1971 ബിയോണ്ട് ബോർഡേഴ്സ് – ⭐


2017 ബിയോണ്ട് ടോളറൻസ് – ⭐

നേന്ത്രക്കായ, മുരിങ്ങക്കായ, ചേന, കുമ്പളങ്ങ, പടവലങ്ങ, ബീൻസ്, പച്ചമുളക്, മഞ്ഞൾപൊടി, തേങ്ങാ ചിരണ്ടിയത്, തൈര്, ജീരകം, കറിവേപ്പില, ചെറിയഉള്ളി, വെളിച്ചെണ്ണ എന്നിവ കൃത്യമായ അളവിൽ ചേർത്താൽ തനതായ കേരളം വിഭവം അവിയൽ തയ്യാർ. മേല്പറഞ്ഞ പച്ചക്കറികൾ സ്വന്തം കൃഷിയിടങ്ങളിൽ നിന്നാണ് ലഭിക്കുന്നതെങ്കിൽ അത്യുത്തമം!

ഇത് പാചക നിരൂപണമല്ല. 1971 ബിയോണ്ട് ബോർഡേഴ്സ് എന്ന സിനിമയുടെ തിരക്കഥ എഴുതുവാൻ സംവിധായകൻ മേജർ രവി സ്വീകരിച്ച രീതിയോട് ഉപമിച്ചതാണ്. മേജർ രവിയുടെ മുൻകാല പട്ടാള ചിത്രങ്ങളായ കീർത്തിചക്ര, കുരുക്ഷേത്ര, പിക്കറ്റ് 43 എന്നിവയുടെ കഥാസന്ദർഭങ്ങൾ പുതിയ കഥാപശ്ചാത്തലത്തിലേക്കു മാറ്റിയെഴുതി അവതരിപ്പിച്ച സിനിമയാണ് 1971 ബിയോണ്ട് ബോർഡേഴ്സ്. ഒറ്റവാചകത്തിൽ പറഞ്ഞാൽ, അദ്ദേഹത്തിന്റെ തന്നെ മുൻകാല സിനിമകളിലെ വിജയ ഘടകങ്ങൾ ചേർത്തൊരുക്കി അവിയൽ പരുവത്തിലാക്കിയ ഒരു സിനിമ. സ്വന്തം സിനിമകളിലെ തിരക്കഥകളിൽ നിന്നും കടമെടുത്തു എന്നത് ആശ്വാസകരം!

കർമ്മയോദ്ധ എന്ന സിനിമയ്ക്ക് ശേഷം റെഡ് റോസ് ക്രിയേഷൻസിന്റെ ബാനറിൽ ഹനീഫ് മുഹമ്മദ് നിർമ്മിക്കുന്ന മോഹൻലാൽ-മേജർ രവി സിനിമയാണ് 1971 ബിയോണ്ട് ബോർഡേഴ്സ്. മേജർ രവിയുടെ തിരക്കഥയ്ക്ക് സംഭാഷണങ്ങൾ എഴുതിയത് ഷിജു നമ്പ്യാത്താണ്. സുജിത് വാസുദേവ് ഛായാഗ്രഹണവും, സംജിത് സന്നിവേശവും, സാലു കെ. ജോർജ് കലാസംവിധാനവും, ഗോപി സുന്ദർ പശ്ചാത്തല സംഗീതവും, മാഫിയ ശശി സംഘട്ടന സംവിധാനവും നിർവഹിച്ചിരിക്കുന്നു.

പ്രമേയം: ⭐⭐
ഇന്ത്യൻ ക്യാമ്പുകളിൽ ആക്രമണം നടത്തിയ പാക്കിസ്ഥാനാണ് യുദ്ധത്തിന് തുടക്കമിട്ടത്. 1971ൽ നടന്ന ഈ ഇന്ത്യ-പാകിസ്ഥാൻ യുദ്ധം നീണ്ടുനിന്നത് 13 ദിവസമാണ്. ഡിസംബർ 16നു പാകിസ്ഥാൻ അടിയറവു പറഞ്ഞതോടെ കിഴക്കേ പാകിസ്ഥാൻ എന്നറിയപ്പെട്ടിരുന്ന രാജ്യം(ഇപ്പോഴത്തെ ബംഗ്ലാദേശ്)രൂപപെട്ടത്. ആ യുദ്ധത്തിൽ വീരമൃത്യുവരിച്ച യോദ്ധാക്കൾക്കുള്ള സമർപ്പണമാണ് മേജർ രവിയുടെ 1971 ബിയോണ്ട് ബോർഡേഴ്സ് എന്ന സിനിമ. ആ യുദ്ധത്തിനിടെ പാക്കിസ്ഥാൻ പട്ടാളക്കാരനും ഇന്ത്യൻ പട്ടാളക്കാരും തമ്മിൽ ഉടലെടുത്ത ബന്ധമാണ് ഈ സിനിമയുടെ പ്രമേയം. അവർ തമ്മിൽ ശത്രുതയാണെങ്കിലും പരസ്പര ബഹുമാനം കാത്തുസൂക്ഷിച്ചിരുന്നു. ആ യുദ്ധം നയിച്ച പട്ടാളക്കാരുടെ ജീവിതകഥയാണ് ഈ സിനിമയിലൂടെ മേജർ അവതരിപ്പിക്കുന്നത്.

തിരക്കഥ: ⭐
കീർത്തിചക്രയിലെ വൈകാരിക നിമിഷങ്ങളും കുരുക്ഷേത്രയിലെ രാജ്യസ്നേഹവും പിക്കറ്റ് 43യിലെ മതസൗഹാർദ്ദവും മോഹൻലാലിന്റെ താരമൂല്യവും സമന്വയിപ്പിച്ചു എഴുതിയ കഥാസന്ദർഭങ്ങളാണ് ഈ സിനിമയുടേത്. വിഭജന കാലത്തുള്ള ചരിത്രമോ യുദ്ധസമയത്തുള്ള അന്തരീക്ഷമോ തിരക്കഥയിൽ എവിടെയും പരാമർശിക്കുന്നില്ല. യുദ്ധം സംഭവിക്കാനുള്ള കാരണങ്ങളും അന്ന് സംഭവിച്ചിട്ടുള്ള ദുരന്തങ്ങളും വിക്കിപീഡിയയിൽ ലഭ്യമാണ്. അതിലെഴുതിയ പോലെയൊന്നുമല്ല ഈ സിനിമയുടെ കഥാസന്ദർഭങ്ങൾ. പട്ടാളക്കാരുടെ കുടുംബത്തെപ്പറ്റിയുള്ള ഓർമ്മകളും യുദ്ധഭൂമിയിൽ വീരമൃത്യുവരുന്നവരെ ദുരവസ്ഥയും പാകിസ്ഥാൻ പട്ടാളവുമായി അനാവശ്യ ശത്രുതയുടെ ആവശ്യകതയില്ല എന്നുമാണ് ഈ സിനിമയിലൂടെ മേജർ രവി പറയുവാൻ ശ്രമിക്കുന്നത്. മേല്പറഞ്ഞ രംഗങ്ങളിലുള്ള ആവർത്തനവിരസത കണ്ടുമടുത്ത പ്രേക്ഷകരെ കൂടുതൽ മുഷിപ്പിക്കാനായി മേജർ സഹദേവനെ ധീര യോദ്ധാവാക്കാനുള്ള രംഗങ്ങൾ വേറെ. മോഹൻലാലും വില്ലന്മാരും ഒഴികെയുള്ള ഓരോ കഥാപാത്രങ്ങളിലും മൂപ്പൻ എഫെക്റ്റ് കൊണ്ടുവരാൻ മേജർ ശ്രമിച്ചിട്ടുണ്ട്. പുലിമുരുകനിലെ പുകഴ്ത്തൽ രീതി സ്വീകരിച്ചതാണെങ്കിൽ, ഈ സിനിമയ്ക്കോ മേജർ സഹദേവൻ എന്ന കഥാപാത്രത്തിനോ പുകഴ്ത്തലിന്റെ ആവശ്യകതയില്ല. നായകൻ നേരിടുന്നത് മൃഗത്തെയാകുമ്പോൾ നായകനെ അതിമാനുഷികനായി ചിത്രീകരിക്കേണ്ട ആവശ്യതയുണ്ട്. അതിലുപരി, സിനിമ കണ്ടുകൊണ്ടിരിക്കുന്ന പ്രേക്ഷകരിൽ മുരുകന്റെ കഴിവ് പറഞ്ഞുഫലിപ്പിക്കേണ്ടതുണ്ട്. അതുകൊണ്ടാണ് മൂപ്പൻ എന്ന കഥാപാത്രത്തിന് അത്തരത്തിലുള്ള സംഭാഷണങ്ങൾ നൽകിയത്. അതെ രീതി സ്വീകരിച്ച മേജർ രവിക്കും സംഭാഷണങ്ങൾ എഴുതിയ ഷിജു നമ്പ്യാത്തും പുലിമുരുകനിലെ സംഭാഷണങ്ങൾ അത്തരത്തിലായതു എന്തുകൊണ്ടെന്ന് മനസിലായില്ല എന്നുവേണം കരുതാൻ. നിവിൻ പോളി നായകനാകുന്ന മേജർ രവിയുടെ സിനിമയ്ക്കായി പ്രേക്ഷകർ കാത്തിരിക്കുന്നു എന്ന് മേജർ രവി അറിയരുതേ എന്ന പ്രാർത്ഥിച്ചുകൊണ്ട് നിർത്തുന്നു.

സംവിധാനം: ⭐⭐
പുനർജനി, കീർത്തിചക്ര, മിഷൻ 90 ഡെയ്‌സ്, തൂഫാൻ, കുരുക്ഷേത്ര, കാണ്ഡഹാർ, കർമ്മയോദ്ധ, ഒരേ യാത്രയിൽ, പിക്കറ്റ് 43 തുടങ്ങിയ ഒൻപതു സിനിമകൾ സംവിധാനം ചെയ്ത ഒരാളാണ് മേജർ രവി. ഇത്രയും പരിചയസമ്പത്തുള്ള ഒരു സംവിധായകൻ പക്വതയില്ലാത്ത അവതരണ രീതി സ്വീകരിക്കുമ്പോൾ പ്രേക്ഷകരുടെ പ്രതീക്ഷ തകിടം മറയുകയാണ് ചെയ്യുന്നത്. പഴഞ്ചൻ അവതരണ രീതിയും ആവേശകരമല്ലാത്ത യുദ്ധ രംഗങ്ങളും അവിശ്വസനീയമായ രീതിയിലാണ് മേജർ രവി അവതരിപ്പിച്ചത്. കഥാവസാനമുള്ള യുദ്ധ രംഗങ്ങളിൽ ആരൊക്കെയാണ് കൊല്ലപ്പെട്ടത് എന്നുപോലും അവ്യക്തമായിരുന്നു. ടാങ്ക് ഉപയോഗിച്ചുള്ള യുദ്ധ രംഗങ്ങൾ മാത്രമാണ് ഒരല്പമെങ്കിലും മികവ് പുലർത്തിയത്. കഥാപാത്രങ്ങൾക്ക് അനിയോജ്യമല്ലാത്ത അഭിനേതാക്കളെ അന്വേഷിച്ചു കണ്ടുപിടിച്ചു അഭിനയിപ്പിച്ച മേജർ രവിയെ സമ്മതിക്കണം. അന്യഭാഷയിൽ സിനിമ വിറ്റഴിക്കുക എന്നതാണ് ലക്ഷ്യമെങ്കിൽ, ആ ഭാഷകളിലെ കഴിവുള്ള അഭിനേതാക്കളെ കണ്ടെത്തുകയെങ്കിലും ചെയ്യാമായിരുന്നു. മോഹൻലാൽ എന്ന അഭിനേതാവിനേക്കാൾ ഉപരി അദ്ദേഹത്തിന്റെ താരമൂല്യത്തെയാണ് മേജർ രവി ആരാധിക്കുന്നത്. മലയാളത്തിന് പുറമെ തമിഴിലും ഹിന്ദിയിലും തെലുങ്കിലും ആരാധകരുള്ള മോഹൻലാൽ എന്ന താരത്തെ വിറ്റഴിച്ചു നേട്ടങ്ങൾ നേടുക എന്ന ലക്ഷ്യത്തോടെയാണ് ഈ സിനിമ മേജർ രവി സംവിധാനം ചെയ്തത് എന്നത് വ്യക്തം. അതിനുദാഹരണമാണ് കൃത്യമായ ഇടവേളകളിൽ സംഭാഷണങ്ങളിലൂടെ മേജർ സഹദേവനെ വാനോളം പുകഴ്ത്തുന്നത്. മേജർ മഹാദേവന്റെ അഞ്ചാമത്തെ വരവിനുള്ള തയ്യാറെടുപ്പിലാണ് മേജർ രവി എന്നുള്ള വാർത്തകൾ ആരാധകരും പ്രേക്ഷകരും ഞെട്ടലോടെയാണ് കേൾക്കുന്നത്.

സാങ്കേതികം: ⭐⭐⭐
സുജിത് വാസുദേവ് നിർവഹിച്ച ഛായാഗ്രഹണം മികവ് പുലർത്തി. ഈ സിനിമയുടെ ജീവൻ നിലനിർത്തിയ ഏക ഘടകമെന്നത് ഛായാഗ്രഹണമാണ്. ടാങ്ക് ചെയ്‌സ് രംഗങ്ങളും ക്‌ളൈമാക്‌സിലെ യുദ്ധങ്ങളും വിശ്വസനീയതയോടെ ചിത്രീകരിച്ചു. പേസിപ്പോകാതെ എന്ന തമിഴ്‍ ഗാനചിത്രീകരണവും മനോഹരമായിരുന്നു. ഒരു വാക്കിനാൽ എന്ന ഗാനത്തിന്റെ ചിത്രീകരണത്തിലെ ട്രെയിൻ പോകുന്ന രംഗമൊഴികെ മറ്റെല്ലാ രംഗങ്ങളും മികവ് പുലർത്തി. സാലു കെ. ജോർജ് എന്ന കലാസംവിധായകൻ അതിഗംഭീരമായ രീതിയിലാണ് യുദ്ധ ഭൂമിയിലെ സെറ്റുകൾ തയ്യാറാക്കിയിരിക്കുന്നത്. ഗോപി സുന്ദറിന്റെ പശ്ചാത്തല സംഗീതം ആവേശമുണർത്തുന്ന രീതിയിലായിരുന്നില്ല. സംജിത് കൂട്ടിയോജിപ്പിച്ച രംഗങ്ങൾ ഇഴഞ്ഞുനീങ്ങുന്ന പോലെ അനുഭവപെട്ടു. ചടുലത അർഹിക്കുന്ന യുദ്ധ രംഗങ്ങൾ പോലും വേഗതയില്ലാതെ അനുഭവപെട്ടു. നജിം അർഷാദ് ഈണമിട്ട ഹിന്ദി ഗാനം യുദ്ധത്തിനിടയിൽ കേൾക്കുമ്പോൾ പ്രത്യേകതയുള്ള പോലെ തോന്നി. രാഹുൽ സുബ്രമണ്യവും സിദ്ധാർഥ് വിപിനും ഈണമിട്ട മലയാള ഗാനവും തമിഴ് ഗാനവും തരക്കേടില്ലായിരുന്നു. മാഫിയ ശശിയാണ് സംഘട്ടനങ്ങൾ സംവിധാനം ചെയ്തത്. യുദ്ധത്തിന്റെ വീര്യം പകുതിയിൽ ചോർന്നുപോകുന്ന രീതിയിലായിരുന്നു പല സംഘട്ടന രംഗങ്ങളും. സായ് നിർവഹിച്ച ചമയം കൃത്രിമത്വം നിറഞ്ഞതായിരുന്നു. സുദേവനാണ് വസ്ത്രാലങ്കാരം.

അഭിനയം: ⭐⭐
മേജർ സഹദേവനായും മേജർ മഹാദേവനായും അഭിനയിച്ച മോഹൻലാൽ രണ്ടു കഥാപാത്രങ്ങളെയും ഒരുപോലെ അവതരിപ്പിച്ചു. രണ്ടു കഥാപാത്രങ്ങളിലും അഭിനയത്തിന്റെ കാര്യത്തിൽ വ്യത്യസ്ത കൊണ്ടുവരാനൊന്നും അദ്ദേഹം ശ്രമിച്ചിട്ടില്ല. രണ്ടു കഥാപാത്രങ്ങളും കാഴ്ചയിലും പെരുമാറ്റത്തിലും ഒരുപോലെ തന്നെ. പാക് ആർമിയുടെ തലവനായി ഹിന്ദി നടൻ അരുണോദയ് സിംഗ് തിളങ്ങി. ഈ സിനിമയിലെ ഏറ്റവും ശ്രദ്ധിക്കപ്പെട്ട അഭിനയവും അരുണോദയിന്റെതാണ്. ഇവരെ കൂടാതെ ആശാ ശരത്, അല്ലു സിരിഷ്, രഞ്ജി പണിക്കർ, സുധീർ സുകുമാരൻ, കണ്ണൻ പട്ടാമ്പി, സൈജു കുറുപ്പ്, സുധീർ കരമന, വിജയകൃഷ്ണൻ, മണിക്കുട്ടൻ, ടിനി ടോം, കൃഷ്ണകുമാർ, പത്മരാജ് രതീഷ്, ദേവൻ, ബാലാജി, ഷാജു ശ്രീധർ, കൃഷ്ണപ്രസാദ്‌, മേഘനാഥൻ, കോഴിക്കോട് നാരായണൻ നായർ, കൊല്ലം തുളസി, സേതുലക്ഷ്മി എന്നിവരും ഈ സിനിമയിലെ പ്രധാന കഥാപാത്രങ്ങളാകുന്നു. അവരവരുടെ വേഷങ്ങൾ തരക്കേടില്ലാതെ ഏവരും അഭിനയിച്ചു.

വാൽക്കഷ്ണം: ആവേശമുണർത്തുന്ന യുദ്ധ രംഗങ്ങളുമില്ല വികാരമുണർത്തുന്ന പട്ടാള സിനിമയുമല്ല!

തിരക്കഥ, സംവിധാനം: മേജർ രവി
സംഭാഷണം: ഷിജു നമ്പ്യാത്
നിർമ്മാണം: ഹനീഫ് മുഹമ്മദ്
ബാനർ: റെഡ് റോസ് ക്രിയേഷൻസ്
ഛായാഗ്രഹണം: സുജിത് വാസുദേവ്
ചിത്രസന്നിവേശം: സംജിത്
പശ്ചാത്തല സംഗീതം: ഗോപി സുന്ദർ
കലാസംവിധാനം: സാലു കെ.ജോർജ്
സംഗീതം: സിദ്ധാർഥ് വിപിൻ, നജിം അർഷാദ്, രാഹുൽ സുബ്രമണ്യം
ഗാനരചന: ഹരിനാരായണൻ, മോഹൻ രാജൻ, കമാൽ കാർത്തിക്, നിഖിൽ മട്ടത്തിൽ
ചമയം: സായ്
വസ്ത്രാലങ്കാരം: സുദേവൻ
സംഘട്ടനം: മാഫിയ ശശി
നൃത്തസംവിധാനം: പ്രസന്ന സുജിത്
വിതരണം: റെഡ് റോസ് റിലീസ്.

മുന്തിരിവള്ളികൾ തളിർക്കുമ്പോൾ – ⭐⭐⭐


ദാമ്പത്യ പ്രണയം പൂവിടുമ്പോൾ… – ⭐⭐⭐

“നമുക്ക് ഗ്രാമങ്ങളിൽ ചെന്ന് രാപാർക്കാം, അതികാലത്ത് മുന്തിരിതോട്ടങ്ങളിൽപോയി മുന്തിരിവള്ളി തളിർത്തു പൂവിടുകയും മാതള നാരകം പൂക്കുകയും ചെയ്തോ എന്ന് നോക്കാം.
അവിടെ വെച്ചു ഞാൻ നിനക്കെന്റെ പ്രേമം തരും.” – കെ.കെ.സുധാകരന്റെ ‘നമുക്ക് ഗ്രാമങ്ങളിൽ ചെന്ന് രാപ്പാർക്കാം’ എന്ന നോവലിലെ ഒരു വാചകം.

ഒരു വ്യക്തിയുടെ സമസ്തമേഖലകളിലെയും വിജയം ദാമ്പത്യ ജീവിതത്തിലെ വിജയത്തെ ആശ്രയിച്ചിരിക്കുന്നു. തകർന്ന കുടുംബബന്ധങ്ങൾ മറ്റു മേഖലകളിലെ പരാജയത്തിന് കാരണമാകുന്നു. ‘എന്റെ ഭാര്യയാണ് എന്റെ ജീവിതം’ എന്ന സന്ദേശം അർത്ഥവത്താക്കുന്ന ഒരുപിടി നല്ല മുഹൂർത്തങ്ങളിലൂടെ ആവിഷ്കരിച്ചിരിക്കുന്ന ഈ സിനിമയിൽ ഒട്ടനവധി സന്ദേശങ്ങൾ കുടുംബങ്ങൾക്കായി ഉൾപ്പെടുത്തിയിട്ടുണ്ട്.

വി.ജെ.ജെയ്മ്സിന്റെ ‘പ്രണയോപനിഷത്’ എന്ന ചെറുകഥയെ ആസ്പദമാക്കി എം.സിന്ധുരാജ് രചന നിർവഹിച്ച മുന്തിരിവള്ളികൾ തളിർക്കുമ്പോൾ സംവിധാനം ചെയ്തിരിക്കുന്നത് ജിബു ജേക്കബാണ്. പ്രമോദ് പിള്ള ഛായാഗ്രഹണവും, സൂരജ് എസ്. ചിത്രസന്നിവേശവും, ബിജിബാൽ പശ്ചാത്തല സംഗീതവും, എം.ജയചന്ദ്രൻ-ബിജിബാൽ ടീം പാട്ടുകളുടെ സംഗീത സംവിധാനവും നിർവഹിച്ചിരിക്കുന്നു. ബാംഗ്ലൂർ ഡെയ്‌സ്, കാട് പൂക്കുന്ന നേരം എന്നീ സിനിമകൾക്ക്‌ ശേഷം വീക്കെൻഡ് ബ്ലോക്ബസ്റ്ററിന്റെ ബാനറിൽ സോഫീയ പോൾ നിർമ്മിച്ചിരിക്കുന്ന ഈ സിനിമയിൽ മോഹൻലാലും മീനയും പ്രധാന കഥാപാത്രങ്ങളെ അവതരിപ്പിച്ചിരിക്കുന്നു.

പ്രമേയം: ⭐⭐⭐
ദമ്പതികൾ തമ്മിൽ എങ്ങനെ സ്നേഹിക്കണമെന്നും, ആശയവിനിമയം എങ്ങനെ ഫലപ്രദമാക്കാം എന്നും, മറ്റു ബന്ധങ്ങളുടെ പ്രലോഭനങ്ങളിൽ നിന്നും എങ്ങനെ രക്ഷപെടാമെന്നും, മക്കളോട് എങ്ങനെ സ്നേഹം പ്രകടിപ്പിക്കണമെന്നും, മാതാപിതാക്കൾ തമ്മിലുള്ള സ്നേഹം കുട്ടികളുടെ സ്വഭാവരൂപീകരണത്തിൽ സ്വാധീനം ചെലുത്തുന്നുണ്ട് എന്നും ഈ സിനിമയിലൂടെ ചർച്ചചെയ്യുന്നു. കുടുംബങ്ങളിൽ വലിയ അളവിൽ സ്വാധീനം ചെലുത്തുവാൻ സാധ്യതയുള്ള ഒരു വിഷയം ഒരുപാട് നാളുകൾക്കു ശേഷമാണ് മലയാള സിനിമയിൽ പ്രേമേയമാകുന്നത്. ഒരുപക്ഷെ അത് തന്നെയാകും ഈ സിനിമയുടെ വിജയവും.

തിരക്കഥ: ⭐⭐⭐
എം.സിന്ധുരാജ് തിരക്കഥയും സംഭാഷണങ്ങളും രചിച്ച മുന്തിരിവള്ളികൾ തളിർക്കുമ്പോളിൽ ദാമ്പത്യ ജീവിതത്തിലെ അസ്വാരസ്യങ്ങൾ സൃഷ്ടിക്കുന്ന പല സംഭവങ്ങളും ചർച്ചാവിഷയമാകുന്നുണ്ട്. അവിഹിത ബന്ധങ്ങളും അമിതമായ ഫോൺ ഉപയോഗവും മൂലം കുടുംബത്തിൽ ചിലവിടാൻ സമയമില്ലായ്മ ഉണ്ടാവുകയും ചെയ്യുന്നു. മേല്പറഞ്ഞ വിഷയം കുടുംബങ്ങളെ ബാധിക്കാതിരിക്കണമെങ്കിൽ, കുടുംബനാഥൻ അയാളുടെ സുഹൃത്തുക്കളെയോ മറ്റു ബന്ധങ്ങളെയോ സ്നേഹിക്കുന്നതിനേക്കാൾ തന്റെ ഭാര്യയെ സ്നേഹിക്കുക എന്ന സന്ദേശമാണ് ഈ സിനിമയിലൂടെ സമൂഹത്തിനു നൽകുന്നത്. ഈ ആശയം പ്രേക്ഷകരിലേക്കെത്തിക്കുവാനുള്ള കഥാസന്ദർഭങ്ങളാണ് ഈ സിനിമയുടെ തിരക്കഥയിലുള്ളത്. വിശ്വസനീയമായ കഥാസന്ദർഭങ്ങളും സംഭാഷണങ്ങളുമാണ് ഈ സിനിമയെ വ്യത്യസ്ഥമാക്കുന്നത്. സിനിമയുടെ ആദ്യപകുതിയുടെ തുടക്കത്തിൽ മേല്പറഞ്ഞ വിഷയത്തിലേക്കു എത്തിച്ചേരുവാൻ ഒട്ടനവധി കഥാസന്ദർഭങ്ങൾ ഉൾപ്പെടുത്തേണ്ട ആവശ്യകത ഉണ്ടായിരുന്നില്ല. അതുപോലെ മൂലകഥയിൽ പ്രാധാന്യമില്ലാത്ത കുറെ കഥാപാത്രങ്ങൾ സിനിമയിൽ ഉടനീളമുണ്ട്. ഈ പറഞ്ഞ കുറവുകളൊക്കെ തിരക്കഥയിൽ ഉണ്ടെങ്കിലും, എന്റെ ജീവിതം എന്റെ ഭാര്യയാണ് എന്നത്തിന്റെ പൂർണ അർഥം പ്രേക്ഷക മനസ്സുകളിലേക്ക് ആഴ്നിറങ്ങുവാൻ സാധിക്കുന്ന രീതിയിൽ തിരക്കഥ എഴുതുവാൻ എം.സിന്ധുരാജിന് സാധിച്ചു എന്നതാണ് തിരക്കഥാകൃത്തിന്റെ വിജയം. അഭിനന്ദനങ്ങൾ!

സംവിധാനം:⭐⭐⭐
വെള്ളിമൂങ്ങ എന്ന ആദ്യ സിനിമയിലൂടെ പ്രേക്ഷകരുടെ മനംകവർന്ന സംവിധായകനാണ് ജിബു ജേക്കബ്. നല്ല പ്രമേയവും കഥയും തിരഞ്ഞെടുത്തു കുടുംബങ്ങൾക്ക് ഇഷ്ടപെടുന്ന രീതിയിലുള്ള കഥാസന്ദർഭങ്ങൾ കൂട്ടിച്ചേർത്തു കഥാപാത്രങ്ങൾക്ക് അനിയോജ്യരായ നടീനടമാരെ അഭിനയിപ്പിച്ചു കൃത്യതയോടെ സംവിധാനം നിർവഹിച്ചു നല്ലൊരു സന്ദേശം സമൂഹത്തിലെത്തിക്കുവാൻ ജിബു ജേക്കബ് നടത്തിയ പരിശ്രമം വിജയിച്ചിരിക്കുന്നു. ഇഴഞ്ഞു നീങ്ങുന്ന അവതരണവും സിനിമയുടെ ദൈർഘ്യവും, കഥയിൽ പ്രാധാന്യമില്ലാത്ത കഥാപാത്രങ്ങളും മാത്രമാണ് ഈ സിനിമയുടെ പോരായ്മയായി അവശേഷിക്കുന്നത്. ദൃശ്യത്തിന് ശേഷം പ്രേക്ഷകർക്ക് ഇഷ്ടപെടുന്ന മോഹൻലാലിനെ അവതരിപ്പിച്ചു എന്നതാണ് ഈ സിനിമയുടെ വിജയഘടകങ്ങളിൽ ഒന്ന്. സിനിമയുടെ രണ്ടാം പകുതിയും ക്‌ളൈമാക്‌സും മികവോടെ അവതരിപ്പിച്ചതാണ് മറ്റൊരു ഘടകം. ഇനിയും ഇതുപോലുള്ള സിനിമകൾ നിർമ്മിക്കുവാൻ സോഫിയ പോളിനും സാധിക്കട്ടെ. സ്നേഹത്തിന്റെ മുന്തിരിവള്ളികൾ കുടുംബങ്ങളിൽ പൂത്തുതളിർക്കട്ടെ!

സാങ്കേതികം: ⭐⭐⭐
പ്രമോദ് പിള്ളയുടെ ഛായാഗ്രഹണം സിനിമയുടെ കഥയോടും പശ്ചാത്തലത്തിനോടും ചേർന്ന് നിൽക്കുന്നു. എന്നാൽ സൂരജിന്റെ സന്നിവേശം വേണ്ടുവോളം മികവ് പുലർത്തിയില്ല. സിനിമയുടെ ആദ്യ പകുതിയിലെ രംഗങ്ങൾ പലതും കഥയിൽ പ്രാധാന്യമില്ലാത്തതും വലിച്ചുനീട്ടിയിരിക്കുന്ന രീതിയിലുമായി അനുഭവപെട്ടു. സിനിമയുടെ ദൈർഘ്യം ഒരല്പം കൂടുതലായത് പ്രേക്ഷകരിൽ മുഷിപ്പുണ്ടാക്കുന്നതിനു വഴിയൊരുക്കിയിട്ടുണ്ട്. ബിജിബാലിന്റെ പശ്ചാത്തല സംഗീത സംവിധാനം രംഗങ്ങളുടെ മാറ്റുകൂട്ടുന്നതിനു സഹായിച്ചിട്ടുണ്ട്. റഫീഖ് അഹമ്മദ്, മധു വാസുദേവ്, അജിത്കുമാർ എന്നിവരുടെ വരികൾക്ക് എം.ജയചന്ദ്രനും ബിജിബാലും ഈണമിട്ട മൂന്ന് പാട്ടുകളാണുള്ളത്. ശരാശരിയിലൊതുങ്ങുന്ന പാട്ടുകളാണ് മൂന്നും. അജയ് മങ്ങാടിന്റെ കലാസംവിധാനവും സജി കൊരട്ടിയുടെ ചമയവും മികവ് പുലർത്തി. നിസാർ റഹ്മത്തിന്റെ വസ്ത്രാലങ്കാര മികവിനാൽ മോഹൻലാൽ പതിവിലും പ്രായക്കുറവ് തോന്നിപ്പിക്കുന്ന രീതിയിലായി. രംഗനാഥ് രവിയാണ് ശബ്ദരൂപീകരണം നിർവഹിച്ചത്.

അഭിനയം: ⭐⭐⭐⭐
മോഹൻലാൽ, മീന, അനൂപ് മേനോൻ, ശ്രിന്ദ അഷബ്, ഐമ റോസ്മി സെബാസ്റ്റ്യൻ, മാസ്റ്റർ സനൂപ്, അലൻസിയാർ ലേ ലോപസ്, സുരാജ് വെഞ്ഞാറമൂട്, കലാഭവൻ ഷാജോൺ, ഷറഫുദ്ധീൻ, സുധീർ കരമന, സുരേഷ് കൃഷ്ണ, മേഘനാഥൻ, സോഹൻ സീനുലാൽ, ജോയ് മാത്യു, രാഹുൽ മാധവ്, കെ.എൽ.ആന്റണി, ലിഷോയ്, രാജേഷ് പറവൂർ, ഗണപതി, നന്ദു, ശശി കലിങ്ക, കുമരകം രഘുനാഥ്, ആശ ശരത്,
നേഹ സക്‌സേന, ബിന്ദു പണിക്കർ, രശ്മി ബോബൻ, മഞ്ജു സുനിൽ, ലീന ആന്റണി, അംബിക മോഹൻ എന്നിവരാണ് ഈ സിനിമയിലെ അഭിനേതാക്കൾ. ഉലഹന്നാൻ എന്ന കഥാപാത്രത്തെ തന്മയത്വത്തോടെ അവതരിപ്പിക്കുവാൻ മറ്റൊരു നടനും സാധിക്കുകയില്ല എന്ന് അടിവരയിട്ടു സ്ഥാപിച്ചിരിക്കുകയാണ് നടനവിസ്മയം മോഹൻലാൽ. ഇത്രയും ആസ്വാദ്യകരമായി പ്രണയത്തെ അവതരിപ്പിക്കുവാൻ മോഹൻലാലിനല്ലാതെ മലയാള സിനിമയിൽ നിലവിലുള്ള ഒരു നടനും സാധിക്കുകയില്ല എന്നത് നിസംശയം പറയാം. പാവാട ബാബുവിന് ശേഷം അഭിനയ സാധ്യതയുള്ള വേണുക്കുട്ടൻ എന്ന കഥാപാത്രത്തെ മികവോടെ അവതരിപ്പിച്ചു കയ്യടി നേടുവാൻ അനൂപ് മേനോന് സാധിച്ചു. ദൃശ്യത്തിന് ശേഷം മീനയ്ക്കും ലഭിച്ച നല്ല വേഷമാണ് ഈ സിനിമയിലെ ആനിയമ്മ. അലൻസിയാർ, ഷാജോൺ, ഐമ റോസ്മി, ശ്രിന്ദ, മഞ്ജു സുനിൽ എന്നിവരും അവരവർക്കു ലഭിച്ച കഥാപാത്രം ഗംഭീരമാക്കി.

വാൽക്കഷ്ണം: സ്നേഹത്തിന്റെ സന്തോഷത്തിന്റെ മുന്തിരിവള്ളികൾ നിങ്ങളുടെ കുടുംബത്തിലും പടർന്നുപിടിക്കണമെങ്കിൽ ഈ സിനിമ തീർച്ചയായും കണ്ടിരിക്കണം!

സംവിധാനം: ജിബു ജേക്കബ്
രചന: എം.സിന്ധുരാജ്
നിർമ്മാണം: സോഫിയാ പോൾ
ബാനർ: വീക്കെൻഡ് ബ്ലോക്ബസ്റ്റർ
ഛായാഗ്രഹണം: പ്രമോദ് പിള്ള
ചിത്രസന്നിവേശം: സൂരജ് എസ്.
പശ്ചാത്തല സംഗീതം: ബിജിബാൽ
ഗാനരചന: റഫീഖ് അഹമ്മദ്, മധു വാസുദേവ്, അജിത്കുമാർ ഡി.ബി.
സംഗീതം: എം.ജയചന്ദ്രൻ, ബിജിബാൽ
കലാസംവിധാനം: അജയൻ മാങ്ങാട്
ചമയം: സജി കൊരട്ടി
വസ്ത്രാലങ്കാരം: നിസാർ റഹ്മത്
ശബ്ദമിശ്രണം: അജിത് എ.ജോർജ്
ശബ്ദരൂപീകരണം: രംഗനാഥ് രവി
വിതരണം: വീക്കെൻഡ് ബ്ലോക്ബസ്റ്റർ റിലീസ്.

പുലിമുരുകൻ – ⭐⭐⭐


രോമാഞ്ചമുണർത്തുന്ന ആക്ഷൻ എന്റർറ്റെയിനർ! – ⭐⭐⭐

മുരുകാ മുരുകാ പുലിമുരുകാ…
ഇനി അമ്പരമുയരണം വേൽമുരുകാ…
പോരിനിറങ്ങിയ പോരഴകാ…
മിഴി ചെങ്കനലാകണം പുലിമുരുകാ…

(ബി.കെ.ഹരിനാരായണന്റെ വരികൾക്ക് ഗോപി സുന്ദർ ഈണമിട്ട മലയാള സിനിമാ പ്രേമികളുടെ പ്രിയപ്പെട്ട ഗാനം).

യുക്തിയില്ലാത്ത കഥാസന്ദർഭങ്ങളും നിലവാരമില്ലാത്ത സംഭാഷണങ്ങളും കൃത്യമായി സമന്വയിപ്പിച്ചു എഴുതിയ തിരക്കഥയെ അത്യുഗ്രൻ സാങ്കേതികമികവോടെ അവതരിപ്പിച്ച പക്കാ ആക്ഷൻ എന്റർറ്റെയിനറാണ് പുലിമുരുകൻ.

മുളകുപാടം ഫിലിംസിന്റെ ബാനറിൽ ടോമിച്ചൻ മുളകുപാടം നിർമ്മിച്ചിരിക്കുന്ന പുലിമുരുകന്റെ രചന നിർവഹിച്ചത് ഉദയകൃഷ്ണയാണ്. പോക്കിരിരാജ, സീനിയേഴ്സ്, മല്ലു സിംഗ്‌, സൗണ്ട് തോമ, വിശുദ്ധൻ, കസിൻസ് എന്നീ സിനിമകൾക്ക് ശേഷം വൈശാഖ് സംവിധാനം ചെയ്ത പുലിമുരുകനിൽ പ്രശസ്തരായ സാങ്കേതികപ്രവർത്തകരും അഭിനേതാക്കളും ഒന്നിച്ചിരിക്കുന്നു. മുളകുപാടം ഫിലിംസാണ് ഈ സിനിമയുടെ വിതരണം.

മെയ്വഴക്കത്തിന്റെ മുരുകാവതാരം മോഹൻലാൽ, ആക്ഷൻ കുലപതി പീറ്റർ ഹെയ്ൻ, സംഗീത മാന്ത്രികൻ ഗോപി സുന്ദർ, ദൃശ്യവിരുന്നൊരുക്കിയ ഷാജി കുമാർ, ഇടിമുഴക്കം സൃഷ്ട്ടിച്ച ശബ്ദലേഖകൻ തപസ് നായക്, കാട്ടിലെ സെറ്റുകൾ ഒരുക്കിയ ജോസഫ് നെല്ലിക്കൽ, പണംമുടക്കിയ ടോമിച്ചൻ മുളകുപാടം, പുലിമുരുകനെ പുപ്പുലിമുരുകനാക്കിയ സംവിധായകൻ വൈശാഖ് എന്നിവർ കൈകോർത്തുകൊണ്ടു മലയാള സിനിമയുടെ യശസ്സ് വാനോളം ഉയർത്തിയിരിക്കുന്നു.

പ്രമേയം: ⭐⭐
നരഭോജികളായ പുലികളും കടുവകളും വാഴുന്ന പുലിയൂർ ഗ്രാമം. പുലികളെ അതിന്റെ മടയിൽ ചെന്ന് കൊല്ലുന്ന വേട്ടക്കാരൻ പുലിയൂർ മുരുകൻ. മൃഗവും(പുലിയും)മനുഷ്യനും (പുലിമുരുകനും)തമ്മിലുള്ള പോരാട്ടമാണ് പുലിമുരുകൻ എന്ന സിനിമയുടെ പ്രമേയം. പുലിയൂരിലെ പേടിസ്വപ്നമായി വരയൻ പുലികളെക്കാൾ വലിയ ശത്രുക്കൾ നാട്ടിലെ മനുഷ്യരാണെന്നു തിരിച്ചറിയുകയുന്ന പുലിമുരുകന്റെ കഥയാണിത്. ഉദയകൃഷ്ണ സ്വതന്ത്രമായി കഥയെഴുതുന്ന ആദ്യ സിനിമകൂടിയാണിത്. ലോഹിതദാസ്-ഐ.വി.ശശി-മമ്മൂട്ടി ടീമിന്റെ മൃഗയ എന്ന സിനിമയ്ക്ക് ശേഷം മലയാള സിനിമയിൽ എഴുതപെട്ട പുലിവേട്ട പ്രമേയമാക്കിയ കഥയാണ് പുലിമുരുകൻ.

തിരക്കഥ: ⭐
ഉദയകൃഷ്ണ സ്വതന്ത്ര തിരക്കഥാകൃത്താവുന്ന ആദ്യ സിനിമയുടെ തിരക്കഥയെ ഒറ്റവാക്കിൽ പരിതാപകരം എന്നല്ലാതെ മറ്റൊന്നും വിശേഷിപ്പിക്കുവാനില്ല. മൃഗങ്ങളും മനുഷ്യരും തമ്മിലുള്ള പോരാട്ടത്തിന്റെയും വേട്ടയുടെയും കഥ പറയുന്നതിനിടയിൽ കാട്ടിലെ കഞ്ചാവ് കൃഷിയും ചന്ദന കള്ളക്കടത്തും മരുന്ന് നിർമ്മാണവും കുത്തിക്കയറ്റി യുക്തിയെ ചോദ്യം ചെയ്യുന്ന കഥാസന്ദർഭങ്ങളാക്കിമാറ്റി. അതിനു മാറ്റുകൂട്ടുവാനായി അസഭ്യങ്ങൾ തിരുകികയറ്റിയ സംഭാഷണങ്ങളും അന്യഭാഷാ സിനിമകളെ ഓർമ്മിപ്പിക്കുന്ന തരത്തിലുള്ള മസാല സംഘട്ടന രംഗങ്ങൾക്ക് വേണ്ടിയുള്ള കഥാസന്ദർഭങ്ങളും കോർത്തിണക്കിയ ദുരന്തമാണ് ഈ സിനിമയുടെ തിരക്കഥ. സിനിമയുടെ രണ്ടാം പകുതിയിലെ ഒട്ടുമിക്ക രംഗങ്ങളുടെ കഥാസന്ദർഭങ്ങളും ചില തെലുങ്ക് സിനിമകളെ ഓർമ്മിപ്പിച്ചു. പൂങ്കായ് ശശി, ജൂലി എന്നീ കഥാപാത്രങ്ങളുടെ ആവശ്യകത എന്താണെന്നു മനസ്സിലാകുന്നില്ല. അതുപോലെ കൃത്യമായ ഇടവേളകളിൽ മൂപ്പനെ കൊണ്ടുവന്നു മുരുകനെ പുകഴ്ത്തുന്നതും അരോചകമായി തോന്നി. പുലിയുമായുള്ള ആദ്യ സംഘട്ടന രംഗം മാത്രം മതിയായിരുന്നു പുലിമുരുകന്റെ സവിശേഷതയെന്തെന്നു പ്രേക്ഷകർക്ക് മനസ്സിലാക്കുവാൻ. ഇത്രയും സിനിമകൾക്ക് തിരക്കഥ എഴുതിയ പരിചയസമ്പത്തുള്ള ഒരു എഴുത്തുകാരനിൽ നിന്നും ഒരല്പംകൂടി നിലവാരം പ്രതീക്ഷിക്കുന്നു.

സംവിധാനം: ⭐⭐⭐⭐
രണ്ടു വർഷത്തെ പ്രയത്നത്തിനൊടുവിൽ സിനിമാ പ്രേമികളെ ആസ്വാദനത്തിന്റെ കൊടുമുടിയിലെത്തിക്കുവാൻ സംവിധായകൻ വൈശാഖിനു സാധിച്ചു. നിലവാരമില്ലാത്ത തിരക്കഥയെ അസാധാരണ സിനിമാനുഭവമാക്കിയ വൈശാഖിനു അഭിനന്ദനങ്ങൾ! ഇന്ത്യൻ സിനിമയിലെ മികച്ച സങ്കേത്തിക പ്രവർത്തകരെ ഉൾപ്പെടുത്തി മികച്ചൊരു ആക്ഷൻ സിനിമയെടുക്കുവാൻ വൈശാഖിനു കഴിഞ്ഞിട്ടുണ്ട്. അനാവശ്യ കഥാപാത്രങ്ങളും ആക്ഷന് വേണ്ടി എഴുതപെട്ട രംഗങ്ങളും ഒഴുവാക്കി സിനിമയുടെ ദൈർഘ്യം കുറച്ചിരുന്നുവെങ്കിൽ എല്ലാത്തരം പ്രേക്ഷകരെയും ഈ സിനിമ ആസ്വദിപ്പിക്കുമായിരുന്നു. മോഹൻലാൽ എന്ന നടനെയും താരത്തെയും സമീപകാലത്തു പൂർണമായി ഉപയോഗിച്ച സംവിധായകരിൽ ഒരാളാണ് വൈശാഖ്. ലാലേട്ടൻ എന്ന നടന്റെ കുടുംബ സിനിമകൾ ഇഷ്ടപെടുന്ന പ്രേക്ഷകർക്കും ആക്ഷൻ സിനിമകൾ ഇഷ്ടപെടുന്ന പ്രേക്ഷകർക്കും ത്രില്ലർ സിനിമകൾ ഇഷ്ടപെടുന്ന പ്രേക്ഷകർക്കും ഒരുപോലെ ഇഷ്ടമാകുന്ന എല്ലാ ചേരുവകളും പുലിമുരുകനിൽ വൈശാഖ് ഉൾപ്പെടുത്തിയിട്ടുണ്ട്. സിനിമയുടെ ആരംഭത്തിൽ മാസ്റ്റർ അജാസും പുലിയും തമ്മിലുള്ള സംഘട്ടന രംഗവും, സിനിമയുടെ അവസാനം വില്ലന്മാരും പുലിയും മുരുകനും നടത്തുന്ന സംഘട്ടന രംഗങ്ങളും അത്യുഗ്രനായി ചിത്രീകരിച്ചിരിക്കുന്നു. പീറ്റർ ഹെയ്ൻ, ഗോപി സുന്ദർ, ജോസഫ് നെല്ലിക്കൽ, ഷാജി കുമാർ, ജോൺകുട്ടി, തപസ് നായക് തുടങ്ങിയ തിരക്കേറിയവരെ ഈ സിനിമയിൽ ഉൾപ്പെടുത്തുവാൻ തീരുമാനിച്ചതാണ് ഈ സിനിമ ഇത്രയും വലിയ നിലയിലെത്തിയത്. നരസിംഹം, ദൃശ്യം എന്നീ സിനിമകൾക്ക് ശേഷം മോഹൻലാലിൻറെ ആരാധകരെ ആവേശഭരിതരാക്കിയ മറ്റൊരു സിനിമയും അടുത്തകാലത്തുണ്ടായിട്ടില്ല. അഭിനന്ദനങ്ങൾ!

സാങ്കേതികം:⭐⭐⭐⭐⭐
മലയാള സിനിമ ഇന്നോളം കണ്ടിട്ടില്ലാത്ത അത്യുഗ്രൻ ആക്ഷൻ രംഗങ്ങൾ സംവിധാനം ചെയ്ത പീറ്റർ ഹെയ്ൻ അക്ഷരാർത്ഥത്തിൽ പ്രേക്ഷകരെ ഞെട്ടിച്ചു. രണ്ടര മണിക്കൂർ പ്രേക്ഷകരെ ആകാംഷയുടെ മുൾമുനയിൽ നിർത്തുവാൻ ഗോപി സുന്ദറിന്റെ പശ്ചാത്തല സംഗീതത്തിനും സാധിച്ചു. കാടിന്റെ ദൃശ്യചാരുത ഒപ്പിയെടുത്തുകൊണ്ടു ഷാജി കുമാർ കണ്ണിന്നു കുളിർമയുള്ള വിരുന്നൊരുക്കി. അതിഗംഭീരമായ വിഷ്വൽസാണ് ഷാജി ഈ സിനിമയ്ക്ക് വേണ്ടി ഒരുക്കിയത്. ജോൺകുട്ടിയുടെ സന്നിവേശവും മികവ് പുലർത്തി. കഥയിൽ പ്രാധാന്യമില്ലാത്ത ഒട്ടനവധി കഥാസന്ദർഭങ്ങൾ ഒഴുവാക്കാമായിരുന്നു. എന്നിരുന്നാലും അവയെല്ലാം ചിത്രീകരിച്ചിരിക്കുന്ന രീതി മികവുറ്റതായതിനാൽ പ്രേക്ഷകരെ മുഷിപ്പിച്ചില്ല. ഓരോ രംഗങ്ങളും മറ്റൊരു തലത്തിലെത്തിക്കുവാൻ തപസ് നായ്കിന്റെ ശബ്ദലേഖനത്തിനും കഴിഞ്ഞു. കാട്ടിലെ സെറ്റുകളും, മുരുകന്റെ വീടും, പുലിയെ കൊല്ലുന്ന ഗുഹയും തുടങ്ങി എല്ലാ സ്ഥലങ്ങളും വിശ്വസനീയമായി അനുഭവപ്പെട്ടത് ജോസഫ് നെല്ലിക്കലിന്റെ കലാസംവിധാന മികവുകൊണ്ടാണ്. സജി കൊരട്ടിയുടെ ചമയവും അരുൺ മനോഹറിന്റെ വസ്ത്രാലങ്കാരവും മുരുകന് ഇതുവരെ കാണാത്ത വേഷപ്പകർച്ച നൽകി. മലയാള സിനിമയിൽ പഴശ്ശിരാജയ്ക്കു ശേഷം സാങ്കേതികമികവോടെ അവതരിപ്പിച്ച ഏക സിനിമയാണിത്. ഏവർക്കും അഭിനന്ദനങ്ങൾ!

അഭിനയം: ⭐⭐⭐⭐
മോഹൻലാൽ, ലാൽ, ജഗപതി ബാബു, മകരന്ദ് ദേശ്പാണ്ഡെ, കിഷോർ, സിദ്ദിക്ക്, ബാല, വിനു മോഹൻ, സുരാജ് വെഞ്ഞാറമൂട്, നോബി, ഹരീഷ് പരേഡി, സുധീർ കരമന, നന്ദുലാൽ, ഗോപകുമാർ, ശശി കലിങ്ക, ചെമ്പിൽ അശോകൻ, ഇടവേള ബാബു, വിജയകൃഷ്ണൻ, ചാലി പാലാ, ആന്റണി പെരുമ്പാവൂർ, കണ്ണൻ പട്ടാമ്പി, സന്തോഷ് കീഴാറ്റൂർ, വിനോദ് കെടാമംഗലം, മാസ്റ്റർ അജാസ്, കമാലിനി മുഖർജി, നമിത, സേതുലക്ഷ്മി, അഞ്ജലി ഉപാസന എന്നിവർ പ്രധാന കഥാപാത്രങ്ങളെ അവതരിപ്പിച്ചിരിക്കുന്നു. അഭിനയമികവിന്റെ മെയ്വഴക്കത്തിന്റെ നടനവൈഭവത്തിന്റെ പര്യായമാണെന്ന് ഒരിക്കൽക്കൂടി തെളിയിച്ചിരിക്കുകയാണ് മോഹൻലാൽ. ഹാസ്യ രംഗങ്ങളും ആക്ഷൻ രംഗങ്ങളും ഒരേ മികവോടെ അഭിനയിച്ചു ഫലിപ്പിക്കുവാൻ മോഹൻലാലിന് സാധിച്ചു. പൂവള്ളി ഇന്ദുചൂഢനും മേജർ മഹാദേവനും ശേഷം പ്രേക്ഷകർ ഹർഷാരവത്തോടെ നെഞ്ചിലേറ്റിയ കഥാപാത്രമാണ് പുലിയൂർ മുരുകൻ. ബലരാമൻ എന്ന കഥാപാത്രമായി ലാലും, ഡാഡി ഗിരിജ എന്ന വില്ലൻ വേഷത്തിൽ തെലുങ്ക് നടൻ ജഗപതി ബാബുവും, ആർ.കെ.യായി കിഷോറും അഭിനയമികവ് പുലർത്തി. മുരുകന്റെ ഭാര്യവേഷം അവതരിപ്പിച്ച കമാലിനി മുഖർജിയും പൂങ്കായ് ശശിയായി സുരാജ് വെഞ്ഞാറമൂടും, ജൂലിയായ് നമിതയും നിരാശപ്പെടുത്തി.

വാൽക്കഷ്ണം: സാങ്കേതികമികവിന്റെ പുതിയരോദ്ധ്യായം മലയാള സിനിമയ്ക്ക് സമ്മാനിച്ച പുലിമുരുകൻ തിയറ്ററുകളിൽ തന്നെ കാണുന്ന പ്രേക്ഷകരെ ഈ സിനിമ നിരാശപ്പെടുത്തില്ല.

സംവിധാനം: വൈശാഖ്
നിർമ്മാണം: ടോമിച്ചൻ മുളകുപാടം
ബാനർ: മുളകുപാടം ഫിലിംസ്
രചന: ഉദയകൃഷ്ണ
സംഘട്ടനം: പീറ്റർ ഹെയ്ൻ
പശ്ചാത്തല സംഗീതം: ഗോപി സുന്ദർ
ശബ്ദലേഖനം: തപസ് നായക്
ഛായാഗ്രഹണം: ഷാജി കുമാർ
ചിത്രസന്നിവേശം: ജോൺകുട്ടി
കലാസംവിധാനം: ജോസഫ് നെല്ലിക്കൽ
ഗാനരചന: റഫീഖ് അഹമ്മദ്, ബി.കെ.ഹരിനാരായണൻ
ചമയം: സജി കൊരട്ടി
വസ്ത്രാലങ്കാരം: അരുൺ മനോഹർ
വിതരണം: മുളകുപാടം റിലീസ്.

ഒപ്പം – ⭐⭐⭐


കേരളക്കരയാകെ ലാലേട്ടനോടൊപ്പം! – ⭐⭐⭐

ലാലേട്ടനോടൊപ്പം ലാലേട്ടൻ മാത്രം! ഒരു അന്ധന്റെ ഭാവപ്രകടനങ്ങളും ശാരീരിക ചലനങ്ങളും അതിസൂക്ഷ്മമായി നിരീക്ഷിച്ചു അതിഗംഭീരമായി അവതരിപ്പിച്ചു ഫലിപ്പിക്കുവാൻ നടനവൈഭവത്തിന്റെ ഇതിഹാസം മോഹൻലാലിന് സാധിച്ചു. അത് തന്നെയാണ് ഒപ്പത്തിനൊപ്പം ഒപ്പം മാത്രമെന്ന് പ്രേക്ഷകർ വിധിയെഴുതിയത്. മോഹൻലാൽ ഇതാദ്യമായിട്ടാണ് ഒരു മുഴുനീള അന്ധകഥാപാത്രത്തെ അവതരിപ്പിക്കുന്നത്. ജയരാമൻ ഒരു കൊലപാതക കുറ്റത്തിന്റെ ഏക സാക്ഷിയാകുന്നു. അതോടെ, ജയരാമന്റെ ഒപ്പം കൊലയാളി നിഴൽ പോലെ പിന്തുടരുന്നു. തുടർന്ന് ജയരാമന്റെ ജീവിതത്തിൽ സംഭവിക്കുന്നതാണ് ഒപ്പം എന്ന സിനിമയുടെ കഥ.

ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിച്ച ഒപ്പത്തിന്റെ കഥ ഗോവിന്ദ് വിജയൻ എന്ന പുതുമുഖത്തിന്റെയാണ്. ഗോവിന്ദിന്റെ കഥയ്ക്ക്‌ തിരക്കഥയും സംഭാഷണങ്ങളും എഴുതി സംവിധാനം ചെയ്തിരിക്കുന്നത് പ്രിയദർശനാണ്.

പ്രമേയം: ⭐⭐
നഗരത്തിലെ ഒരു ഫ്ലാറ്റിൽ ഒരാൾ കൊല്ലപ്പെടുന്നു. ആ കൊലപാതകിയെ കാണുന്ന ഏക ദൃക്‌സാക്ഷി ഒരു അന്ധനാണ്. ആ അന്ധൻ സ്വന്തം നിരപരാധിത്വം തെളിയിക്കുന്നതിനായി കൊലപാതകിയെ തേടുന്നു. ആ കൊലപാതകി അയാളുടെ അവസാനത്തെ ഇരയെ തേടി അന്ധനോപ്പം നിഴൽ പോലെ കൂടുന്നു. ഇതാണ് പ്രിയദർശന് വേണ്ടി ഗോവിന്ദ് വിജയൻ എഴുതിയ കഥ. കഥാവസാനം അന്ധൻ എങ്ങനെ കൊലയാളിയിൽ നിന്നും ഇരയെ രക്ഷപ്പെടുത്തുന്നു എന്നതാണ് ഈ സിനിമയുടെ ക്ലൈമാക്സ്.

തിരക്കഥ: ⭐⭐
ചന്ദ്രലേഖയ്ക്ക് ശേഷം പ്രിയദർശൻ തിരക്കഥ എഴുതുന്ന ഒരു മോഹൻലാൽ സിനിമയാണ് ഒപ്പം. ജയരാമൻ എന്ന കഥാപാത്രത്തിന്റെ കുടുംബത്തിൽ നിന്നും ആരംഭിക്കുന്ന കഥാസന്ദർഭങ്ങൾ ചെന്നെത്തുന്നത് അയാളുടെ ജോലിസ്ഥലമായ ഫ്‌ളാറ്റിലാണ്. ഫ്‌ളാറ്റിലെ ഓരോ കുടുംബവുമായും നല്ല സൗഹൃദത്തിലാണെന്നും കഥാസന്ദർഭങ്ങളിലൂടെ വിവരിക്കുന്നു. ആദ്യ പകുതിയിൽ പ്രിയദർശൻ സിനിമകളിൽ കണ്ടുമടുത്ത കഥാസന്ദർഭങ്ങൾ ഒട്ടനവധിയുണ്ട്. ജയരാമന്റെ സഹോദരനും ബന്ധുക്കളും ഫ്‌ളാറ്റിലെ അന്ധേവാസികളും പോലീസുകാരും തുടങ്ങി ഒട്ടുമിക്ക എല്ലാ കഥാപാത്രങ്ങളും പരിചിതമായ കഥാപാത്രങ്ങൾ തന്നെ. അവരുടെ സംഭാഷണങ്ങളും പ്രവചിക്കാനാവുന്ന രീതിയിലായതും പ്രിയദർശൻ സിനിമകളുടെ സ്ഥിരം ദൗർബല്യങ്ങളിൽ ഉൾപ്പെടുന്നു. രണ്ടാം പകുതിയിലെ ഉദ്യോഗജനകമായ കഥാസന്ദർഭങ്ങൾ മികവു പുലർത്തി. പോലീസ് സ്റ്റേഷനിലെ കളരിപ്പയറ്റ് സംഘട്ടനം, ഓട്ടോറിക്ഷ ഡ്രൈവറിനെ കൊല്ലുന്ന രംഗങ്ങൾ, ക്ലൈമാക്സ് സംഘട്ടന രംഗങ്ങൾ എന്നിവ ഒപ്പം സിനിമയ്ക്ക് ജീവൻ നൽക്കി. അന്ധനായ നായക കഥാപാത്രം തന്റെ നിരപരാധിത്വം തെളിയിക്കുന്ന രംഗങ്ങളും കൊലപാതികയേ കീഴ്പ്പെടുത്തുന്ന രംഗങ്ങളും പുതുമയുള്ളതായി അനുഭവപെട്ടു. സമീപകാല പ്രിയദർശൻ സിനിമകളിലെ ഏറ്റവും ഭേദപ്പെട്ട തിരക്കഥയാണ് ഈ സിനിമയുടെത്.

സംവിധാനം: ⭐⭐⭐⭐
പ്രിയദർശൻ എന്ന സംവിധായകന്റെ മികവു ഒന്നുകൊണ്ടു മാത്രമാണ് ശരാശരി നിലവാരമുള്ള ഒരു തിരക്കഥയെ അത്യുഗ്രൻ സിനിമാനുഭവമാക്കി മാറ്റിയത്. ശാന്തമായി ആരംഭിച്ച ഒപ്പം സിനിമ രണ്ടാം പകുതിയിലെത്തുമ്പോൾ പ്രേക്ഷകരെ ആകാംഷയുടെ മുൾമുനയിലെത്തിക്കുന്നു. ആദ്യാവസാനം കൃത്യമായ ഇടവേളകളിൽ പ്രേക്ഷകരെ ത്രസിപ്പിക്കുവാൻ പ്രിയദർശനു സാധിച്ചു. ഓരോ ഫ്രെയിമുകളും പുത്തൻ ദൃശ്യാനുഭവമാണ് പ്രേക്ഷകർക്ക്‌ സമ്മാനിച്ചത്. ഇടവേളയ്ക്കു മുമ്പുള്ള രംഗത്തിൽ ജയരാമൻ വാസുദേവനെ മണത്തിലൂടെ തിരച്ചറിയുന്ന രംഗമാണ് ഒപ്പത്തിലെ ഏറ്റവും മികച്ചത്. അതുപോലെ കളരിപ്പയറ്റ് സംഘട്ടന രംഗം അതിഗംഭീരമായി അവതരിപ്പിച്ചിരിക്കുന്നു. അതുപോലെ ക്‌ളൈമാക്‌സിന്റെ അവതരണവും പ്രേക്ഷകരെ മുൾമുനയിൽ നിർത്തുന്ന രീതിയിലായിരുന്നു. പ്രിയദർശന്റെ ഗംഭീരമായ തിരിച്ചുവരവാണ് ഒപ്പം എന്ന സിനിമ. അഭിനന്ദനങ്ങൾ!

സാങ്കേതികം: ⭐⭐⭐⭐
ഏകാംബരം ഒരുക്കിയ ദൃശ്യവിരുന്നാണ് ഒപ്പം. ഏകാംബരം നിർവഹിച്ച ഛായാഗ്രഹണത്തെപ്പറ്റി അതിഗംഭീരം എന്നല്ലാതെ മറ്റൊന്നും വിശേഷിപ്പിക്കുവാനില്ല. ഓരോ രംഗങ്ങളും അതിന്റെ പൂർണതയിലെത്തിക്കുവാൻ പ്രിയദർശന് സാധിച്ചത് ഏകാംബരം എന്ന ഛായാഗ്രാഹകന്റെ സഹായത്തോടെയാണ്. റോൺ എതാൻ യോഹനാണ് ഒപ്പത്തിന് വേണ്ടി പശ്ചാത്തല സംഗീതം ഒരുക്കിയത്. രണ്ടാം പകുതിയിലെ രംഗങ്ങളെല്ലാം പ്രേക്ഷകർ ഇമചിമ്മാതെയാണ് കണ്ടിരുന്നത്. അതിനു കാരണം റോൺ നിർവഹിച്ച പശ്ചാത്തല സംഗീതമാണ്. അതുപോലെ തന്നെ മികവു പുലർത്തിയ മറ്റൊരു ഘടകം ശബ്ദമിശ്രണമാണ്. വിഷ്ണു ഗോവിന്ദ്-ശ്രീ ശങ്കർ എന്നിവരാണ് ഭീതിപടർത്തുന്ന ക്ലൈമാക്സ് രംഗങ്ങൾക്ക് വിശ്വസനീയത നൽക്കിയത്‌. ബി.കെ.ഹരിനാരായണൻ, ഡോക്ടർ മധു വാസുദേവ്, ഷാരോൺ എന്നിവരുടെ വരികൾക്ക് സംഗീതം നൽക്കിയത്‌ 4 മ്യൂസിക്സ് ആണ്. മിനുങ്ങും മിന്നാമിനുങ്ങേ എന്ന പാട്ട് മികവു പുലർത്തി. അയ്യപ്പൻ നായരാണ് ഒപ്പം സിനിമയുടെ രംഗങ്ങൾ കോർത്തിണക്കിയത്‌. ആദ്യപകുതിയിലെ കുറെ രംഗങ്ങൾക്ക് ഇഴച്ചിൽ അനുഭവപെട്ടു എന്നതൊഴികെ മറ്റൊരു കുറവുമില്ലാത്ത രീതിയിലായിരുന്നു അയ്യപ്പൻ നായർ രംഗങ്ങളുടെ സന്നിവേശം നിർവഹിച്ചത്. കളരിപ്പയറ്റ് ഉൾപ്പടെ ഈ സിനിമയിലെ സംഘട്ടന രംഗങ്ങളെല്ലാം മികവു പുലർത്തി.

അഭിനയം: ⭐⭐⭐⭐
മോഹൻലാൽ, സമുദ്രക്കനി, ബേബി മീനാക്ഷി, അനുശ്രീ നായർ, വിമല രാമൻ, നെടുമുടി വേണു, ഇന്നസെന്റ്, സിദ്ദിക്ക്, മാമുക്കോയ, രൺജി പണിക്കർ, അജു വർഗീസ്‌, ചെമ്പൻ വിനോദ് ജോസ്, ഹരീഷ് പെരുമണ്ണ, കലാഭവൻ ഷാജോൺ, കുഞ്ചൻ, ഇടവേള ബാബു, ബാലാജി, മണിക്കുട്ടൻ, അർജുൻ നന്ദകുമാർ, ബിനീഷ് കോടിയേരി, കലാശാല ബാബു, പ്രദീപ്‌, കോഴിക്കോട് നാരായണൻ നായർ, അരുണ്‍ ബെന്നി, പൂജപ്പുര രാധാകൃഷ്ണൻ, കൃഷ്ണപ്രസാദ്‌, ആന്റണി പെരുമ്പാവൂർ, അഞ്ജലി അനീഷ്‌, കവിയൂർ പൊന്നമ്മ, സോനാ, ശ്രീലത നമ്പൂതിരി, ബിന്ദു മുരളി എന്നിവരാണ് ഒപ്പത്തിലെ താരനിര. ജയരാമൻ എന്ന അന്ധനെ വിശ്വസനീയതയോടെ അവതരിപ്പിച്ചു മോഹൻലാൽ കയ്യടിനേടി. ഗംഗ എന്ന പോലീസ് ഉദ്യോഗസ്ഥയുടെ വേഷത്തിൽ അനുശ്രീ കയ്യടക്കത്തോടെ അഭിനയിച്ചു. വില്ലൻ വേഷത്തിലെത്തിയ സമുദ്രക്കനി വീണ്ടും തന്റെ കഴിവ് തെളിയിച്ചു. മാമുക്കോയയും ചെമ്പൻ വിനോദ് ജോസും ഹാസ്യ രംഗങ്ങളിൽ തിളങ്ങി. ബേബി മീനാക്ഷി തന്മയത്വത്തോടെ അവളുടെ കഥാപാത്രത്തെ അവതരിപ്പിച്ചു. വിമല രാമനൊഴികെ മറ്റെല്ലാ നടീനടന്മാരും അവരവരുടെ വേഷങ്ങൾ ഭംഗിയായി അഭിനയിച്ചു.

വാൽക്കഷ്ണം: കുടുംബത്തോടൊപ്പം കുട്ടികളോടൊപ്പം കണ്ടിരിക്കാവുന്ന ത്രില്ലറാണ് പ്രിയദർശന്റെ ഒപ്പം!

തിരക്കഥ, സംഭാഷണം, സംവിധാനം: പ്രിയദർശൻ
കഥ: ഗോവിന്ദ് വിജയൻ
നിർമ്മാണം: ആന്റണി പെരുമ്പാവൂർ
ബാനർ: ആശിർവാദ് സിനിമാസ്
ചായാഗ്രഹണം: ഏകാംബരം
ചിത്രസന്നിവേശം: അയ്യപ്പൻ നായർ
സംഗീതം: ജിം, ബിബി, എൽദോസ്, ജസ്റ്റിൻ
പശ്ചാത്തല സംഗീതം: റോൺ എതാൻ യോഹൻ
ഗാനരചന: ഡോക്ടർ മധു വാസുദേവ്, ബി.കെ.ഹരിനാരായണൻ, ഷാരോൺ ജോസഫ്‌
കലാസംവിധാനം: മോഹൻദാസ്
ചമയം: സജി കൊരട്ടി
സംഘട്ടനം: സ്റ്റണ്ട് സിൽവ
വസ്ത്രാലങ്കാരം: സുജിത് സുധാകരൻ
ശബ്ദമിശ്രണം: രാജകൃഷ്ണൻ
ശബ്ദലേഖനം: വിഷ്ണു ഗോവിന്ദ്, ശ്രീ ശങ്കർ
വിതരണം: മാക്സ്‌ലാബ് റിലീസ്.