അഡ്വഞ്ചേഴ്സ് ഓഫ് ഓമനക്കുട്ടൻ – ⭐


ക്ഷമപരീക്ഷിക്കുന്ന അതിസാഹസികത! – ⭐

താനാരാണെന്നു തനിക്കറിയില്ലെങ്കിൽ താനെന്നോട് ചോദിക്ക് താനാരാണെന്ന്. ഞാനാരാണെന്നു എനിക്കറിയാമോ എന്ന് താനെന്നോട് ചോദിക്ക് അപ്പൊ ഞാൻ പറഞ്ഞു തരാം താനാരാണെന്നും ഞാനാരാണെന്നും!

ഓമനക്കുട്ടന്റെ മൂന്ന് മണിക്കൂർ സാഹസിക യാത്ര കണ്ടിറങ്ങുന്ന ശരാശരി പ്രേക്ഷകന്റെ
അവസ്ഥയെ തേന്മാവിൻ കൊമ്പത്തിലെ കുതിരവട്ടം പപ്പുവിന്റെ സംഭാഷണം കേട്ട മോഹൻലാലിന്റെ അവസ്ഥയോടു ഉപമിക്കാം.

അന്യഭാഷയിൽ നിർമ്മിക്കപ്പെടുന്ന പരീക്ഷണ സിനിമകളെ വിജയിപ്പിക്കുന്ന മലയാളികൾ മാതൃഭാഷയിലുള്ള പരീക്ഷണ സിനിമകളെ തിരസ്ക്കരിക്കുന്നു എന്ന ആക്ഷേപം ഓൺലൈൻ മാധ്യമങ്ങളിൽ ചർച്ചാവിഷയമാണ്. ഇന്ത്യൻ സിനിമ കണ്ടതിൽ ഏറ്റവും പുതുമയുള്ള പരീക്ഷണ സിനിമകളായിരുന്നു മൈഡിയർ കുട്ടിച്ചാത്തനും വൈശാലിയും തൂവാനത്തുമ്പികളും ഞാൻ ഗന്ധർവനും. മേല്പറഞ്ഞ സിനിമകൾ ഇരുകൈയ്യുംനീട്ടി സ്വീകരിച്ചവരാണ് മലയാളികൾ. അവരുടെ മുമ്പിലേക്ക് യുക്തിയെ ചോദ്യം ചെയ്യുന്ന ഒരു കഥയും പുതുമയുള്ള അവതരണമെന്ന പൊള്ളയായ വാദമുന്നയിച്ചു അവതരിപ്പിച്ച ഓമനക്കുട്ടന്റെ അതിസാഹസിക യാത്രയും സ്വീകരിക്കാത്തതിൽ അത്ഭുതമില്ല. ഭീരുവായി ജീവിച്ചിരുന്ന ഒരാൾ തന്റെ ഓർമ്മ നഷ്ടപ്പെടുമ്പോൾ ധീരനായി മാറുന്നു എന്ന പ്രമേയം പുതുമയുള്ളതാണ് എന്നത് സത്യം. എന്നാൽ, ഈ പ്രമേയം യുക്തിയില്ലാത്ത കഥാസന്ദർഭങ്ങളിലൂടെ അവതരിപ്പിച്ചാൽ അത് പരീക്ഷണമായി കണ്ടിരിക്കുന്നവരല്ല ബുദ്ധിയുള്ള പ്രേക്ഷകർ.

മലയാള സിനിമയിൽ പരിചയസമ്പത്തോ പാരമ്പര്യമോ അവകാശപ്പെടാനില്ലാത്തവരായ ഒരുകൂട്ടം പുതുമുഖങ്ങൾ അഡ്വഞ്ചേഴ്സ് ഓഫ് ഓമനക്കുട്ടൻ പോലൊരു സിനിമയുണ്ടാക്കി എന്നത് പ്രശംസനീയമാണ്. സംവിധായകൻ രോഹിത് വി.എസ്., തിരക്കഥാരചയിതാവ് സമീർ അബ്ദുൾ, നിർമ്മാതാക്കളായ ആന്റണി ബിനോയ്-ബിജു പുളിയോക്കൽ, ഛായാഗ്രാഹകൻ അഖിൽ ജോർജ്ജ്, സന്നിവേശകൻ ലിവിങ്സ്റ്റൺ, സംഗീത സംവിധായകൻ ഡോൺ വിൻസെന്റ് എന്നിവരാണ് ആ നവാഗത സുഹൃത്തുക്കൾ.

പ്രമേയം: ⭐⭐
ഇന്നോളം മലയാള സിനിമയിൽ അവതരിപ്പിച്ചിട്ടില്ലാത്ത ഒരു പ്രമേയമാണ് അഡ്വഞ്ചേഴ്സ് ഓഫ് ഓമനകുട്ടനിലൂടെ രോഹിതും സമീറും പറയുന്നത്. പാശ്ചാത്യ സിനിമകളിൽ മാത്രം പരീക്ഷിച്ചിട്ടുള്ള കഥകൾ മലയാള സിനിമയിലും കാണുമ്പോൾ പ്രേക്ഷകർക്ക് കൗതുകമാണ് തോന്നുന്നത്. സിനിമയുടെ പേരോളം തന്നെ സാഹസികമായ ഒരു കഥ രൂപപെടുത്തിയെടുക്കുവാൻ ഇരുവർക്കും സാധിച്ചു. കഥയിൽ ചോദ്യമില്ല എന്ന പഴമൊഴി സ്മരിച്ചുകൊണ്ട് കഥയിലെ മണ്ടത്തരങ്ങൾ ഇവിടെ എഴുതുന്നില്ല. പുതുമയുള്ളതും വ്യത്യസ്തവുമായൊരു പ്രമേയം ആസ്വാദനത്തിനു വകയുള്ള ഒരു കഥയായി എഴുതുവാൻ നവാഗത കൂട്ടത്തിനു കഴിഞ്ഞില്ല എന്നിടത്ത് തന്നെ അവർക്കു കാലിടറി.

തിരക്കഥ: ⭐
സമീർ അബ്ദുൾ എഴുതിയ തിരക്കഥ വ്യത്യസ്തമായിരുന്നെങ്കിലും അവയൊന്നും വിശ്വസനീയമായിരുന്നില്ല. തന്റെ ഓർമ്മ നഷ്ടപ്പെട്ടു എന്ന് സ്വയം തിരിച്ചറിയുമ്പോൾ, അയാൾ ആദ്യം ചെയ്യേണ്ട പ്രവർത്തി പോലീസിന്റെ സഹായം തേടുക എന്നതാകും. ഓമനക്കുട്ടന്റെ സുഹൃത്തുക്കൾ പോലും അദ്ദേഹത്തെ അന്വേഷിച്ചിറങ്ങുകയോ പിന്നീട് ഒരവസരത്തിൽ കാണുമ്പോൾ എവിടെയായിരുന്നുവെന്നു അന്വേഷിക്കുകയോ ചെയ്യുന്നില്ല. ഇത്തരത്തിലുള്ള മണ്ടത്തരങ്ങളാണ് സിനിമയുടെ ആദ്യാവസാനം എഴുതിയിരിക്കുന്നത്. പ്രിയദർശൻ സിനിമകൾ പോലെ സ്ലാപ്സ്റ്റിക്ക് ഹ്യുമറായിരുന്നു സമീർ അബ്ദുൾ ഉദ്ദേശിച്ചതെങ്കിൽ, ഉത്തരത്തിൽ നിന്നെടുക്കാൻ സാധിച്ചതുമില്ല കക്ഷത്തിലുള്ളത് പോവുകയും ചെയ്തു എന്ന് വേണം കരുതാൻ. ഒരല്പം ഫാന്റസി കലർന്നൊരു കഥാസന്ദർഭങ്ങളായിരുന്നു എങ്കിൽ പ്രേക്ഷകർ യുക്തിയുള്ള രംഗങ്ങൾക്ക് വേണ്ടി കാത്തിരിക്കില്ലായിരുന്നു. പ്രേക്ഷകരെ ഒന്നടങ്കം ആശയ കുഴപ്പത്തിലാക്കുന്ന കഥാഗതിയും കൂടി ചേർന്നപ്പോൾ സമ്പൂർണ സാഹസികമായി തിരക്കഥ രചന. ഈ കുറവുകൾക്കു ഒരാശ്വാസമെന്നത് ഓമനക്കുട്ടന്റെ കഥാപാത്ര രൂപീകരണമാണ്. ഭീരുവായ ഒരാൾ സാഹചര്യങ്ങൾ മൂലം ധീരനായി മാറുന്ന കഥാപാത്രത്തിന്റെ സഞ്ചാരം വിശ്വസനീയമായിരുന്നു. സമീർ എഴുതിയ സംഭാഷണങ്ങൾ രസകരമായിരുന്നു. പ്രത്യേകിച്ച് രണ്ടാം പകുതിയിലെ അജു വർഗീസും സിദ്ദിക്കും പറയുന്ന സംഭാഷണങ്ങൾ.

സംവിധാനം: ⭐⭐
സിനിമ സംവിധാനം സ്വപ്നമായി കൊണ്ടുനടക്കുന്നവർക്ക്‌ എന്നും ഒരു പ്രചോദനമാകും രോഹിത്തിനെ പോലുള്ളവർ. ഹൃസ്വ സിനിമകൾ മാത്രം സംവിധാനം ചെയ്ത പരിചയസമ്പത്തിന്റെ ആത്മവിശ്വാസത്തിൽ ഇത്തരത്തിലുള്ളൊരു പരീക്ഷണ സിനിമ സംവിധാനം ചെയ്യാൻ കാണിച്ച ധൈര്യത്തിന് അഭിനന്ദനങ്ങൾ! അവിശ്വസനീയ രംഗങ്ങൾ പതിഞ്ഞ താളത്തിൽ അവതരിപ്പിച്ചപ്പോൾ ഇരട്ടി ദുരന്തമായി. ഓമനക്കുട്ടന്റെ യാത്ര രസകരമായി അവതരിപ്പിച്ചിരുന്നെങ്കിൽ ആസിഫ് അലിയുടെ ജീവിതത്തിലെ വഴിതിരുവാകുമായിരുന്നു ഈ സിനിമയും ഓമനകുട്ടനെന്ന കഥാപാത്രവും. സിനിമ കണ്ടിറങ്ങുന്ന ഭൂരിഭാഗം പ്രേക്ഷകരും കഥയെന്താണെന്നു പോലും മറ്റുള്ളവരോട് ചോദിക്കുന്ന കാഴ്ചയാണ് കണ്ടത്. അന്തവും കുന്തവുമില്ലാതെ ദിശതെറ്റി സഞ്ചരിക്കുന്നതും വലിച്ചു നീട്ടിയതുമായ രംഗങ്ങളാൽ സമ്പന്നമാണ് ആദ്യപകുതി. രണ്ടാം പകുതിയിൽ ഒരല്പം വേഗത കൈവരിക്കുന്ന സിനിമ കണ്ടിരിക്കാവുന്ന അവസ്ഥയിലായി. അതിനു രോഹിതിനെ സഹായിച്ചത് അഖിൽ ജോർജ്ജിന്റെ ഛായാഗ്രഹണവും ഡോൺ വിൻസെന്റിന്റെ പശ്ചാത്തല സംഗീതവുമാണ്. അതോടൊപ്പം ആസിഫ് അലി, ഭാവന, സിദ്ദിഖ്, അജു വർഗീസ് എന്നിവരുടെ അഭിനയവും. രണ്ടേമുക്കാൽ മണിക്കൂർ ദൈർഘ്യമാണ്‌ ഓമനക്കുട്ടന്റെ സാഹസിക യാത്രക്ക് വിനയായ മറ്റൊരു ഘടകം. ഒരു മണിക്കൂറിൽ പറഞ്ഞവസാനിപ്പിക്കാവുന്ന ഒരു കഥയെ നെടുനീളൻ രംഗങ്ങളാൽ അവതരിപ്പിച്ച രോഹിതിന്റെ സംവിധാനം പൂർണ പരാജയമായിരുന്നു. യുക്തിയില്ലാത്ത സന്ദർഭങ്ങൾ സാധാരണക്കാർക്ക് ദഹിക്കാത്ത രീതിയിൽ അവതരിപ്പിക്കുന്നതാണോ പുതുമ? അങ്ങനെയാണെങ്കിൽ ഓമനക്കുട്ടൻ പുതുമയുള്ള സിനിമ തന്നെ.

സാങ്കേതികം: ⭐⭐⭐
ഓമനക്കുട്ടന്റെ യാത്ര ഒപ്പിയെടുത്ത ക്യാമറക്കണ്ണുകൾ അഖിൽ ജോർജ്ജിന്റേതാണ്. പുതുമകൾ നിറഞ്ഞ ഒട്ടനവധി ഫ്രയിമുകൾ സിനിമയിലുടനീളം കാണുവാൻ സാധിച്ചു. ഒരാളുടെ സ്വഭാവത്തെ കേന്ദ്രികരിച്ചു നടക്കുന്ന കഥയായതിനാൽ അയാളുടെ ഭാവാഭിനയവും ശരീരഭാഷയും പ്രേക്ഷകർക്ക് മനസിലാകുന്ന രീതിയിലാകണം രംഗങ്ങൾ ചിത്രീകരിക്കാൻ. ഓമനക്കുട്ടന്റെ ഇമചിമ്മുന്നതും കൈകൾ ചുരുട്ടിപിടിച്ചു നടക്കുന്നതും അടുത്തടുത്ത രംഗങ്ങളിൽ കാണിച്ചത് സ്വഭാവ വിവരണത്തിന് എളുപ്പമായി. ലിവിങ്സ്റ്റൺ മാത്യുവിന്റെ സന്നിവേശം ഇഴഞ്ഞു നീങ്ങുന്ന രീതിയിലായി. ചില രംഗങ്ങളുടെ ദൈർഘ്യം സാധാരണ സിനിമകളിൽ കാണുന്നതിലും കൂടുതലായിരുന്നു. ഇത്രയും രസകരമായ ഒരു കഥയ്ക്ക് എന്തുകൊണ്ടാണ് പതിഞ്ഞ താളത്തിലുള്ള സന്നിവേശ രീതി സ്വീകരിച്ചത് എന്ന് മനസിലാകുന്നില്ല. മനു മഞ്ജിത്, ഹരിനാരായണൻ, ഗുരു എന്നിവരുടെ വരികൾക്ക് അരുൺ മുരളീധരനും ഡോൺ വിൻസെന്റും ചേർന്നാണ് സംഗീതം നൽകിയത്. ഓർത്തിരിക്കാവുന്ന വരികളോ സംഗീതമോ ഒരു ഗാനത്തിന് പോലും സൃഷ്ടിക്കാനായില്ല. ഡോൺ വിൻസെന്റിന്റെ പശ്ചാത്തല സംഗീതം മികവ് പുലർത്തി. പ്രേക്ഷകരെ ഉറങ്ങിപോകാതെ പിടിച്ചിരുത്തിയതിന്റെ ഏറെ പങ്കും വഹിച്ചത് പശ്ചാത്തല സംഗീതത്തിന്റെ ഗുണമൊന്നുകൊണ്ടു മാത്രമാണ്. ഉണ്ണി വിശ്വനാഥിന്റെ കലാസംവിധാനം തരക്കേടില്ലായിരുന്നു. ഓമനക്കുട്ടന്റെ സ്വഭാവത്തിനനുസരിച്ചുള്ള ഒരു വസ്തുവും ഓമനക്കുട്ടൻ താമസിക്കുന്ന മുറിയിൽ കണ്ടില്ല. ധന്യ ബാലകൃഷ്ണന്റെ വസ്ത്രാലങ്കാരം മികവ് പുലർത്തി. ആദ്യ പകുതിയിലെ ഓമനക്കുട്ടന്റെ വേഷവിധാനവും രണ്ടാം പകുതിയിലെ വേഷങ്ങളും അയാളുടെ സ്വഭാവത്തിന്റെ പ്രതിഫലനങ്ങളായിരുന്നു.

അഭിനയം: ⭐⭐
ആസിഫ് അലി, ഭാവന, സിദ്ദിഖ്, അജു വർഗീസ്, കലാഭവൻ ഷാജോൺ, സൈജു കുറുപ്പ്, ശിവജി ഗുരുവായൂർ, വി.കെ.പ്രകാശ്, രാഹുൽ മാധവ്, ഫിറോസ്, ശ്രിന്ദ അഷബ്, അദിതി രവി, ആര്യ രോഹിത് എന്നിവരാണ് ഈ സിനിമയിലെ അഭിനേതാക്കൾ. ഭീരുവായ ഓമനക്കുട്ടനെ മോശമാക്കാതെ അവതരിപ്പിക്കുവാൻ ആസിഫ് അലിക്ക് സാധിച്ചു. ഇമ ചിമ്മുന്നതും ശരീര ഭാഷയിലുള്ള വ്യസ്തസ്ഥയും ഓമനക്കുട്ടന്റെ ഭീരുത്വത്തിനു വിശ്വസനീയത നൽകി. പക്ഷെ, സിനിമയുടെ തുടക്കത്തിൽ നിർത്താതെ ഇമ ചിമ്മിയിരുന്ന ഓമനക്കുട്ടൻ പിന്നീട് എപ്പോഴും അങ്ങനെ ചെയ്യുന്നത് കണ്ടതുമില്ല. ഇടയ്ക്കെപ്പോഴോ ഒഴിമുറിയിലെ ആസിഫ് അലിയുടെ കഥാപാത്രം അഭിനയത്തിൽ സ്വാധീനം ചെലുത്തിയതുപോലെ അനുഭവപെട്ടു. പല്ലവി എന്ന കന്നഡികയായി ഭാവന അഭിനയ മികവ് പുലർത്തി. സിദ്ദിക്കും അജു വർഗീസും അവരവരുടെ രംഗങ്ങൾ രസകരമായി അവതരിപ്പിച്ചു. മറ്റെല്ലാ നടീനടന്മാരും മോശമാക്കാതെയുള്ള അഭിനയം കാഴ്ചവെച്ചു.

വാൽക്കഷ്ണം: വിശ്വസനീയമായ കഥയോ രസകരമായ അവതരണമോയില്ലാത്ത മൂന്ന് മണിക്കൂർ മുഷിപ്പിക്കുന്ന ഓമനക്കുട്ടന്റെ യാത്ര അത്യന്തം അതിസാഹസികമായി.

സംവിധാനം: രോഹിത് വി.എസ്.
നിർമ്മാണം: ആന്റണി ബിനോയ്, ബിജു പുളിയോക്കൽ
ബാനർ: ഫോർ എം എന്ററെർറ്റെയിന്മെന്റ്സ്
രചന: സമീർ അബ്‌ദുൾ
ഛായാഗ്രഹണം: അഖിൽ ജോർജ്ജ്
സന്നിവേശം: ലിവിങ്സ്റ്റൺ മാത്യു
സംഗീതം: അരുൺ മുരളീധരൻ, ഡോൺ വിൻസെന്റ്
പശ്ചാത്തല സംഗീതം, ശബ്ദസംവിധാനം: ഡോൺ വിൻസെന്റ്
ഗാനരചന: മനു മഞ്ജിത്, ഹരിനാരായണൻ, ഗുരു
കലാസംവിധാനം: ഉണ്ണി വിശ്വനാഥൻ
ചമയം: രാജേഷ് നെന്മാറ
വസ്ത്രാലങ്കാരം: ധന്യ ബാലകൃഷ്ണൻ
സംഘട്ടനം: മാഫിയ ശശി
വിതരണം: ഫോർ എം റിലീസ്.

അച്ഛായൻസ് – ⭐


അറുബോറൻ അച്ഛായന്മാർ – ⭐

അറുബോറൻ കാഴ്ച്ചകളിലൂടെ വികസിക്കുന്നതും പ്രേക്ഷകരുടെ ക്ഷമ പരീക്ഷിക്കുന്നതുമായ സിനിമയാണ് അച്ഛായൻസ്. അവർത്തനവിരസമാണെങ്കിലും ഒരു മസാല സിനിമയ്ക്ക് വേണ്ട ചേരുവകളെല്ലാം കൃത്യമായി ചേർക്കപ്പെട്ട തിരക്കഥയുടെ മുഷിപ്പിക്കുന്ന അവതരണമാണ് സംവിധായകൻ കണ്ണൻ താമരക്കുളം സ്വീകരിച്ചത്. ജയറാമിന്റെ സീനിയേഴ്സ് എന്ന സിനിമയുടെ ചുവടുപിടിച്ചു മുൻപോട്ടു നീങ്ങുന്ന കഥാഗതിയാണ് അച്ഛായൻസിലും കാണാൻ കഴിയുന്നത്. സേതുവാണ്‌ കഥയും തിരക്കഥയും സംഭാഷണങ്ങളും എഴുതിയത്.

ഡി.എൻ.വി.പി. ക്രിയേഷൻസിനു വേണ്ടി സി.കെ.പത്മകുമാർ നിർമ്മിച്ച അച്ഛായൻസ് വിതരണം ചെയ്തിരിക്കുന്നത് രജപുത്ര ഫിലിംസാണ്. പ്രദീപ് നായർ ഛായാഗ്രഹണവും, രജിത് കെ.ആർ. സന്നിവേശവും, ഗോപി സുന്ദർ പശ്ചാത്തല സംഗീതവും, അൻപ് അറിവ് സംഘട്ടനങ്ങളും, സഹസ് ബാല കലാസംവിധാനവും നിർവഹിച്ചിരിക്കുന്നു.

പ്രമേയം: ⭐
ജീവിതം ആഘോഷമാക്കി നടക്കുന്ന മൂന്ന് സഹോദരങ്ങളും അവരുടെ സുഹൃത്തും ഒരു പ്രത്യേക സാഹചര്യത്തിൽ ദൂരയാത്ര പോകുന്നു. ആ യാത്രക്കിടയിൽ അച്ഛായൻസ് സംഘം അഭിമുഖീകരിക്കേണ്ടി വരുന്ന പ്രശ്നങ്ങളാണ് സിനിമയുടെ പ്രമേയം. സേതു എഴുതിയ ഈ സിനിമയുടെ കഥയിൽ തമാശകൾ, സസ്പെൻസ്, ട്വിസ്റ്റ്, യാത്ര തുടങ്ങിയ ചേരുവകളെല്ലാം കൃത്യമായി ചേർത്തിട്ടുണ്ട്. സീനിയേഴ്‌സിന്റെ കഥാഗതി അതേപടി സ്വീകരിച്ചു അവസാന നിമിഷംവരെ സസ്പെൻസ് നിലനിർത്തിയ കഥയാണ് അച്ഛായൻസിന്റേതും. സസ്പെൻസിനു വേണ്ടി എഴുതിയുണ്ടാക്കിയ സസ്പെൻസും കഥയിലെ പ്രവചിക്കാനാവുന്ന വഴിത്തിരുവകളും കുട്ടികൾക്ക് വരെ ഊഹിക്കാവുന്നതാണ്.

തിരക്കഥ: ⭐
പ്രവചിക്കാനാവുന്ന കഥാസന്ദർഭങ്ങളും ദ്വയാർത്ഥ പ്രയോഗമുള്ള സംഭാഷണങ്ങളും ഊഹിക്കാനാവുന്ന സസ്‌പെൻസും മലമുകളിലേക്കുള്ള യാത്രകളും ചിരിവരാത്ത വളിപ്പുകളും കൃത്യമായി തുന്നിച്ചേർത്ത തിരക്കഥയാണ് ഈ സിനിമയുടേത്‌. ഇന്നത്തെ കാലഘട്ടത്തിലെ തട്ടുപൊളിപ്പൻ സിനിമകളിൽ അഭിവാജ്യഘടകമായിരിക്കുന്ന ഒന്നാണ് വെള്ളമടി രംഗങ്ങൾ. അത് ആവശ്യത്തിനും അനാവശ്യത്തിനും കഥാസന്ദർഭങ്ങളിൽ വന്നുപോകുന്നുണ്ട്. ആഘോഷങ്ങൾക്ക് വേണ്ടിയുള്ള അസഭ്യ തമാശകളും, വെള്ളമടിയും, പാട്ടുകളും, ഡാൻസുകളും, യാത്രകളും അങ്ങനെ ഒരു അന്തവും കുന്തവുമില്ലാതെ പോകുന്ന ആദ്യപകുതി. പ്രശ്നങ്ങൾക്ക് നടുവിൽ ചെന്നെത്തുന്ന നാൽവർ സംഘവും അവരെ ചുറ്റിപറ്റി നടക്കുന്ന കുറെ പ്രശ്നങ്ങളും, നിജസ്ഥിതി അറിയുവാനായി നെട്ടോട്ടമോടുന്ന പോലീസും നിരപരാധിത്വം തെളിയിക്കാൻ ശ്രമിക്കുന്ന അച്ഛായൻസും. ഒടുവിൽ സത്യം തെളിയിക്കുകയും കുറ്റവാളിയെ കണ്ടെത്തുന്ന രംഗങ്ങളുള്ള രണ്ടാംപകുതിയും. സീനിയേഴ്സ് സിനിമയുടെ തിരക്കഥ മറ്റൊരു രീതിയിലാക്കി നിർമ്മതിവിനെയും അഭിനേതാക്കളെയും പറ്റിക്കാം. പക്ഷെ, പ്രേക്ഷകരെ മണ്ടന്മാരാക്കാൻ സാധിക്കുകയില്ല എന്ന് സേതു മനസിലാക്കിയാൽ നന്ന്!

സംവിധാനം: ⭐
തിങ്കൾ മുതൽ വെള്ളിവരെ, ആടുപുലിയാട്ടം എന്നീ സിനിമകൾക്ക് ശേഷം കണ്ണൻ താമരക്കുളം സംവിധാനം നിർവഹിച്ച അച്ഛായൻസ് സംവിധായകന്റെ മുൻകാല സിനിമകളിൽ നിന്നും വ്യത്യസ്തമാണ്. എല്ലാത്തരം സിനിമകൾ ഇഷ്ടപെടുന്ന പ്രേക്ഷകരെയും തൃപ്തിപ്പെടുത്തുക എന്നതായിരുന്നു ലക്ഷ്യമെങ്കിൽ അത് പൂർണ പരാജയമായി. കണ്ടുമടുത്ത പഴഞ്ചൻ അവതരണ ശൈലിയാണ് സിനിമയിലുടനീളം കാണാൻ കഴിഞ്ഞത്. അതിനു മാറ്റുക്കൂട്ടുവാൻ രജിത്തിന്റെ സന്നിവേശവും ഗോപി സുന്ദറിന്റെ പശ്ചാത്തല സംഗീതവും. അഭിനേതാക്കളെ തിരഞ്ഞെടുക്കുന്നതിലും സംവിധായകന് പിഴവുപറ്റി. പ്രകാശ് രാജിനെ പോലെ കഴിവുള്ള ഒരു നടനെ ലഭിച്ചിട്ടും അത് പൂർണമായി ഉപയോഗപ്പെടുത്തുവാൻ കണ്ണൻ താമരക്കുളത്തിനു സാധിച്ചില്ല. സസ്പെൻസ് നിലനിർത്തിയിരുന്ന രീതിയും സസ്പെൻസിനു വേണ്ടി കണ്ടെത്തിയ വിഷയവും യാതൊരു പുതുമയും പ്രേക്ഷകർക്ക് സമ്മാനിക്കുന്നില്ല. കളർഫുൾ പോസ്റ്ററുകൾ ഒരു വിപണനതന്ത്രം മാത്രമായിരുന്നു എന്ന് പ്രേക്ഷകർ തിരിച്ചറിയുന്ന ഒരു കാലം വിദൂരമല്ല. ഇനിയുള്ള ഒരുമാസക്കാലം വമ്പൻ സിനിമകളൊന്നും പ്രദർശനത്തിന് വരുന്നില്ല എന്നത് ഈ സിനിമയ്ക്ക് ഗുണകരമാകാൻ സാധ്യതയുണ്ട് എന്ന് കരുതി ജയറാമിനും കണ്ണൻ താമരക്കുളത്തിനും സി.കെ.പത്മകുമാറിനും രജപുത്ര രഞ്ജിത്തിനും ആശ്വസിക്കാം.

സാങ്കേതികം: ⭐⭐
കളർഫുൾ വിഷ്വൽസിലൂടെ പ്രേക്ഷകരെ പിടിച്ചിരുത്താൻ പ്രദീപ് നായരുടെ ഛായാഗ്രഹണത്തിനു സാധിച്ചു. പാട്ടുകളുടെ ചിത്രീകരണമായാലും മൂന്നാറിലെ ദുരൂഹത നിറഞ്ഞ രംഗങ്ങളായാലും സംവിധായകന്റെ മനസ്സറിഞ്ഞു രംഗങ്ങൾ ചിത്രീകരിക്കുവാൻ പ്രദീപിന് സാധിച്ചു. രതീഷ് വേഗ ഈണമിട്ട അഞ്ചു പാട്ടുകളാണ് ഈ സിനിമയിലുള്ളത്. ഉണ്ണി മുകുന്ദൻ ആലപിച്ച ഗാനമൊഴികെ മറ്റൊന്നും നിലവാരം പുലർത്തിയില്ല. കൈതപ്രം, അനിൽ പനച്ചൂരാൻ, ഹരിനാരായണൻ എന്നിവരാണ് ഗാനരചന. സഹസ് ബാലയുടെ കലാസംവിധാനം കഥയോട് ചേർന്നുപോകുന്നവയായിരുന്നു. ഈ സിനിമയുടെ സന്നിവേശം തലവേദന മാത്രം സൃഷ്ടിച്ച ഒന്നായിരുന്നു. രജിത് കെ.ആർ. എന്ന പുതുമുഖമാണ് സന്നിവേശം നിർവഹിച്ചത്. ഗോപി സുന്ദറിന്റെ പശ്ചാത്തല സംഗീതം സമ്പൂർണ നിരാശയാണ് സമ്മാനിച്ചത്. തെലുങ്ക് സിനിമകളെ ഓർമ്മിപ്പിക്കുന്നതായിരുന്നു പശ്ചാത്തല സംഗീതം. അൻപ് അറിവിന്റെ സംഘട്ടന രംഗങ്ങളും അന്യഭാഷാ സിനിമകളെ ഓർമ്മിപ്പിക്കുന്നതായിരുന്നു.

അഭിനയം ⭐⭐⭐
ജയറാം, പ്രകാശ് രാജ്, ഉണ്ണി മുകുന്ദൻ, അമല പോൾ, ആദിൽ ഇബ്രാഹിം, സഞ്ജു ശിവറാം, അനു സിത്താര, ശിവദാ നായർ, സിദ്ദിഖ്, രമേശ് പിഷാരടി, പി.സി.ജോർജ്ജ്, ധർമ്മജൻ, സാജു നവോദയ, ജനാർദ്ദനൻ, മണിയൻപിള്ള രാജു, ജയൻ ചേർത്തല, സോഹൻ സീനുലാൽ, കുമരകം രഘുനാഥ്, വിജയകൃഷ്ണൻ, കവിയൂർ പൊന്നമ്മ, പൊന്നമ്മ ബാബു, മായാ വിശ്വനാഥ്, തെസ്നി ഖാൻ, സുജ എന്നിവരാണ് ഈ സിനിമയിലെ പ്രധാന അഭിനേതാക്കൾ. കാർത്തിക് എന്ന പോലീസ് ഉദ്യോഗസ്ഥന്റെ വേഷം തനതായ അഭിനയ ശൈലികൊണ്ട് വ്യത്യസ്തമാക്കാൻ പ്രകാശ് രാജിന് സാധിച്ചു. ഈ സിനിമയിൽ ഒരല്പം ആശ്വാസമായതും പ്രകാശ് രാജിന്റെ സാന്നിധ്യം മാത്രമാണ്. റോയ് എന്ന കഥാപാത്രത്തെ ജയറാം സ്ഥിരം മാനറിസങ്ങൾ ഉപയോഗിച്ച് അവതരിപ്പിച്ചു. ചെറിയ വേഷമാണെങ്കിലും സിദ്ദിക്കും തന്റെ റോളിൽ തിളങ്ങി. അമല പോളിന് സമീപകാലത്തു ലഭിച്ച മികച്ച കഥാപാത്രങ്ങളിൽ ഒന്നാണ് ഈ സിനിമയിലേത്. തനിക്കാവുന്ന വിധം മോശമാക്കാതെ അമല ആ കഥാപാത്രത്തെ അവതരിപ്പിച്ചിട്ടുണ്ട്. ഉണ്ണി മുകുന്ദൻ ടോണി എന്ന മുഴുകുടിയന്റെ കഥാപാത്രം പോലും നന്നേ കഷ്ടപ്പെട്ട് അഭിനയിച്ചത് പോലെ തോന്നി. ആദിൽ ഇബ്രാഹിമും സഞ്ജു ശിവറാമും നിരാശപ്പെടുത്തിയില്ല. മാലിനിയായി രാമന്റെ ഏദൻതോട്ടത്തിൽ അഭിനയിച്ചത് അനു സിത്താരയായിരുന്നോ എന്ന് തോന്നിപ്പിക്കുന്ന അഭിനയമാണ് ഈ സിനിമയിൽ കണ്ടത്. മറ്റെല്ലാ നടീനടന്മാരും ഒട്ടും താല്പര്യമില്ലാത്ത രീതിയിലാണ് അഭിനയം കാഴ്ചവെച്ചത് എന്ന് തോന്നി.

വാൽക്കഷ്ണം: കേട്ടറിവിനേക്കാൾ വലുതാണ് അച്ഛായൻസ് എന്ന ദുരന്തം!

സംവിധാനം: കണ്ണൻ താമരക്കുളം
നിർമ്മാണം: സി.കെ.പത്മകുമാർ
ബാനർ: ഡി.എൻ.വി.പി. ക്രിയേഷൻസ്
രചന: സേതു
ഛായാഗ്രഹണം: പ്രദീപ് നായർ
ചിത്രസന്നിവേശം: രജിത് കെ.ആർ.
പശ്ചാത്തല സംഗീതം: ഗോപി സുന്ദർ
സംഗീതം: രതീഷ് വേഗ
ഗാനരചന: കൈതപ്രം, അനിൽ പനച്ചൂരാൻ, ഹരിനാരായണൻ
കലാസംവിധാനം: സഹസ് ബാല
വസ്ത്രാലങ്കാരം: അരുൺ മനോഹർ
ചമയം: സജി കാട്ടാക്കട
സംഘട്ടനം: അൻപ് അറിവ്
ശബ്ദസംവിധാനം: ജിജുമോൻ ടി. ബ്രൂസ്
വിതരണം: രജപുത്ര റിലീസ്.

ഗോദ – ⭐⭐⭐


ആസ്വാദനത്തിന്റെ ദൃതങ്കപുളകിത നിമിഷങ്ങൾ! – ⭐⭐⭐

ഹാസ്യരസാവഹമായ മുഹൂർത്തങ്ങളാലും നർമ്മത്തിൽ ചാലിച്ച സംഭാഷണങ്ങളാലും രസകരമായ ആഖ്യാന ശൈലിയാലും ഏവരെയും തൃപ്ത്തിപെടുത്തുവാൻ കഴിഞ്ഞതിൽ ബേസിൽ ജോസഫിനും കൂട്ടർക്കും അഭിമാനിക്കാം. കഥാപരമായി പുതുമയൊന്നും അവകാശപ്പെടാനില്ലെങ്കിലും പുത്തുനുണർവ്വ് നൽകുന്ന അവതരണ മികവുകൊണ്ടും സാങ്കേതിക തികവുകൊണ്ടും അഭിനയ മികവുകൊണ്ടും ഒരുവട്ടം ആസ്വദിച്ചു കണ്ടിരിക്കുവാൻ കഴിയുന്ന സിനിമയാണ് ഗോദ.

കുഞ്ഞി രാമായണത്തിന്റെ വലിയ വിജയത്തിന് ശേഷം ബേസിൽ ജോസഫ് ഒരുക്കിയ ഗോദയിൽ പഞ്ചാബി സുന്ദരി വാമിക്വ ഗബ്ബിയാണ് പ്രധാന കഥാപാത്രത്തെ അവതരിപ്പിക്കുന്നത്. ടൊവിനോ തോമസും രഞ്ജിപണിക്കരും തുല്യപ്രധാന വേഷങ്ങളിൽ വാമിക്വയോടൊപ്പം അഭിനയിച്ചിട്ടുണ്ട്. ഇ ഫോർ എന്റെർറ്റെയിൻമെന്റ്സിനു വേണ്ടി മുകേഷ് ആർ. മേത്തയും സി.വി.സാരഥിയും എ.വി.എ.പ്രൊഡക്ഷൻസിനു വേണ്ടി എ.വി.അനൂപും സംയുക്തമായാണ് ഗോദ നിർമ്മിച്ചിരിക്കുന്നത്.

പ്രമേയം: ⭐⭐
സുൽത്താനും ദങ്കലും കേരളത്തിലെ സിനിമാപ്രേമികളെ ഏറെ സ്വാധീനിച്ച സിനിമകളാണ്. അതെ ശ്രേണിയിൽ ഉൾപെടുത്താവുന്ന പ്രമേയവും കേരളത്തിന്റെ സംസ്കാരം നിലനിർത്തിക്കൊണ്ടു മലയാള ഭാഷ സംസാരിക്കുന്ന രീതിയിലേക്ക് മാറ്റിയ ഒരു ഗുസ്തിമത്സര കഥയുമാണ് രാകേഷ് മാന്തോടി എഴുതിയത്. പഞ്ചാബിലെ ഗോദയിൽ മത്സരിക്കാൻ അനുമതി ലഭിക്കാത്ത ഒരുവൾ കേരളത്തിന് വേണ്ടി മത്സരിക്കുവാനെത്തുന്ന സാഹചര്യമാണ് കഥയിലെ ഏക പുതുമ. മലയാള സിനിമയിൽ നിർമ്മിക്കപ്പെട്ട ഒട്ടുമിക്ക കായികവിനോദങ്ങൾ പ്രേമേയമാക്കിയ സിനിമകളിലും പ്രേക്ഷകർ കണ്ടാസ്വദിച്ചവ തന്നെയാണ് ഗോദയിലും കഥാപശ്ചാത്തലമാകുന്നത്.

തിരക്കഥ: ⭐⭐⭐
വിനീത് ശ്രീനിവാസന്റെ തിരയുടെ തിരക്കഥ രചിച്ചുകൊണ്ടു മലയാള സിനിമയിലെത്തിയ രാകേഷ് മാന്തോടി രചന നിർവഹിച്ച രണ്ടാമത്തെ സിനിമയാണ് ഗോദ. ഗുസ്തി എന്ന കായികവിനോദത്തിനു വേണ്ടി തയ്യാറെടുക്കുന്നതും ജയ-പരാജയങ്ങളിലൂടെ ഒടുവിൽ സ്വന്തം നാടിനെ പ്രതിനിധികരിക്കുവാൻ സാധിക്കുന്ന ഒരു പഞ്ചാബി പെൺകുട്ടിയുടെ കഥയാണ് രാകേഷ് മാന്തോടി എഴുതിയത്. പഞ്ചാബി പെൺകുട്ടി കേരളത്തിന് വേണ്ടി മത്സരിക്കാനെത്തുന്ന സന്ദർഭങ്ങൾ മാത്രമാണ് പുതുമയുള്ളതായി അനുഭവപ്പെട്ടത്. ഗുസ്തി മത്സരത്തിനുള്ള തയ്യാറെടുപ്പുകളും വീറും വാശിയും നിറഞ്ഞ മത്സരങ്ങളും പ്രേക്ഷകർക്ക് സുപരിചിതമായ രീതിയിലുള്ള കഥാസന്ദർഭങ്ങളിലൂടെയാണ് കടന്നുപോകുന്നത്. അത് തന്നെയാണ് ഈ സിനിമയുടെ രസംകൊല്ലിയാകുന്നതും. പ്രണയത്തിനു സാധ്യതയുള്ള കഥാഗതിയായിരുന്നുവെങ്കിലും ഒട്ടും പൈങ്കിളിയാക്കാത്ത ആ സന്ദർഭങ്ങൾ കയ്യടക്കത്തോടെ എഴുതുവാൻ രാകേഷിനു സാധിച്ചു. നാട്ടിനുപുറവും മൈതാനവും ക്രിക്കറ്റ് കളിയുമൊക്കെ ആവർത്തന വിരസമായി അനുഭവപെട്ടു. ആദ്യ പകുതിയിലെ മേല്പറഞ്ഞ കഥാസന്ദർഭങ്ങൾ കണ്ടുമടുത്തതാണെങ്കിലും നർമ്മത്തിൽ പൊതിഞ്ഞ സംഭാഷണങ്ങളാണ് പ്രേക്ഷകരെ ബോറടിപ്പിക്കാതെ പിടിച്ചിരുത്തിയത്. അതുപോലെ രഞ്ജി പണിക്കർ അവതരിപ്പിച്ച ക്യാപ്റ്റന്റെ കഥാപാത്ര രൂപീകരണവും മികവ് പുലർത്തി. തിരയിലൂടെ ഓളങ്ങൾ സൃഷ്ടിക്കാൻ രാകേഷ് മാന്തോടിയ്ക്കു സാധിച്ചില്ലായെങ്കിലും ഗോദയിലൂടെ ശക്തമായ രണ്ടാംവരവിന്‌ കഴിഞ്ഞു.

സംവിധാനം: ⭐⭐⭐⭐
ഗുസ്തി എന്ന കേൾക്കുമ്പോൾ മലയാളികൾക്ക് ഓർമ്മവരുന്ന മുഖം ഒരുപക്ഷെ സുശീൽ കുമാറിന്റേതാകാം. ഗുസ്തി എന്ന കായികവിനോദത്തിലൂടെ കേരളത്തിന്റെ യശസ്സ് വാനോളം ഉയർത്തിയ ഗട്ടാ ഗുസ്തിക്കാരനാണ് ടി.ജെ.ജോർജ്ജ്. ഗുസ്തിക്കാരുടെ കഥയും ഗോദയിൽ മത്സരിക്കാനിറങ്ങുമ്പോഴുള്ള അവരുടെ വികാരങ്ങളും പോരാട്ടങ്ങളും പ്രേമേയമാക്കിയ സിനിമകളൊന്നും മലയാളത്തിൽ നിർമ്മിക്കപ്പെട്ടിട്ടില്ല. പത്മരാജന്റെ ഒരിടത്തൊരു ഫയൽവാൻ എന്ന സിനിമയിലും സിബി മലയിലിന്റെ മുത്താരംകുന്ന് പി.ഓ. എന്ന സിനിമയിലും മാത്രമാണ് നമ്മൾ ഗുസ്തി കണ്ടിട്ടുള്ളത്. കുഞ്ഞിരാമായണം പോലെ കേരളത്തിലെ ഒരു ഉൾഗ്രാമത്തിൽ നടക്കുന്ന കഥയാണ് ഗോദയിലും ബേസിൽ അവതരിപ്പിച്ചത്. പുതുമയാർന്നതും ഉണർവ്വ് പകരുന്നതുമായ അവതരണമാണ് ഗോദയെ വ്യത്യസ്തമാക്കുന്നത്. വേഗതയോടെയുള്ള കഥപറച്ചിൽ സിനിമയുടെ ആസ്വാദനത്തിനു ഗുണകരമായി. ഏവർക്കുമറിയാവുന്ന കഥയും കഥയിലെ വഴിത്തിരുവുകളും ഈ സിനിമയുടെ ന്യൂനതകളിൽ ഉൾപ്പെടുന്നുവെങ്കിലും, അതൊന്നും പ്രേക്ഷകർക്ക് ചിന്തിച്ചെടുക്കാൻ കഴിയാത്ത വിധത്തിലുള്ള സന്നിവേശവും വിഷ്വൽസും പശ്ചാത്തല സംഗീതവും ഉപയോഗപ്പെടുത്തി അവതരിപ്പിക്കുവാൻ ബേസിൽ ജോസഫിന് സാധിച്ചിട്ടുണ്ട്. ബാഹുബലിയിൽ നിന്ന് മോചിതരായി ഇനിയുള്ള കുറച്ചു മാസങ്ങൾ പ്രേക്ഷകർ ഗോദക്ക് പിന്നാലെ പോകുമെന്നുറപ്പ്!

സാങ്കേതികം: ⭐⭐⭐⭐
അഭിനവ് സുന്ദർ നായകും വിഷ്ണു ശർമ്മയും ഷാൻ റഹ്‌മാനും ചേർന്ന് അത്യുഗ്രൻ സാങ്കേത്തികമികവോടെ പ്രേക്ഷകരെ ആസ്വാദനത്തിന്റെ കൊടുമുടിയിലെത്തിച്ചു. ഗോതമ്പിന്റെ നിറമുള്ള കളർടോണുകൾ നൽകി ഇതുവരെ കണ്ടിട്ടില്ലാത്ത പഞ്ചാബിന്റെ മുഖം ഒപ്പിയെടുക്കുവാൻ വിഷ്ണു ശർമ്മയുടെ ക്യാമറക്കണ്ണുകൾക്കു സാധിച്ചു. അതുപോലെ കേരളത്തിലെ നാട്ടിൻപുറത്തെ കാഴ്ചകളും ക്‌ളൈമാക്‌സിലെ ഗുസ്തിമത്സരങ്ങളും മികവോടെ ചിത്രീകരിക്കുവാൻ വിഷ്ണുവിന് കഴിഞ്ഞു. ചടുലമായ സന്നിവേശമാണ് പ്രേക്ഷകരെ മുഷിപ്പിക്കാതെ പിടിച്ചിരുത്തിയത്. അഭിനവ് സുന്ദർ നായക് പ്രത്യേക അഭിനന്ദനം അർഹിക്കുന്നു. ഷാൻ റഹ്മാന്റെ പശ്ചാത്തല സംഗീതവും മികവ് പുലർത്തി. ആരോ നെഞ്ചിൽ മഞ്ഞായി പെയ്യുന്ന എന്ന പാട്ടും അതിന്റെ സംഗീതവും മലയാളികൾ ഏറ്റെടുത്തുകഴിഞ്ഞു. സമീപകാലത്തു കേട്ടതിൽ ഏറ്റവും ഇമ്പമാർന്ന സംഗീതമാണ് ആ പാട്ടിനു ഷാൻ റഹ്മാൻ നൽകിയത്. ഗോദ ഒരുക്കിയത് ത്യാഗു തവന്നൂരാണ്. ഗുസ്തി മത്സരത്തിനായുള്ള ആഡംബര വേദിയൊരുക്കുന്നതിൽ ത്യാഗു വിജയിച്ചു. സമീറ സനീഷിന്റെ വസ്ത്രാലങ്കാരം മികവ് പുലർത്തി. ഗുസ്തി മത്സരങ്ങളുടെ സംഘട്ടനം ഒരുക്കിയത് സ്റ്റണ്ണർ ശിവയും സംവിധായകൻ ബേസിൽ ജോസഫും ചേർന്നാണ്. ഏവർക്കും അഭിനന്ദനങ്ങൾ!

അഭിനയം: ⭐⭐⭐
വാമിക്വ ഗബ്ബി, രഞ്ജി പണിക്കർ, ടൊവിനോ തോമസ്, അജു വർഗീസ്, ഹരീഷ് പെരുമണ്ണ, ശ്രീജിത്ത് രവി, ധർമ്മജൻ ബോൾഗാട്ടി, മാമുക്കോയ, ബിജുക്കുട്ടൻ, കോട്ടയം പ്രദീപ്, ഹരീഷ് പരേടി, ഷൈൻ ടോം ചാക്കോ, ദിനേശ് നായർ, പാർവതി എന്നിവരാണ് ഗോദയിലെ പ്രധാന അഭിനേതാക്കൾ. സമീപകാലത്തു കണ്ടതിൽ ഏറ്റവും പൗരുഷമുള്ള കഥാപാത്രത്തെ നൂറു ശതമാനം ആത്മാർത്ഥമായി അവതരിപ്പിക്കുവാൻ രഞ്ജി പണിക്കർക്ക് സാധിച്ചു. ആഞ്ജനേയ ദാസ് എന്ന നായക കഥാപാത്രത്തെ മികവോടെ അവതരിപ്പിച്ചു വിജയിപ്പിക്കുവാൻ ടൊവിനോ തോമസിനും കഴിഞ്ഞു. അദിതി സിംഗ് എന്ന ഗുസ്തിക്കാരിയായി വാമിക്വയും അഭിനയ മികവ് പുലർത്തി. അജു വർഗീസും ഹരീഷ് പെരുമണ്ണയും പാർവതിയും അവരവരുടെ വേഷങ്ങളിൽ തിളങ്ങി. നാട്ടിൻപുറത്തെ കഥാപാത്രങ്ങൾക്കു ജീവൻ നൽകിയത് മാമുക്കോയയും ധർമ്മജനും ബിജുക്കുട്ടനും ശ്രീജിത്ത് രവിയും ഹരീഷ് പരേടിയും ചേർന്നാണ്. ശുദ്ധമായ ഹാസ്യരംഗങ്ങളിലെ നിഷ്കളങ്കമായ ഇവരുടെ അഭിനയമാണ് പ്രേക്ഷകരെ ഏറെ രസിപ്പിച്ചത്.

വാൽക്കഷ്ണം: കുട്ടികൾക്കും യുവാക്കൾക്കും ഒരുപോലെ ആസ്വദിക്കാനാകുന്ന ഒരുപിടി രസകരമായ മുഹൂർത്തങ്ങളിലൂടെ കോർത്തിണക്കിയ ഗുസ്തിക്കഥയാണ് ഗോദ!

സംവിധാനം: ബേസിൽ ജോസഫ്
നിർമ്മാണം: മുകേഷ് ആർ.മേത്ത, എ.വി.അനൂപ്, സി.വി.സാരഥി
ബാനർ: ഇ ഫോർ എൻറ്റർറ്റെയിന്മെന്റ്സ്, എ.വി.എ. പ്രൊഡക്ഷൻസ്
രചന: രാകേഷ് മാന്തോടി
ഛായാഗ്രഹണം: വിഷ്ണു ശർമ്മ
ചിത്രസന്നിവേശം: അഭിനവ് സുന്ദർ നായക്
സംഗീതം: ഷാൻ റഹ്‌മാൻ
ഗാനരചന: മനു മഞ്ജിത്, വിനായക് ശശികുമാർ
കലാസംവിധാനം: ത്യാഗു തവന്നൂർ
ചമയം: ഹസ്സൻ വണ്ടൂർ
വസ്ത്രാലങ്കാരം: സമീറ സനീഷ്
ശബ്ദസംവിധാനം: രാജകൃഷ്ണൻ
വിതരണം: ഇ ഫോർ എന്ററെർറ്റെയിന്മെന്റ്സ്.

രക്ഷാധികാരി ബൈജു (ഒപ്പ്) – ⭐⭐⭐


ഗൃഹാതുരത്വ ഓർമ്മകളിലൂടെ ഒരല്പനേരം – ⭐⭐⭐

ഓരോ തലമുറയിലെ കുട്ടികൾക്കും അവരുടേതായ പ്രിയപ്പെട്ട വിനോദങ്ങളുണ്ടാകും. മൊബൈൽ ഫോണും കംപ്യൂട്ടർ ഗെയിമുകളും ഇന്നത്തെ തലമുറയിലെ കുട്ടികൾക്ക് ജീവിതം ആസ്വദിക്കാനുള്ള ഏറ്റവും പ്രധാനപ്പെട്ട വിനോദ ഉപാദികളാണ്. ഒന്നോ രണ്ടോ തലമുറ മുമ്പുള്ള, ഇന്നത്തെ യുവാക്കളായ അന്നത്തെ കുട്ടികൾ സമയം ചിലവഴിച്ചുകൊണ്ടിരുന്നതും ഓരോ വിനോദങ്ങളിൽ ഏർപ്പെട്ടിരുന്നതും പാടത്തും പറമ്പിലും നാട്ടിൻപുറത്തെ കൊച്ചു മൈതാനങ്ങളിലുമായാണ്. കാലമെത്ര കഴിഞ്ഞാലും അവയെല്ലാം ഒരുപിടി മനോഹരമായ ഓർമ്മകളായി എന്നും അവരുടെ ഉള്ളിൽ അവശേഷിക്കുന്നു. അത്തരത്തിലുള്ള കുറെ സുന്ദര നിമിഷങ്ങൾ ഇന്നത്തെ തലമുറയിലെ കുട്ടികൾക്ക് മനസിലാക്കുവാനും പഴയ തലമുറയിലുള്ളവർക്കു അവരുടെ ബാല്യകാലസ്മരണങ്ങൾ ഓർത്തെടുക്കുവാനും സാധിക്കുന്ന സിനിമയാണ് രക്ഷാധികാരി ബൈജു(ഒപ്പ്‌).

റോസ് ഗിറ്റാറിനാൽ എന്ന സിനിമയ്ക്ക് ശേഷം രഞ്ജൻ പ്രമോദ് രചനയും സംവിധാനവും നിർവഹിച്ച സിനിമയാണ് രക്ഷാധികാരി ബൈജു. പുതുമുഖം ടി.എസ് അർജുനാണ് ഈ സിനിമയുടെ കഥ എഴുതിയത്. 100ത് മങ്കി മൂവീസിനു വേണ്ടി അലക്‌സാണ്ടർ മാത്യുവും സതീഷ് കോലവും നിർമ്മിച്ച രക്ഷാധികാരി ബൈജു ഇറോസ് ഇൻറ്റർനാഷണലാണ് വിതരണം ചെയ്തിരിക്കുന്നത്.

പ്രമേയം: ⭐⭐
കേരളത്തിലെ ഏതു കൊച്ചു ഗ്രാമപ്രദേശത്ത് ചെന്നാലും അവിടെയൊക്കെ ബൈജുവിനെ പോലെയുള്ള ആളുകളെ കാണാൻ സാധിക്കും. ആ പ്രദേശത്തുള്ള നിവാസികളൊക്കെ ഏതു പ്രധാനപ്പെട്ട കാര്യത്തിനും സമീപിക്കുന്നത് ബൈജുവിനെ പോലെയുള്ളവരെയായിരിക്കും. അതുപോലെ ഗ്രാമനിവാസികളായ യുവാക്കളും കുട്ടികളും ദിവസേന വൈകുന്നേരങ്ങളിൽ ഒത്തുകൂടുന്ന ഒരു ചായക്കടയോ കവലയോ മൈതാനമോ ഉണ്ടാകും. അവരുടെ ദിനചര്യകളിൽ പ്രത്യേകിച്ചു മാറ്റങ്ങൾ ഒന്നുമുണ്ടാകില്ല. അവിടെയുള്ളവരുടെ വിനോദത്തിനായി ആരംഭിക്കുന്ന ആർട്സ് ആൻഡ് സ്പോർട്സ് ക്ലബ്ബും അതിന്റെ പ്രവർത്തനങ്ങളും കായിക വിനോദങ്ങളും എല്ലാ പ്രദേശങ്ങളിലും കാണപെടുന്നതാണ്. കുമ്പളം എന്ന കൊച്ചുഗ്രാമത്തിൽ ബൈജുവിന്റേയും കൂട്ടരുടെയും നേതൃത്വത്തിൽ തുടങ്ങുന്ന കുമ്പളം ബ്രദേഴ്സ് എന്ന ക്ലബ്ബും കായികവിനോദങ്ങളുടെ കൂട്ടായ്മയ്ക്ക് വേണ്ടിയാണ് ആരംഭിക്കുന്നത്. മേല്പറഞ്ഞ കുമ്പളം ഗ്രാമനിവാസികളുടെയും അവരുടെ ഒരേയൊരു മൈതാനത്തിന്റ രക്ഷാധികാരി ബൈജുവിന്റെയും കഥയാണ് രക്ഷാധികാരി ബൈജു എന്ന സിനിമയിലൂടെ രഞ്ജൻ പ്രമോദ് പറയുന്നത്.

തിരക്കഥ: ⭐⭐⭐⭐
രണ്ടാം ഭാവവും, മീശമാധവനും, മനസ്സിനക്കരയും, നരനും എഴുതിയ രഞ്ജൻ പ്രമോദിന്റെ തൂലികയിൽ പിറന്ന ഗംഭീര തിരക്കഥയാണ് രക്ഷാധികാരി ബൈജു. ഗൃഹാതുരത്വമുണർത്തുന്ന ഒരുപിടി നല്ല മുഹൂർത്തങ്ങൾ അത്യന്തം രസകരമായി കോർത്തിണക്കിയ കഥാസന്ദർഭങ്ങളാണ് സിനിമയുടെ ആദ്യാവസാനം. മഹേഷിന്റെ പ്രതികാരം എന്ന സിനിമയുടെ തിരക്കഥയ്ക്ക് ശേഷം ഇത്രയും ഹൃദയത്തോട് ചേർന്ന് നിന്നെഴുതിയ തിരക്കഥയൊന്നും അടുത്തകാലത്തു മലയാള സിനിമയിൽ കണ്ടിട്ടില്ല. ഹാസ്യത്തിന്റെ മേമ്പൊടിയോടെ ദ്വയാർത്ഥ പ്രയോഗമില്ലാത്ത ശുദ്ധമായ നർമ്മ സംഭാഷണങ്ങളിലൂടെ അവതരിപ്പിച്ച രംഗങ്ങളെല്ലാം പ്രേക്ഷകർ ആസ്വദിച്ചു. ഓരോ കഥാപാത്രങ്ങളുടെയും രൂപീകരണമാണ് തിരക്കഥയുടെ മറ്റൊരു സവിശേഷതയായി തോന്നിയത്. അവരിലെ പലരിലും നമ്മളെ തന്നെ കാണുവാൻ സാധിക്കുമായിരുന്നു. വിശ്വസനീയതയുള്ള സന്ദർഭങ്ങൾ, ഏച്ചുകെട്ടലുകളില്ലാത്ത സംഭാഷണങ്ങൾ, സുപരിചതരായ കഥാപാത്രങ്ങൾ, ഹൃദയസ്പർശിയായ ക്‌ളൈമാക്‌സ് തുടങ്ങിയവയാണ് തിരക്കഥയിലെ പ്രത്യേകതകൾ. കുട്ടിക്കാലം മുതൽ നമുക്ക് ചുറ്റും കണ്ട കാഴ്ചകളെല്ലാം കുട്ടികൾക്കും കുടുംബത്തിനൊപ്പം വീണ്ടും കാണുമ്പോളുള്ള സന്തോഷം പ്രേക്ഷകരിൽ പ്രകടമായിരുന്നു. ഇനിയും ഇതുപോലെ രസകരമായ തിരക്കഥകൾ എഴുതുവാൻ രഞ്ജൻ പ്രമോദിന് കഴിയട്ടെ.

സംവിധാനം: ⭐⭐⭐⭐
കഥാസന്ദർഭങ്ങളുടെ കൃത്രിമത്വമില്ലാത്ത അവതരണമാണ് ഓരോ സിനിമയെയും പ്രേക്ഷകരുടെ പ്രിയപെട്ടതാകുന്നത്. കേരളത്തിലെ നാട്ടിൻപുറങ്ങളിൽ ചെന്നാൽ നേരിൽ കാണുന്ന കാഴ്ചകൾ അതേപടി വിശ്വസനീയമായി അവതരിപ്പിച്ച രഞ്ജൻ പ്രമോദിന്റെ സംവിധാന രീതി പ്രശംസനീയമാണ്. കഥാപശ്ചാത്തലത്തിനു അനിയോജ്യമായ ഒരു ലൊക്കേഷനിൽ ഈ സിനിമ ചിത്രീകരിക്കാനായി എന്നത് കഥയുടെ വിശ്വസനീയതയ്ക്കു ആക്കം കൂട്ടിയിട്ടുണ്ട്. അഭിനേതാക്കളുടെ മിതമാർന്ന പ്രകടനവും, സിങ്ക് സൗണ്ട് ഉപയോഗിച്ചുള്ള സംഭാഷണങ്ങളുടെ റെക്കോർഡിങ്ങും സിനിമയുടെ അവതരണത്തിന് ഗുണം ചെയ്തിട്ടുണ്ട്. ആ ഗ്രാമനിവാസികളുടെ മൈതാനത്തിന്റെ കഥയോടൊപ്പം ബൈജുവിന്റെയും സുഹൃത്തുക്കളുടെയും കുടുംബത്തിലുള്ളവരുടെയും ജീവിതത്തിലെ വിഷമങ്ങളും സന്തോഷങ്ങളും കഷ്ടപ്പാടുകളും പ്രണയവും വിരഹവും കൃത്യമായി സമന്വയിപ്പിച്ചാണ് രഞ്ജൻ പ്രമോദ് അവതരിപ്പിച്ചത്. എൺപതുകളുടെ അവസാനം നിർമ്മിക്കപ്പെട്ടിട്ടുള്ള ചില സത്യൻ അന്തിക്കാട്-ശ്രീനിവാസൻ സിനിമകളെ ഓർമ്മിപ്പിക്കിന്നവിധമാണ് ഈ സിനിമയുടെ അവതരണം. ഒരുപാട് നാളുകൾക്കു ശേഷമുള്ള രഞ്ജൻ പ്രമോദ് എന്ന എഴുത്തുകാരന്റെയും സംവിധായകന്റെയും രണ്ടാംവരവ് ഗംഭീരമായി.

സാങ്കേതികം: ⭐⭐⭐⭐
സിനിമയുടെ ദൈർഘ്യം കഥയാവശ്യപെടുന്നതിലും ഒരല്പം കൂടുതലായിരുന്നു എന്നത് ആസ്വാദനത്തെ ദോഷകരമായി ബാധിച്ചു. സംജിത് മുഹമ്മദ് തന്റെ സ്ഥിരം ശൈലി കൈവിടാതെ സൂക്ഷമമായി രംഗങ്ങൾ കോർത്തിണക്കിയിട്ടുണ്ട്. കഥയിൽ പ്രാധാന്യമില്ലാത്ത ഒന്ന് രണ്ടു കഥാപാത്രങ്ങളെ ഒഴുവാക്കിയിരുന്നുവെങ്കിൽ ദൈർഘ്യം കുറയ്ക്കാമായിരുന്നു. പ്രശാന്ത് രവീന്ദ്രനാണ് രംഗങ്ങൾ ക്യാമറയിൽ പകർത്തിയത്. ഓരോ ഫ്രയിമുകളും നൂറു ശതമാനം വിശ്വസനീയതയോടെയാണ് ചിത്രീകരിച്ചത്. ക്യാമറ ഗിമ്മിക്‌സുകളോ കൃത്രിമത്വ ലൈറ്റുകളോ ഒന്നും ഉപയോഗിക്കാതെ ചിത്രീകരിച്ച ഈ സിനിമയിലെ ഓരോ രംഗങ്ങളും ഹൃദ്യമായിരുന്നു. എടുത്തു പറയേണ്ട പ്രശംസിക്കേണ്ട ഒന്നാണ് ബിജിബാലിന്റെ പശ്ചാത്തല സംഗീതം. ഓരോ കഥാസന്ദർഭങ്ങളോടും ഇഴുകിച്ചേർന്ന പശ്ചാത്തല സംഗീതമായിരുന്നു ബിജിബാൽ ചിട്ടപ്പെടുത്തിയത്. ഹരിനാരായണൻ എഴുതി ബിജിബാൽ ഈണമിട്ട ആകാശം പന്തലുകെട്ടി എന്ന പാട്ടും മികവുറ്റതായിരുന്നു. പ്രമോദ് തോമസാണ് സിങ്ക് സൗണ്ട് രീതിയിലുള്ള ശബ്ദമിശ്രണത്തിനു നേതൃത്വം നൽകിയത്. രംഗങ്ങളുടെ വിശ്വസനീയതയ്ക്കു മാറ്റുകൂട്ടുവാൻ സഹായിച്ച ഘടകങ്ങളിൽ ഒന്നാണ് ചിത്രീകരണത്തിനിടയിലുള്ള ശബ്ദമിശ്രണം. സമീറ സനീഷിന്റെ വസ്ത്രാലങ്കാരം കഥാപാത്രങ്ങൾക്ക് യോജിച്ചവയായിരുന്നു. ശ്രീജിത്ത് ഗുരുവായൂരാണ് ചമയം നിർവഹിച്ചത്.

അഭിനയം: ⭐⭐⭐⭐
ഒരു സിനിമയിലെ എല്ലാ അഭിനേതാക്കളും തനതായ ശൈലിയിൽ അവരവരുടെ കഥാപാത്രങ്ങളെ അവതരിപ്പിക്കുന്നത് വിരളം മാത്രം സംഭവിക്കുന്ന ഒന്നാണ്. ബൈജു എന്ന കഥാപാത്രത്തെ അവതരിപ്പിക്കവാൻ ബിജു മേനോനെയല്ലാതെ മറ്റൊരാളെ സങ്കല്പിക്കാനാകില്ല. അത്രയ്ക്ക് രസകരമായ രീതിയിൽ അലസതയുള്ള ഒരു ചെറുപ്പക്കാരന്റെ കഥാപാത്രം മികവോടെ ബിജു മേനോൻ അവതരിപ്പിച്ചു. മറ്റൊരു മികച്ച അഭിനയം കാഴ്ചവെച്ചത് ഹരീഷ് പെരുമണ്ണയാണ്. അധികം സംഭാഷണങ്ങൾ ഒന്നുമില്ലാത്ത വിനീത് എന്ന ചെറുപ്പക്കാരനെ ഹാസ്യരസമുള്ള ഭാവാഭിനയത്തിലൂടെ ഹരീഷ് അവതരിപ്പിച്ചു. അജു വർഗീസിന്റെ ജോഡിയായി അഭിനയിച്ച പുതുമുഖം ശ്രീകലയുടെ അഭിനയം വളരെ മികച്ചുനിന്നു. മനോജ് എന്ന വേഷത്തിൽ ദീപക് പറമ്പോളും തിളങ്ങി. സ്വതസിദ്ധമായ അഭിനയമാണ് വിജയരാഘവന്റെ അച്ഛൻ കഥാപാത്രത്തെ മികവുറ്റതാക്കിയത്. അജു വർഗീസും ജനാർദ്ദനനും ഇന്ദ്രൻസും അലൻസിയാറും മണികണ്ഠനും ദിലീഷ് പോത്തനും ഹന്നാ റെജിയും അവരവരുടെ കഥാപാത്രങ്ങളെ ഗംഭീരമാക്കി. ഇവരെ കൂടാതെ പത്മരാജ് രതീഷ്, ശശി കലിങ്ക, ആബിദ്, നെബീഷ്, ഹക്കിം, ചേതൻ ലാൽ, മാസ്റ്റർ വിശാൽ, അഞ്ജലി അനീഷ്, ശ്രീധന്യ, അംബിക മോഹൻ, അനഘ എന്നിവരും ഈ സിനിമയിൽ അഭിനയിച്ചിട്ടുണ്ട്. ഏവർക്കും അഭിനന്ദനങ്ങൾ!

വാൽക്കഷ്ണം: ഗൃഹാതുരത്വമുണർത്തുന്ന ഒരുപിടി നല്ല മുഹൂർത്തങ്ങൾ കോർത്തിണക്കിയ കുടുംബചിത്രമാണ് രക്ഷാധികാരി ബൈജു!

രചന, സംവിധാനം: രഞ്ജൻ പ്രമോദ്
കഥ: ടി.എസ്.അർജുൻ
നിർമ്മാണം: അലക്‌സാണ്ടർ മാത്യു, സതീഷ് കോലം
ബാനർ: 100ത് മങ്കി മൂവീസ്
ഛായാഗ്രഹണം: പ്രശാന്ത് രവീന്ദ്രൻ
ചിത്രസന്നിവേശം: സംജിത് മുഹമ്മദ്
ഗാനരചന: ഹരിനാരായണൻ
സംഗീതം: ബിജിബാൽ
കലാസംവിധാനം: അജയ് മാങ്ങാട്
ശബ്ദസംവിധാനം: പ്രമോദ് തോമസ്
ചമയം: ശ്രീജിത്ത് ഗുരുവായൂർ
വസ്ത്രാലങ്കാരം: സമീറ സനീഷ്
വിതരണം: ഇറോസ് ഇൻറ്റർനാഷണൽ.

ജോർജ്ജേട്ടൻസ് പൂരം – ⭐⭐


പൊട്ടാത്ത ചളുപ്പടക്കങ്ങളും ആളൊഴിഞ്ഞ പൂരപ്പറമ്പും! – ⭐⭐

ജനപ്രിയനായകന്റെ അവധിക്കാല സിനിമകൾ കുട്ടികൾക്ക് ആസ്വദിക്കാനുള്ളതാണെന്ന് അദ്ദേഹവും ആരാധകരും അവകാശപെടാറുള്ളതാണ്. ദിലീപിന്റെ മുൻകാല വിഷു ചിത്രങ്ങളുടെ പട്ടികയെടുത്താൽ അത് വ്യക്തമാകും. പാപ്പി അപ്പച്ചയും, മായാമോഹിനിയും, റിംഗ് മാസ്റ്ററും, കിംഗ് ലയറുമൊക്കെ അവധിക്കാലത്ത് പ്രദർശനത്തിനെത്തിയ സിനിമകളാണ്. മേല്പറഞ്ഞ സിനിമകൾ നിങ്ങളെ രസിപ്പിച്ചിട്ടുണ്ടെങ്കിൽ ജോർജ്ജേട്ടൻസ് പൂരവും നിങ്ങളെ രസിപ്പിച്ചേക്കാം. അതല്ലാതെ ശുദ്ധമായ ഹാസ്യ രംഗങ്ങളുള്ള ആസ്വാദ്യകരമായ സിനിമ ആഗ്രഹിക്കുന്നവർ ജോർജ്ജേട്ടൻസ് പൂരം ഒഴിവാക്കുന്നതാകും ഭേദം.

ഡോക്ടർ ലൗ എന്ന കുഞ്ചാക്കോ ബോബൻ സിനിമയ്ക്ക് ശേഷം കെ.ബിജു സംവിധാനം ചെയ്ത ജോർജ്ജേട്ടൻസ് പൂരത്തിന്റെ രചന നിർവഹിച്ചത് വൈ.വി.രാജേഷാണ്. കഥയെഴുതിയത് സംവിധായകൻ ബിജു തന്നെയാണ്. ശിവാനി സുരാജും അജയ് ഘോഷും ബിജോയ് ചന്ദ്രനും ചേർന്നാണ് ജോർജ്ജേട്ടൻസ് പൂരം നിർമ്മിച്ചത്. വിനോദ് ഇല്ലമ്പള്ളി ഛായാഗ്രഹണവും, ലിജോ പോൾ സന്നിവേശവും ഗോപി സുന്ദർ പശ്ചാത്തല സംഗീതവും നിർവഹിച്ചിരിക്കുന്നു.

പ്രമേയം: ⭐
സാമൂഹിക സേവനം ചെയ്യുന്നു എന്ന തട്ടിപ്പിൽ ഒരു തൊഴിലും ചെയ്യാതെ ജീവിക്കുന്ന നാൽവർ സംഘം. അവരുടെ പ്രിയപ്പെട്ട സ്ഥലമാണ് മത്തായി പറമ്പ്. ഉടമസ്ഥ അവകാശമില്ലെങ്കിലും ജോർജ്ജേട്ടനും സുഹൃത്തുക്കളും അറിയാതെ മത്തായി പറമ്പിൽ ഒന്നും നടക്കില്ല. ആ സ്ഥലത്തിന്റെ യഥാർത്ഥ അവകാശി വരുന്നതോടെ കഥ മറ്റൊരു ദിശയിലേക്കു തിരിയുന്നു. കാലാകാലങ്ങളായി കണ്ടുമടുത്ത പ്രമേയവും കഥയും തന്നെയാണ് ജോർജ്ജേട്ടൻസ് പൂരത്തിലും കാഴ്ച്ചയാകുന്നത്. മലയാള സിനിമ പുതിയ പാതയിലൂടെ സഞ്ചരിച്ചു തുടങ്ങിയതൊന്നും ഈ സിനിമയുടെ അണിയറപ്രവർത്തകർ അറിഞ്ഞിട്ടില്ല എന്ന് കരുതുന്നു. പൂരത്തിന് കുട്ടികളെങ്കിലും കയറുമോ എന്ന് കണ്ടറിയാം!

തിരക്കഥ: ⭐⭐
വൈ.വി.രാജേഷ് എന്ന തിരക്കഥാകൃത്തിന്റെ മുൻകാല സിനിമകളുടെ വിജയ ചേരുവകൾ തെറ്റാതെ എഴുതിയ തിരക്കഥയാണ് ജോർജ്ജേട്ടൻസ് പൂരത്തിന്റേതും. പുതുമയില്ലാത്ത കഥാസന്ദർഭങ്ങൾ, പരിചിതമായ കഥാപാത്രങ്ങൾ, പ്രവചിക്കാനാവുന്ന കഥാഗതി, ചിരിവരാത്ത സംഭാഷണങ്ങൾ എന്നിവ സമന്വയിപ്പിച്ചു എഴുതിയതാണ് ഈ സിനിമയുടെ തിരക്കഥ. പതിവ് രീതിയിൽ നിന്ന് മാറ്റിപ്പിടിച്ച ഒരേയൊരു ഘടകം കഥാവസാനമുള്ള കബഡി കളിയാണ്. അവധികാലം ആഘോഷിക്കുവാൻ വേണ്ടി സിനിമ കാണാനെത്തുന്ന കുട്ടികളെയും കുടുംബ പ്രേക്ഷകരെയും ചിരിപ്പിക്കുക എന്നതായിരുന്നു വൈ.വി.രാജേഷിന്റെ ഉദ്ദേശമെങ്കിൽ, അസഭ്യങ്ങളും ദ്വയാർത്ഥ പ്രയോഗങ്ങളുമുള്ള സംഭാഷണങ്ങളെങ്കിലും ഈ സിനിമയിൽ നിന്ന് ഒഴിവാക്കാമായിരുന്നു. സെൻട്രൽ ജയിൽ എന്ന ക്രൂര സിനിമാപീഡനം കണ്ട ജനപ്രിയ നായകന്റെ ആരാധകർക്ക് ഒരു ആശ്വാസമായിരിക്കാം ജോർജ്ജേട്ടൻസ് പൂരം.

സംവിധാനം: ⭐⭐
ആറു വർഷങ്ങൾക്കു മുമ്പ് കെ. ബിജു സംവിധാനം ചെയ്ത ഡോക്ടർ ലൗ എന്ന സിനിമയ്ക്ക് വേണ്ടി സ്വീകരിച്ച അതെ അവതരണ രീതിയാണ് ഈ സിനിമയ്ക്ക് വേണ്ടിയും സ്വീകരിച്ചത്. ഒരുപാട് മാറ്റങ്ങൾ സിനിമയുടെ അവതരണ രീതിയിൽ സംഭവിച്ചു എന്ന വസ്തുത അദ്ദേഹം അറിഞ്ഞിട്ടില്ല എന്ന് കരുതാം. കൊച്ചുകുട്ടികൾക്ക് പോലും പ്രവചിക്കാനാവുന്ന അവതരണമാണ് ഈ സിനിമയുടെ പോരായ്മകളിൽ പ്രധാനം. ജനപ്രിയ നായകന്റെ സമ്മതവും, പണം മുടക്കാൻ നിർമ്മാതാക്കളെയും ലഭിച്ചതിനു ശേഷമാണ് ഈ സിനിമയുടെ തിരക്കഥ എഴുതി തുടങ്ങിയതെന്ന് സംശയിക്കേണ്ടിയിരിക്കുന്നു. തിരക്കഥയും അവതരണ രീതിയും മുൻകൂറായി മനസ്സിലായിക്കാൽ പുതുമുഖ നടന്മാർ പോലും ഈ സിനിമയിൽ അഭിനയിക്കുവാൻ സാധ്യത കാണുന്നില്ല. അവധിക്കാലത്തെ വൻകിട സിനിമകൾക്ക് മുമ്പിൽ പൊട്ടാത്ത ചളുപടക്കങ്ങളുള്ള ഈ പൂരക്കാഴ്ച കാണുവാൻ ജനങ്ങൾ വരുമോയെന്നു വരുംനാളുകളിൽ അറിയാം. ജനപ്രിയനായകനു ഭാഗ്യം തുണച്ചില്ലെങ്കിൽ, പ്രദർശനശാലകൾ ആളൊഴിഞ്ഞ പൂരപ്പറമ്പ് പോലെയാകാനാണ് സാധ്യത!

സാങ്കേതികം: ⭐⭐⭐
വിനോദ് ഇല്ലമ്പള്ളിയുടെ ഛായാഗ്രഹണം ശരാശരിയിലൊതുങ്ങി. കണ്ടുമടുത്ത തൃശൂർ കാഴ്ച്ചകൾ തന്നെയാണ് ഈ സിനിമയിലും. പാട്ടുകളുടെ ചിത്രീകരണം കളർഫുള്ളായിരുന്നു എന്നത് ഒരു സവിശേഷതയല്ലെങ്കിലും സിനിമയിലെ മറ്റു രംഗങ്ങളെ അപേക്ഷിച്ചു ഭേദമായിരുന്നു. ലിജോ പോളിന്റെ സന്നിവേശം പ്രത്യേകിച്ച് പുതുമകളൊന്നും സമ്മാനിച്ചില്ല. രണ്ടാം പകുതിയുടെ അവസാന ഭാഗത്തിലുള്ള കബഡികളികൾ സ്ലോ മോഷനിൽ അവതരിപ്പിച്ചതുകൊണ്ടു പ്രേക്ഷകരിൽ ആവേശം ജനിപ്പിക്കാനായില്ല. രംഗങ്ങൾക്ക് ഒരല്പമെങ്കിലും ഉണർവ്വ് പകർന്നത് ഗോപി സുന്ദറിന്റെ പശ്ചാത്തല സംഗീതം കാരണമാണ്. അതുപോലെ, ഗോപി സുന്ദർ ഈണമിട്ട പാട്ടുകൾ കേൾക്കാനും ഏറ്റുപാടാനും തോന്നുന്നവയായിരുന്നു. ജോലീം കൂലീം എന്ന പാട്ടും ഓമൽ ചിരിയോ എന്ന പാട്ടും എഴുതിയിരിക്കുന്നത് ഹരിനാരായണനാണ്. ഷോബി പോൾരാജിന്റെ നൃത്ത സംവിധാനം മികവ് പുലർത്തിയിരുന്നു. ഏറെ നാളുകൾക്കു ശേഷം ദിലീപിന്റെ രസകരമായ നൃത്തം കണ്ടത് ഓമൽ ചിരിയോ എന്ന ഗാന ചിത്രീകരണത്തിലാണ്. അൻപറീവിന്റെ സംഘട്ടന രംഗങ്ങൾ ജനപ്രിയ നായകന്റെ ആരാധകരെ ആവേശഭരിതരാക്കുന്ന രീതിയിലായിരുന്നു. പി.എൻ.മണിയുടെ ചമയം പല രംഗങ്ങളിലും അമിതമായി അനുഭവപെട്ടു. നിസ്സാർ റഹ്മത്തിന്റെ വസ്ത്രാലങ്കാരം കഥാപാത്രങ്ങൾക്ക് ചേരുന്നവയായിരുന്നു.

അഭിനയം: ⭐⭐⭐
ജനപ്രിയനായകൻ ദിലീപ്, രജീഷ വിജയൻ, ചെമ്പൻ വിനോദ് ജോസ്, രഞ്ജി പണിക്കർ, ടീ.ജി.രവി, വിനയ് ഫോർട്ട്, ഷറഫുദ്ധീൻ, തിരു ആക്ട്ലാബ്, അസീം ജമാൽ, ജയരാജ് വാര്യർ, സുനിൽ സുഖദ, ശശി കലിങ്ക, ജനാർദ്ദനൻ, കെ.ൽ.ആന്റണി, ജയശങ്കർ, ഹരികൃഷ്ണൻ, കലാഭവൻ ഹനീഫ്, ഗണപതി, മാസ്റ്റർ ജീവൻ, കലാരഞ്ജിനി, സതി പ്രേംജി, കുളപ്പുള്ളി ലീല എന്നിവരാണ് ഈ സിനിമയിലെ പ്രധാന അഭിനേതാക്കൾ. ദിലീപ് തന്റെ സ്ഥിരം ശൈലിയിൽ കുട്ടികളെ ആകർഷിക്കുന്ന രീതിയിൽ ജോർജ്ജേട്ടനായി അഭിനയിച്ചു. അശ്ലീലം ആവശ്യത്തിനും അനാവശ്യത്തിനും പറഞ്ഞു ഷറഫുദ്ധീൻ വെറുപ്പിക്കൽ തുടർന്നു. വിനയ് ഫോർട്ടും രഞ്ജി പണിക്കരും ചെമ്പൻ വിനോദും അവരവരുടെ കഥാപാത്രങ്ങൾ തന്മയത്വത്തോടെ അവതരിപ്പിച്ചു. മികച്ച നടിക്കുള്ള സംസ്ഥാന പുരസ്‌കാരം നേടിയ രജീഷ വിജയൻ വെറുതെ വന്നുപോയി. ചെറുതും വലുതുമായ കഥാപാത്രങ്ങൾ അവതരിപ്പിച്ച ഒട്ടനവധി അഭിനേതാക്കളും ഈ സിനിമയിലുണ്ട്.

വാൽക്കഷ്ണം: ജനപ്രിയനായകന്റെ കുട്ടി ആരാധകർക്കായി ഒരുക്കിയ പൂരകാഴ്ച്ചകൾ മുതിർന്നവരെ തൃപ്തിപ്പെടുത്തില്ല.

കഥ, സംവിധാനം: കെ.ബിജു
നിർമ്മാണം: അജയ് ഘോഷ്, ബിജോയ് ചന്ദ്രൻ, ശിവാനി സുരാജ്
ബാനർ: ചാന്ദ് വി. ക്രിയേഷൻസ്
തിരക്കഥ, സംഭാഷണം: വൈ.വി.രാജേഷ്
ഛായാഗ്രഹണം: വിനോദ് ഇല്ലമ്പള്ളി
ചിത്രസന്നിവേശം: ലിജോ പോൾ
സംഗീതം: ഗോപി സുന്ദർ
ഗാനരചന: ഹരിനാരായണൻ
കലാസംവിധാനം: സുജിത് രാഘവ്
ചമയം: പി.എൻ.മണി
വസ്ത്രാലങ്കാരം: നിസ്സാർ റഹ്മത്
സംഘട്ടനം: അൻപറിവ്
നൃത്തസംവിധാനം: ഷോബി പോൾരാജ്
വിതരണം: ചാന്ദ് വി. റിലീസ്.

ഫുക്രി – ⭐


ഫുക്രി – ചളുവിൽ ചാലിച്ച ചളിച്ചിത്രകാവ്യം!⭐

ശ്രീമതികളെ ശ്രീമാന്മാരെ,

ഭാസ്കര ചരിതമെഴുതി പെരുംനുണപ്പുഴ നീന്തി കടന്നു ഉദയപുരം സുൽത്താന്റെ കൊട്ടാരത്തിലെത്തിയ സിനിമാ സംവിധായകനും ഉത്സാഹ കമ്മിറ്റിക്കാരും കൊട്ടാരത്തിലെ കാര്യസ്ഥന്റെ ജീവിത കഥ കേട്ടു കോരിത്തരിച്ചു. സംവിധായകനും കൂട്ടരും സംവിധായകന്റെ മൈലാഞ്ചി മൊഞ്ചുള്ള വീട്ടിലെത്തിയ ഉടനെ ഒരു സിനിമയ്ക്കുള്ള തിരക്കഥ എഴുതി. ആ തിരക്കഥയുടെ ചളിച്ചിത്ര ആവിഷ്കാരമാണ് ഫുക്രി.

പ്രമേയം: ⭐
മലയാള സിനിമയിൽ ഒരുകാലത്തെ സ്ഥിരം പ്രമേയമായിരുന്നു ആൾമാറാട്ടം. ഒരു പ്രത്യേക ദൗത്യം നിറവേറ്റുവായി ഒരുപാട് കുടുംബാംഗങ്ങുള്ള ഒരു തറവാട് വീട്ടിലെത്തുന്ന അനാഥനായ നായകൻ. നായകന്റെ സഹായത്തിനായി രണ്ടോ മൂന്നോ മണ്ടന്മാർ. അവരെ മുഴുവൻ കുടുംബത്തിൽ കയറ്റി താമസിപ്പിക്കുന്ന തറവാട് വീട്ടിലെ അംഗങ്ങൾ. തറവാട്ട് വീട്ടിലെ സുന്ദരിയായ നായികയ്ക്ക് നായകനോട് പ്രണയം. ഒടുവിൽ, നായകൻ ദൗത്യം നിറവേറ്റുന്നതോടെ ആൾമാറാട്ട കഥ എല്ലാവരുമാറിയുന്നു. നായികയും നായകനും തമ്മിലുള്ള പ്രണയം കാരണം എല്ലാം എല്ലാവരും ക്ഷമിക്കുന്നു. ശുഭം! വള്ളിപുള്ളി തെറ്റാതെ ഇതേ പ്രമേയം തിരഞ്ഞെടുത്ത സിദ്ദിക്ക് എന്ന സംവിധായകനോട് ഈ അവസരത്തിൽ മലയാള സിനിമ പ്രേമികൾക്കു പറയുവാനുള്ളത് ഒന്നുമാത്രം – പഴയ വീഞ്ഞ് ആവശ്യത്തിനധികം നിത്യേനെ രുചിച്ചുകൊണ്ടിരിക്കുന്നു. പുതിയ കുപ്പിയിലാക്കി ഇനിയും വിളമ്പരുത്!

തിരക്കഥ: ⭐
അവധിക്കാലത്ത്‌ സിനിമ കാണുവാനെത്തുന്ന കുടുംബപ്രേക്ഷകരെ ലക്ഷ്യമാക്കി സിനിമ ഒരുക്കുമ്പോൾ, ഹാസ്യത്തിന് പ്രാധാന്യം നൽകിയിട്ടുള്ള മുഴുനീള എന്റർറ്റെയിനർ വേണമെന്ന് നിർമ്മാതാവ് നിർബന്ധം പിടിക്കുന്നതിൽ തെറ്റില്ല. എന്നാൽ, ഒരു സംവിധായകൻ തന്നെ നിർമ്മാതാകുമ്പോൾ, അത്തരത്തിലുള്ള നിബന്ധനകളുടെ ആവശ്യമില്ല. ഫുക്രി എന്ന സിനിമയുടെ നിർമ്മാതാക്കളിൽ ഒരാളായ സിദ്ദിക്ക്, വാണിജ്യ വിജയം മാത്രം മുന്നിൽ കണ്ടുകൊണ്ടു തന്റെ മുൻകാല സിനിമകളിലെ സന്ദർഭങ്ങളും സംഭാഷണങ്ങളും അതേപടി തിരക്കഥയിൽ ഉൾപ്പെടുത്തിയിരിക്കുന്നു. മേല്പറഞ്ഞ കാരണമാണ് ഫുക്രി എന്ന സിനിമയെ പ്രേക്ഷകരിൽ നിന്നും അകറ്റുന്നതും. കഴിഞ്ഞ കുറച്ചു വർഷങ്ങളായി ടീവി ചാനലിലെ കോമഡി പരിപാടികളുടെ വിധികർത്താവായിരിക്കവേ കേട്ട തമാശകളെന്നു തോന്നിപ്പിക്കുന്ന വളിപ്പുകൾ ഒന്ന് പോലും വിട്ടുപോകാതെ സംഭാഷണങ്ങളായി ഉൾപ്പെടുത്തിയിട്ടുണ്ട്. അസഹനീയമായിരുന്നു അവ ഓരോന്നും എന്ന് അടിവരയിട്ടു പറയേണ്ടിയിരിക്കുന്നു. അച്ഛൻ-മകൻ ബന്ധമോ, പ്രണയമോ, നായകന്റെ നിസ്സഹായാവസ്ഥയോ ഒന്നും പ്രേക്ഷകരെ സ്വാധീനിക്കുന്നില്ല. മലയാള സിനിമയിലെ സിദ്ദിഖിന്റെ തൂലികയിൽ പിറന്ന ഏറ്റവും മോശം തിരക്കഥയാണ് ഫുക്രി എന്ന ഈ സിനിമയുടേത്.

സംവിധാനം: ⭐
ഹാസ്യ രംഗങ്ങൾ തന്മയത്വത്തോടെ അവതരിപ്പിക്കുവാൻ കഴിവുള്ള നടീനടന്മാർ, പ്രഗൽഭരായ സാങ്കേതിക വിദഗ്ദർ, പണം മുടക്കാൻ നിർമ്മാതാക്കൾ, എല്ലാ ഭാഷകളിലും സിനിമകൾ സംവിധാനം ചെയ്ത പരിചയസമ്പത്ത്. ഇവയെല്ലാം ഉണ്ടായിരുന്നിട്ടും നല്ലൊരു പ്രമേയമോ കഥയോ സംഭാഷണങ്ങളോ അവതരണ മികവോ ഒന്നും ഫുക്രി എന്ന സിനിമയ്ക്ക് വേണ്ടി രൂപപെടുത്തിയെടുക്കുവാൻ സിദ്ദിക്കിന് സാധിച്ചില്ല. സിനിമയുടെ ആദ്യാവസാനം കൃത്രിമത്വം നിറഞ്ഞ കഥാസന്ദർഭങ്ങളും, വളിപ്പ് സംഭാഷണങ്ങളും ഒരുവശത്തു പ്രേക്ഷകരെ മുഷിപ്പിക്കുമ്പോൾ, മറുവശത്തു അഭിനേതാക്കളുടെ താല്പര്യമില്ലാത്ത അഭിനയ രീതിയും അലസമായ അവതരണ രീതിയും പ്രേക്ഷകരെ ബോറടിപ്പിച്ചു. നാളിതുവരെ മലയാള സിനിമയിൽ പുറത്തിറങ്ങിയ ഏറ്റവും മോശം സിദ്ദിക്ക് സിനിമ എന്ന വിശേഷണം ഫുക്രിയ്ക്ക് ലഭിച്ചു.

സാങ്കേതികം: ⭐⭐⭐
തിരക്കഥയ്ക്ക് അനിയോജ്യമായ രംഗങ്ങൾ പ്രത്യേകിച്ച് പുതുമകളൊന്നും സമ്മാനിക്കാതെ ക്യാമറയിൽ പകർത്തുവാൻ വിജയ് ഉലകനാഥിന് സാധിച്ചു. പാട്ടുകളുടെ ചിത്രീകരണം പോലും മുമ്പ് കണ്ടിട്ടുള്ളതിൽ നിന്നും വ്യത്യസ്ഥമല്ല. കെ.ആർ.ഗൗരിശങ്കർ ആണ് രംഗങ്ങൾ സന്നിവേശം ചെയ്തത്. കഥയിൽ പ്രാധാന്യമില്ലാത്ത രംഗങ്ങൾ നിരവധി കാണപ്പെട്ടു. ഹാസ്യത്തിന് വേണ്ടി ഉൾപ്പെടുത്തിയ കഥാപാത്രങ്ങളും കഥാസന്ദർഭങ്ങളും അനാവശ്യമായിരുന്നു. ഗോപി സുന്ദർ നിർവഹിച്ച പശ്ചാത്തല സംഗീതം കേട്ടതായി ഓർമ്മപോലുമില്ല. ഫുക്രിമാരുടെ വീട് ഒരുക്കിയ ജോസഫ് നെല്ലിക്കൽ അഭിനന്ദനം അർഹിക്കുന്നു. പാട്ടുകളുടെ ചിത്രീകരണത്തിൽ വീടിനകത്തുള്ള കലാസംവിധാനവും മികവ് പുലർത്തി. റഫീഖ് അഹമ്മദ് എഴുതിയ വരികൾക്ക് സംഗീതം നൽകിയത് വിശ്വജിത്തും ഡോക്ടർ സുധീപും ചേർന്നാണ്. ‘ഒരേ ഒരു വാക്കിൽ’ എന്ന് തുടങ്ങുന്ന പാട്ടു മികവ് പുലർത്തി. പ്രവീൺ വർമ്മയുടെ വസ്ത്രാലങ്കാരം കഥാസന്ദർഭങ്ങളോടും കഥാപാത്രങ്ങളോടും നീതി പുലർത്തുന്നവയായിരുന്നു. ലിബിൻ മോഹനനാണ് ചമയം.

അഭിനയം: ⭐⭐⭐
ജോയ് താക്കോൽക്കാരനായും, അങ്കൂർ റാവുത്തറായും, രഘുറാമായും, സുധിയായും, ഡോൺബോസ്‌കോയായും നിറഞ്ഞാടിയ ജയസൂര്യ, തട്ടിപ്പുവീരൻ കഥാപാത്രങ്ങളുടെ പാത വീണ്ടും പിന്തുടരുന്നതിന്റെ തുടക്കമായാണോ ലുക്മാൻ അലി ഫുക്രിയെ തിരഞ്ഞെടുത്തത്? ലക്കി എന്ന കഥാപാത്രത്തെ അലസമായി അവതരിപ്പിച്ച പ്രതീതിയാണ് അനുഭവപ്പെട്ടത്. ഭാവാഭിനയത്തിലൂടെ നടൻ സിദ്ദിഖ് സുലൈമാൻ ഫുക്രിയായി മികച്ച പ്രകടനം കാഴ്ച്ചവെച്ചപ്പോൾ, അലി ഫുക്രിയായി ലാൽ വന്നതും പോയതും അറിഞ്ഞില്ല. നായികമാരിൽ അനു സിത്താര തരക്കേടില്ലാത്ത പ്രകടനം കാഴ്ച്ചവെച്ചപ്പോൾ, പ്രയാഗ മാർട്ടിൻ കൃത്രിമത്വം നിറഞ്ഞ അഭിനയത്തിലൂടെ നിരാശപ്പെടുത്തി. ഹാസ്യ വിഭാഗം കൈകാര്യം ചെയ്ത ജോജു ജോർജ്, ഭഗത് മാനുവൽ, നിർമ്മൽ പാലാഴി, നിയാസ് ബക്കർ, നസീർ സംക്രാന്തി എന്നിവർ ബോറടിപ്പിച്ചു. ഇവരെ കൂടാതെ ജനാർദനൻ, ജോൺ കൈപ്പറമ്പിൽ, അൻസാർ കലാഭവൻ, വിനോദ് കെടാമംഗലം, സാജൻ പള്ളുരുത്തി, മജീദ്, കെ.പി.എ.സി.ലളിത, ശ്രീലത, തെസ്നി ഖാൻ, കൃഷ്ണപ്രഭ എന്നിവരും ഈ സിനിമയിൽ അഭിനയിച്ചിട്ടുണ്ട്.

വാൽക്കഷ്ണം: ആദ്യാവസാനം പ്രേക്ഷകരെ മുഷിപ്പിക്കുന്ന കഥയും കഥാസന്ദർഭങ്ങളും കഥാപാത്രങ്ങളുമടങ്ങുന്ന ദുരന്തമാണ് ഫുക്രി!

രചന, സംവിധാനം: സിദ്ദിഖ്
നിർമ്മാണം: സിദ്ദിഖ്, വൈശാഖ് രാജൻ, ജെൻസോ ജോസ്
ഛായാഗ്രഹണം: വിജയ് ഉലകനാഥ്
ചിത്രസന്നിവേശം: കെ.ആർ.ഗൗരിശങ്കർ
ഗാനരചന: റഫീഖ് അഹമ്മദ്
സംഗീതം: വിശ്വജിത്, ഡോക്ടർ സുധീപ്
പശ്ചാത്തല സംഗീതം: ഗോപി സുന്ദർ
കലാസംവിധാനം: ജോസഫ് നെല്ലിക്കൽ
വസ്ത്രാലങ്കാരം: പ്രവീൺ വർമ്മ
ചമയം: ലിബിൻ മോഹനൻ
നൃത്തസംവിധാനം: ബ്രിന്ദ
സംഘട്ടനം: മാഫിയ ശശി
വിതരണം: വൈശാഖ റിലീസ്.

കട്ടപ്പനയിലെ ഋത്വിക് റോഷൻ – ⭐⭐


‘ഏറെക്കുറെ’ രസിപ്പിക്കുന്ന സിനിമ! – ⭐⭐

കുറവുകൾ കൂടുതലുള്ള തിരക്കഥയെ കൂടുതൽ കുറവുകൾ തോന്നിപ്പിക്കാതെ അവതരിപ്പിച്ച ആസ്വാദ്യകരമായ സിനിമയാണ് കട്ടപ്പനയിലെ ഋത്വിക് റോഷൻ. അച്ഛൻ-മകൻ ആത്മബന്ധത്തിന്റെ നൊമ്പരമുണർത്തുന്ന രംഗങ്ങളും, ശുദ്ധമായ ഹാസ്യ രംഗങ്ങളും, നല്ലൊരു സന്ദേശവും ഈ സിനിമയുടെ സവിശേഷതകൾ ആണെങ്കിൽ, നാട്ടിൻപുറത്തെ കണ്ടുമടുത്ത കഥാപാത്രങ്ങളും, പ്രവചിക്കാനാവുന്ന കഥാഗതിയും സിനിമയുടെ പ്രധാന പോരായ്മകളായി അവശേഷിക്കുന്നു.

മലയാള സിനിമയിലേക്ക് അഭിനയ ശേഷിയുള്ള ഒരു നായക നടനെ ഈ സിനിമയിലൂടെ ലഭിച്ചിരിക്കുന്നു. ചെറിയ വേഷങ്ങളിലൂടെ പത്തു വർഷത്തിലധികം ബാലതാരമായി അഭിനയിച്ച വിഷ്ണു ഉണ്ണികൃഷ്ണനാണ് മലയാള സിനിമയിലെ പുതിയ താരോദയം. എന്റെ വീട് അപ്പൂന്റെയും, അമൃതം എന്നീ സിനിമകളിലൂടെ ശ്രദ്ധ നേടിയ ബാലതാരമായിരുന്നു വിഷ്ണു ഉണ്ണികൃഷ്ണൻ. എഴുത്തിലും അഭിനയത്തിലും ഒരേ സിനിമയിലൂടെ കഴിവ് തെളിയിച്ച കട്ടപ്പനയിലെ ഋത്വിക് റോഷൻ ആയ വിഷ്ണു ഉണ്ണികൃഷ്ണൻ മലയാള സിനിമയിലെ ശ്രീനിവാസനായി മാറുമെന്ന് നിസംശയം പറയാം.

പ്രമേയം: ⭐⭐
ജീവിതത്തിലെ ഏറ്റവും പ്രധാനപ്പെട്ട രണ്ടു ആഗ്രഹങ്ങളുടെ സഫലീകരണത്തിനായി പരിശ്രമിക്കുന്നതിനിടയിൽ തോറ്റുപോകുന്ന കിച്ചു, അവന്റെ കൊച്ചു കൊച്ചു സന്തോഷങ്ങളും ആത്മാർത്ഥമായി അവനെ സ്നേഹക്കുന്നവരെയും തിരിച്ചറിയാതെ പോകുന്നതുമാണ് ഈ സിനിമയുടെ പ്രമേയം. സിനിമാ മോഹിയായ ഒരച്ഛന്റെ ആഗ്രഹമായിരുന്നു മകനെ നാലാളറിയുന്ന ഒരു സിനിമാ നടനാക്കണമെന്ന്. കൃഷ്ണൻ നായർ എന്ന കിച്ചു അച്ഛന്റെ ആഗ്രഹം പോലെ സിനിമയെ സ്നേഹിക്കുകയും സിനിമാ നടനാകാൻ പരിശ്രമിക്കുകയും ചെയ്യുന്നു. കട്ടപ്പനക്കാർ കിച്ചുവിനെ ഋത്വിക് റോഷൻ എന്ന് വിളിച്ചു. കിച്ചുവിന്റെ ജീവിതത്തിലേക്ക് ഒരു പെൺകുട്ടി കടന്നുവരുന്നു. തുടർന്നുണ്ടാകുന്ന സംഭവങ്ങളാണ് ഈ സിനിമയുടെ കഥ.

തിരക്കഥ: ⭐⭐
അമർ അക്ബർ അന്തോണി എന്ന സിനിമയ്ക്ക് ശേഷം ബിബിൻ ജോർജ്-വിഷ്ണു ഉണ്ണികൃഷ്ണൻ ടീം എഴുതുന്ന തിരക്കഥയാണ് കട്ടപ്പനയിലെ ഋത്വിക് റോഷൻ എന്ന സിനിമയുടേത്. ആസ്വാദ്യകരമായ രണ്ടര മണിക്കൂർ സമ്മാനിക്കുവാൻ ആവശ്യകരമായ ഘടകങ്ങളാണ് ഈ സിനിമയുടെ തിരക്കഥയിൽ ഉടനീളം. കണ്ടുമടുത്ത സ്ഥിരം നാട്ടിൻപുറത്തെ കഥാപാത്രങ്ങളിലൂടെ ആണെങ്കിലും ശുദ്ധമായ ഹാസ്യത്തിന്റെ മേമ്പൊടിയോടെ അവതരിപ്പിച്ച രംഗങ്ങളും നർമ്മ സംഭാഷണങ്ങളും പ്രേക്ഷകരെ ചിരിപ്പിക്കുകയും രസിപ്പിക്കുകയും ചെയ്തു. സിനിമ മോഹവുമായി നടക്കുന്നതിനിടയിൽ കിച്ചുവിന്റെ ജീവിതത്തിൽ ഒരു പെൺകുട്ടി കടന്നുവരുന്നു. ആ പെൺകുട്ടിയുമായി അടുപ്പത്തിലാകുന്നു. എന്നാൽ അവൾ കിച്ചുവിനെ നല്ലൊരു സുഹൃത്തായി മാത്രമാണ്‌ കാണുന്നത് എന്നവൻ മനസ്സിലാകുന്നില്ല. സിനിമയിൽ അവസരങ്ങൾ ലഭിക്കുന്നുണ്ടെങ്കിലും നിറമില്ലാത്ത കാരണത്താൽ അവയെല്ലാം കിച്ചുവിന് നഷ്ടപ്പെടുന്നു. ഇത്തരത്തിലുള്ള ക്‌ളീഷേ രംഗങ്ങളിലൂടെ വികസിക്കുന്ന കഥാസന്ദർഭങ്ങൾ പോരായ്മയാണെങ്കിലും ഹാസ്യ രംഗങ്ങളും സംഭാഷണങ്ങളും വലിയൊരു ആശ്വാസം നൽകുന്നവയാണ്. ഹാസ്യ രംഗങ്ങളോടെ അവസാനിക്കുന്ന ആദ്യ പകുതിയ്ക്ക് നേർവിപരീതമായി അച്ഛനും മകനും തമ്മിലുള്ള ആത്മബദ്ധവും കിച്ചു നേരിടുന്ന പ്രതികൂല സാഹചര്യങ്ങളും പ്രണയ നൈരാശ്യവുമാണ് രണ്ടാം പകുതി. കഥാവസാനം പ്രവചിക്കാനാവുന്ന രീതിയിൽ സിനിമ അവസാനിപ്പിക്കുകയും ചെയ്തു. എല്ലാത്തരം പ്രേക്ഷകരെയും ആസ്വദിപ്പിക്കുന്ന രംഗങ്ങൾ എഴുതുവാൻ ശ്രമിച്ച ബിബിനും വിഷ്ണുവും പുതുമയുള്ള കഥാസന്ദർഭങ്ങൾ എഴുതുവാൻ ശ്രമിച്ചില്ല.

സംവിധാനം: ⭐⭐⭐
തിരക്കഥയിലുള്ള ന്യൂനതകൾ ഒരുപരിധി വരെ പ്രേക്ഷകർക്ക് മനസ്സിലാകാത്തത് നാദിർഷ എന്ന സംവിധായകന്റെ മികവ് ഒന്നുകൊണ്ടു മാത്രമാണ്. കഥാപാത്രങ്ങൾക്ക് അനിയോജ്യരായ നടീനടന്മാരെ കണ്ടെത്തുന്നതിലും, കഥയുടെ വിശ്വസനീയതയോടെയുള്ള അവതരണവും, നല്ല പാട്ടുകളും, രംഗങ്ങൾക്ക് മാറ്റുകൂട്ടുന്ന പശ്ചാത്തല സംഗീതവും സമന്വയിപ്പിച്ചു മികച്ചൊരു എന്റർറ്റെയിനർ ഒരുക്കുന്നതിൽ നാദിർഷ വിജയിച്ചു. സസ്പെൻസ് നിറഞ്ഞ അന്തരീക്ഷത്തിൽ ആരംഭിച്ച കഥ ആദ്യപകുതിയുടെ അവസാനവും സസ്പെൻസ് നിലനിർത്തിക്കൊണ്ടു അവസാനിച്ചു. ഹാസ്യ രംഗങ്ങളും സെന്റിമെന്റ്സ് രംഗങ്ങളും കൃത്യമായ അളവിൽ ഉൾപ്പെടുത്തിയ സിനിമ ആസ്വാദ്യകരമാക്കിയത് സംവിധാന മികവുകൊണ്ട് മാത്രമാണ്. അമർ അക്ബർ അന്തോണി പോലെ ഒരു വലിയ വിജയമായില്ലെങ്കിലും ഈ ഋത്വിക് റോഷനെ പ്രേക്ഷകർ സ്വീകരിക്കുമെന്നുറപ്പ്!

സാങ്കേതികം: ⭐⭐⭐
ഷാംദത്ത് സൈനുദ്ധീൻ ഊഴത്തിനു ശേഷം ഛായാഗ്രഹണം നിർവഹിക്കുന്ന സിനിമയാണിത്. കട്ടപ്പനയുടെ ദൃശ്യചാരുത ഒപ്പിയെടുക്കുന്നതിനു പകരം കഥയ്ക്ക് ആവശ്യമായ രംഗങ്ങൾ റിയലിസ്റ്റിക്കായി ചിത്രീകരിക്കുവാൻ ശ്രമിച്ചത് സിനിമയ്ക്ക് ഗുണകരമായി. കളർഫുൾ ദൃശ്യങ്ങളടങ്ങുന്ന പാട്ടുകളുടെ ചിത്രീകരണവും മികവ് പുലർത്തി. സിനിമയുടെ ആരംഭം മുതൽ
ബിജിബാലിന്റെ പശ്ചാത്തല സംഗീതം ചിരിപടർത്തുന്നവയായിരുന്നു. നർമ്മ സംഭാഷണങ്ങളെക്കാൾ പ്രേക്ഷകരെ പല രംഗങ്ങളിലും പൊട്ടിചിരിപ്പിച്ചത് പശ്ചാത്തല സംഗീതം കേട്ടാണ്. മൂന്ന് പാട്ടുകളുള്ള ഈ സിനിമയിലെ അഴകേ എന്ന് തുടങ്ങുന്ന പാട്ടു മറ്റുള്ളവയെക്കാൾ മികവ് പുലർത്തി. സന്തോഷ് വർമ്മയും ഹരിനാരായണനും നാദിർഷയും എഴുതിയ വരികൾക്ക് നാദിർഷയാണ് സംഗീതം പകർന്നത്. ജോൺകുട്ടിയുടെ സന്നിവേശം ശരാശരിയിലൊതുങ്ങി. സിനിമയുടെ ആരംഭത്തിൽ ഓരോ കഥാപാത്രങ്ങളുടെയും സ്വഭാവങ്ങൾ എങ്ങനെയെന്നുള്ള വിശദീകരണം വലിച്ചുനീട്ടിയതുപോലെ തോന്നി. സിനിമാ മോഹിയായ അച്ഛന്റെ കഥയുടെ അവതരണം ഹാസ്യ രംഗങ്ങൾ ഉൾപെടുത്തണമെന്നുള്ള ഉദ്ദേശത്തോടെ മാത്രമാണ്. അഖി എൽസയുടെ വസ്ത്രാലങ്കാരം മികവ് പുലർത്തി.

അഭിനയം: ⭐⭐⭐⭐
എല്ലാ ഭാവാഭിനയ മുഹൂർത്തങ്ങളും ആദ്യ നായക കഥാപാത്രത്തിലൂടെ അഭിനയിക്കാനുള്ള അവസരം എല്ലാ നടന്മാർക്കും ലഭിക്കുന്ന ഭാഗ്യമല്ല. വിഷ്ണു ഉണ്ണികൃഷ്ണനെ സംബന്ധിച്ചിടത്തോളം ഹാസ്യവും സെന്റിമെൻറ്സും ഡാൻസും ആക്ഷനും ഇതിനു മുമ്പുള്ള സിനിമകളിൽ ചെയ്തിട്ടുള്ളതുകൊണ്ട് ഈ കഥാപാത്രം അവതരിപ്പിക്കുന്നതിൽ ബുദ്ധിമുട്ടനുഭവിച്ചിട്ടുണ്ടാകില്ല. ഇനിയും നായകനാകാനുള്ള ഭാഗ്യം ഈ കലാകാരന് ലഭിക്കട്ടെ എന്ന് ആശംസിക്കുന്നു. കിച്ചുവിന്റെ സന്തത സഹചാരിയായ ദാസപ്പൻ മികവോടെ അവതരിപ്പിച്ചു കയ്യടി നേടുവാൻ ധർമ്മജന് സാധിച്ചു. ഈ സിനിമയിലെ ഏറ്റവും മികച്ച പ്രകടനങ്ങളിൽ ഒരെണ്ണം ധർമ്മജന്റെതാണ്. സിദ്ദിക്കും തനിക്കു ലഭിച്ച വേഷം മികവോടെ അവതരിപ്പിച്ചു. മഹേഷിന്റെ പ്രതികാരത്തിലൂടെ മലയാള സിനിമയിലെത്തിയ ലിജോമോൾ കനി എന്ന നായിക കഥാപാത്രത്തെ ഭംഗിയാക്കി. പ്രയാഗ മാർട്ടിനും തന്റെ വേഷം തരക്കേടില്ലാതെ അവതരിപ്പിച്ചു. സലിം കുമാറിന്റെ അഭിനയം പല രംഗങ്ങളിലും അമിതാഭിനയമായി തോന്നി. ഇവരെ കൂടാതെ സിജു വിത്സൺ, രാഹുൽ മാധവ്, കലാഭവൻ ഷാജോൺ, കോട്ടയം നസീർ, ജോർജ്, കലാഭവൻ ഹനീഫ്, വിനോദ് കെടാമംഗലം, മജീദ്, ബാബു ജോസ്, ജാഫർ ഇടുക്കി, ബിബിൻ ജോർജ്, കോട്ടയം പ്രദീപ്, രമേശ് കുറുമശ്ശേരി, സമദ്, രാജേഷ്, മഹേഷ്, സീമ ജി.നായർ, സ്വസിക, നീന കുറുപ്പ്, താര കല്യാൺ, സേതുലക്ഷ്മി, അംബിക മോഹൻ എന്നിവരും ഈ സിനിമയിൽ ഓരോ കഥാപാത്രങ്ങളെ അവതരിപ്പിച്ചിരിക്കുന്നു.

വാൽക്കഷ്ണം: ചിരിപ്പിച്ച കരയിപ്പിച്ച ചിന്തിപ്പിച്ച ഋത്വിക് റോഷൻ ഇനിമുതൽ കേരളക്കരയുടെ സ്വന്തം.

സംഗീതം, സംവിധാനം: നാദിർഷ
നിർമ്മാണം: ദിലീപ്, ഡോ. സക്കറിയ തോമസ്
രചന: വിഷ്ണു ഉണ്ണികൃഷ്ണൻ, ബിബിൻ ജോർജ്
ഛായാഗ്രഹണം: ഷാംദത്ത് സൈനുദ്ധീൻ
ചിത്രസന്നിവേശം: ജോൺകുട്ടി
ഗാനരചന: സന്തോഷ് വർമ്മ, ഹരിനാരായണൻ, നാദിർഷ
പശ്ചാത്തല സംഗീതം: ബിജിബാൽ
കലാസംവിധാനം: ജോസഫ് നെല്ലിക്കൽ
ചമയം: പി.വി.ശങ്കർ
വസ്ത്രാലങ്കാരം: അഖി എൽസ
വിതരണം: നാഥ് ഗ്രൂപ് റിലീസ്.

കവി ഉദ്ദേശിച്ചത്? – ⭐⭐

വോളിബോളിന്റെ നാമത്തിൽ ഒരു പന്തയകഥ! – ⭐⭐

രമണിയേച്ചിയുടെ നാമത്തിൽ എന്ന ലഘു സിനിമയ്ക്ക് ശേഷം മുഖ്യധാര സിനിമയിലേക്ക് തോമസും ലിജു തോമസും അരങ്ങേറ്റം കുറിച്ചത് ചില ഉദ്ദേശങ്ങളോടെയാണ്. അത്തരത്തിലുള്ള ആദ്യ സംരംഭമാണ് കവി ഉദ്ദേശിച്ചത്. കവി ഉദ്ദേശിച്ചതതെന്താണെന്നു മനസ്സിലാക്കിയ ആസിഫ് അലിയും സജിൻ ജാഫറും അവരുടെ നിർമ്മാണ കമ്പിനിയായ ആദംസ് വേൾഡ് ഓഫ് ഇമാജിനേഷന്റെ പേരിൽ ഈ സിനിമ നിർമ്മിച്ചു.

അള്ളിമൂല എന്ന ഗ്രാമനിവാസികളുടെ പ്രിയപ്പെട്ട കായിക വിനോദമാണ് വോളിബോൾ. വോളിബോൾ വിനോദത്തിനു വേണ്ടി കുടുംബം വരെ പന്തയത്തിനു ഉപയോഗിക്കുന്നവരാണ് അള്ളിമൂലയിലെ കുടുംബങ്ങൾ. അവരിൽ പ്രമുഖരായ വട്ടത്തിൽ തറവാട്ടിലെ ബോസ്‌കോയും വോളിബോൾ പന്തയംവെച്ചു നടത്തുന്നതിൽ പിന്നോട്ടല്ല. വട്ടത്തിൽ ബോസ്‌കോയുടെ ആജന്മ ശത്രുവാണ് കാവാലം ജിമ്മി. ഗാങ്സ് ഓഫ് അള്ളിമൂല എന്ന വോളിബോൾ ടീമിന്റെ സാരഥിയാണ് കാവാലം ജിമ്മി. ജിമ്മിയും സുഹൃത്തുക്കളും വട്ടത്തിൽ ബോസ്‌കോയും സുഹൃത്തുക്കളും തമ്മിൽ കടുത്ത ശത്രുതയിലാണ്.

ഒരിക്കൽ, ഇവർ തമ്മിൽ വോളിബോൾ വിനോദത്തിനായി പന്തയംവെയ്ക്കുന്നു. ഗാങ്സ് ഓഫ് അള്ളിമൂല ടീമിന്റെ പരിശീലകനായി മിന്നൽ സൈമൺ വരുന്നതോടെ കഥ ഏറെ രസകരമാകുന്നു. കാവാലം ജിമ്മിയായി ആസിഫ് അലിയും, മിന്നൽ സൈമണായി ബിജു മേനോനും, വട്ടത്തിൽ ബോസ്‌കോയായി നരേനും അഭിനയിച്ചിരിക്കുന്നു.

സൈജു കുറുപ്പ്, ബാലു വർഗീസ്, ബിജു കുട്ടൻ, സുധി കോപ്പ, അഭിഷേക്, ഗണപതി, മനോജ് ഗിന്നസ്, പ്രദീപ് കോട്ടയം, ശശി കലിങ്ക, സുനിൽ സുഖദ, ബാലാജി, ദിനേശ് നായർ, പ്രശാന്ത് അലക്‌സാണ്ടർ, ആലപ്പി അഷ്‌റഫ്, കെ.ടി.സി.അബ്ദുള്ള, അഞ്ജു കുര്യൻ, സിജ റോസ്, ലെന, ബിന്ദു പണിക്കർ, ചിത്ര ഷേണായ്, വീണ നായർ എന്നിവരാണ് കവി ഉദ്ദേശിച്ചതിലെ മറ്റു പ്രധാന അഭിനേതാക്കൾ.

പ്രമേയം: ⭐⭐
ആജന്മ ശത്രുക്കളായ രണ്ടുപേർ അവരുടെ പ്രണയസാഫല്യത്തിനു വേണ്ടി വോളിബോൾ കായിക വിനോദത്തിന്റെ പേരിൽ പന്തയംവെച്ച് കലഹിക്കുന്നതാണ് കവി ഉദ്ദേശിച്ചത് എന്ന സിനിമയുടെ പ്രമേയം. തോമസും മാർട്ടിൻ ഡ്യൂറോയും ചേർന്നാണ് ഈ സിനിമയുടെ കഥ എഴുതിയത്. ഗ്രാമീണ പശ്ചാത്തലവും ഗൃഹാതുരതയും സൗഹൃദവും പ്രണയവും ബാല്യകാലസ്മരണകളും വോളിബോൾ കളിയുമെല്ലാം കോർത്തിണക്കിയതാണ് ഈ സിനിമയുടെ കഥ. കേട്ടുപഴകിയ പ്രമേയമാണെങ്കിലും വോളിബോൾ കായിക വിനോദം പശ്ചാത്തലമാക്കിയ അധികം സിനിമകളൊന്നും മലയാളത്തിലുണ്ടായിട്ടില്ല എന്നതാണ് ഏക പ്രത്യേകത.

തിരക്കഥ: ⭐⭐
ഗ്രാമീണ പശ്ചാത്തലത്തിൽ കഥ പറഞ്ഞിട്ടുള്ള മലയാള സിനിമകളിൽ കാലാകാലങ്ങളായി കണ്ടുവരുന്ന സ്ഥിരം കാഴ്ചകളായ ഒരുപറ്റം ചെറുപ്പക്കാരും അവരുടെ സൗഹൃദവും പ്രണയവും ശത്രുതയും കായിക വിനോദവും പന്തയംവെക്കലും നിസ്സഹായാവസ്ഥയും അടിപിടിയും എല്ലാമടങ്ങുന്നതാണ് ഈ സിനിമയുടെയും തിരക്കഥ. തോമസും മാർട്ടിൻ ഡ്യൂറോയും ചേർന്നാണ് ഈ സിനിമയുടെ തിരക്കഥയും സംഭാഷണങ്ങളും എഴുതിയത്. നവാഗതരായ ഇരുവരും രസകരമായ ഒരു സിനിമയ്ക്ക് യോജിച്ച തിരക്കഥ എഴുതണം
എന്ന ലക്ഷ്യം മനസ്സിൽവെച്ചുകൊണ്ടാണ് ഈ സിനിമയ്ക്കുവേണ്ടി തിരക്കഥ എഴുതിയത്. ഒരു രസകരമായ സിനിമയ്ക്കു വേണ്ടിയുള്ള എല്ലാ ചേരുവകളും കൃത്യമായി ഉൾപ്പെടുത്തിയാണ് പ്രേക്ഷകരെ മുഷിപ്പിക്കാതെ മുമ്പോട്ടു കൊണ്ടുപോയത്. കഥാസന്ദർഭങ്ങളും സംഭാഷണങ്ങളും കഥാഗതിയും എല്ലാം പ്രവചിക്കാനാവുന്നതായിരുന്നു എന്നതുതന്നെയാണ് ഈ സിനിമയുടെ പ്രധാന പോരായ്മകളിൽ ഒന്ന്. രമണിയേച്ചിയുടെ നാമത്തിൽ എന്ന ലഘു സിനിമ പോലെ, കവി ഉദ്ദേശിച്ചതിലും കഥാസന്ദർഭങ്ങളെക്കാൾ പ്രാധാന്യം അണിയറപ്രവർത്തകർ നൽകിയത് ആവിഷ്കാരത്തിനായിരുന്നു. ഒരല്പം ഭേദപെട്ട തിരക്കഥയായിരുന്നുവെങ്കിൽ മറ്റൊരു 1983 ആകുമായിരുന്നു ഈ സിനിമയും.

സംവിധാനം: ⭐⭐⭐
തോമസും ലിജു തോമസും ചേർന്നാണ് കവി ഉദ്ദേശിച്ചത് സംവിധാനം ചെയ്തത്. പ്രവചിക്കാനാവുന്ന കഥാസന്ദർഭങ്ങളിലെ ന്യൂനതകൾ രസകരമായ അവതരണ രീതികൊണ്ട് സവിശേഷമാക്കിയ കാഴ്ചയാണ് പ്രേക്ഷകർ കണ്ടത്. വോളിബോൾ കളിയെ ഇത്രയും വിശ്വസനീയതയോടെയും ത്രില്ലടിപ്പിക്കുന്ന രീതിയിലും അവതരിപ്പിച്ചതാണ് ഈ സിനിമയുടെ രക്ഷയായത്. കഥാപാത്രങ്ങൾക്ക് അനിയോജ്യരായ നടീനടന്മാരെ തിരഞ്ഞെടുക്കുന്നതിൽ പൂർണമായി വിജയിക്കുവാൻ സംവിധായകർക്ക് സാധിച്ചു. കണ്ടുമടുത്തതും കേട്ടപഴകിയതുമായ കഥാസന്ദർഭങ്ങളാൽ സമ്പന്നമാണ് ആദ്യപകുതിയെങ്കിലും, രണ്ടാമത്തെ പകുതീയുടെ അവസാന ഭാഗങ്ങൾ ഉദ്യോഗജനകമായി ചിത്രീകരിക്കുവാൻ ഇരുവർക്കും സാധിച്ചു. ഒരു ലഘു സിനിമയെടുത്തത് കണ്ടിഷ്ടപ്പെട്ട ആസിഫ് അലി ഈ സിനിമയുടെ സംവിധായകർക്ക് തുറന്നുകൊടുത്തത് സിനിമയിലേക്കുള്ള കവാടമാണ്. തോമസും ലിജുവും പോലെ അനേകായിരം സിനിമ പ്രേമികൾ ദിനംതോറും ലഘു സിനിമകൾ സംവിധാനം ചെയ്യുന്നുണ്ട്. അവർക്കും ഇത്തരത്തിലുള്ള ഒരു അവസരം നൽകാൻ ആസിഫ് അലിയെ പോലെ മറ്റാരെങ്കിലും കടന്നുവരട്ടെ.

സാങ്കേതികം: ⭐⭐⭐
കണ്ണൂർ ഇരുട്ടിയിലെ ഗ്രാമപ്രദേശമാണ് അള്ളിമൂലയാക്കി ചിത്രീകരിച്ചിരിച്ചത്. സ്ഥിരം കാഴ്ചകളിൽ നിന്നും പുതുമനൽക്കുന്ന ഒന്നും ഷെഹനാദ് ജലാൽ നിർവഹിച്ച ഛായാഗ്രഹണത്തിനില്ല. ആവേശഭരിതമായ ചടുലതയോടെ വോളിബോൾ കളി ചിത്രീകരിച്ചതാണ് ഛായാഗ്രഹണത്തിലുള്ള മേന്മ. സുനിൽ എസ്. പിള്ളയാണ് രംഗങ്ങൾ കോർത്തിണക്കിയത്. സിനിമയുടെ കഥ നിയന്ത്രിക്കുന്നതനിസരിച്ചു രംഗങ്ങൾ കൂട്ടിയോജിപ്പിച്ചു എന്നതുമാത്രമാണ് സുനിൽ ചെയ്തത്. വോളിബോൾ കളിയുടെ ചിത്രീകരണവും സന്നിവേശവും മികവുപുലർത്തി. ജെയ്ക്സ് ബിജോയ് ആണ് പശ്ചാത്തല സംഗീതം. ഉദ്യോഗജനകമായ കഥാസന്ദർഭങ്ങളിൽ പശ്ചാത്തല സംഗീതമുണ്ടായിരുന്നോ എന്നുപോലും പ്രേക്ഷകർ ഓർക്കുന്നില്ല. റഫീഖ് അഹമ്മദ് എഴുതിയ ഇന്നലെയും എന്ന പാട്ടിനു സംഗീതം നൽകിയത് വിനു തോമസാണ്. മൂന്ന് പാട്ടുകളുള്ള ഈ സിനിമയിൽ ഒരു പാട്ടിനു ജെയ്ക്സ് ബിജോയിയും സംഗീതം നൽകിയിട്ടുണ്ട്. വോളിബോൾ കളിയ്ക്കുള്ള സെറ്റുകൾ ഒരുക്കിയ നിമേഷ് താനൂർ അഭിനന്ദനം അർഹിക്കുന്നു. രമ്യ സുരേഷിന്റെ വസ്ത്രാലങ്കാരം കഥാപാത്രങ്ങൾക്ക് അനിയോജ്യമായിരുന്നു.

അഭിനയം: ⭐⭐⭐
ആസിഫ് അലിയും ബിജു മേനോനും അവരവരുടെ കഥാപാത്രങ്ങളെ രസകരമായ രീതിയിൽ അവതരിപ്പിച്ചു. ഉടായിപ്പു കഥാപാത്രങ്ങൾ അലസമായി അവതരിപ്പിക്കുവാൻ ബിജു മേനോനോളം കഴിവ് മറ്റാർക്കുമില്ല. നായിക വേഷത്തിലെത്തിയ അഞ്ജു കുര്യനും കിട്ടിയ കഥാപാത്രം മോശമാക്കിയില്ല. വട്ടത്തിൽ ബോസ്‌കോ എന്ന കഥാപാത്രമായി നരേനും വേഷമിട്ടു. ഒരല്പം അമിതാഭിനയം അവിടിവിടങ്ങളിലായി ഉണ്ടായിരുന്നോ എന്ന് തോന്നിപോകുന്നവിധമാണ് നരേൻ അഭിനയിച്ചത്. ബാലു വർഗീസും അഭിഷേകും സുധി കോപ്പയും ആസിഫ് അലിയ്ക്കു മികച്ച പിന്തുണ നൽകി. വില്ലൻ വേഷത്തിലെത്തിയ സൈജു കുറുപ്പും സുനിൽ സുഖദയും, അമ്മ വേഷത്തിലെത്തിയ ബിന്ദു പണിക്കരും സ്ഥിരം മാനറിസങ്ങൾ വീണ്ടും ആവർത്തിച്ചു. ഇതുവരെ ലഭിക്കാത്ത ഒരു വേഷമാണ് ലെന ഈ സിനിമയിൽ അവതരിപ്പിച്ചത്. അത് നല്ലരീതിയിൽ അവതരിപ്പിക്കുവാനും ലെനയ്ക്ക് കഴിഞ്ഞിട്ടുണ്ട്. ഇവരെക്കൂടാതെ ചെറുതും വലുതുമായി ഒട്ടനവധി കഥാപാത്രങ്ങൾ ഈ സിനിമയിലുണ്ട്.

വാൽക്കഷ്ണം: ഗൃഹാതുരതയും സൗഹൃദവും വോളിബോളും കോർത്തിണക്കിയ രസകരമായ സിനിമ!

സംവിധാനം: തോമസ്, ലിജു തോമസ്
നിർമ്മാണം: ആസിഫ് അലി, സജിൻ ജാഫർ
ബാനർ: ആദംസ് വേൾഡ് ഓഫ് ഇമാജിനേഷൻ
രചന: തോമസ്, മാർട്ടിൻ ഡ്യുറോ
ഛായാഗ്രഹണം: ഷെഹനാദ് ജലാൽ
ചിത്രസന്നിവേശം: സുനിൽ എസ്. പിള്ള
ഗാനരചന: റഫീഖ് അഹമ്മദ്, ജ്യോതിഷ് കാശി
സംഗീതം: ജെയ്ക്സ് ബിജോയ്, വിനു തോമസ്
പശ്ചാത്തല സംഗീതം: ജെയ്ക്സ് ബിജോയ്
കലാസംവിധാനം: നിമേഷ് താനൂർ
വസ്ത്രാലങ്കാരം: രമ്യ സുരേഷ്
ചമയം: അമൽ
സംഘട്ടനം: മാഫിയ ശശി
നൃത്തസംവിധാനം: ഷോബിൻ പോൾരാജ്
വിതരണം: ആദംസ് റിലീസ്.

തോപ്പിൽ ജോപ്പൻ – ⭐⭐


ആരാധകരെ 50% രസിപ്പിക്കും 50% വെറുപ്പിക്കും ജോപ്പൻ! – ⭐⭐

50% നൗഷാദ് ആലത്തൂരും 50% ജീവൻ നാസറും പണം ചിലവഴിച്ചു ഗ്രാന്റേ ഫിലിം കോർപറേഷന്റെയും എസ്.എൻ.ഗ്രൂപ്പിന്റെയും ബാനറിൽ നിർമ്മിച്ച തോപ്പിൽ ജോപ്പന്റെ മനസ്സിൽ 50% പ്രണയവും ശരീരത്തിൽ 50% മദ്യവും എന്ന അളവിലാണുള്ളത്. ഏറെ നാളുകൾക്കു ശേഷം ജോണി ആന്റണി സംവിധാനം ചെയ്ത ഈ സിനിമയിൽ നല്ല സിനിമകൾ ഇഷ്ടപ്പെടുന്നവരെ 50% ത്രിപ്ത്തിപെടുത്തുന്ന ഘടകങ്ങൾ പോലുമില്ല. നിഷാദ് കോയ എഴുതിയ തിരക്കഥയിൽ 50% രസിപ്പിക്കുന്ന ഫലിതങ്ങളും 50% വളിപ്പ് തമാശകളുമാണുള്ളത്.

പ്രമേയം:⭐
തോപ്പ്രംകുടിയിലെ തോപ്പിൽ തറവാട്ടിലെ അവിവിവാഹിതനായ തോപ്പിൽ ജോപ്പന്റെ പ്രണയവും പ്രണയനൈരാശ്യവും പ്രണയ സാഫല്യത്തിനായുള്ള കാത്തിരിപ്പും അതിനു വേണ്ടിയുള്ള പ്രയത്നങ്ങളുമാണ് ഈ സിനിമയുടെ പ്രമേയം. നിഷാദ് കോയയുടേതാണ് കഥ. കൗമാര പ്രായത്തിൽ ആദ്യനോട്ടത്തിൽ തന്നെ ജോപ്പന് പ്രണയം തോന്നിയ ആനി ഇന്ന് മറ്റൊരാളുടെ ഭാര്യയാണെന്ന ദുഃഖം താങ്ങാനാവാത്ത ജോപ്പൻ മുഴുകുടിയനായി മാറിയിരിക്കുന്നു. ഈ സാഹചര്യത്തിൽ ജോപ്പന്റെ ജീവിതത്തിൽ മരിയ എന്ന പെൺകുട്ടി കടന്നുവരുന്നു. തുടർന്നുണ്ടാകുന്ന സംഭവങ്ങളാണ് തോപ്പിൽ ജോപ്പന്റെ കഥ.

തിരക്കഥ: ⭐⭐
ഓർഡിനറി, മധുര നാരങ്ങ എന്നീ സിനിമകൾക്ക് ശേഷം നിഷാദ് കോയ രചന നിർവഹിക്കുന്ന തോപ്പിൽ ജോപ്പൻ ഒരു പ്രണയകഥയാണ്. സ്നേഹിച്ച പെൺകുട്ടിയെ നഷ്ടപ്പെട്ടതിന്റെ വേദനയിൽ കുടിയനായി നടക്കുന്ന ജോപ്പന്റെ ജീവിതത്തിൽ നടക്കുന്ന സംഭവങ്ങളാണ് ഈ സിനിമയുടെ കഥാസന്ദർഭങ്ങൾ. കബഡി കളിയിലൂടെ ആരംഭിക്കുന്ന കഥ ചെന്നെത്തുന്നത് കബഡി കളിയിലെ എതിർ ടീമിന്റെ ക്യാപ്‌റ്റനും ദുഷ്ടനുമായ പോലീസ് ഉദ്യോഗസ്ഥനുമായുള്ള സംഘട്ടനത്തിലാണ്. അവിടെന്നു പിന്നീട് മരിയ കഥാപാത്രവുമായുള്ള ജോപ്പന്റെ സൗഹൃദത്തിലാണ് കഥയുടെ സഞ്ചാരം. ഒടുവിൽ ആനി എന്ന ജോപ്പന്റെ കാമുകിയെ വീണ്ടും കണ്ടുമുട്ടുന്നു. അതിനിടയിൽ ധ്യാന കേന്ദ്രം, മരിയയുടെ ഒളിച്ചോട്ടം തുടങ്ങിയ കഥാസന്ദർഭങ്ങളും വന്നുപോകുന്നു. മേല്പറഞ്ഞതുപോലെ ഒരു അന്തവും കുന്തവുമില്ലാതെ ദിശയില്ലാതെ സഞ്ചരിക്കുന്ന പട്ടം പോലെയാണ് ഈ സിനിമയുടെ തിരക്കഥ രചന. പ്രവചിക്കാനാവുന്ന കഥാഗതിയും വളിപ്പ് തമാശകളും മാത്രമാണ് ഈ സിനിമയിലുടനീളമുള്ളത്. തോപ്പിൽ ജോപ്പന്റെ കഥാപാത്രരൂപീകരണം പോലും ഓരോസമയവും ഓരോ രീതിയിലാണ്. അലസമായ തിരക്കഥ രചന എന്നതാണ് ഒറ്റവാക്കിൽ പറയുവാനുള്ളത്.

സംവിധാനം: ⭐⭐
ജോണി ആന്റണി സിനിമകളുടെ സ്ഥിരം ചേരുവകളൊന്നും ഈ സിനിമയിലില്ല. റിയലിസ്റ്റിക് കഥാസന്ദർഭങ്ങളിലൂടെയാണ് കഥയുടെ അവതരണം. മമ്മൂട്ടി എന്ന അഭിനേതാവിനെയോ മമ്മൂട്ടി എന്ന താരത്തെയോ പൂർണ്ണതയോടെ അവതരിപ്പിക്കുവാൻ ജോണി ആന്റണിയ്ക്കു സാധിച്ചില്ല. മുൻകാല ജോണി ആന്റണി സിനിമകളായ തുറുപ്പുഗുലാനും പട്ടണത്തിൽ ഭൂതവും അപേക്ഷിച്ചു ഭേദമാണ് ഈ സിനിമ. ഒരു കോട്ടയം കുഞ്ഞച്ചനോ കുട്ടപ്പായിയോ പ്രതീക്ഷിച്ചു പോകുന്നവരെ നിരാശപ്പെടുത്തുന്ന അച്ചായൻ കഥാപാത്രമാണ് തോപ്പിൽ ജോപ്പൻ. മമ്മൂട്ടിയുടെ മഴയത്തുള്ള ഡാൻസും മമ്ത മോഹൻദാസുമായുള്ള ആ പാട്ടും ആരാധകരെ പോലും വെറുപ്പിച്ചു. പ്രവചിക്കാനാവുന്ന കഥാസന്ദർഭങ്ങൾ പതിഞ്ഞ താളത്തിൽ അവതരിപ്പിച്ചപ്പോൾ പ്രേക്ഷകർക്കു നന്നേ ബോറടിച്ചു. പ്രേക്ഷകരെ രണ്ടു മണിക്കൂർ പിടിച്ചിരുത്തുവാനുള്ള ഒരു പുതുമയും തോപ്പിൽ ജോപ്പനിലില്ല. മമ്മൂട്ടിയെ സ്നേഹിക്കുന്നവർക്ക് ഒരുവട്ടം കണ്ടിരിക്കാവുന്ന ഒരു സിനിമ എന്നതിലുപരി ഒരു സവിശേഷതകളുമില്ല.

സാങ്കേതികം: ⭐⭐⭐
സുനോജ് വേലായുധമാണ് ഈ സിനിമയുടെ ഛായാഗ്രഹണം. ഇടുക്കിയിലെ കണ്ടുമടുത്ത കാഴ്ചകൾക്ക് അപ്പുറം പുതുമകളൊന്നും ഛായാഗ്രഹണത്തിലില്ല. മഴ പെയ്യുന്ന ഫ്രയിമുകളെല്ലാം കൃത്രിമത്വം തോന്നിപ്പിക്കുന്ന രീതിയിലായതു വ്യക്തമായി മനസ്സിലാകും. പതിഞ്ഞ താളത്തിലാണ് രഞ്ജൻ എബ്രഹാം രംഗങ്ങൾ കോർത്തിണക്കിയിരിക്കുന്നത്. അത് തന്നെയാണ് ഈ സിനിമയുടെ പ്രധാന ന്യൂനതകളിൽ ഒന്ന്. കഥാസന്ദർഭങ്ങൾക്കു അനിയോജ്യമല്ലാത്ത പശ്ചാത്തല സംഗീതമാണ് വിദ്യാസാഗർ ഈ സിനിമയ്ക്ക് നൽകിയിരിക്കുന്നത്. അതുപോലെ പാട്ടുകളും നിലവാരം പുലർത്തിയില്ല. ഏലേലംകിടി എന്ന തുടങ്ങുന്ന പാട്ട് മാത്രമാണ് ഭേദമായി തോന്നിയത്. സാലു കെ.ജോർജിന്റെ കലാസംവിധാനം കഥാപശ്ചാത്തലത്തിനു യോജിച്ചതായിരുന്നു. സമീറ സനീഷിന്റെ വസ്ത്രാലങ്കാരത്തിൽ തോപ്പിൽ ജോപ്പൻ കൂടുതൽ സുന്ദരനായിരുന്നു.

അഭിനയം: ⭐⭐⭐
അച്ചായൻ കഥാപാത്രങ്ങളെ തനതായ ശൈലിയിൽ അവതരിപ്പിക്കുവാൻ മലയാള സിനിമയിലെ മഹാനടനുള്ള കഴിവ് പ്രേക്ഷകർ കണ്ടാസ്വദിച്ചതാണ്. കോട്ടയം കുഞ്ഞച്ചനും സംഘത്തിലെ കുട്ടപ്പായിയും അനശ്വരമാക്കിയ മമ്മൂട്ടിയുടെ വ്യത്യസ്ത അച്ചായൻ കഥാപാത്രമാണ് തോപ്പിൽ ജോപ്പൻ. മരിയ എന്ന കഥാപാത്രത്തെ മമ്ത മികച്ച രീതിയിൽ അവതരിപ്പിച്ചപ്പോൾ ആനിയായി ആൻഡ്രിയ നിരാശപ്പെടുത്തി. സോഹൻ സീനുലാലും സാജു നവോദയയും ഹാസ്യരംഗങ്ങളിൽ തിളങ്ങിയപ്പോൾ സലിംകുമാർ വെറുപ്പിക്കുന്ന രീതിയിൽ അഭിനയിച്ചു. മമ്മൂട്ടിയോടൊപ്പം സോഹൻ സീനുലാൽ, അലൻസിയാർ, സാജു നവോദയ, ശ്രീജിത്ത് രവി, ഹരിശ്രീ അശോകൻ, സലിംകുമാർ, രഞ്ജി പണിക്കർ, സുരേഷ് കൃഷ്ണ, സുധീർ, ജൂഡ് ആന്തണി ജോസഫ്, മേഘനാഥൻ, ലിഷോയ്, കലാഭവൻ ഹനീഫ്, മോഹൻജോസ്, ആൻഡ്രിയ ജെർമിയ, മമ്ത മോഹൻദാസ്, കവിയൂർ പൊന്നമ്മ, രശ്മി ബോബൻ, അക്ഷര കിഷോർ, ശാന്തകുമാരി എന്നിവരും പ്രധാന കഥാപാത്രങ്ങളെ അവതരിപ്പിച്ചിരിക്കുന്നു.

വാൽക്കഷ്ണം: മമ്മൂട്ടിയുടെ ആരാധകരെ മാത്രം രസിപ്പിക്കുന്ന സിനിമ!

സംവിധാനം: ജോണി ആന്റണി
രചന: നിഷാദ് കോയ
നിർമ്മാണം: നൗഷാദ് ആലത്തൂർ, ജീവൻ നാസർ
ബാനർ: ഗ്രാന്റേ ഫിലിം കോർപറേഷൻ, എസ്.എൻ.ഗ്രൂപ്പ്
ഛായാഗ്രഹണം: സുനോജ് വേലായുധം
ചിത്രസന്നിവേശം: രഞ്ജൻ എബ്രഹാം
സംഗീതം, പശ്ചാത്തല സംഗീതം: വിദ്യാസാഗർ
ഗാനരചന: റഫീഖ് അഹമ്മദ്, വയലാർ ശരത്ചന്ദ്ര വർമ്മ
കലാസംവിധാനം: സാലു കെ. ജോർജ്
വസ്ത്രാലങ്കാരം: സമീറ സനീഷ്
വിതരണം: ഗ്രാന്റേ ഫിലിം കോർപറേഷൻ.

ഒരു മുത്തശ്ശി ഗദ – ⭐⭐⭐

ഒരു മുത്തശ്ശി വീരഗാഥ! – ⭐⭐⭐

മുത്തശ്ശിമാരെ കുറിച്ചോർക്കുമ്പോൾ ആദ്യം ഓർമ്മയിൽ വരുന്നത് മൂന്ന് കാര്യങ്ങളാണ്. സ്നേഹത്തിന്റെ ഭാഷയിൽ മാത്രം സംസാരിക്കാനറിയുന്നവർ, സദാസമയം പ്രാർത്ഥനയുമായി ഒതുങ്ങിക്കൂടി ജീവിക്കുന്നവർ, വൈകുന്നേരങ്ങളിൽ ടെലിവിഷൻ സീരിയുലുകൾ മുടങ്ങാതെ കാണുന്നവർ. അവരിൽ നിന്നെല്ലാം വ്യതസ്ഥമായ സ്വഭാവമുള്ള ലീലാമ്മ എന്ന 65 വയസ്സുകാരി മുത്തശ്ശിയുടെ ജീവിതത്തിലെ വീരഗാഥയാണ് ജൂഡ് ആന്തണി ജോസെഫിന്റെ ഒരു മുത്തശ്ശി ഗദ.

ഇ ഫോർ എന്റർറ്റെയിൻമെൻസ്റ്റിനു വേണ്ടി മുകേഷ് ആർ.മേത്തയും എ.വി.എ.യ്ക്ക് വേണ്ടി എ.വി.അനൂപും സംയുകതമായി നിർമ്മിച്ച ഒരു മുത്തശ്ശി ഗദയിൽ പുതുമുഖം രജിനി ചാണ്ടി കേന്ദ്രകഥാപാത്രമായ ലീലാമ്മയെ അവതരിപ്പിച്ചിരിക്കുന്നു.

പ്രമേയം: ⭐⭐⭐
വാർദ്ധക്യമായാൽ നാലു ചുമരുകൾക്കുള്ളിൽ തളച്ചിടേണ്ടവരല്ല നമ്മളുടെ മാതാപിതാക്കൾ എന്ന് മക്കളെ ഓർമ്മിപ്പിക്കുന്ന സിനിമയാണ് ഒരു മുത്തശ്ശി ഗദ. അതുപോലെ, മക്കളുടെ നന്മയ്ക്കു വേണ്ടി പ്രാർത്ഥിച്ചു ശിഷ്ടകാലം ജീവിച്ചു തീർക്കേണ്ടവരല്ല നമ്മൾ എന്ന് സ്വയം തിരിച്ചറിയണം എന്ന് പ്രായമുള്ളവരെയും ഓർമ്മപ്പെടുത്തുന്ന പ്രമേയവും കഥയുമാണ് ഈ സിനിമയുടെത്. ശൈശവത്തിലും കൗമാരത്തിലും യൗവനത്തിലും നമ്മൾക്ക് ആഗ്രഹമുള്ള പോലെ വാർദ്ധക്യത്തിലും ഓരോരോ ആഗ്രഹങ്ങളും സ്വപ്നങ്ങളും ഉണ്ടാകുന്നു. ഒരുപക്ഷെ ഒരാളുടെ ശൈശവത്തിലോ കൗമാരത്തിലോ യൗവനത്തിലോ നടക്കാതെ പോയ ഒരു സ്വപ്നമായിരിക്കാം. അങ്ങനെ നടക്കാതെപോയ ആഗ്രഹങ്ങൾ സഫലീകരിക്കുവാൻ വാർദ്ധക്യത്തിലും സാധിക്കണം എന്നതാണ് ഈ സിനിമയിലൂടെ പ്രേക്ഷകരിലേക്ക് എത്തുന്ന സന്ദേശം. അത്തരത്തിലുള്ള കുറെ ആഗ്രഹങ്ങൾ നടപ്പിലാക്കാൻ പുറപ്പെട്ടിറങ്ങുന്ന ലീലാമ്മയുടെ കഥയാണ് ഒരു മുത്തശ്ശി ഗദ. നിവിൻ പോളിയുടേതാണ് ഈ സിനിമയുടെ കഥാതന്തു.

തിരക്കഥ: ⭐⭐⭐
ലീലാമ്മയുടെ കുടുംബത്തിൽ മകൻ സിബിയും ഭാര്യയും രണ്ടു മക്കളുമാണുള്ളത്. മകനെ വരച്ചവരയിൽ നിർത്തുന്ന ലീലാമ്മയ്ക്കു മരുമകളെ കാണുന്നതുപോലും ദേഷ്യമാണ്. മകന്റെ സുഹൃത്തുക്കൾ അത്താഴത്തിനു വീട്ടിൽ വരുന്നതും, കൊച്ചുമകളുടെ ആൺ സുഹൃത്തുക്കൾ വീട്ടിൽ വരുന്നതും, കൊച്ചുമകൻ സദാസമയം ഗെയിം കളിക്കുന്നതും, ജോലിക്കാരികൾ ഉഴപ്പി പണിയെടുക്കുന്നതും ഇഷ്ടമല്ലാത്ത ലീലാമ്മയുടെ കഥാപാത്രാവിവരണമാണ് ഈ സിനിമയുടെ ആദ്യപകുതി. ഇത്തരത്തിലൊക്കെ ഒരാൾ വീട്ടിൽ വരുന്ന അതിഥികളോട് പെരുമാറുമോ എന്നതിന് ന്യായീകരണങ്ങൾ സിനിമയുടെ രണ്ടാം പകുതിയിൽ പരാമർശിക്കുന്നുണ്ട്. ലീലാമ്മയുടെ ആഗ്രഹങ്ങൾ ഓരോന്നായി നടപ്പിലാക്കുന്നതാണ് രണ്ടാം പകുതി. കുറെ അപ്രതീക്ഷിത വഴിത്തിരിവുകളിലൂടെ പ്രേക്ഷകരെ ഒന്നടങ്കം രസിപ്പിച്ചു അവസാനിക്കുന്ന ക്ലൈമാക്സും. ഏച്ചുകെട്ടലുകളില്ലാതെ എഴുതിയിരിക്കുന്ന കഥാസന്ദർഭങ്ങളും ചിരിപ്പിക്കുന്ന സംഭാഷണങ്ങളുമാണ് തിരക്കഥയുടെ സവിശേഷത. ഒരൊറ്റ ദ്വയാർത്ഥ പ്രയോഗം പോലുമില്ലാതെ പ്രേക്ഷകരെ ചിരിപ്പിച്ച ജൂഡ് ആന്തണി ജോസഫിന് അഭിനന്ദനങ്ങൾ! ആദ്യ പകുതിയിലേക്കാൾ മികവു പുലർത്തിയത് രണ്ടാം പകുതിയിലെ രംഗങ്ങളാണ്. ക്ലൈമാക്സിൽ നല്ലൊരു സന്ദേശത്തോടെ സിനിമ അവസാനിക്കുന്നു.

സംവിധാനം: ⭐⭐⭐⭐
ഓം ശാന്തി ഓശാനയ്ക്ക് ശേഷം ജൂഡ് ആന്തണി ജോസഫ്‌ സംവിധാനം നിർവഹിച്ച ഒരു മുത്തശ്ശി ഗദ ഈ വർഷത്തെ ഏറ്റവും മികച്ച എന്റർറ്റെയിനറാണ്. പുതുമയുള്ള അവതരണ രീതിയാണ് ഈ സിനിമയുടെ പ്രത്യേകത. കഥാപാത്രങ്ങൾക്ക് അനിയോജ്യരായ നടീനടമാരെ കണ്ടെത്തുക, മുഷിപ്പിക്കാതെ കഥ അവതരിപ്പിക്കുക, കൃത്യമായ ഇടവേളകളിൽ വഴിത്തിരിവുകൾ കൊണ്ടുവരിക, അനാവശ്യമായ പാട്ടുകൾ ഉൾപെടുത്താതിരിക്കുക, കൃത്രിമത്വമായ സെന്റിമെന്റ്സ് രംഗങ്ങൾ ഒഴിവാക്കുക എന്നതെല്ലാമാണ് ജൂഡ് ആന്തണി ജോസഫിന്റെ സംവിധാന മികവായി പറയേണ്ട പ്രശംസിക്കേണ്ട കാര്യങ്ങൾ. വിനോദ് ഇല്ലംപിള്ളിയുടെ ഛായാഗ്രഹണവും ഷാൻ റഹ്മാന്റെ പശ്ചാത്തല സംഗീതവും ലിജോ പോളിന്റെ ചിത്രസന്നിവേശവും മികച്ചൊരു എന്റർറ്റെയിനർ ഒരുക്കുന്നതിൽ ജൂഡ് ആന്തണി ജോസഫിനെ സഹായിച്ചിട്ടുണ്ട്. ഈ വർഷത്തെ ഓണം ബമ്പർ ഈ വെടക്കു മുത്തശ്ശി കൊണ്ടുപോകുമെന്ന് ഏകദേശം ഉറപ്പാണ്!

സാങ്കേതികം: ⭐⭐⭐⭐
വിനോദ് ഇല്ലംപിള്ളിയുടെ കളർഫുൾ വിഷ്വൽസ് മികച്ചൊരു എന്റർറ്റെയിനർ ഒരുക്കുവാൻ സംവിധായകനെ സഹായിച്ചിട്ടുണ്ട്. പ്രത്യേകിച്ച് മുന്നാറിൽ ചിത്രീകരിച്ച രംഗങ്ങൾ വളരെയധികം മനോഹരമായിരുന്നു. ആദ്യാവസാനമുള്ള രംഗങ്ങളെല്ലാം ചടുലതയോടെ കോർത്തിണക്കുവാൻ ലിജോ പോളിനും സാധിച്ചു. ഷാൻ റഹ്മാന്റെ പശ്ചാത്തല സംഗീതവും സിനിമയുടെ സ്വഭാവത്തിന് ഇണങ്ങുന്നവയായിരുന്നു. ഷാൻ റഹ്മാൻ ഈണമിട്ട തെന്നൽ നിലാവിന്റെ എന്ന പട്ടു ശ്രവ്യസുന്ദരമായിരുന്നു. വിനീത് ശ്രീനിവാസനും അപർണ്ണ ബലമുരളിയും ചേർന്നാണ് ആ ഗാനം ആലപ്പിച്ചതും ആ ഗാനരംഗത്തിൽ അഭിനയിച്ചതും. സുനിൽ ലാവണ്യയുടെ കലാസംവിധാനവും റോണക്സ്‌ സേവ്യറുടെ ചമയവും സമീറ സനീഷിന്റെ വസ്ത്രലാകാരവും മികവു പുലർത്തി.

അഭിനയം: ⭐⭐⭐
രജനി ചാണ്ടി തന്മയത്വത്തോടെ ലീലാമ്മയെ അവതരിപ്പിച്ചിരിക്കുന്നു. പല രംഗങ്ങളിലും അമിതാഭിനയം എന്ന് തോന്നുന്നുണ്ടെങ്കിലും ആ കഥാപാത്രത്തിന്റെ സ്വഭാവമനുസരിച്ചു അത് ആവശ്യമായിരുന്നു. സിബി എന്ന മകന്റെ കഥാപാത്രത്തെ സുരാജ് നന്നായി അവതരിപ്പിച്ചു. രസകരമായ ഒരു കഥാപാത്രത്തെ ജൂഡ് ആന്തണിയും പ്രേക്ഷകരെ ചിരിപ്പിച്ചുകൊണ്ടു അവതരിപ്പിച്ചു. ഡബ്ബിംഗ് ആർട്ടിസ്റ്റ് ഭാഗ്യലക്ഷ്മി, ലെന, വിജയരാഘവൻ, അപർണ്ണ ബാലമുരളി, രാജീവ്‌ പിള്ള, രമേശ്‌ പിഷാരടി എന്നിവരും അതിഥി വേഷത്തിൽ ശ്രീനിവാസനും വിനീത് ശ്രീനിവാസനും രൺജി പണിക്കരും സംവിധായകൻ ലാൽ ജോസും ഈ സിനിമയിൽ അഭിനയിച്ചിരിക്കുന്നു.

വാൽക്കഷ്ണം: മാതാപിതാക്കളോടൊപ്പം ഓരോ കുടുംബവും തീർച്ചയായും കണ്ടിരിക്കേണ്ട ഒരു മുത്തശ്ശി വീരഗാഥ!

രചന, സംവിധാനം: ജൂഡ് ആന്തണി ജോസഫ്‌
കഥാതന്തു: നിവിൻ പോളി
നിർമ്മാണം: മുകേഷ് ആർ.മേത്ത, എ.വി.അനൂപ്‌
ബാനർ: ഈ ഫോർ എന്റർറ്റെയിന്മെന്റ്സ്, എ.വി.എ.പ്രൊഡക്ഷൻസ്
ചായാഗ്രഹണം: വിനോദ് ഇല്ലംപിള്ളി
ചിത്രസന്നിവേശം: ലിജോ പോൾ
സംഗീതം: ഷാൻ റഹ്മാൻ
കലാസംവിധാനം: സുനിൽ ലാവണ്യ
ചമയം: റോണക്സ്‌ സേവ്യർ
വസ്ത്രാലങ്കാരം: സമീറ സനീഷ്
വിതരണം: ഈ ഫോർ എന്റർറ്റെയിന്മെന്റ്സ്.