഷകരുടെ മനസ്സിൽ ചോദ്യങ്ങൾ ഏറെ ബാക്കിനിർത്തിക്കൊണ്ട് ലീല അവസാനിക്കുന്നു.

സാങ്കേതികം: ⭐⭐⭐
വയനാടാൻ ചുരങ്ങൾ അതിമനോഹരമായി ഒപ്പിയെടുത്ത ക്യാമറക്കണ്ണുകൾ പ്രശാന്ത് രവീന്ദ്രന്റെതാണ്‌. ആകാംഷയുടെ മുൾമുനയിൽ പ്രേക്ഷകരെ കൊണ്ടെത്തിക്കുന്ന ക്ലൈമാക്സ് രംഗങ്ങളുടെ ചിത്രീകരണം മികച്ചതായി അനുഭവപെട്ടു. മനോജ്‌ കണ്ണോതാണ് ചിത്രസന്നിവേശം നിർവഹിച്ചത്. ആദ്യ പകുതിയിലെ കുറെ രംഗങ്ങൾ വലിച്ചുനീട്ടി അവതരിപ്പിച്ചു പ്രേക്ഷകരെ മുഷിപ്പിച്ചു. കുട്ടിയപ്പന്റെ സ്വഭാവം പ്രേക്ഷകരിലേക്ക് എത്തിക്കുവാൻ ഒരുപാട് രംഗങ്ങൾ ആദ്യ പകുതിയിലുണ്ട്. കുട്ടിയപ്പന്റെ ഭ്രാന്തൻ ചിന്തകളും ആഗ്രഹങ്ങളും പറഞ്ഞു പറഞ്ഞു ബോറടിപ്പിച്ചു. ഈ കുറവുകൾ ഒരുപരുധിവരെ പ്രേക്ഷകർ ക്ഷമിച്ചു സിനിമ കണ്ടത് ബിജിബാലിന്റെ പശ്ചാത്തല സംഗീതം ഒന്നുകൊണ്ട് മാത്രമാണ്. സിനിമയിലുടനീളം രംഗങ്ങൾക്ക് അനിയോജ്യമായിരുന്ന പശ്ചാത്തല സംഗീതമായിരുന്നു ബിജിബാൽ നൽകിയത്. എടുത്തു പറയേണ്ടത് ക്ലൈമാക്സ് രംഗങ്ങളിലെ പശ്ചാത്തല സംഗീതത്തെ കുറിച്ചാണ്. സന്തോഷ്‌ രാമന്റെ കലാസംവിധാനവും റോണക്സ്‌ സേവ്യറിന്റെ മേയ്ക്കപ്പും എസ്.ബി സതീഷിന്റെ വസ്ത്രാലങ്കാരവും സിനിമയുടെ സ്വഭാവത്തോട് ചേർന്ന്പോകുന്നവയാണ്.

അഭിനയം: ⭐⭐⭐
ധനികനായ എമ്പോക്കി കുട്ടിയപ്പനായി ബിജു മേനോൻ മികച്ച അഭിനയം കാഴ്ചവെച്ചു. ചില രംഗങ്ങളിൽ ബിജു മേനോന്റെ സ്ഥിരം അഭിനയ ശൈലിയും സംഭാഷണ രീതിയും കടന്നുവരുന്നതായി അനുഭവപെട്ടുവെങ്കിലും, കഥാപാത്രത്തോട് നീതിപുലർത്തുന്ന അഭിനയമായിരുന്നു അദ്ദേഹത്തിന്റേത്. കുട്ടിയപ്പനായി മോഹൻലാലോ മമ്മൂട്ടിയോ അഭിനയിചിരുന്നുവെങ്കിൽ ഈ സിനിമ വേറൊരു തലത്തിൽ എത്തുമായിരുന്നു എന്ന് തോന്നുന്നു. എന്നിരുന്നാലും ബിജു മേനോൻ തന്നാലാവുംവിധം അഭിനയിച്ചിട്ടുണ്ട് ഈ സിനിമയിൽ. ലീലയായി സംഭാഷണങ്ങൾ ഒന്നുമില്ലാതെ ഭാവാഭിനയത്തിലൂടെ തിളങ്ങുവാൻ പാർവതി നമ്പ്യാരിനും സാധിച്ചു. ഈ സിനിമയിലെ ഏറ്റവും മികച്ച രണ്ടു കഥാപാത്രങ്ങളെ അവതരിപ്പിച്ച വിജയരാഘവനും ജഗദീഷും അക്ഷരാർത്ഥത്തിൽ ഏവരെയും ഞെട്ടിക്കുന്ന അഭിനയമാണ് കാഴ്ചവെച്ചത്. ഇന്ദ്രൻസും, സുരേഷ് കൃഷ്ണയും, വി.കെ.ശ്രീരാമനും, വത്സല മേനോനും, കവിത നായരും, പാർവതിയും അവരവരുടെ കഥാപാത്രങ്ങൾ തന്മയതത്വോടെ അഭിനയിച്ചു.

വാൽക്കഷ്ണം: ഒരുവട്ടം കണ്ടിരിക്കാം കുട്ടിയപ്പന്റെ ലീലാവിലാസങ്ങൾ!

സംവിധാനം, നിർമ്മാണം: രഞ്ജിത്ത്
രചന: ഉണ്ണി ആർ.
ബാനർ: ക്യാപ്പിറ്റോൾ തിയറ്റേഴ്സ്
ചായാഗ്രഹണം: പ്രശാന്ത്‌ രവീന്ദ്രൻ
ചിത്രസന്നിവേശം: മനോജ്‌ കണ്ണോത്ത്
സംഗീതം: ബിജിബാൽ
കലാസംവിധാനം: സന്തോഷ്‌ രാമൻ
വസ്ത്രാലങ്കാരം: എസ്.ബി.സതീഷ്‌
മേയ്ക്കപ്പ്: റോണക്സ്‌ സേവ്യർ
വിതരണം: ക്യാപിറ്റോൾ തിയറ്റർ