രാമന്റെ ഏദൻതോട്ടം – ⭐⭐


ബന്ധനങ്ങളുടെ ഏദൻതോട്ടം! – ⭐⭐

അനർവചനീയ അനുഭൂതി നൽകുന്ന ഒന്നാണ് പ്രണയം. ഓരോരുത്തർക്കും പ്രണയം തോന്നുന്നത് ജീവിതത്തിലെ ഓരോ കാലഘട്ടത്തിലാകും അതിനു പല കരണങ്ങളുമുണ്ടാകും. പ്രണയത്തിനു പല മുഖങ്ങളുമുണ്ടാകും. ചിലർക്കത് ദിവ്യപ്രണയമാകാം മറ്റുചിലർക്ക് കാമമാകാം. പ്രണയിക്കുന്നയാളിനെ ഒരിക്കലും സ്വന്തമാക്കുവാൻ സാധിക്കുകയില്ല എന്ന തിരിച്ചറിവ് സ്വയം തോന്നുന്ന നിമിഷങ്ങളിലാകും അയാളോടുള്ള പ്രണയം ഏറ്റവും തീവ്രമാകുന്നത്. ചിലർ അതിനു പുറകെ പോകുന്നവരാകും മറ്റുചിലർ അതിനെ ഉള്ളിലൊതുക്കും വേറെചിലർ അതിനെ പറയാതെ പറയുന്ന പ്രണയമെന്നോ സൗഹൃദമെന്നോ വിശേഷിപ്പിക്കും. രാമന്റെ ഏദൻതോട്ടം എന്ന സിനിമ ചർച്ചചെയ്യുന്ന വിഷയവും പ്രണയത്തിന്റെ പലതലങ്ങളാണ്.

ഡ്രീംസ് ആൻഡ് ബിയോണ്ടിന്റെ ബാനറിൽ രഞ്ജിത്ത് ശങ്കർ നിർമ്മിച്ച്, അദ്ദേഹം തന്നെ എഴുതി സംവിധാനം നിർവഹിച്ച രാമന്റെ ഏദൻതോട്ടം വിതരണം ചെയ്തിരിക്കുന്നത് സെൻട്രൽ പിക്ചേഴ്സ്സാണ്. രാമനായി കുഞ്ചാക്കോ ബോബനും, മാലിനിയായി അനു സിത്താരയും, എൽവിസ്സായി ജോജു ജോർജ്ജും വർമ്മാജിയായി രമേശ് പിഷാരടിയും സലീമായി ശ്രീജിത്ത് രവിയും അഭിനയിച്ചിരിക്കുന്നു.

പ്രമേയം: ⭐⭐
പ്രണയത്തിന്റെയും സൗഹൃദത്തിന്റെയും ഇതുവരെ കാണാത്ത മുഖങ്ങളായിരുന്നു പത്മരാജന്റെ തൂവാനത്തുമ്പികളും കമലിന്റെ മേഘമൽഹാറും ശ്യാമപ്രസാദിന്റെ ഒരേ കടലും ബ്ലെസ്സിയുടെ പ്രണയവും നമുക്ക് സമ്മാനിച്ചത്. രഞ്ജിത്ത് ശങ്കറിന്റെ രാമന്റെ ഏദൻതോട്ടവും മേല്പറഞ്ഞ സിനിമകൾ പോലെ പ്രണയത്തിന്റെ വേറിട്ട മുഖം വരച്ചുകാട്ടുന്നു. രാമനും മാലിനിക്കും എൽവിസിനും വർമ്മാജിക്കും സലീമിനും ശത്രുഘ്‌നനും തുടങ്ങി രാമന്റെ ഏദൻതോട്ടത്തിലെ ഓരോ അതിഥികളും പ്രണയം പ്രകടിപ്പിക്കുന്നത് ഓരോ രീതിയിലാണ്. വിവാഹേതര ബന്ധത്തെ അവിഹിതമെന്നു വിളിക്കുന്നവരുമുണ്ട് സൗഹൃദമെന്നു വിളിക്കുന്നവരുമുണ്ട്. ഓരോ വ്യക്തികളുടെയും കാഴ്ചപ്പാടുകളെ ആശ്രയിച്ച ഒന്നായിരിക്കും അത്തരത്തിലുള്ള സൗഹൃദങ്ങൾ. അതിർവരമ്പുകൾ ലംഘിക്കാത്ത വിവാഹേതര സൗഹൃദങ്ങളെ സമൂഹം എങ്ങനെ നോക്കിക്കാണുമെന്നും ഈ സിനിമയിൽ വിഷയമാകുന്നു. കുടുംബ ബന്ധം തകരാതിരിക്കുവാനും കുട്ടികളുടെ ഭാവിയും സുരക്ഷയും ഓർത്തുകൊണ്ട് എല്ലാം സഹിച്ചു ആൺമേധാവിത്വത്തിനു മുമ്പിൽ എപ്പോഴും തോറ്റുകൊടുക്കുന്നതിനു പകരം സ്ത്രീകൾ പ്രതികരിക്കണമെന്നും സ്വയം പ്രാപ്തി നേടണമെന്ന പ്രമേയവും ഈ സിനിമയിൽ ചർച്ചാവിഷയമാകുന്നുണ്ട്. സ്ത്രീ സ്വാതന്ത്ര്യം, സ്വപ്നസാക്ഷാത്കാരം തുടങ്ങിയവയും കഥാസന്ദർഭങ്ങളിൽ വന്നുപോകുന്നുണ്ട്. പറഞ്ഞുപഴകിയ പ്രമേയമാണെങ്കിലും കേരളത്തിലെ കുടുംബ പ്രേക്ഷകർക്ക് എന്നും കണ്ടിരിക്കാൻ രസമുള്ള വിഷയമാണ് മേല്പറഞ്ഞവയെല്ലാം.

തിരക്കഥ: ⭐⭐
നഗരങ്ങളിൽ കാടുകൾ സൃഷ്ടിക്കുക എന്ന ആശയം സമൂഹത്തിലെത്തിക്കുന്ന അക്കീര മിയാവാക്കി എന്ന പ്രകൃതിസ്നേഹിയെ പോലെയൊരാളാണ് രാമൻ. അയാളുടെ ഏദൻതോട്ടത്തിൽ അതിഥിയായി എത്തുന്നു നർത്തകി കൂടിയായ മാലിനി. ആൺമേധാവിത്വത്തിനു അടിമയായി ജീവിക്കുന്ന മാലിനിയെ ജീവിതത്തിലെ സ്വപ്ങ്ങൾ യാഥാർഥ്യമാക്കുവാൻ രാമൻ പ്രചോദനം നൽകുന്നു. അതോടെ ഇരുവരും സൗഹൃദത്തിലാകുന്നു. രഞ്ജിത്ത് ശങ്കർ എന്ന എഴുത്തുകാരന്റെ രചനാപാടവം പ്രതിഫലിച്ച കഥാസന്ദർഭങ്ങളായിരുന്നു അവയെല്ലാം. എന്നാൽ, ആ സൗഹൃദം മറ്റൊരു തലത്തിലേക്ക് സഞ്ചരിക്കേണ്ട ആവശ്യകതയുണ്ടോ എന്ന ആശയക്കുഴപ്പത്തിലായി രഞ്ജിത്ത് ശങ്കർ എന്ന തിരക്കഥാകൃത്ത്. സൗഹൃദമാണോ പ്രണയമാണോ എന്ന നിർവചിക്കാൻ സാധിക്കാത്ത തരത്തിലായി പിന്നീടുള്ള കഥാസന്ദർഭങ്ങൾ. മാലിനിയും രാമനും തമ്മിലുള്ള ബന്ധമെന്താണ് എന്ന കഥാസന്ദർഭങ്ങളിലൂടെ അവതരിപ്പിക്കുവാൻ രഞ്ജിത്ത് ശങ്കറിന് കഴിഞ്ഞില്ല. രാമന്റെയും മാലിനിയുടെയും കഥാപാത്രങ്ങളുടെ സ്വഭാവം ഓരോ അവസരത്തിലും ഓരോ രീതിയിലായി തോന്നി. അവർ തമ്മിലുള്ള സംഭാഷങ്ങളിൽ ഉടനീളം നാടകീയത നിറഞ്ഞുനിന്നിരുന്നു. ഒരേ ചിന്താഗതിയുള്ള രാമന്റെയും മാലിനിയുടെയും അപൂർവ സൗഹൃദം കാണുവാൻ പ്രതീക്ഷിച്ച പ്രേക്ഷകരെ നിരാശപ്പെടുത്തുന്ന കഥാഗതിയായിരുന്നു സിനിമയുടേത്. വിവാഹേതര സൗഹൃദത്തിൽ നിലയുറപ്പിക്കുന്നതിനു പകരം പല ഉപവിഷയങ്ങളിലേക്കും കഥാകൃത്ത് പ്രേക്ഷകരെ കൊണ്ടുചെന്നത് അവരെ ആശയകുഴപ്പത്തിലാക്കി. ഈ കുറവുകളൊക്കെയുണ്ടെങ്കിലും ഇന്നത്തെ കുടുംബങ്ങൾ തീർച്ചയായും കണ്ടിരിക്കേണ്ട കുറെ രംഗങ്ങൾ ഈ സിനിമയിലുണ്ട്.

സംവിധാനം: ⭐⭐⭐
പാസഞ്ചർ മുതൽ പ്രേതം വരെ ഒന്നിനൊന്നു വ്യത്യസ്ത സിനിമകൾ സംവിധാനം ചെയ്ത രഞ്ജിത്ത് ശങ്കർ പരീക്ഷിക്കാത്ത ഒരു പ്രമേയമാണ് രാമന്റെ എദൻതോട്ടം. ഇന്നത്തെ കുടുംബങ്ങളിൽ നടന്നുകൊണ്ടിരിക്കുന്ന സംഭവങ്ങൾ റിയലസ്റ്റിക്കായി അവതരിപ്പിക്കുവാൻ രഞ്ജിത്ത് ശങ്കർ പരമാവധി ശ്രമിച്ചിട്ടുണ്ട്. കഥാപാത്രങ്ങൾക്ക് അനിയോജ്യരായ നടീനടമാരെ കണ്ടെത്തുന്നതിൽ വിജയിച്ചു. കുഞ്ചാക്കോ ബോബന് സമീപകാലത്തു ലഭിച്ച ഏറ്റവും മികച്ച കഥാപാത്രമാണ് രാമൻ. മാലിനിയായി പലവരുടെയും മുഖം ഓർമ്മവരുമെങ്കിലും അനു സിത്താരയാണ് ഏറ്റവും അനിയോജ്യമെന്നു സിനിമ കാണുമ്പോൾ ബോധ്യമാകും. ഒഴുക്കൻ മട്ടിലുള്ള അവതരണമാണ് ഈ സിനിമയ്ക്ക് അനിയോജ്യം എന്ന് മനസ്സിലാക്കിയ രഞ്ജിത്ത് ശങ്കർ ആസ്വാദനത്തിനു വേണ്ടിയുള്ള ചേരുവകളായ നർമ്മവും പാട്ടുകളും കൃത്യതയോടെ ചേർക്കുവാൻ മറന്നില്ല. വി. സാജന്റെ സന്നിവേശവും മധു നീലകണ്ഠന്റെ വിഷ്വൽസും അതിനു സംവിധായകനെ സഹായിച്ചു. പതിഞ്ഞ താളത്തിലുള്ള പ്രണയകഥകൾ ഇഷ്ടപെടുന്ന പ്രേക്ഷകർക്ക് ഒരുതവണ കണ്ടിരിക്കാം ഏദൻതോട്ടത്തിലെ കാഴ്ച്ചകൾ. അശ്രദ്ധയോടെയാണ് പല രംഗങ്ങളിലെയും ഡബ്ബിങ് നിർവഹിച്ചത്. ജോജുവിന്റെയും രമേശ് പിഷാരടിയുടെയും സംഭാഷണങ്ങൾ പലതും ചിത്രീകരണത്തിന് ശേഷം മാറ്റിയെഴുതിയതായി അനുഭവപെട്ടു. മുൻകാല രഞ്ജിത്ത് ശങ്കർ സിനിമകൾ പ്രതീക്ഷിച്ചു പോകുന്നവർക്ക് നിരാശയാകും ഈ സിനിമ സമ്മാനിക്കുന്നത്.

സാങ്കേതികം: ⭐⭐⭐
മധു നീലകണ്ഠന്റെ അത്യുഗ്രൻ ഛായാഗ്രഹണമാണ് ഏദൻതോട്ടത്തിന്റെ ജീവൻ നിലനിർത്തുന്നത്. ആദ്യപകുതിയിൽ ഏദൻതോട്ടത്തിന്റെ പച്ചപ്പ്‌ മുഴുവൻ ഒപ്പിയെടുക്കുവാനും, ഗൗരവമുള്ള ഒരു വിഷയത്തിലേക്കു കഥ സഞ്ചരിച്ചു തുടങ്ങിയപ്പോൾ റിയാലസ്റ്റിക്കായ ഒരു ഫീൽ നൽകുവാൻ മധു നീലകണ്ഠന് സാധിച്ചു. രാമനും മാലിനിയും ഏദൻതോട്ടത്തിൽ കണ്ടുമുട്ടുന്ന രംഗങ്ങളെല്ലാം മികവാർന്ന രീതിയിൽ ചിത്രീകരിക്കുവാൻ മധു നീലകണ്ഠന് കഴിഞ്ഞു. സന്തോഷ് വർമ്മ എഴുതി ബിജിബാൽ ഈണമിട്ട പാട്ടുകളും ശ്രവ്യസുന്ദരമായിരുന്നു. ശ്രേയ ഘോഷാൽ പാടിയ കാടിന്റെ എന്ന തുടങ്ങുന്ന ഗാനത്തിന്റെ വരികളും സംഗീതവും മികവുറ്റതായിരുന്നു. സിനിമയുടെ വേഗതക്കു അനുസരിച്ചുള്ള പശ്ചാത്തല സംഗീതം നൽകുവാൻ ബിജിബാലിന് കഴിഞ്ഞു. പറയാതെ പറയുന്ന പ്രണയത്തിനു അനുസരിച്ചുള്ള പശ്ചാത്തല സംഗീതം ചിട്ടപ്പെടുത്തുവാൻ ബിജിബാലിന് സാധിച്ചില്ല. വി. സാജന്റെ സന്നിവേശം കഥയുടെ ഒഴിക്കിനനുസരിച്ചുള്ളതായിരുന്നു. കഥയിൽ അനിവാര്യമല്ലാത്ത രംഗങ്ങളോ കഥാപാത്രങ്ങളോ ഈ സിനിമയിലില്ല. അജയ് മാങ്ങാടിന്റെ കലാസംവിധാനത്തിൽ ഏദൻതോട്ടം ഗംഭീരമായി. കുതിരയും നായകുട്ടികളും അന്തേവാസികളായതും മികവുപുലർത്തി. കാടിന്റെ ദൃശ്യഭംഗി വിഷ്വൽസിൽ കണ്ടെങ്കിലും കാട്ടിലെ പക്ഷികളുടെയോ മറ്റു ജീവജാലങ്ങളുടെയോ ശബ്ദങ്ങൾ ഉപയോഗപ്പെടുത്താൻ തപസ് നായകിനായില്ല. അരുൺ മനോഹറിന്റെ വസ്ത്രാലങ്കാരവും ശ്രീജിത്തിന്റെ ചമയവും അനു സിത്താരയെ ശാലീനതയുള്ള ഒരാളായി മാറ്റുന്നതിൽ സഹായിച്ചിട്ടുണ്ട്.

അഭിനയം: ⭐⭐⭐⭐
കുഞ്ചാക്കോ ബോബൻ, അനു സിത്താര, ജോജു ജോർജ്ജ്, രമേശ് പിഷാരടി, അജു വർഗീസ്, ശ്രീജിത്ത് രവി, ഗോപാലൻ, മുത്തുമണി എന്നിവരാണ് ഏദൻതോട്ടത്തിലെ അഭിനേതാക്കൾ. മാലിനിയായി മിതത്വമാർന്ന അഭിനയം കാഴ്ചവെച്ചുകൊണ്ട് അനു സിത്താര ഏവരുടെയും പ്രിയ നായികയായി മാറി. ഒരുപാടു വ്യത്യസ്ത മാനസിക ബുദ്ധിമുട്ടുകൾ അവതരിപ്പിക്കേണ്ട രംഗങ്ങളിൽ അമിതാഭിനയം കാഴ്ചവെയ്ക്കാതെ മാലിനിയെ അവതരിപ്പിച്ചു കയ്യടി നേടി. ചാക്കോച്ചനു ലഭിച്ച അഭിനയ സാധ്യതയുള്ള ഒരു വേഷമായിരുന്നു രാമൻ. രാമന്റെ സങ്കടവും ഒറ്റപ്പെടലും നിസ്സഹയാവസ്ഥയും പ്രണയവുമെല്ലാം മികവോടെ അവതരിപ്പിക്കുവാൻ കുഞ്ചാക്കോ ബോബന് സാധിച്ചു. എല്ലാത്തരം വേഷങ്ങളും തനിക്കുചേരും എന്ന് ജോജു ജോർജ്ജ് തെളിയിച്ചു. കഥാപാത്രത്തിന് ശബ്ദം നൽകിയപ്പോഴുള്ള അശ്രദ്ധ ഒഴിച്ച് നിർത്തിയാൽ മറ്റൊരു കുറവും ജോജുവിന്റെ അഭിനയത്തിനില്ല. ഹാസ്യരസ സംഭാഷണങ്ങളിലൂടെ രമേശ് പിഷാരടി വർമ്മാജി എന്ന കഥാപാത്രത്തെ ഗംഭീരമാക്കി. ശ്രീജിത്ത് രവിയും മുത്തുമണിയും അജു വർഗീസും ഗോപാലനും അവരവരുടെ രംഗങ്ങൾ മോശമാക്കാതെ അവതരിപ്പിച്ചു.

വാൽക്കഷ്ണം: ബന്ധങ്ങളുടെയും ബന്ധനങ്ങളുടെയും ഏദൻതോട്ടത്തിലെ കാഴ്ച്ചകൾ കുടുംബത്തോടൊപ്പം ഒരുവട്ടം കണ്ടിരിക്കാം!

രചന, സംവിധാനം: രഞ്ജിത്ത് ശങ്കർ
നിർമ്മാണം: ഡ്രീംസ് ആൻഡ് ബിയോണ്ട്
ഛായാഗ്രഹണം: മധു നീലകണ്ഠൻ
ചിത്രസന്നിവേശം: വി. സാജൻ
ഗാനരചന: സന്തോഷ് വർമ്മ
സംഗീതം: ബിജിബാൽ
കലാസംവിധാനം: അജയ് മങ്ങാട്
ശബ്ദസംവിധാനം: തപസ് നായക്
ചമയം: ശ്രീജിത്ത് ഗുരുവായൂർ
വസ്ത്രാലങ്കാരം: അരുൺ മനോഹർ
വിതരണം: സെൻട്രൽ പിക്ചേഴ്സ്.

ടേക്ക് ഓഫ് – ⭐⭐⭐⭐


മലയാള സിനിമയുടെ അത്യുജ്വല ടേക്ക് ഓഫ്! – ⭐⭐⭐⭐

“ഒരു ജീവൻ രക്ഷിക്കുന്നവരെ ഹീറോ എന്നാണ് വിശേഷിപ്പിക്കുന്നതെങ്കിൽ, നൂറുകണക്കിന് ജീവൻ രക്ഷിക്കുന്നവരെ നേഴ്‌സുമാർ എന്ന് വിശേഷിപ്പിക്കാം”. നൂറു ശതമാനം അർത്ഥവത്താകുന്നതാണ് മേല്പറഞ്ഞ വാചകങ്ങൾ. ദൈവത്തിന്റെ മാലാഖാമാർക്കു സമർപ്പിക്കുന്ന ടേക്ക് ഓഫ് ഓരോ മലയാളികളും അതിലുപരി ഓരോ സിനിമാ പ്രേമിയും കണ്ടിരിക്കേണ്ടതാണ്!

2014 ജൂലൈ 23നു 58 ഇന്ത്യക്കാരായ നേഴ്‌സുമാരെ ഇറാഖ് കേന്ദ്രികരിച്ചു പ്രവർത്തിക്കുന്ന തീവ്രവാദ സംഘടനയായ ഐ എസ് ഐ എസ് തീവ്രവാദികളിൽ നിന്നും മോചിപ്പിച്ചു. ഈ സംഭവം നടക്കുന്നതിനു ദിവസങ്ങൾക്കു മുമ്പ് 2014 ജൂലൈ 4നു 46 മലയാളി നേഴ്‌സുമാരെ ഇറാഖിലെ മുസോളിലെ സുന്നി ജിഹാദിസ്റ്റ് തീവ്രവാദികളിൽ നിന്നും രക്ഷപെടുത്തിയിരുന്നു. ശ്രിമതി സുഷമ സ്വരാജിന്റെ നേതൃത്വത്തിൽ സൗദി അറേബ്യ, ലിബിയ എന്നീ രാജ്യങ്ങളുടെ സഹായത്തോടെ തിക്രിതി ആശുപത്രിയിൽ ജോലിചെയ്തിരുന്ന നഴ്സുമാരെ രക്ഷപ്പെടുത്തിയ യഥാർത്ഥ സംഭവത്തിന്റെ ചലച്ചിത്ര ആവിഷ്കാരമാണ് ടേക്ക് ഓഫ്.

ട്രാഫിക് എന്ന സിനിമയിലൂടെ മലയാള സിനിമയ്ക്ക് പുതിയമാനം നൽകിയ യശ്ശശരീരനായ സംവിധായകൻ രാജേഷ് പിള്ളയുടെ ഓർമ്മയ്ക്ക്‌ മുമ്പിൽ സമർപ്പിച്ച ടേക്ക് ഓഫ് നിർമ്മിച്ചത് ആന്റോ ജോസഫും ഷെബിൻ ബെക്കറും ചേർന്നാണ്. പ്രശസ്ത ചിത്രസന്നിവേശകൻ മഹേഷ് നാരായണൻ ആദ്യമായി തിരക്കഥ എഴുതി സംവിധാനം നിർവഹിച്ച ടേക്ക് ഓഫ് മലയാള സിനിമയുടെ അഭിമാനമായി മാറുമെന്നു നൂറു ശതമാനം ഉറപ്പ്. മഹേഷ് നാരായണനോടൊപ്പം ഷാജികുമാറും ഈ സിനിമയുടെ തിരക്കഥ എഴുത്തിൽ പങ്കാളിയാണ്. സനു ജോൺ വർഗീസ് ഛായാഗ്രഹണവും, മഹേഷ് നാരായണനും അഭിലാഷ് ബാലചന്ദ്രനും ചേർന്ന് സന്നിവേശവും, ഗോപി സുന്ദർ പശ്ചാത്തല സംഗീതവും, രാജശേഖർ സംഘട്ടനവും സന്തോഷ് രാമൻ കലാസംവിധാനവും രഞ്ജിത്ത് അമ്പാടി ചമയവും നിർവഹിച്ചിരിക്കുന്നു.

പ്രമേയം: ⭐⭐⭐⭐
ഇറാഖിലെ തീവ്രവാദികളിൽ നിന്നും മലയാളികളായ നേഴ്‌സുമാരെ മോചിപ്പിക്കുന്ന യഥാർത്ഥ സംഭവം ഇന്ത്യൻ സിനിമയിലെ ഒരു ഭാഷയിലും ഇന്നേവരെ പ്രമേയമാക്കാത്ത ഒന്നാണ്. 2016ൽ രാജകൃഷ്ണൻ മേനോൻ സംവിധാനം നിർവഹിച്ചു, അക്ഷയ്കുമാർ കേന്ദ്ര കഥാപാത്രത്തെ അവതരിപ്പിച്ച എയർലിഫ്റ്റ് എന്ന ഹിന്ദി സിനിമ ചർച്ചചെയ്യുന്ന പ്രമേയം ടേക്ക് ഓഫുമായി സമാനമായ ഒന്നാണ്. കുവൈറ്റും ഇറാഖും തമ്മിലുള്ള തൊണ്ണൂറുകളിലെ യുദ്ധത്തിൽ അകപ്പെട്ടു പോകുന്ന ഭാരതീയരുടെ മോചനമാണ് എയർലിഫ്റ്റ് എന്ന സിനിമയുടെ കഥ. ടേക്ക് ഓഫിന്റെ പ്രമേയവും കഥയും മഹേഷ് നാരായണന്റേതാണ്. ഇറാഖിൽ നടന്ന യഥാർത്ഥ സംഭവങ്ങൾ അന്വേഷിച്ചു കണ്ടെത്തി സിനിമയ്ക്ക് അനിയോജ്യമായ കഥ വിശ്വസനീയത നഷ്ടപ്പെടാതെ എഴുതുക എന്നത് ശ്രമകരമായ ഒന്നാണ്. അതിൽ പൂർണമായും വിജയിക്കുവാൻ മഹേഷ് നാരായണനും പി.വി.ഷാജികുമാറിനും സാധിച്ചു.

തിരക്കഥ: ⭐⭐⭐⭐⭐
യഥാർത്ഥ സംഭവകഥയുടെ വൈകാരികത നഷ്ടപ്പെട്ട് പോകാതെയും വിശ്വസനീയത കളയാതെയും കഥാസന്ദർഭങ്ങൾ സൃഷ്ടിക്കുക സംഭാഷണങ്ങൾ എഴുതുക എന്നതിൽ സമ്പൂർണ വിജയം നേടുവാൻ മഹേഷ് നാരായണനും പി.വി.ഷാജികുമാറിനും കഴിഞ്ഞിട്ടുണ്ട്. ആദ്യ രംഗം മുതൽ അവസാനത്തെ വിമാനത്തിന്റെ ടേക്ക് ഓഫ് വരെ പ്രേക്ഷകരെ മാനസികമായി വീർപ്പുമുട്ടിക്കാൻ കഥാസന്ദർഭങ്ങൾക്കു സാധിച്ചു. സിനിമ കാണുന്ന പ്രേക്ഷകർക്ക് പരിചിതമല്ലാത്ത ഒരു പശ്ചാത്തലമാണ് ഈ സിനിമയുടേത്. അപ്പോൾ, കഥാസന്ദർഭങ്ങൾക്കു വിശ്വസനീയത നൽക്കേണ്ടത് ഏറെ പ്രയാസമുള്ള കാര്യമാണ്. ഒരുപാട് ഗവേഷണം നടത്തിയതിന്റെ തെളിവ് കഥാസന്ദർഭങ്ങളിൽ പ്രകടമാണ്. സമീറയും മറ്റു നേഴ്‌സുമാരും തീവ്രവാദികളുടെ ക്യാമ്പിൽ എത്തിപെടുന്ന രംഗവും, അവരെ അവിടെ നിന്ന് മോചിപ്പിക്കുന്നതിന് വേണ്ടി മനോജ് എബ്രഹാമും സംഘവും നടത്തുന്ന ശ്രമങ്ങളും അത്യുഗ്രൻ കഥാസന്ദർഭങ്ങളിലൂടെ ഈ സിനിമയിൽ അവതരിപ്പിച്ചിട്ടുണ്ട്. നേഴ്‌സുമാരുടെയും ഇറാഖിലുള്ള സാധാരണക്കാരുടെ ദുരവസ്ഥയും കാണുന്ന പ്രേക്ഷകരുടെ ഹൃദയത്തിൽ നൊമ്പരമുണർത്തുവാൻ തിരക്കഥാകൃത്തുക്കൾക്കു കഴിഞ്ഞു എന്നതാണ് ടേക്ക് ഓഫിന്റെ പ്രത്യേകത. മലയാള സിനിമ പ്രേമികൾക്ക് ഒരു അത്യുജ്വല സിനിമ സമ്മാനിച്ചതിനു മഹേഷ് നാരായണനും പി.വി.ഷാജികുമാറിനും ഒരാരായിരം അഭിനന്ദനങ്ങൾ!

സംവിധാനം: ⭐⭐⭐⭐
ചിത്രസന്നിവേശകൻ എന്ന നിലയിൽ തന്റെ കഴിവ് തെളിയിച്ച വ്യക്തിയാണ് മഹേഷ് നാരായണൻ. ആദ്യ സിനിമയാണ് ടേക്ക് ഓഫ് എന്ന തോന്നലുണ്ടാക്കാതെയാണ് മഹേഷ് നാരായണൻ സംവിധാനം ചെയ്തിരിക്കുന്നത്. യഥാർത്ഥ സംഭവങ്ങൾ കൃത്രിമത്വം ഇല്ലാതെയും അതിഭാവകത്വം തോന്നിപ്പിക്കാതെയും അവതരിപ്പിച്ചതാണ് സിനിമയ്ക്ക് ഗുണം ചെയ്തത്. കഥയിൽ പ്രാധാന്യമില്ലാത്ത ഒരൊറ്റ രംഗം പോലും ഈ സിനിമയിലില്ല. പ്രേക്ഷകരെ ആകാംഷയോടെ മുൾമുനയിൽ നിർത്തുവാൻ സംവിധായകനു സാധിച്ചു. അതിനു കാരണമായത് സിനിമയുടെ രണ്ടാം പകുതിയിലുള്ള കഥയുടെ വേഗതയുള്ള അവതരണമാണ്. നേഴ്‌സുമാരെ രക്ഷപ്പെടുത്തുവാൻ ശ്രമിക്കുന്നതു മുതൽ അവർ സുരക്ഷിതരായി ഇന്ത്യയിലെത്തുന്നതു വരെയുള്ള രംഗങ്ങൾ അവതരണ മികവിനാൽ ഗംഭീരമാണ്. ഇത്രയും മികവുറ്റ ഒരു സിനിമയുണ്ടാക്കുവാൻ മഹേഷ് നാരായണനെ സഹായിച്ചത് മികച്ച സാങ്കേതിക പ്രവർത്തികരും അഭിനേതാക്കളാണ്. മികച്ച സിനിമയ്ക്കുള്ള ദേശീയ ചലച്ചിത്ര അവാർഡും സംസ്ഥാന ചലച്ചിത്ര അവാർഡും ലഭിക്കുവാൻ വരെ സാധ്യതയുള്ള ഒന്നാണ് ടേക്ക് ഓഫ് എന്നതിൽ യാതൊരു തർക്കവുമില്ല. ഏവർക്കും അഭിനന്ദനങ്ങൾ!

സാങ്കേതികം: ⭐⭐⭐⭐⭐
ഗോപി സുന്ദർ എന്ന സംഗീത മാന്ത്രികൻ നിർവഹിച്ച പശ്ചാത്തല സംഗീതമാണ് ടേക്ക് ഓഫിനെ മറ്റൊരു തലത്തിലേക്ക് ഉയർത്തിയത്. പ്രേക്ഷകരെ ആകാംഷയുടെ മുൾമുനയിൽ നിർത്തുന്ന പശ്ചാത്തല സംഗീതം സിനിമയുടെ അവസാനം വരെ പ്രേക്ഷകരുടെ നെഞ്ചിടിപ്പ് കൂട്ടി. അതുപോലെ മികവുറ്റതായിരുന്നു സനു ജോൺ വർഗീസ് നിർവഹിച്ച ഛായാഗ്രഹണം. പ്രേക്ഷകരെ ഓരോരുത്തരെയും ഇറാഖിലെത്തിച്ചു അവർ നേരിട്ട് ആ ദുരിതം അനുഭവിച്ചറിഞ്ഞ പ്രതീതിയാണ് സമ്മാനിച്ചത്. പുതുമ നൽകുന്ന രീതിയിലാണ് മഹേഷ് നാരായണനും അഭിലാഷും ചേർന്ന് രംഗങ്ങൾ സന്നിവേശം ചെയ്തത്. പല സ്ഥലങ്ങളിലായി നടക്കുന്ന രംഗങ്ങൾ മുഷിപ്പില്ലാതെ സന്നിവേശം നിർവഹിച്ചതു പ്രേക്ഷകർക്ക് പുത്തനനുഭവമായി. യുദ്ധ ഭൂമിയുടെ പ്രതീതി നിലനിർത്തുവാൻ സന്തോഷ് രാമൻ ഒരുക്കിയ കലാസംവിധാനം ഗംഭീരമായി. ബോംബ് സ്ഫോടനങ്ങൾ നടന്ന സ്ഥലങ്ങളെല്ലാം യഥാർത്ഥത്തിൽ സ്ഫോടനങ്ങൾ നടന്നതാണോ എന്നുവരെ സംശയം തോന്നിയേക്കാം. ഓരോ കഥാപാത്രങ്ങൾക്കും അനിയോജ്യമായ ചമയമാണ് രഞ്ജിത്ത് അമ്പാടി നിർവഹിച്ചത്. ബോംബ് സ്ഫോടനങ്ങളിൽ അപകടം പറ്റിയവരുടെ ചമയം ഇതിനുദാഹരണം. റഫീഖ് അഹമ്മദും ഹരിനാരായണനും ചേർന്നെഴുതിയ വരികൾക്ക് ഷാൻ റഹ്‌മാനും ഗോപി സുന്ദറുമാണ് ഈണം പകർന്നത്. ശരാശരി നിലവാരം മാത്രമുള്ളതാണ് ഈ സിനിമയിലെ പാട്ടുകൾ. രാജശേഖർ ആണ് സംഘട്ടന സംവിധാനം നിർവഹിച്ചത്. ചെറിയ ശബ്ദങ്ങൾ വരെ ഒപ്പിയെടുത്തുകൊണ്ടു വിഷ്ണു ഗോവിന്ദും ശ്രീ ശങ്കറും നിർവഹിച്ച ശബ്ദ സംവിധാനം മികവ് പുലർത്തി. ധന്യ ബാലകൃഷ്ണന്റെ വസ്ത്രാലങ്കാരം കഥാപാത്രങ്ങൾക്ക് അനിയോജ്യമായിരുന്നു.

അഭിനയം: ⭐⭐⭐⭐
കാഞ്ചനമാലയായും ടെസ്സയായും തകർത്തഭിനയിച്ച പാർവതി തിരുവോത്തിന്റെ അഭിനയ ജീവിതത്തിലേക്ക് പുതിയ പൊൻത്തൂവലാകും സമീറ എന്ന കഥാപാത്രം. ശാരദയ്ക്കും ശോഭനയ്ക്കും മഞ്ജു വാര്യർക്കും ശേഷം മലയാളികളുടെ മനസ്സ് കവർന്ന അഭിനേത്രിയാരാകുമെന്നത്തിനുള്ള ഉത്തരമാണ് പാർവതി തിരുവോത്ത്. മികച്ച നടിക്കുള്ള സംസ്ഥാന ചലച്ചിത്ര അവാർഡ് നേടാനുള്ള എല്ലാ സാധ്യതകളും പാർവതിയ്ക്കുണ്ടെന്നു നിസംശയം പറയാം. മഹേഷ് ഭാവനയെ പ്രേക്ഷകർ മറക്കുന്നതിനു മുമ്പേ മനോജ് അബ്രാഹമായി ജീവിച്ച ഫഹദ് ഫാസിൽ ഗംഭീരമായ അഭിനയമാണ് കാഴ്ചവെച്ചത്. ഫഹദിന്റെ ഓരോ ഭാവപ്രകടനങ്ങളും കൈയടിയോടെയാണ് പ്രേക്ഷകർ സ്വീകരിച്ചത്. സത്യനും മോഹൻലാലിനും ശേഷം തന്മയത്വത്തോടെ കഥാപാത്രങ്ങളെ അവതരിപ്പിക്കുവാനുള്ള കഴിവുള്ള ഏക നടനാണ് താനെന്നു ഫഹദ് ഫാസിൽ ഒരിക്കൽക്കൂടി തെളിയിച്ചു. കുഞ്ചാക്കോ ബോബന് ഒരുപാട് നാളുകൾക്കു ലഭിച്ച മികച്ച വേഷങ്ങളിൽ ഒന്നാണ് ഈ സിനിമയിലേത്. അത് വിശ്വസനീയമായി ചാക്കോച്ചൻ അവതരിപ്പിക്കുകയും ചെയ്തു. ആസിഫ് അലി, പ്രകാശ് ബെലവാദി, അലൻസിയാർ ലേ ലോപസ്, പ്രേം പ്രകാശ്, ജോജു ജോർജ്, ഷഹീൻ സിദ്ദിഖ്, സിദ്ധാർഥ് ശിവ, അഞ്ജലി അനീഷ്, പാർവതി, ദേവി അജിത് എന്നിവരാണ് ഈ സിനിമയിലെ മറ്റു പ്രധാന അഭിനേതാക്കൾ. ഇവരെ കൂടാതെ നേഴ്സുമാരായി അഭിനയിച്ച പുതുമുഖ അഭിനേതാക്കൾവരെ അഭിനയിക്കുന്നതിന് പകരം ജീവിക്കുകയാണെന്നാണ് പ്രേക്ഷകർക്ക് തോന്നിയത്.

വാൽക്കഷ്ണം: മലയാള സിനിമയുടെ യശസ്സ് അന്താരാഷ്ട്ര നിലവാരത്തിലേക്ക് ഉയർത്തിയ ടേക്ക് ഓഫിനു ഹാറ്റ്സ് ഓഫ്!!!

സംവിധാനം: മഹേഷ് നാരായണൻ
നിർമ്മാണം: ആന്റോ ജോസഫ്, ഷെബിൻ ബെക്കർ
രചന: മഹേഷ് നാരായണൻ, ഷാജികുമാർ
ഛായാഗ്രഹണം: സനു ജോൺ വർഗീസ്
ചിത്രസന്നിവേശം: മഹേഷ് നാരായണൻ, അഭിലാഷ് ബാലചന്ദ്രൻ
പശ്ചാത്തല സംഗീതം: ഗോപി സുന്ദർ
സംഗീതം: ഗോപി സുന്ദർ, ഷാൻ റഹ്മാൻ
ഗാനരചന: റഫീഖ് അഹമ്മദ്, ഹരിനാരായണൻ
കലാസംവിധാനം: സന്തോഷ് രാമൻ
ശബ്ദമിശ്രണം: രാജകൃഷ്ണൻ
ശബ്ദ സംവിധാനം: വിഷ്ണു ഗോവിന്ദ്, ശ്രീ ശങ്കർ
വസ്ത്രാലങ്കാരം: ധന്യ ബാലകൃഷ്ണൻ
ചമയം: രഞ്ജിത്ത് അമ്പാടി
സംഘട്ടനം: രാജശേഖർ
വിതരണം: ആന്റോ ജോസഫ് ഫിലിം കമ്പിനി.

കൊചൗവ്വ പൗലോ അയ്യപ്പ കൊയ്‌ലോ – ⭐⭐

പ്രചോദന പൗലോ ഇഴയുന്ന കൊയ്‌ലോ – ⭐⭐

“എന്തെങ്കിലും നേടിയെടുക്കണമെന്ന് ഒരാൾ പൂർണ്ണമനസ്സോടെ ആഗ്രഹിച്ചാൽ ആ ആഗ്രഹം സഫലമാക്കാൻ പ്രപഞ്ചം മുഴുവൻ സഹായത്തിനെത്തും”- പൗലോ കൊയ്‌ലോ, നോവലിസ്റ്റ്, ബ്രസീൽ.

വിശ്വപ്രസിദ്ധ നോവലിസ്റ്റും ഗാന രചയിതാവുമായ പൗലോ കൊയ്‌ലോയുടെ സിദ്ധാന്തമാണ് ഉദയ പിക്ചേഴ്സിന്റെ തിരിച്ചുവരവിന് കാരണമായ സിനിമ കൊചൗവ്വ പൗലോ അയ്യപ്പ കൊയ്‌ലോയുടെ പ്രമേയം. ദേശീയ പുരസ്‌കാര ജേതാവും നടനുമായ സിദ്ധാർത്ഥ് ശിവയാണ് ഈ സിനിമയുടെ രചനയും സംവിധാനവും നിർവഹിച്ചിരിക്കുന്നത്. മലയാള സിനിമയിലെ എക്കാലത്തെയും മികച്ച ബാനറുകളിൽ ഒന്നായ ഉദയ പിക്ചേഴ്സിന്റെ പുതിയ സാരഥി കുഞ്ചാക്കോ ബോബനാണ് ഈ സിനിമയുടെ നിർമ്മാതാവ്.

പ്രമേയം: ⭐⭐⭐
സ്വപ്നം കാണണമെന്നും അത് യാഥാർഥ്യമാക്കാൻ പ്രയത്നിക്കണമെന്നും പ്രമേയമാക്കിയിട്ടുള്ള ഒട്ടനവധി സിനിമകൾ മലയാളത്തിൽ അവതരിപ്പിച്ചിട്ടുണ്ട്. ഒരാൾ ഒന്നിനെ തീവ്രമായി ആഗ്രഹിച്ചിട്ടുണ്ടെങ്കിൽ അത് സഫലീകരിക്കുവാൻ പ്രപഞ്ചം മുഴുവൻ സഹായത്തിനെത്തും എന്ന ഈ സിനിമയുടെ പ്രമേയവും ഇന്ത്യയിലെ പല ഭാഷകളിലെ സിനിമകളിൽ അവതരിപ്പിച്ചിട്ടുള്ളതാണ്. മേല്പറഞ്ഞ പ്രമേയം കേരളത്തിലെ ഒരു ഗ്രാമത്തിൽ നടക്കുന്ന കഥയുടെ രൂപത്തിൽ അവതരിപ്പിച്ചിരിക്കുകയാണ് സിദ്ധാർത്ഥ ശിവ. അയ്യപ്പ ദാസ്‌ എന്ന 10 വയസ്സുകാരന്റെ സ്വപ്നം സാക്ഷാത്കരിക്കുവാൻ അജയകുമാർ എന്നയാൾ നടത്തുന്ന പരിശ്രമമാണ് കൊചൗവ്വ പൗലോ അയ്യപ്പ കൊയ്‌ലോ എന്ന സിനിമയുടെ കഥ.

തിരക്കഥ: ⭐
നൂറ്റിയൊന്ന് ചോദ്യങ്ങൾ, ഐൻ എന്നീ സിനിമകൾക്ക്‌ ശേഷം സിദ്ധാർത്ഥ ശിവ കഥയും തിരക്കഥയും സംഭാഷണങ്ങളും എഴുതുന്ന സിനിമയാണിത്. കുട്ടികൾക്കും മുതിർന്നവർക്കും ഒരുപോലെ പ്രജോദനമാകുന്ന ഒരു പ്രമേയത്തെ പരിചിതമായ കഥാന്തരീക്ഷത്തിലൂടെ പ്രവചിക്കാനാവുന്ന കഥാസന്ദർഭങ്ങളിലൂടെ ഉപദേശങ്ങളുള്ള സംഭാഷണങ്ങളിലൂടെ തിരക്കഥയിലാക്കിയിരിക്കുന്നു. സിനിമയുടെ ആദ്യപകുതി പറയുന്നത് അജയകുമാർ എന്ന കൊചൗവ്വയുടെയും അയ്യപ്പദാസ് എന്ന അപ്പുവിന്റെയും ജീവിതത്തിലെ ചുറ്റുപാടുകളും അവരുടെ ദിനചര്യകളും സ്വപ്നങ്ങളും മറ്റുമാണ്. അപ്പുവിന്റെ സ്വപ്നം കൊചൗവ്വ തിരിച്ചറിയുകയും അതിനു വേണ്ടി പരിശ്രമിക്കാൻ തയ്യാറെടുക്കുകയും ചെയ്യുന്നിത്തടതാണ് ആദ്യ പകുതി അവസാനിക്കുന്നത്. കുട്ടികൾക്ക് എളുപ്പത്തിൽ മനസ്സിലാക്കുവാൻ വേണ്ടിയാണോ കഥയിലെ ഓരോ പ്രധാനപെട്ട രംഗങ്ങളും വിശദീകരിച്ചു തിരക്കഥയിൽ ഉൾപ്പെടുത്തിയിരിക്കുന്നത് എന്ന് തോന്നുന്നു. പൗലോ കൊയ്‌ലോയുടെ സിദ്ധാന്തം ഇടയ്ക്കിടെ പറഞ്ഞു പറഞ്ഞു പോകുന്നതും കുട്ടികളുടെ മനസ്സിൽ അവ ആഴത്തിൽ പതിയാനാണെന്നു കരുതാം. അത്തരത്തിലുള്ള തിരക്കഥ രചന ശൈലി മുതിർന്നവർക്ക് ആസ്വാദ്യകരമായിരുന്നില്ല. ഓരോ ചെറിയ വസ്തുതകൾ പോലും പലതവണ കഥാസന്ദർഭങ്ങളാകുന്നു എന്നിടത്താണ് ഈ തിരക്കഥ പരാജയപ്പെടുന്നത്. ഇന്നത്തെ തലമുറയിലെ കുട്ടികൾക്ക് സ്പൂൺ ഫീഡിംഗ് രീതിയിലുള്ള കഥ വിവരണ ശൈലി ആവശ്യമുണ്ടായിരുന്നോ എന്ന് സിദ്ധാർത്ഥ ശിവ ചിന്തിക്കേണ്ടതായിരുന്നു. എന്നിരുന്നാലും, മികച്ചൊരു പ്രമേയം സിനിമയാക്കുവാൻ അദ്ദേഹം കാണിച്ച മനസ്സിന് അഭിനന്ദനങ്ങൾ!

സംവിധാനം: ⭐⭐
സംസ്ഥാന-ദേശീയ പുരസ്കാരങ്ങൾ നേടിയ ആദ്യ രണ്ടു സിനിമകളും ഒരു വിഭാഗം പ്രേക്ഷകരെ മാത്രം ലക്ഷ്യംവെച്ചാണ് പ്രദർശനശാലകളിൽ എത്തിയത്. അവയൊന്നും സാമ്പത്തിക ലാഭം നേടിയ സിനിമകളല്ല. കൊചൗവ്വ പൗലോ അയ്യപ്പ കൊയ്‌ലോ എന്ന സിനിമ തികച്ചും ഒരു എന്റർറ്റെയിനർ എന്ന നിലയിലാണ് അദ്ദേഹം സംവിധാനം ചെയ്തിരിക്കുന്നത്. സിനിമയുടെ ആദ്യാവസാനം ഹാസ്യത്തിന്റെ മേമ്പൊടിയോടെയാണ് ഒട്ടുമിക്ക രംഗങ്ങളും അവതരിപ്പിച്ചിരിക്കുന്നത്. ആദ്യ പകുതിയിൽ നാല് പാട്ടുകളിലൂടെയാണ് കഥ വികസിക്കുന്നത്. ഇവയൊക്കെ പ്രേക്ഷകരെ രസിപ്പിക്കുന്നതിലൂടെ കഥ പറഞ്ഞുപോവുക എന്ന ഉദ്ദേശത്തോടെയാണ് സിനിമയിൽ ഉൾപ്പെടുത്തിയത്. മേല്പറഞ്ഞ കഥാസന്ദർഭങ്ങൾ ഓരോന്നും പ്രവചിക്കാനാവുന്നതും മുമ്പ് കണ്ടിട്ടുള്ളതുമാണെങ്കിലും അവയൊന്നും പ്രേക്ഷകരെ മുഷിപ്പിക്കുന്നില്ല. അതിനു കാരണം സിദ്ധാർത്ഥ ശിവയുടെ സംവിധാന രീതിയാണ്. എന്നിരുന്നാലും ഒരു കൊച്ചു കഥയെ വലിച്ചുനീട്ടി രണ്ടരമണിക്കൂർ ദൈർഘ്യത്തിൽ അവതരിപ്പിക്കേണ്ട ആവശ്യകത ഉണ്ടായിരുന്നില്ല. ഹാസ്യത്തിന് വേണ്ടി കെട്ടിച്ചമച്ച കുറെ കഥാപാത്രങ്ങളും രംഗങ്ങളും സിനിമയ്ക്ക് ഗുണം ചെയ്തില്ല. സിദ്ധാർത്ഥ ശിവ സംവിധാനം ചെയ്ത ആദ്യ രണ്ടു സിനിമകളെ അപേക്ഷിച്ച് ഒരല്പം നിരാശപ്പെടുത്തുന്ന ഒന്നാണ് ഈ സിനിമ.

സാങ്കേതികം: ⭐⭐⭐
അടിമാലിയും പരിസര പ്രദേശങ്ങളും മനോഹരമായി ഒപ്പിയെടുത്ത് കണ്ണിനു കുളിർമയുള്ള വിരുന്നൊരുക്കിയ നീൽ ഡി കൂഞ്ഞ പ്രശംസ അർഹിക്കുന്നു. ഓരോ ഫ്രേയിമും ഇതുവരെ കാണാത്ത ഇടുക്കിയെ കാണിച്ചുതന്നു. നീലക്കണ്ണുള്ള മാനെ എന്ന് തുടങ്ങുന്ന പാട്ടിന്റെ ദൃശ്യങ്ങളും മികവുറ്റതായിരുന്നു. ഷാൻ റഹ്മാൻ ഈണമിട്ട പാട്ടുകളിൽ നീലക്കണ്ണുള്ള മാനെ പ്രേക്ഷക ശ്രദ്ധ പിടിച്ചുപറ്റുന്നു. സൂരജ് എസ്.കുറുപ്പ് ഈണമിട്ട പാട്ടുകളും ഈ സിനിമയിലുണ്ട്. ബിജിബാലിന്റെ വകയാണ് പശ്ചാത്തല സംഗീതം. പ്രത്യേകിച്ചു പുതുമകളൊന്നുമില്ലാതെ രംഗങ്ങളോട് ഇഴുകിച്ചേർന്നു നിൽക്കുന്നു. ഹസ്സൻ വണ്ടൂരിന്റെ ചമയം മികവു പുലർത്തി. അയ്യപ്പ ദാസിന് ചിക്കൻ പോക്സ് പിടിപെട്ടു മുഖത്തും ദേഹത്തും പാടുകൾ വന്നതൊക്കെ വിശ്വസനീയമായിരുന്നു. സമീറ സനീഷ് ആണ് വസ്ത്രാലങ്കാരം.

അഭിനയം: ⭐⭐⭐
നടൻ സുധീഷിന്റെ മകൻ രുദ്രാക്ഷ് ആണ് ഈ സിനിമയിലെ കേന്ദ്ര കഥാപാത്രമായ അയ്യപ്പ ദാസിനെ അവതരിപ്പിച്ചത്. കൊചൗവ്വയായി കുഞ്ചാക്കോ ബോബനും ടൈറ്റിൽ റോളിൽ അഭിനയിച്ചിരിക്കുന്നു. അയ്യപ്പദാസ് എന്ന കഥാപാത്രത്തെ മികച്ച രീതിയിൽ അഭിനയിച്ചു കയ്യടി നേടുവാൻ രുദ്രാക്ഷിനു സാധിച്ചു. ഈ വർഷത്തെ മികച്ച ബാലതാരത്തിനുള്ള അംഗീകാരം ആ കൊച്ചുമിടുക്കനു ലഭിക്കുമെന്ന് ഉറപ്പാണ്. കുഞ്ചാക്കോ ബോബൻ തനതായ ശൈലിയിൽ കൊചൗവ്വയായി അഭിനയിച്ചു. ഇവരെ കൂടാതെ മുകേഷ്, നെടുമുടി വേണു, അജു വർഗീസ്‌, സുരാജ് വെഞ്ഞാറമൂട്, മണിയൻപിള്ള രാജു, സുധീഷ്, മുസ്തഫ, ഇർഷാദ്, മിഥുൻ രമേശ്‌, അനുശ്രീ നായർ, കെ.പി.എ.സി.ലളിത, മുത്തുമണി എന്നിവരും ഈ സിനിമയിലെ പ്രധാന കഥാപാത്രങ്ങളെ അവതരിപ്പിച്ചു.

വാൽക്കഷ്ണം: ആദ്യാവസാനം പ്രജോദനമാകുന്ന രംഗങ്ങളുടെ അകമ്പടിയോടെ പതിഞ്ഞ താളത്തിൽ ഇഴയുന്ന കുട്ടികളുടെ സിനിമ!

രചന, സംവിധാനം: സിദ്ധാർത്ഥ ശിവ
നിർമ്മാണം: കുഞ്ചാക്കോ ബോബൻ
ബാനർ: ഉദയ പിക്ചേഴ്സ്
ചായാഗ്രഹണം: നീൽ ഡി കൂഞ്ഞ
ചിത്രസന്നിവേശം: വിനീബ് കൃഷ്ണൻ
സംഗീതം: ഷാൻ റഹ്മാൻ, സൂരജ് എസ്.കുറുപ്പ്
കലാസംവിധാനം: ജ്യോതിഷ് ശങ്കർ
ചമയം: ഹസ്സൻ വണ്ടൂർ
വസ്ത്രാലങ്കാരം: സമീറ സനീഷ്
വിതരണം: ഉദയ ത്രു ആർ.ജെ. റിലീസ്.

ഷാജഹാനും പരീക്കുട്ടിയും – ⭐⭐

image

ഒന്നു ചിരിക്കാം പിന്നെ മറക്കാം! – ⭐⭐

ഗുലുമാലും ത്രീ കിംഗ്‌സും ഇഷ്ടപെടുന്ന പ്രേക്ഷകർക്ക്‌ തീർച്ചയായി കണ്ടു രസിക്കാവുന്ന സിനിമയാണ് ബോബൻ സാമുവലിന്റെ ഷാജഹാനും പരീക്കുട്ടിയും. മുംതാസിന്റെ ഓർമ്മക്കായി താജ് മഹൽ പണിതുയർത്തിയ മുഗൾ ചക്രവർത്തി ഷാജഹാനെയും, കറുത്തമ്മയെ നഷ്ടപെട്ട വേദനയിൽ കടപ്പുറത്തു പാടിയലഞ്ഞ പരീക്കുട്ടിയെയും അറിയാത്തവർ വിരളമാണ്. വിരഹ ദുഃഖം അനുഭവിച്ച ഇവരെപ്പോലെ രണ്ടുപേരാണ് പ്രണവും പ്രിൻസും. ഇവരുടെ കാമുകിയായ ജിയയുടെ ഓർമ്മ നഷ്ടപ്പെടുന്നു. ഓർമ്മ വീണ്ടെടുക്കുവാനുള്ള ജിയയുടെ ശ്രമങ്ങൾക്കിടയിൽ അവൾ പ്രണവിനെയും പ്രിൻസിനെയും പ്രണയിച്ചിരുന്നു എന്ന് മനസിലാകുന്നത്. തുടർന്ന് നടക്കുന്ന രസകരമായ സംഭവങ്ങളാണ് ഈ സിനിമയുടെ കഥ.

ജനപ്രിയൻ, റോമൻസ്, ഹാപ്പി ജേർണി എന്നീ സിനിമകൾക്ക്‌ ശേഷം ബോബൻ സാമുവൽ സംവിധാനം നിർവഹിച്ച ഈ സിനിമയിൽ കുഞ്ചാക്കോ ബോബനും ജയസൂര്യയും അമല പോളും പ്രധാന കഥാപാത്രങ്ങളെ അവതരിപ്പിച്ചിരിക്കുന്നു. റോമൻസിന്റെ തിരക്കഥ എഴുതിയ വൈ.വി.രാജേഷാണ് ഈ സിനിമയുടെ രചന നിർവഹിച്ചിരിക്കുന്നത്. ആഷിക് ഉസ്മാൻ നിർമ്മിച്ചിരിക്കുന്ന ഈ സിനിമ വിതരണം ചെയ്തത് സെൻട്രൽ പിക്ചേഴ്സ്സാണ്.

പ്രമേയം: ⭐⭐
നായികയുടെ ഓർമ്മ വീണ്ടെടുക്കുവാനായി അവളുടെ ഭൂതകാലം അന്വേഷിച്ചിറങ്ങുന്നു. അവൾ രണ്ടു വ്യക്തികളെ രണ്ടു സാഹചര്യത്തിൽ പ്രണയിച്ചിരുന്നു. ഇങ്ങനെ മുമ്പോട്ടു പോകുന്ന ആദ്യ പകുതി. രണ്ടാം പകുതിയിൽ കഥ മറ്റൊരു ദിശയിലേക്ക് ട്വിസ്റ്റുകളോടെ സഞ്ചരിക്കുന്നു. ആദ്യ പകുതിയിൽ കണ്ടതൊന്നുമല്ല യഥാർത്ഥ സംഭവങ്ങൾ. കഥാവസാനം കൺഫ്യുഷണുകളോടെ പ്രേക്ഷകർ കുറച്ചു ചിരിച്ചു എന്ന ആശ്വാസത്തോടെ മടങ്ങുന്നു. ഇതാണ് ബോബൻ സാമുവലിനേയും ആഷിക് ഉസ്മാനെയും ഈ സിനിമയിലേക്ക് ആകർഷിച്ച ഘടകം.

തിരക്കഥ: ⭐⭐
വൈ.വി.രാജേഷ്‌ കഥയും തിരക്കഥയും സംഭാഷണങ്ങളും എഴുതിയ ഷാജഹാനും പരീക്കുട്ടിയും അദ്ദേഹത്തിന്റെ മുൻകാല സിനിമകൾ പോലെ തന്നെ ഒരിക്കൽ കണ്ടു ചിരിച്ചു പിന്നെ മറക്കാവുന്ന അതെ രീതിയിലാണ്. ഒരു എന്റർറ്റെയിനർ സിനിമയ്ക്ക് വേണ്ട എല്ലാ ഘടഗങ്ങളും കൃത്യമായി ഉൾകൊള്ളിച്ചുകൊണ്ടാണ് ഈ സിനിമയുടെ തിരക്കഥ എഴുതിയിരിക്കുന്നത്. ആദ്യ പകുതി കാണുമ്പോൾ ഇതൊരു ത്രികോണ പ്രണയകഥയാണോ എന്ന് തോന്നുകയും രണ്ടാം പകുതിയിൽ കഥ മറ്റൊരു രീതിയിൽ ചെന്നെത്തുകയും ചെയ്യുന്നുണ്ട്. അജു വർഗീസിന്റെ കഥാപാത്രവും സുരാജിന്റെ കഥാപാത്രവും രസകരമായാണ് തിരക്കഥയിൽ ഉൾപ്പെടുത്തിയത്. സംഭാഷണങ്ങളിലെ കോമഡിക്ക് വേണ്ടി പറയിപ്പിച്ച വളിപ്പുകൾ സിനിമയിലുടനീളമുണ്ട്. എന്നിരുന്നാലും ആസ്വാദനത്തിനു വേണ്ടി മാത്രം എഴുതിയിരിക്കുന്ന തിരക്കഥയും സംഭാഷണങ്ങളുമായതുകൊണ്ട് പ്രേക്ഷകർ ക്ഷമിച്ചു കണ്ടിരിക്കുമെന്ന് തിരക്കഥ രചയ്താവിനും ബോധ്യമാണ്. ഇതുപോലുള്ള തട്ടിക്കൂട്ട് തിരക്കഥകൾ ഇനിയും എത്രകാലം സിനിമയാക്കും എന്ന് കണ്ടറിയണം.

സംവിധാനം: ⭐⭐⭐
ജയസൂര്യയ്ക്ക് ഏറെ പ്രശംസ നേടിക്കൊടുത്ത സിനിമകളിൽ ഒന്നാണ് ജനപ്രിയൻ. കുഞ്ചാക്കോ ബോബനും ബിജു മേനോനും തിളങ്ങിയ മികച്ച എന്റർറ്റെയിനറായിരുന്നു റോമൻസ്. അന്ധനായ ക്രിക്കറ്റ് പ്രേമിയുടെ കഥയും ജയസുര്യയുടെ അഭിനയമികവുംകൊണ്ട് ശ്രദ്ധനേടിയ സിനിമയായിരുന്നു ഹാപ്പി ജേർണി. ബോബൻ സാമുവലിന്റെ ഈ മൂന്ന് സിനിമകളുമായി താരതമ്യം ചെയ്യുമ്പോൾ ഷാജഹാനും പരീക്കുട്ടിയും വളരെ പിന്നിലാണ്. ട്വിസ്റ്റുകൾ നിന്ന് ട്വിസ്റ്റുകളിലേക്കു കഥ സഞ്ചരിക്കുമ്പോൾ ഇങ്ങനെയൊക്കെ സംഭവിക്കുമോ എന്നൊരു തോന്നൽ പ്രേക്ഷകരുടെ മനസിൽ സ്വാഭിവകമായും തോന്നും. അവിടെയാണ് സംവിധായകനെന്ന നിലയിൽ ബോബൻ സാമുവൽ പരാജയപെട്ടത്‌. എന്നിരുന്നാലും കുട്ടികളോടൊപ്പം കുടുംബത്തോടൊപ്പം കണ്ടു രസിക്കാനാവുന്ന സിനിമയാണ് ഷാജഹാനും പരീക്കുട്ടിയും.

സാങ്കേതികം: ⭐⭐⭐
അനീഷ്‌ ലാലാണ് ഷാജഹാനും പരീക്കുട്ടിയുടെയും ചായാഗ്രഹണം നിർവഹിച്ചത്. കളർഫുൾ വിഷ്വൽസിലൂടെ പ്രേക്ഷകരെ പിടിചിരുത്തുവാൻ സാധിക്കുന്നുണ്ട് ഓരോ രംഗങ്ങൾക്കും. പാട്ടുകളുടെ ചിത്രീകരണവും മികവു പുലർത്തി. ലിജോ പോളാണ് രംഗങ്ങളുടെ സന്നിവേശം നിർവഹിച്ചത്. ഏറെ ട്വിസ്റ്റുകളുള്ള കഥയാണ് ഈ സിനിമയുടെത്. വേഗതയോടെ തന്നെയാണ് ഓരോ രംഗങ്ങളും കോർത്തിണക്കിയിരിക്കുന്നതും. രണ്ടാം പകുതിയിലെ ഒരു പാട്ടൊഴികെ കഥയിൽ അനാവശ്യമായി കുത്തിനിറച്ച രംഗങ്ങൾ ഒന്നുംതന്നെയില്ല. ഗോപി സുന്ദറാണ് പശ്ചാത്തല സംഗീത സംവിധാനം നിർവഹിച്ചത്. ഒരു എന്റർറ്റെയിനർ സിനിമയ്ക്ക് ആവശ്യമായ തട്ടുപൊളിപ്പൻ സംഗീതമാണ് ഓരോ രംഗങ്ങൾക്കും ഗോപി സുന്ദർ നൽകിയിരിക്കുന്നത്. ഗോപി സുന്ദർ ഈണമിട്ട ചിത്തിര മുത്തേ എന്ന പാട്ടും, നാദിർ ഷാ വരികൾ എഴുതുകയും സംഗീതം നൽകുകയും ചെയ്ത മധുരിക്കും ഓർമ്മകളെ എന്ന പാട്ടുമാണ് ഈ സിനിമയിലുള്ളത്. ഈ സിനിമയിലെ സുപ്രധാന വഴിത്തിരിവുണ്ടാകുന്ന ഒന്നാണ് പ്രണവ് അന്വേഷിക്കുന്ന ഒരു കാർ. കാറിന്റെ നിറം മാറുന്നതൊന്നും അത്ര വിശ്വസനീയമായി തോന്നിയില്ല. കുറേക്കൂടി വിശ്വസനീയതയുള്ള രീതിയിൽ കാറിന്റെ നിറം മാറുന്ന രംഗങ്ങൾ കലാസംവിധായകൻ ഗോകുൽ ദാസ് ഒരുക്കേണ്ടതായിരുന്നു. റോണക്സ്‌ സേവ്യറാണ് മേക്കപ്പ്.

അഭിനയം: ⭐⭐⭐
പ്രണവായി കുഞ്ചാക്കോ ബോബനും പ്രിൻസായി ജയസൂര്യയും ജിയയായി അമല പോളും അഭിനയിച്ചിരിക്കുന്നു. മൂന്നുപേരും അവരവരുടെ രീതിയിൽ പ്രേക്ഷകർക്ക്‌ ഇഷ്ടമാകുന്ന വിധത്തിൽ അഭിനയിച്ചിട്ടുണ്ട്. മേജർ ഇമ്മാനുവൽ രവി എന്ന കഥാപാത്രമായി അജു വർഗീസും, ഡിക്റ്റക്റ്റീവിന്റെ വേഷത്തിൽ സുരാജ് വെഞ്ഞാറമൂടും തകർപ്പൻ അഭിനയമാണ് കാഴ്ചവെച്ചത്. ഹാസ്യ രംഗങ്ങളിലെ ഇവരുടെ അഭിനയമികവ് ഒന്നുകൊണ്ട് മാത്രമാണ് ഈ സിനിമ രസകരമായി തോന്നിയത്. ഇവരെ കൂടാതെ വിജയരാഘവൻ, റാഫി, കലാഭവൻ ഷാജോൺ, ഷാജു ശ്രീധർ, ബൈജു എഴുപുന്ന, വി.കെ.ബൈജു, ഇന്ത്യൻ, നിക്കി ഗൽറാണി, വിനയപ്രസാദ്‌, ലെന, സീനത്ത് എന്നിവരാണ് മറ്റു അഭിനേതാക്കൾ.

വാൽക്കഷ്ണം: കുടുംബത്തോടൊപ്പം കുട്ടികളോടൊപ്പം കണ്ടുരസിക്കാവുന്ന ശരാശരി എന്റർറ്റെയിനറാണ് ഷാജഹാനും പരീക്കുട്ടിയും.

സംവിധാനം: ബോബൻ സാമുവൽ
നിർമ്മാണം: ആഷിക് ഉസ്മാൻ
രചന: വൈ.വി.രാജേഷ്‌
ചായാഗ്രഹണം: അനീഷ്‌ ലാൽ
ചിത്രസന്നിവേശം: ലിജോ പോൾ
സംഗീതം: ഗോപി സുന്ദർ, നാദിർഷാ
കലാസംവിധാനം: ഗോകുൽ ദാസ്‌
മേക്കപ്പ്: റോണക്സ്‌ സേവ്യർ
വസ്ത്രാലങ്കാരം: മഷർ ഹംസ
വിതരണം: സെൻട്രൽ പിക്ക്ചെഴ്സ്

സ്കൂൾ ബസ്‌ – ⭐⭐

image

ദിശതെറ്റി സഞ്ചരിക്കുന്ന സ്കൂൾ ബസ്‌ -⭐⭐

“മനുഷ്യന് പ്രകൃതിയുടെ മേൽ ഉള്ളതുപോലെതന്നെ, പ്രകൃതിയ്ക്ക് മനുഷ്യന്റെ മേലും ഒരു തിരഞ്ഞെടുപ്പുണ്ടെന്ന് ഓർമ്മിപ്പിക്കുന്നു” – ദത്താപഹാരം(വി.ജെ.ജയിംസ്)

സഹ്യന്റെ വനാന്തരങ്ങളിൽ നിന്ന് ഇനിയും കണ്ടെത്തപെടാത്ത ഒരു കിളിയുടെ ശബ്ദത്തിന് കാതോർത്ത് കാടിന്റെ വന്യസൗന്ദര്യത്തിലേക്ക് കൂപ്പുകുത്തി മറഞ്ഞുപോയ ഫ്രെഡി റോബർട്ട് എന്ന കൗമാരക്കരന്റെ കഥയാണ് വി.ജെ.ജയിംസിന്റെ ദത്താപഹാരം എന്ന നോവലിലൂടെ പറയുന്നത്.

മാതാപിതാക്കളുടെയും സ്കൂളിലെ അധ്യാപകരുടെയും ശകാരം കേട്ടുമടുത്ത അജോയ് ജോസഫ്‌ എന്ന സ്കൂൾ വിദ്യാർഥി ഒരു പ്രത്യേക സാഹചര്യത്തിൽ ഒളിച്ചോടുന്നു. ആ യാത്രയിലൂടെ അവനും, അവനെ നഷ്ടപെടുന്ന അവസ്ഥയിലെത്തുമ്പോൾ അവന്റെ മാതാപിതാക്കളും തിരിച്ചറിയുന്ന വസ്തുതകൾ ഇന്നത്തെ കാലഘട്ടത്തിൽ സംഭവിച്ചുകൊണ്ടിരിക്കുന്ന യഥാർത്യങ്ങളാണെന്ന് നമ്മളെ ഓർമ്മിപ്പിക്കുന്നു.

ബോബി-സഞ്ജയ്‌ കഥയും തിരക്കഥയും സംഭാഷണങ്ങളും എഴുതി റോഷൻ ആൻഡ്രൂസ് സംവിധാനം ചെയ്ത സ്കൂൾ ബസ്‌ എന്ന സിനിമയിലൂടെ കാലികപ്രസകതിയുളള ഒരു വിഷയമാണ്‌ അവതരിപ്പിച്ചിരിക്കുന്നത്. ആകാശ് മുരളീധരൻ, അഞ്ജലീന റോഷൻ, ജയസുര്യ, കുഞ്ചാക്കോ ബോബൻ, അപർണ്ണ ഗോപിനാഥ് എന്നിവരാണ് ഈ സിനിമയിലെ പ്രധാന അഭിനേതാക്കൾ.

പ്രമേയം: ⭐⭐⭐
മാതാപിതാക്കൾ ഏർപ്പെടുത്തുന്ന അമിത നിയന്ത്രണങ്ങളാൾ കുട്ടികൾക്ക് നഷ്ടപ്പെടുന്ന സ്വാതന്ത്ര്യവും, സ്കൂളുകളിലെ ഇന്നത്തെ വിദ്യാഭ്യാസ സമ്പ്രദായം അനുസരിച്ച് കുട്ടികൾക്ക് നൽക്കുന്ന ശിക്ഷകളും അവരുടെ മനസ്സിനെയും ചിന്തകളെയും മോശമായി ബാധിക്കാറുണ്ട് എന്ന് തിരിച്ചറിയുന്ന എത്ര മാതാപിതാക്കളും സ്കൂൾ അധികൃതരും സമൂഹത്തിലുണ്ട് എന്ന വിഷയമാണ് ഈ സിനിമയിലൂടെ ബോബി-സഞ്ജയ്‌ ടീം അവതരിപ്പിക്കുന്നത്‌. കൗമാര പ്രായമെത്തുന്ന കുട്ടികൾ അവരുടെ സ്വപ്‌നങ്ങൾ യാഥാർത്ഥ്യമാണോ എന്ന് അന്വേഷിച്ചുനടക്കുന്നത്‌ അറിയുവാനും, അവരുടെ മനസ്സിൽ തോന്നുന്ന ചോദ്യങ്ങൾക്കുള്ള ഉത്തരം പറഞ്ഞുകൊടുക്കുവാനും മാതാപിതാകൾക്ക് സമയമില്ല. ഇത്തരത്തിലുള്ള ഒരു പ്രമേയത്തെ ആസ്പദമാക്കിയാണ് ഈ സിനിമയുടെ കഥ എഴുതിയിരിക്കുന്നത്.

തിരക്കഥ: ⭐⭐
ശക്തമായ പ്രമേയങ്ങൾ വിശ്വസനീയമായ കഥയുടെ രൂപത്തിൽ അതിശയോക്തിയില്ലാത്ത  കഥാസന്ദർഭങ്ങളിലൂടെ ത്രസിപ്പിക്കുന്ന സംഭാഷണങ്ങളിലൂടെ അവതരിപ്പിക്കുവാൻ ബോബി-സഞ്ജയ്‌മാരോളം കഴിവുള്ള തിരക്കഥരചയ്താക്കൾ നവയുഗ മലയാള സിനിമയിലില്ല. പക്ഷെ, മേല്പറഞ്ഞ കാര്യങ്ങളൊക്കെ തെറ്റിപോയ അവസ്ഥയാണ് സ്കൂൾ ബസ്‌ എന്ന സിനിമയുടെ കാര്യത്തിൽ സംഭവിച്ചത്. ഒരു പ്രമേയത്തിൽ ഉറച്ചുനിൽക്കുന്നതിനു പകരം രണ്ടു പ്രമേയങ്ങളിലും കൈവെച്ചു രണ്ടും മുഴുവനാക്കാൻ പറ്റാത്ത പാന്തിവേന്ത അവസ്ഥയിലായി ഈ സിനിമയുടെ തിരക്കഥ. കണ്ടുമടുത്തതും പ്രവചിക്കാനവുന്നതുമായ കഥാസന്ദർഭങ്ങളിലൂടെ വികസിക്കുന്ന കഥയിൽ ഒരുപാട് ചോദ്യങ്ങൾ പ്രേക്ഷകന്റെ മനസ്സിൽ ബാക്കിയാവുന്നു. സിനിമയുടെ രണ്ടാം പകുതിയിലെ കഥാസന്ദർഭങ്ങൾ അവിശ്വസനീയമായി തോന്നിപ്പിച്ചു. മാതാപിതാക്കൾ എന്ന നിലയിൽ ഇരുവരും ചെയ്ത തെറ്റുകൾ ഏറ്റുപറയുന്ന സംഭാഷണമൊഴികെ വേറൊരു സംഭാഷണം പോലും മികവു പുലർത്തിയില്ല. ബോബി സഞ്ജയ്‌ ടീമിന്റെ സമീപകാലത്തെ ഏറ്റവും മോശം തിരക്കഥകളിൽ ഒന്നാണ് ഈ സിനിമയുടെത്.

സംവിധാനം: ⭐⭐
ഒരുപിടി നല്ല സിനിമകൾ മലയാളികൾക്ക് സമ്മാനിച്ചിട്ടുള്ള സംവിധായകരിൽ ഒരാളാണ് റോഷൻ ആൻഡ്രൂസ്. അദ്ദേഹത്തിന്റെ ഓരോ സിനിമകളിലൂടെ പ്രേക്ഷകർക്ക്‌ ഉൾകൊള്ളുവാനാകുന്ന ഒരു സന്ദേശമുണ്ടായിരിക്കും. കുട്ടികൾക്ക് വേണ്ടി അച്ഛനും അമ്മയും സമയം കണ്ടെത്തണമെന്നും, സ്വാന്ത്ര്യത്തോടെ അവരെ വളർത്തണമെന്നും തുടങ്ങിയ നല്ല സന്ദേശങ്ങൾ ഈ സിനിമയിലുമുണ്ട്. പക്ഷെ ആ സന്ദേശങ്ങൾ പറയുന്നതിനിടയിൽ സംവിധായകന്റെ സ്കൂൾ ബസ്‌ എവിടെയോവെച്ച് ദിശതെറ്റി സഞ്ചരിക്കുവാൻ തുടങ്ങി. രണ്ടാം പകുതിയിലെ കഥാസന്ദർഭങ്ങൾ കണ്ടപ്പോൾ ഈ സിനിമയിലൂടെ എന്താണ് സംവിധായകൻ പറയുവാനുദ്ദെശിച്ച വിഷയം എന്ന് സംശയിച്ചുപോയി പാവം പ്രേക്ഷകർ. സ്കൂൾ ബസ്‌ എന്ന ടൈറ്റിൽ ഈ സിനിമയ്ക്ക് നൽക്കുവാനുള്ള കാരണവും മനസ്സിലാകുന്നില്ല. ദ്വയാർത്ഥ പ്രയോഗങ്ങലുള്ള തമാശകളോ യുക്തിയെ ചോദ്യം ചെയ്യുന്ന സന്ദർഭങ്ങളോ ഇല്ല എന്നതിനാൽ കുടുംബങ്ങൾക്ക് കുട്ടികളോടൊപ്പം ഒരുവട്ടം സ്കൂൾ ബസ്സിൽ കയറാം.

സാങ്കേതികം: ⭐⭐⭐⭐
3 ഇഡിയറ്റസ്, പി.കെ. എന്നീ സിനിമകളുടെ ചായാഗ്രാഹകൻ സി.കെ.മുരളീധരൻ മലയാളത്തിൽ ആദ്യമായി ക്യാമറചലിപ്പിച്ച സിനിമയാണ് സ്കൂൾ ബസ്‌. സിനിമയുടെ രണ്ടാം പകുതിയിലെ ദൃശ്യങ്ങൾ മികവുറ്റതായിരുന്നു. വയനാടിന്റെ ഉൾക്കാടുകൾ നൽക്കുന്ന ഭീതി പ്രേക്ഷകരിലേക്ക് എത്തിക്കുവാൻ സി.കെ.മുരളീധരന് സാധിച്ചു. വേഗതയോടെ രംഗങ്ങൾ കോർത്തിണക്കി കൃത്യതയോടെ സന്നിവേശം ചെയ്യുവാൻ വിവേക് ഹർഷന് കഴിഞ്ഞു. ഗോപി സുന്ദറിന്റെ പശ്ചാത്തല സംഗീതം ചിലയിടങ്ങളിൽ മികവ് പുലർത്തി. പി.എം.സതീഷിന്റെ ശബ്ദമിശ്രണം ശരാശരിയിലൊതുങ്ങി. കാടിന്റെതായ ഒരു ശബ്ദവും ഒരു രംഗങ്ങളിലും കേട്ടില്ല. കഥാപാത്രങ്ങളുടെ മേയിക്കപ്പും വസ്ത്രാലങ്കാരവും മികവു പുലർത്തി.

അഭിനയം: ⭐⭐⭐
ചായാഗ്രാഹകൻ സി.കെ.മുരളീധരന്റെ മകൻ ആകാശ് മുരളീധരൻ, റോഷൻ ആൻഡ്രൂസിന്റെ മകൾ അഞ്ജലീന റോഷൻ എന്നിവരാണ് ഈ സിനിമയിലെ പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്. രണ്ടു കുട്ടികളും അവരവരുടെ കഥാപാത്രങ്ങളെ രസകരമായി അവതരിപ്പിച്ചിട്ടുണ്ട്. ജയസുര്യ, അപർണ്ണ ഗോപിനാഥ്, കുഞ്ചാക്കോ ബോബൻ, സുധീർ കരമന, നിർമ്മാതാവ് എ.വി.അനൂപ്‌, നന്ദു ലാൽ, മേഘ്ന ജാസ്മിൻ എന്നിവരാണ് ഈ സിനിമയിലെ മറ്റു പ്രധാന അഭിനേതാക്കൾ.

വാൽക്കഷ്ണം: സ്കൂൾ ബസ്സിലെ കാഴ്ചകൾ കുട്ടികളെയോ കുടുംബങ്ങളെയോ ഒരു രീതിയിലും സ്വാധീനിക്കുന്നില്ല.

സംവിധാനം: റോഷൻ ആൻഡ്രൂസ്
രചന: ബോബി-സഞ്ജയ്‌
നിർമ്മാണം: എ.വി.അനൂപ്‌
ചായാഗ്രഹണം: സി.കെ.മുരളീധരൻ
ചിത്രസന്നിവേശം: വിവേക് ഹർഷൻ
പശ്ചാത്തല സംഗീതം: ഗോപി സുന്ദർ
കലാസംവിധാനം: സിറിൽ കുരുവിള
ശബ്ദമിശ്രണം: പി.എം.സതീഷ്‌
വസ്ത്രാലങ്കാരം: സമീറ സനീഷ്
മേയിക്കപ്പ്: രഞ്ജിത്ത് അമ്പാടി
വിതരണം: സെൻട്രൽ പിക്ക്ചേഴ്സ്.

വള്ളീം തെറ്റി പുള്ളീം തെറ്റി – ⭐⭐

image

വള്ളീം പുള്ളീം കുത്തും കോമയും എല്ലാം തെറ്റി! – ⭐⭐

പാലക്കാട് ജില്ലയിലെ ഒരു കൊച്ചു ഗ്രാമത്തിൽ 1990 കാലഘട്ടത്തിൽ നടക്കുന്ന ഒരു പ്രണയകഥ ഹാസ്യത്തിന്റെ മേമ്പൊടിയോടെ അവതരിപ്പിച്ച സിനിമയാണ് വള്ളീം തെറ്റി പുള്ളീം തെറ്റി. നവാഗതനായ ഋഷി ശിവകുമാർ രചനയും സംവിധാനവും നിർവഹിച്ചിരിക്കുന്ന ഈ സിനിമ നിർമ്മിച്ചിരിക്കുന്നത് അച്ചാപ്പു മൂവി മാജിക്കിനു വേണ്ടി ഫൈസൽ ലത്തീഫാണ്. കുഞ്ഞുണ്ണി എസ്. കുമാർ ചായഗ്രഹണവും, പുതുമുഖം സൂരജ് എസ്. കുറുപ്പ് സംഗീതവും, ബൈജു കുറുപ്പ് ചിത്രസന്നിവേശവും നിർവഹിച്ചിരിക്കുന്നു.

ശ്രീദേവി ടാക്കീസ് എന്ന സിനിമ കൊട്ടകയിലെ ഓപ്പറേറ്റർ വിനയനും ആ ഗ്രാമത്തിലെ ഏക പണക്കാരനും പലിശക്കാരനുമായ ഭഗവാൻ മേനോന്റെ മകൾ ശ്രീദേവിയും തമ്മിൽ പ്രണയത്തിലാണ്. വിനയന്റെ സുഹൃത്തുക്കളും, ശ്രീദേവി ടാക്കീസിന്റെ ഉടമ മാധവേട്ടനും, തെങ്ങ് ചെത്തുന്ന ആശാൻ എന്ന് വിളിപേരുള്ള രാജനും വിനയൻ-ശ്രീദേവി പ്രണയത്തെ അനുകൂലിക്കുന്നവരാണ്. പക്ഷെ, കൊള്ള പലിശക്കാരനായ ഭഗവാൻ ആ പ്രണയബന്ധത്തിനെതിരുമാണ്. ഭഗവാന്റെ ആദ്യപുത്രി ആ നാട്ടിലെ ഒരു ചെറുപ്പക്കാരനുമായി ഒളിച്ചോടി വിവാഹിതയായതാണ് അതിനു കാരണം. ശ്രീദേവി ടാക്കീസിന്റെ നിലനിൽപ്പിനു വേണ്ടി മാധവേട്ടൻ കുറച്ചു പണം ഭഗവാന്റെയടുത്തു നിന്ന് കടം മേടിക്കുന്നു. ഒരിക്കൽ ശ്രീദേവി ടാക്കീസ് എന്നന്നേക്കുമായി നഷ്ടപെടുന്ന അവസ്ഥയെത്തുന്നു. അതോടൊപ്പം വർഷങ്ങൾക്കു മുമ്പ് നാടുവിട്ടുപോയ ഗഗൻ എന്ന ചെറുപ്പക്കാരനും ആ നാട്ടിലെത്തുന്നു. തുടർന്ന് ആ നാട്ടിൽ അരങ്ങേറുന്ന സംഭവങ്ങളാണ് ഈ സിനിമയിലൂടെ രസകരമായി അവതരിപ്പിക്കുവാൻ ശ്രമിച്ചിരിക്കുന്നത്.

വിനയനായി കുഞ്ചാക്കോ ബോബനും, ശ്രീദേവിയായി ശാമിലിയും, ഭാഗവാനായി സുരേഷ് കൃഷ്ണയും, മാധവേട്ടനായി രഞ്ജി പണിക്കരും, ആശാനായി മനോജ്‌ കെ.ജയനും അഭിനയിച്ചിരിക്കുന്നു. ഇവരെ കൂടാതെ കൃഷ്ണ ശങ്കർ, അനീഷ്‌ മേനോൻ, സുധീർ കരമന, സൈജു കുറുപ്പ്, ശ്രീജിത്ത്‌ രവി, ചെമ്പിൽ അശോകൻ, കലാഭവൻ ഹനീഫ്, ഉണ്ണികൃഷ്ണൻ, മിയ ജോർജ്, മുത്തുമണി, സീമ ജി.നായർ എന്നിവരും പ്രധാന കഥാപാത്രങ്ങളെ അവതരിപ്പിച്ചിരിക്കുന്നു.

പ്രമേയം: ⭐
മലയാള സിനിമയുടെ സുവർണ്ണ കാലഘട്ടം എന്നറിയപെടുന്ന 80കളുടെ അവസാനം പുറത്തിറങ്ങിയ ഒരുപിടി നല്ല സിനിമകളുടെ പ്രമേയവുമായി സാമനതയുള്ള പ്രമേയവും കഥയുമായാണ് നവാഗതനായ ഋഷി ശിവകുമാർ വള്ളീം തെറ്റി പുള്ളീം തെറ്റി എന്ന സിനിമയിലൂടെ അവതരിപ്പിച്ചിരിക്കുന്നത്. സിബി മലയിലിന്റെ മുത്താംരംകുന്ന് പി.ഓ., ഗിരീഷിന്റെ അക്കരനിന്നൊരു മാരൻ, ലാൽ ജോസിന്റെ മീശമാധവൻ എന്നിവയെല്ലാം ഗ്രാമീണ പശ്ചാത്തലത്തിൽ അവതരിപ്പിച്ചിരിക്കുന്ന പ്രണയ കഥകളാണ്. അതിലുപരി, സാധാരണക്കാരനും പാവപെട്ടവനുമായ നായകനും സുഹൃത്തുക്കളും ഒരു വശത്ത് നായികയുടെ അച്ഛനും തമാശ പറയുന്ന ഗുണ്ടകൾ മറുവശത്ത്. അവസാനം യുക്തിയില്ലാത്ത കുറെ സംഭവബഹുലമായ രംഗങ്ങൾക്ക് ശേഷം നായകനും നായികയും ഒന്നിക്കുന്നു. ഇത്തരത്തിലുള്ള ഒരു പഴഞ്ചൻ കഥ ഒരു പുതുമുഖ സംവിധായകനിൽ നിന്ന് പ്രേക്ഷകർ പ്രതീക്ഷിക്കുന്നില്ല.

തിരക്കഥ: ⭐⭐
ഏതൊരു നല്ല സിനിമയുടെയും വിജയത്തിന് പിന്നിൽ കെട്ടുറപുള്ള ഒരു തിരക്കഥയുണ്ടാകും. അത് തിരിച്ചറിയാനുള്ള വിവേകം സാങ്കേതിക മികവിൽ മാത്രം വിശ്വസിച്ചു സിനിമയെടുക്കുന്നവർ കാണുക്കുന്നില്ല എന്നതാണ് ഇന്നത്തെ സിനിമ സംവിധായകരുടെ പ്രധാന പ്രശ്നങ്ങളിൽ ഒന്ന്. കേട്ടുപഴകിയ സംഭാഷണങ്ങളും കണ്ടുമടുത്ത കഥാസന്ദർഭങ്ങളും, പ്രവചിക്കാനവുന്ന കഥാഗതിയും, ചിരിവരാത്ത കുറെ കോമാളിത്തരങ്ങളും, അവിശ്വസനീയമായ ക്ലൈമാക്സും കൃത്യമായി എഴുതിച്ചേർത്ത തിരക്കഥയാണ് ഈ സിനിമയുടെത്. ഈ സിനിമയിലെ കുഞ്ചാക്കോ ബോബൻ അവതരിപ്പിച്ച വിനയൻ എന്ന കഥാപാത്രം പറയുന്ന സംഭാഷണങ്ങളിൽ ഒന്നിൽ “ജസ്റ്റ്‌ റിമംബർ ദാറ്റ്” എന്ന് പറയുന്നുണ്ട്. കമ്മീഷ്ണർ റിലീസ് ചെയ്ത വർഷം 1993 ആണ്. അങ്ങനെയെങ്കിൽ 1990 ഏപ്രിൽ മാസത്തിൽ നടക്കുന്ന കഥയിൽ ആ സംഭാഷണം എങ്ങനെ വന്നു എന്നത് ഒരു സംശയമായി അവസാനിക്കുന്നു.

സംവിധാനം: ⭐⭐
ഒരു നവാഗതനെന്ന നിലയിൽ തന്റേതായ കഴിവ് തെളിയക്കാൻ ഋഷി ശിവകുമാറിന് ലഭിച്ച സുവർണ്ണ അവസരമാണ് ഈ സിനിമ. പ്രവചിക്കാനവുന്ന കഥയും കഥാപാത്രങ്ങളും കഥാസന്ദർഭങ്ങളും ധാരാളമുള്ള ഒരു തിരക്കഥയെ ഇഴഞ്ഞുനീങ്ങുന്ന താളത്തിൽ അവതരിപ്പിച്ചു അവിശ്വസനീയമായ ക്ലൈമാക്സിലൂടെ അവസാനിപ്പിച്ചു. കുഞ്ഞുണ്ണി എസ്.കുമാർ എന്ന ചായഗ്രാഹകന്റെ മികവുറ്റ ഫ്രെയിമുകളും, സൂരജ് എസ്. കുറുപ്പിന്റെ സംഗീതവും, പാട്ടുകളുടെ വ്യതസ്ഥതയും ഈ സിനിമയെ കണ്ടിരിക്കാവുന്ന രീതിയിലാക്കി. കഥയിൽ പ്രാധാന്യമില്ലാത്ത ഒട്ടനവധി കഥാപാത്രങ്ങൾ ഈ സിനിമയിലുണ്ട്. അവരൊക്കെ സിനിമയുടെ രണ്ടാം പകുതിയിലെ അപ്രതീക്ഷിത ട്വിസ്റ്റിനും അവിശ്വസനീയ ക്ലൈമാക്സിനും വേണ്ടിയാണെന്ന് അറിയുമ്പോൾ പോലും അനാവശ്യമായി കുത്തിനിറച്ചതാണ് എന്ന്  തോന്നുന്നു. ഈ കുറവുകളൊക്കെ മോശമായി സിനിമയെ ബാധിച്ചിട്ടുണ്ട് എന്ന് വേണം കരുതാൻ.

സാങ്കേതികം: ⭐⭐⭐⭐
ലോഹം എന്ന സിനിമയ്ക്ക് ശേഷം പ്രശസ്ത ചായഗ്രാഹകൻ എസ്.കുമാറിന്റെ മകൻ കുഞ്ഞുണ്ണി പകർത്തിയ ഓരോ ഫ്രെയിമുകളും അതിമനോഹരമായിരുന്നു. പാലക്കാടിന്റെ ഭംഗി ഒപ്പിയെടത്തു പഴയ കാലഘട്ടം പുനർസൃഷ്ട്ടിക്കുവാൻ കുഞ്ഞുണ്ണിക്ക് സാധിച്ചു. പാട്ടുകളുടെ ചിത്രീകരണവും, മഴ പെയ്യുന്ന രംഗങ്ങളും മികവുറ്റതായിരുന്നു. അതേപോലെ മികച്ചു നിന്ന മറ്റൊരു സാങ്കേതികവശം കലാസംവിധാനമായിരുന്നു. ജ്യോതിഷ് ശങ്കർ ഒരുക്കിയ അമ്പലപറമ്പും, നാടകവും, ശ്രീദേവി ടാക്കീസും മികച്ചതായിരുന്നു. 2016 ലെ മികച്ച ഗാനങ്ങളുള്ള സിനിമകളിൽ ഒന്നായി ഈ സിനിമ പിൽകാലത്ത് അറിയപെടും. ഹരിചരണും മഡോണയും ചേർന്നാലപിച്ച “പുലർക്കാലം പോലെ വിരൽതുമ്പിനാൽ എൻ നെഞ്ചിനെ”എന്ന ഗാനവും “അരേ തു ചക്കർ” എന്ന ഗാനവും കേൾക്കാനും ഏറ്റുപാടുവാനും രസമുള്ളതാണ്‌. റോണക്സ്‌ സേവ്യർ നിർവഹിച്ച മേയിക്കപ് ശാമിലിയ്ക്ക് ഉചിതമായി തോന്നിയില്ല. ബൈജു കുറുപ്പിന്റെ സന്നിവേശം ശരാശരിയിൽ ഒതുങ്ങിയതിനാൽ ഇഴഞ്ഞു നീങ്ങുന്ന രംഗങ്ങൾ വേണ്ടുവോളമുണ്ടായിരുന്നു ഈ സിനിമയിൽ.

അഭിനയം: ⭐⭐
വിനയനെന്ന സാധരക്കാരന്റെ വേഷം ഭംഗിയായി അവതരിപ്പിക്കുവാൻ കുഞ്ചാക്കോ ബോബന് സാധിച്ചു. പക്ഷെ, ചാക്കോച്ചനേക്കാൾ കയ്യടി നേടിയത് ഗഗനെ അവതരിപ്പിച്ച കൃഷ്ണ ശങ്കറും, മാധവേട്ടനായി അഭിനയിച്ച രഞ്ജി പണിക്കരുമാണ്. നീർ ആശാനായി മാനോജ് കെ. ജയൻ സ്ഥിരം ശൈലിയിൽ അഭിനയിച്ചു. ചിലയിടങ്ങളിൽ അമിതാഭിനയവുമായി അനുഭവപെട്ടു. സമീപകാലതിറങ്ങിയ സിനിമകളിലെ ഏറ്റവും മോശമായ അഭിനയം കാഴ്ചവെച്ച പുതുമുഖ നായികയായി ശ്യാമിലി. അനാർക്കലി എന്ന സിനിമയ്ക്ക് ശേഷം സുരേഷ് കൃഷ്ണയ്ക്ക് ലഭിച്ച മികച്ച വേഷമാണ് ഈ സിനിമയിലെ ഭഗവാൻ മേനോൻ. അതു മികച്ച രീതിയിൽ അവതരിപ്പിക്കുവാൻ സുരേഷ് കൃഷ്ണയ്ക്കും സാധിച്ചു. സൈജു കുറുപ്പും ശ്രീജിത്ത്‌ രവിയും മികച്ച രീതിയിൽ ഹാസ്യം കൈകാര്യം ചെയ്തിട്ടുണ്ട്. മറ്റു നടീനടൻമാർ തരക്കേടില്ലാതെ അഭിനയിച്ചു.

വാൽക്കഷ്ണം: കേട്ടുപഴകിയ കണ്ടുമടുത്ത ഒരു പഴങ്കഥയാണ് വള്ളീം തെറ്റി പുള്ളീം തെറ്റി!

രചന, സംവിധാനം: ഋഷി ശിവകുമാർ
നിർമ്മാണം: ഫൈസൽ ലത്തീഫ്
ചായാഗ്രഹണം: കുഞ്ഞുണ്ണി എസ്.കുമാർ
ചിത്രസന്നിവേശം: ബൈജു കുറുപ്പ്
സംഗീതം: സൂരജ് എസ്. കുറുപ്പ്
ഗാനരചന: ഹരിനാരായണൻ, സൂരജ് എസ്. കുറുപ്പ്
കലാസംവിധാനം: ജ്യോതിഷ് ശങ്കർ
മേയിക്കപ്പ്: റോണക്സ് സേവ്യർ
വസ്ത്രാലങ്കാരം: സ്റ്റെഫി സേവ്യർ
വിതരണം: കലാസംഘം റിലീസ്

വേട്ട – ⭐⭐⭐

image

മനകണക്കുകളിലൂടെ ഇരകളും വേട്ടക്കാരനും! ⭐⭐⭐

“നിങ്ങളുടെ ഒരു യെസ് നാളത്തെ ചരിത്രമാകും”എന്ന് ട്രാഫിക് സിനിമയിലൂടെ നമ്മളെ പഠിപ്പിച്ച നവയുഗ സിനിമയുടെ അമരക്കാരൻ, മലയാള സിനിമയിൽ 2011 വരെ ആരും പരീക്ഷിക്കാത്ത അവതരണ രീതി സ്വീകരിച്ച സംവിധായകൻ, മലയാള സിനിമയിലെ ആദ്യ മൈൻഡ് ഗെയിം പ്രമേയമാക്കിയ സംവിധായകൻ തുടങ്ങിയ വിശേഷണങ്ങൾക്ക് അർഹതപെട്ട സംവിധായകനാണ് രാജേഷ്‌ പിള്ള.

രാജേഷ്‌ പിള്ള ഫിലിംസും റെഡ് റോസ് ക്രിയെഷൻസും സംയുക്തമായി നിർമ്മിച്ചിരിക്കുന്ന സിനിമയാണ് വേട്ട. അരുണ്‍ ലാൽ രാമചന്ദ്രൻ രചന നിർവഹിച്ചിരിക്കുന്ന ഈ സിനിമയിൽ കുഞ്ചാക്കോ ബോബൻ, മഞ്ജു വാര്യർ, ഇന്ദ്രജിത്ത് എന്നിവർ പ്രധാന കഥാപാത്രങ്ങളെ അവതരിപ്പിച്ചിരിക്കുന്നു. മൂന്ന് വ്യകതികളുടെ മാനസിക സംഘർഷങ്ങളിലൂടെ വികസിക്കുന്ന കഥ, ഉദ്യോഗജനകമായ കഥാസന്ദർഭങ്ങളിലൂടെ നിഗൂഡത നിറഞ്ഞ സംഭാഷണങ്ങളിലൂടെ ത്രസിപ്പിക്കുന്ന സസ്പെൻസ് നിറഞ്ഞ അവതരണത്തിലൂടെ വേറിട്ട ഒരു സിനിമ അനുഭവമാകുന്നു വേട്ട.

പ്രമേയം: ⭐⭐⭐⭐
ചതുരംഗ കളിയിലെ പോലെ ശത്രുപക്ഷത്തിന്റെ ചിന്തകൾ മുൻക്കൂട്ടി കണ്ടുകൊണ്ടു നടത്തുന്ന സൂക്ഷ്മമായ നീക്കങ്ങൾ പ്രമേയമാക്കിയിട്ടുള്ള സിനിമകൾ കണ്ടിട്ടുണ്ട്. എന്നാൽ യഥാർത്ഥ ജീവിതത്തിൽ, ഇരകളെ തേടിപിടിക്കുന്നതിനു വേണ്ടി മനക്കണക്കുകൾ ഉപയോഗിക്കുന്ന വേട്ടക്കാരന്റെ കഥ പ്രമേയമാക്കിയിട്ടുള്ള സിനിമ മലയാളത്തിൽ ആദ്യം. ഇതുവരെ പരീക്ഷിച്ചിട്ടില്ലാത്ത മികച്ചൊരു പ്രമേയം സിനിമയാക്കുവാൻ തിരഞ്ഞെടുത്തതിനു അരുണ്‍ ലാലിനും രാജേഷ്‌ പിള്ളയ്ക്കും ഹനീഫ് മുഹമ്മദിനും അഭിമാനിക്കാം!

തിരക്കഥ: ⭐⭐
താങ്ക് യു, ഹാപ്പി ജേർണി തുടങ്ങിയ സിനിമകളുടെ തിരക്കഥകൃത്ത് അരുണ്‍ ലാൽ രാമചന്ദ്രൻ കഥയും തിരക്കഥയും സംഭാഷണങ്ങളും എഴുതിയ വേട്ട മനക്കണക്കുകളിലൂടെ ഇരയെ തേടിപോകുന്ന വേട്ടക്കാരന്റെ പ്രതികാര കഥ പറയുന്നു. പുതുമയുള്ള കഥയും കഥാസന്ദർഭങ്ങളും വേറിട്ടൊരു അനുഭവം പ്രേക്ഷകർക്ക്‌ നൽക്കുന്നുണ്ടെങ്കിലും, അവരുടെ മനസ്സിൽ ഒരുപാട് ചോദ്യങ്ങൾ ബാക്കിയാവുന്നു. രണ്ടു കാലഘട്ടങ്ങളുടെ അവതരണത്തിലെ ചില സംശയങ്ങളും, ചില സംഭവങ്ങൾ നടക്കുന്ന സമയവും തമ്മിൽ ചേർച്ചകുറവുള്ളതും തിരക്കഥ രചനയിലെ പാളിച്ചകളാണ്. ഈ കുറവുകളൊക്കെ ഒരുപരുധി വരെ മറക്കുന്നത് സംവിധാന മികവും സംഭാഷണങ്ങളുടെ മികവും കൊണ്ടാണ്. അരുണ്‍ ലാൽ ഇതുവരെ എഴുതിയ തിരക്കഥകളിൽ ഏറ്റവും മികച്ചത് വേട്ടയുടെ തിരക്കഥ തന്നെ.

സംവിധാനം: ⭐⭐⭐
ട്രാഫിക് എന്ന സിനിമയിലൂടെ മലയാളത്തിൽ പുത്തനുണർവ്വ് നൽകിയ സംവിധായകനാണ് രാജേഷ്‌ പിള്ള. മലയാള സിനിമ പ്രേമികൾ  ഇതുവരെ കണ്ടിട്ടില്ലാത്ത പ്രമേയവും അവതരണവുമാണ് വേട്ടയ്ക്ക് വേണ്ടി രാജേഷ്‌ പിള്ള സ്വീകരിച്ചിരിക്കുന്നത്. ഏറെ ബുദ്ധിമുട്ടുള്ള ഒരു കഥാഗതിയാണ് ത്രസിപ്പിക്കുന്ന രീതിയിൽ സാങ്കേതിക മികവോടെ അവതരിപ്പിച്ചിരിക്കുന്നത്. സസ്പെൻസ് നിലനിർത്തിയിരിക്കുന്ന രീതി ഈ സിനിമയുടെ പ്രധാന സവിശേഷതകളിൽ ഒന്നാണ്. ഏറെ അപാകതകളുള്ള തിരക്കഥയെ കൃത്യതയോടെ സംവിധാനം ചെയ്യുവാൻ രാജേഷ്‌ പിള്ളക്ക് സാധിച്ചു. ഇനിയൊരു രാജേഷ്‌ പിള്ള സിനിമ കാണുവാനുള്ള ഭാഗ്യം മലയാള സിനിമ പ്രേക്ഷകർക്കില്ല എന്നത് നമ്മളുടെ ദൗർഭാഗ്യം. രാജേഷ്‌ പിള്ളയ്ക്ക് ആദരാഞ്ജലികൾ!

സാങ്കേതികം: ⭐⭐⭐⭐
വേട്ട ഒരു വേറിട്ട അനുഭവമാക്കുവാൻ അനീഷ്‌ ലാൽ എന്ന ചായഗ്രാഹകനും അഭിലാഷ് ബാലചന്ദ്രൻ എന്ന സന്നിവേശകനും ഷാൻ റഹ്മാൻ എന്ന സംഗീത സംവിധായകനും വഹിച്ച പങ്ക് ചെറുതല്ല. മികച്ച വിഷ്വൽസ് സിനിമയ്ക്ക് ത്രില്ലർ സ്വഭാവം നൽക്കാൻ സഹായിച്ചു. രണ്ടാം പകുതിയിലെ രംഗങ്ങളുടെ സന്നിവേശം മികച്ച രീതിയിലായത് സിനിമയ്ക്ക്  ചടുലത നൽകി . ഷാൻ റഹ്മാൻ നിർവഹിച്ച പശ്ചാത്തല സംഗീതം രംഗങ്ങൾക്ക് നിഗൂഡത നൽകുകയും പ്രേക്ഷകരെ ത്രസിപ്പിക്കുകയും ചെയ്തു. ശ്രേയ അരവിന്ദിന്റെ വസ്ത്രാലങ്കാരം സിനിമയുടെ കഥയോട് ചേർന്ന് പോകുന്നു. ഈ സിനിമയിലെ ഗാനരച്ചയ്താക്കളിൽ ഒരാളായിരുന്നു ഈയിടെ മരണപെട്ട ഷാൻ ജോൺസൺ. ഷാനിനും ആദരാഞ്ജലികൾ!

അഭിനയം: ⭐⭐⭐
മെൽവിൻ ജോസഫ്‌ എന്ന കഥാപാത്രം നാളിതുവരെ കുഞ്ചാക്കോ ബോബാൻ അഭിനയിച്ച കഥാപാത്രങ്ങളിൽ നിന്ന് വ്യതസ്തത പുലർത്തുന്നു. ദുരൂഹമായ കഥാപാത്രത്തെ വിശ്വസനീയമായി അവതരിപ്പിക്കുവാൻ ചാക്കോച്ചനു കഴിഞ്ഞു. ശ്രീബാലയായി മഞ്ജു വാര്യർ ആദ്യാവസാനം മിതത്വമാർന്ന അഭിനയം കാഴ്ച്ചവെച്ചു. സൈലക്സ് എബ്രഹാം ഇന്ദ്രജിത്തിന്റെ കയ്യിൽ ഭദ്രം. ഇവരെ കൂടാതെ റോണി ഡേവിഡ്‌, വിജയരാഘവൻ, പ്രേം പ്രകാശ്, ദീപക് പറമ്പോൾ, കോട്ടയം നസീർ, സന്തോഷ്‌ കീഴാറ്റൂർ, ഇർഷാദ്, മജിദ്‌, മിഥുൻ രമേശ്‌, സനൂഷ, കാതൽ സന്ധ്യ, ബേബി അക്ഷര എന്നിവരാണ് ഈ സിനിമയിലെ പ്രധാന  അഭിനേതാക്കൾ.

വാൽക്കഷ്ണം: പ്രേക്ഷക മനസ്സിനെ ആകാംഷയുടെ മുൾമുനയിൽ നിർത്തുന്ന ആദ്യ മൈൻഡ് ഗെയിം സിനിമ!

സംവിധാനം: രാജേഷ്‌ പിള്ള
രചന: അരുണ്‍ലാൽ രാമചന്ദ്രൻ
നിർമ്മാണം: മുഹമ്മദ്‌ ഹനീഫ്, രാജേഷ്‌ പിള്ള
ചായാഗ്രഹണം: അനീഷ്‌ ലാൽ ആർ.എസ്
ചിത്രസന്നിവേശം: അഭിലാഷ് ബാലചന്ദ്രൻ
സംഗീതം: ഷാൻ റഹ്മാൻ
പശ്ചാത്തല സംഗീതം: ഷാൻ റഹ്മാൻ
ഗാനരചന: ഹരിനാരായണൻ, മനു മഞ്ജിത്ത്, ഷാൻ ജോൺസൺ
കലാസംവിധാനം: സിറിൽ കുരുവിള
വസ്ത്രാലങ്കാരം: ശ്രേയ അരവിന്ദ്
മേക്കപ്പ്: ഷാജി പുൽപ്പള്ളി
വിതരണം: റെഡ് റോസ് റിലീസ്